1. Хуӕртӕ нӕ организацийӕн цӕхуӕн ӕнхус ӕнцӕ ӕма си беретӕ цӕхуӕн зиндзийнӕдтӕбӕл ӕмбӕлунцӕ? (Кӕсӕ хузӕмӕ ӕндаг цъарӕбӕл.)

ХЪӔБӔР ӕхцӕуӕн нин ӕй, зингзӕрдӕй ка лӕггадӕ кӕнуй, берӕ уӕхӕн хуӕртӕ нин ке ес. Зӕгъӕн, ӕмбурди гъуддӕгти ӕма игъосун кӕнуни гъуддаги архайунцӕ, Паддзахади залтӕ ӕфснайунмӕ ӕма рӕвдзӕ кӕнунмӕ фӕккӕсунцӕ, удта ӕмбурди иннетӕн дӕр ӕнхус кӕнунцӕ. Еци хуӕртӕн сӕхе зиндзийнӕдтӕ дӕр куд нӕййес. Кадӕртӕ си ӕ каргун ниййергутӕмӕ кӕсуй, кӕмӕндӕр ӕ бийнонтӕ ӕ нихмӕ рацудӕнцӕ, кедӕр ба берӕ косун гъӕуй, уомӕн ӕма ӕ сувӕллӕнтти еунӕгӕй хӕссуй.

2. Ӕмбурди хуӕрти федар кӕнун цӕмӕн гъӕуй?

² Ӕмбурди хуӕрти федар кӕнун цӕмӕн гъӕуй? Уомӕн ӕма син аци дуйней алкӕд нӕ фӕййаргъ кӕнунцӕ. Удта нӕ Библи дӕр разӕнгард кӕнуй, цӕмӕй син ӕнхус кӕнӕн. Зӕгъӕн, апостол Павел Роми ӕмбурдмӕ ниффинста, цӕмӕй хуӕрӕ Фиви зӕрдиагӕй баиуазӕг кодтайуонцӕ ӕма ’й се ’нхус «кӕми багъудайдӕ, уоми имӕ фӕккастайуонцӕ» (Ром. 16:1, 2). Павел фарисей ку адтӕй, уӕд е дӕр иннӕ фарисейти хузӕн силгоймӕгтӕмӕ ӕнӕнвӕрсон каст кодта. Фал киристон ку иссӕй, уӕдта Йесой хузӕн силгоймӕгти нимайун райдӕдта ӕма сӕмӕ адтӕй хӕларзӕрдӕ (1 Кор. 11:1).

3. Киристе силгоймӕгтӕмӕ цӕхуӕн цӕстӕй кастӕй, уӕлдайдӕр ба ин ӕ Фиди фӕндон ка ӕнхӕст кодта, уонӕмӕ?

³ Йесо силгоймӕгтӕн кадӕ кодта (Иоан. 4:27). Ӕма уомӕй хъӕбӕр хецӕн кодта, уӕди рӕстӕги дини разамонгутӕй. Еу энциклопедий финст ӕй: «Йесо силгоймӕгти кадӕ некӕд дӕлӕмӕ кодта». Уӕлдай кадӕ ба кодта, ӕ Фиди фӕндон ин ка ӕнхӕст кодта, еци силгоймӕгтӕн. Зӕгъун, ма гъӕуй уой дӕр, ӕма Йесо нӕлгоймӕгти е ’нсувӕртӕбӕл куд нимадта, уотӕ силгоймӕгти ба нимадта ӕ хуӕртӕбӕл (Матф. 12:50).

4. Аци статьяй цӕмӕ ӕркӕсдзиан?

 ⁴ Йесо алкӕддӕр цӕттӕ адтӕй, Хуцауӕн ка лӕггадӕ кодта, еци силгоймӕгтӕн банхус кӕнунмӕ. Сӕ хъиамӕтӕн син аргъ кодта, ку багъӕуидӕ, уӕдта син сӕ сӕрбӕл дӕр исдзоридӕ. Гъӕйдӕ ӕркӕсӕн, нӕ бон куд ӕй Киристей хузӕн нӕ хуӕрти федар кӕнун.

