1. Mâ ǀgaugu ǃnâ di ǃgâsade ǀapeǂhomisa ra ǂkhâǃnâ tsî mâ ǃgomsina di ra hōǃgâ? (Tsoatsoas ai hâ ai-īsiba mû re.)

KAISE da ge ra ǃgâiaǂgao ǃgarise ra sîsen ǃgâsade da ǀhaohâb ǃnâ ūhâsa. Aiǁgause di ge ǁîde ǀhaodi tawa ǃeream tsî ra aoǁnâ. ǀNîdi ge ǀhû-omga hî-ūnu tsî ǃgâiǃgâibasensa nau khoen ǃnâ ra ǁgau. Xawe da ge a ǂan ǁîdi tsîn ge ǃgomsina ra hōǃâ. ǀNîdi ge kaira ǁgûna ra kōǃgâ. Tsî ǀnîdi ge omaris ǁanin xa ra māǃoahe. Tsî di ge naude ǃgamme tama di hâ xawe ǃgarise ra sîsen îdi ǁîdi omaride kōǃgâ.

2. Tae-i ǃaroma da ǁguiǂgāsen tsî sida di ǃgâsade nî ǂkhâǃnâ?

² Tae-i ǃaroma da tarekhoede ǃgôasiba nî ǁgau? Nē ǃhūbaib ǃnâ di tarekhoede hoaǁae ǃgôasiba ǁgauhe tama hâ amaga. Elobmîs ge ra ǂkhâǃnâ da îda hoaǁae ǁîde ǂkhâǃnâ. Aiǁgauseb ge apostel Pauluba Romes ǃnâ hâ Xristeǁîna ge mîba în Febesa harase tsâ kai tsî “ǁîsa hui.” (Rom. 16:1, 2) Paulub ge Farise i ob ge ǁîba tarekhoede ra ǃgôaǁnâ khoen ǀkha gere hâ. Xaweb ge a Xristeǁî kai ob ge, tarekhoede ǃgôa tsî ǃgâise gere hâ-ū, Jesub khami.—1Kor. 11:1.

3. Jesuba tarekhoede mati gere hâ-ū tsî matib ge Elob ǂâisa ra dī tarekhoede gere mû?

³ Jesub ge hoa tarekhoede ǃgôasib ǃnâ gere hâ-ū. (Jhn. 4:27) ǁÎb ge ǁîde Jodeǁî ǂgomdi ǂgaeǂgui-aogu ge, tarekhoede gere hâ-ū khama ge hâ-ū tama hâ i. ǀGui Elobmîs ôaǃnâ ǂkhanis ge ra mî: “Jesub ge tātsēs tsîna tarekhoede ra ǃgôaǁnâ ǀgaub ǃnâ ge ǃhoa tama hâ i.” Jesub ge ǀō-aisa ǃkhaisa tarekhoedi hîna ǁîb Dadasab di ǂâisa ra dīde ge ūba hâ i. ǁÎb ge ǁîde ǃgâsadi ase gere mû  tsî ǁîb omaris ǃâ di a khami gere hâ-ū.—Mat. 12:50.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Jesub ge tarekhoedi hîna Eloba ra ǃoabade hoaǁae gere hui. ǁÎb ge ǁîde gere ǁgau ǂhâǂhâsa di a ǃkhaisa tsî gere ǃhoaba. Hāre îda Jesub ge tarekhoede tsaurase gere hâ-ū ǀgauba da mati a ǁgae ǁkhāsa ǃhoaǃgao.

