1. Mudimwinyi wazatañawu ahela mukuloñesha, nawa kukalanyi kwamonañawu antu amavulu? (Talenu mwevulu wudi hakava.)

TWAZAÑALALAÑA chikupu hakwikala nawahela adikita muchipompelu. Chakutalilahu, akulañahu hakupompa nawa ashimwinaña nsañu yayiwahi. Amakwawu azatañaku mudimu wakuwahisha Itala daWanta nawa akamenaña akwawu akwakudifukula. Hela chochu, amonaña kukala. Amakwawu akamenaña anvwali jawu akula dehi. Amakwawu ayidimbululaña kudi antu amuchisaka chawu. Amakwawu niwena hiyanvwali ajiki, azataña nañovu kwakamena anyanawu.

2. Muloñadi chitwatela kuzatila nañovu kulonda tukolesheña ahela?

² Muloñadi chitwatela kukwashila ahela? Muloña kakavulu antu amukaayi hiyalemeshaña ambandaku. Kubombelahu, Bayibolu yatulejaña kukolesha ambanda. Chakutalilahu, kapostolu Pawulu walejeli chipompelu chamuRoma kumutambwila Fwibi “nakumukwasha muyuma yejima yikukaankilayi.” (Rom. 16:1, 2) Hakwikala kaFwarisi, Pawulu hadaha wadiñijili muchisemwa chawantu amweneña ambanda neyi amukunkulwayi. Ilaña hekaliliyi mukwaKristu, wamwimbujoleli Yesu nawa walemesheleña ambanda nikuyitiyila luwi.—1 Kor. 11:1.

3. Yesu wayimweneña ñahi ambanda, nawa ambanda elileña nkeñelu yaNzambi wayimweneña ñahi?

³ Yesu walemesheleña ambanda ejima. (Yow. 4:27) Hamweneña ambanda neyi chayimweneñawu kudi akulumpi jansakililu yawaYudeya amumafuku indiku. Mukanda wumu wahosha haBayibolu washimuna nawu: “Kwosi izu nidimu dahosheliyi Yesu dakusupisha hela kusawula ambandaku.” Ilaña Yesu walemesheleña chikupu ambanda elileña nkeñelu yaTata yindi. Chasweja kulema, wayimweneña nindi hiyahelindi nawa wayiteneneni hamu nawamayala amweneñayi neyi chisaka chindi.—Mat. 12:50.

4. Tukuhanjekadi muchinu chibaaba?

 ⁴ Yesu mpinji yejima wadiña wadiloñesha kukwasha ahelindi akuspiritu. Wadiña nakuyihameka nikuyihakwilaku. Tuhanjekenu chitunateli kumwimbujola Yesu kuhitila mukuyitoñojokelaku ahela.

5. Muloñadi ahela amakwawu chichayikalilaña kwikala nawamabwambu?

⁵ Wejima wetu, amanakwetu niahela, twakeñaña kwikala nawamabwambu amawahi. Hela chochu, mpinji jikwawu ahela chinateli kuyikalila kwikala nawamabwambu amawahi. Muloñadi? Talenu chahosheliwu antu amakwawu. Muhela wumu wejina daJordan * wahosheli nindi, “Chineli nidi mujiki, kakavulu natiyaña nami hinatela kwikala namudimu muchipompeluku, natiyaña nami hinatelela kwikala muchipompeluku.” Kristen, payiniya wabuukilili kwiluña dacheñi nakukalakala chikupu mumudimu wakushimwina wahosheli nindi, “Neyi wudi wamuha muchipompelu, wunateli kutiya wuudi.” Amanakwetu amakwawu niwena dichinateli kutiyawu. Antu ejima ashakamaña nawantu amuchisaka abula kwikala aYinsahu jaYehova nateli kutiya nindi waambuka nachisaka chindi nawa hampinji yoyimu nateli kutiya neyi waambuka nachisaka chindi chakuspiritu. Ahela anateli kutiya wuudi muloña wakukata nawa hiyanateli kufuma hetalaku, neyi chinateli kutiyawu ana ahembaña antaña jawu akata. Annette wahosheli nindi, “Nakaanineña kuya nakuhanjeka nawamanakwetu niahela muloña yami nadiña nakuhemba amama.”

