1. Хотӕ организацийӕн куыд ӕххуыс кӕнынц, фӕлӕ сӕ бирӕтӕ цавӕр зындзинӕдтыл ӕмбӕлынц? (Кӕс нывмӕ ӕддаг цъарыл.)

КУЫД тынг цин кӕнӕм, афтӕ бирӕ хотӕ нын кӕй ис ӕмӕ ӕмбырдты зӕрдиагӕй кӕй фыдӕбон кӕнынц, ууыл! Зӕгъӕм, архайынц фембӕлдты ӕмӕ хъусын кӕныны хъуыддаджы. Иуӕй-иутӕ дзы ӕххуыс кӕнынц Паддзахады залтӕм зилынӕн ӕмӕ сӕ чырыстон хотыл ӕмӕ ӕфсымӕртыл зӕрдӕбынӕй тыхсынц. Кӕй зӕгъын ӕй хъӕуы, зындзинӕдтыл дӕр ӕмбӕлынц. Иуӕй-иутӕ кӕсынц сӕ ацӕргӕ ныййарджытӕм. Иннӕтӕн та сӕ бинонтӕ сӕ дины тыххӕй сӕ ныхмӕ цӕуынц. Ис нын ахӕм хотӕ дӕр, ӕмӕ сӕ цоты иунӕгӕй хъомыл кӕнынц ӕмӕ сӕ уый тыххӕй хъӕуы бирӕ фыдӕбон кӕнын.

2. Хотӕн цӕмӕн хъуамӕ ӕххуыс кӕнӕм?

² Хъуамӕ хотӕн ӕххуыс кӕнӕм, уымӕн ӕмӕ ацы дунейы сылгоймӕгтӕн, цы кады аккаг сты, арӕх ахӕм кад нӕ фӕкӕнынц. Уымӕй уӕлдай нын Библи дӕр дзуры, кӕй сын хъуамӕ ӕххуыс кӕнӕм. Зӕгъӕм, апостол Павел Ромы ӕмбырдмӕ ныффыста, цӕмӕй Фивӕйы суазӕг кодтаиккой ӕмӕ-иу ӕй сӕ сӕр кӕм бахъуыдаид, уым-иу ӕм фӕкастаиккой (Ром. 16:1, 2). Павел раздӕр уыд фарисей ӕмӕ, ӕвӕццӕгӕн, иннӕ фарисейтау уый дӕр сылгоймӕгтӕм уӕлейӕ дӕлӕмӕ каст. Фӕлӕ ныр чырыстон кӕй уыд, уымӕ гӕсгӕ алы хъуыддаджы дӕр Йесойы фӕзмыдта. Йесойау Павел дӕр сылгоймӕгты нымадта ӕмӕ сӕм хӕларзӕрдӕ уыд (1 Кор. 11:1).

3. Йесо сылгоймӕгтӕм, уӕлдайдӕр та, Хуыцауы фӕндон чи ӕххӕст кодта, уыдонмӕ, цы цӕстӕй каст?

³ Йесо сылгоймӕгтӕн се ’ппӕтӕн дӕр тынг аргъ кодта (Иоан. 4:27). Йӕ рӕстӕджы цӕрӕг дзуттаг дины разамонджытӕ сӕм цы цӕстӕй кастысты, ахӕм цӕстӕй сӕм нӕ каст. Иу энциклопедийы фыст ис: «Йесо иу ахӕм ныхас дӕр никуы загъта, цӕмӕй сылгоймаджы кад ӕрныллӕг кодтаид». Фӕлӕ ноджы тынгдӕр та аргъ кодта, йӕ Фыды фӕндон ын чи ӕххӕст кодта, уыцы сылгоймӕгтӕн. Ӕмӕ, йӕ бинонтыл кӕй нымадта, уыдоны кой куы кодта, уӕд нӕлгоймӕгтимӕ скодта сылгоймӕгты кой дӕр (Матф. 12:50).

4. Ацы статьяйы цӕуыл аныхас кӕндзыстӕм?

