1. Mabasa enaapariwa arogola munikuruni mwa Yehova baavi, ki makathamiho baani enafwanyiwa? (Osugwe fotu yavakapani.)

NNOHAGALALA okanna arogola mmulogoni enilibihedha. Motajhiha, aliwa enokosa dhipaddi omutugumanoni ni enowapara mabasa oolaleya. Amodha enokavihera osamalela Nyumba Dhomwene ni enowapwatha addibila ni arogola amodha. Ebaribari wi aliwa enofwanyiwa makathamiho. Amodha enowasamalela Ababiwa yuluvale. Teto amodhaya enoharahariwa ni amudhiwa. Ohiya eyo, arogola amodha enowalela aniwa yekiwa ni enowilibihedha wihina yaasamalele epaddi yomwilini.

2. Mwahaya bwaddi egahoweleya wakavihera arogola?

² Mwahaya bwaddi egahoweleya wakavihera arogola ammulogoni? Mwaha bowi, mwilaboni ahiyana enotabusiwa vanlubale. Ohiya eyeneve, Bibliya ononikongomedha wakavihera aliwa. Motajhiha, murumiwi Pawulo ahikongomedha mulogo wo Roma wi emwakele Febe ni envahe ‘nikavihero enahoweleya.’ (Rom. 16:1, 2) Ninga mafarizewu, podi wera Pawulo kaariha ahiyana. Mbwenye nuukala mukiristawu oliye wambela omutajhiha Yesu ni wavahaga thima ahiyana.  — 1 Cor. 11:1.

3. Yesu aweddiha avi ahiyana, Ki ale yilibihedha werana efunelo ya Ababe awoona ni makalelo baani?

³ Yesu owavaha thima ahiyana atene. (João 4:27) Oliye kaweddiha ahiyana ninga anamaholela gereja amudhidhi waye. Livuru enithaniwa esikulopediya a Bibliya nnawoga negi: “Jesus nunca disse nada que pudesse ofender ou rebaixar as mulheres.” Yesu owavaha thima ahiyana yerana efunelo ya Ababe. Oliye owawoona ninga arogola, ni owawoga ninga awogiliye alobwana  amodha awoniye ninga amudhaaye. — Mat. 12:50.

4. Yohudhera ela nnazuze ddi?

⁴ Yesu owiivahedha wihina aakavihere ahiyana yamulabela Mulugu. Oliye owerana eyo ajhaga mudhidhi naaliwa, teto owavaha thima ni owawakihedha. Vano nnafuna none makalelo omutajhiha oliye wodhela wavaha thima arogola.

5. Mwahaya bwaddi arogola amodha ehidhowaga waredha ni addibila amodha?

⁵ Iyo atene, addibila ni arogola, nnohowela wandana wapama. Mbwenye malabo mamodha eyo enowarusa arogola amodha. Mwahaya bwaddi? Wi ninone, osugwe ethu ewogile arogola amodha. Jordan * onowoga egi: “Mwaha okala muddiye, ginona wi soorusa woona mburo waaga mmulogoni, enakala ninga kaginna thima.” Kristen, piyonera atamele murudda mmodha enahoweleya anamalaleya onowoga egi: “We watamela mulogo mmodha, podi wonaga wi oli weka.” Arogola amodha enowiyoona nimakalelo yayo. Muthu di muthu anakala vamuralani wogawanyeya, podi wonaga wi kaandanile ni amudhaaye, teto podi wonaga wi addibila ammulogoni eli wolapelana ni oliye. Arogola ehinavenyavo vaade mwaha woredda obe ale enaasamalela amudhiwa eli aredda, podi wonaga wi eli yekiwa. Annette onosoriha egi: “Amamaga yaroromela nikavihero naga, bumwahaya addibila yaagithana wihina ndowe naredhe miyo geresa okoodda.”