6. Yesu wayikwashili ñahi aMata naMariya, kwesekeja nachasonekawu haLuka 10:38-42?

⁶ Yesu wadiña nakuhanjeka nawahela jindi akuspiritu nawa wadiña ibwambu dawu walala. Shinshikenu hadi amabwambu jindi aMariya naMata, wejima wawu adiña ajiki. (Tañenu Luka 10:38-42.) Chakadi nikujina, mazu niyuma yelileñayi Yesu yayikojejeli kwikala akasunuka. Mariya wakasunukili nakushakama kunyendu yindi hamu neyi kambanji. * Nawa Mata chatiyili kutama muloña wakwila Mariya wamukwashiliku kuloñesha yakuda wanyi, wakasunukili nakumulejamu Yesu yuma yadiña kumuchima windi. Haniyi mpinji, Yesu wayikwashili awa ambanda kuspiritu. Wamwekesheli nindi wayakameneni awa ambanda nimanakwawu Lazaru, kuhitila mukuyihempula mpinji jikwawu. (Yow. 12:1-3) Dichi Lazaru chakatiliyi nankashi, aMariya naMata elukili nawu anateli kulomba wukwashu kudi Yesu.—Yow. 11:3, 5.

7. Njilanyi yimu mutunateli kukoleshela ahela?

⁷ Ahela amakwawu, chayawu kukupompa diyi mpinji yadimonañawu nawakwawu akwakudifukula. Dichi twatela kuzatisha iyi mpinji kuyitambwila, kuhanjeka nawu kulonda amoni nawu twayakamenaña. Jordan, itwatena hakusambila wahosheli nindi, “Nakoleshewaña chikupu neyi amanakwetu niahela anhameka chinakulahu hakupompa, azata nanami mumudimu wakushimwina hela amwekesha nawu añakamenaña munjila jashiyashana.” Ahela atela kwiluka nawu twayilemesha chikupu. Kia wahosheli nindi: “Neyi nijiña kukupompa, nelukaña nami kudi muntu wukuntemeshela meseji nakuñihula neyi chakwila nakata hela nehi. Chumichi chankwashaña kwiluka nami amanakwami niahela añusha muchima.”

8. Njilanyi jikwawu mutunateli kumwimbujolela Yesu?

⁸ Kufwana Yesu, ninetu tunateli kwikala nampinji yakuhanjeka nawahela. Hadaha tunateli kuyitambika kwinza nakudiila hamu nanetu hela kuhemena hamu nawu. Neyi tuyitambika, twatela kuhanjeka hohu hansañu yinateli kuyikolesha.  (Rom. 1:11, 12) Akulumpi atela kwikala nayilwilu neyi yadiña naYesu. Welukili nindi amakwawu kushakama wujiki kunateli kuyikalila, dichi wayilejeli hatooka nindi bayi neyi kusumbuka hela kwikala nanyana diyi yuma yaletaña muzañalu wahaya nyaakaku. (Luka 11:27, 28) Ilaña muzañalu wahaya nyaaka wafumaña mukutwamijaku mudimu waYehova.—Mat. 19:12.

9. Yumanyi yinateli kwilawu akulumpi hakwila akwashi ahela?

⁹ Sweje-e dinu, akulumpi atela kumonaña ambanda akwaKristu neyi hiyahela jawu niamama jawu akuspiritu. (1 Tim. 5:1, 2) Akulumpi akwilaña chiwahi neyi akwikalaña nampinji yakuhanjeka nawahela henohu kupompa kanda hela hanyima yakupompa. Kristen wahosheli nindi: “Mukulumpi wamweni nindi ami nakasiki nanyidimu nawa wakeñeleña kwiluka chadiña ndandanda yami. Namusakililili nankashi hakuñusha muchima.” Neyi akulumpi ekalaña nampinji yakuhanjeka nawahela jawu akuspiritu, akumwekesha nawu ayakamenaña. * Annette, itwashimuna hakusambila washimwini kuwaha kwekala mukuhanjeka nawakulumpi mpinji yejima. Wahosheli nindi: “Nayilukaña chikupu chekalawu nawa niwena añilukaña chinekala. Dichi neyi inakuhita mukweseka kwasweja, nekalaña wakasunuka kuyilomba wukwashu.”

