ບົດຄວາມສຶກສາທີ 39
ໃຫ້ເອົາໃຈໃສ່ພີ່ນ້ອງຍິງ
“ຜູ້ຍິງທີ່ປະກາດຂ່າວດີເປັນກອງທັບໃຫຍ່.”—ເພງ. 68:11, ລ.ມ.
ເພງ 137 ພີ່ນ້ອງຍິງທີ່ສັດຊື່
ໃຈຄວາມສຳຄັນ *
ພີ່ນ້ອງຍິງທີ່ດຸໝັ່ນແລະກະຕືລືລົ້ນອອກຄຳຄິດເຫັນຢູ່ການປະຊຸມ ໄປປະກາດ ຊ່ວຍເບິ່ງແຍງຫໍປະຊຸມ ແລະສະແດງຄວາມສົນໃຈຕໍ່ພີ່ນ້ອງ (ເບິ່ງຂໍ້ 1)
1. ພີ່ນ້ອງຍິງຊ່ອຍອົງການແນວໃດ ແຕ່ເຂົາເຈົ້າຫຼາຍຄົນເຈິບັນຫາຫຍັງແດ່? (ເບິ່ງຮູບໜ້າປົກ)
ເຮົາຮູ້ສຶກຂອບໃຈແທ້ໆທີ່ມີພີ່ນ້ອງຍິງຫຼາຍຄົນກຳລັງເຮັດວຽກໜັກໃນປະຊາຄົມ. ຕົວຢ່າງເຊັ່ນ: ເຂົາເຈົ້າອອກຄຳຄິດເຫັນໃນການປະຊຸມແລະເຮັດວຽກປະກາດ. ບາງຄົນຊ່ອຍເບິ່ງແຍງຫໍປະຊຸມ ແລະບາງຄົນຊ່ອຍເບິ່ງແຍງພີ່ນ້ອງໃນປະຊາຄົມ. ແຕ່ເຂົາເຈົ້າກໍເຈິບັນຫາຫຼາຍຢ່າງ ບາງຄົນຕ້ອງເບິ່ງແຍງພໍ່ແມ່ທີ່ເຖົ້າແລ້ວ ແລະບາງຄົນຖືກຄອບຄົວຕໍ່ຕ້ານ. ນອກຈາກນັ້ນ ບາງຄົນລ້ຽງລູກຜູ້ດຽວແລະຕ້ອງເຮັດວຽກໜັກເພື່ອຫາລ້ຽງລູກ.
2. ເປັນຫຍັງເຮົາຄວນເອົາໃຈໃສ່ແລະຊ່ວຍເຫຼືອພີ່ນ້ອງຍິງ?
2 ເປັນຫຍັງເຮົາຄວນເອົາໃຈໃສ່ແລະຊ່ວຍເຫຼືອພີ່ນ້ອງຍິງ? ຍ້ອນວ່າຫຼາຍຄົນໃນໂລກມັກດູຖູກແລະບໍ່ໃຫ້ກຽດຜູ້ຍິງ. ແຕ່ຄຳພີໄບເບິນບອກໃຫ້ເຮົາຊ່ວຍເຫຼືອພີ່ນ້ອງຍິງ. ຕົວຢ່າງເຊັ່ນ: ອັກຄະສາວົກໂປໂລບອກພີ່ນ້ອງໃນເມືອງໂຣມໃຫ້ຕ້ອນຮັບພີ່ນ້ອງຟອຍເບແລະ “ຊ່ວຍເຫຼືອລາວໃນເລື່ອງທີ່ຈຳເປັນ.” (ຣມ. 16:1, 2) ຕອນທີ່ໂປໂລເປັນຟາຣິຊາຍ ລາວຖືວ່າຜູ້ຍິງເປັນຄົນຕ່ຳຕ້ອຍແລະລາວໄດ້ປະຕິບັດກັບຜູ້ຍິງແບບຕ່ຳຕ້ອຍ ແຕ່ເມື່ອເຂົ້າມາເປັນຄລິດສະຕຽນ ລາວກໍຮຽນແບບພະເຢຊູໂດຍສະແດງຄວາມອ່ອນໂຍນແລະໃຫ້ກຽດຜູ້ຍິງ.—1 ກຣ. 11:1
3. ພະເຢຊູປະຕິບັດກັບຜູ້ຍິງແນວໃດ ແລະເພິ່ນຖືວ່າຜູ້ຍິງທີ່ເຮັດຕາມຄວາມຕ້ອງການຂອງພໍ່ເພິ່ນເປັນແນວໃດ?
3 ພະເຢຊູໃຫ້ກຽດຜູ້ຍິງທຸກຄົນ. (ຢຮ. 4:27) ເພິ່ນບໍ່ໄດ້ເບິ່ງວ່າຜູ້ຍິງຕ່ຳຕ້ອຍຄືກັບທີ່ພວກຫົວໜ້າສາສະໜາຢິວໃນສະໄໝຂອງເພິ່ນເບິ່ງ. ທີ່ຈິງ ປຶ້ມອ້າງອີງຫົວໜຶ່ງບອກວ່າ: “ພະເຢຊູບໍ່ເຄີຍເວົ້າດູຖູກຜູ້ຍິງ.” ແຕ່ພະເຢຊູໃຫ້ກຽດເປັນພິເສດກັບຜູ້ຍິງທີ່ເຮັດຕາມຄວາມຕ້ອງການຂອງພໍ່ເພິ່ນ. ສຳຄັນກວ່ານັ້ນ ເພິ່ນຖືວ່າເຂົາເຈົ້າເປັນເອື້ອຍເປັນນ້ອງຂອງເພິ່ນ ແລະຍັງໄດ້ເວົ້າເຖິງເຂົາເຈົ້ານຳກັນກັບຜູ້ຊາຍທີ່ເພິ່ນຖືວ່າເປັນສ່ວນໜຶ່ງໃນຄອບຄົວຂອງເພິ່ນ.—ມທ. 12:50
4. ເຮົາຈະຮຽນຫຍັງໃນບົດນີ້?
