1. Antoy nitutulong na saray agagin bibii diad organisasyon, balet anto ray subok ya aarapen da? (Nengnengen so litrato ed apis.)

MISALSALAMAT tayo ed saray makulikuli ya sister ed kongregasyon! Lanang iran mankokomento ed aral, tan maseseg iran manpulong tan mangiyaral na Biblia. Say arum ed sikara et mangiiba ya manmintina ed Kingdom Hall, tan personal dan tutulongan iray agagi. Siempre, wala met iray subok ya aarapen da. Wala ray mangaasikaso na maedad lan atateng da, say arum et aanosan day ikokontra na kapamilya da, tan say arum et bukor day mamapabaleg ed ananak da tan sikara so manaanap na pambilay.

2. Akin et importante ya pabiskegen tayo ray agagin bibii?

² Akin et importante ya pabiskegen tayo ray agagin bibii? On ta dakel ya totoo natan so agmanrerespeto ed saray bibii. Sakey ni, bibilinen itayo na Biblia ya tulongan tayo ra. Singa bilang, sinulatan nen apostol Pablo so kongregasyon ed Roma ya maliket dan awaten si Febe tan ‘iter dad sikatoy antokaman a tulong a nakaukolan to.’ (Roma 16:1, 2) Lapud datin Fariseo si Pablo, amta to ya diad kultura da et melmelag so pakanengneng ed saray bibii. Balet nen nagmaliw a Kristiano, inalig toy maaro tan marespeton panagtrato nen Jesus ed saray bibii.​—1 Cor. 11:1.

3. Panon so impantrato nen Jesus ed saray bibii, lalo la ed saramay manguunor ed Ama to?

³ Marespeto si Jesus ed amin ya bibii. (Juan 4:27) Agto inalig iray Judion lider na relihyon ya aliwliway panagtrato da ed saray bibii. Oniay imbaga na sakey a reperensya: “Agbalot pinabaingan odino minelmelag nen Jesus iray bibii.” Diad tua,  espisyal so impantrato nen Jesus ed saray bibii ya manguunor ed Ama to. Inturing to ra ya agagi to, tan imbaga to ya kaiba ira ed espiritual ya pamilya to.​—Mat. 12:50.

4. Antoy pantongtongan tayo ed sayan artikulo?

⁴ Tutulongan ya lanang nen Jesus iray bibii ya agagi tod espiritual. Inapresya tan indepensa to ra. Pantongtongan tayo ed sayan artikulo no panon tayon nipanengneng so konsiderasyon ed saray agagin bibii ya singa ginawa nen Jesus.

5. Akin ya saray arum ya agagi tayon bibii et naiirapan ya mikaaro?

⁵ Amin tayo et kaukolan tayoy kaaro. Balet wala ray agagin bibii ya naiirapan ya mikaaro. Akin? Imanoen so imbaga na nanduruman sister. Oniay imbaga nen Sister Jordan *: “Lapud single ak, pakaliknak et anggapoy nagagawaan ko ed kongregasyon tan singa anggapoy kaarok.” Si Kristen ya payunir tan inmalis ed lugar ya baleg so pankaukolan et inkuan to: “No balo ka ed kongregasyon, nababaingan ka.” Saramay bukor day Tasi ed pamilya et limitado so pakapiulop dad saray kapamilya da, tan ompan agda met naynay ya nakaiba iray agagi. Wala ray agagin bibii ya ag-ira makaalis ed abung da lapud mansasakit ira odino sikara so mangaasikaso ed kapamilya ran mansasakit. Oniay imbaga nen Annette: “Matalag kon nakaulop iray agagi ta aasikasoen koy nanay ko.”

6. Base ed Lucas 10:38-42, panon ya imbangat nen Jesus si Marta tan Maria?

⁶ Impanaon nen Jesus ya nakaiba iray ituturing ton agagi to ya bibii, tan impanengneng to ya sikatoy tuan kaaro. Imanoen pa so impantrato to ed saray kakaaro ton mamarikit ya si Maria tan Marta. (Basaen so Lucas 10:38-42.) Lapud maabig so pitotongtong tan panagtrato to ed sikara, anlemew so liknaan da ed sikato. Singa bilang, agnababaingan si Maria ya onyurong ed salian nen Jesus bilang sakey ya disipulo to. * Tan nen asyodotan si Marta ta ag-iibaan nen Maria ya manparaan na naakan, agnatatakot ya ibagad si Jesus so pansyodot to. Diad saman ya imbisita nen Jesus, akaaral ed sikato iyan sanagi na importante iran leksion. Tan lapud mabetbet ya oonlad abung da, alikna ra ya walay malasakit to ed sikaran sanagi, pati diad si Lazaro ya agi ra. (Juan 12:1-3) Kanian nen nansakit si Lazaro, sikaton tampol so naisip nen Maria tan Marta ya ipatawag.​—Juan 11:3, 5.