5. Tae-i ǃaroma di ǀnî ǃgâsade omkhâi tsî nî ǁgam-ū di khoena hōs ǀkha ǃgomsiba ūhâ?

⁵ Hoade ge nau khoen ǀkha ǁgamsa ǂhâ hâ. ǀNî ǁaegu ai di ge ǃgâsade nēs xa a ǃgombahe ǁkhā. Tae-i ǃaroma? Saora ǃgâsadi ra mî xū-e kō re. Jordan * di ǀon hâ ǃgâsas ge ra mî: “ǃGamme tama ta hâ amaga ta ge nē ǀhaohâb di ǃâ tama ta hâ khama ra tsâ.” Kristen di ǀon hâ aimâba-ao ǃgâsas hîna ge ǂhâsib hâ ǃkhaiba ǃoa a does ge ra mî: “ǀAsa ǀhaohâba ǃoats ga doe ots ge a ǀguri tsâsen ǁkhā.” ǀNî ǃgâsagu tsîn ge nēti ra tsâ. ǀHûǀguitimî-ao tama omaris ǁanin ǀkha ra hâ khoen ge a tsâ ǁkhā ǁîn ǃgâsana xu a ǀgorasa di. ǀNî ǃgâsadi ge ǀguri a tsâ ǁkhā ǁîdi ǀaesen hâ tamas ka io di ǁîdi omaris ǁani-i hîna ǀaesen hâ-e ra kōǃgâ amaga. Anettes ge ra mî: “ǁKhauhe ta gere ǃkhaina ǃoa ta ge ge ī ǁoa i, ti masa ta gere kōǃgâ amaga.”

6. Lukab 10:38-42 ǃnâb ge Jesuba Martas tsî Marias tsîra mati hui?

⁶ Jesub ge ǁîb gagasi ǃgâdi ǀkha gere hâ tsîb ge ǁîba ǁîdi ǃoa ge ǃgâi ǀhōsa i. Kō re ǁîb di ǀhōsagusis Marias tsî Martas ǀkhab ge ūhâ-isa. Hoara ge ǃgamme tama ge hâ-i. (Khomai re Lukab 10:38-42.) ǁÎb di mîdi tsî tanisen ǀgaub ǃnâb ge Jesuba ǁîra harase gere tsâ kai. Marias ge harase gere tsâ ǁîb di ǂaira ams ai ǂnû tsî ǁkhāǁkhāhesa. * Tsîs ge Martasa, Marias ge huisi tama hâ-i amagas ge ǁaixa o, Jesuba harase ge mîba ǁkhā i. ǁNā ǀhaos aib ge Jesuba nē gagasise ǀgaisa khoera ge hui. Tsîb ge ǁîra tsî ǁîra ǃgâb, Lasarub tsînab ǁaeba hâsa gere ǁgau, ǀkhara ǁaegu ai sari nîs ǃnâ-ū. (Jhn. 12:1-3) ǁNā-amaga ra ge Marias tsî Martas tsîra ge ǂan i Lasarub ge ǀaesen o ra Jesuba ǃoa nî īsa huib ǃaroma.—Jhn. 11:3, 5.

7. Mâ ǀgaub ai da ǃgâsade a ǂkhâǃnâ ǁkhā?

⁷ ǀNî ǃgâsadi ge nau ǃgâsan ǀkha kai-amse ǀhaodi ai ǀgui ra ǀhao. ǁNā-amaga da ge nē ǃede sîsen-ū tsî ǁîde harase tsâ kai, ǁîdi ǀkha ǃhoa tsî ǁîdi xa da ra ǂâi ǃkhaisa nî mîba di. Jordans ge ra mî: “Kaise i ge ra ǂkhâǃnâ te khoen ga tida ra mā ǃereamdi ǃgao koade, aoǁnâ sîsen-e ǃoa ǁkhaute tsî ga ra ǁgau o tida xan ra ǂâisa.” Sida di ǃgâsade da ge nî ǁgau ǂhâǂhâsa di a ǃkhaisa. Kias ge ra mî: “ǀHaosa ǃoa ta ga ī tama ga ra io, o ta ge a ǂan sms-e tsî ta ǂkhaisiba nî dîhesa. Nēs ge ra ǁgau ti ǃgâsan tida xa ǁae hâsa.”

8. Mâ ǀgaub ǃnâ da Jesuba a ǁgae ǁkhā?

⁸ Jesub khami da ge nî dītsâ îda sada di ǃgâsadi ǀkha ǃgâi ǁaeba ūhâ. ǀNîsi da ge ǁîde a ǁkhau ǁkhā ǂûǀhaos ǃaroma. Nēsa  da ga dī o da ge omkhâira ǀgaub ǃnâ ǁîdi ǀkha nî ǃhoa. (Rom. 1:11, 12) ǀHaohâb ǃûi-aogu tsîn ge Jesub gere tanisen khama nî tanisen. ǁÎb ge ge ǂan i ǃgamme tamase hâs a ǃgom ǁkhāsa, xaweb ge mî tama ge hâ i ǃgammes, tamas ka io ǀgôana hōs hâhâ ra ǂkhîba nî hau ti. (Luk. 11:27, 28) Xawe da ge ǂkhîba nî ūhâ Jehovab di ǃoabasa da ga ǂgurose sida di ûib ǃnâ a mâi o.—Mat. 19:12.

