1. Ino benankashi balasebensa ncito nshi mulibunga, sombi ino ngamapensho nshi baanji ngobeendaamo? (Amubone cikope cili pa peeji yakutaanguna.)

TULIKONDETWE abuumbi kuba abenankashi baanji mulibungano basebensa cankusu! Kucakubonenaako, balaabanamo lubasu ndyetuli kumabungano alimwi amuncito yakushimikila. Bamwi balacafwilisha mukubamba Ŋanda ya Bwaami alimwi akutondesha ayi balabikila maano kubamakwesu abenankashi. Nacibi boobo, cimwi ciindi baleenda mumapensho. Bamwi balalama bashali babo bacembele. Bamwi balapikishikwa kubeshikamukowa. Alimwi bamwi balibo beenka mbuli mushali, aboobo balasebensa cankusu kwaamba ayi bacanine mukwashi shitoyandika.

2. Ino nceebonshi tulyeelete kucafwa benankashi?

² Ino nceebonshi tulyeelete kubikila maano kukucafwa benankashi? Mukwiinga liinji mucishi banakashi tabapekwi bulemu mbobayandika. Kwiilikaawo, Baibo ilatuyuminisha ayi tulyeelete kubacafwa. Kucakubonenaako, Paulo wakalwiita libungano lyaku bene Loma ayi bamutambule kabotu Febi akumucafwa mushintu shoonse shiyandika. (Loma. 16:1, 2) Ndyaakalinga mu Falisi, Paulo wakalinga pakati kabaabo batakalinga kulemeka banakashi. Ano ndyaakaba Mwineklistu, wakatalika kukonkela cakubonenaako cakwe Yesu, aboobo wakalinga kulemeka banakashi akubanyumfwila nkumbu.​—1 Koli. 11:1.

3. Ino Yesu wakalinga kubabona buyani banakashi boonse, kwiilikaawo abaabo bakalinga kucita kuyanda kwa Baishi?

³ Yesu wakalinga kulemeka banakashi. (Joni 4:27) Taakalinga kubabona munshila yatakalinga kabotu mbuli bwakalinga kucita bamatanjilili babupailishi baba Juda paciindi cilya. Nceceeco libuku limwi lyaamba pamakani amu Baibo lyakaamba ayi: “Yesu taakwe kwaambawo maswi akalinga kutondesha ayi taacitewo bulemu kubanakashi.” Wakalinga kubalemeka abuumbi abo bakalinga kucita kuyanda kwa Baishi. Ncakutatoonsha kwaamba ayi Yesu wakalinga kubona banakashi mbuli benankashi shakwe, alimwi pabantu mbwaakalinga kubona anga ndubasu lwa mukwashi wakwe wakumushimu, abanakashi bakalingaawo.​—Mate. 12:50.

4. Ino tutokwiiya nshi mumutwi uyu?

 ⁴ Yesu wakalinga kulibambite lyoonse kucafwa benankashi shakwe bakumushimu. Wakalinga kucita shintu shakalinga kutondesha ayi alababona ayi balayandika alimwi wakalinga kubeemikaninaako. Amuleke tubandike mbweenga twatondesha ayi tulabikila maano kubenankashi kwiinda mukukonkela cakubonenaako cakwe Yesu.

5. Ino nciinshi cipa kwaamba ayi benankashi bamwi baalilwe kufwakasha pomwi abamakwesu abenankashi?

⁵ Soonsebo, bamakwesu na benankashi, tulayandika kuba pomwi abeshicibusa bali kabotu. Nacibi boobo, cimwi ciindi ici inga caba ciyumu kubenankashi. Ino nceebonshi? Amunyumfwe shitokonkelaawo shakaamba benankashi bamwi. Nankashi umwi waliina lya Jordan * wakaamba ayi: “Mukwiinga nshibete mucikwati, liinji ndanyumfwa anga nshiciteewo ncito mulibungano alimwi ndabona anga taakuwo lubasu ndooncite.” Nankashi Kristen, painiya wakalongela kumusena kumwi kwaamba ayi anoocita shiinji muncito yakushimikila wakaamba ayi: “Kulaba kulinyumfwa kuba weenka na walongela kulibungano lya kumwi.” Cimwi ciindi bamakwesu bamwi abalo mbobalinyumfwa. Abo bekala mumukwashi uteshi wa Bakamboni inga cabayumina kulinyumfwa kuba pafwiifwi abamumukwashi wabo alimwi akubamakwesu abenankashi bamulibungano. Benankashi baalilwa kweenda ceebo cakuciswa na kulama umwi utoociswa mumukwashi, inga balinyumfwa kuba beenka. Nankashi Annette wakaamba ayi: “Ndakalinga kwaalilwa kuya mukufwakasha na bamakwesu abenankashi banjita, mukwiinga ndime ndakalinga kulama bama.”

