1. Woo halpen de Sestren en Gott sien Volkj met, un waut vonne Schwierichkjeiten haben väle? (See daut Bilt oppe väaschte Sied.)

FREI wie ons nich, daut et en onse Vesaumlungen soo väl flietje Sestren jeft? Dee moaken biejlikj bie de Toopkomes met un doonen prädjen. Eenje halpen met, daut daut Vesaumlungshus en Ordninj blift, un dee sent uk om äare Gloowesbreeda bekjemmat. Oba dee haben uk Schwierichkjeiten. Eenje motten sikj om äare Elren kjemren, waut aul ella jeworden sent. Aundre haben Jäajenstaunt en de Famielje. Un wada aundre trakjen äare Kjinja auleen opp un motten schwoa schaufen toom fa dee sorjen.

2. Wuarom es daut needich, daut wie de Sestren unjastetten?

² Wuarom sell wie de Sestren unjastetten? Wäajen de Frues en de Welt nich emma soo behaundelt woaren, aus dee daut wudden vedeent haben. Un de Schreft rot ons uk too, daut wie dee unjastetten sellen. De Apostel Paulus säd biejlikj to de Vesaumlunk en Room, daut see Feebe oppnämen sullen un dee “biestonen, wua ar daut [fäld]” (Reem. 16:1-2). Aus Paulus noch een Farisäa wia, wia hee secha met Menschen toop, waut Frues soo behaundelden, aus wan dee weinja wieet wieren. Oba nu wia hee een Christ un deed Jesus no un wia leeftolich un fein to de Frues (1. Kor. 11:1).

3. Woo wia Jesus to de Frues, un woo docht hee äwa soone Frues, waut no sienen Voda horchten?

³ Jesus jinkj met aule Frues fein om (Joh. 4:27). Hee docht gaunz aundasch äwa dee aus de judische Gloowesleidasch. Een Buak, waut de Schreft utlajcht, sajcht: “Jesus säd kjeenmol waut, waut auntovestonen jeef, daut de Frues weinja wieet wieren.” Un Jesus räakjend besonda soone Frues väl, waut no sienen Voda horchten. Hee sach dee mau rajcht aus siene Sestren aun un dee jehieeden krakjt soo mank siene jeistelje Famielje aus de Mana (Mat. 12:50).

4. Waut woa wie en disen Artikjel seenen?

 ⁴ Jesus wia emma reed de Sestren to halpen. Hee räakjend dee väl un stunt fa dee en. Well wie mol seenen, woo wie krakjt soo met de Sestren omgonen kjennen aus Jesus.

5. Wuarom es eenje Sestren daut schwoa, met goode Frind toop to sennen?

⁵ Wie aula wellen met goode Frind toop sennen. Oba eenjemol es daut fa de Sestren schwoa. Wuarom? Eene Sesta, waut Jordan * heet, sajcht: “Wiels ekj nich befriet sie, feel ekj mie en de Vesaumlunk foaken toom äwajen.” Kristen es eene Pionia-Sesta, waut omjetrocken es, om mea em Deenst to doonen. See sajcht: “Wan eena nie en eene Vesaumlunk es, dan kaun daut leicht sennen, daut eena sikj auleen feelt.” Eenje Breeda jeit daut veleicht uk soo. Un wan nich aule enne Famielje Jehova deenen, dan feelt eena sikj met dee veleicht nich soo vebungen, oba eena kaun uk nich soo väl met de Gloowesbreeda toop sennen. Soone Sestren, waut wäajen eene Krankheit nich von tus kjennen ooda wäm von de Famielje besorjen motten, kjennen sikj uk auleen feelen. Annette sajcht: “Wiels ekj miene Mame besorjen must, kunn ekj nich met de Breeda un Sestren toop sennen.”

6. Woo holp Jesus Marta un Maria no Lukas 10:38-42 no?

⁶ Jesus neem sikj Tiet fa de Sestren un wia uk een gooda Frint fa dee. Daut es doaraun to seenen, daut hee Frint wia met Maria un Marta, waut woomäajlich beid nich befriet wieren (läs Lukas 10:38-42). Wäajen daut, waut Jesus säd un deed, jleichten dee daut, met am toop to sennen. Maria saut doa wellich bie Jesus siene Feet, soo aus de Jinja daut deeden. * Un aus Marta doaräwa vestalt wia, daut Maria ar nich holp, säd see Jesus daut gaunz frie, waut see docht. Un Jesus kunn dee beid dan em jeisteljen halpen. Un daut Jesus om dise Frues un om dee äaren Brooda Lazarus bekjemmat wia, wia uk doaraun to seenen, daut hee doa ieremol hankjeem (Joh. 12:1-3). Doawäajen fruagen Maria un Marta Jesus no Help, aus Lazarus sea krank wort (Joh. 11:3, 5).

