1. Yiphi imisebenzi eyenziwa ngodade enhlanganisweni njalo yibuphi ubunzima abanengi babo abahlangana labo? (Khangela umfanekiso ongaphandle.)

SIYATHOKOZA kakhulu ngokuthi silabodadewethu abanengi abasebenza nzima ebandleni. Ngokwesibonelo, bayaphendula emihlanganweni yebandla futhi batshumayele. Abanye bancedisa ekunakekeleni amaWolu oMbuso njalo balendaba labazalwane abasebandleni. Lanxa kunjalo, bahlangana lobunzima. Abanye banakekela abazali asebekhulile, abanye baphikiswa ngabangakibo ikanti abanye kabalabomkabo yikho basebenza nzima ukuze bakhulise abantwababo.

2. Kungani kumele sisekele odadewethu?

² Kungani kumele sisekele odadewethu? Esinye isizatho yikuthi abantu bomhlaba lo kababahloniphi abesifazana ngendlela okumele bahlonitshwe ngayo. Kanti njalo iBhayibhili lisikhuthaza ukuthi sibasekele. Ngokwesibonelo, umphostoli uPhawuli wakhuthaza ibandla laseRoma ukuthi lamukele uFebhi njalo “limncedise ngaloba yini ayiswelayo.” (Rom. 16:1, 2) AbaFarisi babebakhangelela phansi abesifazana, yikho kumele ukuthi uPhawuli laye esasengumFarisi wayebeyisa. Kodwa khathesi njengoba wayesengumKhristu wayesebahlonipha futhi ebaphatha ngomusa elingisela uJesu.—1 Khor. 11:1.

3. UJesu wayebaphatha njani abesifazana futhi wayebabona njani labo ababesenza intando kaNkulunkulu?

³ UJesu wayehlonipha bonke abesifazana. (Joh. 4:27) Wayengafanani labakhokheli benkolo ababengabahloniphi. Elinye ibhuku elichasisa iBhayibhili lithi: “UJesu kazange akhulume loba yini etshengisa ukuthi udelela abesifazana.” Lanxa wayehlonipha bonke abesifazana, ayebahlonipha kakhulu ngababesenza intando kaYise. Wababiza ngokuthi ngodadewabo njalo wabaqamba ndawonye lamadoda ayewabona engabafowabo.—Mat. 12:50.

4. Sizaxoxa ngani esihlokweni lesi?

 ⁴ UJesu wayehlala ezimisele ukuncedisa abesifazana abakhonza uNkulunkulu. Wayebaqakathekisa futhi ebalwela. Ake sixoxe ngokuthi singamlingisela njani.

5. Kungani kungaba nzima ukuthi abanye odadewethu babelezikhathi ezimnandi labanye ebandleni?

⁵ Sonke siyafuna ukuba lezikhathi ezimnandi labafowethu labodadewethu. Kodwa lokhu kungaba nzima kwabanye odadewethu. Zwana ukuthi kungani abanye kubathwalisa nzima. UJordan * uthi, “Ngizibona ngingaqakathekanga ebandleni njalo izikhathi ezinengi ngiyabe ngingakwazi ukuthi ngijayelane lobani njengoba ngingatshadanga.” Iphayona okuthiwa nguKristen elathuthela kwenye indawo ukuze lenze okunengi ekutshumayeleni lithi, “Ungaba lesizungu nxa usanda kufika ebandleni elithile.” Labo abahlala labangakibo abangayisiboFakazi bakaJehova bangathwala nzima ukuba lobudlelwano labo kanye labafowethu labodadewethu ebandleni. Abanye odadewethu bangaba lesizungu ngenxa yokuthi bayagula futhi abenelisi ukuphuma endlini kumbe ngenxa yokuthi banakekela abangakibo abagulayo. U-Annette uthi, “Ngangingenelisi ukuba lezikhathi ezimnandi labafowethu labodadewethu ngoba nganginakekela umama.”

6. Ngokwalokho okutshiwo kuLukha 10:38-42, uJesu wamnceda njani uMatha loMariya?

⁶ UJesu wayezinika isikhathi sokuba labesifazana ababekhonza uNkulunkulu futhi wayengumngane omuhle kubo. Ngokwesibonelo, wayengumngane kaMariya loMatha okungenzakala babengatshadanga. (Bala uLukha 10:38-42.) Amazwi kaJesu lalokho ayekwenza kwakusenza bakhululeke ukuba laye. UMariya waze wakhululeka ukuhlala enyaweni zakhe njengalokho okwakusenziwa ngumfundi. * UMatha yena wakhululeka ukutshela uJesu ayekucabanga ngesikhathi ezondele ukuthi uMariya wayengamncedisi ukulungisa ukudla. UJesu wabancedisa bobabili ukuthi bafunde izifundo eziqakathekileyo. Kanti njalo watshengisa ukuthi ulendaba labo kanye lomnewabo uLazaro ngokubavakatshela langezinye izikhathi. (Joh. 12:1-3) Yikho uLazaro wathi esegula kakhulu, uMariya loMatha babekwazi ukuthi bangacela uJesu abancede.—Joh. 11:3, 5.