 ⁴ Йесо алкӕддӕр цӕттӕ уыд, Хуыцауӕн чи лӕггад кодта, уыцы сылгоймӕгтӕн баххуыс кӕнынмӕ. Семӕ-иу рӕстӕг ӕрвыста, аргъ сын кодта ӕмӕ-иу сӕ сӕрыл дзырдта. Цӕй ӕмӕ аныхас кӕнӕм, нӕ бон куыд у Йесойы фӕзмын.

5. Иуӕй-иу хотӕн зын цӕмӕн вӕййы, сӕ ныфсыл-иу сын ныфс чи бафтауа, ахӕм ӕмбӕлттӕ ссарын?

⁵ Не ’ппӕты дӕр, хоты дӕр ӕмӕ ӕфсымӕрты дӕр, хъӕуы хорз ӕмбӕлттӕ. Фӕлӕ хатт хотӕн ӕмбӕлттӕ ссарын зын вӕййы. Цӕмӕн? Дӕ хъус-ма ӕрдар, хотӕй иуӕй-иутӕ цы дзурынц, уымӕ. Иу хо, Джордан *, загъта: «Цардӕмбал мын нӕй, ӕмӕ арӕх, ӕмбырды-иу кӕимӕ аныхас кӕнон, уый нӕ фӕзонын ӕмӕ мӕм афтӕ фӕкӕсы, цыма ӕмбырды ницы пайда дӕн». Пионерӕй чи лӕггад кӕны ӕмӕ фылдӕр хъусын кӕныны тыххӕй ӕндӕр ранмӕ чи ацыд, уыцы хо, Кристен, зӕгъы: «Ӕмбырды ног куы уай, уӕд, гӕнӕн ис, ӕмӕ дӕхимӕ иунӕг кӕсай». Йӕ бинонтӕ Йегъовӕйы Ӕвдисӕнтӕ кӕмӕн не сты, уый, гӕнӕн ис, семӕ ӕнгом ма уа, стӕй ӕмбырды дӕр йӕхимӕ иунӕг кӕса. Хӕдзарӕй ӕддӕмӕ йӕ бон рацӕуын кӕмӕн нӕу, уыдон дӕр, чи зоны, сӕхимӕ иунӕг кӕсой. Афтӕ вӕййы сӕ хабар, йӕ бинонтӕй исчи рынчын кӕмӕн вӕййы ӕмӕ йӕхи кӕсинаг кӕмӕн вӕййы, уыдонӕн дӕр. Хо Аннетт та загъта: «Хотӕ ӕмӕ-иу мӕ ӕфсымӕртӕ искуыдӕм куы фӕхуыдтой, уӕд-иу мӕ бон ацӕуын нӕ уыд, уымӕн ӕмӕ мӕ мадмӕ фылдӕр мӕхӕдӕг кастӕн».

6. Лукайы 10:38–42 стихты цы фыст ис, уымӕ гӕсгӕ Йесо Марфӕ ӕмӕ Марийӕйӕн куыд баххуыс кодта?

⁶ Йесо-иу рӕстӕг ӕрвыста, Хуыцауӕн чи лӕггад кодта, уыцы сылгоймӕгтимӕ ӕмӕ сын уыди хорз ӕмбал. Зӕгъӕм, уыцы сылгоймӕгтӕй дыууӕ уыдысты Марфӕ ӕмӕ Марийӕ, ӕвӕццӕгӕн, моймӕдзыд нӕ уыдысты. (Бакӕс Лукайы 10:38–42.) Йесо афтӕ ныхас кодта ӕмӕ йӕхи афтӕ дардта, ӕмӕ сын йемӕ тынг ӕнцон уыд. Иухатт Марийӕ, ахуыргӕнинӕгтӕ-иу куыд кодтой, афтӕ йӕ къӕхты раз ӕрбадт *. Марийӕ афтӕ уымӕн бакодта, ӕмӕ йӕ ӕмбӕрста, Йесо йӕм уый тыххӕй кӕй не смӕсты уыдаид. Марфӕ та Марийӕмӕ смӕсты, кӕй йын не ’ххуыс кодта, уый тыххӕй ӕмӕ Йесойӕн йӕ хъуыды зӕгъын нӕ фӕтарст. Ӕмӕ Йесо сӕ дыууӕйӕн дӕр баххуыс кодта ахсджиаг хъуыддӕгтӕ бамбарынӕн. Йесо дыууӕ хойы дӕр ӕмӕ сын се ’фсымӕр Лазӕры дӕр кӕй уарзта, уый бӕрӕг у, ӕндӕр хӕттыты дӕр-иу сӕм кӕй ӕрбацыд, уымӕй (Иоан. 12:1–3). Ӕмӕ Лазӕр тынг куы фӕрынчын, уӕд Марфӕ ӕмӕ Марийӕ зыдтой, сӕ бон кӕй уыд Йесомӕ фӕдзурын, цӕмӕй йын баххуыс кодтаид (Иоан. 11:3, 5).

