1. Hambzaji jiri kubeseresa kudini sangano, asi zvineso zvapi zviri kusongana no vazinji? (Vonanyi pikica yo pa kapa.)

TINODAKARA maningi ngo kuva no hambzaji jakawanda jinoshanda ngo simba mu ungano! Inga muezaniso, vanopa mupinguro pa musongano, kwenda kocumaera no kujijisa masoko akanaka. Vamweni vanotobesera pa kunasirira-nasirira Nyumba jo Umambo no kukhombija kudakarira kwavo hama imwe nga imwe. Zvokadi kamare, ivona vanosonganavo no zvineso. Vamweni vanodikana kukorondha majibaba avo vaavasharuka. Vamweni vanodikana kucungirira kuteverehwa pa mbhuri. Vamweni varikutorera voga vana zvokuti vanodikana kutoshanda ngo simba kuti vape zvokuha ku vanevo.

2. Ngenyi tinodikana kuvangisira kuti tibesere hambzaji jedu?

² Ngenyi itusu tinodikana kubesera hambzaji jedu? Ngokuti nyika, kazinji aitaji vanakaji inga zvovanofanera kuitwa. Mukuengejera, Bhaibheri rinotivangisa kuti tivabesere. Inga muezaniso, mupostori Pauro wakangwaja ungano yo Roma kuti iashire Febhi no ‘kumubesa ku zvese zvaaidikana kubeswa’ ndizvona. (VaRoma 16:1, 2) Pauro paainga ari Mufarisi, wainga pacikwata caitenda kuti vanakaji vakaderera, zvokuti iyena waivatajavo ngo njira yondhoyo. Asi paakazova Mukristu, wakatevejera Jesu, wotaja vanakaji ngo nderemejo no unyasha.—1 VaKorinto 11:1.

3. Jesu waitajisa kudini vanakaji zve waivona kudini vanakaji vaiita kuda ka Baba wake?

³ Jesu waitaja vanakaji vese ngo nderemejo. (Johani 4:27) Iyena aacaivona vanakaji inga zvaiita vatungamiriri vo zviyara zvo cijudha vo mu njiku jake. Bhuku rimweni rinobhuya ngo zvo Bhaibheri, rakati: “Jesu na kamwe aazivi kubhuya zviri zvese zvinorerusa vanakaji.” Asi iyena waireremeja maningi vanakaji vaiita kuda ka Baba wake. Zvokuti waitovavona inga hambzaji jaiita  divi ro mbhuri yake yo kumujimu.—Mateu 12:50.

4. Zvicinyi zvatinozovona pa musoro uu?

⁴ Jesu nguva jese wainga wakanasiririka kuti abesere hambzaji jake jo kumujimu. Waikhombija kuti ivona vaisisira zve waivainikira. Pa musoro uwu, tinozovona manera atingatevejera muezaniso wa Jesu ngo kupeja nguva no hambzaji jedu.

5. Ngenyi hambzaji jimweni jinovona zvecinesa kuva no shamwari jakanaka?

⁵ Itusu tese, hama no hambzaji, tinoda kuva no shamwari jakanaka. Asi nguva jimweni hambzaji jinonesehwa maningi kuva no shamwari jakadari. Ngenyi? Vonanyi zvakabhuya hambzaji jimweni. Hambzaji Jordhani *, vakati: “Zvecivoneka kuti andizivi kurovohwa, kazinji ndinojizwa inga kuti apana basa randinoita mu ungano kana kutoita divi rayo.” Kiristina, uwo ari piyona wakathutha woenda kogara kumweni, wakati: “Paunonga uri mupsa mu ungano, unojizwa uri woga.” Hama jimweni jinojizwavo kudaro. Vese vanogara no vandhu vanonamata zviyara zvakasiyana, kangaije zvingavanesera kuva phedo no mbhuri yavo. Zvingaitazve kuti ajizwe akaparajana no hama no hambzaji jiri mu ungano. Hambzaji jimweni, jingajizwa jiri joga ngokuti jiri kuhwaja kana umweni wo pambhuri ari kuhwaja. Hambzaji Aneti, vakananga kudari: “Andicaitendera mukoka wo kwenda kobungaija no hama no hambzaji jangu ngokuti ndaikoromdha mai wangu vaihwaja.”