7. Singabakhuthaza njani odadewethu?

⁷ Kwabanye odadewethu imihlangano yebandla ngeminye yemibuthano emilutshwana abalayo ebanika ithuba lokuba labanye abazalwane. Yikho kumele sibamukele, sixoxe labo njalo sitshengise ukuthi silendaba labo. UJordan esike sakhuluma ngaye uthi, “Kuyangikhuthaza ukuzwa abanye bengincoma ngempendulo zami, behlela ukuphuma lami ekutshumayeleni futhi betshengisa ngezinye izindlela ukuthi balendaba lami.” Kumele sitshengise ukuthi siyabaqakathekisa odadewethu. UKia uthi, “Nxa ngingayanga emihlanganweni yebandla ngiyabe ngikwazi ukuthi abanye abafowethu labodadewethu bazangithumezela imeseji befuna ukubakwazi ukuthi ngirayithi yini. Khonalokhu kwenza ngibone ukuthi balendaba lami.”

8. Singamlingisela njani uJesu?

⁸ Kumele silingisele uJesu sizinike isikhathi sokuba labodadewethu. Mhlawumbe  singabanxusa ukuthi bazokudla lathi kumbe ukuthi siyezilibazisa labo. Kodwa kumele sibe leqiniso lokuthi esikutshoyo kuyakhuthaza. (Rom. 1:11, 12) Abadala bebandla kumele balingisele indlela uJesu ayecabanga ngayo. Wayekwazi ukuthi abanye kungabathwalisa nzima ukungatshadi kodwa wakwenza kwacaca ukuthi ukutshada kumbe ukuba labantwana ayisikho okungenza umuntu ahlale ethokoza. (Luk. 11:27, 28) Okungenza umuntu ahlale ethokoza yikuqakathekisa ukukhonza uJehova ukwedlula loba yini.—Mat. 19:12.

9. Abadala bangenzani ukuze bancede odade?

⁹ Abadala bebandla kumele baphathe abesifazana abangamaKhristu njengabodadewabo labonina. (1 Tim. 5:1, 2) Kufanele bazinike isikhathi sokuxoxa labo imihlangano yebandla ingakaqalisi kumbe isiphelile. UKristen esike sakhuluma ngaye uthi, “Omunye umdala wananzelela ukuthi ngangihlala ngibhizi yikho wangibuza ukuthi uhlelo lwami lumi njani. Kwangithokozisa ukubona ukuthi ulendaba lami.” Nxa abadala behlala bezinika isikhathi sokuxoxa labodadewabo bayabe betshengisa ukuthi balendaba labo. * U-Annette esike sakhuluma ngaye uchasisa ukuthi kumnceda ngani ukuhlala exoxa labadala. Uthi, “Ngibabazi kuhle futhi labo babangazi. Lokhu kwenza  ngikhululeke ukukhuluma labo nxa sengilohlupho.”

10. Kuyini okungenza odadewethu bathokoze?

¹⁰ Sonke siyathokoza nxa abanye benanzelela esenelisa ukukwenza besebesincoma ngomsebenzi esiwenzayo. Kodwa siyadana nxa bengakwenzi lokho. Iphayona elingatshadanga okuthiwa ngu-Abigail liyavuma ukuthi liyake licabange ukuthi abantu kabalandaba lalo. Lithi: “Abantu bakwazi engizalwa labo labazali bami kuphela, kabaziniki isikhathi sokubangazi kuhle. Ngezinye izikhathi ngize ngicabange ukuthi kabalandaba lami.” Kodwa odadewethu abangeke bazizwe ngaleyondlela nxa singatshengisa ukuthi silendaba labo. Udade ongatshadanga okuthiwa nguPam waba ngumnali okweminyaka eminengi. Ngemva kwalokho wabuyela ngakibo ukuze ayenakekela abazali bakhe. Khathesi usekubo-70 futhi ulokhu ephayona. Uthi: “Okungincede kakhulu yikuzwa abanye bengitshela ukuthi bayabonga ngomsebenzi engiwenzayo.”

11. UJesu watshengisa njani ukuthi uyabaqakathekisa abesifazana ababemncedisa enkonzweni yakhe?

¹¹ Abesifazana abathembekileyo bancedisa uJesu ‘besebenzisa okungokwabo’ futhi wabonga kakhulu ngababemenzela khona. (Luk. 8:1-3) Wayebatshela lezinto eziqakathekileyo ezimayelana lentando kaNkulunkulu. Ngokwesibonelo wabatshela ukuthi uzakufa abesevuswa. (Luk. 24:5-8) Wancedisa abesifazana laba balungela ubunzima obabuzabehlela njengalokho ayekwenze kubaphostoli. (Mak. 9:30-32; 10:32-34) Lanxa abaphostoli babaleka ngesikhathi uJesu ebotshwa, abanye abesifazana ababeke bamncedisa abazange bamtshiye ngesikhathi esifa esigodweni sokuhlutshwa.—Mat. 26:56; Mak. 15:40, 41.

