1. Nikhaviheryo taani arokora anavahaaya mmarehereryo nave makacamiho taani arokora akina anahoolelaaya? (Moone eruku ya ekaapa.)

NINNATEPA ohakalala okhalano arokora ancipale mmulokoni yaawo analapa mwakuru! Ntoko yootakiherya, awo annapaka makupa mmithukumano, nave annaya mmuteko woolaleerya. Akina annakhaviherya oreherya ipa sa Omwene, nave annooniherya waapwacha anna ni arokora aya. Naamwi hiiha, awo annahoolela makacamiho. Akina a yaawo anaakhapelela asitiithi aya awuuluvala. Akina annavilela ni waakaahiwa wa veemusini. Eniiha akina anaaphuwa anaaya meekhaya, nave annalapa mwakuru wi yaavakulele.

2. Ntakhara heeni ninnaphwanela wiilipiserya waakhaviherya arokora ahu?

² Ntakhara heeni ninnaphwanela waakhaviherya arokora ahu? Nthowa na wi elapo henaavaha ncicimiho nenno awo anaphwanelaaya waakhela. Mwawaaceererya, Piipiliya onnaceenyerya wi nnaphwanela waakhaviheryaka athiyana xaxaxa arokora ahu. Ntoko yootakiherya, Murummwa Paulo aahiveka muloko wo Roma wi omwaakhele Fepi ni ‘omukhaviheryaka ni seiyo saamuthowa.’ (Aro. 16:1, 2) Ntoko Mfarisi, Paulo aanapaka makupa a achu yaawo yaawoona athiyana ohikhala echweenevo. Mwawiihiiha, vano amanle okhala Mukristu, owo aanamutakiherya Yesu nave aanaakhaliha athiyana mwancicimiho ni mooreera murima.—1 Kor. 11:1.

3. Yesu aakhaliha hai athiyana, nave yaale yaapaka yookhwela ya Muluku owo aawoona hai?

³ Yesu aanaakhaliha athiyana oothene mwa ncicimiho. (Yoh. 4:27) Owo haawoona athiyana hiiha ntoko ahooleli a Ayuta yaawoonelaaya. Liivuru mmoha onaloca sa Piipiliya oriye: “Yesu hantonko oloca echu vyakala yohaacicimiha athiyana.” Mwawiihiiha Yesu aanaacicimiha vancipale athiyana yaawo yeera yookhwela ya Atiithi awe. Owo aawoona athiyana ntoko arokora awe, nave awo vamoha ni alopwana akina aawoona ntoko amusi awe oomunepani.—Mat. 12:50.

4. Tiheeni nneeraahu nthokororye mmwaha yoola?

⁴ Ilukuluku soothene Yesu aari oorehereya waakhaviherya arokora awe oomunepani. Owo aanathamalela ni owaakiha. Hankooni  noone mukhalelo nneeraahu nimutakiherye Yesu mu wooniherya waapwacha arokora.

5. Ntakhara heeni onakhalaaya woovila wa arokora akina waphwanya asinthamwene aphaama yaawo anaachunaaya?

⁵ Oothene ahu, anna ni arokora, ninnachuna okhalano asinthamwene aphaama. Mwawiihiiha, mu ilukuluku ikina, arokora annoona okhala woovila waphwanya asinthamwene aphaama yaawo anaachunaaya. Ntakhara heeni? Muthokororye yeeyo arokora akina aloncaaya. Murokora mmoha oniichaniwa Jordan * ooloca: “Nthowa nawi kamuciye, kinniisoona wi nkinaphariheleya mmulokoni nave wi nkinapaka makupa a muloko.” Kristen, piyoneera yoowo aathamenele muceche mukina wi aaceererye orummwa awe, ooloca: “Vaavaa muchu onathaameleiye muloko mukina, onniisoona okhala oomeekha.” Anna akina anniisoona mmukhalelo woolikana. Muchu ori oothene yoowo onakhala mu emusi yookawanyeya malapelo, onanwerya wiisoona ntoko muchu oovalaanyeya ni emusi awe yoomunepani. Arokora akina anniisoona okhala oomeekha, nthowa nawi anamwiiceliwa nave hanawerya weeca naari nthowa nawi anamukhapelela muchu a veemusini yoowo oniiceliwa. Annette ooloca: “Nkaawerya omaliha elukuluku vamoha ni anna ni arokora nthowa nawi kaakhapelela amama aka.”