7. Нӕ бон куыд у нӕ хоты ныфсыл ныфс ӕфтауын?

⁷ Иуӕй-иу хотӕн бирӕ фадӕттӕ нӕй се ’мчырыстӕттимӕ ӕмбӕлынӕн. Фӕлӕ сӕ сӕ бон фенын вӕййы ӕмбырдты. Уымӕ гӕсгӕ нӕ фӕнды, цӕмӕй-иу ӕмбырдты ахӕм хотыл бацин кӕнӕм, семӕ-иу аныхас кӕнӕм ӕмӕ сӕ кӕй уарзӕм, уый-иу сын равдисӕм. Уӕлдӕр кӕй кой кодтам, уыцы хо, Джордан, загъта: «Иннӕтӕ мӕ мӕ дзуаппыты тыххӕй куы раппӕлынц, мемӕ хъусын кӕнынмӕ куы баныхас кӕнынц кӕнӕ мӕ кӕй уарзынц, уый мын ноджыдӕр истӕмӕй куы равдисынц, уӕд мӕ ныфсыл ныфс бафты». Хъуамӕ нӕ хотӕн ӕвдисӕм, кӕй сӕ уарзӕм, уый. Хо Киа дзуры: «Ӕмбырды куы нӕ вӕййын, уӕд ӕй фӕзонын, исчи мӕм кӕй ныффысдзӕн ӕмӕ мӕ кӕй бафӕрсдзӕн, куыд дӕ, зӕгъгӕ. Ӕмӕ йӕ уымӕ гӕсгӕ зонын, хотӕ ӕмӕ мӕ ӕфсымӕртӕ кӕй уарзынц».

8. Йесойы ма нӕ бон ноджыдӕр цӕмӕй у фӕзмын?

⁸ Йесойау махӕн дӕр нӕ бон у архайын, цӕмӕй-иу нӕ хотӕн рӕстӕг рахицӕн кӕнӕм. Нӕ бон сӕ у нӕхимӕ фӕхонын, цӕмӕй-иу иумӕ исты бахӕрӕм кӕнӕ нӕхи истӕмӕй аирхӕфсӕм.  Куы сӕ фӕхонӕм, уӕд семӕ ныхас кӕндзыстӕм, цы сӕ бафидар кӕндзӕн, ахӕм истӕуылты (Ром. 1:11, 12). Йесо зыдта, цардӕмбал кӕмӕн нӕй, уыдонӕй кӕмӕндӕрты иунӕгӕй зын кӕй уыдзӕн. Фӕлӕ бамбарын кодта, ӕцӕг амонд нӕдӕр, цардӕмбал дын уа, уымӕй кӕнгӕ у, нӕдӕр, сывӕллӕттӕ дын уа, уымӕй (Лук. 11:27, 28). Адӕймаг ӕцӕг амондджын вӕййы, царды йын фыццаг бынаты Йегъовӕйӕн лӕггад кӕнын куы вӕййы, уӕд (Матф. 19:12). Цардӕмбал кӕмӕн нӕй, уыдонмӕ цы цӕстӕй кӕсын хъӕуы, уымӕй Йесойы фӕзмын уӕлдай тынгдӕр хистӕр нӕлгоймӕгты хъӕуы.

9. Хистӕр нӕлгоймӕгтӕн сӕ бон куыд у хотӕн ӕххуыс кӕнын?

