1. ¿Ima llaquicunatallata congregacionmanda panigucunaca charin? (Callari paginapi fotota ricupangui).

CONGREGACIONGUNAPICA panigucunaca ashtacatami ayudanajun. Paicunaca tandanajuicunapi comentashpa, villachishpa, shuj huauquipanicunatapashmi ayudan. Shinallata huaquin panigucunaca Tandanajui Huasicunatapash arreglashpa, cuidashpami ayudan. Congregaciongunapica panigucunataca ninandami juyapanchi. Ñucanchi panigucunaca huaquingunaca mayorlla taitamamacunatami cuidanajun. Cutin shujcunaca familiacuna na Testigocuna cajpimi llaquicunata charin. Shinallata shuj panigucunaca paicunallami huahuacunata viñachingapaj, mantiningapaj shinllita esforzarinajun.

2. ¿Imamandata ñucanchi panigucunataca respetohuan tratana capanchi?

² ¿Imamandata ñucanchi panigucunata ayudangapaj esforzarina capanchi? Canllamanda gentecunaca huarmigucunataca na valichishpa, na respetashpami tratan. Bibliapica huarmigucunataca ayudana, respetanami canguichi ninmi. Apóstol Pablo Roma llactamanda congregacionman escribijushpaca Febe panigutaca aliguman chasquipanguichi, imaguta na charijpipash carapanguichi nishpami mandarca (Rom. 16:1, 2). Pablo fariseo cashpaca huarmigucunataca na valichishpami tratan carca. Shinapash Jesuspa catij tucushpaca Jesushnami huarmigucunataca juyaihuan, respetohuan tratan carca (1 Cor. 11:1).

3. Jesusca ¿imashinata huarmigucunataca tratan carca?

³ Judiocunata ñaupaman pushajcunaca huarmicunataca nalipachami tratan carca. Cutin Jesusca tucui huarmigucunatami juyaihuan, respetohuan tratarca (Juan 4:27). Bibliamanda parlaj shuj libroca: “Jesusca ima horapash huarmigucunamandaca nalitaca na parlarcachu. Huarmicunaca na sirvinllu nishpapash  na nircachu” nijunmi. Jesusca Jehovata sirvij huarmigucunataca ashtahuanmi juyan carca. Tucuicunatallatami paipa propio familiatashna juyaihuan tratan carca (Mat. 12:50).

4. Cunanga ¿imatata yachajupashun?

⁴ Jesusca huarmigucunataca siempremi ayudan carca. Paicunataca respetohuanmi tratarca. Shujcuna paicunata nali tratajpipash Jesusca difindircami. Jesushna ñucanchicunapash huarmigucunata ali tratana cashcata yachajupashunchi.

5. Huaquin panigucunaca ¿imamandata solalla sintirin?

⁵ Jaricuna, huarmicuna cashpapash tucuicunallatami ali llevaringapaj munapanchi. Shinapash huaquin panigucunapaca chaica dificilmi can. Juanita * paniguca ninmi: “Soltera caimandami tauca viajecunata congregacionbica na ali sintirini. Imapashi caipi cani yashpami pensani” nin. Karol shuti precursora paniguca villachijcuna minishtirishca pushtupi sirvingapami rirca. Paica: “Chairalla congregacionman chayashcamandami huaquinbica solalla sintirita usharin” nin. Huaquingunaca paicunapa familiacuna na Testigo cajpimi llaquilla sintirin. Shinallatami huauquipanicunahuanbash sintirita ushanman. Huaquinbica saludhuan nali caimanda o familiacunata cuidajuimandami huasimanda na llujshita ushashpa paicunalla sintirita ushanman. Anitaca ninmi: “Turiñañagucuna invitajpica ñuca mamitata cuidana caimandami na fácil rita ushan carcani” nin.