6. Tiheeni nnahuseryaahu mu Luka 10:38-42, vooloca sa mukhalelo Yesu aamukhavihenreiye Mariya ni Marta?

⁶ Yesu aanamaliha elukuluku vamoha ni arokora awe oomunepani, nave owo aari nthamwene eeparipari wa yaawo. Muupuwele onthamwene yoowo aareiyeno ni Mariya vamoha ni Marta, yaawo akhweya yaari aciye. (Mwaalakhanye Luka 10:38-42.) Moorweela mmukhalelo aaloceiye ni meerelo awe, aaneeriha wi yiisooneke okhala ootaphuwa ni yene. Ntoko yootakiherya, Mariya aahikhala ootaphuwa okilaathi o inaani sa Yesu ntoko oohuserya. * Nave vaavaa Marta aananariweiye nthowa nawi Mariya haamukhaviherya orehererya yoolya, owo aahikhala ootaphuwa omuleela Yesu yeeyo uupuweleiye. Nave mu elukuluku yeele, Yesu aahaakhaviherya athiyana oopiili, moorweela wa waahusiha echu yoochuneya. Nave owo aahooniherya opwacha wa athiyana oopiili vamoha ni munnaya Lasaro, moorweela mu waasekurya elukuluku ekina. (Yoh. 12:1-3) Mwawiihiiha, vaavaa Lasaro iiceliweiye vancipale, Mariya ni Marta yaanasuwela wi yaanwerya omveka Yesu nikhaviheryo.—Yoh. 11:3, 5.

7. Mmukhalelo taani mmoha nneeraahu naalipihe arokora?

⁷ Wa arokora akina, mithukumano eri elukuluku ya vameekhaaya wi ekhale vamoha ni alapeli akhwaaya. Mwawiihiiha, nnachuna opharihela elukuluku yeela wi niwaakhele phaama, oloca ni yaawo, ni weeriha wi yoone wuukhuwa nryaahuno ntakhara yaawo. Jordan, yoowo oromoliwe woopaceryani oriye: “Kinnalipiheya vancipale vaavaa akina anathamalelaaya maakhulo aka, anapakaaya marehereryo wi yeece vamoha ni miyaano mmuteko woolaleerya, naari vaavaa anooniheryaaya wi annakipwacha mmukhalelo vyakala.” Nnaphwanela owooniherya arokora ahu wi toochuneya wa hiyaano. Murokora Kia ooloca: “Wakhala wi nkiwenrye oya mmithukumano, kinnawehererya waakhela muchaka wa anna ni arokora, echunaka osuwela tiheeni ekeerinhe ohiyawo omithukumano. Ela ennakikhaviherya osuwela wi anna ni arokora annakipwacha.”

8. Mmikhalelo taani mikina nneeraahu nimutakiherye Yesu?

⁸ Moolikana ni Yesu nnanwerya omaliha elukuluku ni arokora. Akhweya nnanwerya waawopela owannyahu wi nalye vamoha naari ochekula.  Nnaphwanela ororomela wi echu nnalocaahu ni yaawo ti yoolipiha. (Aro. 1:11, 12) Atokweene anaphwanela okhalano moonelo mmohamoha yoowo Yesu aareiyeno. Owo aahisuwela wi okhala muciye onanwerya okhala woovila wa akina, nyenya aahiloca mookwakwaleya wi othela naari okhalano anamwane tahi echu yaahaala omweeriha muchu okhala oohakalala. (Luka 11:27, 28) Ohiya yeeyo, ohakalala weeparipari onarweela mu ohela mu nipuro noopacerya muteko wa Yehova.—Mat. 19:12.

9. Tiheeni atokweene anaphwanelaaya opaka wi yaakhaviherye arokora?

⁹ Xaxaxa atokweene a mmulokoni anaphwanela waakhalihaka athiyana Eekristu ntoko arokora aya ni asimaayi oomunepani. (1 Tim. 5:1, 2) Atokweene anneerano phaama vaavaa anapharihelaaya elukuluku wi yaalocele arokora mithukumano ihaakumve opacerya naari imanle. Kristen ooloca: “Mutokweene mmoha aahoona wi kaanatepa okhala ooweiwa nave aahichuna osuwela tiheeni yaakeeriha okhala ooweiwa. Kaahitepa othamalela wuukhuwa wawe ni miyo.” Vaavaa atokweene wiiliwiili anamalihaaya elukuluku elocaka ni arokora aya oomunepani annooniherya wi annaapwacha. * Annette, yoowo oromoliwe woopaceryani, oothariha ntakhara heeni eryaaya yaphaama oloca ni atokweene wiiliwiili. Owo oriye: “Kaahaasuwela phaama yaawo, nave awo  tho yaahikisuwela. Nyenya vaavaa kinaholelaaka makacamiho, kinnakhala ootaphuwa waaphiyerya wi kaaveke nikhaviheryo.”