7. Woo kjenn wie de Sestren Moot moaken?

⁷ Eenje Sestren kjennen mieeschtens bloos bie de Toopkomes met äare Gloowesbreeda toop sennen. Doawäajen well wie dee doa bejreessen un met dee räden un dee wiesen, daut wie om an todoonen sent. Jordan, wua wie ea aul von jerät haben, sajcht: “Daut jeft mie soo väl Moot, wan aundre mie fa miene Auntwuaten lowen ooda met mie toop em Deenst gonen wellen ooda mie opp eene aundre Wajch wiesen, daut see om mie bekjemmat sent.” Wie motten de Sestren daut wiesen, daut wie dee waut räakjnen. Kia sajcht: “Wan ekj mol nich bie een Toopkomen sie, dan weet ekj aul, daut mie wäa schriewen woat, bloos toom seenen, aus aules fein es. Soo weet ekj, daut de Breeda un Sestren om mie bekjemmat sent.”

8. Woo kjenn wie Jesus nodoonen?

⁸ Krakjt soo aus Jesus kjenn wie ons uk Tiet nämen fa de Sestren. Veleicht kjenn wie dee mol no ons kroagen toom een bät waut äten ooda Tietvedrief haben. Doa  well wie dan von soont räden, waut ons oppmuntat (Reem. 1:11-12). De Eltestasch sellen soo jesonnen sennen aus Jesus. Hee wist, daut daut fa eenje schwoa wia, daut see nich eenen Ehepoatna hauden. Oba hee muak daut uk dietlich, daut eena nich bloos doaderch kunn schaftich sennen, daut eena befriet wia ooda Kjinja haud (Luk. 11:27-28). Eena es opp iernst schaftich, wan eena daut ieeschte doarom todoonen es, Jehova to deenen (Mat. 19:12).

9. Waut kjennen de Eltestasch fa de Sestren doonen?

⁹ Besonda de Eltestasch sellen de Frues von de Vesaumlunk soo behaundlen aus eene Sesta ooda Mutta (1. Tim. 5:1-2). Daut es goot, wan dee sikj ver ooda no de Toopkomes Tiet nämen toom met de Sestren vetalen. Kristen sajcht: “Eenen Eltesten foll daut opp, daut ekj sea drock wia, un hee wull mol weeten, waut ekj aules to doonen haud. Ekj freid mie, daut dee soo om mie bekjemmat wia.” Wan de Eltestasch sikj emma wada Tiet nämen, om met de Sestren to räden, dan wiesen dee, daut dee om an bekjemmat sent. * Annette, wua wie aul ea von räden, sajcht, wuarom daut goot  es, wan eena räajelmässich met de Eltestasch vetalt. See sajcht: “Soo lia ekj dee bäta kjanen un dee mie. Un wan dan een Trubbel oppkjemt, dan es mie daut leichta, dee no Help to froagen.”

10. Waut kaun de Sestren väl Freid jäwen?

¹⁰ Endoont aus Mana ooda Frues, wie aula freien ons, wan aundre seenen, waut wie doonen, un ons doafäa lowen. Oba wie kjennen leicht mootloos woaren, wan kjeena daut wiest, daut hee onse Oabeit waut räakjent. Abigail es eene onbefriede Pionia-Sesta, waut sikj eenjemol toom äwajen feelt. See sajcht: “Eenjemol späat sikj mie daut soo, daut aundre nich väl om mie romjäwen. Dee kjanen bloos miene Elren ooda miene Jeschwista.” Pam es eene onbefriede Sesta, waut joarenlank Missionoa wia. Oba dan must see trigj no äa Launt, om fa äare Elren to sorjen. Nu es dee aul enne 70 un es noch emma Pionia. Pam sajcht: “Mie halpt daut emma sea väl, wan aundre mie sajen, daut see mie väl räakjnen.”

11. Woo wees Jesus, daut hee de Frues väl räakjend, waut am holpen?

¹¹ Jesus räakjend de true Frues sea väl, “dee von äa Vemieejen jejäft hauden, fa am to sorjen” (Luk. 8:1-3). Hee neem nich bloos dee äare Help aun, oba hee holp de Frues uk, wichtje Lieren to vestonen. Biejlikj säd hee dee, daut hee stoawen wudd un wada vom Doot oppstonen (Luk. 24:5-8). Un hee muak dee uk fa de Proowen reed, waut noch komen wudden, krakjt soo, aus hee daut bie de Apostel jedonen haud (Mar. 9:30-32; 10:32-34). Daut es oppfaulent, daut de Apostel sikj fuatbrochten, aus Jesus faustjenomen wort. Oba eenje von de Frues, waut Jesus emma unjastett hauden, wieren doa, aus hee aum Pol storf (Mat. 26:56; Mar. 15:40-41).