5. Хуӕртӕн хатгай ӕмбал иссерун ӕнцон цӕмӕннӕ фӕууй?

⁵ Хуарз ӕмбӕлттӕ ни алкедӕр гъӕуй – хуӕрти дӕр ӕма ӕнсувӕрти дӕр. Фал хуӕртӕн хатгай ӕнцон нӕ фӕууй, уӕхӕн ӕмбал иссерун. Цума цӕмӕн? Ӕркӕсӕн еуӕй-еуетӕ ци фӕззӕгъунцӕ, уомӕ. Хуӕрӕ Джорданӕ * зӕгъуй: «Цардӕмбал мин ке нӕййес, уой туххӕй мӕмӕ уотӕ фӕккӕсуй ӕма ӕмбурди неци пайда дӕн». Бӕсти ӕндӕр хаймӕ игъосун кӕнунмӕ ка рандӕ ’й, еу уӕхӕн пионер хуӕрӕ Кристинӕ ба зӕгъуй: «Адӕймаг нӕуӕг ӕмбурдмӕ ку рахезуй, уӕд арӕх ӕхемӕ еунӕг фӕккӕсуй». Ӕ хеуӕнттӕ рӕстдзийнади кӕмӕн нӕ ’нцӕ, етӕ дӕр сӕхемӕ еунӕг фӕккӕсунцӕ, уомӕн ӕма сӕхе бийнонти хӕццӕ дӕр уотӕ хӕстӕг нӕбал фӕуунцӕ, удта син ӕмбурд дӕр бийнонти адӕ нӕма фӕккӕнуй. Зин ма фӕууй, ести нези туххӕй хӕдзарӕй ӕндӕмӕ ка нӕ фӕццӕуй кенӕ ба сӕйгӕмӕ ка кӕсуй, уонӕн. Хуӕрӕ Аннет зӕгъуй: «Рабадунмӕ мӕ ку хониуонцӕ, уӕд некӕд фӕццӕуинӕ, уомӕн ӕма мӕ мадӕмӕ кастӕн».

6. Лукай 10:38–42 куд финст ӕй, уомӕ гӕсгӕ Йесо Марфӕ ӕма Марийӕн куд банхус кодта?

⁶ Йесо рӕстӕг хецӕн кодта, Йеговӕн ка лӕггадӕ кодта, еци силгоймӕгтӕн. Ӕргъуди кӕнӕн, Марийӕ ӕма Марфӕн куд хуарз ӕмбал адтӕй, уой. Сӕ дууӕ дӕр ӕнӕцуд адтӕнцӕ (Бакӕсӕ Лукай 10:38–42.) Йесой рази тухсгӕ некӕд кодтонцӕ. Зӕгъӕн, еухатт Марийӕ Киристей къӕхтӕмӕ исбадтӕй, ӕ ахуркӕнуйнӕгтӕ куд исбадиуонцӕ уотӕ, ӕма ин уой туххӕй ке неци зӕгъдзӕй, уой зудта *. Марфи зӕрдӕмӕ ба нӕ фӕццудӕй, Марийӕ ин ке не ’нхус кодта, ӕма уой туххӕй Йесойӕн рагъаст кӕнунмӕ нӕ бафсӕрми кодта. Фал Йесо сӕ дууемӕн дӕр фӕлмӕнӕй балӕдӕрун кодта, ӕхсидзгӕдӕр ци адтӕй, уой. Йесо арӕх бабӕрӕг кӕнидӕ Марийӕ, Марфӕ ӕма се ’нсувӕр Лазӕри. Ӕма ’й етӕ дӕр уидтонцӕ, куд берӕ сӕ уарзуй, уой (Иоан. 12:1–3). Мадта дессаг нӕй, Лазӕр хъӕбӕр ку фӕссӕйгӕ ’й, уӕд Марийӕ ӕма Марфӕ Йесой ке байагурдтонцӕ (Иоан. 11:3, 5).

