1. Hadia manö nifalua ndra talifusöda ira alawe ba wotuhini organisasida, hizaʼi hadia manö gabula dödö nitaögöra? (Faigi gambara ba guli majalah.)

TATU taʼandrö sibai saohagölö ba wamorege nifalua ndra talifusöda ira alawe ba mbanua niha Keriso! Duma-dumania, latuhini waö-waö halöwö nifalua ba gangowuloa, möi ira manuriaigö turia somuso dödö hegöi ba wamahaʼö niha böʼö, ba fao ira ba wondrorogö Balai Mbanua Lowalangi. Baero daʼö, laforomaʼö göi wa laʼameʼegö tödö ndra talifusöra ba wamati. Hizaʼi, göna göi ira abula dödö. So ba gotaluara zondrorogö satuara si no alawa döfi. So ösa zanaögö fanaisi moroi ba nösi nomora, ba so göi zi no tobali lakha mbanua irege moguna laforege samösa ba wangaʼasogö soguna khö ndraonora.

2. Hana wa moguna taforege ba wotuhini ndra talifusöda ira alawe?

² Ba gulidanö andre iadaʼa, asese laʼosiwawöi ndra alawe. Daʼö mbörö wa moguna tatuhini ndra talifusöda ira alawe ba mbanua niha Keriso. Baero daʼö, no göi ifarou dödöda Sura Niʼamoniʼö ba wotuhini yaʼira. Duma-dumania, iʼandrö Faulo ba mbanua niha Keriso si so ba Roma enaʼö latemaʼö Woʼibe, ba ’latolo ia ba zoguna khönia’. (Rom. 16:1, 2) Börö me no irai tobali niha Farizaiʼo Waulo, aboto ba dödönia wa so ösa niha sangosiwawöi ira alawe. Hizaʼi, börö me no tobali ia niha Keriso, iʼoʼö duma-duma Yesu ba wangosinangegö ira alawe hegöi ba wangoromaʼö khöra faʼasökhi dödö.​—1 Kor. 11:1.

3. Hewisa gamuata Yesu khö ndra alawe, ba hewisa lala wangera-ngerania ba ndra alawe samalua somasi Lowalangi?

³ Iforomaʼö Yesu wa ifosumange fefu ndra alawe. (Yoh. 4:27) Tenga simane ira sondröniaʼö agama Yahudi me götö daʼö, lö iʼosiwawöi ndra alawe Yesu. Imane sambua referensi Zura Niʼamoniʼö, ”Lö irai iwaʼö Yesu wehede sangosiwawöi ira alawe.” Tobali, abölö ifosumange Yesu ndra alawe samalua somasi Namania. Simane ira matua si lö faröi, no göi ösi nomonia ba wamati ira, ba ifotöi ira talifusönia ira alawe.​—Mat. 12:50.

4. Hadia nitutunöda ba artikel daʼa?

 ⁴ Lö aetu iforomaʼö Yesu wa omasi ia itolo ndra talifusönia ira alawe ba wamati. Ibeʼe ginötönia fariawö khöra, iforomaʼö khöra wangandrö saohagölö, ba iʼoʼawögö göi ira. Datatutunö hewisa lalada ba woloʼö duma-duma Yesu ba woʼameʼegö tödö ndra talifusöda ira alawe.