6. Inga zvatinovona pana Luka 10:38-42, Jesu wakabeseresa kudini Mariya na Marita?

⁶ Jesu wakapeja mukuvo muzinji no hambzaji jake jo kumujimu zve wakava shamwari yokadi kwavari. Vonanyi ushamwari hwaainga nahwo na Mariya na Marita. (Verenganyi Luka 10:38-42.) Ngo magama ake no zviito wakaita kuti ivona vajizwe ushoni. Inga muezaniso, Mariya waijizwa wakasujunuka kuti agare phedo na Jesu. * Marita, ngo kunyangajwa ngokuti Mariya aacaimubesera kuita basa, wakajizwa akasujunuka kuti avhunje Jesu zvaairangarira. Pa mukuvo uu, Jesu wakakwanisa kubesera vovaviri. Wakakhombijazve kuti waineseka ndivona no hama yavo Razaro ngokuti wakaendazve kovavhakacira pa vhaza imweni. (Johani 12:1-3) Razaro paakahwaja, Mariya na Marita vaizviziva kuti vaidikana kubesehwa ndi Jesu.—Johani 11:3, 5.

7. Ngoyapi njira yatingavangisa ndiyona hambzaji jedu?

⁷ Ku hambzaji jimweni, musongano i mukana wo kuva pamwepo no vanamati doni. Ngo kudaro, itusu tinoda kushandisa mukana wondhowo kuti tivaashire, tibhuye navo no kukhombija manera atinovataja pa musongano. Hambzaji Jordhani vanangwaya pakutanga, vakati: “Ndinovangiswa maningi vamweni povanondisimba ngo mupinguro jondaita pa musongano, povanoita nasiriro yo kubuda na inini mu basa ro kucumaera kana pavanokhombija ngo njira iri yese kuti vanoneseka ndini.” Tinodikana kukhombija ku hambzaji jedu kuti ijona jinosisira kwatiri. Hambzaji Kiya vakati: “Pandinotama kwenda ku musongano ndinozviziva kuti hama jinonditarira mensajhi jicindivhunjisa kuti ndiri ushoni kana kuti haiwa, zvondhozvo zvinokhombija kuti hama no hambzaji jinoneseka ndini.

8. Mu njira japi jatingatevejera muezaniso wa Jesu?

⁸ Inga ndi Jesu, tinodikana kupeja nguva kuti tishamwarijane no hambzaji jedu. Kangaije tingavakoka kuti vaviye koha na itusu kana kutobungaija navo. Patinoita zvondhozvo,  tinodikana kuva no mabhuyo anovangisa. (VaRoma 1:11, 12) Vakuru vanodikana kuita zvakafanana no zvakaita Jesu. Iyena waizviziva kuti kutama kucadha caizova cineso ku vamweni. Asi wakajekesazve kuti mudakaro aufiri pa kucadha kana kuva no vana. (Luka 11:27, 28) Mukusiyana, mudakaro wo kwenda no kwenda, unoviya ngo kudira Jehovha pakutanga.—Mateu 19:12.

9. Vakuru vangaitenyi kuti vabesere hambzaji?

⁹ Vakuru vanodikana kutaja vanakaji vo Cikristu inga maitiro avanoita hambzaji kana majimai avo akabhabhatijwa. (1 Timoti 5:1, 2) Vakuru vanoita ushoni pavanoshandisa nguva yavo kuti vabhuye no hambzaji musongano ucito watanga kana pakupera ko musongano. Hambzaji Kiristina vanangwaya pakutanga, vakati: “Mukuru umweni wakavona kuti ndainga ndakabatikana maningi zve waida kuziva manera hwakagara urongwa hwangu. Ndakadakara maningi ngo kuneseka kwavo ngo pamusoro pangu.” Kudari vakuru vakawana nguva yo kubhuya no hambzaji javo jo kumujimu, ivona vanonga vecikhombija kuti vanoneseka ndivona. * Hambzaji Aneti vanangwaya pakutanga, vakadurujira kuti kubhuya no vakuru, zvaushoni maningi. Ivona vakati: “Ndinonasa kuvaziva  zve ivona vanonasa kundiziva ushoni. Ngo kudaro, pandinonga ndino zvineso, zvinozondirerukira maningi kukumbira besero kwavari.”

