1. Aamwameme ohaya ambidhidha ehangano momikalo dhini, ihe oyendji yomuyo ohaya taalele omashongo geni? (Tala ethano lyokombanda.)

OTWA pandula sho tu na aamwameme oyendji haya longo nuudhiginini megongalo. Pashiholelwa, ohaya kutha ombinga mokugongala nohaya uvitha wo onkundana ombwanawa. Yamwe ohaya kwathele moku kaleka Oshinyanga shUukwaniilwa monkalo ombwanawa nohayu ulike ohokwe mooitaali ooyakwawo. Odhoshili kutya omathimbo gamwe ohaya taalele omashongo. Yamwe otaya sile oshimpwiyu aavali yawo aakokele. Yamwe otayi idhidhimikile omapataneko okuza kaakwanezimo. Omanga yamwe taya putudha oyana oyo ayeke nohaya longo nuudhiginini ye ya sile oshimpwiyu.

2. Omolwashike twa pumbwa okukala hatu ambidhidha aamwameme yetu?

² Omolwashike twa pumbwa okwaambidhidha aamwameme? Oshoka aantu muuyuni olundji ihayu ungaunga nawa naakiintu. Shimwe ishewe, Ombiimbeli otayi tu ladhipike tu kale hatu ya ambidhidha. Pashiholelwa, omuyapostoli Paulus okwa li a ladhipike egongalo lyomuRoma li taambe ko Foibe nomaako agehe, noli “mu yakule moompumbwe dhe adhihe.” (Rom. 16:1, 2) Sho a li Omufarisayi, Paulus otashi vulika a li e na etaloko ewinayi kombinga yaakiintu. Ihe sho a ningi Omukriste okwa kala ha holele Jesus mokukala hu ungaunga naakiintu nesimaneko nonolukeno. — 1 Kor. 11:1.

3. Jesus okwa li hu ungaunga ngiini naakiintu, nokwa li a tala ko ngiini aakiintu mboka haya longo ehalo lyaHe?

³ Jesus okwa li hu ungaunga naakiintu ayehe nesimaneko. (Joh. 4:27) Ka li e ya tala ko ngaashi aawiliki yelongelokalunga lyOshijuda yopethimbo lye. Embo limwe lyuuyelele wOmbiimbeli olya ti: “Jesus ka li nando a popi oohapu tadhi dhinitha aakiintu.” Okwa li a simaneka noonkondo aakiintu mboka ya li haya longo ehalo lyaHe. Okwa li e ya tala ko onga aamwayinakadhona nokwe ya popi pamwe naalumentu mboka a li a tala ko ye li aamwayina yopambepo. — Mat. 12:50.

4. Oshike tatu ka kundathana moshitopolwa shika?

⁴ Jesus okwa li ha kala aluhe i ilongekidha okukwathela aakiintu aalongelikalunga. Okwa li e ya lenga nohe ya popile. Tu kundathaneni  nkene tatu vulu okuholela Jesus mokukala hatu yaalele aamwameme.

5. Omolwashike shi li oshidhigu kaamwameme yamwe okumona eendathano ewanawa ndyoka ya pumbwa?

⁵ Atuheni, kutya nduno aamwatate nenge aamwameme, otwa pumbwa okweendathana nayalwe. Nonando ongawo, omathimbo gamwe aamwameme otashi vulika ya mone oshidhigu. Ngiini mbela? Ndhindhilika omatyokosha gaamwameme yaali taya landula. Omumwameme Jordan * ota ti: “Molwaashoka inandi hokanwa, olundji ohandi kala ndu uvite kutya kandi na oshilonga megongalo noihandi kala ndu uvite ndi li oshitopolwa shalyo.” Omumwameme Kristen, omukokolindjila ngoka a tembukila koshitopolwa shilwe, opo a tamunune mo uukalele we, ota ti: “Uuna wa tembukile kegongalo epe, oho kala wu uvite owike.” Aamwatate yamwe nayo ohaya kala yu uvite ngawo. Mboka haya zi muukwanegumbo wa topoka palongelokalunga, otashi vulika ya kale yu uvite kaaye na ekwatathano ewanawa noyaandjawo, notashi vulika wo ya kale yu uvite kaaye li lela oshitopolwa shegongalo. Mboka ihaya vulu okuza mo megumbo naamboka haya sile oshimpwiyu aakwanezimo yawo mboka taye ehama, ohashi vulika ya kale yu uvite owike. Omumwameme Annette ota ti: “Uuna tandi hiywa ndi ka tyapule pamwe naamwatate naamwameme, ihandi yi, oshoka ongame awike nda li handi sile meme oshimpwiyu.”