⁹ Хистӕр нӕлгоймӕгты чырыстон сылгоймӕгтӕм хъӕуы ахӕм цӕстӕй кӕсын, цыма сӕ хотӕ кӕнӕ сӕ мадӕлтӕ сты (1 Тим. 5:1, 2). Хистӕр нӕлгоймӕгтӕ-иу хъуамӕ ӕмбырды размӕ кӕнӕ ӕмбырды фӕстӕ рӕстӕг рахицӕн кӕной хотимӕ аныхас кӕнынӕн. Кристен, уӕлдӕр кӕй кой кодтам, уыцы хо, загъта: «Кусгӕ дӕр кодтон, стӕй пионерӕй дӕр лӕггад кодтон, ӕмӕ ӕдзух мӕ сӕрыл куырой зылди. Уый хистӕр нӕлгоймӕгтӕй иу бафиппайдта ӕмӕ мӕ бафарста мӕ графикӕй. Кӕй мыл батыхст, уый тыххӕй дзы тынг фӕбузныг дӕн». Хистӕр нӕлгоймӕгтӕ сӕ чырыстон хотимӕ аныхас кӕнынӕн рӕстӕг кӕй ссарынц, уымӕй ӕвдисынц, кӕй сыл тыхсынц *.  Хо Аннетт та, уый кой дӕр кодтам уӕлдӕр, бамбарын кодта, хистӕр нӕлгоймӕгтимӕ арӕх кӕй ныхас кӕны, уый йӕ зӕрдӕмӕ цӕмӕй цӕуы: «Хуыздӕр сӕ базыдтон, уыдон та мӕн базыдтой хуыздӕр. Ӕмӕ исты зындзинадыл куы сӕмбӕлын, уӕд сӕ ӕххуыс ракурын нӕ фефсӕрмы кӕнын».

10. Нӕ хотӕн сӕ зӕрдӕ цӕмӕй барухс вӕййы?

¹⁰ Не ’ппӕтӕн дӕр, нӕлгоймӕгтӕн дӕр ӕмӕ сылгоймӕгтӕн дӕр, ӕхсызгон вӕййы, иннӕтӕ нын нӕ курдиӕттӕ куы фӕуынынц ӕмӕ нын нӕ фыдӕбоны тыххӕй бузныг куы фӕдзурынц. Фӕлӕ нын нӕ курдиӕттӕ ӕмӕ нӕ фыдӕбон куы ницӕмӕ фӕдарынц, уӕд нӕ ныфс асӕтты. Моймӕдзыд чи нӕу, иу ахӕм пионер-хо Абигейл зӕгъы, хатт ӕм афтӕ кӕй фӕкӕсы, ӕмӕ нымады дӕр никӕмӕ у: «Кӕй хо дӕн кӕнӕ кӕй чызг дӕн, ӕрмӕстдӕр мӕ уымӕй зонынц. Иуӕй-иу хатт мӕм афтӕ фӕкӕсы, ӕмӕ мӕ уынгӕ дӕр ничи кӕны». Фӕлӕ-ма дӕ хъус ӕрдар, хо Пэм та цы зӕгъы. Пэмӕн цардӕмбал нӕй, бирӕ азты дӕргъы миссионерӕй лӕггад кодта. Уый фӕстӕ сӕхимӕ ӕрыздӕхт, йӕ ныййарджытӕ кӕсинаг кӕй уыдысты, уый тыххӕй. Ныр Пэмыл цӕуы 70 азӕй фылдӕр ӕмӕ ныр дӕр ма пионерӕй лӕггад кӕны. Пэм зӕгъы: «Ӕппӕты тынгдӕр мын ӕххуыс кӕны, иннӕтӕ мын кӕй фӕдзурынц, мӕ фыдӕбоны тыххӕй мӕ бузныг кӕй сты, уый».

11. Йесо куыд равдыста, хъусын кӕнгӕйӕ йемӕ чи уыд, уыцы иузӕрдион сылгоймӕгтӕн кӕй аргъ кодта, уый?