10. Chumanyi chinateli kukwasha ahela jetu kwikala namuzañalu?

¹⁰ Wejima wetu, amayala niambanda, twazañalalaña neyi antu amakwawu eluka wuswa wutukweti nawa atuleja nawu asakililaña hamudimu wutwazataña. Kwambukaku, neyi antu hiyanakusakilila hanyidimu yitwazatañaku, twazeyaña. Payiniya mujiki wejina daAbigail wetejeli nindi mpinji yikwawu wamonaña neyi hiyamushaña maanaku, wahosheli nindi: “Ammonaña hohu nawu nidi muhela awakanaña wakumujimba hela mwana kawakanaña. Mpinji yikwawu natoñojokaña nami ammonaña wanyi.” Hela chochu, tiyenu cheñi chahosheliyi muhela Pam. Hadiñayi mujiki, wazatili wumishonali hadi yaaka yayivulu. Nkumininaku wafuntili kwitala nakwakamena anvwali jindi. Chayinu mpinji wudi muyaaka yamuma 70 nawa wuchidi kuzata wupayiniya. Pam wahosheli nindi: “Chuma chinankwashi nankashi hikutiya antu amakwawu anakunleja nawu asakililaña hamudimu wunazataña.”

11. Yesu wamwekesheli ñahi nindi walemesheli ambanda adiña nakumukwasha mumudimu windi wakushimwina?

¹¹ Yesu walemesheli wukwashu watambwilileñayi kudi ambanda amukeña Nzambi “adiña nakuzatisha yuma yawu” hakumukalakela. (Luka 8:1-3) Hayitejeli hohu kumukalakelaku, ilaña wadiña nakuyidizisha cheñi chalala hankeñelu yaNzambi. Chakutalilahu, wayilejeli nindi wakafwa nawa wakasañuka. (Luka 24:5-8) Wayikwashili awa ambanda kudiloñesha hakweseka kukamonawu kumbidi neyi chochakwashiliyi apostolu. (Maku 9:30-32; 10:32-34) Nawa hela chakwila apostolu atemukili hamukwatiliwu Yesu, ambanda amu amukwashili adiña kwakwihi nayena hampinji yafwileñayi hamutondu wakuyandishila.—Mat. 26:56; Maku 15:40, 41.

12. Yesu wenkeli ambanda mudimwinyi?

¹² Yesu wenkeli ambanda mudimu walema. Chakutalilahu, ambanda amukeñeli Nzambi diwu adiña atachi kumona chasañukiliyi. Wayinkeli awa ambanda mudimu wakuleja apostolu nindi anamusañuli mudi afu. (Mat. 28:5, 9, 10) Nawa haPentekosta 33 C.E., hadaha awa ambanda adiña hohu mpinji yayiwayishiliwu atumbanji naspiritu yajila. Neyi adiña hohu, dikwila nawu awa ahela awayishiluwu atela atambwilili wuswa wakuhosha mumadimi acheñi nikulejaku amakwawu “hanyidimu yaNzambi yañovu.”—Yilw. 1:14; 2:2-4, 11.