6. Kweelana a Luka 10:38-42, ino Yesu wakacafwa buyani Malita a Maliya?

⁶ Yesu wakalinga kucana ciindi cakuba pomwi abenankashi shakwe bakumushimu, alimwi wakalinga shicibusa wabo wancine. Amuyeeye Yesu mbwaakalinga kunyumfwana a Maliya alimwi a Malita batakalinga kweebetwe. (Amubelenge Luka 10:38-42.) Cilyeelete kwaamba ayi wakalinga kwaamba akucita shintu shakalinga kupa kwaamba ayi babe baangulukite kuli nguwe. Kucakubonenaako, Maliya taakwe kuloonda kukala pafwiifwi a Yesu mbuli shikwiiya wakwe. * Alimwi Malita ndyaakakalala ceebo cakwaamba ayi Maliya taakwe kumucafwa ndyaakalinga kubamba cakulya, taakwe kuloonda kulwiita Yesu nshaakalinga kuyeeya. Paciindi cilya, Yesu wakaiisha Maliya a Malita shiiyo shiyandika abuumbi. Alimwi kwiinda mukufwakasha kwakwe paciindi cilya wakatondesha ayi wakalinga kubabikila maano boonse pomwi amukwabo Lasalo. (Joni 12:1-3) Aboobo Lasalo ndyaakaciswa, Maliya a Malita bakalinga kucishi ayi inga basenga lucafwo kuli Yesu.​—Joni 11:3, 5.

7. Ino nciinshi nceenga twaciita kwaamba ayi tuyuminishe benankashi?

⁷ Kubenankashi bamwi, kucanika kumabungano ncecoolwe ceenkabo ncobacite cakuba pomwi abashominyinaabo. Aboobo tulyeelete kushinisha kwaamba ayi twabatambula kabotu, kubandikaabo, akubatondesha kwaamba ayi tulababikila maano abuumbi. Nankashi Jordan ngotwalinga twaambawo, wakaamba ayi: “Ndayuminishikwa abuumbi na bamwi bandumba ceebo cakukumbulawo kumabungano, bandwiita kusebensaabo muncito yakushimikila na kucita shimwi shitondesha ayi balambikilako maano.” Tulyeelete kucita shintu shitondesha benankashi kwaamba ayi balayandika. Nankashi waliina lya Kia wakaamba ayi: “Na nshikwe kucanika kumabungano, ndashiba kwaamba ayi bamakwesu abenankashi batootuma kwaamba ayi banjipushe na ndibo kabotu. Ici cilampa kushiba kwaamba ayi bamakwesu abenankashi balambikilako maano.”

8. Ino cakubonenaako cakwe Yesu inga twacikonkela buyani?

⁸ Bweenka mbuli Yesu, inga tweelesha kucana ciindi cakuba pomwi abenankashi. Mpashi inga twabeetako kucakulya na kuyaabo mukufwakasha. Na  twacita boobo, tulyeelete kushinisha kwaamba ayi tutobandika makani eenga abayuminisha. (Loma. 1:11, 12) Bamanene balyeelete kubona shintu bweenka mbuli Yesu mbwaakalinga kucita. Wakalinga kucishi kwaamba ayi kutaba mucikwati teshi cintu cuubu kubamwi, nacibi boobo, wakaamba cakuteenda mweela ayi kuba mucikwati akuba abaana teshi ncecintu ceenga capa muntu kucana lusangalalo lutamaani. (Luka 11:27, 28) Sombi inga twacanabo lusangalalo lutamaani na katubikila maano abuumbi kukusebensela Yehova.​—Mate. 19:12.

9. Ino bamanene inga bacita buyani kwaamba ayi bacafwe benankashi?

⁹ Bamanene mbobeelete kweelesha bunene kunoobona benankashi mbuli bashali babo banakashi na benankashi shabo. (1 Timo. 5:1, 2) Bamanene balyeelete kucana ciindi cakubandika abenankashi kubungana kakutana kutalika na pesule lyakubungana. Nankashi Kristen wakaamba ayi: “Munene umwi mulibungano ndyaakabona ayi ndakalinga kucite shiinji shakucita, wakanjipusha ncocibetele boobo. Ndakalumba abuumbi kwaamba ayi wakatondesha kubikila maano.” Na lyoonse bamanene kabeelesha kubandika abenankashi shabo bakumushimu, balatondesha ayi ncakwiila mbantu babikila maano. * Nankashi Annette ngotwaambawo kale wakaamba bubotu bwakubandika abamanene lyoonse. Wakaamba ayi: “Cilancafwa kubashiba kabotu, alimwi abalo balanshiba kabotu. Aboobo na kuli lipenshi  ndyentookwindaamo, cilaba cuubu kusenga lucafwo.”