4 ພະເຢຊູພ້ອມສະເໝີທີ່ຈະຊ່ວຍເຫຼືອຜູ້ຍິງທີ່ເປັນເອື້ອຍເປັນນ້ອງທາງຄວາມເຊື່ອກັບເພິ່ນ. ເພິ່ນເຫັນຄ່າເຂົາເຈົ້າແລະເວົ້າປົກປ້ອງເຂົາເຈົ້າ. ໃຫ້ເຮົາມາເບິ່ງວ່າເຮົາຈະຮຽນແບບພະເຢຊູໄດ້ແນວໃດໃນການສະແດງຄວາມສົນໃຈພີ່ນ້ອງຍິງ?
ສະແດງຄວາມສົນໃຈພີ່ນ້ອງຍິງ
5. ເປັນຫຍັງພີ່ນ້ອງຍິງບາງຄົນຮູ້ສຶກວ່າຍາກທີ່ຈະໃຊ້ເວລາກັບພີ່ນ້ອງໃນປະຊາຄົມ?
5 ເຮົາທຸກຄົນບໍ່ວ່າຈະເປັນຊາຍຫຼືຍິງກໍຕ້ອງການໃຊ້ເວລາກັບພີ່ນ້ອງ. ແຕ່ບາງເທື່ອພີ່ນ້ອງຍິງອາດຮູ້ສຶກວ່າຍາກທີ່ຈະເຮັດແບບນັ້ນ. ຍ້ອນຫຍັງ? ໃຫ້ເຮົາເບິ່ງສິ່ງທີ່ພີ່ນ້ອງຍິງບາງຄົນເວົ້າ. ພີ່ນ້ອງຈໍແດນ *ເວົ້າວ່າ “ຍ້ອນຂ້ອຍຍັງເປັນໂສດ ຂ້ອຍຈຶ່ງຮູ້ສຶກວ່າຂ້ອຍບໍ່ມີຄວາມສຳຄັນຫຍັງໃນປະຊາຄົມ ແລະບໍ່ໄດ້ຮູ້ສຶກວ່າເປັນສ່ວນໜຶ່ງຂອງປະຊາຄົມ.” ພີ່ນ້ອງຄລິດສະຕິນເຊິ່ງເປັນໄພໂອເນຍທີ່ຍ້າຍໄປຮັບໃຊ້ໃນເຂດທີ່ມີຄວາມຈຳເປັນຫຼາຍກວ່າເວົ້າວ່າ: “ເມື່ອຍ້າຍໄປປະຊາຄົມໃໝ່ ຂ້ອຍຮູ້ສຶກເຫງົາ.” ພີ່ນ້ອງທີ່ເປັນພະຍານພະເຢໂຫວາຄົນດຽວໃນຄອບຄົວອາດຮູ້ສຶກວ່າຍາກທີ່ຈະສະໜິດກັບຄອບຄົວ ແລະຍັງຮູ້ສຶກວ່າໂຕເອງບໍ່ໄດ້ສະໜິດກັບພີ່ນ້ອງໃນປະຊາຄົມ. ພີ່ນ້ອງບາງຄົນກໍອາດຮູ້ສຶກເຫງົາຍ້ອນບໍ່ສະບາຍແລະອອກໄປໃສບໍ່ໄດ້ ແລະບາງຄົນອາດຕ້ອງເບິ່ງແຍງຄົນໃນຄອບຄົວທີ່ບໍ່ສະບາຍ. ພີ່ນ້ອງແອນເນັດເວົ້າວ່າ “ເຖິງວ່າພີ່ນ້ອງຈະຊວນຂ້ອຍໄປຫັ້ນໄປນີ້ ແຕ່ຂ້ອຍກໍໄປບໍ່ໄດ້ເພາະຕ້ອງເບິ່ງແຍງແມ່.”
ຄືກັບພະເຢຊູ ເຮົາສະແດງໃຫ້ເຫັນວ່າເຮົາຮັກແລະເປັນຫ່ວງພີ່ນ້ອງຍິງ (ເບິ່ງຂໍ້ 6-9) *
6. ຕາມລູກາ 10:38-42 ພະເຢຊູໄດ້ຊ່ອຍມາຣີແລະມາທາແນວໃດ?
6 ພະເຢຊູໃຊ້ເວລາກັບຜູ້ຍິງທີ່ເປັນເອື້ອຍເປັນນ້ອງທາງຄວາມເຊື່ອກັບເພິ່ນ ແລະເພິ່ນກໍເປັນໝູ່ແທ້ຂອງເຂົາເຈົ້າ. ໃຫ້ເຮົາມາເບິ່ງສາຍສຳພັນຂອງພະເຢຊູກັບມາຣີແລະມາທາ ເບິ່ງຄືວ່າທັງສອງເປັນໂສດ. (ອ່ານລູກາ 10:38-42) ສິ່ງທີ່ພະເຢຊູເວົ້າແລະເຮັດ ເຮັດໃຫ້ເຂົາເຈົ້າຮູ້ສຶກສະບາຍໃຈ. ມາຣີຮູ້ສຶກສະດວກໃຈທີ່ຈະນັ່ງຢູ່ໃກ້ຕີນຂອງພະເຢຊູໃນຖານະເປັນລູກສິດຂອງເພິ່ນ. * ສ່ວນມາທາຮູ້ສຶກບໍ່ພໍໃຈທີ່ມາຣີບໍ່ໄປແຕ່ງກິນຊ່ອຍ ແລະລາວກ້າບອກພະເຢຊູວ່າລາວຮູ້ສຶກແນວໃດ. ໃນຕອນນັ້ນ ພະເຢຊູໄດ້ສອນບົດຮຽນທີ່ສຳຄັນໃຫ້ເຂົາເຈົ້າ. ພະເຢຊູສະແດງໃຫ້ເຫັນວ່າເພິ່ນເປັນຫ່ວງຜູ້ຍິງສອງຄົນນີ້ແລະລາຊະໂຣທີ່ເປັນອ້າຍນ້ອງຂອງເຂົາເຈົ້າໂດຍໄປຫາຄອບຄົວນີ້ໃນໂອກາດອື່ນນຳອີກ. (ຢຮ. 12:1-3) ຍ້ອນແນວນີ້ ຕອນທີ່ລາຊະໂຣບໍ່ສະບາຍແຮງ ມາຣີແລະມາທາຈຶ່ງກ້າໄປຂໍຄວາມຊ່ວຍເຫຼືອຈາກພະເຢຊູ.—ຢຮ. 11:3, 5
7. ເຮົາຈະໃຫ້ກຳລັງໃຈພີ່ນ້ອງຍິງໄດ້ແນວໃດ?