12. UJesu wanika abesifazana umsebenzi wokwenzani?

¹² UJesu wanika abesifazana imisebenzi eqakathekileyo. Ngokwesibonelo, abesifazana abathembekileyo yibo ababa ngabokuqala ukumbona esevusiwe. Wabathuma ukuthi bayetshela abaphostoli ukuthi wayesevusiwe kwabafileyo. (Mat. 28:5, 9, 10) Kanti njalo kungenzeka abesifazana babekhona lapho umoya ongcwele uthululwa kubafundi ngePhentekhosti lika-33 C.E. Nxa babekhona kumele ukuthi labo benelisa ukukhuluma ngezindimi ezitshiyeneyo betshela abanye “izinto ezimangalisayo zikaNkulunkulu.”—ImiSeb. 1:14; 2:2-4, 11.

13. Yiphi imisebenzi eyenziwa ngodadewethu futhi singatshengisa njani ukuthi siyakuqakathekisa abakwenzayo?

¹³ Kumele sibancome odadewethu ngakho konke abakwenzayo enhlanganisweni kaJehova. Bayakha futhi banakekele izakhiwo zethu, bayancedisa emabandleni asebenzisa olunye ulimi njalo basebenza eBhetheli. Bayancedisa nxa kube lomonakalo wemvelo, bahumutsha amabhuku ethu futhi bangamaphayona labanali. Labo njengabafowethu bayenelisa ukungena isikolo samaphayona, iSikolo Sabavangeli BoMbuso leseGiliyadi. Kanti njalo amakhosikazi ancedisa omkawo ukuthi benze yonke imisebenzi abayiphathisiweyo ebandleni lasenhlanganisweni. Abafowethu laba ‘bayizipho ezingabantu’ futhi kunengi abakwenzayo ukuze bancede abanye. (Efe. 4:8) Kodwa bekungabanzima ukuthi bakwenze lokho aluba omkabo bebengabasekeli. Yiziphi izindlela ongabasekela ngazo odadewethu laba?

14. Ngokwalokho okutshiwo kuHubo 68:11, abadala abahlakaniphileyo benzani?

¹⁴ Abadala abahlakaniphileyo bayakwazi ukuthi odade “balibutho elikhulu” lezisebenzi ezizimiseleyo lokuthi izikhathi ezinengi yibo abawenza kuhle umsebenzi  wokutshumayela. (Bala iHubo 68:11, NWT.) * Yikho bayazama ukufunda kubo. U-Abigail okuke kwakhulunywa ngaye uthi kuyamkhuthaza nxa abafowethu bembuza ukuthi yiziphi izindlela zokuqalisa ingxoxo azibona ziphumelela. Uthi: “Lokhu kwenza ngibone ukuthi uJehova uyangiqakathekisa.” Abadala bayakwazi lokuthi odade abathembekileyo asebekhulile bayenelisa ukuncedisa odade abasesebatsha nxa belenhlupho. (Tit. 2:3-5) Kuyacaca ukuthi kumele sibathande futhi sibaqakathekise odadewethu.

15. Kunini lapho odade abangadinga ukukhulunyelwa khona?

¹⁵ Ngezinye izikhathi odadewethu bangadinga umuntu ongabakhulumela nxa belohlupho. (Isaya. 1:17) Ngokwesibonelo, udade ongumfelokazi kumbe owachithekelwa ngumtshado angadinga umuntu ongamkhulumela futhi amncedise ukwenza eminye imisebenzi eyayisenziwa ngumkakhe. Udade osekhulile angadinga umuntu ongamkhulumela labodokotela kumbe amncedise ukukhuluma labo. Udade oliphayona owenza eminye imisebenzi yenhlanganiso angadinga umuntu ongamlwela nxa abanye bemsola ngokuthi kaphumi kakhulu ekutshumayeleni njengamanye amaphayona. Yiphi enye indlela esingabanceda ngayo odadewethu? Kasixoxeni futhi ngokwenziwa nguJesu.