6. Ninga anawoga Lucas 10:38-42 Yesu amukavihere ni makalelo baani Maria ni Marta?

⁶ Yesu oojhesa mudhidhi naarogola ammuroromeloni. Oliye aali mukwiwa ororomeleya. Wubuwele wandana anniyena ni Maria vamodha ni Marta. Podi wera aliwa yaali addiye. (Omwileri Lucas 10:38-42.) Yesu owoga ni owerana dhithu dhaahiya aliwa ohagalalene. Maria kaanna manyazo wokarati omoddoni wa Yesu ninga anamahara aye yeresiwana. * Teto Marta aali otapuwene wihina amwaddele Yesu wi ahinyanyuwa mwaha Maria ohumukavihera opiya yojha. Mudhidhi yole wowaredha Yesu ahimuhudhiha Maria ni Marta dhithu dhapama. Teto ela kiyaali dila yoroma Yesu adhowiliye wawaredhela. Oliye ahawaredhela dila dhowinjhivadhene, onihaga wi oomudhivela Maria, Marta ni murogoliwaya Lazaru. (João 12:1-3) Lazaru nufwanyiwa oredda, Maria ni Marta yahinona wi Yesu anona anere wakavihera.— João 11:3, 5.

7. Nnawedhe avi walibiha addibila?

⁷ Arogola amodha, omutugumanoni mburo enandiwa okala ni addibila ammuroromeloni. Bumwahaya nipathege mudhidhi yola wihina nawakele pama, nithapanyege ni aliwa, teto nawaddelege wihina nnowapwatha. Jordan awogiwe omambelelo, onosoriha egi: “Ginohagalala gatamaleliwaga mwaha yowakula yaga, ni amodha yapamganaga ni miyo wi ndowe mmalaleyelo, teto yeragana ethu-sithu enatonyihedha wi enogithuwathuwela.” Iyo nnohowela woniha wi arogolihu bathima. Kia onowoga egi: “Gahidhowa omutugumanoni, gihinona wi aliwa enere ogikohedha akala gili apamene. Eyo enogooniha wi addibila ammulogoni enogithuwathuwela.”

8. Makalelo mamodha omutajhiha Yesu baavi?

⁸ Ninga Yesu, nivedege mudhidhi wihina nithapanyege naarogola. Onoona avi wawithana wi mujhe vamodha obe mwaredhe vamodha?  Mudhidhi yola owogege dhithu dhoriya. (Rom. 1:11, 12) Akala oli namaholela mulogo wubuwelege yotajhiha ya Yesu. Oliye ahinona wi waathu amodha kahiyo ethu yokweya okala muddiye. Teto oliye ahoniha wi ohagalala kunadha baahi mwaha otela obe oteliwa ni okanna ahima. (Luc. 11:27, 28) Mwebaribarene xavi yohagalala, fuwaahela mabasa a Yehova mburo woroma.  — Mat. 19:12.

9. Anamaholela mulogo enere ddi wihina yakavihere arogola?

⁹ Thabwathabwa anamaholela mulogo enohowela wawona ahiyana ammulogoni ninga arogoliwa ni amayiwa oomuzimuni. (1 Tim. 5:1, 2) Sapama anamaholela opatha mudhidhi mutugumano ohunarome obe wamala wihina ethapanye ni arogola. Kristen onowoga egi: “Namaholela mulogo ahona wi mabasa yahigipinyaminya, vano oliye ogikoha mudhidhi waaga weedda avi. Miyo ohagalala gamonilimi wi ogithuwathuwela.” Anamaholela mulogo yavedaga mudhidhi wi ethapanye ni arogoliwa omuzimuni, aliwa enowoniha wi enowathuwathuwela. * Annette, awogiwe mundduli anowoga mareeliho erivo mwaha wothapanya ni anamaholela mulogo. Oliye onosoriha egi: “Eyo enogikavihera waanona pamadhene anamaholela mulogo, teto anamaholela mulogo enoginona  pamadhene. Gafwanyiwa makathamiho oorusa, ginakala otapuwene wihina gaalobe nikavihero.”

