1. Kouma bann ser soutenir lorganizasion Zeova, ek ar ki difikilte boukou fer fas? (Get zimaz lor kouvertir.)

NOU vremem apresie ki ena boukou ser ki travay dir dan nou lasanble! Par exanp, zot partisipe dan renion, ek zot pres ek ansegn bon nouvel lor Rwayom Bondie. Sertin ede pou fer mintenans dan bann Lasal Renion, ek zot montre ki zot interese ar zot bann frer ek ser. Biensir, zot fer fas ar boukou difikilte. Sertin bizin pran swin zot bann paran ki aze. Lezot gagn persekision avek bann manb zot fami. Ek sertin bizin elve zot bann zanfan tousel ek zot bizin travay dir pou donn zot zanfan seki zot bizin.

2. Kifer nou bizin soutenir nou bann ser?

² Kifer nou bizin soutenir nou bann ser? Parski dan sa lemond-la, bann dimounn pa touletan donn bann madam respe ki zot merite. Anplis, Labib ankouraz nou pou soutenir zot. Par exanp, lapot Pol ti demann lasanble ki ti dan Rom pou akeyir Febe ek pou “asiste li dan ninport ki kitsoz ki li bizin.” (Rom. 16:1, 2) Kan li ti enn Farizien, Pol ti inflianse par enn kiltir kot bann dimounn ti panse ki bann madam inferyer. Me asterla ki li ti vinn enn Kretien, li ti imit Zezi ek li ti tret bann madam avek respe ek bonte.​—1 Kor. 11:1.

3. Kouma Zezi ti tret bann madam, ek kouma li ti konsider bann madam ki fer volonte Bondie?

³ Zezi ti tret tou bann madam avek respe. (Zan 4:27) Fason ki li ti konsider bann madam ti diferan ar fason ki bann sef relizie Zwif dan so lepok ti konsider bann madam. Avredir, enn liv referans lor Labib dir: “Zame Zezi pa’nn dir enn  kitsoz ki ti denigre ouswa abes bann madam.” Anplis, Zezi ti ena boukou respe pou bann madam ki ti fer volonte so Papa. Li ti konsider zot kouma so bann ser ek pou li, zot ti form parti so fami spiritiel parey kouma bann misie.​—Mat. 12:50.

4. Ki nou pou examine dan sa lartik-la?

⁴ Zezi ti touletan dispoze pou ed bann madam ki servi Bondie. Li ti montre ki zot ti inportan pou li ek li ti defann zot. Anou gete kouma nou kapav imit Zezi kan nou ena konsiderasion pou nou bann ser.

5. Kifer sertin ser trouv sa difisil pou gagn bann bon kamarad?

⁵ Nou tou, nou bizin ena bann bon kamarad. Me parfwa, nou bann ser kapav trouv sa difisil pou gagn bann bon kamarad. Kifer? Anou gete seki sertin ser dir. Enn ser ki apel Jordan * dir: “Parski mo selibater, souvan mo ena linpresion ki mo pena mo plas dan lasanble.” Kristen, enn pionie ki’nn al servi kot bizin led, dir: “Kan to fek ariv dan enn nouvo lasanble, to kapav santi twa tousel.” Sertin frer osi kapav ena sa bann santiman-la. Bann ki tousel dan laverite, kitfwa zot santi zot mwin pros ar so fami ek anmemtan lwin ar zot bann frer ek ser spiritiel. Sertin ser kitfwa santi zot tousel parski zot bizin res lakaz akoz zot malad, ouswa parski zot bizin pran swin bann manb zot fami ki malad. Annette dir: “Mo pa ti kapav aksepte linvitasion bann frer ek ser parski mo ti bizin pran swin mo mama.”

6. Dapre Lik 10:38-42, kouma Zezi ti ed Mari ek Mart?

⁶ Zezi ti pas letan avek so bann ser spiritiel, ek li ti enn vre kamarad pou zot. Anou get lamitie ki Zezi ti ena avek Mari ek Mart, ek li paret ki toulede ser ti selibater. (Lir Lik 10:38-42.) Li kler ki par so bann parol ek so bann aksion, Zezi ti fer zot santi zot alez. Par exanp, Mari ti santi li alez pou asiz kot lipie Zezi, parey kouma enn disip abitie fer ar so ansegnan. * Kan Mart ti agase parski Mari pa ti pe ed li, Mart ti santi li alez pou dir Zezi seki li ti ena lor so leker. Dan sa moman-la, Zezi ti ed toulede pou aprann bann leson bien inportan. Zezi ti osi montre ki li ti apresie sa bann madam-la ek zot frer, Lazar, kan li ti rann zot vizit dan diferan lokazion. (Zan 12:1-3) Alor, kan Lazar ti bien malad, Mari ek Mart ti kone ki zot ti kapav rod led ar Zezi.​—Zan 11:3, 5.