¹¹ Йесо тынг аргъ кодта, цы сӕм уыд, уый йын чи не ’вгъау кодта ӕмӕ йын афтӕмӕй чи лӕггад кодта, уыцы иузӕрдион сылгоймӕгтӕн (Лук. 8:1–3). Йесо сӕ ӕрмӕст уыцы кады аккаг не скодта, цӕмӕй йын лӕггад кодтаиккой, фӕлӕ ма сын ӕргом кодта, Хуыцауы фӕндонмӕ чи хауд, уыцы ахсджиаг хъуыддӕгтӕ дӕр. Зӕгъӕм, загъта сын, кӕй йӕ хъуамӕ амардтаиккой ӕмӕ кӕй хъуамӕ райгас уыдаид (Лук. 24:5–8). Апостолтау уыцы сылгоймӕгты дӕр бацӕттӕ кодта, цы уӕззау хабӕрттӕ хъуамӕ ӕрцыдаид, уыдонмӕ – куыд хъизӕмар кӕндзӕн ӕмӕ куыд амӕлдзӕн, уый кӕй фендзысты, уымӕ (Мар. 9:30–32; 10:32–34). Йесойы куы ’рцахстой, уӕд ӕй суанг апостолтӕ дӕр ныууагътой ӕмӕ алыгъдысты. Фӕлӕ йын чи лӕггад кодта, уыцы сылгоймӕгтӕй иуӕй-иутӕ уыдысты йӕ фарсмӕ, хъизӕмӕртты хъӕдыл ӕй куы ’рцауыгътой, уӕд дӕр (Матф. 26:56; Мар. 15:40, 41).

12. Йесо сылгоймӕгтӕн сӕ бӕрны цавӕр ахсджиаг хъуыддӕгтӕ бакодта?

¹² Йесо-иу сылгоймӕгтӕн сӕ бӕрны бакодта ахсджиаг хъуыддӕгтӕ. Зӕгъӕм, кӕй райгас, уый фыццаг сылгоймӕгтӕ федтой. Ӕмӕ сын Йесо загъта, цӕмӕй уый тыххӕй апостолтӕн фехъусын кодтаиккой (Матф. 28:5, 9, 10). Ӕмӕ н. э. 33 азы Фӕндзайӕм боны ахуыргӕнинӕгтыл сыгъдӕг тых куы ’рцыд, уӕд се ’хсӕн сылгоймӕгтӕ дӕр уыдаид. Кӕд афтӕ уыд, уӕд уыцы хотӕ дӕр сыгъдӕг тыхӕй схайджын сты ӕмӕ диссаджы хуызы ӕндӕр ӕвзӕгтыл дзурын райдыдтой ӕмӕ иннӕтӕн «Хуыцауы стыр хъуыддӕгты тыххӕй» дзырдтой (Хъуыд. 1:14; 2:2–4, 11).

13. Абон нӕ чырыстон хотӕ цавӕр куыстыты архайынц ӕмӕ сӕ сӕ фыдӕбоны тыххӕй бузныг кӕй стӕм, уый нӕ бон куыд у равдисын?

¹³ Нӕ хотӕ раппӕлинаг сты, Йегъовӕйӕн лӕггад кӕныны хъуыддаджы цас аразынц, уый тыххӕй. Зӕгъӕм, архайынц алыхуызон бӕстыхӕйттӕ аразыны ӕмӕ цалцӕг кӕныны куыстыты, ӕххуыс кӕнынц ӕндӕр ӕвзӕгтыл дзурӕг къордтӕн ӕмӕ Вефилты. Феххуыс кӕнынц, ӕрдзон бӕллӕх зиан кӕмӕн ӕрхӕссы, уыдонӕн ӕмӕ нӕ публикацитӕ тӕлмац кӕнынӕн, стӕй лӕггад кӕнынц пионертӕй ӕмӕ миссионертӕй. Ӕфсымӕртимӕ хотӕ дӕр фӕахуыр кӕнынц пионерты скъолайы, Хуыцауы Паддзахад хъусынгӕнджыты скъолайы ӕмӕ Галаады скъолайы. Уымӕй уӕлдай хотӕ сӕ сӕрыхицӕуттӕн ӕххуыс кӕнынц, ӕмбырды ӕмӕ сын организацийы цы хӕстӕ ис, уыдон ӕххӕст кӕнынӕн. Уыцы ӕфсымӕртӕ сты «лӕвӕрттӕ» ӕмӕ цӕмӕй иннӕтӕн ӕххуыс кӕной, уый тыххӕй сӕхиуыл нӕ ауӕрдынц. Ӕмӕ сын сӕ хӕстӕ ӕххӕст кӕнын бирӕ зындӕр уаид, сӕ цардӕмбӕлттӕ сын куы не ’ххуыс кӕниккой, уӕд (Еф. 4:8).  Ахъуыды кӕн, дӕ бон куыд уаид нӕ хотӕн баххуыс кӕнын.