10. Ethu baani enaakavihere arogolihu okala otapuwene?

¹⁰ Iyo atene, alobwana obe ahiyana, nnakala ohagalalene akwihu yanona ele nnandihu werana ni yavahaga thima mabasa nnaparihu. Mwa epaddi emodha, muthu di muthu ahivahaga thima ndhe nnonilihu obe nnandihu werana, iyo podi okwerebeya. Piyonera ali muddiye anithaniwa Abigail, anorumedha wi malabo mamodha kanapwathiwa. Oliye onowoga egi: “Athu amodha enagoona ninga gili murogola nese obe mwaana ang’ana. Malabo mamodha ginowoona wi kaginoniwe.” Kasugwa yopadduwa emodha ya murogola anithaniwa Pam. Oliye ahinateliwe ohulaba yaka dhowinjhivadhene ninga misiyonariya. Vano ofiya mudhidhi wi ahogolowele vaade asamalelege makolo aye. Peeno Pam anna yaka okwaranya 70 ni onodhowave aaparaga mabasa oopiyonera. Oliye onowoga egi: “Enagikavihera baathu amodha yawogaga wi enoovaha thima dhatedhene gineriminna.”

11. Yesu oonihe addi wi owavahesa thima ahiyana yadhowedha mmalaleyelo nuliye?

¹¹ Ahiyana amodha ororomeleya yomukavihera Yesu ‘Ni dhorela dhewa’, mbwenye oliye oovaha thima wilibihedha wewa. (Luc. 8:1-3) Yesu kahiyile baahi ahiyana ale okanna oneti yoyo, mbwenye owawaddela dhithu dhomuzimuni dhorusa wonelamo. Motajhiha, ahawaddela wi oliye ere okwa ni ere ovenyihiwa. (Luc. 24:5-8) Ninga aweriliyena arumiwi, Yesu ahawegeredha ahiyana ale oororomeleya wodhela makathamiho yafwanye osogolo. (Mar. 9:30-32; 10:32-34) Kaniddiwaale wi Yesu agamagiwe anamaharaye yahithawa. Mbwenye agaali vantxikwani na goyi ahiyana ale yamukaviheresa yaali owimelene epaddi yaye emusugwaga. — Mat. 26:56; Mar. 15:40, 41.

12. Mabasa baani Yesu avahiliye ahiyana?

¹² Yesu ahavaha ahiyana mabasa athima. Motajhiha, athu ooroma yamoonile Yesu agavenyihiwe yaali ahiyana ale oororomeleya. Teto Yesu wavaha mutholo wihina yawaddele arumiwi aye wodhela ovenyihiwa waye. (Mat. 28:5, 9, 10) Ohiya eyo, podi wera va Pentekosteni a yaka ya 33, muzimu wotxena ogaamorele athu, ahiyana yaaligi vevale. Akala eyo yahipadduwa, ahiyana ale yahivahiwa gari yowoga dhiwogelo dhohiyana-iyana. Wa makalelo yala aliwa yahikanna mutholo wowawaddela athu amodha wodhela ‘dhithu dhotikiniha dha Mulugu’. — Atos 1:14; 2:2-4, 11.

13. Dhithu baani arogola eneriwana peeno munikuruni mwa Yehova, ki we onoonihe avi wi onovaha thima dhatedhene enapariwa?

¹³ Arogolihu enohoweleya otamaleliwa mwaha mabasa enapariwa mmulogoni mwa Yehova, ninga omaga ni osamalela Nyumba Dhomwene, okavihera nikuru nnawoga ewogelo ehili yewa, ni wapara mabasa owivelela obeteli. Teto, enowapara mabasa owivelela athu yapadduweliwa ngovi, otapulela malivuru, ni olaba ninga mapiyonera obe mamisiyonariya. Ninga addibila, arogola enodhowa oskola yamapiyonero, eskola yanamalaleya Oomwene ni eskola yojeliyadi. Ohiya eyeneve, ale eteliwe enowakavihera amamuniwa osamalela mutholo wewa enniwana mmulogoni obe munikuruni mwa Yehova. Addibila ayo enowanda okala ‘alobwana ninga gari’ mwaha wi ehikanna nikavihero naamwariwa. (Efé. 4:8) Onowubuwela makalelo owakavihera arogola ala mwaha dhatedhene enapariwa?