12. Waut vonne Oppgowen jeef Jesus de Frues?

¹² Jesus jeef de Frues wichtje Oppgowen. De true Frues wieren biejlikj de ieeschte, waut daut sagen, daut hee vom Doot oppjestonen wia. Un hee säd, daut see de Apostel daut sajen sullen (Mat. 28:5, 9-10). Un doa wieren secha uk Frues mank, aus Pinjsten aune 33 de heilja Jeist utjegoten wort. Wan daut soo wia, dan kunnen dee secha uk derch een Wunda opp aundre Sproaken räden un “von Gott siene groote Wundawoakjen räden” (Apj. 1:14; 2:2-4, 11).

13. Waut doonen de Sestren vondoag dän Dach, un woo kjenn wie an wiesen, daut wie doafäa dankboa sent?

¹³ Wäajen de Sestren soo väl fa Jehova doonen, haben dee daut vedeent, daut wie an lowen. Dee doonen biejlikj Hiesa buen un en Ordninj hoolen un unjastetten Gruppen, waut opp eene aundre Sproak prädjen, un halpen em Betel met. Dee sent Pionieren ooda Missionoaren, halpen onse Bieekja to äwasaten ooda unjastetten dee, waut derch een Owwada Schoden jekjräajen haben. Un dee kjennen krakjt soo aus de Breeda no de Pioniadeenst-School gonen un no de School fa Kjennichrikjsvekjindja un no de Gilead-School. Un wan dee befriet sent, dan unjastetten dee äare Mana uk, daut dee sikj om äare Oppgowen en de Vesaumlunk ooda en de Organisazion kjemren kjennen. Dise Eltestasch sent soo aus “Gowen” un dee wudden nich soo väl fa de Breeda doonen kjennen, wan äare Frues an nich unjastetten wudden (Efs. 4:8). Waut wudd wie fa soone true Sestren doonen kjennen?

14. Aun waut denkjen weise Eltestasch, soo aus Psalm 68:11 (NW) sajcht?

¹⁴ Weise Eltestasch denkjen doaraun, daut de Sestren “een grootet Häa” sent, waut flietich schaufen, un daut dee foaken sea fein vestonen to prädjen (läs  Psalm 68:11, NW *). Doawäajen wellen de Eltestasch von dee lieren. Abigail, wua wie aul ea von räden, freit sikj sea, wan Breeda ar froagen, woo daut met dän Prädichtdeenst en äare Jäajent fein schauft. See sajcht: “Daut wiest mie, daut ekj uk waut fa Jehova siene Organisazion doonen kaun.” Un de Eltestasch weeten uk, daut de true, erfoarne Sestren de jinjre Sestren fein halpen kjennen, wan dee Trubbels haben (Tit. 2:3-5). De Sestren haben daut werkjlich vedeent, daut wie an waut räakjnen!

15. En waut vonne Loagen brucken de Sestren woomäajlich Help?

¹⁵ Eenjemol haben de Sestren eenen Trubbel un brucken wäm, dee fa an ensteit (Jes. 1:17). Eene Wätfru ooda eene jeschiedne Sesta brukt veleicht wäm, dee fa ar räden deit un ar met jewesset halpt, waut äa Ehemaun ea jedonen haft. Ooda eene elre Sesta brukt veleicht Help toom met eenen Dokta räden. Ooda woo es daut, wan eene Pionia-Sesta uk noch aundre Oabeit deit fa Jehova siene Organisazion? Veleicht fält dee daut aun wäm, waut fa ar ensteit, wan aundre äwa ar grunzen, daut see nich soo foaken em Deenst es aus de aundre Pionieren. Woo kjenn wie de Sestren noch halpen? See wie mol, waut Jesus deed.