7. Panon tayon napaseseg iray agagin bibii?

⁷ Wala ray sister ya diad aral da labat nakakaiba iray agagi. Kanian seguroen tayo ya i-welcome ira diad aral, miistoryaan tayo ed sikara, tan ipanengneng tayo ya walay malasakit tayo ed sikara. Oniay imbaga nen Sister Jordan ya abitla nen niman: “Napapaseseg ak no aapresyaen na agagi so komentok, no isisipan dan siak so kaulop dan manpulong, tan no ipapalikna ran iyaansakit da ak.” Ipalikna tayo ed saray agagin bibii ya importante ira ed sikatayo. “No agak makapiaral,” kuan nen Kia, “walan walay agi ya man-text ed siak no ayos ak labat. Kanian naliliknak ya inar-aro ak na agagi.”

8. Panon tayon naalig si Jesus?

⁸ Aligen tayoy Jesus​—ipanaon tayo met ya nakaiba iray agagin bibii. Itagar tayo ran mangan odino manrelaks. Tan no kaiba  tayo ra, seguroen tayo ya makapaseseg iray panistoryaan tayo. (Roma 1:11, 12) Importantin tandaan na saray elder so impantrato nen Jesus ed saray bibii. Amta nen Jesus ya aliwan mainomay parad arum so bilay na anggapoy asawa, balet imbangat to ya aliwan say piasawa odino pakawalaan na ananak so mangiter na tuan liket. (Luc. 11:27, 28) Imbaga to ya say sakey et magmaliw ya tuan maliket no iyuna tod bilay to so panaglingkor ed si Jehova.​—Mat. 19:12.

9. Anto ray gawaen na saray elder pian natulongan da iray agagin bibii?

⁹ Importante ya saray elder et ituring dan agagi tan ina ra ed espiritual iray sister ed kongregasyon. (1 Tim. 5:1, 2) Maabig no miistoryaan iran magano ed sikara antis o kayari na aral. “Apansin na sakey ya elder ya busy ak ya maong tan tinepet to no ayos labat so trabahok tan pampapayunir ko,” kuan nen Kristen. “Alikliknak so malasakit to.” No kukumustaen na saray elder iray agagin bibii, ipapanengneng da ya iyaansakit da ra. * Imbaga nen Annette, ya abitla nen niman, so sakey ya pankaabigan na lanang ya pitongtong ed saray elder. Kuan to: “Mas nakakabat ko ra, tan nakakabat da ak  met. Kanian no walay problemak, agak nababaingan ya manpatulong ed sikara.”

10. Antoy nagawaan tayo pian ombiskeg iray agagin bibii?

¹⁰ Amin tayo, laki man o bii, et ombibiskeg tayo no aapresyaen tan pisasalamatan na arum iray nagagawaan tayo. Balet no anggapoy mangiimano ed pansasagpot tayo, nadidismaya tayo. Oniay nalilikna na marikit ya payunir ya si Abigail: “Say pakanengneng ed siak na totoo et basta ‘agi ak nen kien’ odino ‘anak ak nen kien.’ Anggapoy mamapansin ed siak.” Imanoen balet so imbaga nen Sister Pam. Marikit ni Pam et misionero la. Insan pinmawil ed bansa ra ta sikatoy angasikaso ed atateng to. Masulok lan 70 nen Pam pero payunir ni anggad natan. Imbaga to: “Say talagan mamapabiskeg ed siak et no ibaga na arum ya aapresyaen da iray nagagawaan ko.”

11. Panon ya impanengneng nen Jesus ya aapresyaen toy pansasagpot na saray bibiin kaiba to ed ministeryo to?

¹¹ Pisalsalamatan nen Jesus so tulong na saray matoor ya bibiin ‘angusar ed saray kayamanan da’ pian naibaan da ed ministeryo to. (Luc. 8:1-3) Imbangat to ed sikara iray aralem ya katuaan. Singa bilang, imbaga to ed sikara ya sikatoy pateyen tan onoli ed bilay. (Luc. 24:5-8) Pinabiskeg to irayan bibii pian makapanmatoor ira anggano nasubok ira, ya singa impamabiskeg tod saray apostol to. (Mar. 9:30-32; 10:32-34) Diad tua, anggano batik iray apostol nen inaresto si Jesus, sikatoy agtinaynan na saray disipulo ton bibii sanen manpapanabos diad panamairapan a poste.​—Mat. 26:56; Mar. 15:40, 41.