13. Nyidimwinyi yinakuzatawu ambanda akwaKristu makonu, tunateli kumwekesha ñahi kusakilila hanyidimu yazatañawu?

¹³ Ahela jetu akeñekaña kuyihameka hayuma yejima yelañawu mumudimu waYehova. Muniwu mudimu munabombeli kutuña nikuwahisha matala, kukwasha mazanvu ahoshaña idimi dacheñi nikuzatila haBeteli. Azatañaku mumudimu wakukwasha antu anaholokeli muwubanji, akwashaña kubalumuna nyikanda yetu nawa azatañaku wupayiniya niwumishonali. Kufwana amanakwetu, ahela ayaña kushikola yawapayiniya, Shikola Yawakwakushimwina aWanta nikuShikola yaGileyadi. Kubombelahu, ambanda akwashaña anfumu jawu kukalakala nyidimu yalema muchipompelu nimukuloñesha. Awa amanakwetu hiyamayala ahanawu “kwikala yawaana” nawa azataña nyidimu yayivulu kulonda akwashi amakwawu. Dichi, chadi kuyikalila chikupu neyi chakwila añodi jawu hiyanakuyikwashaku. (Efwe. 4:8) Kudihu njila mumunateli kuyikwashila awa ahela mumudimu wazatañawu?

14. Kwesekeja nachinashimuniwu haMasamu 68:11, chumanyi chelañawu akulumpi akweti kanshinshi?

¹⁴ Akulumpi akweti kashinshi eluka nawu ahela ‘hiizaza deneni’ dawakwakukalakala adihana nawa kakavulu ekala hakachi kawakwakushimwina nsañu yayiwahi ashikahu. (Tañenu Masamu 68:11.) Dichi enu akulumpi esekenu kudizila kudi ahela. Abigail, itwatena hakusambila wasakililaña neyi amanakwetu amwihula njila jamonayi nindi jazatikaña chiwahi  hakushimwina antu amwiluña dawu dakushimwina. Wahosheli nindi, “Chumichi chankwashaña kwiluka nami Yehova wanyinka mudimu walema wunatela kuzata mukuloñesha kwindi.” Kubombelahu, akulumpi eluka nawu ahela ashinshika nawa apama azataña chiwahi hakukwasha ahela atwansi anakuhita mukukala. (Tit. 2:3-5) Chakadi nikujina, twatela kuyihameka ahela jetu!

15. Mpinjinyi yitunateli kuhakwilaku ahela?

¹⁵ Mpinji yikwawu ahela akeñekaña muntu wakuyihakwilaku neyi amona kukala. (Isa. 1:17) Chakutalilahu, muhela ntuluwa hela anaseñiwu wakeñekaña wakumuhakwilaku nikumukwashaku kuzata nyidimu yazatileñayi nfumwindi. Muhela wakula dehi nateli kukeñaku muntu wakumukwashaku kuhanjeka nawandotolu. Indi kwiji muhela wazataña nyidimu yamukuloñesha kwaYehova nateli kukeña muntu wakumuhoshelaku neyi amakwawu anakuhosha nawu nakuzata nankashi wanyi mumudimu wakushimwina neyi chelañawu akwawu apayiniya. Njilanyi yikwawu mutunateli kukwashila ahela? Tushinshikenu cheñi chuma cheliliyi Yesu.

16. Kwesekeja nachasonekawu haMaku 14:3-9, Yesu wamuhakwililiku ñahi Mariya?

¹⁶ Yesu wanyakeleña kuhoshelaku ahelindi akuspiritu neyi anakuyinka nyiloña kudi antu. Chakutalilahu, wamuhakwililiku Mariya hamwinkeleñawu nyiloña kudi Mata. (Luka 10:38-42) Wamuhakwililiku Mariya kamuchiyedi hamuhosholeliwu kudi antu atoñojokeleña nawu wafuukwili mwaluwa. (Tañenu Maku 14:3-9.) Yesu welukili chuma chaletesheli Mariya yafuukuli muniyi njila nawa wamuhamekeli nindi: “Nanzatili mudimu wawuwahi. . . . Neli chuma chatela kwilayi.” Nawa waprofweteli nindi chuma chachiwahi chineliyi akachishimuna “kwejima kwakashimwinawu nsañu yayiwahi mwahita kaayi kejima,” neyi chinakwila achinu chibaaba. Yesu hamuhamekeliyi Mariya hachuma chachiwahi cheliliyi wahosheli nihansañu yayiwahi nindi akayishimwañena mwahita kaayi kejima. Awa mazu atela amukolesheli Mariya hanyima yakumwila kudi antu nawu nafuukuli mwaluwa.