10. Tiheeni enahaala waakhaviherya arokora okhala oohakalala?

¹⁰ Oothene ahu, alopwana naari athiyana ninnalipiheya vaavaa akina anasuwelaaya mavyakelo ahu, ni onithamalela ntakhara muteko nnapakaahu. Mwawiihiiha, wakhala wi haavovo onathamalela mukhalelo nnapharihelaahu mavyakelo ahu naari muteko nnalapaahu, ninnaceecheya. Piyoneera mmoha yoowo ori muciye oniichaniwa Abigail onneemererya wi ilukuluku ikina onniisoona ntoko muchu oohipwachiwa, owo oriye: “Achu hanakisuwela phaama nave awo anakoona ntoko muchu vyakala. Ikwaha ikina kinniisoona okhala oocuwaliwa.” Moone tho yeeyo murokora oniichaniwa Pam olonceiye. Vaavaa aareiye muciye, owo aahirumeela ntoko Misiyonaariya mu iyaakha sincipale. Nyenya hiihaano, ookookela owaani wi aakhapelele asitiithi awe. Vano owo orino iyaakha opwaha 70 nave onnarumeela ntoko piyoneera. Owo oriye: “Echu enakikhaviherya ori vaavaa akina anathamalelaaya muteko yoowo kinalapaaka.”

11. Yesu oonihenrye hai wi aanaathamalela athiyana yaawo yaamukhaviherya mu orummwa awe?

¹¹ Yesu aanavaha esisapo nikhaviheryo nenlo aakheleiye orweela wa athiyana ooromeleya yaawo ‘yaamukhaviherya ni muhakhu aya.’ (Luka 8:1-3) Tahi wi pahiru Yesu aarimoona waavaha athiyana ekari ya omurumeela yene, nyenya aahaahusiha iparipari soochuneya vooloca sa yookhwela ya Muluku. Ntoko yootakiherya, owo aahaaleela wi aahaala wiiphiwa nave voocharela oviihiwa mookhwani. (Luka 24:5-8) Owo aahaavyakiha athiyana, hiiha ntoko enreiye ni arummwa, ntakhara makacamiho yaawo yaahaalaaya ohoolela muhoolo. (Mar. 9:30-32; 10:32-34) Ti yawooneya wi arummwa akina yaahichawa vaavaa Yesu aaphariweiye, nyenya athiyana akina yaawo yaamukhaviherya yaari vakhiviru ni yene, elukuluku akhweiye vamwirini.—Mat. 26:56; Mar. 15:40, 41.

12. Muteko taani Yesu aavaherenryeiye athiyana?

¹² Yesu aahaavahererya athiyana muteko woochuneya. Ntoko yootakiherya, athiyana ooromeleya yaari oopacerya weerela onamoona sa oviihiwa mookhwani wa Yesu. Owo aahaaruma athiyana wi yaaleele arummwa wi owo ooviihiwa mookhwani. (Mat. 28:5, 9, 10) Nave mu Pentekoste 33 E.K., woonaru athiyana yaahikhalavo vaavaa achu yayeeheryiwaya munepa waweela. Waakhanle wi ti hiiha, arokora yaala avyaani oothanliwa ni munepa waweela, yaahiwerya waakhela mavyakelo ootikhiniha a oloca ilocelo sookhopela ni waaleela akina ‘ichu sootikhiniha sa Muluku.’—Saw. 1:14; 2:2-4, 11.

13. Tiheeni arokora ahu anapakaaya olelo, nave nni nooniherye hai othamalela ntakhara yeeyo anapakaaya?

¹³ Arokora ahu annaphwanela othamaleliwa ntakhara soothene anapakaaya mmuteko wa Yehova. Miteko seiha inaphitaanyerya oteka ni orehererya Ipa sa malapelo ahu, okhaviherya mmakhuuru a ilocelo sookhopela, ni okhaviherya mmuteko wa Opeteli. Awo annakhaviherya weiwo weeren’yewo epahu ya maphacuwelo, annataphulela soolaleeryiwa sahu, nave annarumeela nto mapiyoneera ni mamisiyonaariya. Moolikana ni anna, arokora annavolowa mu Exikola ya mapiyoneero, Exikola ya Alaleeryi a Omwene, ni Exikola ya Okiliyati. Mwawaacererya, arokora yaawo atheliwe annaakhaviherya asiiyaya okhwaaniherya murici aya mmulokoni ni mmarehereryo. Anna yaawo arino mirici mmarehereryo, hiyaahaala orumeela moopwahaxa ntoko “samahala wa atchu” nihirivo nikhaviheryo na asaaraya. (Éfe. 4:8, NN) Apwanne mwanwerya wuupuwela mukhalelo muneeraanyu mwaakhaviherye mmuteko anapharaaya?