14. Псалом 68:11 стихы хоты тыххӕй цы фыст ис ӕмӕ ӕмбаргӕ хистӕр нӕлгоймӕгтӕ цы фӕаразынц?

¹⁴ Ӕмбаргӕ хистӕр нӕлгоймӕгтӕ зонынц, хотӕ кӕй сты зынгзӕрдӕ лӕггадгӕнджыты «ӕнӕхъӕн ӕфсад» ӕмӕ сӕ бирӕтӕ кӕй сты тынг арӕхстджын хъусынгӕнджытӕ. (Бакӕс Псалом 68:11.) Уымӕ гӕсгӕ хистӕр нӕлгоймӕгтӕ ахӕм хоты фӕлтӕрддзинадӕй ахуыр кӕнынц. Уӕлдӕр кӕй кой кодтам, уыцы хо Абигейлӕн ӕхсызгон вӕййы, ӕфсымӕртӕ йӕ куы бафӕрсынц, сӕ территорийы адӕмимӕ ныхас хуыздӕр куыд уаид райдайӕн, уымӕй. Абигейл зӕгъы: «Уый фӕрцы уынын, Йегъовӕйы организацийы мын ахсджиаг куыст кӕй ис». Уымӕй уӕлдай хистӕр нӕлгоймӕгтӕ зонынц, ӕрыгон хотӕ исты зындзинӕдтыл куы сӕмбӕлынц, уӕд сын иузӕрдион, фӕлтӕрдджын хотӕ стыр ӕххуыс кӕй фӕвӕййынц (Тит. 2:3–5). Кӕй зӕгъын ӕй хъӕуы, нӕ хотӕ бирӕ аразынц, цӕмӕй сӕ уарзӕм ӕмӕ сӕ бузныг уӕм.

15. Хотӕн баххуыс кӕнын кӕд фӕхъӕуы?

¹⁵ Иуӕй-иу хатт хотӕ цавӕрдӕр зындзинӕдтыл сӕмбӕлынц, ӕмӕ сӕ, гӕнӕн ис, не ’ххуыс бахъӕуа (Ис. 1:17). Зӕгъӕм, идӕдз кӕнӕ, йӕ цардӕмбалӕй хицӕн чи у, ахӕм хойы, чи зоны, хъӕуа, цӕмӕй исчи йӕ сӕрыл рахӕца кӕнӕ-иу раздӕр йӕ сӕрыхицау цы арӕзта, уыдӕттӕ саразынӕн ын баххуыс кӕна. Ацӕргӕ хойы, гӕнӕн ис, хъӕуа ӕххуыс дохтыртимӕ аныхас кӕнынӕн. Кӕнӕ ис хотӕ, ӕмӕ пионертӕй дӕр лӕггад кӕнынц ӕмӕ ма Йегъовӕйы организацийы ӕндӕр куыст дӕр кӕнынц. Уыдон, чи зоны, иннӕ пионертӕ цас хъусын кӕнынц, уыйас рӕстӕг нӕ фӕхъусын кӕнынц, ӕмӕ сын уый тыххӕй, гӕнӕн ис, исчи бауайдзӕф кӕна. Ахӕм уавӕрты фӕхъӕуы сӕ сӕрыл сдзурын. Нӕ бон ма ноджыдӕр куыд у нӕ хотӕн ӕххуыс кӕнын? Ногӕй та ӕркӕсӕм Йесойы цӕвиттонмӕ.

16. Марчы 14:3–9 стихты цы фыст ис, уымӕ гӕсгӕ Йесо Марийӕйы сӕрыл куыд рахӕцыд?