7. Kouma nou kapav ankouraz nou bann ser?

⁷ Pou sertin ser, bann renion se samem lokazion ki zot ena pou pas letan avek zot bann frer ek ser. Alor, nou anvi sezi sa bann lokazion-la pou akeyir zot, koz avek zot, ek montre zot ki nou kontan zot. Jordan, ki nou ti mansione avan, dir: “Sa ankouraz mwa boukou kan lezot felisit mwa pou mo bann komanter, fer bann laranzman pou ki nou prese ansam, ouswa montre dan lezot fason ki zot kontan mwa.” Nou bizin fer nou bann ser kone ki zot inportan pou nou. Kia dir: “Si mo rat enn renion, mo kone ki kikenn pou avoy mwa enn mesaz pou pran mo nouvel. Sa montre mwa ki bann frer ek ser gagn mo traka.”

8. Dan ki fason ankor nou kapav imit Zezi?

 ⁸ Parey kouma Zezi, nou bizin fer zefor pou pas letan avek nou bann ser. Par exanp, nou kapav invit zot kot nou pou enn repa, ouswa nou kapav pas enn ti moman ansam avek zot. Ek kan nou fer sa, nou bann konversasion bizin ankourazan. (Rom. 1:11, 12) Bann ansien bizin ena mem latitid ki Zezi. Li ti kone ki sertin ti pou trouv sa difisil pou res selibater. Me li ti montre osi dan enn fason bien kler ki vre boner pa depann lor maryaz ouswa gagn zanfan. (Lik 11:27, 28) Okontrer, kan nou fer nou servis pou Zeova vinn nou priorite dan nou lavi, se lerla ki nou pou konn vre boner.​—Mat. 19:12.

9. Ki bann ansien kapav fer pou ed bann ser?

⁹ Bann ansien bizin konsider bann madam ki servi Zeova kouma zot bann ser ouswa zot bann mama. (1 Tim. 5:1, 2) Bann ansien bizin pran letan pou koz avek bann ser avan ek apre renion. Kristen dir: “Enn ansien ti remarke ki mo ti bien okipe ek li ti anvi konpran kouma mo organiz mo program. Mo ti vremem apresie ki li ti interes li ar mwa.” Kan bann ansien regilierman pran letan pou koz avek bann ser, zot montre ki zot gagn  zot traka. * Annette, ki nou ti mansione avan, explik enn parmi bann bienfe ki nou gagne kan nou koz regilierman avek bann ansien. Li dir: “Mo aprann konn zot pli bien, ek zot aprann konn mwa osi. Lerla, kan mo pe pas par enn sitiasion difisil, mo santi mwa alez pou rod zot led.”

10. Ki nou kapav fer pou ki nou bann ser santi zot bien?

¹⁰ Nou tou, nou kontan kan lezot remark nou bann kapasite ek dir nou ki zot apresie travay ki nou fer. Parkont, si personn pa rekonesan pou fason ki nou servi nou bann kapasite ouswa travay ki nou fer, sa kapav dekouraz nou. Abigail, enn ser selibater ki pionie, rekonet ki parfwa li santi ki personn pa pran li kont: “Lezot trouv mwa zis kouma intel so ser ouswa kouma intel so tifi. Parfwa, mo ena linpresion ki mo invizib.” Get seki enn lot ser ki apel Pam dir. Kan li ti selibater, li ti servi kouma misioner pandan plizir lane. Avek letan, li ti retourn lakaz pou okip so bann paran. Asterla, li ena anviron 70 an ek li ankor pe servi kouma pionie. Pam dir: “Seki plis ed mwa se kan lezot dir mwa ki zot apresie seki mo fer.”