7. Нӕ бон куд ӕй нӕ хуӕрти федар кӕнун?

⁷ Еуӕй-еу хуӕртӕн иннети хӕццӕ фембӕлунмӕ фадуат фӕууй ӕрмӕстдӕр ӕмбурди. Уомӕ гӕсгӕ ӕмбурдмӕ ку ӕрбацӕунцӕ, уӕд сӕбӕл гъӕуама зӕрдиагӕй бацийнӕ кӕнӕн, сӕ хӕццӕ радзубандитӕ кӕнӕн ӕма сӕ рафӕрститӕ кӕнӕн. Уӕлдӕр ке кой кодтан, еци хуӕрӕ Джорданӕ зӕгъуй: «Хъӕбӕр ӕхцӕуӕн мин фӕууй, иннетӕ мӕ мӕ дзуӕппити туххӕй ку растаунцӕ, мӕ хӕццӕ игъосун кӕнунмӕ ку бадзубанди кӕнунцӕ кенӕ мӕбӕл ӕндӕр ескуд ку батухсунцӕ». Нӕ бон ци ӕй, уой гъӕуама кӕнӕн, цӕмӕй хуӕртӕ ма дузӕрдуг кӕнонцӕ, хъазар нин ке ’нцӕ, уобӕл. Хуӕрӕ Кийӕ зӕгъуй: «Зонун ӕй, ӕмбурдмӕ ку не ’рбацӕуон, уӕд мӕмӕ еске рафинсдзӕй ӕма мӕ рафӕрсдзӕй куд дӕн, уобӕл. Уой фӕрци хуӕртӕ ӕма ӕнсувӕрти уарзт лӕдӕрун».

8. Киристей ма цӕхуӕн гъуддаги гъӕуама фӕнзӕн?

⁸ Йеговӕн ка лӕггадӕ кодта, еци силгоймӕгтӕн Йесо рӕстӕг хецӕн кодта, ӕма мах дӕр гъӕуама уотӕ архайӕн. Зӕгъӕн, нӕ бон сӕ ӕй нӕхемӕ рабадунмӕ ӕма радзубандитӕ кӕнунмӕ ӕрбахонун. Фал нӕ дзубандитӕй  гъӕуама адӕймаги федар кӕнӕн (Ром. 1:11, 12). Хестӕр нӕлгоймӕгтӕмӕ дӕр гъӕуама уа Киристей хузӕн зундахаст. Киристе ӕй зудта, еуӕй-еуетӕн ӕнӕ цардӕмбалӕй зин ке уодзӕй. Фал ӕй балӕдӕрун кодта, адӕймагӕн ӕ амонд, бийнонтӕ ин ес ӕви нӕ, уомӕй кӕнгӕ ке нӕй (Лук. 11:27, 28). Адӕймаг амондгун фӕууй, Йеговӕн лӕггадӕ кӕнун ин царди фиццаг бунати ку фӕууй, уӕд (Матф. 19:12).

9. Хестӕр нӕлгоймӕгти бон куд ӕй хуӕртӕн ӕнхус кӕнун?