10. Ino nciinshi ceenga cacafwa benankashi kutolelela kuba alusangalalo?

¹⁰ Soonsebo, basankwa na banakashi, tulanyumfwa kabotu na bamwi batulumba pancito nshetucita. Ano na bantu tabatootulumba pashintu nshetucita, inga twalefuka. Nankashi waliina lya Abigail painiya uteebetwe, wakaamba ayi cimwi ciindi alabona anga bamakwesu abenankashi tabamubikiliko maano. Wakaamba ayi: “Bantu balishibo banike bangu, bamanene bangu, alimwi abashali bangu, sombi nebo tabanshiiwo. Cimwi ciindi ndalinyumfwa anga taakuwo umbikilako maano.” Ano amunyumfwe shakaamba nankashi waliina lya Pam. Nankashi uyu taabete mucikwati, alimwi wakasebensa mbuli mishonali kwa myaaka iinji. Mukuya kwaciindi, wakaboolela kumishaabo mukulama bashali bakwe. Pacecino ciindi nankashi Pam alicite myaaka yamuma 70, alimwi watolelela kusebensa mbuli painiya. Wakaamba ayi: “Cinene cakapa kwaamba ayi ntolelele kusebensa bupainiya, nceebo cakwaamba ayi bamakwesu bakalinga kundumba pancito njoonsebensa.”

11. Ino Yesu wakatondesha buyani kulumba kubanakashi bakalinga kumucafwa muncito yakwe?

¹¹ Yesu wakabalumba abuumbi benankashi bakalinga kumucafwa kwiinda “mukusebensesha shintu shabo.” (Luka 8:1-3) Taakwe kweelabo pakubapa coolwe cakumucafwa, sombi wakabayiisha ashiiyo shiyandika pamakani akuyanda kwakwe Lesa. Kucakubonenaako, wakabalwiita ayi alaakufwa alimwi akubushikwa. (Luka 24:5-8) Wakacafwa banakashi aba bweenka mbuli mbwakacafwa batumwi bakwe, kwaamba ayi bacikoonshe kuliyumya mumapensho akalinga kusa kunembo. (Maako 9:30-32; 10:32-34) Alimwi nabi kwaamba ayi batumwi bakwe bakacica Yesu ndyaakacatwa, banakashi bamwi pabaabo bakalinga kumucafwa bakalinga pafwiifwi anguwe ndyaakalinga kufwa pacisamu cakupenshesha.​—Mate. 26:56; Maako 15:40, 41.

12. Ino Yesu wakabapa ncito nshi banakashi?

¹² Yesu wakapa banakashi incito iyandika. Kucakubonenaako, banakashi balemeka Lesa mbobakalinga bakutaanguna kushiba ayi Yesu wabushikwa. Alimwi mbwaakatuma kuya mukulwiita batumwi bakwe kwaamba ayi wabushikwa kuswa kubafu. (Mate. 28:5, 9, 10) Alimwi cilyeelete kwaamba ayi banakashi abalo bakalingaawo pabushiku bwa Pentekositi yamu 33 C.E. bashikwiiya bakwe Yesu ndyebakananikwa amushimu usalashi. Alimwi na bakalingaako, nkokwaamba ayi abalo bakapekwa nkusu shakwaamba kubantu bamwi mumishobo ipusenepusene “pashintu shinene isho Lesa nshaakacita.”​—Milimo 1:14; 2:2-4, 11.

13. Ino benankashi balasebensa ncito nshi, alimwi ino inga twatondesha buyani ayi tulalumba?

¹³ Benankashi balayandika kulumbwa pancito shoonse nshobasebensa muncito yakwe Yehova. Incito nshobasebensa shileelikaawo kuyaka alimwi akubamba, kucafwilisha mutukoto twaamba mushobo umwi, alimwi akulyaaba kusebensela pa Bethel. Balacafwilisha muncito yakupa lucafwo na kwacitika mapensho anene, kucafwilisha muncito yakusansulula mabuku esu, kusebensa mbuli bapainiya alimwi abamishonali. Alimwi bweenka mbuli bamakwesu, benankashi abalo baleetwa kucikolo ca bapainiya, ca Bashimikila sha Bwaami, alimwi acikolo ca Gilyadi. Kwiilikaawo, benankashi beebetwe balacafwa beebaabo kwaamba ayi bacikoonshe kusebensa kabotu mikuli inene ya mulibungano alimwi amulibunga. Bamakwesu aba ‘nshipo kubantu’ alimwi balacita shiinji kwaamba ayi bacafwe bamwi, nacibi boobo, inga caba ciyumu kukumanisha mikuli yabo kwakubula lucafwo lwa bakaabo. (Efe. 4:8) Sa kuli nshemutoobona ayi inga mwaciita kwaamba ayi mucafwe benankashi aba muncito njobasebensa?