14. Nubuwelaga anawoga Salmo 68:11 anamaholela mulogo a thotho ethu baani eneriwana?

¹⁴ Arogola enokosa nikuru ‘naanyakoddo ninlubale’ nanamalaba owivelela. Teto aliwa  enowanda wapara mabasa oolaleya pamadhene. (Omwileri Salmo 68:11.) Anamaholela mulogo athotho ehinona yeyo, teto enoveda makalelo owatajhiha aliwa. Abigail, awogiwe mundduli anakala oolibene addibila yaamukohaga yegi: “Makalelo apama owambela othapanya ni muthu mmalaleyelo baavi?” Oliye onowoga egi: “Eyo enogikavihera woona wi Yehova onogivaha mburo mmulogoni mwaaye.” Ohiya eyo, Anamaholela mulogo ehinona wi arogola anroromelo owuluvala enowanda wakavihera pamadhene arogola azombwe yafwanyiwa makathamiho. (Tito 2:3-5) Mwebaribarene, arogolihu enofwanelela odhivela ni otamalela wehu!

15. Mudhidhi baani arogola enahoweliwa nikavihero naaddibila?

¹⁵ Malabo mamodha arogola enofwanyiwa makathamiho, ni enomuhowela muthu wihina awakihedhe. (Isa. 1:17) Motajhiha, murogola ali maamukwele obe mamune adduddumadhe vaade, podi wera onomuhowela muthu wihina amwakihedhe, obe amukavihere ni mabasa mamodha aaparesa mamune. Podi wera murogola owunnuwelavo anomuhowela muthu wihina athapanye ni mediku. Obe piyonera anaalaba mabasa mamodha oomuzimuni vano annohiya mabasa olaleya, podi omuhoowela muthu wi amwakihedhe amodha yaamukohaga mwahaya bwaddi ahidhowaga mmalaleyelo ninga apiyonero amodha. Ethu emodha nnafunihu werana wihina nakavihere arogolihu siivi? Dila yanabili nnafuna none yotajhiha ya Yesu.

16. Ninga anawoga Marcos 14:3-9, Yesu amwakihedhe avi Maria?

¹⁶ Yesu owawakihedha mowaguva arogoliye oomuzimuni aliwa yapambihiwaga naamodha. Motajhiha, oliye ahimwakihedha Maria mwaha wa Marta ampambihiye. (Luc. 10:38-42) Dila yanabili, yesu ahimwakihedhave Maria athu yampambihiwa yeraga kubuwele pama. (Omwileri a Marcos 14:3-9.) Yesu ahinona pama yamuthukulele Maria werana yothoma yaye, ni oliye omutamalela erega: ‘oliye ohugerela ethu yapama . . . oliye erilena ele andiliye werana’. Yesu ahivuhulela egi: ‘Mburo buumburo dhinaalaleyiwe muthenga dhapama wapela elabo yatene, ethu erilena muhiyana ola enere owogiwa ubuweliwaga oliye’ — ele awogile Yesu wodhela muhiyana ole, siyela enawogiwa va yohudhera ela ya peeno. Mohanganyedha, madhu a Yesu yahimulibiha Maria nuumala opambihiwa. Teto ethu yathimaya fuudhela olabihedha makalelo apama a Maria, wihina awoge wi mabasa olaleya yere ofiya wapela elabo yatene!