6. Lucas 10:38-42​pi nishca shinaca ¿imashinata Jesusca Mariata, Martatapash ayudarca?

⁶ Jesusca Jehovata sirvij huarmigucunahuan ali llevarimandami paicunahuan tiempota yalin carca. Mariahuan, Martahuanbashmi ali llevarin carca (Lucas 10:38-42, liingui). Jesusca paicunataca parlocunahuan, ruraicunahuanmi ali sintirichun ayudan carca. Mariaca Jesushuan ali llevarimandami Jesuspa ñaupajpi tiarishpa pai villajujta uyajurca. * Shinallata Martapash Jesushuan ali llevarimandami paipa ñaña Mariahuan culira cashcata Jesusmanga villarca. Jesuspash paicunahuan ali llevarimandami ishcandita consejarca. Mariata, Martata paicunapa turi Lazarotapash huaquin viajecunata visitashpami paicunamanda preocuparishcata Jesusca ricuchirca (Juan 12:1-3). Shina ali llevarimandami Lázaro huañujujpica Mariapash, Martapash Jesusta cayachun cachanajurca (Juan 11:3, 5).

7. ¿Imashinata panigucunataca animaita ushapanchi?

⁷ Huaquin panigucunaca tandanajuicunaman rishpallami huauquipanicunahuan yalita ushan. Chaimi tandanajuiman uchalla chayashpa paicunahuan parlaita ushapanchi. Párrafo 5​pi parlashca Juanitaca ninmi: “Tandanajuicunapi comentajpi turiñañagucuna ñucata felicitajpi, villachingapaj ñucahuan llujshijpi, imagupipash ñucata ayudajpica ninandami cushijupani” nin. Congregacionbi panigucuna ninan valishca cashcata ricuchipashunchi. Karolca ninmi: “Tandanajuiman na rijpi, alillachu cangui nishpa shuj mensajeta turiñañagucuna cachamujpica ninandami cushijupani. Shinami turiñañagucunaca ñucamanda preocuparishcata ricupani” nin.

8. ¿Imashinata Jesushna caita ushapanchi?

⁸ Jesusca tucui huarmigucunatami respetohuan tratan carca. Chaimi ñucanchicunapash panigucunata respetohuan tratangapaj esforzarina capanchi. Huasiman imagutapash  micungapaj invitashpa, Jehovamanda imata yachajushcata parlangapami tiempoguta llujchina capanchi (Rom. 1:11, 12). Ashtahuanbachaca ancianocunami Jesushna cangapaj esforzarina can. Jesusca soltero cana difícil cashcataca alimi yacharca. Cazarana o huahuacunata charina ali cajpipash Jesusca paipa causaihuanmi Jehovata sirvina ashtahuanbacha cushichijta ricuchirca (Mat. 19:12; Luc. 11:27, 28).

9. Ancianocunaca ¿imashinata panigucunataca ayudaita ushan?

⁹ Ancianocunaca mayorlla panigucunataca mamacunatashna, joven panigucunataca paicunapa propio panicunatashnami ricuna can (1 Tim. 5:1, 2). Shinallata tandanajui nara callarijpillata, tucurishca jipapashmi panigucunahuan parlangapaj tiempoguta llujchina can. Karolca ninmi: “Precursora cajpi, trabajopi ocupada cajta ricushpami shuj ancianoca imashinata tucuita pactachingui nishpa tapuhuarca. Shina tapujpica cushillami sintirircani” nin. Ancianocuna panigucunahuan parlangapaj tiempota llujchishpaca paicunamanda preocuparishcatami ricuchin. * Anitaca ninmi: “Anciano turigucuna ñucamanda preocuparijta  ricushpaca paicuna imashina cashcatami ashtahuan yachajuni. Chaimi imapash problemata charishpaca paicunahuanga fácil parlanilla” nin.

10. Panigucunaca ¿imamandata cushilla sintirin?

¹⁰ Tucuicunallatami ñucanchicuna imata rurashcamanda felicitajpica cushilla sintiripanchi. Shinallata imagutapash ashtahuan rurangapami esforzaripanchi. Abigaíl precursora soltera paniguca ninmi: “Huaquinbica turiñañacunaca paica chai huauquipa ushimi can nishpami rijsihuan. Chaimi pipash ñucataca na rijsihuanllu, na valichihuanllu yashpami llaquirini” nin. Cunanga Toa soltera panigumanda parlapashun. Paica tauca huatacunatami misionera carca. Shinapash paipa taitamamacunata cuidangapami huasiman tigrarca. Cunanga 70 yali huatacunata charishpapash precursora cashpami catin. Paica ninmi: “Shuj turiñañagucuna ñuca imagutapash alita rurashcamanda felicitajpica alimi sintirini” nin.