12. Anto ran pribilehyo so inter nen Jesus ed saray bibii?

¹² Inikdan nen Jesus na importantin pribilehyo iray bibii. Singa bilang, saray matoor ya bibiin akaiba to so unonan akaamta ya sikatoy inmoli la. Imbaki to rad saray apostol pian ipaamta itan ya balita. (Mat. 28:5, 9, 10) Tan nen Pentecostes 33 C.E., mapatnag ya wala ray kaiban bibii nen inkalbo so masanton espiritu. No ontan sirin, akapansalita met irayan alanaan ya bibii na sananey a lenguahe tan inyabawag da so “makapadinayew iran gawa na Dios.”​—Gawa 1:14; 2:2-4, 11.

13. Anto ran kimey so gagawaen na saray agagin bibii, tan panon tayon nipanengneng ya aapresyaen tayoy pansasagpot da?

¹³ Manepeg labat ya komendaan tayo ray agagin bibii ed amin ya gagawaen da diad panlilingkor da ed si Jehova. Say arum ed sikara et ontutulong ed panagpaalagey tan panagmintina na saray bilding tayo, onsusuporta ra ed saray foreign-language group, tan manboboluntaryo ra diad Bethel. Kaiba met so arum ed sikara diad pangibunog na saray tulong no walay kalamidad, diad pangipapatalos na saray publikasyon tayo, tan dakel ed sikara so payunir tan misionero. Manaaral met iray agagin bibii ed Pioneer Service School, School for Kingdom Evangelizers, tan Gilead School. Ontan met, baleg ya suporta iray asawan bibii ed kaasawaan da ya walaan na ambelat iran responsabilidad diad kongregasyon tan diad organisasyon. Nagagawaan na sarayan brother so betang da bilang “regalo a lalaki” diad tulong na kaasawaan da. (Efe. 4:8) Wala tay naisip mo ya nagawaan mo pian nasuportaan mo irayan agagin bibii?

14. Base ed katuaan ya walad Salmo 68:11, antoy gawaen na saray makabat ya elder?

¹⁴ Bibirbiren na saray makabat ya elder ya saray agagin bibii et “baleg ya armada” tan marunong iran manpulong. (Basaen so  Salmo 68:11.) Kanian maniisip iray paraan pian makaaral ira ed eksperiensya na agagin bibii. Naliliketan si Abigail, ya abitla nen niman, no sikatoy tepetan na saray brother no anto ray asali ton epektibon paraan na pitotongtong diad teritorya da. Imbaga to: “Lapud satan et naliliknak ya walay panguusaran nen Jehova ed siak diad organisasyon to.” Ontan met, bibirbiren na saray elder ya maabig no saray matoor tan eksperiensyadon sister so manbilin ed saray kabataan ya sister. (Tito 2:3-5) Talagan manepeg labat ya aroen tan apresyaen tayo iray agagin bibii!

15. Anto ray situasyon ya kaukolan na saray sister so tulong odino mangidepensa ed sikara?

¹⁵ No maminsan, kaukolan na saray sister ya walay mansalita parad sikara. (Isa. 1:17) Singa bilang, ompan kaukolan na sister ya abiyuda odino sian ed asawa to so tulong pian nagawaan to ray transaksion ya datin gagawaen na asawa to. Ompan kaukolan na maedad lan sister so kaiba no mitongtong ed doktor to. Odino ompan walay payunir ya sister ya manboboluntaryo ed arum ya proyekto na organisasyon ya kaukolan toy mangidepensa ed sikato no kukuestionen na arum ya matalag lan manpulong. Panon tayon natulongan irayan agagin bibii? Nengnengen tayo lamet so alimbawa nen Jesus.