⁹ Хестӕр нӕлгоймӕгтӕн уӕлдай ӕхсидзгӕдӕр ӕй киристон силгоймӕгтӕмӕ хуӕртӕ ӕма мадтӕлти цӕстӕй кӕсун (1 Тим. 5:1, 2). Гъӕуама син ӕмбурди размӕ кенӕ ӕмбурди фӕсте рӕстӕг хецӕн кӕнонцӕ. Хуӕрӕ Кристинӕ зӕгъуй: «Рӕстӕг мин некӕд уидӕ, уомӕн ӕма пионерӕй дӕр лӕггадӕ кодтон, удта мин кусти дӕр дуйне хабӕрттӕ адтӕй. Еу хестӕр нӕлгоймаг уой балӕдӕрдтӕй ӕма мӕ бафарста, уойбӕрцӕ гъуддӕгтӕбӕл куд хъӕртис, зӕгъгӕ. Ке мӕбӕл батухстӕй, е мин хъӕбӕр ӕхцӕуӕн адтӕй». Хестӕр нӕлгоймӕгтӕ хуӕрти хӕццӕ радзубанди кӕнунмӕ рӕстӕг ку хецӕн кӕнонцӕ, уӕд ӕй хуӕртӕ уиндзӕнцӕ, ке сӕбӕл тухсунцӕ, уой *. Еу хуӕрӕ Аннет радзурдта, уӕхӕн фембӕлдтӕ ин куд ӕнхус кӕнунцӕ, уой: «Етӕ дӕр мӕ хуӕздӕр базонунцӕ,  ӕма сӕ ӕз дӕр хуӕздӕр базонун. Удта мин ести уӕд ӕнхус ракорун дӕр ӕнцондӕр фӕууй».

10. Хуӕртӕн ӕхцӕуӕн ци фӕууй?

¹⁰ Хуӕртӕн дӕр ӕма ӕнсувӕртӕн дӕр ӕхцӕуӕн фӕууй, хуарз цӕмӕ арӕхсунцӕ, уой иннетӕ ку фӕууинунцӕ ӕма сӕ сӕ кусти туххӕй ку растаунцӕ. Фал нин нӕ искурдиӕдтӕ ӕма нӕ хъиамӕттӕ ку неке фӕууинуй, уӕдта нин зин фӕууй. Киндзицуд ка нӕй, еу уӕхӕн хуӕрӕ Абигейлмӕ хатгай уотӕ фӕккӕсуй ӕма неке гъӕуй: «Арӕх мин фӕззӕгъунцӕ, „ду уой хуӕрӕ нӕ дӕ?“ кенӕ „ду уой кизгӕ нӕ дӕ?“, зӕгъгӕ. Цума мӕхуӕдӕг ба неке дӕн». Ӕндӕр ӕнӕцуд хуӕрӕ Пэм ба берӕ ӕнзти дӕргъи миссионерӕй фӕллӕггадӕ кодта, уой фӕсте ба фӕстӕмӕ сӕхемӕ ӕрӕздахтӕй, уомӕн ӕма ’й ӕ ниййергутӕмӕ кӕсун гъудӕй. Нур ибӕл 70 анземӕй фулдӕр цӕуй ӕма ма уӕддӕр пионерӕй лӕггадӕ кӕнуй. Пэм зӕгъуй: «Еске мин мӕ хъиамӕтти туххӕй ку райарфӕ кӕнуй, уӕд мин уомӕй ӕхцӕуӕндӕр неци фӕууй».

11. Йесо куд ӕвдиста, ка ин лӕггадӕ кодта, еци силгоймӕгти хъиамӕтӕн ке аргъ кодта, уой?

¹¹ Йесо аргъ кодта, ка ин лӕггадӕ кодта, еци еузӕрдон силгоймӕгти хъиамӕтӕн. Етӕ ин, «ци сӕмӕ адтӕй, уой не ’вгъау кодтонцӕ» (Лук. 8:1–3). Йесойӕн лӕггадӕ кӕнун сӕ бон ке адтӕй, уомӕй уӕлдай ма син Йесо Хуцауи фӕндон дӕр раргом кодта. Зӕгъӕн, фегъосун син кодта, ке рамӕлдзӕй, уой фӕсте ба ке райгас уодзӕй, уой (Лук. 24:5–8). Апостолти хузӕн, уони дӕр федӕни фӕлварӕнтӕмӕ бацӕттӕ кодта (Мар. 9:30–32; 10:32–34). Зӕгъун гъӕуй уой дӕр, ӕма Йесой ку ниййахӕстонцӕ, уӕд ӕй ӕ апостолтӕ ниууагътонцӕ, еци силгоймӕгтӕй ба еуӕй-еуетӕ ӕ фарсмӕ адтӕнцӕ, гъезӕмӕртти гъӕдӕбӕл мӕлгӕ ку кодта, уӕд дӕр (Матф. 26:56; Мар. 15:40, 41).