11. ¿Imashinata Jesusca huarmigucunata agradicishcata ricuchirca?

¹¹ Diosta sirvij huarmigucunaca ‘Jesustaca imaguhuanbashmi ayudarca’. Shina rurashcamandaca Jesusca paicunataca ninandami agradicirca (Luc. 8:1-3, MTQI ). Agradicimandami Jehová Dios imacunatalla pactachinata, Jesús imashina huañushpa cutin causarina cashcatapash chai huarmigucunamanga villarca (Luc. 24:5-8, NM ). Apostolcunamanga chaitaca ña villashcami carca. Chaitallatami chai huarmigucunamanbash villarca (Mar. 9:30-32; 10:32-34). Jesusta prezo japijpica apostolcunaca pacajushpami rirca. Shinapash huaquin huarmigucunaca Jesustaca huañungacamanmi cumbarca (Mat. 26:56; Mar. 15:40, 41).

12. a) Jesús causarishpaca ¿picunamanda primeroca ricurirca? b) ¿Imata rurachunda chai huarmigucunataca mandarca?

¹² Jesús causarishpaca primeroca huaquin huarmigucunamanmi ricurirca. Paicunaman ricurishpaca ñuca causarishcata ñucapa catijcunaman villagripaichi nishpami mandarca (Mat. 28:5, 9, 10). Huata 33 Pentecostés punllapica Jehová Diosca paipa espíritu santota huaquin Jesusta catijcunamanmi curca. Paicunapurapica huarmicunapashmi tiashcanga. Paicunapashmi “Taita Dios juyailla rurashcataca” shuj shuj shimicunapi villachi ushashcanga (Hech. 1:14; 2:2-4, 11).

13. a) Ashtaca panigucunaca ¿imatata Jehovata sirvingapaj ruranajun? b) Shina ruranajushcamandaca ¿imatata rurana capanchi?

¹³ Jehovata sirvinajushcamandami panigucunataca felicitana capanchi. Ashtaca panigucunaca Tandanajui Huasicunata shayachishpa, Jatun Tandanajui Huasicunata arreglashpapashmi ayudanajun. Huaquingunaca shuj shuj shimicunapimi villachinajun. Huaquingunaca Betelpipashmi huaquin punllacunata ayudanajun. Shinallata shuj panigucunaca llaqui apashca pushtucunapimi ayudanajun. Cutin huaquingunaca publicaciongunata traducishpami ayudanajun. Shuj panigucunaca precursoracuna, misioneracunashnami sirvinajun. Chai panigucunaca Precursorcunapa Escuelaman, Diospa Reinomanda Villachijcunapa Escuelaman, Galaad Escuelamanbashmi rita ushashca. Cutin cazada panigucunaca paicunapa cusacuna congregacionbi ashtahuan ayudashpa catichunmi paicunapa cusacunataca apoyan (Efes. 4:8). Chaimi tucuilla panigucunata felicitangapaj esforzarina capanchi.

14. Salmo 68:11​pi nishca shinaca ¿imatata ancianocunaca ali yachan?

¹⁴ Ashtaca ‘ashtaca huarmigucuna’ Diospa Reinomanda ali villaigucunata villachinajujtaca ancianocunaca alimi yachan (Salmo 68: 11, liingui). Chaimi anciano huauquicunaca experienciata charij panigucunamanda yachajungapaj esforzarin. Callari parrafocunapi parlashca Abigaíl panigutaca imashinata gentecunahuan parlai callaringui nishpa shuj anciano huauqui tapujpica Abigailca cushillami sintirin. Paica ninmi: “Jehovapa organizacionbi ayudajushcatami cuenta japini” nin. Ancianocunaca experienciata charij panigucuna shuj jovenlla panigucunata ayudai ushashcatapashmi ali yachan (Tito 2:3-5). Caicunata ricushpami tucui panigucunata agradicina cashcata, juyaihuan tratana cashcatapash yachajupanchi.