16. Panon ya indepensa nen Jesus si Maria ya singa nabasa ed Marcos 14:3-9?

¹⁶ Idedepensa nen Jesus iray ituturing ton agagi to ya bibii no walay manbalaw o mankuestion ed sikara. Singa bilang, indepensa toy Maria nen mansyodot ed sikato si Marta. (Luc. 10:38-42) Tan indepensa to lamet si Maria nen binalaw na arum so ginawa ton kamaongan ed si Jesus. (Basaen so Marcos 14:3-9.) Amta nen Jesus ya maong so motibo nen Maria kanian kinomendaan to. Imbaga to: “Sikatoy nanggaway maabig ed siak. . . . Ginawa toy anggaay nayarian to.” Impropesiya to ni ingen ya satan ya ginawa nen Maria et naamtaan na totoo “inerman ed mundo so kipulongan na maong a balita.” Singa natan, pantotongtongan tayoy Maria ed sayan artikulo. Seguradon malikeliket si Maria ed impangidepensa nen Jesus ed sikato! Aliwan satan labat. Inkonekta ni ingen nen Jesus itan ya ginawa to ed kimey a panagpulong diad interon mundo.

17. Mangiter na situasyon ya kaukolan tayon idepensa so sakey ya sister.

¹⁷ Kasin idedepensam iray agagin bibii no kaukolan? Singa bilang, isipen pa so situasyon na sakey a sister ya aliwan Tasi so asawa to. Naiimano na arum ya agagi ya lanang ya atrasado ed aral tan onsesempet ya tampol kayari na aral. Babalawen da ta matalag ton ipila iray ananak to ed aral. Kukuestionen da no akin ya agto ipasoot ed si asawa to ya ipila ed aral iray ananak da. Balet diad tua manaya et gagawaen la na sayan sister so anggaay nayarian to. Ompan dakel so kimey tod abung; tan siempre, agto nadesisyonan ya bukor iray ananak to. Antoy gawaen mo no naamtaan mo ya wala ray agagin manhuhusga ed sikato? Maabig no komendaan mo iman ya sister tan istoryam ed arum iray maong ya nagagawaan to. No ontan so gawaen mo, nidedepensam iman ya sister tan tundaan da lan husgaan.

18. Anto ni ray nagawaan tayo pian natulongan tayo ray agagin bibii?

¹⁸ Nipalikna tayo ya inar-aro tayo ray agagin bibii no manisip tayo na paraan pian natulongan tayo ra. (1 Juan 3:18) Oniay imbaga nen Annette, amay sister ya mangaasikaso ed si  nanay to: “Wala ray agagi ya sandian da ak a magano odino iyakaran da kami na kanen mi. Naliliknak ya inar-aro ak na kongregasyon.” Ontan met so naeksperiensya nen Sister Jordan, ya abitla nen niman. Walay brother ya angibangat ed sikato no panon ton mintinaen so kotse to. Imbaga to: “Balibali ed liknaan ya sankanonot na saray agagi so pankaabigan ko.”

19. Anto ni ray arum ya paraan ya natulongan na saray elder iray agagin bibii?

¹⁹ Sankanonot met na saray elder iray pankaukolan na agagin bibii. Amta ra ya labay nen Jehova ya maong so pantrato da ed saray sister. (Sant. 1:27) Kanian aaligen day Jesus. Makatunongan ira​—ag-ira masyadon istrikto tan anggad posible et ipapanengneng day konsiderasyon ed saray agagin bibii. (Mat. 15:22-28) No pansagpotan na saray elder ya tulongan iray agagin bibii, ipapalikna da so panangaro nen Jehova tan say organisasyon to. Nen naamtaan na manangasikaso na grupo nen Kia ya sikatoy onalis na ayaman, nanggawan tampol na paraan iyan brother pian naibaan da. “Agak masyadon na-stress,” so kuan nen Kia. “Lapud panamaseseg tan tulong na saray elder, alikliknak ya importante ak ed kongregasyon tan amtak ya walay naasinggeran ko no walay problemak.”

20-21. Panon tayon nipalikna ed saray agagin bibii ya papablien tayo ra?

²⁰ Diad kongregasyon tayo, nanenengneng tayo ray makulikuli ya agagin bibii. Manepeg labat ya pabiskegen tayo ra. Naaralan tayod alimbawa nen Jesus ya importantin nakaiba tan kabaten tayo ra. Ibalikas tayoy apresasyon ed saray nagagawaan da diad panlilingkor da ed Dios. Tan idepensa tayo ra no nakaukolan.

²¹ Diad sampot na sulat nen apostol Pablo ed saray taga Roma, binitla toy kangaranan na siameran agagin bibii. (Roma 16:1, 3, 6, 12, 13, 15) Seguradon apaseseg ya maong irayan bibii nen arengel day panangumusta tan komendasyon nen Pablo. Ontan met sirin so gawaen tayo. Pabiskegen tayo so amin ya agagin bibii diad kongregasyon tayo, tan ipalikna tayo ed sikara ya inar-aro tayo ran membro na pamilya tayo.