12. Йесо силгоймӕгтӕн цӕхуӕн гъуддӕгтӕ баихӕс кӕнидӕ?

¹² Йесо силгоймӕгтӕн ӕхсидзгӕ гъуддӕгтӕ дӕр баихӕс кӕнидӕ. Зӕгъӕн, ку райгас ӕй, уӕд ӕй фиццаг силгоймӕгтӕ фӕууидтонцӕ, удта еци хабар апостолтӕн фегъосун кӕнунмӕ дӕр Йесо уони рарвиста (Матф. 28:5, 9, 10). Нӕ эри 33 анзи Фӕндзайӕймаг бон, сугъдӕг хъаурӕ кӕбӕл ӕрцудӕй, еци киристӕнтти астӕу, ӕвӕдзи, силгоймӕгтӕ дӕр адтӕй. Ӕма кӕд уотӕ ’й, уӕд етӕ дӕр сугъдӕг хъаури фӕрци аллихузи ӕвзӕгтӕбӕл исдзурдтонцӕ ӕма «Хуцауи устур гъуддӕгти туххӕй» игъосун кодтонцӕ (Гъуд. 1:14; 2:2–4, 11).

13. Хуӕртӕ Йеговӕн лӕггадӕ кӕнгӕй цӕхуӕн гъуддӕгти фӕййархайунцӕ ӕма син сӕ хъиамӕтӕн ке аргъ кӕнӕн, уой нӕ бон куд ӕй ӕвдесун?

¹³ Нӕ хуӕртӕ растауйнаг ӕнцӕ, Йеговӕн лӕггадӕ кӕнгӕй цидӕриддӕр кӕнунцӕ, уой туххӕй. Етӕ архайунцӕ арӕзтадон гъуддӕгти, ӕрдзон бӕллӕхти фӕсте ӕнхус кӕнунцӕ, ӕндӕр ӕвзагбӕл ка игъосун кӕнуй, уони хӕццӕ ӕмгуст кӕнунцӕ, нӕ литературӕ тӕлмац кӕнунцӕ, ӕнхус кӕнунцӕ Вефилти, удта лӕггадӕ кӕнунцӕ пионертӕй ӕма миссионертӕй. Ӕнсувӕрти хузӕн етӕ дӕр фӕййахур кӕнунцӕ пионерти скъолай, Паддзахадӕ игъосунгӕнгути скъолай ӕма Галаади скъолай. Уомӕй уӕлдай ма уоститӕ сӕ лӕгтӕн дӕр ӕнхус кӕнунцӕ, цӕмӕй сӕ бон уа ӕмбурди ӕма Йегови организаций сӕ ихӕстӕ ӕнхӕст кӕнун. Ӕнӕ уони ӕнхусӕй еци ӕнсувӕртӕн хъӕбӕр зин адтайдӕ Хуцауи адӕнӕн «лӕвӕрттӕ» исун (Еф. 4:8). Расагъӕс кӕнӕ: дӕ бон куд ӕй, еци уодуӕлдай силгоймӕгти федар кӕнун?

14. Псаломи 68:11 силгоймӕгти туххӕй ци финст ес, уомӕ гӕсгӕ хестӕр нӕлгоймӕгтӕ куд фӕййархайунцӕ?