7 ສຳລັບພີ່ນ້ອງຍິງບາງຄົນ ການປະຊຸມຕ່າງໆເປັນໂອກາດໜຶ່ງທີ່ຈະໄດ້ຢູ່ກັບພີ່ນ້ອງ. ດັ່ງນັ້ນ ເຮົາຄວນໃຊ້ໂອກາດແບບນີ້ເພື່ອຕ້ອນຮັບເຂົາເຈົ້າ ລົມກັບເຂົາເຈົ້າ ແລະເຮັດໃຫ້ເຂົາເຈົ້າຮູ້ວ່າເຮົາເປັນຫ່ວງເຂົາເຈົ້າແທ້ໆ. ພີ່ນ້ອງຈໍແດນທີ່ເວົ້າເຖິງກ່ອນໜ້ານີ້ເວົ້າວ່າ: “ຂ້ອຍໄດ້ກຳລັງໃຈຫຼາຍເມື່ອມີຄົນຊົມເຊີຍຄຳຕອບຂອງຂ້ອຍຢູ່ການປະຊຸມ ຊວນຂ້ອຍໄປປະກາດ ຫຼືເຮັດແນວອື່ນທີ່ສະແດງວ່າສົນໃຈຂ້ອຍ.” ເຮົາຕ້ອງເຮັດໃຫ້ພີ່ນ້ອງຍິງຮູ້ວ່າເຂົາເຈົ້າສຳຄັນຕໍ່ເຮົາ. ພີ່ນ້ອງເກຍເວົ້າວ່າ: “ຖ້າຂ້ອຍບໍ່ໄດ້ໄປປະຊຸມ ຂ້ອຍກໍຮູ້ເລີຍວ່າຈະມີພີ່ນ້ອງສົ່ງຂໍ້ຄວາມມາຫາຂ້ອຍແລະຖາມວ່າ ‘ເຈົ້າເປັນຫຍັງບໍ ບໍ່ເປັນຫຍັງຕີ້.’ ສິ່ງນີ້ເຮັດໃຫ້ຂ້ອຍຮູ້ວ່າເຂົາເຈົ້າເປັນຫ່ວງຂ້ອຍແທ້ໆ.”
8. ເຮົາຈະຮຽນແບບພະເຢຊູໄດ້ແນວໃດ?
8 ຄືກັບພະເຢຊູ ເຮົາພະຍາຍາມໃຫ້ເວລາກັບພີ່ນ້ອງຍິງ. ເຮົາອາດຊວນເຂົາເຈົ້າມາກິນເຂົ້ານຳຫຼືມາຫຼິ້ນນຳກັນ. ເມື່ອເຮັດແບບນັ້ນ ສິ່ງທີ່ເຮົາລົມກັນຄວນເປັນເລື່ອງທີ່ໃຫ້ກຳລັງໃຈກັນ. (ຣມ. 1:11, 12) ຜູ້ດູແລຄວນຄິດຄືກັບພະເຢຊູ. ເພິ່ນຮູ້ວ່າການເປັນໂສດອາດບໍ່ງ່າຍສຳລັບບາງຄົນ ແຕ່ເພິ່ນກໍເຮັດໃຫ້ເຫັນແຈ້ງວ່າຄວາມສຸກແທ້ບໍ່ໄດ້ມາຈາກການແຕ່ງດອງຫຼືການມີລູກ. (ລກ. 11:27, 28) ຄວາມສຸກແທ້ແມ່ນການໃຫ້ວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ.—ມທ. 19:12
9. ຜູ້ດູແລສາມາດເຮັດຫຍັງເພື່ອຊ່ອຍພີ່ນ້ອງຍິງ?
9 ຜູ້ດູແລຄວນປະຕິບັດກັບພີ່ນ້ອງຍິງໃນປະຊາຄົມຄືກັບເປັນເອື້ອຍເປັນນ້ອງແລະເປັນແມ່ຂອງເຂົາເຈົ້າ. (1 ຕມ. 5:1, 2) ຜູ້ດູແລເຮັດແບບນັ້ນໄດ້ໂດຍໃຊ້ເວລາລົມກັບພີ່ນ້ອງຍິງກ່ອນຫຼືຫຼັງປະຊຸມ. ພີ່ນ້ອງຄລິດສະຕິນທີ່ເວົ້າເຖິງກ່ອນໜ້ານີ້ເວົ້າວ່າ: “ຜູ້ດູແລຄົນໜຶ່ງສັງເກດເຫັນວ່າຂ້ອຍຫຍຸ້ງຫຼາຍ ຍ້ອນຂ້ອຍທັງເຮັດວຽກແລະເປັນໄພໂອເນຍນຳ. ຜູ້ດູແລຈຶ່ງຢາກຮູ້ວ່າຕາຕະລາງວຽກຂ້ອຍເປັນແນວໃດ ແລະລາວຢາກຊ່ອຍຂ້ອຍຈັດຕາຕະລາງວຽກ. ຂ້ອຍຮູ້ສຶກຂອບໃຈຫຼາຍແທ້ໆທີ່ລາວເປັນຫ່ວງຂ້ອຍ.” ເມື່ອຜູ້ດູແລໃຊ້ເວລາລົມກັບພີ່ນ້ອງຍິງເປັນປະຈຳ ເຂົາເຈົ້າກໍສະແດງໃຫ້ເຫັນວ່າເປັນຫ່ວງພີ່ນ້ອງຍິງແທ້ໆ. * ພີ່ນ້ອງແອນເນັດທີ່ເວົ້າເຖິງກ່ອນໜ້ານີ້ເນັ້ນເຖິງຜົນດີຢ່າງໜຶ່ງຂອງການລົມກັບຜູ້ດູແລ ລາວເວົ້າວ່າ: “ຂ້ອຍໄດ້ຮູ້ຈັກຜູ້ດູແລຫຼາຍຂຶ້ນ ແລະເຂົາເຈົ້າກໍຮູ້ຈັກຂ້ອຍຫຼາຍຂຶ້ນຄືກັນ. ເມື່ອມີບັນຫາຂ້ອຍຮູ້ສຶກວ່າງ່າຍທີ່ຈະໄປຂໍຄວາມຊ່ວຍເຫຼືອຈາກເຂົາເຈົ້າ.”