6. Ngaashi sha popiwa muLukas 10:38-42, Jesus okwa li a kwathele ngiini Marta naMaria?

⁶ Jesus okwa li ha kutha ethimbo a kale naakiintu ooitaali, nokwa li kuume kawo kashili. Natu ka taleni kuukuume mboka a panga naMaria nosho wo Marta mboka ya li inaaya hokanwa. (Lesha Lukas 10:38-42.) Oshi iwetikile kutya oohapu dhaJesus niilonga ye, oyo ye shi ningitha ya kale ye mu mangulukila. Maria okwa li a manguluka okukuutumba poompadhi dhe, e li omulongwa. * Marta ngoka a li u uvite nayi sho Maria itee mu kwathele nokuteleka, okwa li a manguluka okulombwela Jesus nkene u uvitile. Pompito ndjoka, Jesus okwa li a vulu okukwathela aakiintu ayehe mboka yi ilonge iiyilongomwa ya simana. Okwa li wo hu ulike kutya oku na ko nasha nayo nonomumwayinamati gwawo Lasarus, mokukala he ya talele po lwiikando. (Joh. 12:1-3) Itashi kumitha sho Maria naMarta ya li ya pula Jesus e ya kwathele, sho Lasarus a li te ehama. — Joh. 11:3, 5.

7. Ongiini tatu vulu okutsa omukumo aamwameme?

⁷ Aamwameme oyendji, pokugongala opo unene haya mono ompito yokukala nooitaali ooyakwawo. Onkene otu na okukala hatu longitha oompito ndhoka tu ya hambelele, tu popye nayo nokuya ulukila kutya otu na ko nasha nayo. Omumwameme Jordan ngoka a popiwa metetekelo, ota ti: “Ohashi tsu ndje lela omukumo uuna yalwe taya pandula ndje omolwomatyokosha gandje, taya pula ndje ndi ka longe pamwe nayo muukalele nuuna tayu ulike kutya oye na ko nasha lela nangame.” Otwa pumbwa okuulukila aamwameme kutya oya simana kutse. Omumwameme Kia ota ti: “Ngele onda faula okugongala, ohandi kala ndi shi kutya ondi na okutuminwa etumwalaka kongodhi kaamwatate naamwameme taya pula ngele ondu uvite ngaa nawa. Shono ohashi shilipaleke ndje kutya aamwatate naamwameme oye na ko nasha lela nangame.”

8. Omomikalo dhimwe dhini tatu vulu okuholela Jesus?

⁸ Ngaashi Jesus natse otatu vulu okukutha ethimbo tu kale naamwameme. Otatu vulu oku ya hiya ye ye ya lye pamwe natse nenge tu nyanyukilwe pamwe. (Rom. 1:11, 12) Uuna twe ya hiya, natu shilipaleke kutya oonkundathana dhetu otadhi tungu. Aakuluntugongalo oye na okukala ye  na etaloko lya fa lyaJesus. Jesus okwa li e shi kutya okwiikalela otaku vulu okukala eshongo kuyalwe, ihe okwe shi yelitha wo kutya okukala wa nyanyukwa monkalamwenyo inaku ikolelela kokuya mondjokana nenge kokumona aanona. (Luk. 11:27, 28) Pehala lyaashono, enyanyu tali kalelele, ohali zi mokupititha komeho iilonga yaJehova. — Mat. 19:12.

9. Oshike aakuluntugongalo taya vulu okuninga ya kwathele aamwameme megongalo?

⁹ Aakuluntugongalo oyo unene ya pumbwa okuungaunga naamwameme megongalo onga aamwayina nooyina yopambepo. (1 Tim. 5:1, 2) Oshi li pandunge aakuluntugongalo ya kale haya kutha ethimbo ya popye naamwameme manga okugongalo inaaku tameka nenge konima ngele kwa pu. Omumwameme Kristen ngoka a popiwa metetekelo ota ti: “Omukuluntugongalo gumwe okwa li a ndhindhilike kutya ondi ipyakidhila noonkondo, nokwa li a hala okuuva ko kutya omolwashike. Onda li lela nda pandula sho u ulike kutya oku na ko nasha nangame.” Uuna aakuluntugongalo haya kutha ethimbo pandjigilile ya popye naamwameme megongalo, ohashi ulike kutya oye na ko nasha nayo. * Omumwameme Annette ngoka a popiwa metetekelo, okwa popi kombinga yuuwanawa wumwe mboka hawu zi mokupopya naakuluntugongalo pandjigilile. Okwa ti: “Shoka  ohashi kwathele ndje ndi ya tseye nawa, nohashi ya kwathele wo ya tseye ndje. Opo nduno uuna ndi na uupyakadhi, ohashi kala oshipu kungame oku ya pula ekwatho.”