¹⁶ Хуыцауӕн чи лӕггад кодта, уыцы сылгоймӕгтӕй-иу искӕй раст куы нӕ бамбӕрстой, уӕд-иу Йесо йӕ сӕрыл сдзурыныл фӕстӕ нӕ фӕкодта. Зӕгъӕм, Йесо Марийӕйы сӕрыл сдзырдта, Марфӕ дзы куы рахъаст кодта, уӕд (Лук. 10:38–42). Дыккаг хатт та Марийӕйы сӕрыл рахӕцыд, цы сарӕзта, уый иннӕты зӕрдӕмӕ куы нӕ фӕцыд ӕмӕ йыл куы хъуыр-хъуыр кодтой, уӕд. (Бакӕс Марчы 14:3–9.) Йесо бамбӕрста, Марийӕ афтӕ цӕмӕн бакодта, уый ӕмӕ дзы раппӕлыд. Загъта: «Уый мӕнӕн хорздзинад ракодта. [...] Ацы сылгоймаг, йӕ бон цы уыд, уый сарӕзта». Стӕй ма загъта, «хорз хабар ӕгас дунейы кӕмфӕнды ма хъусын кӕной», уым-иу кӕй зӕгъдзысты, Марийӕ цы бакодта, уый тыххӕй. Ӕмӕ уый бӕрӕг у ацы статьяйӕ дӕр. Йесойы ныхӕстӕ фехъусгӕйӕ Марийӕйӕн куыннӕ фенцон уыдаид! Ӕмӕ йын стыр кад куыннӕ уыдаид, хорз хабар ӕнӕхъӕн зӕххыл кӕй айхъуысдзӕн, Йесо уый тыххӕй куы загъта, уӕд ын йӕ хорз хъуыддаджы кой дӕр кӕй скодта.

17. Хойы сӕрыл нӕ сдзурын кӕд фӕхъӕуы, уымӕн цӕвиттон ӕрхӕсс.

¹⁷ Куы бахъӕуы, уӕд дӕ чырыстон хоты сӕрыл сдзурыс? Зӕгъӕм, ӕмбырды иуӕй-иутӕ бафиппайдтой, йӕ сӕрыхицау Йегъовӕйы Ӕвдисӕн кӕмӕн нӕу, ахӕм хо фембӕлдтӕм арӕх кӕй байрӕджы кӕны ӕмӕ фембӕлды фӕстӕ уайтагъд кӕй ацӕуы. Стӕй ма бафиппайдтой, йӕ сывӕллӕтты йемӕ арӕх кӕй не ’рбакӕны. Гъемӕ йӕ фауынц, уымӕн ӕмӕ, сӕ хъуыдымӕ гӕсгӕ, хъуамӕ йӕ сӕрыхицауӕн фидарӕй зӕгъа, цӕмӕй йын сывӕллӕтты ӕмбырдмӕ кӕнын уадза. Фӕлӕ ууыл нӕ хъуыды кӕнынц, ӕмӕ хо, йӕ бон цыдӕриддӕр у, уый кӕй аразы. Хатт ын йӕ сӕрыхицау ӕмбырдмӕ цӕуын афон фӕзӕгъы, цыдӕр саразын кӕй хъӕуы. Уымӕй уӕлдай хо хъуамӕ хъуса, йӕ сӕрыхицау сывӕллӕтты ӕмбырдмӕ кӕныны тыххӕй цы уынаффӕ рахаста, уымӕ. Уыцы хойӕ цы дзурынц, уый фехъусгӕйӕ куыд бакӕндзынӕ? Хойӕ иннӕты раз куы раппӕлай ӕмӕ йын йӕ хорз хъуыддӕгты кой куы скӕнай, уӕд, гӕнӕн ис, ӕмӕ йӕ фыдкой мауал кӕной.

18. Нӕ хотӕн ма ноджыдӕр нӕ бон куыд у ӕххуыс кӕнын?