11. Kouma Zezi ti montre ki li ti ena rekonesans anver bann madam ki ti akonpagn li dan so minister?

¹¹ Zezi ti bien rekonesan anver bann madam ki “ti servi zot dibien” pou ed li. (Lik 8:1-3) Li pa ti zis donn zot privilez pou servi li, me li ti osi ansegn zot bann verite inportan lor volonte Bondie. Par exanp, li ti dir zot ki li ti pou bizin mor ek resisite. (Lik 24:5-8, NW) Zezi ti prepar sa bann madam-la pou bann leprev ki zot ti pou gagne, parey kouma li ti fer avek so bann zapot. (Mark 9:30-32; 10:32-34) Kan bann dimounn ti aret Zezi, so bann zapot ti sove. Parkont, sertin parmi bann madam ki ti akonpagn li dan so minister, ti res avek li mem kan li ti pe mor lor enn poto.​—Mat. 26:56; Mark 15:40, 41.

12. Ki travay Zezi ti donn bann madam?

¹² Zezi ti donn bann madam enn travay bien inportan. Par exanp, kan Zezi ti resisite, se ar bann madam fidel ki li ti aparet an premie. Li ti donn sa bann madam-la responsabilite pou al dir bann zapot ki li ti resisite. (Mat. 28:5, 9, 10, NW) Pandan Lapantkot lane 33 Nou Lepok, kan bann disip ti gagn lespri sin, li posib ki ti ena bann madam. Alor, li posib ki zot osi zot ti gagn sa kapasite extraordiner pou koz dan lezot lang ek pou rakont bann “mervey Bondie.”​—Zist. 1:14; 2:2-4, 11.

13. Ki travay bann ser pe fer azordi, ek kouma nou kapav montre nou rekonesans pou travay ki zot pe fer?

¹³ Nou bann ser merite ki nou felisit zot pou tou seki zot fer dan zot servis pou Zeova. Sa inplik konstriksion ek mintenans bann batiman, soutenir bann group lang, ek port zot volonter dan Betel. Zot ede kan ena bann katastrof natirel, zot ede pou tradir nou bann piblikasion, ek zot servi kouma pionie ek misioner. Parey kouma bann frer, bann ser asiste lekol pionie, Lekol pou Bann Evanzelizater Rwayom Bondie, ek Lekol Galaad. Anplis, bann fam soutenir zot mari pou ki zot kapav asim zot bann responsabilite dan lasanble ek dan lorganizasion. Sa bann frer-la zot “kouma bann don” ek zot fer boukou kitsoz pou ed lezot. Me selman, sa ti pou difisil pou zot fer sa si zot madam pa ti soutenir zot. (Efe. 4:8, NW) Kouma to kapav soutenir sa bann ser-la pou travay ki zot fer?

14. An-akor avek seki’nn ekrir dan Psom 68:11, ki bann ansien ki ena sazes fer?

 ¹⁴ Bann ansien ki ena sazes rekonet ki bann ser zot “enn gran larme” ki dispoze pou travay, ek bien souvan zot parmi bann pli bon predikater bon nouvel Rwayom Bondie. (Lir Psom 68:11, NW. *) Alor, bann ansien kapav aprann ar lexperyans bann ser. Abigail, ki nou ti mansione avan, bien apresie kan bann frer demann li ki bann bon fason li’nn trouve pou koumans bann konversasion dan teritwar. Li dir: “Sa montre mwa ki Zeova ena enn travay inportan pou mwa dan so lorganizasion.” Anplis, bann ansien rekonet ki bann ser aze ki fidel, zot bien efikas pou ed bann pli zenn ser kan zot gagn bann difikilte. (Tit 2:3-5) Wi, vremem, nou bann ser merit nou lamour ek nou rekonesans!

15. Sit diferan sitiasion kot kitfwa bann ser bizin ki enn kikenn koz pou zot.

¹⁵ Parfwa, bann ser bizin ki enn dimounn koz pou zot kan zot fer fas ar enn problem presi. (Iza. 1:17) Par exanp, enn ser ki vev ouswa ki divorse kitfwa pou bizin ki enn kikenn koz pou li ek ed li pou fer bann kitsoz ki so mari ti abitie fer. Enn ser aze kitfwa pou bizin led kan li bizin koz avek bann dokter. Ouswa enn ser ki pionie ek ki pe fer bann lezot travay pou lorganizasion Zeova, kitfwa pou bizin ki enn kikenn koz pou li, si arive ki lezot kritik li, parski li pa pe pres osi souvan ki bann lezot pionie. Dan ki fason ankor nou kapav ed nou bann ser? Ankor enn fwa, anou get lexanp Zezi.