10. Oshike tashi vulu okukwathela aamwameme momagongalo getu ya kale haye shi enditha nawa?

¹⁰ Atuheni, kutya nduno aalumentu nenge aakiintu, ohatu shi enditha nawa uuna yalwe haye tu pandula omolwiilonga yetu nokuvula kwetu. Ihe ohashi tu teya omukumo, uuna kaapu na ngoka ha pandula oonkambadhala dhetu nenge iilonga yetu. Omukokolindjila inaa hokanwa gwedhina Abigail, okwa ti kutya omathimbo gamwe oha kala u uvite kutya aantu kaye mu shi. Ota ti: “Aantu oya tala ndje ko owala ndi li omumwayina gwantumba nangandi nenge omwana gwantumba nangandi. Omathimbo gamwe ohandi kala ndi uvite kutya kapu ngoka e na ko nasha nangame.” Ihe ngashingeyi ndhindhilika shoka sha popiwa komumwameme Pam. Okwa kala omutumwa uule womimvo oye awike. Mokweendela ko kwethimbo okwa galukile kegumbo a ka sile oshimpwiyu aavali ye. Ngashingeyi oku na omimvo 70, nota tsikile nuukokolindjila. Pam ota ti: “Shoka sha kwathela ndje unene oosho yalwe haya lombwele ndje kutya oya pandula ndje.”

11. Jesus oku ulike ngiini kutya okwa lenga aakiintu mboka ya li haya longo pamwe naye muukalele?

¹¹ Jesus okwa li a lenga ekwatho ndyoka ha pewa kaakiintu aatilikalunga mboka ya li haya longitha “omaliko gawo” ye mu yakule. (Luk. 8:1-3) Ka li owala a pitike ya kale ye na uuthembahenda mboka, ihe okwa li wo e ya longo oshili ya simana kombinga yehalo lyaKalunga. Pashiholelwa, okwa li e ya lombwele kutya ota ka sa nokuyumudhwa. (Luk. 24:5-8) Okwa li a lombwele aakiintu mboka omashongo ngoka taye ki iyadha mugo ngaashi owala a li a ningile aayapostoli ye. (Mark. 9:30-32; 10:32-34) Nonando aayapostoli oya li ya yi ontuku sho Jesus a kwatwa po, aakiintu yamwe oya kala popepi naye, sigo opethimbo sho ta si e li komuti gwomahepeko. — Mat. 26:56; Mark. 15:40, 41.

12. Jesus okwa li a pe aakiintu iilonga yini?

¹² Jesus okwa li a pe aakiintu iilonga ya simana. Pashiholelwa, aakiintu aatilikalunga oyo tango ya li ya mono Jesus konima sho a yumudhwa. Okwa lombwele aakiintu mboka ya ka lombwele aayapostoli kutya okwa yumudhwa. (Mat. 28:5, 9, 10) Shimwe ishewe, poPentekoste 33 E.N., otashi vulika wo pwa li aakiintu sho aalongwa ya gwayekwa nombepo ondjapuki. Ngele nayo opo ya li, otashi vulika wo ya gwayekwa nombepo ondjapuki, e taya tameke okupopya omalaka omakwiilongo nokulombwela yalwe kombinga ‘yiilonga iinene yaKalunga.’ — Iil. 1:14; 2:2-4, 11.

13. Aakiintu Aakriste kunena ohaya longo iilonga yini, nongiini tatu vulu okuulika olupandu omolwiilonga yawo?

¹³ Aamwameme momagongalo getu oya pumbwa okupandulwa, omolwiilonga mbyoka haya longo miilonga yaJehova. Iilonga mbyoka oya kwatela mo okukaleka omatungo monkalo ombwanawa, okwaambidhidha oongundu dhomalaka omakwiilongo nokukwathela momatungo gaBetel. Ohaya kwathele wo miilonga yokukwathela mboka ya dhengwa kiiponga yopaunshitwe, mokutoloka iileshomwa yetu, omanga yamwe aakokolindjila naatumwa. Ngaashi owala aamwatate, aamwameme nayo ohaya yi kosikola yaakokolindjila, kOsikola yAauvithi yUukwaniilwa nokOsikola yaGilead. Shimwe ishewe, aakulukadhi ohaya kwathele aasamane yawo, opo ya vule okugwanitha po iilonga yawo. Aamwatate mboka oye li “aantu ye li omagano” nohaya longo nuudhiginini, opo ya kwathele yalwe. (Ef. 4:8) Ihe ando kaya li haya kwathelwa kaakulukadhi yawo, otashi ka kala oshidhigu kuyo, ya gwanithe po iinakugwanithwa ayihe mbyoka. Mbela ito vulu okudhiladhila omikalo moka to vulu okwaambidhidha aamwameme miilonga mbyoka haya longo?