ເຫັນຄ່າພີ່ນ້ອງຍິງ
10. ສິ່ງໃດທີ່ຊ່ອຍພີ່ນ້ອງຍິງໃຫ້ມີຄວາມສຸກ?
10 ເຮົາທຸກຄົນບໍ່ວ່າຈະເປັນຊາຍຫຼືຍິງ ເຮົາມີຄວາມສຸກເມື່ອມີຄົນເຫັນຄວາມສາມາດຂອງເຮົາແລະເຫັນຄ່າວຽກທີ່ເຮົາເຮັດ. ແຕ່ຖ້າບໍ່ມີໃຜເຫັນຄວາມສາມາດຂອງເຮົາຫຼືບໍ່ເຫັນຄ່າສິ່ງທີ່ເຮົາເຮັດ ເຮົາກໍຮູ້ສຶກທໍ້ໃຈ. ພີ່ນ້ອງຍິງໂສດຊື່ອາບີເກວເຊິ່ງຮັບໃຊ້ເປັນໄພໂອເນຍຍອມຮັບວ່າບາງເທື່ອລາວຮູ້ສຶກວ່າຖືກເບິ່ງຂ້າມ. ລາວເວົ້າວ່າ: “ພີ່ນ້ອງບໍ່ໄດ້ຮູ້ຈັກວ່າຂ້ອຍເປັນຄົນແນວໃດແທ້ໆ. ເຂົາເຈົ້າຮູ້ແຕ່ວ່າຂ້ອຍເປັນລູກຂອງຜູ້ນັ້ນຜູ້ນີ້ແລະເປັນເອື້ອຍນ້ອງກັບຜູ້ນັ້ນຜູ້ນີ້. ບາງເທື່ອຂ້ອຍຮູ້ສຶກວ່າຂ້ອຍບໍ່ມີຕົວຕົນເລີຍ.” ໃຫ້ສັງເກດສິ່ງທີ່ພີ່ນ້ອງແພມເວົ້າ ຕອນເປັນໂສດລາວຮັບໃຊ້ເປັນມິດຊັນນາລີຫຼາຍປີ ແຕ່ໃນທີ່ສຸດລາວກໍຕ້ອງກັບເມືອບ້ານເພື່ອເບິ່ງແຍງພໍ່ແມ່. ຕອນນີ້ລາວອາຍຸເຈັດສິບປາຍປີແລ້ວ ແຕ່ລາວກໍຍັງຮັບໃຊ້ເປັນໄພໂອເນຍຢູ່. ພີ່ນ້ອງແພມເວົ້າວ່າ “ສິ່ງທີ່ຊ່ອຍຂ້ອຍໄດ້ຫຼາຍທີ່ສຸດແມ່ນຕອນທີ່ຄົນອື່ນຂອບໃຈຂ້ອຍສຳລັບສິ່ງທີ່ຂ້ອຍເຮັດ.”
11. ພະເຢຊູສະແດງໃຫ້ເຫັນແນວໃດວ່າເພິ່ນເຫັນຄ່າຜູ້ຍິງທີ່ສັດຊື່ທີ່ຊ່ອຍເພິ່ນ?
11 ພະເຢຊູເຫັນຄ່າຜູ້ຍິງທີ່ສັດຊື່ເຊິ່ງໃຊ້ “ຊັບສິນຂອງຕົວເອງ” ເພື່ອຊ່ອຍເພິ່ນ. (ລກ. 8:1-3) ພະເຢຊູບໍ່ພຽງແຕ່ໃຫ້ເຂົາເຈົ້າມີສິດທິພິເສດໄດ້ຮັບໃຊ້ເພິ່ນ ແຕ່ພະເຢຊູຍັງເປີດເຜີຍຄວາມຈິງທີ່ສຳຄັນກ່ຽວກັບຄວາມຕ້ອງການຂອງພະເຈົ້າໃຫ້ເຂົາເຈົ້າຮູ້ນຳອີກ. ຕົວຢ່າງເຊັ່ນ: ເພິ່ນບອກເຂົາເຈົ້າໃຫ້ຮູ້ວ່າເພິ່ນຈະຕາຍແລະຟື້ນຄືນມາຈາກຕາຍ. (ລກ. 24:5-8) ຄືກັບທີ່ພະເຢຊູໄດ້ກຽມພວກອັກຄະສາວົກໄວ້ ເພິ່ນກໍໄດ້ກຽມຜູ້ຍິງເຫຼົ່ານີ້ໄວ້ໃຫ້ພ້ອມສຳລັບຄວາມຫຍຸ້ງຍາກທີ່ຈະເກີດຂຶ້ນໃນອະນາຄົດເມື່ອເຂົາເຈົ້າເຫັນເພິ່ນທຸກທໍລະມານແລະຕາຍ. (ມຣກ. 9:30-32; 10:32-34) ເຖິງວ່າພວກອັກຄະສາວົກຈະປະຖິ້ມພະເຢຊູຕອນທີ່ເພິ່ນຖືກຈັບ ແຕ່ຜູ້ຍິງບາງຄົນກໍບໍ່ໄດ້ປະຖິ້ມເພິ່ນຕອນທີ່ເພິ່ນກຳລັງຈະຕາຍຢູ່ເທິງເສົາທໍລະມານ.—ມທ. 26:56; ມຣກ. 15:40, 41
12. ພະເຢຊູໄດ້ໃຫ້ຜູ້ຍິງເຮັດວຽກຫຍັງແດ່?