9. ǀHaohâb ǃûiga mâ ǀgaub ǃnâ ǃgâsade ra hui?

⁹ ǀHaohâb ǃûi-aogu ge Xristeǁî ǃgâsade, gagasi ǃgâsadi tsî ǁgûdi ase nî mû. (1Tim. 5:1, 2) ǀHaohâb ǃûi-aogu ge ǁaeba ǁamaǂui tsî ǀhaos ais ai tamas ka io, ǀhoas ga toa o ǃgâsadi ǀkha nî ǃhoa. “ǀGui ǀhaohâb ǃûi-aob ge kaise ta a ǁaxasa mû tsî gere ǂan ǂgao ti tsēs mati ī sa,” tis ge Kristensa ra mî. “Kaise ta ge gere ǃgôaǃgâ ǁîb ge tida xa gere ǂâi amaga.” ǀHaohâb ǃûi-aogu ga ǁaeba ǁamaǂui tsî gagasi ǃgâsadi ǀkha a ǃhoa, os ge nēsa ra ǁgau ǁîgu ǁîde ra tsâbasa. * Annettes ge ra mî matis ra ǀamasa, ǀhaohâb ǃûi-aogu ǀkhas ga ǃhoa o. ǁÎs ge ra mî: “ǁÎga ta ge ǃgâise ra ǂan tsîgu ge ǁîgu  tsîna tida ra ǂan. Tsî i ga ǃgomsi-e hā o da ge harase ǁîgu tawa sī tsî huiba a ǂan ǁkhā.”

10. Tae-e sida di ǃgâsade nî ǂkhîǂkhî?

¹⁰ Hoada ge nau khoen ga sida di ǁkhasigu ǃgao a koada o kaise nēsa ra gangan. Xawe da ge khoe-i ga sida ra dī xūn ǃgao, ǃgôaǃgâsiba ǁgau tama ka io ra ǂkhabuǂâi. ǃGamme tama hâ aimâba-aos Abigails ge, mûhe tamas hâ khama ra tsâ. ǁÎs ge ra mî khoen ge ǁîs ǃgân tamas ka io ǁîs ǁgûn ǀguina a ǂan di. “Khoe-i mû te tama khami ta ge ra tsâ,” tis ge ra mî. Xawe ǃgaoǃgâ re Pams ra mî xū-e. ǃGamme tamas hâ hînas ge ǂgui kurina sîsabese gere aoǁnâ. Xawes ge ega omsa ǃoa ge oa ǁîs ǁgûra ge ǀaesen o. Nēsis ge hûdisis xa ǃnāsa kurina ūhâ tsî a aimâba-ao. Pams ge ra mî: “Nau khoen tida ra dī sîsen-i ǃgao ra gangan de ǃkhais ge ge huite.”

11. Jesuba mati ge ǁgau ǁîb tarekhoedi sîsen-e ra ǃgôaǃgâsa?

¹¹ Jesub ge eloǃaoǃgâxa taradi hîna ge “ǂgui xūn âdi ǀkha gere ǃoaba” bi de kaise gere ǃgôaǃgâ. (Luk. 8:1-3) ǁÎb ge ǁîde ǁnā aiǂhanub ǀguiba ge mā tama hâ i xawe ǂhâǂhâsa amaba Elob ǂâisa xu ge ǁkhāǁkhā. Aiǁgauseb ge ǁîde ge mîba ǁō tsîb ni khâisa. (Luk. 24:5-8) Tsîb ge ǁîb di apostel gab ge aiǂhomi khami ǁîdi tsîna hā nî ǃgomsib ǃgao ge aiǂhomi. (Mrk. 9:30-32; 10:32-34) Jesub ge ǃkhōsis ǃnâ ūhe o gu ge ǀnî apostel ga ǁîba xu ge bē, xawe di ge ǀnî tarade ǁîb ǀgūse ge hâ, ǃgâuhaib aib mâ hîna.—Mat. 26:56; Mrk. 15:40, 41.