14. Kweelana a Kulumbaisha 68:11, ino bamanene basongo balacita buyani?

¹⁴ Bamanene basongo balanyumfwisha kwaamba ayi benankashi “ndikoto linene” lyabasebenshi bakalyaaba alimwi liinji balacita kabotu abuumbi muncito yakushimikila makani abotu. (Amubelenge Kulumbaisha 68:11.) Aboobo nobamanene amubone nsheenga mweeya kuswa kubenankashi.  Nankashi Abigail ngotwalinga twaambawo, alayuminishikwa na bamakwesu bamwiipusha shimucafwa kushimikila kabotu kumusena nkwaashimikila. Wakaamba ayi: “Ici cilampa kunoobona kwaamba ayi anu Yehova wakampa ncito iyandika mulibungano lyakwe.” Kwiilikaawo, bamanene balishi kwaamba ayi benankashi bacinene bashomeka mbobacishi kabotu abuumbi kucafwa benankashi bacanike kushiba mbweenga bacita na bacana mapensho. (Taitasi 2:3-5) Ncakutatoonsha kwaamba ayi tulyeelete kubalumba benankashi akutondesha ayi tulibasuni!

15. Ino ndilili ndyeenga benankashi bayandika wakubeemikaninaako?

¹⁵ Cimwi ciindi, benankashi balayandika wakubeemikaninaako mumapensho amwi. (Isa. 1:17) Kucakubonenaako, nankashi wakafwitwa na wakalekana abeebaye inga wayandika wakumwimikaninaako akumucafwa ncito shimwi shakalinga kucitwa abeebaye. Nankashi wacinene inga wayandika wakumwimikaninaako kuma dokota. Nankashi usebensako ncito shimwi sha mulibunga lyakwe Lesa inga wayandika wakumwimikaninaako na bamwi batokwaamba shitabete kabotu pali nguwe ceebo cakutasebensa ciindi cikwene muncito yakushimikila mbuli painiya. Ino nshiinshi shimwi nsheenga twaciita kwaamba ayi tucafwe benankashi? Amuleke tubandike ashimwi nsheenga tweeya kucakubonenaako cakwe Yesu.

16. Kweelana a Maako 14:3-9, ino Yesu wakamwimikaninaako buyani Maliya?

¹⁶ Yesu wakalinga kufwambaana kwimikaninaako benankashi shakwe bakumushimu na kuli bamwi batana kubanyumfwishisha. Kucakubonenaako, wakeemikaninako Maliya, Malita ndyaakaalilwa kumunyumfwishisha. (Luka 10:38-42) Alimwi wakeemikaninako Maliya linkanda lyabili bamwi ndyebakalinga kwaamba shitabete kabotu ceebo cakuyeeya ayi taakwe kusala kabotu. (Amubelenge Maako 14:3-9.) Yesu wakanyumfwisha cakapa Maliya kucita nshaakacita, aboobo wakamulumba akwaamba ayi: “Wancitila cintu cibotu abuumbi. . . . Wacita cibotu ncaakonsha kucita.” Alimwi Yesu wakaamba abushinshimi ayi “kuli koonse bantu nkweshi bakanooshimikila makani abotu mucishi coonse,” nshaakacita balaakunooshaambawo, bweenka mbuli mbotutokwaambawo mumutwi uyu. Cilasangalasha kushiba kwaamba ayi Yesu wakaamba ayi makani abotu alaakushimikilwa cishi coonse, ciindi ndyaakalinga kulumba Maliya. Cilyeelete kwaamba ayi Maliya wakayuminishikwa abuumbi amaswi akaamba Yesu bamwi ndyebakaalilwa kunyumfwishisha ncaakacita!