 ¹⁸ Нӕ хоты куыд тынг уарзӕм, уый нӕ бон равдисын у, хъуыддагӕй-иу сын куы баххуыс кӕнӕм, уымӕй (1 Иоан. 3:18). Аннетт зӕгъы: «Хотӕй ӕмӕ-иу нын ӕфсымӕртӕй чидӕртӕ хӕринаг ӕрбахастой кӕнӕ-иу ӕрбауадысты мӕ рынчын мадмӕ фӕкӕсынмӕ, цӕмӕй-иу уыцы рӕстӕг ӕз та мӕ иннӕ хъуыддӕгтӕ акодтаин. Уымӕ гӕсгӕ йӕ ӕмбӕрстон, кӕй мӕ уарзынц ӕмӕ мӕ сӕ хойыл кӕй нымайынц». Джордан дӕр хотӕ ӕмӕ ӕфсымӕртӕй тынг бузныг у. Иу ӕфсымӕр ын бацамыдта, машинӕмӕ зилын куыд хъӕуы, уый. Джордан загъта: «Мӕ хотӕ ӕмӕ мын ме ’фсымӕртӕ мӕ ӕдасдзинадыл кӕй тыхсынц, уый мын тынг ӕхсызгон у».

19. Хистӕр нӕлгоймӕгтӕн ма ноджыдӕр сӕ бон куыд у хотӕн баххуыс кӕнын?

¹⁹ Хистӕр нӕлгоймӕгтӕ дӕр фӕархайынц, цӕмӕй-иу хотӕн баххуыс кӕной, истӕмӕй-иу сӕм фӕкӕсын куы хъӕуа, уӕд. Уыдон зонынц, Йегъовӕйы кӕй фӕнды, цӕмӕй хотыл тыхсой (Иак. 1:27). Уымӕ гӕсгӕ архайынц, цӕмӕй Йесойау ӕмбаргӕ уой. Ӕмӕ цавӕрдӕр закъӕттӕ ӕмӕ уагӕвӕрдтӕ не ’рымысынц, фӕлӕ фӕархайынц, цӕмӕй-иу иннӕты бамбарой ӕмӕ уой хӕларзӕрдӕ (Матф. 15:22–28). Хистӕр нӕлгоймӕгтӕ хотӕн куы феххуыс кӕнынц, уӕд хотӕ фембарынц, Йегъовӕ ӕмӕ сӕ йӕ организаци кӕй уарзынц, уый. Киа ӕндӕр хӕдзармӕ кӕй лидзы, уый сӕ къорды цӕстдарӕг куы базыдта, уӕд уайтагъд батыхст, цӕмӕй йын баххуыс кодтаиккой. Киа загъта: «Фенцон мын ис, тынг нал тыхстӕн. Хистӕр нӕлгоймӕгтӕ мӕ кӕй бафидар кодтой ӕмӕ мын хъуыддагӕй кӕй баххуыс кодтой, уымӕ гӕсгӕ бамбӕрстон, ӕмбырды кӕй хъӕуын ӕмӕ зын уавӕры куы бахауон, уӕд иунӕгӕй кӕй нӕ баззайдзынӕн».

20, 21. Нӕ чырыстон хоты се ’ппӕты дӕр кӕй уарзӕм, уый нӕ бон куыд у ӕвдисын?

²⁰ Ӕмбырдты ис, зӕрдӕбынӕй чи фыдӕбон кӕны, тынг бирӕ ахӕм хотӕ, ӕмӕ-иу хъуамӕ сӕ фарсмӕ балӕууӕм. Йесойау махӕн дӕр нӕ бон у, цӕмӕй-иу рӕстӕг рахицӕн кӕнӕм ӕмӕ-иу сӕ хуыздӕр базонӕм. Нӕ бон сын у равдисын, Хуыцауы хъуыддаджы цы аразынц, уый тыххӕй сӕ бузныг кӕй стӕм. Стӕй нӕ бон у, цӕмӕй-иу куы бахъӕуа, уӕд-иу сӕ сӕрыл сдзурӕм.

²¹ Павел йӕ фыстӕджы ромӕгтӕм фӕстагмӕ сӕрмагондӕй скодта фараст чырыстон сылгоймаджы кой (Ром. 16:1, 3, 6, 12, 13, 15). Уыцы сылгоймӕгтӕ куыннӕ бафидар уыдаиккой, Павел сын салӕмттӕ кӕй ӕрвиты ӕмӕ сӕ кӕй ӕппӕлы, уый куы фехъуыстой, уӕд. Цӕй ӕмӕ мах дӕр не ’мбырды хотӕн ӕххуыс кӕнӕм. Уымӕй ӕвдисдзыстӕм, цыма нӕхи бинонтӕй сты, афтӕ сӕ кӕй уарзӕм.