12 ພະເຢຊູໄດ້ໃຫ້ຜູ້ຍິງເຮັດວຽກທີ່ສຳຄັນ. ຕົວຢ່າງເຊັ່ນ: ຜູ້ຍິງເປັນຜູ້ທຳອິດທີ່ເປັນພະຍານຮູ້ເຫັນເລື່ອງທີ່ພະເຢຊູຟື້ນຄືນມາຈາກຕາຍ. ເພິ່ນບອກເຂົາເຈົ້າໃຫ້ໄປບອກພວກອັກຄະສາວົກວ່າເພິ່ນຟື້ນຄືນມາຈາກຕາຍແລ້ວ. (ມທ. 28:5, 9, 10) ໃນວັນເພັນເຕກອດປີ ຄ.ສ 33 ອາດຈະມີຜູ້ຍິງຢູ່ນຳຄືກັນແລະເຂົາເຈົ້າຄືຊິໄດ້ຮັບພະລັງບໍລິສຸດ. ຖ້າເປັນແບບນັ້ນ ເຂົາເຈົ້າຄືຊິໄດ້ຮັບຄວາມສາມາດພິເສດທີ່ຈະເວົ້າພາສາຕ່າງປະເທດໄດ້ແລະບອກຄົນອື່ນກ່ຽວກັບ “ສິ່ງມະຫັດສະຈັນຕ່າງໆຂອງພະເຈົ້າ.”—ກຈກ. 1:14; 2:2-4, 11
13. ມີວຽກຫຍັງແດ່ທີ່ພີ່ນ້ອງຍິງກຳລັງເຮັດໃນທຸກມື້ນີ້ ແລະເຮົາຈະສະແດງໃຫ້ເຫັນແນວໃດວ່າເຮົາເຫັນຄ່າໃນວຽກທີ່ເຂົາເຈົ້າເຮັດ?
13 ພີ່ນ້ອງຍິງສົມຄວນໄດ້ຮັບຄຳຊົມເຊີຍຈາກເຮົາຍ້ອນສິ່ງທີ່ເຂົາເຈົ້າເຮັດໃນວຽກຮັບໃຊ້ພະເຢໂຫວາ. ວຽກນັ້ນລວມເຖິງວຽກກໍ່ສ້າງແລະວຽກເບິ່ງແຍງຕຶກອາຄານຕ່າງໆຂອງອົງການ ຊ່ອຍໃນກຸ່ມພາສາຕ່າງປະເທດ ແລະເປັນອາສາສະໝັກເຮັດວຽກຢູ່ເບເທນ. ເຂົາເຈົ້າຊ່ອຍໃນວຽກບັນເທົາທຸກ ວຽກແປ ແລະຮັບໃຊ້ເປັນໄພໂອເນຍແລະມິດຊັນນາລີ. ຄືກັບພີ່ນ້ອງຊາຍ ພີ່ນ້ອງຍິງກໍໄດ້ເຂົ້າໂຮງຮຽນໄພໂອເນຍ ໂຮງຮຽນຜູ້ປະກາດລາຊະອານາຈັກ ແລະໂຮງຮຽນກິລຽດຄືກັນ. ນອກຈາກນັ້ນ ພີ່ນ້ອງຍິງທີ່ເປັນເມຍຍັງຊ່ອຍຜົວຂອງເຂົາເຈົ້າໃຫ້ເຮັດວຽກຮັບຜິດຊອບໃນປະຊາຄົມແລະໃນອົງການໄດ້ສຳເລັດ. ພີ່ນ້ອງຊາຍເຫຼົ່ານີ້ເປັນ “ຂອງຂວັນທີ່ເປັນມະນຸດ” ແລະເຮັດຫຼາຍສິ່ງເພື່ອຊ່ອຍຄົນອື່ນ ແຕ່ຖ້າເມຍບໍ່ສະໜັບສະໜູນ ເຂົາເຈົ້າກໍຄືຊິເຮັດວຽກນີ້ໄດ້ຍາກ. (ອຟຊ. 4:8) ເຈົ້າຄິດເຖິງວິທີໃດແດ່ທີ່ຈະຊ່ອຍພີ່ນ້ອງຍິງເຫຼົ່ານີ້ໃນວຽກທີ່ເຂົາເຈົ້າເຮັດ?
14. ຕາມທີ່ບອກໄວ້ໃນຄຳເພງ 68:11 ຜູ້ດູແລທີ່ສະຫຼາດຄວນເຮັດຫຍັງ?
14 ຜູ້ດູແລທີ່ສະຫຼາດຮູ້ວ່າພີ່ນ້ອງຍິງເປັນ “ກອງທັບໃຫຍ່” ທີ່ເຕັມໃຈເຮັດວຽກ ແລະສ່ວນຫຼາຍແລ້ວເຂົາເຈົ້າກໍປະກາດເກັ່ງຄືກັນ. (ອ່ານຄຳເພງ 68:11) * ດັ່ງນັ້ນ ຜູ້ດູແລຈະພະຍາຍາມຮຽນຮູ້ຈາກປະສົບການຂອງພີ່ນ້ອງຍິງ. ອາບີເກວທີ່ເວົ້າເຖິງກ່ອນໜ້ານີ້ໄດ້ຮັບກຳລັງໃຈຫຼາຍຕອນທີ່ພີ່ນ້ອງຊາຍຖາມລາວວ່າ ຈາກປະສົບການຂອງລາວ ລາວຄິດວ່າວິທີໃດແມ່ນດີທີ່ຈະເລີ່ມລົມກັບຄົນອື່ນເລື່ອງຄຳພີໄບເບິນ. ອາບີເກວເວົ້າວ່າ “ເລື່ອງນີ້ຊ່ອຍຂ້ອຍໃຫ້ເຫັນວ່າພະເຢໂຫວາຍັງເຫັນວ່າຂ້ອຍມີຄວາມສຳຄັນໃນອົງການຂອງເພິ່ນ.” ນອກຈາກນັ້ນ ຜູ້ດູແລຍັງຮູ້ວ່າພີ່ນ້ອງຍິງສູງອາຍຸທີ່ສັດຊື່ຊ່ອຍພີ່ນ້ອງຍິງໜຸ່ມໄດ້ດີເມື່ອເຂົາເຈົ້າເຈິບັນຫາ. (ຕຕ. 2:3-5) ເຮົາເຫັນຄ່າພີ່ນ້ອງຍິງຫຼາຍແທ້ໆແລະເຂົາເຈົ້າສົມຄວນໄດ້ຮັບຄວາມຮັກຈາກເຮົາ!