10. Ngozvapi zvingabesera hambzaji jedu kuti jijizwe jakadakara?

¹⁰ Tese vanarume no vanakaji, tinovangisira vamweni pavanoziva zvatinokwanisa kuita no kutivhunja kuti vanodakarira maningi basa ratinoita. Ngo njira imweni, kudari apana anobongesera, ngo manera atinokwanisa kuita zviro kana ngo basa rotaiita, tinorembejeka. Hambzaji Abhigairi vacizivi kurovohwa zve vari piyona, vakananga kuti nguva jimweni vanojizwa inga kuti vakanganiwa. Tinokwanisa kuvona izvi, ngo zvovakananga: “Ndaivoneka inga yaya wa ngana kana mwana waangana. Nguva jimweni ndaijizwa ndanyunguruka.” Vonanyi zvakananga hambzaji Pamu. Ivona vacito varovohwa, vakashanda makore akawanda maningi inga misionario. No papera makore akati kuti, ivona vakahwirira kanyi kuti vakorondhe vabari vavo. Wari vaano makore anokwana makumanomwe vacicumaera inga piyona. Hambzaji Pamu vakati: “Ndinobesereka maningi vandhu pavanondireremeja.”

11. Jesu wakakhombijisa kudini kuti waibongesera vanakaji vaimubeseraya pa basa rake?

¹¹ Jesu waibongesera ngo besero raivha ku vanakaji vaimushandira “ngo upfumi hwavo.” (Luka 8:1-3) Iyena aazivi kuvatendera basi kuti vave no cidakajiso co kumushandira asi wakavajijisa zvokadi zvinosisira zviri mu Soko ra Mwari. Inga muezaniso, iyena wakavavhunja kuti waizofa zve waizomuswa. (Luka 24:5-8) Iyena wakanasirira vanakaji ava inga zvaakaita no vapostori, kuti vakwanise kuhwisana no zvineso zvovaizosongana nazvo. (Marco 9:30-32; 10:32-34) Vapostori vakatiza, Jesu paakasungwa. Asi paainga ecifa pa danda ro kutambujikira, vanakaji vamweni vakamubeseraya vainga phedo naye.—Mateu 26:56; Marco 15:40, 41.

12. Ngorapi basa rakapuwa vanakaji ndi Jesu?

¹² Jesu wakapa vanakaji basa rinosisira maningi. Inga muezaniso, vanakaji ndivona vakatanga kuziva kuti Jesu wamuswa. Iyena wakavavhunja kuti vaende kozivisa vapostori kuti wainga wamuswa ko vakafa. (Mateu 28:5, 9, 10) Kangaije vanakaji vaingepovo pa Pentekoste yo mu gore ra 33, vajiji povakazojwa ngo mujimu mucena. Ngokudaro, ivona kangaije vakavavo no cidakajiso co kuvereketa ndumi jimweni no kuvhunja vamweni ngo pamusoro po “muxamaiso ya Mwari.”—Maitiro o Vapostori 1:14; 2:2-4, 11.

13. Hambzaji jo Cikristu jiri kuitenyi nyamasi uno zve tingakhombijisa kudini kuti tinoreremeja zvavari kuita?

¹³ Hambzaji jedu jinofanira kusimbhwa ngo zvese zvajinoita pa kushandira Jehovha. Basa iri, rinobatanija kuvaka, kunasirira-nasirira Nyumba jo Umambo, kubesera zvikwata zvinovereketa ndumi jimweni no kujipira kuti jishandire ku Bheteri. Ijona jinobeseravo pakaitika ngozi jinoitika jega, kubesera kusanduja mabhuku edu, kushanda inga piyona no mamisionario. Inga zvinoitwa ngo hama jedu, hambzaji jinoendavo ku cikora co mapiyona, ku Cikora co Vavhangeri vo Umambo no ku Cikora co Giriadhi. Mukuengejera, hambzaji jakacadha jinobesera majimwamuna ajo kuti vakwanirise mabasa o vakagajwa mu ungano. Hama iji jinokwanisa kushanda ushoni inga ‘zvipo zviri vanarume’ ngokuti jiri kubesehwa ngo vakaji vajo. (VaEfeso 4:8, Shanduro yeNyika Itsva) Muri kukwanisa kurangarira manera okubesera hambzaji iji ngo basa rajiri kuita here?