5. Hana wa so ösa ndra talifusöda ira alawe sorasoi wa abua khöra ba wangokhögö fariawösa si sökhi?

⁵ Fefu ita, ira matua hegöi ira alawe, moguna taʼokhögö wariawösa si sökhi. Hizaʼi, itaria abua khö ndra talifusöda ira alawe ba wangokhögö daʼö. Hadia mbörö? Nehegö mbua gera-erara andre. Imane samösa dalifusöda ira alawe sotöi Jordan, * ”Börö me lö sangowalu ndraʼodo, asese urasoi wa lö hadöi halöwö si tola ufalua ba mbanua niha Keriso, ba hulö zi tenga ösi mbanua niha Keriso ndraʼo.” Imane samösa perintis sotöi Kristen, si möi ba mbanua böʼö enaʼö tola idouʼö wamalua fanuriaigö, ”Na findra ita ba mbanua niha Keriso si bohou, tola manö tarasoi wa lö awö-awöda.” Na toröi ita ba nösi nomoda si tenga Samaduhuʼö Yehowa, tola manö abua khöda fahuwu ba nösi nomoda hegöi khö ndra talifusöda ba mbanua niha Keriso. So göi ösa zorasoi falöʼawö-awö börö me tebai laröi nomora. Tola manö mofökhö ira mazui moguna larorogö nösi nomora si no göna fökhö. Imane Annette, ”Börö me yaʼodo zondrorogö mamagu, tebai möido fariawö khö ndra talifusöda si sara lala ba wamati.”

6. Simane nisura ba Luka 10:38-42, hewisa lala Yesu ba wanolo Maria hegöi Marata?

⁶ Ibeʼe ginötönia Yesu fariawö khö ndra talifusönia ira alawe, ba tobali ia sindruhu zi fahuwu khöra. Nehegö wahuwusania khö Maria hegöi Marata, darua zi fatalifusö si lö sangowalu. (Baso Luka 10:38-42.) Börö wehedenia hegöi amuatania khöra, ohahau dödöra fariawö khö Yesu. Duma-dumania, lö alawö Maria wedadao ahatö ba gahe Yesu, simane nifalua zi samösa nifahaʼö. * Baero daʼö, me abao dödö Marata khö Maria börö me lö itolo ia ba wamaʼanö ö, lö alawö ia ba wanutunö khö Yesu hadia zi lö fao dödönia. Ba ginötö daʼö, oya wamahaʼö si tohude nifaʼema Yesu khöra. Ba ginötö tanö böʼö, ifuli zui iʼondrasi Yesu ndra alawe si darua andrö hegöi talifusöra sotöi Lazaro. Daʼa zangoromaʼö wa iʼameʼegö tödö ira Yesu. (Yoh. 12:1-3) Börö daʼö, me abölö-bölö wökhö Lazaro, lö alawö Maria hegöi Marata ba wangandrö tolo khö Yesu.​—Yoh. 11:3, 5.

7. Hewisa lalada ba wameʼe famarou dödö khö ndra talifusöda ira alawe?

⁷ So ösa ndra talifusöda ira alawe sorasoi, wa ha na mufalua gangowuloa tola fariawö ira khö ndra talifusöra ba wamati. Börö daʼö, na falukha ita khöra ba gangowuloa, moguna tatemaʼö ira, fahuhuo ita khöra, ba taforomaʼö wa taʼameʼegö tödö ira. Imane Jordan si no mututunö moroi yawa, ”Terou sibai dödögu me ato ndra talifusöda zanuno bua gera-era nifaʼemagu ba gangowuloa, lafabuʼu wefao khögu ba wanuriaigö, mazui lafalua danö böʼö sangoromaʼö wa laʼameʼegö tödö ndraʼo.” Sindruhu-ndruhu moguna taforomaʼö khö ndra talifusöda ira alawe wa no sebua böli ira ba wamaigida. Imane talifusöda ira alawe sotöi Kia, ”Na lö möido ba gangowuloa, hasambalö lasofu ira talifusöda hewisa duriagu. Tola urasoi wa laʼameʼegö tödö sibai ndraʼo ira talifusöda.”

8. Hadia nasa lala si tola tafalua ba woloʼö duma-duma Yesu?

⁸ Simane Yesu, moguna göi taforege ba wameʼe inötöda fariawö khö ndra talifusöda ira alawe. Tola takaoni ira weʼamöi manga ba nomoda mazui ba wamalua rekreasi. Na tafalua daʼö, moguna taforege enaʼö möi famarou  dödöra wehededa. (Rom. 1:11, 12) Baero daʼö, moguna göi laforege ira satua sokubaloi ba woloʼö amuata Yesu. Aboto ba dödö Yesu wa tola manö abu dödö zi samösa niha na lö sangowalu ia. Hizaʼi, iforomaʼö wa tenga fangowalu mazui fangokhögö iraono zangaʼasogö faʼowua-wua dödö sindruhu. (Luk. 11:27, 28) Tobali, hasambalö taʼokhögö waʼowua-wua dödö sindruhu na taʼofönaiʼö wamalua somasi Yehowa ba waʼaurida.​—Mat. 19:12.