14. Metsokumwe naashoka sha popiwa mEpisalomi 68:11, aakuluntugongalo ohaya kala ye shi shike?

¹⁴ Aakuluntugongalo oye na okukala ye shi kutya aamwameme oye li “ongundu onene” hayi longo nehalo ewanawa, nolundji oyo unene haye shi enditha nawa mokuuvitha onkundana ombwanawa.  (Lesha Episalomi 68:11.) Onkee ano, aakuluntugongalo kambadhaleni okwiilonga ko sha kontseyo yaamwameme. Abigail, ngoka a popiwa metetekelo, okwa ti kutya ohashi mu tsu omukumo uuna aamwatate taye mu pula omaetopo ge kombinga yomikalo ndhoka hadhi pondola mokutameka oonkundathana naantu muukalele. Ota ti: “Shoka ohashi kwathele ndje ndi mone kutya ondi na oshilonga mehangano lyaJehova.” Shimwe ishewe, aakuluntugongalo oye shi ndhindhilika kutya aamwameme mboka aadhiginini noya pyokoka pambepo, ohaye shi pondola mokukwathela aamwameme aagundjuka yu ungaunge nomaupyakadhi ngoka ye na. (Tit. 2:3-5) Odhoshili kutya aamwameme yetu oya pumbwa okupandulwa.

15. Uunake tashi vulika aamwameme ya kale ya pumbwa gumwe ngoka te ya popile?

¹⁵ Poompito dhimwe aamwameme otashi vulika ya kale ya pumbwa gumwe e ya popile uuna ya taalela onkalo ondhigu. (Jes. 1:17) Pashiholelwa, omuselekadhi nenge omumwameme ngoka kee li we mondjokana, otashi vulika a kale a pumbwa gumwe e mu popile noku mu kwathela a longe po iilonga mbyoka ya li hayi longwa komusamane gwe. Omumwameme omukokele otashi vulika a kale a pumbwa ekwatho a popye noondohotola. Nenge omumwameme omukokolindjila ngoka ha kwathele miilonga yokutunga omatungo gehangano, otashi vulika a kale a pumbwa gumwe e mu popile, uuna yalwe taye mu popile muuwinayi sho ihaa yi muukalele pandjigilile a fa aakokolindjila ooyakwawo. Ongiini ishewe tatu vulu okukwathela aamwameme? Natango natu ka taleni koshiholelwa shaJesus.

16. Ngaashi sha popiwa muMarkus 14:3-9, Jesus okwa li a popile ngiini Maria?

¹⁶ Jesus okwa li aluhe i ilongekidha a popile aamwameme uuna kaaye uvitiwe ko. Pashiholelwa, okwa li a popile Maria, sho Marta a li itee mu kwathele nokuteleka. (Luk. 10:38-42) Okwa li wo a popile Maria oshikando oshitiyali, sho yalwe ya li taye mu popile muuwinayi, omolwoshinima shoka a ningila Jesus. (Lesha Markus 14:3-9.) Jesus okwa li u uvite ko einyengotompelo lyaMaria nokwe mu pandula, a ti: ‘Okwa longele ndje oshilonga oshiwanawa . . . okwa ningi shono shi thike poonkondo dhe.’ Okwa li wo a hunganeke kutya oshilonga shoka Maria a longo otashi ka hokololwa nokudhimbulukiwa, ‘shaa nkoka muuyuni awuhe elaka etoye tali ka uvithwa,’ ngaashi naanaa tatu shi kundathana ngeyi. Otashi hokitha sho Jesus a ti kutya onkundana ombwanawa otayi ku uvithwa muuyuni awuhe, sho a pandula oshilonga shoka sha longwa kuMaria. Oohapu dhe kadha li tuu dha hekeleke Maria, sho yalwe ya li taya dhiladhila kutya okwa ninga oshinima sha puka!