17. Amwaambe bukaalo ndyeenga twayandika kwimikaninako nankashi.

¹⁷ Sa amwebo mulabeemikaninaako benankashi na kaciyandika kucita boobo? Kucakubonenaako, amuyeeye bukaalo butokonkelaawo. Nankashi weebetwe kumusankwa uteshi Kamboni alacelwa lyoonse kumabungano alimwi alaya kuŋanda na mabungano amanabo. Liinji tesiiwo abaana kumabungano. Aboobo beshikushimikila bamwi batalika kwaamba shitabete kabotu ceebo cakuyeeya ayi atokwaalila kulwiita beebaye ayi alyeelete kusa abaana kumabungano. Nacibi boobo, ncobatacishi ncakwaamba ayi nankashi atokweelesha kucita nsheenga wacikonsha. Taakuwo nsheenga wacita kwaamba ayi aalule mulongo washintu nshaacita alimwi teshi ngoosalila baana shakucita. Ino inga mwacita buyani na mwanyumfwa bamwi kabaamba sha mushobo uyu pali nankashi? Na kamumulumba ceebo cakweelesha kwakwe akulwiitako bamwi nshaatoocita kabotu, inga mwapa kwaamba ayi bamwi bacileeke kwaamba shitabete kabotu pali nguwe.

18. Ino nshiinshi shimwi nsheenga twaciita kwaamba ayi tucafwe benankashi?

¹⁸ Inga twatondesha ayi tulababikila maano abuumbi benankashi kwiinda mukubacitila shintu sheenga shabacafwa. (1 Joni 3:18) Nankashi Annette, wakalinga kulama banyina balwashi wakaamba ayi: “Bamakwesu abenankashi bamwi bakalinga kusa mukuncafwa kuŋanda akuncalilaako abama kwaamba ayi njenciteko shimwi, bamwi bakalinga kuleta shakulya. Ici cakampa kulinyumfwa ayi bamakwesu balinsuni alimwi ndisuniki mulibungano.” Nankashi Jordan alakwe wakatambula lucafwo. Mukwesu  umwi wakamucafwa kushiba mbweenga walama kabotu motoka yakwe. Aboobo wakaamba ayi: “Cilayuminisha abuumbi kushiba kwaamba ayi bamakwesu abenankashi balambikila maano alimwi balisuni kwaamba ayi ndishitilishe ndyentokweensha motoka.”

19. Ino nshiinshi shimwi bamanene nsheenga bacita kwaamba ayi bacafwe benankashi?

¹⁹ Bamanene abalo balacafwa benankashi mushintu nshebayandika. Balicishi kwaamba ayi Yehova alabikila maano kubenankashi mbobalamwa. (Jemu. 1:27) Aboobo bamanene balakonkela cakubonenaako cakwe Yesu cakubona shintu munshila yakweelanya kabotu. Balacita boobo kwiinda mukutondesha nkumbu akunyumfwishisha muciindi cakubika milawo pateelete. (Mate. 15:22-28) Na bamanene bacita nsheenga bacikonsha kucafwa benankashi, balaakubacafwa kulinyumfwa ayi Yehova alibunga lyakwe balabikila maano. Munene utanjilila kakoto kakushimikila mubete nankashi Kia ndyaakanyumfwa ayi nankashi uyu atoolongela muŋanda imwi, cakufwambaana wakalangoola bakumucafwa. Nankashi Kia wakaamba ayi: “Shakacita mukwesu uyu shakapa kwaamba ayi ntalisukami.” Alimwi wakatolelela akwaamba ayi: “Mukwiinga bakanjuminisha akumpa lucafwo ndondakalinga kuyandika, cakancafwa kushiba kwaamba ayi ndisuniki mulibungano alimwi inga bancafwa na ndacana mapensho.”

20-21. Ino inga twatondesha buyani ayi tulibasuni benankashi boonse mulibungano?

²⁰ Munshiku shino mumabungano aanji muli benankashi basebensa cankusu bacite cakubonenaako cibotu mbotweelete kuyuminisha. Bweenka mbotweeya kuswa kucakubonenaako cakwe Yesu, inga twabacafwa kwiinda mukucana ciindi cakubaabo pomwi alimwi akubashiba kabotu. Inga twabalumba pancito njobatoosebensa muncito yakwe Lesa. Alimwi inga twabeemikaninaako na kaciyandika.

²¹ Kumamanino ankalata njaakalembela libungano lyaku bene Loma, mutumwi Paulo wakaamba meena aBeneklistu banakashi bali 9. (Loma. 16:1, 3, 6, 12, 13, 15) Ncakutatoonsha kwaamba ayi banakashi Beneklistu balya bakayuminishikwa abuumbi kunyumfwa Paulo nshaakalemba pali mbabo. Aswebo atweeleshe kucafwa benankashi boonse mulibungano. Kucita boobo kulaakutondesha kwaamba ayi tulibasuni mbuli lubasu lwa mukwashi wesu wakumushimu.