¹⁴ Хестӕр нӕлгоймӕгтӕ ’й лӕдӕрунцӕ, зингзӕрдӕй ка игъосун кӕнуй, еци хуӕртӕ «ӕнӕгъӕнӕ ӕфсад» ке ’нцӕ ӕма арӕхдӕр  тӕккӕ арӕхстгундӕр игъосунгӕнгутӕ етӕ ке фӕуунцӕ. (Бакӕсӕ Псалом 68:11.) Уомӕ гӕсгӕ хестӕр нӕлгоймӕгтӕн дӕр уӕхӕн хуӕртӕ фӕнзуйнаг фӕуунцӕ. Уӕлдӕр ке кой кодтан, еци хуӕрӕ Абигейлӕн хъӕбӕр ӕхцӕуӕн фӕууй, ӕнсувӕртӕ ’й ку бафӕрсунцӕ, ӕнтӕстгунӕй игъосун кӕнунмӕ ин ци ӕнхус кӕнуй ӕма цӕхуӕн мадзӕлттӕй фӕппайда кӕнуй, уобӕл. Абигейл зӕгъуй: «Уой фӕрци ’й лӕдӕрун, Йеговӕ мин ӕ организаций ӕхсидзгӕ гъуддаг ке баихӕс кодта». Уомӕй уӕлдай ма ’й хестӕр нӕлгоймӕгтӕ зонунцӕ, еузӕрдон ӕма фӕлтӕрдгун хуӕрти бон ке ӕй, зиндзийнӕдтӕбӕл ка ӕмбӕлуй, уӕхӕн ӕригон хуӕртӕн ӕнхус кӕнун (Тит. 2:3–5). Мадта нӕ хуӕртӕ уой аккаг ӕнцӕ, цӕмӕй сӕ уарзӕн ӕма син аргъ кӕнӕн.

15. Хуӕрти цӕхуӕн уавӕрти фӕгъгъӕуй не ’нхус?

¹⁵ Зин уавӕрти ка бахауй, еци хуӕртӕн еуӕй-еухатт фӕгъгъӕуй банхус кӕнун кенӕ сӕ сӕрбӕл исдзорун (Исай 1:17). Зӕгъӕн, идӕдзӕ кенӕ ка рахецӕн ӕй, еци хуӕрти хатгай ӕнхус фӕгъгъӕуй, раздӕр сӕ лӕгтӕ ке кодтонцӕ, еци гъуддӕгти. Кенӕ ба, ка ’й зонуй, каргун хуӕри дӕр ӕнхус гъӕуй, цӕмӕй ӕ бӕсти дохтири хӕццӕ еске радзора. Хуцауи организаций ӕндӕр гъуддӕгти дӕр ма ка лӕггадӕ кӕнуй, уӕхӕн пионер хуӕри сӕрбӕл ба фӕгъгъӕуй исдзорун, иннӕ пионерти бӕрцӕ ке нӕ лӕггадӕ кӕнуй, уой туххӕй ин иннетӕ уайдзӕф ку кӕнонцӕ, уӕд. Хуӕртӕн ма никкидӕр нӕ бон куд ӕй ӕнхус кӕнун? Нӕуӕгӕй ӕркӕсӕн, Киристе куд архайдта, уомӕ.

16. Марки 14:3–9 куд финст ӕй, уомӕ гӕсгӕ Йесо Марийи сӕрбӕл куд исдзурдта?