ເວົ້າປົກປ້ອງພີ່ນ້ອງຍິງ
15. ຕອນໃດທີ່ພີ່ນ້ອງຍິງອາດຢາກໃຫ້ມີຄົນຊ່ອຍເວົ້າປົກປ້ອງເຂົາເຈົ້າ?
15 ບາງເທື່ອພີ່ນ້ອງຍິງກໍຢາກໃຫ້ມີຄົນເວົ້າປົກປ້ອງເຂົາເຈົ້າເມື່ອເຈິບັນຫາໃດໜຶ່ງ. (ເອຊາ. 1:17) ຕົວຢ່າງເຊັ່ນ: ພີ່ນ້ອງທີ່ເປັນແມ່ໝ້າຍຫຼືແມ່ຮ້າງອາດຢາກໃຫ້ມີຄົນຊ່ອຍເວົ້າແທນເຂົາເຈົ້າ ແລະຊ່ອຍເຮັດວຽກບາງຢ່າງທີ່ຜົວຂອງເຂົາເຈົ້າເຄີຍເຮັດ. ພີ່ນ້ອງຍິງທີ່ເປັນຜູ້ເຖົ້າອາດຢາກໃຫ້ຊ່ອຍລົມກັບທ່ານໝໍ ຫຼືພີ່ນ້ອງຍິງທີ່ເປັນໄພໂອເນຍແລະທັງເຮັດວຽກອື່ນຂອງອົງການນຳອາດຢາກໃຫ້ມີບາງຄົນເວົ້າປົກປ້ອງລາວ ຖ້າມີຄົນເວົ້າໃຫ້ລາວຍ້ອນວ່າບໍ່ໄດ້ອອກໄປປະກາດຫຼາຍຄືກັບໄພໂອເນຍຄົນອື່ນ. ເຮົາຈະຊ່ອຍພີ່ນ້ອງທີ່ມີຄວາມຈຳເປັນແບບນັ້ນໄດ້ແນວໃດ? ໃຫ້ເຮົາເບິ່ງຕົວຢ່າງຂອງພະເຢຊູອີກ.
16. ຕາມມາຣະໂກ 14:3-9 ພະເຢຊູເວົ້າປົກປ້ອງມາຣີແນວໃດ?
16 ພະເຢຊູພ້ອມທີ່ຈະປົກປ້ອງຜູ້ຍິງເມື່ອມີຄົນເຂົ້າໃຈເຂົາເຈົ້າຜິດ. ຕົວຢ່າງເຊັ່ນ: ເພິ່ນເວົ້າປົກປ້ອງມາຣີຕອນທີ່ມາທາເວົ້າໃຫ້ລາວ. (ລກ. 10:38-42) ພະເຢຊູເວົ້າປົກປ້ອງມາຣີອີກເທື່ອໜຶ່ງເມື່ອມີຄົນເວົ້າໃຫ້ລາວວ່າເຮັດສິ່ງທີ່ຜິດ. (ອ່ານມາຣະໂກ 14:3-9) ພະເຢຊູເຂົ້າໃຈວ່າເປັນຫຍັງມາຣີເຮັດແບບນັ້ນແລະເວົ້າຊົມເຊີຍລາວວ່າ: “ລາວເຮັດສິ່ງທີ່ດີຕໍ່ຂ້ອຍ. . . . ລາວເຮັດສິ່ງທີ່ລາວເຮັດໄດ້.” ພະເຢຊູເຖິງຂັ້ນບອກລ່ວງໜ້າວ່າ “ຂ່າວດີຈະປະກາດໄປບ່ອນໃດໃນໂລກ” ສິ່ງທີ່ມາຣີເຮັດກໍຈະຖືກກ່າວຂານໄປເຖິງບ່ອນນັ້ນ ແລະນັ້ນເປັນສິ່ງທີ່ບົດນີ້ກຳລັງເຮັດຢູ່ໃນຕອນນີ້. ໜ້າສົນໃຈທີ່ພະເຢຊູເວົ້າເຖິງການກະທຳທີ່ບໍ່ເຫັນແກ່ໂຕຂອງມາຣີ ເມື່ອເວົ້າເຖິງການປະກາດຂ່າວດີຢູ່ທົ່ວໂລກ. ຄຳເວົ້າຂອງພະເຢຊູຄືຊິເຮັດໃຫ້ມາຣີສະບາຍໃຈຫຼາຍແທ້ໆຕອນທີ່ຄົນອື່ນເຂົ້າໃຈລາວຜິດ.
17. ຕອນໃດທີ່ເຮົາຄວນເວົ້າປົກປ້ອງພີ່ນ້ອງຍິງ?