12. Jesuba tarekhoede tae-i sîsen-i ǀkha ge ǂgomǃgâ?

¹² Jesub ge tarekhoede ǂhâǂhâsa sîsen-e ge mā. Aiǁgause di ge tarekhoede ge ǂguro i ǁîb di khâise ge mûde. ǁÎb ge nē tarekhoede ge mîba, îdi ǁîb di apostel ga mîba ǁōba xub ge khâisa. (Mat. 28:5, 9, 10) Tarekhoedi ge Pinkster 33ǁî kuri ǀnîsi ǁnapa ge hâ-i, ǁîb di ǁkhāǁkhāsabegab ge ǃanu gagab ǀkha gere ǂkhau-o. Ti i nî īs ga ra io di ge, ǀasase ge ǂkhauhe ǃgâsadi tsîna ǀkhara gowagu ǃna gere ǃhoa tsî khoena ‘Elob di kai dīgu’ xa gere mîba.—ǃNǃkh. 1:14; 2:2-4, 11.

13. Xristeǁî ǃgâsade nētsē tae-e ra dī tsî mati da nî ǁgau ǁîdi ra di sîsen-e da ra ǃgôaǃgâ ǃkhaisa?

¹³ Sida di ǃgâsadi ge a koahe ǁkhā, Jehovab di ǃoabas ǃnâ di ra dī sîsen-i ǃgao. Nē ǃoabadi ge oms, ǀhû-omga hî-ūnus, ǀkhara gowaga ra ǃhoa groepde ǂkhâǃnâs tsî māsenxase Bethels tawa sîsens tsîna ǃkhōǂgā hâ. ǁÎdi ge tsūkeǃgâb ga ra hâ o hui, ǂnûiǃkhuni, aimâba-ao tsî sîsabeses tsîna ra sîsen. Aore ǃgâsagu khami di ge ǃgâsadi tsîna aimâba-aon skoli, gaosib aoǁnâ-aon skoli, tsî Gilead skola ǃoa ra ī. ǁNās ǂam-ai di ge ǃgamme tarade ǁîdi aoga ra ǂkhâǃnâ îgu ǀhaohâb ǃnâ gu ūhâ sîsen-e dī. Nē ǂgomǂgomsa ǃgâsagu ge ‘khoen mādi’ ǁîgu ūhâde ǃamkuse ga sîsen-ū tama hâ ǁîgu taredi ga ǂkhâǃnâ gu tama hâ o. (Efe. 4:8) Mâ ǀgaugu xa du nî ǂâi i du sida di ǃgâsade ǂkhâǃnâ ǁîdi ra dī sîsen-i ǃnâ?

14. Psalmdi 68:11 ǃoagu i tae-e gā-ai ǀhaohâb ǃûi-aoga nî dī?

¹⁴ Gā-ai ǀhaohâb ǃûi-aogu ge ra mû ǂan ǃgâsadi “kaise a ǂgui” ǃkhaisa tsî di ǁîde ǃgâi aoǁnâ sîsen-e ra dī ǃkhaisa. (Khomai  re Psalmdi 68:11.) ǁNā-amaga gu ge ǀhaohâb ǃûi-aoga nē ǃgâsadi aiǁgaude xu nî ǁkhāǁkhāsen. Abigails ais ai goro ǃhoaǃgaohes ge ra ǃgôaǃgâ ǀhaohâb ǃûi-aogu ga ǁîsa ga ra dî o, mâ ǀgaugas aoǁnâ sîsen-i ǃnâ ra sîsen-ūsa. ǁÎs ge ra mî: “Nēs ge ra huite i ta mû Jehovab ǃkhai-e ǁîb di ǀapeǂhomis ǃnâ ūbate hâ ǃkhaisa.” ǁNās ǂam-ai gu ge ǀhaohâb di ǃûi-aoga ra mûǂan ǂgomǂgomsa tsî gā-ai ǃgâsadi, ǂkham ǃgâsade ra huisa, ǁîdi di ǃgomsigu ǃnâ. (Tit. 2:3-5) Amase di ge sida ǃgâsade sida ǀnammi tsî ǃgôaǃgâsiba anu hâ.