¹⁶ Хуӕрти раст ку нӕ балӕдӕриуонцӕ, уӕд Йесо сӕ сӕрбӕл исдзоридӕ. Зӕгъӕн, Марийи сӕрбӕл исдзурдта, Марфӕ си гъаст кӕнун ку райдӕдта, уӕд (Лук. 10:38–42). Иннӕ хатт ба ин ӕ сӕрбӕл исдзурдта, ӕ апостолтӕ ’й уайдзӕфти буни ку фӕккодтонцӕ, уӕд. (Бакӕсӕ Марки 14:3–9.) Йесо ӕй лӕдӕрдтӕй, Марийи хуарз ке фӕндадтӕй, ӕма ’й уой туххӕй растудта ӕма загъта: «Е мин хуарздзийнадӕ ракодта. [...] Ӕ бон ци адтӕй, уой искодта». Уой фӕсте ба ма загъта: «Хуарз хабар ӕгас дуйнебӕл кӕмифӕнди ма игъосун кӕнонцӕ, уоми ӕргъуди кӕндзӕнцӕ аци силгоймаги ӕма зӕгъдзӕнцӕ, ци бакодта, уой туххӕй». Ӕма аци статья дӕр уомӕн ӕвдесӕн ӕй. Йесо, хуарз хабар ӕгас зӕнхӕбӕл дӕр игъустгонд ке ’рцӕудзӕй, уой туххӕй ку дзурдта, уӕд Марийи хуарз гъуддаги кой дӕр искодта. Расагъӕс кӕнӕ, Йесой дзурдтӕ ’й куд бафедар кодтайуонцӕ!

17. Хуӕрти сӕрбӕл дзорун кӕд фӕгъгъӕуй?

¹⁷ Хуӕрти сӕрбӕл исдзорун ку багъӕуй, уӕд куд ба кӕнис? Дӕ цӕститӕбӕл рауайун кӕнӕ уӕхӕн уавӕр: ӕ лӕг Йегови Ӕвдесӕн кӕмӕн нӕй, уӕхӕн хуӕрӕ арӕх ферӕгӕмӕ кӕнуй ӕма ӕмбурди фӕсте дӕр уайтагъд фендӕ уй. Уомӕй уӕлдай ма ӕ сувӕллӕнтти дӕр ефстагмӕ ӕрбахонуй. Хуӕртӕ ӕма ӕнсувӕртӕмӕ уотӕ кӕсуй, ӕма ’й ӕ лӕгмӕ минкъий федардӕр фӕллӕуун гъӕуй, цӕмӕй ӕ сувӕллӕнтти ӕмбурдмӕ уадза. Фал еци хуӕрӕ ӕной дӕр, ӕ бон ци ӕй, уой кӕнуй. Ӕма алци ӕхе куд фӕндуй, уотӕ кӕнун дӕр ӕ бон нӕй. Удта сувӕллӕнтти туххӕй унаффӕ дӕр фиццагидӕр фидӕ хӕссуй. Цума дӕ бон куд адтайдӕ уӕхӕн хуӕри сӕрбӕл исдзорун? Иннети рази ’й ку ӕстауай, удта дӕ рази ку нӕ уа, уотемӕй дӕр ин ӕ хуарзи кой ку кӕнай, уӕд еци ӕнӕгъӕугӕ дзубандитӕн ракӕрон кӕндзӕнӕ.

18. Нӕ бон ма куд ӕй нӕ хуӕртӕн ӕнхус кӕнун?

¹⁸ Хуӕртӕн ке аргъ кӕнӕн, е ма бӕрӕг уодзӕй, гъуддагӕй син ку ӕнхус кӕнӕн, уӕд (1 Иоан. 3:18). Аннет загъта: «Еуӕй-еу хуӕртӕ ӕма ӕнсувӕртӕ мӕ мади хӕццӕ рабадунмӕ ӕрбацӕунцӕ, ӕз ба бал уӕдмӕ ӕндӕр гъуддӕгтӕ ракӕнун, кенӕ ба нин цӕттӕ хуӕруйнаг  ӕрбахӕссунцӕ. Уӕхӕн гъуддӕгти фӕрци ӕй уинун, ке мӕ уарзунцӕ ӕма мин ке аргъ кӕнунцӕ, уой». Джорданӕ дӕр хъӕбӕр боз ӕй, куд ин ӕнхус кӕнунцӕ, уомӕй. Еу ӕнсувӕр ин хуарз цидӕртӕ байамудта, машинӕ куд дарун гъӕуй, уой фӕдбӕл. Джорданӕ зӕгъуй: «Хъӕбӕр ӕхцӕуӕн мин ӕй, хуӕртӕ ӕма ӕнсувӕртӕ мӕбӕл уотӕ ке тухсунцӕ, ӕма сӕ уотӕ ке фӕндуй, цӕмӕй мӕбӕл машинӕбӕл цӕугӕй маци фидбилиз ӕрцӕуа».