17 ເຈົ້າເວົ້າປົກປ້ອງພີ່ນ້ອງຍິງບໍເມື່ອຈຳເປັນ? ໃຫ້ເບິ່ງຕົວຢ່າງຕໍ່ໄປນີ້. ພີ່ນ້ອງບາງຄົນສັງເກດເຫັນວ່າພີ່ນ້ອງຍິງທີ່ຜົວຂອງລາວບໍ່ໄດ້ເປັນພະຍານມັກມາປະຊຸມຊ້າຕະຫຼອດ ແລະເມື່ອປະຊຸມແລ້ວລາວກໍຟ້າວເມືອໂລດ. ເຂົາເຈົ້າຍັງສັງເກດເຫັນວ່າລາວບໍ່ມັກພາລູກມາປະຊຸມນຳ. ດັ່ງນັ້ນ ພີ່ນ້ອງຈຶ່ງເວົ້າໃຫ້ລາວວ່າ ເປັນຫຍັງລາວຄືບໍ່ເວົ້ານຳຜົວວ່າຈະເອົາລູກມາປະຊຸມນຳ. ແຕ່ທີ່ຈິງແລ້ວພີ່ນ້ອງຍິງຄົນນີ້ກຳລັງເຮັດສຸດຄວາມສາມາດ. ລາວບໍ່ສາມາດຄວບຄຸມຕາຕະລາງຊີວິດຂອງໂຕເອງໄດ້ ແລະບໍ່ແມ່ນລາວຜູ້ດຽວທີ່ມີສິດຕັດສິນໃຈໃນເລື່ອງລູກ. ເຈົ້າຈະເຮັດແນວໃດເມື່ອໄດ້ຍິນຄົນອື່ນເວົ້າໃຫ້ລາວແບບນີ້? ຖ້າເຮົາຍ້ອງລາວ ເວົ້າເຖິງສິ່ງທີ່ລາວກຳລັງເຮັດດີຢູ່ແລ້ວໃຫ້ຄົນອື່ນຟັງ ເຮົາກໍຈະຊ່ອຍຄົນອື່ນເຊົາເວົ້າໃຫ້ລາວແລະໃຫ້ເຂົາເຈົ້າເຫັນຈຸດດີໃນໂຕລາວ.
18. ມີວິທີໃດອີກທີ່ເຮົາສາມາດຊ່ອຍພີ່ນ້ອງຍິງໄດ້?
18 ເຮົາສະແດງໃຫ້ເຫັນວ່າເຮົາເປັນຫ່ວງພີ່ນ້ອງຍິງຫຼາຍເມື່ອເຮົາສະເໜີວ່າຈະຊ່ອຍເຂົາເຈົ້າ. (1 ຢຮ. 3:18) ພີ່ນ້ອງແອນເນັດທີ່ເບິ່ງແຍງແມ່ທີ່ບໍ່ສະບາຍເວົ້າວ່າ: “ພີ່ນ້ອງບາງຄົນມາເບິ່ງແຍງແມ່ແທນຂ້ອຍເພື່ອຂ້ອຍຈະໄປເຮັດແນວອື່ນໄດ້. ບາງຄົນກໍເອົາຂອງກິນມາໃຫ້. ການທີ່ພີ່ນ້ອງເຮັດແບບນີ້ເຮັດໃຫ້ຂ້ອຍຮູ້ສຶກວ່າເຂົາເຈົ້າຮັກຂ້ອຍແລະຂ້ອຍກໍເປັນສ່ວນໜຶ່ງໃນປະຊາຄົມ.” ພີ່ນ້ອງຈໍແດນກໍໄດ້ຮັບຄວາມຊ່ວຍເຫຼືອຄືກັນ ພີ່ນ້ອງຊາຍຄົນໜຶ່ງບອກລາວໃຫ້ຮູ້ວິທີເບິ່ງແຍງລົດ. ຈໍແດນເວົ້າວ່າ: “ຂ້ອຍດີໃຈຫຼາຍທີ່ຮູ້ວ່າພີ່ນ້ອງເປັນຫ່ວງຄວາມປອດໄພຂອງຂ້ອຍ.”
19. ມີວິທີໃດແດ່ທີ່ຜູ້ດູແລຊ່ອຍພີ່ນ້ອງຍິງ?
19 ຜູ້ດູແລກໍຄືກັນພະຍາຍາມທີ່ຈະເບິ່ງແຍງຄວາມຈຳເປັນຂອງພີ່ນ້ອງຍິງ. ເຂົາເຈົ້າຮູ້ວ່າພະເຢໂຫວາຢາກໃຫ້ພີ່ນ້ອງຍິງໄດ້ຮັບການປະຕິບັດແບບດີໆ. (ຢກບ. 1:27) ດັ່ງນັ້ນ ຜູ້ດູແລຈຶ່ງຮຽນແບບພະເຢຊູແລະເປັນຄົນມີເຫດຜົນ ເຂົາເຈົ້າຈະບໍ່ເຄັ່ງຄັດຫຼາຍໂພດ ແຕ່ຈະເຂົ້າໃຈຄົນອື່ນແລະເຫັນອົກເຫັນໃຈ. (ມທ. 15:22-28) ເມື່ອຜູ້ດູແລພະຍາຍາມຊ່ອຍພີ່ນ້ອງຍິງ ຜູ້ດູແລກໍເຮັດໃຫ້ພີ່ນ້ອງຍິງຮູ້ສຶກວ່າພະເຢໂຫວາແລະອົງການຮັກແລະເປັນຫ່ວງເຂົາເຈົ້າ. ຕອນທີ່ຜູ້ດູແລກຸ່ມຂອງພີ່ນ້ອງເກຍຮູ້ວ່າລາວກຳລັງຈະຍ້າຍເຮືອນ ຜູ້ດູແລກໍວາງແຜນທີ່ຈະຊ່ວຍເຫຼືອລາວທັນທີ. ພີ່ນ້ອງເກຍເວົ້າວ່າ: “ຂ້ອຍຮູ້ສຶກໂລ່ງໃຈຫຼາຍເພາະຜູ້ດູແລໃຫ້ກຳລັງໃຈຂ້ອຍແລະຊ່ອຍຂ້ອຍໃນຍາມທີ່ຈຳເປັນ. ເຂົາເຈົ້າເຮັດໃຫ້ເຫັນວ່າຂ້ອຍມີຄວາມສຳຄັນໃນປະຊາຄົມ ແລະຂ້ອຍກໍບໍ່ໄດ້ຢູ່ຄົນດຽວເມື່ອເຈິບັນຫາ.”