14. Vakuru vano ungwaru vanodikana kuitenyi pavanovona magama ari pana Nduyo 68:11?

¹⁴ Vakuru vano ungwaru, vanozwisisa kuti hambzaji i ‘cikwata cikuru’ zve kazinji vanokwanisa ushoni kucumaera. (Verenganyi Nduyo 68:11, Shanduro yeNyika Itsva.) Ngo kudaro,  vakuru vanopsakavo njira jokubesereka ngo uzivi hwavo. Hambzaji Abhigairi vanangwa pakutanga, vanovangiswa maningi hama pajinovhunjisa njira javanoshandisa kuti vakwanise kutanga mabhuyo no vandhu mu ndima yavo. Ivona vakati: “Izvo zvinondibesera kuvona kuti Jehovha wakandipavo ndau mu ungano yake.” Kusiyapo zvondhozvo, vakuru vanozivavo kuti hambzaji jakagondeka jaano makore akati kuti, jinokwanisa ushoni kubesera hambzaji jiciri doko kuti jihwisane no zvineso. (Tito 2:3-5) Zvokadi kamare, hambzaji jedu jinofanera kukhombijihwa rudo no nderemejo!

15. Mugariro japi jinoita kuti hambzaji jedu jide besero?

¹⁵ Nguva jimweni hambzaji jedu jinoda mundhu kuti ajiinikire pajinosongana no cineso ciri cese. (Isaia 1:17) Inga muezaniso, hambzaji iri noni no hambzaji yakarambiwa vangada ari wese kuti avainikire kana kuvabesera pa basa raizoitwa ngo mwamuna wake. Hambzaji yaamusharuka ingada kubesehwa kwenda kobhuya na medhiko. Kana hambzaji iri piyona inoita mabasa amweni pa kushandira Jehovha mu sangano rake, ingada kubesehwa ngo ari wese kudari vamweni vanoishora ngo kutama kwayo kwenda kocumaera kakawanda inga zvinoita mapiyona amweni. Tingabeserazve kudini hambzaji jedu? Tinophindazve, ngativone muezaniso wa Jesu.

16. Inga zvinonangwa pana Marco 14:3-9, Jesu wakainikirisa kudini Mariya?

¹⁶ Jesu waikwanisa kubesera hambzaji jake jo kumujimu, vamweni povaitama kuvazwisisa. Inga muezaniso, iyena wakainikira Mariya, Marita paakamushora. (Luka 10:38-42) Iyena wakainikirazve Mariya pa vhaza yo cipiri, vamweni povakamushora ngo zviro zvaushoni zvaainga aita. (Verenganyi Marco 14:3-9.) Jesu wakazwisisa zvakatora Mariya kuti aite zvondhozvo zve wakamusimba eciti: “Yena wandiitira uxoni. . . . Yena waita bzaaikwanisa.” Iyena wakatonanga kuti ciito cake co unyasha, caizonangwa “pasi pese panozotokoteswa Vangeri” inga zviri kuitwari pa musoro uu watiri kujijari. Zvinodakajisa maningi ngo zvokuti, Jesu wakashandisa ciito cakanaka ca Mariya kuti anange kuti masoko akanaka anozocumaehwa pasi pese! Magama awo akavangisa maningi Mariya ngokuti vandhu vainga vapera kumushora!