19. Хестӕр нӕлгоймӕгти бон куд ӕй хуӕртӕн банхус кӕнун?

¹⁹ Хестӕр нӕлгоймӕгтӕ дӕр хуӕртӕн, сӕ бон куд ӕй, уотӕ ӕнхус кӕнунцӕ. Етӕ ’й зонунцӕ, Йегови уотӕ ке фӕндуй, цӕмӕй хуӕртӕ иронхуати ма изайонцӕ (Иак. 1:27). Еци ӕнсувӕртӕ Йесой фӕнзунцӕ ӕма уайтагъд амундтӕ дӕттунмӕ нӕ фӕййагайунцӕ, фал хуӕртӕмӕ лӕмбунӕг байгъосунцӕ ӕма ци ӕнгъезуй бакӕнун, уобӕл расагъӕс кӕнунцӕ (Матф. 15:22–28). Хестӕр нӕлгоймӕгтӕ хуӕртӕн банхус кӕнунмӕ фадуӕттӕ ку фӕййагорунцӕ, уӕд ӕй хуӕртӕ фӕууинунцӕ, Йеговӕн ӕма ӕ организацийӕн хъазар ке ’нцӕ. Зӕгъӕн, Кийӕ кӕми лӕггадӕ кодта, еци къуари цӕстӕдарӕг ӕй ку базудта, ӕ цӕрӕнбунат ке ӕййевуй, уой, уӕд еци фӕдбӕл зеу рамбурд кодта. Кийӕ зӕгъуй: «Еци ӕнхуси фӕрци берӕ сагъӕстӕй фенӕмӕтӕ дӕн. Хестӕр нӕлгоймӕгти фӕлмӕн дзурд ӕма ӕнхуси фӕрци ӕй балӕдӕрдтӕн, ӕмбурди мин аргъ ке кӕнунцӕ ӕма зин сахат еунӕгӕй ке нӕ байзайдзӕн».

20, 21. Нӕ хуӕртӕн аргъ ке кӕнӕн, е цӕмӕй бӕрӕг уодзӕй?

²⁰ Иннетӕн зӕрдӕй ка лӕггадӕ кӕнуй, уӕхӕн хуӕртӕ не ’мбурдти хъӕбӕр берӕ ес. Етӕ уой аккаг ӕнцӕ, цӕмӕй сӕ федар кӕнӕн. Уой туххӕй ба нӕ гъӕуй Киристей хузӕн архайун: гъӕуама син рӕстӕг хецӕн кӕнӕн, цӕмӕй сӕ хуӕздӕр базонӕн, сӕ лӕггади ци кӕнунцӕ, уой туххӕй син арфӕ кӕнӕн, багъӕуаги ба сӕ сӕрбӕл дӕр исдзорӕн.

²¹ Павел ромӕгтӕмӕ финстӕг ку финста, уӕд си фӕстагмӕ фараст силгоймагей кой искодта (Ром. 16:1, 3, 6, 12, 13, 15). Еци хуӕртӕн хъӕбӕр ӕхцӕуӕн адтайдӕ фегъосун, салӕмттӕ син ке рарвиста ӕма сӕ ке растудта. Гъӕйдӕ мадта мах дӕр не ’мбурди хуӕртӕн сӕ нифс федар кӕнӕн. Уотемӕй ӕй лӕдӕрдзӕнцӕ, берӕ сӕ ке уарзӕн ӕма сӕ нӕ бийнонтӕбӕл ке нимайӕн.