17. Shimunenu chakutalilahu chinakumwekesha hitwatela kuhakwilaku muhela.

¹⁷ Komana mwahakwilañaku ahela neyi anakuyinka nyiloña? Shinshikenu ichi chakutalilahu. Akwakushimwina amonaña muhela wasumbuka neyala wabula kwikala Chinsahu nakulaba kukupompa kakavulu nawa neyi kupompa kunamani wayaña swayi kwitala. Nawa havula kusenda anyanindi kukupompaku. Dichi hiyakudihoshesha nakumwinka muloña nawu watela kumuleja nfumwindi kulonda yamwitejeña kusenda anyana kukupompa. Hela chochu, wena aneluki wanyi nawu muhela nakuzata ñovu. Hakweti wuswa wejima hayuma yafuukulañayi kwilaku, nawa hidiyi wafuukulaña yuma yatela kwila anyanaku. Indi enu munateli kwila ñahi? Neyi mumuhameka muhela nikuleja amakwawu chazatañayi nañovu, amakwawu akuleka kumwinka nyiloña.

18. Njilanyi jikwawu mutunateli kukwashila ahela?

¹⁸ Tunateli kumwekesha netu twakamenaña ahela neyi tuyililañaku yuma yinateli kuyikwasha. (1 Yow. 3:18) Annette muhela wahembaña amama yindi akata wahosheli nindi: “Amanakwami niahela enjileña nakunkwasha kulonda nikaliku nampinji yakwila yuma yikwawu, hela kunletelaku yakuda. Chumichi chaletesheli niiluki nami ankeña nawa nami nidi wamuchipompelu. Jordan niyena amukwashili. Amudizishili chakuloñesha motoka yindi kudi amanakwetu. Wahosheli nindi: “Natiyaña kuwaha kwiluka nami amanakwami añakamenaña nawa akeñaña nawu nibuli kwikala mumaposu neyi inakwendesha motoka yami.”

19. Njilanyi jikwawu akulumpi munateli kukwashilawu ahela?

¹⁹ Akulumpi niwena atela kukwasha ahela muyuma yinakaankiliwu. Eluka nawu Yehova wakeñaña nindi akameneña chiwahi ahela. (Yak. 1: 27) Dichi embujolaña Yesu nawa atoñojokelañaku akwawu hakubula kutuña nshimbi hanabuli kutelela. (Mat. 15:22-28) Akulumpi azataña nañovu kukwasha ahela, aleteshaña ahela kutiya nawu ayakamenaña kudi Yehova nichipompelu chindi. Mukulumpi wezanvu mwekalayi Kia chelukiliyi nindi iwu muhela nakubuukila mwitala dacheñi, hohenohu waloñesheli njila yakumukwashilamu. Kia washimwini nindi: “Chiteli chami champeleleli chikupu. Mazu awu akukolesha niwukwashu wawu, yumiyi yankwashili kwiluka nami anlemesha muchipompelu nawa nami neyi nidi mukukala hinekala nkawamiku.”

20-21. Tunateli kumwekesha ñahi netu twalemesha ahela akwaKristu ejima?

²⁰ Muyipompelu yetu makonu mwekala ahela akwaKristu amavulu akeñekaña kuyikwasha. Tunadizili kudi Yesu chitunateli kuyikwasha kuhitila mukwikala nampinji yakuhanjeka nawu nikuyiluka chiwahi. Tunateli kuyihameka chazatañawu mumudimu waNzambi. Nawa tunateli kuyihakwilaku neyi anakuyinka nyiloña.

²¹ Kumakumishilu amukanda wayisonekeleliyi Aroma, kapostolu Pawulu wateneni ambanda akwaKristu hamajina. (Rom. 16:1, 3, 6, 12, 13, 15) Chakadi nikujina awa ambanda atiyili kuwaha chayimushiliyi nikuyihameka. Dichi ninetu twatela kukwasha ahela ejima muchipompelu chetu. Neyi twila mwenimu, tukumwekesha netu twayilemesha hamu neyi ahela jetu akuspiritu.