9. Hadia zinangea lafalua ira satua sokubaloi ba wanolo ndra talifusöra ira alawe?

⁹ Moguna so ba wangera-ngera ndra satua sokubaloi wa no talifusöra ba wamati mazui inara ba wamati fefu ndra alawe si so ba mbanua niha Keriso. (1 Tim. 5:1, 2) Moguna labeʼe ginötöra fahuhuo khö ndra talifusöra ira alawe fatua lö tebörögö mazui na no awai gangowuloa. Imane talifusöda Kristen si no mututunö moroi yawa, ”Anehe zi samösa satua sokubaloi wa oya sibai halöwögu. Börö daʼö, isofu hewisa wamaʼanögu halöwö nifaluagu sero maʼökhö. Uʼandrö sibai saohagölö börö me iʼameʼegö tödö ndraʼo.” Na labeʼe ginötöra ira satua sokubaloi enaʼö tola fahuhuo ira khö ndra talifusöra ira alawe, no laforomaʼö wa laʼameʼegö tödö ira. * Ifatunö Annette si no mututunö moroi yawa, hadia mbua nirasoinia börö me asese fahuhuo ia khö ndra satua sokubaloi. Imane, ”Itugu aboto ba dödögu  haniha ira, ba itugu aboto göi ba dödöra haniha ndraʼodo. Börö daʼö, me alua khögu gabula dödö, lö saʼae alawö ndraʼo ba wangandrö fanolo moroi khöra.”

10. Hadia zi möi famarou dödö ndra talifusöda ira alawe?

¹⁰ Fefu ita, ira matua hegöi ira alawe, tola terou dödöda na lafaduhuʼö waʼonekheda ira niha böʼö ba laʼandrö saohagölö ba halöwö si no tafalua. Hizaʼi, na lö hadöi niha soʼameʼegö tödö faʼonekheda mazui sangandrö saohagölö ba halöwö si no tafalua, tola manö ide-ide dödöda. Irasoi samösa perintis sotöi Abigail wa lö laʼameʼegö tödö ia ira talifusöda. Imane, ”Laʼila yaʼi haniha dalifusögu sindruhu ba haniha zatuagu. Ha daʼö zaboto ba dödöra sanandrösa khögu. Itaria urasoi wa lö hadöi soʼameʼegö tödö yaʼo.” Iadaʼa, nehegö wehede zi samösa dalifusöda ira alawe si lö sangowalu sotöi Pam. No mangai halöwö ia tobali utusan injil ba zi hauga fakhe faʼara. Ba gafuriata, mangawuli ia ba nomonia ba wondrorogö ndra satuania. Hewaʼae na no 70 fakhe ndröfinia iadaʼa, lö aetu mangai halöwö ia tobali perintis. Imane Pam, ”No fanolo sebua khögu ba ginötö laforomaʼö ira talifusöda wa laʼameʼegö tödö halöwö si no ufalua.”

11. Hewisa wangoromaʼö Yesu fangandrö saohagölö khö ndra alawe si falulu fohalöwö khönia?

¹¹ Iʼandrö sibai saohagölö Yesu khö ndra alawe si lö faröi börö me ”laʼogunaʼö fefu gokhötara” ba wanolo yaʼia. (Luk. 8:1-3) Tenga ha ibeʼe khöra döi si sökhi enaʼö falulu fohalöwö khönia, hizaʼi ifahaʼö göi ira ba zindruhu sanandrösa ba gohitö dödö Lowalangi. Duma-dumania, iʼombakhaʼö khöra wa hasambalö mate ia ba ifuli tesusugi. (Luk. 24:5-8) Simane nifaluania khö ndra sinengenia, ifaʼanö göi ira ba wanaögö fanandraigö salua khöra ba zi so miföna. (Mrk. 9:30-32; 10:32-34) Ba gafuriata, hewaʼae na moloi ndra sinenge Yesu me laraʼu ia, so ösa ndra alawe si lö faröi ba wotuhini yaʼia me itaögö waʼafökhö fatua lö mate ia ba döla geu famakao.​—Mat. 26:56; Mrk. 15:40, 41.