15. Mâ ǁaegu ai di ǃgâsade khoe-e ǂhâ hâ ǁîde nî ǃhoaba-e?

¹⁵ ǀNî ǁaegu ai di ge sida di ǃgâsade ǃhoabahesa ǂhâ hâ. (Jes. 1:17) Aiǁgause i ge ǃoataras tamas ka io aob ǀkha ǀgora hâ ǃgâsasa, ǁîsa nî ǃhoaba khoe-e ǂhâ hâ tsî ǁîs aob gere dī sîsenan ǀnîn ǀkhas nî huihesa ǂhâ hâ. Kaira ǃgâsas tsîn ge huiba ǂhâ hâ is dokteran ǀkha ǃhoabahe. Aimâba-ao ǃgâsas hîna Jehovab di ǀapeǂhomis, ǃnâ ǀkhara sîsen-e ra dīs tsîn ge khoe-e ǂhâ hâ is ǃhoabahe, ǀnî khoen ga aimâba-aoses aoǁnâ sîsen-i ǃnâ nau aimâba-aon khami dī tama hâ ti ga ra mî o. Matis tsîna da sida di ǃgâsade a hui ǁkhā? Hāre îda ǁkhapa Jesub di aiǁgausa kō.

16. Jesuba mati Mariasa ge ǂnoaba, Markub 14:3-9 ǃnâ i xoasa khami?

¹⁶ Jesub ge ǁîb di gagasi ǃgâsade gere ǃhoaba. Aiǁgauseb ge Mariasa ge ǂnoaba Martas ge ǃgâi xū-es dī tama ti a mîsi o. (Luk. 10:38-42) Tsîb ge Mariasa ǀgamǁî ǃnâsa ge ǂnoaba nau khoen ge ǃgâi tama xū-es ra dī ti a mî o. (Khomai re Markub 14:3-9.) Jesub ge Marias di ǂâiǀgauba ge ǁnâuǃgā tsî koasi tsî ge mî: “ǃGâi sîsennas kom tita tawa goro dīo. . . . ǁKhās as kōses ge ǁîsa goro dī.” ǁÎb ge kēbo tsî ge mî: “Mapa ǀguis ga nē ǃgâiǂhôasa aoǁnâhe ǃhūbaib hoab ai,” îge ǁîs ge dī ǃgâi xū-i xa nî ǃhoahe, nē ǁkhāǁkhāǃâs ra dī khami. Kaise i ge a ǂoaǂamsa Jesub ge mî o, nē ǃgâiǂhôas sîsen-i ge ǃhūbaib ǂhawase nî aoǁnâhe di, Mariasab ge ǁîs ge dī sîsen-i ǃgao a koa o. ǁÎb di mîdi ge Mariasa ǃgâise ge tsâ kai, khoen xas ge ǁgai xūna gere mîhe xawe.

17. Aiǁgau-e mā re mâ ǁaets ǃgâsasa a ǃhoaba ǁkhā-e.

¹⁷ Gagasi ǃgâsade ǃhoaba i du ra? Saora aiǁgausa kō re. ǀNî ǃgâsan ge ǃgâsas hîna ǀhûǀguitimî-ao tama aoba ǃgamme hâs, ǀhaodi tawa ǃonkhao hâse ǀkhī tsî toa i ga o ra oasa ra mû. ǁÎn ge ra mû ǁîs ǀnî ǁaegu ai ǀgui ǁîs ǀgôana ra hau saosa. ǁÎsa mî tsîn ge ra dî tae-i ǃaromas ǁîs aoba mîba tama hâ ǃkhâisa, îb mā-amsi is ǀgôana ǀhaode ǃoa ū-sao. Xawes ge nē ǃgâsasa ǁkhās a xū-i hoa-e ra dī. ǁÎs ge ǁîs ǁaebas mati nî sîsen-ūsa aitsama mî tama hâ tsîs ge ǀuniga mî-e ǁîs di ǀgôan ai ūhâ tama hâ. Tae-ets a dī ǁkhā? ǃGâsasa koa tsîts ge nau khoena ǃoa a mî ǁkhā ǁîs taena ǃgâise ra dīsa. Nēsats ga dī ots ge nau khoen ra ǃhoa ǁgai xūna a ǀû kai ǁkhā.