17. Gandja oshiholelwa kutya uunake tatu vulu okupopila omumwameme.

¹⁷ Mbela oho popile ngaa aamwameme megongalo lyeni pompito mpoka ye shi pumbwa? Natu ka taleni koshiholelwa tashi landula. Aauvithi yamwe oya ndhindhilike kutya omumwameme ngoka a hokanwa komusamane ngoka kee shi Onzapo, olundji ohe ya a lata kokugongala noha yi nziya kegumbo. Oya ndhindhilike wo kutya uunona we ihe ya nawo aluhe kokugongala. Onkee oya tameke okwiipula kutya omolwashike ihaa thiminike omusamane gwe ngoka kee shi omwiitaali, e ethe oyana ye ye naye kokugongala. Ihe uushili owo kutya omumwameme ngoka ota ningi owala ngaashi ta vulu. Iha kala e shi kutya ota ka kala i ipyakidhila shi thike peni esiku ndyoka, na haye ha tokolele omusamane gwe shoka oyana ye na okuninga. Oto ka ninga po shike uuna wu uvu yalwe taye mu popile muuwinayi? Ngele owa pandula omumwameme ngoka omolwiilonga ye yuudhiginini noku shi lombwela wo yalwe, kungawo yalwe itaya ka kala we haye mu popile muuwinayi.

18. Omomikalo dhimwe dhini tatu vulu okukwathela aamwameme yetu?

¹⁸ Otatu vulu okuulika kutya otu na ko nasha naamwameme yetu mokwiiyamba tu ya kwathele niinima yontumba. (1 Joh. 3:18) Annette, omumwameme ngoka a li ta sile oshimpwiyu yina ngoka a li te ehama, ota ti: “Aamwatate naamwameme  yamwe oya li haye ya ya sile oshimpwiyu meme uule wokathimbo, opo ndi vule oku ka ninga iinima yilwe. Shoka osha li hashi kwathele ndje ndi mone kutya ondi holike nondi li oshitopolwa shegongalo.” Jordan naye okwa li wo a kwathelwa. Omumwatate gumwe okwa li e mu kwathele nkene e na okukaleka ohauto ye monkalo ombwanawa. Ota ti: “Oshiwanawa lela sho aamwatate naamwameme ye na ko nasha nangame nosho wo negameno lyandje.”

19. Omomukalo gumwe guni ishewe aakuluntugongalo taya vulu okukwathela aamwameme?

¹⁹ Aakuluntugongalo ohaya kala wo ye shi kutya aamwameme oye na oompumbwe dhini. Oye shi kutya Jehova okwa hala ya kale hayu ungaungiwa nayo ngiini. (Jak. 1:27) Onkee ano, aakuluntugongalo ohaya holele Jesus, nohaya kala ye na ondjele. Shoka ohaye shi ningi mokuyaalela yalwe nokuyanda oku ya tulila po oompango inaadhi pumbiwa. (Mat. 15:22-28) Ngele aakuluntugongalo ohaya kambadhala ya kwathele aamwameme, ohashi ya kwathele ya kale yu uvite kutya oye holike kuJehova nokehangano lye. Sho omuwiliki gwongundu yomomapya yaKia u uvu kutya Kia ota tembukile kegumbo lilwe, okwa ningi omalongekidho nziya a kwathelwe. Kia ota ti: “Shoka osha kwathele ndje kaandi kale tandi ipula unene nkene tandi ka tembuka. Aakuluntugongalo oye shi ulike kutya ondi na oshilonga megongalo, noitaye ke etha ndje ndu ungaunge nonkalo yandje ondhigu ongame awike, sho ya tsu ndje omukumo noku pa ndje ekwatho ndyoka nda li nda pumbwa.”

20-21. Ongiini tatu vulu okuulika kutya otwa lenga aamwameme megongalo lyetu?

²⁰ Momagongalo getu, omu na aamwameme oyendji mboka haya longo nuudhiginini ya pumbwa ekwatho lyetu. Ngaashi twi ilonga koshiholelwa shaJesus, otatu vulu oku ya kwathela ngele ohatu kutha ethimbo tu kale nayo noku ya tseya nawa. Otatu vulu oku ya pandula sho taya longele Jehova nuudhiginini. Otatu vulu wo oku ya popila uuna sha pumbiwa.

²¹ Pehulilo lyontumwafo ye kAaroma, omuyapostoli Paulus okwa li a popi aakiintu Aakriste ye li omugoyi komadhina. (Rom. 16:1, 3, 6, 12, 13, 15) Kapu na omalimbililo kutya aakiintu mboka oya li ya tsuwa omukumo sho yu uvu omakundo ge naasho e ya pandula. Natse wo natu kale hatu kwathele aamwameme ayehe megongalo. Ngele osho twa ningi, otashi ku ulika kutya otwe ya lenga sho ye li oshitopolwa shegongalo.