14. Mwawiiwanana ni Salumu 68:11, tiheeni atokweene a miruku anapakaaya?

¹⁴ Atokweene annasuwela wi arokora ari ntoko “nikhuuru ntokweene na akhoco” nenlo nnalapa ni murima woothene nave wi awo wiiliwiili annakhumelela phaama mmuteko woolaleerya  michaka ya phaama. (Mwalakhanye Salumu 68:11.) Mwawiihiiha atokweene annaavya mikhalelo sa ophura orweela wa saweereya sa arokora. Abigail, yoowo oromoliwe wuupaceryani, aanathamalela vancipale vaavaa anna yaamukohaaya mukhalelo wa opaceryiha ovaanela ni achu a mu ekulucu aya. Abigail oriye: “Ela ennakikhaviherya osuwela wi Yehova ookivaha muteko woochuneya wi kipake mmarehereryo awe.” Mwawaacererya, atokweene annasuwela wi, arokora oororomeleya ni awiichwelavo annakhumelela phaama mu waakhaviherya asimwali ovilela ni makacamiho aya. (Tito 2:3-5) Mweeparipari, nnaphwanela waasivela ni waathamalela arokora ahu!

15. Elukuluku taani akhweya arokora anamuchunaaya muchu wi awaakihe?

¹⁵ Mu ilukuluku ikina, arokora anammuchuna muchu wi awaakihe naari aakhaviherye vaavaa anahoolelaaya nikacamiho vyakala. (Isa. 1:17) Ntoko yootakiherya, murokora yoowo ori naamukhweli naari yoowo omwalanne ni iyawe onammuchuna muchu wi amwaakihe mmiyaha mikina ni omukhaviherya ni miteko seiyo iyawe aapakeiye. Murokora awuuluvala, onammuchuna muchu wi amukhaviherye oloca ni matotore oxipitali. Naari murokora yoowo ori piyoneera onalapa mmuteko mukina mmarehereryo, onammuchuna muchu wi amwaakihe vaavaa akina anamulocaaya moonanara wi, hanaya mmuteko woolaleerya hiiha ntoko mapiyoneero makina aneerelaaya. Mmikhalelo taani mikina nneeraahu naakhaviherye arokora? Wanaawiili, hankooni nthokororye yootakiherya ya Yesu.

16. Yesu aamwaakinhe hai Mariya, hiiha ntoko elociwaaya mu Marko 14:3-9?

¹⁶ Yesu aanaakuvela owaakiha arokora awe oomunepani vaava yaalociwaaya moonanara. Mu elukuluku ekina, Yesu aahimwaakiha Mariya vaava Marta aamukhupanyeiye. (Luka 10:38-42) Nave tho Yesu aahimwaakiha Mariya mu ekwaha yanaawiili, vaavaa akina yaananariwaaya ni Mariya yuupuwelaka wi owo aahipaka yoolakelela yoonanara. (Mwaalakhanye Marko 14:3-9.) Yesu aahiiwexexa mathowa yaawo yaamweerinhe Mariya opaka yoolakelela yeele, nave aahimuthamalela ariki: “Okeerenle echu yaphaama. . . . Ola eenre yeeyo owenreiye.” Ophiyerya wi Yesu aahilaiherya wi oreera murima wa muthiyana ole waahaala olociwaka “weiwo eneeraaya elaleeiwewo michaka yeela mu elapo yoothene yavathi,” hiiha ntoko mwaha ola onalocaaya. Ti yoohakalaliha osuwela wi, elukuluku Yesu aamuthamaleleiye Mariya nthowa na oreera wawe murima aahiloca tho wi michaka yaphaama yaahaala olaleiwa veelaponi yoothene yavathi! Amanle othorihiwa moonanara Mariya aahitepa olipiheya vaavaa iiwaleiye masu a Yesu!