17. Onere ddi wihina wande omwakihedha murogola? Owoge yotajhiha.

¹⁷ We onowawakihedha arogoliyo ammuroromeloni aliwa yahowelaga wakihedhiwa? Motajhiha, kubuwela ethu ninga ela: Mmulogoni mwawo ohukalamo murogola anna mamune ahili namona. Anamalaleya amodha enowona wi oliye anafiyesa oribeliwene omutugumanoni, teto anadhowa nlobelo nogomihedha omalawene. Ohiya eyo, murogola ole kanaadhegena anaye omutugumanoni. Vano anamalaleya wambela ompambiha ewogaga wi: “Mwahaya bwaddi oliye kanamwaddela mamune ekokonkwene.” Mbwenye mwebaribarene murogola ole onowilibihedha werana ele anaandiye. Oliye kanathoma yeka dhithu dhatedhene anafuniye werana. Teto kahiyo oliye yeka anathoma dhithu dhatedhene anaye enafuniiwa weragana. Onere ddi wihina omwakihedhe? Omutamalele murogola ole wa dhithu dhatedhene anandiye werana, teto wathapanyaga ni athu amodha wawaddelege dhithu dhapama ananda werana murogola ole. Werana ndo, onere okavihera omariha dhowoga dhabure wodhela murogola ole.

18. Makalelo mamodha owakavihera arogolihu baavi?

 ¹⁸ Nnere woniha wi nnowadhivela arogolihu naakaviheraga ni dhithu enahoweliwa. (1 João 3:18) Annette murogola ole aasamalelesa amaye yaali aredda onowoga egi: “Addibila amodha yodhowesa vaade wihina egikavihere wasamalela amama obe edhena yojha. Mowindo miyo gowoona wi yogidhivela, teto gowoona wi ginokosa epaddi mmulogoni.” Jordan ahakela nikavihero nimodhave. Ddibila mmodha omuxagiha makalelo oosamalela karwaye. Oliye onowoga egi: “Sapama onona wi addibilaga enothuwathuwela egumaga.”

19. Makalelo baani Anamaholela mulogo enaakaviheriwa addibila?

¹⁹ Mwamakalelo mamodhave, Anamaholela mulogo esamalelege dhofuna dhaarogola. Aliwa ehinona wi Yehova anafuna arogola esamaleliwege pama. (Tia. 1:27) Anamaholela mulogo ekale owiyeviha ninga Yesu, yatorihege addibila nimakalelo owezeya. (Mat. 15:22-28) Aliwa yaakaviheraga athu amodha, arogola enowona wi Yehova ni mulogo enowathuwathuwela. Kia awogiwe mundduli, ahitama vaade vaye. Namasogolela anikuru naye nammalaleyelo nunona, mowaguva oliye omukavihera. Kia onowoga egi: “Eyo yahigikavihera makalelo aaga owubuwela. Madhu oolibiha Aanamaholela mulogo, nikavihero egivahiliwa nahigoniha wi miyo gihikanna thima mmulogoni. Gihinona wi podive gifwanyiwaga makathamiho, miyo kagili meeka.”

20-21. We onaatonyehedhe avi wi onowavaha thima arogola ammulogoni mwawo?

²⁰ Mulogo bu mulogo nnowafwanyamo arogola owinjhiva enahowela nikavihero. Ninga nihudherihu ni Yesu, naakaviherege arogola wodhela okala naaliwa mudhidhene, nanonaga pamadhene, teto nnohowela wawoniha wi nnovaha thima dhatedhene dhinneriwana mmulogoni mwa Mulugu. Nimarihaga, enohoweleya nawakihedhege, eyo yakala yofuneya.

²¹ Omagomihedho wa karta naye wa mulogo wo Roma, murumiwi pawulo ahawoga mandina aarogola owakwana atanu nennayi. (Rom. 16:1, 3, 6, 12, 13, 15) Mohanganyedha, arogola ala yahilibihiwa yiwaliwa mandiniwa ewogiwaga mudhidhi karta nna nileriwaga, elojheliwaga ni etamaleliwaga ni murumiwi Pawulo. Ninga Pawulo, wakavihere arogola atene ammulogoni mwawo. Mwamakalelo yala we onere wawoniha wi aliwa boofuneya mwimudhini yomuzimuni.