12. Hadia manö noro dödö nibeʼe Yesu khö ndra alawe?

¹² Ibeʼe göi noro dödö si tohude Yesu khö ndra alawe. Duma-dumania, ira alawe zi oföna sibai falukha khönia me no aefa tesusugi ia. Iʼandrö göi khöra ba wamatunö khö ndra sinengenia wa no tesusugi ia moroi ba waʼamate. (Mat. 28:5, 9, 10) Baero daʼö, me Fendrakose 33 M, te so ösa ndra alawe nibayoini faoma eheha niʼamoniʼö. Na simane daʼö, tebeʼe khöra waʼonekhe sahöli-höli dödö irege tola fahuhuo ira ba li böʼö ba latutunö ba niha böʼö sanandrösa ”ba zahöli-höli dödö nifalua Lowalangi”.​—Hal. 1:14; 2:2-4, 11.

13. (a) Hadia manö halöwö nifalua ndra talifusöda ira alawe ba wamosumange Yehowa? (b) Moloʼö yaʼugö, hewisa wangoromaʼöu fangandrö saohagölö ba nifaluara?

¹³ No sinangea musuno ndra talifusöda ira alawe ba ngawalö halöwö nifaluara ba wamosumange Yehowa. Duma-dumania, fao ira ba wamasindro hegöi ba wondrorogö tomosa, latuhini kelompok sangogunaʼö li böʼö, ba mangai halöwö ira ba Mbetieli. Fao göi ira ba wanolo ndra talifusöda si göna bencana, falulu fohalöwö ira ba wamoʼeluaha publikasida, ba mangai halöwö ira tobali perintis hegöi utusan injil. Simane ndra talifusöda ira matua, fao göi ndra talifusöda ira alawe ba Sekolah Dinas Perintis, Sekolah bagi Penginjil Kerajaan, hegöi ba Sekolah Gilead. Baero daʼö, latolo göi ndra foʼomora ira matua ba wamalua noro dödöra ba mbanua niha Keriso hegöi ba organisasi. Ira talifusöda si no amaedola ”buala ba niha” andre, tebai sindruhu-ndruhu lafalua halöwöra na lö fotuhini moroi khö ndra foʼomora ira alawe. (Ef. 4:8) Hadia tola öʼangeragö hadia manö lala si tola öfalua ba wotuhini ndra talifusöda ira alawe ba wamalua halöwöra?

14. Hadia nitutunö Zinunö 68:12 sanandrösa khö ndra talifusöda ira alawe, ba hadia zinangea lafalua ira satua sokubaloi satua-tua?

¹⁴ Aboto ba dödö ndra satua sokubaloi satua-tua wa ”ato sibai” ndra talifusöda ira alawe si falulu fohalöwö khöra ba wamalua halöwö ba wamati, ba si toʼölönia, onekhe sibai  ira ba wamalua halöwö fanuriaigö. (Baso Zinunö 68:12.) Börö daʼö, laforege ira satua sokubaloi ba wamahaʼö yaʼira khö ndra talifusöda ira alawe. Iʼandrö sibai saohagölö Abigail, si no mututunö moroi yawa, me so ösa ndra talifusöda ira matua sanofu khönia hadia lala si tefaudu ba wamörögö fahuhuosa ba wanuriaigö. Imane, ”Daʼa zanolo yaʼo irege aboto ba dödögu wa no ibeʼe khögu Yehowa halöwö si tohude si tola ufalua ba organisasinia.” Baero daʼö, aboto göi ba dödö ndra satua sokubaloi wa onekhe sibai ndra talifusöda ira alawe si no alawa döfi ba wanolo ndra talifusöda ira alawe sawuyu-wuyu si göna abula dödö. (Tit. 2:3-5) Sindruhu-ndruhu wa no sinangea taʼomasiʼö ba taʼandrö saohagölö khö ndra talifusöda ira alawe!