17. Mvahe yootakiherya vooloca sa elukuluku taani nnaphwanelaahu omwaakiha murokora.

¹⁷ Apwanne munnawaakiha arokora anyu oomunepani vaavaa onakhalaaya woochuneya? Ntoko yootakiherya, muthokororye yaweereya enacharela. Alaleeryi akina annoona wi murokora yoowo iyawe ohiri Namoona a Yehova, wiiliwiili onaphiya mmithukumano moolekela nave mithukumano imanle hanalekela tho. Opwaha yeeyo alaleeryi annoona wi murokora hantonko waaruuha anamwane awe mmithukumano. Mwawiihiiha, awo annamukoha ntakhara heeni ohinamulamuleleiye iyawe wi amweemererye waaruuha anamwane awe mmithukumano. Nyenya eparipari tiyawi, murokora owo onnapaka wiilipiserya ophiyerya onaweryeleiyevo, nyenya murokora tahi yene onapaka yoolakelela yookuchula vooloca sa anamwane awe. Tiheeni munaphwanelaanyu opaka wakhala wi munnawiiwa akina emulocaka murokora moonanara mmukhalelo yoola? Wakhala wi moomuthamalela murokora ni oromola ichu ikina eenreiyeno phaama, munahaala waamaliha akina omuloca moonanara.

18. Mmikhalelo taani mikina nneeraahu naakhaviherye arokora ahu?

¹⁸ Nnanwerya owooniherya arokora ophiyerya mweeryo taani nnaapwachaahu moorweela wa waavaha nikhaviheryo nawooneya. (1 Yoh. 3:18) Annette, murokora yoowo onaakhapelela amama awe aniiceliwa, oriye: “Anna ni arokora akina  yaanarwa owaani wi yaakhapelele amama nave eyo yaanakikhaviherya wi kipake miteko mikina. Ela yaanakeeriha wiisoona wi kinnasiveliwa navetho wi kinnapaka makupa a muloko.” Jordan aahaakhela tho nikhaviheryo. Munna mmoha aahimukhaviherya ohuserya mukhalelo wa orehererya ekaaro awe. Owo oriye: “Ti yoohakalaliha osuwela wi nna annapwacha vooloca sa okhapeleleya waka.”

19. Mmikhalelo taani mikina atokweene eneeraaya yakhaviherye arokora?

¹⁹ Mmukhalelo woolikana, atokweene tho annaavya mukhalelo wa othokororya soothowa sa arokora. Awo annasuwela wi Yehova onachuna wi arokora ekhalihiweke phaama. (Tiy. 1:27) Mwawiihiiha, atokweene annatakiherya ophimelela wa Yesu, awo ananwerya weerano yeela moorweela wa ohipaka malamulo oohichuneya, okhala ooreera murima, ni awiiwexexa. (Mat. 15:22-28) Vaavaa atokweene aniilipiseryaaya waakhaviherya arokora aya, annaakhaviherya awo osuwela wi Yehova vamoha ni marehereryo awe annaasivela yaawo. Vaavaa Kia aathaamenleiye mu empa ekina muhooleli mukina a nikhuuru nawe noolaleerya aahimukhaviherya mwawaakuveya. Kia ooloca: “Nikhaviheryo na munna owo naahikikhaviherya ovukula wuukhuwa otokotoko kaaryaakano. Moorweela wa masu aya oolipiha nnikhaviheryo naya nawooneya, atokweene yaahikooniherya wi kinnapaka makupa oochuneya mmulokoni nave wi nkinakhala meekhaaka ilukuluku kinaholelaka makacamiho.”

20-21. Nni nooniherye hai wi ninnaavaha esisapo arokora ahu oomunepani?

²⁰ Mmiloko soothene orukurerya elapo olelo, ninnaphwanyamo arokora yaawo analapa mwakuru nave anachuna nikhaviheryo nahu. Hiiha ntoko nimanlaahu ohuserya orweela wa yootakiherya ya Yesu, nnanwerya waakhaviherya yaawo moorweela wa omaliha elukuluku ni yaawo nave tho waasuwela phaama. Nnanwerya waathamalela ntakhara yeeyo anapakaaya mmuteko wa Muluku. Nave tho nnanwerya owaakiha vaavaa onakhalaaya woochuneya.

²¹ Omakuchuwelo wa ekaarata awe aarepenleiye o Roma, murummwa Paulo aahaaromola athiyana Ekiristu athanu naxexe. (Aro. 16:1, 3, 6, 12, 13, 15) Moohikhwa minikwa, arokora yaala yaahitepa olipiheya vancipale vaavaa Paulo aavanheiye mooni ni waathamalela. Mmukhalelo woolikana hinkooni naathamalele arokora oothene mmulokoni. Mwa weerano hiiha ninnooniherya wi ninnaavaha esisapo ntoko makupa a emusi ahu yoomunepani.