18. Mâ ǀkhara ǀgaugu ǃnâ da sida di ǃgâsade a hui ǁkhā?

¹⁸ Sida di ǃgâsade da ge a ǁgau ǁkhā ǁîdi xa da ra ǂâisa, ǁîde huis ǃnâ-ū. (1Jhn. 3:18) Annettes hîna ǁîs di ǀaesen hâ mamasasa ra kōǃgâs ge ra mî: “ǀNî ǃgâsan ge omsa ǃoa ǀkhī tsî ti masa kōǃgâs ǀkha gere huite tsî ta ge ǀkhara  xūna ge dī ǁkhā i. Nēs ge ǀnam-e ta hâsa gere hōǃgâ kai te. Tsî ta a ǀhaohâb di ǃâsa.” Jordans tsîn ge ge huihe. ǀGui ǃgâsab ge ǁîsa ge ǁgau matis ǁîs audosa nî kōǃgâsa. ǁÎs ge ra mî: “Kaise i ge a ǃgâi ǂansa ti ǃgâsan ti ǃnorasasib xa ǁae hâsa.”

19. Mâ ǀkhara ǀgaugu ǃnâ gu ǀhaohâb di ǃûi-aoga ǃgâsade a hui ǁkhā?

¹⁹ ǀHaohâb ǃûi-aogu ge ǃgâsadi ǂhâsiga ra kōǃgâ. ǁÎgu ge a ǂan Jehovab ǂhâba hâsa îdi ǃgâsade ǃgâi ǀgaub ǃnâ hâ-ūhe. (Jak. 1:27) ǁÎgu ge Jesub di ǀnōsa mûǂuiba ra ǁgae tsî ǃgâsade ǃgâi tsî ǁnâuǃgāxa ǀgaub ai ra hâ-ū. (Mat. 15:22-28) ǀHaohâb ǃûi-aogu ga ǁîde hui o, o gu ge ǁîde ra tsâ kai Jehovab tsî ǁîb ǀapeǂhomis ǁîde a ǀnamsa. Kias aoǁnâ sîsen-i groeps di mûǂam-aob ge ǁîs ǀnî hâ omsa ǃoa ra doesab ge ǁnâu o, ǁîsa ge hui. “Nēs ge ū ta ge hâ-i ǂâiǂhansende ge ǀoroǀoro,” tis ge Kiasa ra mî. “ǂKhâǃnâ te tsî gu ge ǂhâba da hâ huiba a māde o, o gu ge ǀhaohâb ǃûi-aoga ge ǁgau te ǂhâǂhâsa ǃâba ta ǀhaohâb ǃnâ ra ǀhurusa. Tsî ta ǃgomsina ta ga ra hō o, ǀguri hâ tamasa.”

20-21. Mati da nî ǁgau sida di Xristeǁî ǃgâsade da a ǀnam ǃkhaisa?

²⁰ Nētsē da ga sada di ǀhaohâb ǃnâ ga ra kō o, o da ge ǃgarise ra sîsen ǃgâsadi aiǁgaude ra mû, hîna sida di ǂkhâǃnâsa ǂhâ hâde. Jesub di aiǁgausa xu da go ǁkhāǁkhāsen khami da ge ǁîdi ǀkha hâ tsî ǁîde nî ǂan. ǁÎde da ge ǃgôaǃgâsiba a ǁgau ǁkhā ǁîdi Elob di sîsen-i ǃnâ ra dī xūn ǃgao. Tsî da ge ǁîde a ǃhoaba ǁkhā ǂhâbasa i ga ra o.

²¹ Apostel Paulub ge Romeǁîna ǃoa a xoa sîǂkhanis ǀams aib ge ǁîba khoese ǃgâsadi ǀonde ge xoa. (Rom. 16:1, 3, 6, 12, 13, 15) Nē taradi ge tawedehe tsî di gere koahesa di ge ǁnâu o ǃgâise gere tsâ. Hā re îda sida tsîna sida ǀhaohâb ǃnâ hâ ǃgâsade ǂkhâǃnâ. Nēsa da ga ra dī o da ge ra ǁgau ǁîde da a ǀnamsa tsîdi ǁîde sida di omaris di ǃâ ǃkhaisa.