15. Hawaʼara moguna taʼoʼawögö ndra talifusöda ira alawe?

¹⁵ Itaria, latötöna sibai ira talifusöda ira alawe enaʼö so zangoʼawögö yaʼira mazui sanolo yaʼira na alua khöra gabula dödö. (Yes. 1:17) Duma-dumania, na so samösa dalifusöda ira alawe si no tobali lakha mbanua mazui si no fabali auri, tola manö moguna tatolo ia ba wamalua halöwö nifalua woʼomonia me föna. Te moguna göi wanolo khö dalifusöda ira alawe si no alawa döfi enaʼö tola möi ia ba wamalukhaisi ndra doto. Mazui, te so samösa dalifusöda ira alawe si no tobali perintis samalua halöwö tanö böʼö ba organisasi Yehowa. Moguna taʼoʼawögö ia na so zamato-matou yaʼia börö me lö saʼae asese möi ia manuriaigö simane nifalua ndra perintis tanö böʼö. Hadia nasa zi tola tafalua ba wanolo ndra talifusöda ira alawe? Sakali tö, datatutunö duma-duma Yesu.

16. Simane nisura ba Mareko 14:3-9, hadia nifalua Yesu ba wangoʼawögö Maria?

¹⁶ Iʼanemaiʼö iʼowaʼögö ndra talifusönia ira alawe Yesu me so zangokhögö lala wangera-ngera si fasala sanandrösa khöra. Duma-dumania, iʼoʼawögö Maria me isalaikö ia Marata. (Luk. 10:38-42) Aefa daʼö, me so ösa niha sofönu khö Maria börö me lawaʼö wa fasala gangetula nihalönia, ifuli zui iʼoʼawögö ia Yesu. (Baso Mareko 14:3-9.) Aboto ba dödö Yesu gohitö dödö Maria ba isuno ia, imane, ”Si sökhi nifaluania khögu. . . . No ifalua ndrege zi tola ia.” Baero daʼö, ifaʼeleʼö göi Yesu, imane, ”Gofu hezo laturiaigö duria somuso dödö ba zi sagörö ulidanö, tedunö-dunö dania nifalua ndra alawe andre.” No alua wamaʼeleʼönia andrö iadaʼa, simane nifaluada me tatutunö artikel daʼa. Tatu ahöli-höli sibai dödöda ba nifalua Yesu me itutunö wa moʼamakhaita gamuata Maria si lö fakhögusa andrö ba waʼatedou halöwö fanuriaigö nifalua ba zi sagörö ulidanö! Tatu terara sibai dödö Maria me irongo wehede Yesu andrö!

17. Beʼe sambua duma-duma sangoromaʼö hawaʼara moguna taʼoʼawögö zi samösa dalifusöda ira alawe.

¹⁷ Hadia öʼoʼawögö ndra talifusöu ira alawe si sara lala ba wamati na inötö moguna? Nehegö atö duma-duma daʼa. So samösa dalifusöda ira alawe zangokhögö foʼomo si tenga Samaduhuʼö Yehowa. Laʼila ira talifusöda wa asese ahou ia weʼamöi ba gangowuloa ba agalio göi mangawuli ia na no teʼasiwai. Baero daʼö, lö asese iʼohe ndraononia weʼamöi ba gangowuloa. Börö daʼö, ibörögö lasalaikö ia ira talifusöda, ba so ba wangera-ngerara wa lö niforegenia ba wangandrö khö woʼomonia ira matua enaʼö tola möi ia ba gangowuloa ba iʼohe ndraononia. Sindruhunia sa, no iforege talifusöda andrö ba wamalua zabölö sökhi. Tenga yaʼia zotatugöi hadia manö nifaluania ba zi maʼö-maʼökhö daʼö, ba tenga göi yaʼia zangai angetula khö ndraononia. Na örongo so zosalaikö talifusöda ira alawe andrö, hadia nifaluamö? Tola ösuno wamorege si no ifalua, ba ötutunö göi ba niha böʼö wa no iforege talifusöda andrö ba wamalua zabölö sökhi. Na öfalua daʼö, tola manö laböhöli ba wosalaikö yaʼia.