ພີ່ນ້ອງຍິງໃນປະຊາຄົມຕ້ອງການຄວາມຊ່ວຍເຫຼືອ
20-21. ເຮົາຈະສະແດງໃຫ້ເຫັນແນວໃດວ່າເຮົາເຫັນຄ່າພີ່ນ້ອງຍິງທຸກຄົນ?
20 ທຸກມື້ນີ້ເມື່ອເຮົາສັງເກດເບິ່ງໃນປະຊາຄົມ ເຮົາກໍເຫັນວ່າມີພີ່ນ້ອງຍິງຫຼາຍຄົນເຮັດວຽກໜັກແລະເຂົາເຈົ້າສົມຄວນໄດ້ຮັບການເອົາໃຈໃສ່. ດັ່ງທີ່ເຮົາໄດ້ຮຽນຈາກຕົວຢ່າງຂອງພະເຢຊູ ເຮົາສາມາດຊ່ອຍພີ່ນ້ອງຍິງໄດ້ໂດຍໃຊ້ເວລານຳເຂົາເຈົ້າແລະພະຍາຍາມຮູ້ຈັກເຂົາເຈົ້າຫຼາຍຂຶ້ນ ເຫັນຄ່າສິ່ງທີ່ເຂົາເຈົ້າເຮັດເພື່ອຮັບໃຊ້ພະເຢໂຫວາ ແລະເວົ້າປົກປ້ອງເຂົາເຈົ້າເມື່ອຈຳເປັນ.
21 ໃນຕອນທ້າຍຂອງຈົດໝາຍທີ່ອັກຄະສາວົກໂປໂລຂຽນເຖິງພີ່ນ້ອງໃນເມືອງໂຣມ ລາວເວົ້າເຖິງຊື່ຂອງພີ່ນ້ອງຍິງ 9 ຄົນເປັນພິເສດ. (ຣມ. 16:1, 3, 6, 12, 13, 15) ແນ່ນອນວ່າພີ່ນ້ອງຍິງເຫຼົ່ານີ້ຄືຊິໄດ້ຮັບກຳລັງໃຈຫຼາຍແທ້ໆເມື່ອໄດ້ຍິນຄຳທັກທາຍແລະຄຳຊົມເຊີຍຈາກໂປໂລ. ເຮົາກໍຄືກັນ ເຮົາຄວນເອົາໃຈໃສ່ພີ່ນ້ອງຍິງທຸກຄົນໃນປະຊາຄົມ. ເມື່ອເຮັດແບບນັ້ນ ເຮົາກໍສະແດງໃຫ້ເຫັນວ່າເຮົາຮັກເຂົາເຈົ້າແລະຖືວ່າເຂົາເຈົ້າເປັນສ່ວນໜຶ່ງຂອງຄອບຄົວເຮົາ.
ເພງ 136 ລາງວັນທີ່ດີທີ່ສຸດຈາກພະເຢໂຫວາ
^ ຂໍ້ 5 ພີ່ນ້ອງຍິງເຈິບັນຫາຫຼາຍຢ່າງ. ໃນບົດນີ້ເຮົາຈະເບິ່ງວ່າເຮົາຈະເອົາໃຈໃສ່ແລະໃຫ້ກຳລັງໃຈເຂົາເຈົ້າແນວໃດຄືກັບທີ່ພະເຢຊູໄດ້ເຮັດ. ເຮົາຈະຮຽນຈາກວິທີທີ່ພະເຢຊູໃຊ້ເວລາກັບຜູ້ຍິງ ເຫັນຄ່າເຂົາເຈົ້າ ແລະເວົ້າປົກປ້ອງເຂົາເຈົ້າ.
^ ຂໍ້ 5 ຊື່ສົມມຸດ
^ ຂໍ້ 6 ປຶ້ມອ້າງອີງຫົວໜຶ່ງບອກວ່າ: “ປົກກະຕິແລ້ວພວກລູກສິດຈະນັ່ງຢູ່ໃກ້ຕີນຂອງອາຈານ. ເຂົາເຈົ້າເຮັດແບບນີ້ຕອນທີ່ກຽມຈະເປັນອາຈານ ແຕ່ໃນສະໄໝນັ້ນບໍ່ອະນຸຍາດໃຫ້ຜູ້ຍິງເປັນອາຈານ . . . ດັ່ງນັ້ນ ພວກຜູ້ຊາຍຄົນຢິວຄືຊິຕົກໃຈຫຼາຍເມື່ອເຫັນມາຣີນັ່ງຢູ່ໃກ້ຕີນພະເຢຊູແລະຕັ້ງໃຈຟັງສິ່ງທີ່ເພິ່ນສອນ.”
^ ຂໍ້ 9 ຕອນທີ່ຜູ້ດູແລພະຍາຍາມຊ່ອຍພີ່ນ້ອງຍິງ ລາວຕ້ອງລະວັງເປັນພິເສດທີ່ຈະບໍ່ໄປຫາພີ່ນ້ອງຍິງຄົນດຽວ.
^ ຂໍ້ 14 ຄຳເພງ 68:11 (ລ.ມ.): “ພະເຢໂຫວາມີຄຳສັ່ງອອກໄປ ຜູ້ຍິງທີ່ປະກາດຂ່າວດີເປັນກອງທັບໃຫຍ່.”
^ ຂໍ້ 66 ຄຳອະທິບາຍຮູບ: ຮຽນແບບພະເຢຊູທີ່ສະແດງຄວາມສົນໃຈຜູ້ຍິງທີ່ສັດຊື່. ພີ່ນ້ອງຊາຍຄົນໜຶ່ງຊ່ອຍປ່ຽນຕີນລົດໃຫ້ພີ່ນ້ອງຍິງສອງຄົນ. ພີ່ນ້ອງຊາຍອີກຄົນໜຶ່ງໄປຢາມພີ່ນ້ອງຍິງທີ່ບໍ່ສະບາຍ ແລະພີ່ນ້ອງຊາຍອີກຄົນໜຶ່ງກັບເມຍສຶກສາປະຈຳຄອບຄົວກັບພີ່ນ້ອງຍິງແລະລູກສາວຂອງລາວ.