16. Ngokwalokho okutshiwo kuMakho 14:3-9, uJesu wamlwela njani uMariya?

¹⁶ UJesu wayephangisa ukulwela abesifazana abathembekileyo nxa besolwa ngabanye. Ngokwesibonelo, walwela uMariya ngesikhathi uMatha emsola. (Luk. 10:38-42) Waphinda wamlwela ngesikhathi abanye bemsola ngokuthi uphambanisile ngokumthela amafutha ekhanda. (Bala uMakho 14:3-9.) UJesu wayezwisisa ukuthi kungani uMariya wayekwenzile lokho njalo wamncoma wathi: ‘Ungenzele into enhle kakhulu. Wenze lokho abesenelisa ukukwenza.’ Waphinda wathi lokho uMariya ayekwenzile kwakuzakhulunywa “loba ngaphi lapho izindaba ezinhle ezitshunyayelwa khona emhlabeni wonke” futhi lokhu yikho kanye okwenziwa yisihloko lesi. UJesu wayekuqakathekisa kakhulu ayekwenzelwe nguMariya okokuthi wathi emncoma wakhuluma ngokuthi izindaba ezinhle zazizatshunyayelwa emhlabeni wonke. Kumele ukuthi amazwi la amkhuthaza kakhulu uMariya njengoba abanye babeke bamsola.

17. Kunini lapho ongamlwela khona udadewenu?

¹⁷ Wena uyabalwela yini odadewenu? Ake sithi abanye abamemezeli bananzelela ukuthi omunye udade olomkakhe ongayisuyeFakazi ujayele ukuphuza emihlanganweni yebandla lokuthi usuka isanda nje kuphela. Bayananzelela lokuthi izikhathi ezinengi kabuyi labantwabakhe. Yikho bayamsola ngoba bathi akumelanga avume nxa umkakhe esala ukuthi abuye labantwana emihlanganweni. Kodwa abangakunanzeleliyo yikuthi udade lo wenza konke okusemandleni akhe ekukhonzeni. Kwezinye izikhathi kazikhetheli ukuthi asisebenzise njani isikhathi sakhe futhi umkakhe nguye otshoyo ukuthi abantwana bahambe kumbe bangahambi emihlanganweni. Ungenzani nxa usizwa abanye besola udadewenu ngale indlela? Nxa ungamncoma njalo ubatshele ngokuhle akwenzayo, bangayekela ukumsola.

18. Yiziphi ezinye indlela esingancedisa ngazo odadewethu?

¹⁸ Singatshengisa ukuthi silendaba labodadewethu  ngokubancedisa. (1 Joh. 3:18) U-Annette owayenakekela unina ogulayo uthi: “Abanye abafowethu labodadewethu babebuya bezonakekela umama ukuze lami ngenze okunye kumbe basiphathele ukudla. Lokhu kwangenza ngabona ukuthi ngiyathandwa lokuthi ngiqakathekile ebandleni.” UJordan yena watshengiswa ngomunye umzalwane ukuthi imota igcinwa njani isesimeni esihle. Uthi: “Kuyangithokozisa ukubona ukuthi abafowethu labodadewethu bafuna ngivikeleke.”

19. Yiziphi ezinye izindlela abadala abangancedisa ngazo odade?

¹⁹ Abadala labo bayabancedisa odadewethu ngoba bayakwazi ukuthi uJehova ufuna baphathwe kuhle. (Jak. 1:27) Yikho balingisela uJesu ngokuba ngabazwisisayo. Lokhu bakwenza ngokuqakathekisa ukuba lomusa lokuzwisisa kulokuqakathekisa ukutshaya imithetho. (Mat. 15:22-28) Nxa bangazimisela ukubancedisa, odadewethu bazabona ukuthi uJehova kanye labazalwane bayabathanda. Umbonisi weqembu likaKia wathi esezwile ukuthi uyathutha wahle wahlela ukuthi ancediswe. UKia uthi: “Kwangenza ngangakhathazeki kakhulu. Abadala bangikhuthaza futhi bangincedisa. Lokhu kwenza ngabona ukuthi ngiqakathekile ebandleni lokuthi angingedwa nxa ngisebunzimeni.”

20-21. Singatshengisa njani ukuthi siyabathanda bonke odadewethu?

²⁰ Emabandleni amanengi kulabodade abasebenza nzima okumele sibasekele. Sesifundile ukuthi kumele sizinike isikhathi sokuba labo lesokubazi kuhle njengalokho okwakusenziwa nguJesu. Kasitshengiseni ukuthi siyakuqakathekisa abakwenzayo enhlanganisweni kaNkulunkulu njalo sibalwele nxa kudingeka.

²¹ Umphostoli uPhawuli wathi esephetha incwadi yabaseRoma waqamba abesifazana abayisitshiyagalolunye ngamabizo. (Rom. 16:1, 3, 6, 12, 13, 15) Akuthandabuzwa ukuthi abesifazana labo kwabakhuthaza ukuzwa uPhawuli ebabingelela njalo ebancoma. Lathi kumele sibasekele bonke odade abasebandleni. Nxa sisenza njalo siyabe sitshengisa ukuthi siyabathanda lokuthi bangamalunga emuli yethu.