16. Dapre Mark 14:3-9, kouma Zezi ti defann Mari?

¹⁶ Kan bann dimounn ti ziz so bann ser spiritiel dan enn move fason, deswit Zezi ti defann zot. Par exanp, li ti defann Mari kan Mart ti kritik li. (Lik 10:38-42) Kan lezot ti kritik Mari parski zot ti panse ki li ti pran enn move desizion, Zezi ti defann Mari enn deziem fwa. (Lir Mark 14:3-9.) Zezi ti konpran Mari so bann mobil ek ti felisit li. Zezi ti dir: “Li finn fer enn gran kiksoz pou mwa. . . . Li, li finn fer seki li ti kapav fer.” Zezi ti mem profetize ki sa bon aksion ki Mari ti fer la, ti pou rakonte “partou kote dan lemond antie kot Bonn Nouvel pou anonse,” ek se seki sa lartik-la pe fer. Li vremem interesan ki Zezi inn fer enn lien ar predikasion ki pou fer dan lemond antie ek aksion ki Mari ti fer! Pena dout ki bann parol Zezi finn bien rasir Mari apre ki lezot ti ziz li dan enn move fason!

17. Donn enn lexanp pou montre dan ki sitiasion kitfwa nou bizin defann enn ser.

¹⁷ Eski to defann to bann ser spiritiel kan li neseser? Par exanp, mazinn sa senn-la. Sertin proklamater remarke ki enn ser ki tousel dan laverite souvan ariv tar renion, ek deswit kouma renion fini, li ale. Zot remarke osi ki li pa tro amenn so bann zanfan Lasal. Alor, zot kritik li parski zot panse ki li ti bizin demann so mari pou les li amenn so bann zanfan renion. Me an realite, sa ser-la pe fer tou seki li kapav. Li pena enn foul kontrol lor so program, ek se pa zis li tousel ki pran bann desizion konsernan so bann zanfan. Ki to kapav fer? Si to felisit ser-la ek to dir lezot bann bon kitsoz ki li pe fer, kitfwa zot pou aret kritik li.

18. Sit lezot fason kouma nou kapav ed nou bann ser.

¹⁸ Nou kapav montre nou bann ser ki kantite nou trakase pou zot kan nou ed zot dan enn fason pratik. (1 Zan 3:18)  Annette, sa ser ki okip so mama ki malad la, dir: “Sertin kamarad ti amenn manze ouswa ti vinn okip mo mama, lerla mwa mo ti kapav fer lezot kitsoz. Mo trouve ki lezot kontan mwa ek ki mo form parti lasanble.” Jordan osi ti gagn led. Enn frer ti montre li kouma pou fer mintenans so loto. Li dir: “Sa fer plezir pou trouve ki bann frer ek ser trakase pou mo sekirite.”

19. Dan ki lezot fason ankor nou kapav ed bann ser?

¹⁹ Bann ansien osi fer sir ki bann ser ena seki zot bizin. Zot kone ki Zeova anvi ki nou tret nou bann ser bien. (Zak 1:27) Alor, bann ansien imit Zezi ek zot rezonab. Zot fer sa kan zot pa met bann lalwa dan bann sitiasion kot li ti pou pli bon ki zot fer bann exsepsion. (Mat. 15:22-28) Kan bann ansien fer zefor pou ed bann ser, zot fer sa bann ser-la santi ki Zeova ek so lorganizasion kontan zot. Kan Kia so responsab group predikasion ti aprann ki li ti pe demenaze, deswit li ti pran bann dispozision pou ed li. Kia dir: “Sa ti bien diminie mo stres. Zot bann parol ankourazan ek led pratik ki zot inn donn mwa, ti vremem montre mwa ki mo enn manb inportan dan lasanble ek ki mo pa tousel kan mo dan bann sitiasion difisil.”

20-21. Kouma nou kapav montre ki nou kontan tou nou bann ser spiritiel?

²⁰ Azordi, kan nou get dan nou bann lasanble, nou trouv boukou ser fidel ki pe travay dir ek ki merit nou soutien. Parey kouma Zezi, anou ed nou bann ser kan nou pas letan avek zot ek kan nou aprann konn zot. Nou kapav montre nou rekonesans pou seki zot fer dan zot servis pou Bondie. Ek anou defann zot kan li neseser.

²¹ Dan let ki lapot Pol ti ekrir bann Romin, dan lafin, li ti mansionn nom nef ser ki fidel. (Rom. 16:1, 3, 6, 12, 13, 15) Pena dout ki sa ti bien ankouraz sa bann ser-la kan zot ti tann bann salitasion ek bann felisitasion Pol. Nou osi, anou soutenir tou bann ser dan nou lasanble. Koumsa, nou pou montre ki nou kontan zot parski zot form parti nou fami spiritiel.