18. Hadia lala tanö böʼö si tola tafalua ba wanolo ndra talifusöda ira alawe?

¹⁸ Tola taforomaʼö wa taʼameʼegö tödö ndra talifusöda ira alawe na tawaʼö khöra wa omasi ita tatolo ira. (1 Yoh. 3:18) Imane talifusöda Annette sondrorogö mamania si no göna fökhö, ”So ösa ndra talifusöda si möi ba nomoma  ba wondrorogö mamagu enaʼö tola ufalua halöwögu tanö böʼö, ba so göi ösa zolohe göma. Fefu nifaluara andre zangoromaʼö faʼomasira khögu ba urasoi wa sindruhu-ndruhu ösi mbanua niha Keriso ndraʼo.” So göi wanolo nitema dalifusöda ira alawe sotöi Jordan. Duma-dumania, so samösa dalifusöda ira matua samomaha yaʼia ba wondrorogö motonia. Imane Jordan, ”Omuso dödögu börö me uʼila wa laʼameʼegö tödö ndraʼo ira talifusöda, ba lö omasi ira na teʼala waʼaurigu ba ginötö uʼohe moto.”

19. Hadia lala tanö böʼö si tola lafalua ira satua sokubaloi ba wanolo ndra talifusöda ira alawe?

¹⁹ Moguna göi laforege ira satua sokubaloi ba wanolo ndra talifusöda ira alawe. Aboto ba dödöra wa omasi Yehowa na terorogö waʼauri ndra talifusöda ira alawe andrö. (Yak. 1:27) Börö daʼö, moguna laʼoʼö duma-duma Yesu ba laforomaʼö waʼahakhö dödö. Na tefaudu, te abölö sökhi na laforomaʼö waʼasökhi dödö hegöi famatimbaisi, moroi na lafazökhi gamakhoita sabeʼe. (Mat. 15:22-28) Na laforege ira satua sokubaloi ba wameʼe fanolo, no latolo ndra talifusöda ira alawe ba worasoi faʼomasi Yehowa hegöi organisasinia. Me iʼila pengawas kelompok dinas si farahu dalifusöda Kia wa no findra ia ba nomo tanö böʼö, iʼanemaiʼö iʼalui lala ba wameʼe fanolo. Imane Kia, ”Fanolo nibeʼera andrö zangalösi faʼafawuka wangera-ngeragu. Börö me larara dödögu ira satua sokubaloi ba latolo ndraʼodo, aboto ba dödögu wa no sebua böli ndraʼodo ba mbanua niha Keriso, ba hasambalö latolo ndraʼo na alua khögu gabula dödö.”

20-21. Hewisa wangoromaʼöda wa taʼomasiʼö ndra talifusöda ira alawe ba mbanua niha Keriso?

²⁰ Iadaʼa, ato sibai ndra talifusöda ira alawe ba mbanua niha Keriso sangodödögö ba wohalöwö, ba no sinangea tatuhini ira. Simane duma-duma Yesu si no tafahaʼö yaʼita, tola tabeʼe ginötöda fariawö khöra ba taforege enaʼö itugu aboto ba dödöda ira. Tola göi taforomaʼö wangandrö saohagölö ba wamorege si no lafalua ba wamosumange Lowalangi. Baero daʼö, taʼoʼawögö göi ira na inötö moguna.

²¹ Ba gafuriata zurania ba niha Roma, so dasiwa ndra alawe samosumange Yehowa nitötöi Waulo. (Rom. 16:1, 3, 6, 12, 13, 15) Tatu manö, terou sibai dödö ndra talifusöda ira alawe andrö me larongo wangowai hegöi fanuno moroi khö Waulo. Simane Faulo, moguna göi tatuhini ndra talifusöda ira alawe. Na tafalua daʼö, no taforomaʼö wa taʼomasiʼö ira börö me yaʼira andrö ösi nomoda ba wamati.