17. Ipanyi muezaniso unovonesa patinodikana kuinikira hambzaji jedu.

¹⁷ Munokwanisa kuinikira hambzaji jenyu jo Cikristu pazvinodikana weya here? Inga muezaniso, vonanyi muezaniso uwu basi. Ngatiti mu ungano mwenyu muno hambzaji ino mwamuna vacikaripi Capupu zve vacumaeri vamweni vanovona kuti iyona inononoka kuguma pa musongano yobuda musongano paunondopera. Kusiyapo zvondhozvo, vanovonazve kuti asipi kazinji hambzaji iyi inoviisa vana vayo ku musongano. Ngokudaro, ivona vanoishora vecirangarira kudari, iyona inodikana kuita zviri zvese kuti itendehwe ngo mwamuna wayo kuti iviise vana ku musongano. Kunasa kunanga iyona iri kuita zvese zvainokwanisa. Asi iyona no vana vayo vanototongwavo. Kudari mukazwa hama kana hambzaji vaciishora mu njira iyowaro, maizoitenyi? Zvaizova zvaushoni kuisimba ngo kuvangisira kwainoita no kuvhunja vamweni zviro zvaushoni zvainoita. Mukadaro, munoita kuti mabhuyo akashata aingaya aciitwa apere.

18. Ngojapi njira jimweni jatingabesera ndijona hambzaji Jedu?

¹⁸ Tingakhombija kuti tinoneseka ngo hambzaji jedu ngo kujibesera mu njira inovoneka. (1 Johani 3:18) Aneti, imwe hambzaji yaikorondha mai wayo vaihwaja, yakati: “Hama no hambzaji jimweni jaiviya ku muziyo kuti jindibesere kukorondha mangu kana kutoviisa  zvokuha. Izvo zvaindiita kuti ndijizwe kuti ndinodiwa zve ndinoita divi ro ungano.” Hambzaji Jordhani vakabesehwavo. Imwe hama yakaipa mazano o kunasirira-nasirira karu yayo. Iyona yakati: “Zvinodakajisa maningi kuziva kuti hama no hambzaji jangu jinoneseka ndini zve jinoda kuti ndive ndakangwaririka pandinonga ndecifambisa karu yangu.”

19. Vakuru vangabeseresa kudini hambzaji?

¹⁹ Mukufananavo, vakuru vanodikana kuita zviri zvese kuti vabesere hambzaji jedu. Ivona vanoziva kuti Jehovha anoda kuti hambzaji jitajwe ushoni. (Jakobo 1:27) Ngokudaro, vakuru vanotevejera Jesu ngo kuva vandhu vakaezanana. Ivona vanoita zvondhozvo ngo kutama kugaja zvimutemo-mutemo pa kuda kwavo kuva vandhu vakanaka mwoyo no vanozwisisa. (Mateu 15:22-28) Vakuru pavanovangisira kuti vabesere, ivona vanonga vacibesera hambzaji jizwe kuti Jehovha no sangano rake anovada maningi. Hambzaji Kiya vanagwaya pakutanga, vakadikana kuthuta kwenda koogara kumweni. Muvonereri wo cikwata cavo, paakazwa zvondhozvo ngo kukasika wakaita nasiriro kuti abesere. Hambzaji Kiya vakati: “Izvo zvakaita kuti nditame kuneseka maningi. Vangiso yondakawana no besero ro vakandipa zvakavonesa kamare kuti vakuru vaindivona inga divi ro ungano zve andicaengepi ndoga pandaizosongana no mugariro unonesa.”

20-21. Tingakhombijisa kudini kuti tinoda hambzaji jedu jese jo Cikristu?

²⁰ Patinosota mu ungano mwedu nyamasi uno, tinowana muezaniso wo hambzaji jakawanda jinoshanda ngo simba jinofanera kubesehwa ndisu. Inga zvotavona ngo muezaniso wa Jesu, tingavabesera ngo kupeja nguva navo no kuvabesera. Tingavabongesera ngo zvese zvavari kuita pa kushandira Jehovha. Pejisire, tinodikana kuvainikira zvikadiwa weya.

²¹ Paainga ecipejisa karata yake ku ungano yo Roma, mupostori Pauro wakabhuya ngo pamusoro po hambzaji mbvumbhamwe ngo mazina ajo kamare. (VaRoma 16:1, 3, 6, 12, 13, 15) Pacina kukana-kana, hambzaji iji jakavangiswa maningi ngo kuzwa mucungamijo jo vakatumihwa no kusimbhwa ko vakaithwa. Tinodikanavo kuita zvakafanana no hambzaji jese jiri mu ungano mwedu. Patinoita zvondhozvo, tinokhombija kuti tinovada inga divi ro mbhuri yedu yo kumujimu.