16. Woo kjenn wie en Markus 14:3-9 seenen, daut Jesus fa Maria enstunt?

¹⁶ Jesus stunt wellich fa de Sestren en, wan aundre nich rajcht äwa dee dochten. Hee stunt biejlikj Maria bie, aus Marta äwa ar grunzt (Luk. 10:38-42). Un hee holp Maria noch eemol, aus aundre säden, daut see nich daut rajchte jedonen haud (läs Markus 14:3-9). Jesus wist, wuarom Maria daut jedonen haud, un lowd ar doafäa un säd: “See haft aun mie waut wundascheenet jedonen. . . . See deed, waut see doonen kunn”. Hee säd soogoa verut, daut daut goode, waut see jedonen haud, aulawäajen wudd bekauntjemoakt woaren, “wuaemma daut Evangelium en dise Welt . . . [wudd] jeprädicht woaren”. Un daut es jroz, waut wie en disen Artikjel doonen. Es daut nich oppfaulent, daut Jesus von daut prädjen oppe gaunze Welt räd, aus hee Maria fa daut goode lowd, waut see jedonen haud? Secha jeef Maria daut en dise Loag sea väl Moot!

17. Wanea sell wie fa eene Sesta enstonen? Jeff een Biespel.

¹⁷ Sto wie uk fa de Sestren en, wan dee daut fält? Saj wie mol, eene Sesta haft eenen Maun, waut nich Jehova deent. Un eenje Vekjindja räden doaräwa, daut dee foaken nich enne Tiet no de Toopkomes kjemt un nodäm fuaz wada velat. Un dee sajen uk, daut see mieeschtens onen äare Kjinja kjemt. Doawäajen grunzen see äwa ar un sajen, daut dee wudd sellen dolla doaropp schaufen, daut dee äare Kjinja foakna metbrinjen kunn. Oba en Werkjlichkjeit deit de Sesta aul aules, waut see kaun. See kaun je nich aules auleen plonen un see es uk nich auleen de Wieet äwa de Kjinja. Woo kjenn wie fa dise Sesta enstonen? Wie kjennen met daut Jeräd een Enj moaken, wan wie dee lowen un doavon räden, waut fa goodet dee deit.

18. Woo kjenn wie de Sestren noch halpen?

¹⁸ Wan wie de Sestren Help aunbeeden, dan seenen dee, daut wie sea om an bekjemmat sent (1. Joh. 3:18). Annette es de Sesta, waut äare Mame besorjen deed. See sajcht: “Eenje Breeda un Sestren kjeemen un holpen mie, daut ekj mol waut aundret  doonen kunn, ooda dee brochten Äten. Ekj kunn daut späaren, daut see mie waut räakjenden un ekj Poat von de Vesaumlunk wia.” Jordan deeden se uk halpen. Een Brooda läd ar ut, woo see äa Foatich fein en Ordninj hoolen kunn. See sajcht: “Daut freit mie, daut de Breeda un Sestren soo om miene Sechaheit bedocht sent.”

19. Woo kjennen de Eltestasch de Sestren noch halpen?

¹⁹ De Eltestasch sent uk doarom todoonen, waut de Sestren fält. Dee weeten, daut Jehova doano kjikjt, woo de Sestren behaundelt woaren (Jak. 1:27). Dee wellen soo utjejlikjt sennen aus Jesus un moaken en soone Loagen nich strenje Räajlen, wua daut wudd bäta sennen, Vestentnis to haben un leeftolich to sennen (Mat. 15:22-28). Wan de Eltestasch sikj aunstrenjen de Sestren to halpen, dan woaren de Sestren daut en, woo väl Jehova un siene Organisazion an räakjnen. Aus Kia äa Gruppenoppsechta hieed, daut see omtrakjen wull, sach hee fuaz doano, daut see Help kjrieech. Kia sajcht: “Daut wia eene groote Help fa mie. De Eltestasch spruaken mie Moot too un footen doa bie. Daut wees mie, daut ekj en eene schwieeje Loag nich auleen wia un daut ekj Poat von de Vesaumlunk wia.”

20-21. Woo kjenn wie wiesen, daut wie aule Sestren leewen?

²⁰ En Jehova sien Volkj jeft daut een deel flietje Sestren un dee haben daut vedeent, daut wie an halpen. Soo aus Jesus kjenn wie dee biestonen, wan wie met dee toop sent un dee bäta kjanen lieren. Un wie kjennen dee daut wiesen, daut wie daut waut räakjnen, waut dee fa Jehova doonen. Un wie sellen fa dee enstonen, wan daut fält.

²¹ Opp Enj von sienen Breef aun de Reema räd de Apostel Paulus von näajen veschiedne Sestren (Reem. 16:1, 3, 6, 12-13, 15). Dee freiden sikj secha, aus Paulus an lowd un an bestald to jreessen. Well wie uk aule Sestren von onse Vesaumlunk unjastetten. Soo woaren dee en, daut wie an leewen un daut dee to onse jeistelje Famielje jehieren.