15. ¿Imahorata huaquin panigucunaca ayudachun, difindichun minishtin?

¹⁵ Huaquinbica ñucanchi panigucunaca imagupipash ayudachun o pipash imatapash nijpi difindichunmi minishtin (Is. 1:17). Huaquinbica viuda cashcamanda o divorciarishca cashcamandami imagupipash ayudachun minishtin. Cutin mayorlla cashpaca doctorhuan parlashpa ayudachunmi minishtita ushan. Shinallata shuj precursora paniguta na shuj precursoracunashna villachishcamanda huasha rimajpimi chai paniguca difindichun minishtin. Shinaca panigucunata ayudangapaca ¿imatata ashtahuan rurai ushapanchi? Jesuspa ejemplota cutin yaripashun.

16. Marcos 14:3-9​pi nishca shinaca Jesusca ¿imatata rurarca?

¹⁶ Huarmigucunata pipash nalicachishpa parlajujpica Jesusca huarmicunapa ladomi tucun carca. Shuj punllaca Martaca Mariataca nalicachishpami parlajurca. Chaimi Jesusca Mariapa lado tucurca (Luc. 10:38-42). Shujcuna Mariata nalicachishpa rimanajujpipashmi Jesusca paipa lado tucurca (Marcos 14:3-9, liingui). Jesusca Mariapa ali rurashcata ricushpami cashna nirca: “Ñucapaj ali cachunmi, cashna rurangapaj shamushca. [...] Paica, pai imata rurai ushashcagutallami rurashca” nircami. Cashnatapashmi nirca: “Cai ali villaita tucui cai pachapi villajushpaca, cai huarmita yarinajuchumbash, pai imaguta rurashcatapashmi villanga nircami”. Mariapa ali ruraitaca cai revistapipashmi yarinajupanchi. Jesús paipa lado tucujpica Mariaca ninandami cushijushcanga. Diospa Reinomanda ali villaicunataca mundo enteropimi villachinajupanchi. Mariapa ali ruraitapash mundo enteropimi yarinajupanchi.

17. ¿Imahorata shuj paniguca paipa lado tucuchun minishtinman?

¹⁷ Ñucanchi panicunata pipash nalicachishpa parlajujpica panigucunapa lado tucupashunchi. Na Testigo cusata charij shuj panigupi pensaripashunchi. Chai paniguca tandanajuiman jipayashcallami chayan. Tandanajui tucurijpipash uchallami rin. Huahuacunatapash tandanajuimanga na pushajta ricupashcanchiman. Chaimi huaquin huauquipanicunaca imashpashi paipa cusahuanga na shinlli shayarin nishpa huasha rimaita ushanman. Shinapash chai paniguca tucui usharishcatami tandanajuicunaman ringapaca esforzarijun. Shinallata cusa na Testigo cashcamandami huahuacunatapash na fuerza tandanajuimanga apaita ushan. Chaipica ¿imashinata chai panigutaca ayudaita ushapanchi? Chai panigu ninanda esforzarijujta ricushpami felicitana capanchi. Shinallata chai panigupa ali rurajushcataca shujcunamanbashmi parlaita ushapanchi. Shinami shujcuna chai paniguta ama nalicachishpa parlachun ayudanga.

18. Ñucanchi panigucunataca ¿imashinata ashtahuan ayudaita ushapanchi?

¹⁸ Ñucanchi panicunataca ¿imashinata ashtahuan ayudaita ushapanchi? Paicunataca shuj shuj ruraicunapimi ayudaita ushapanchi  (1 Juan 3:18). Anitaca paipa mamita irquiyajpimi cuidajurca. Paica ninmi: “Huaquin turiñañagucunami ñuca mamitata cuidashpa ayudangapaj shamun carca. Huaquingunaca micunagutapashmi apashpa shamun carca. Shina rurajpimi turiñañagucuna ñucata juyashcata ricuparcani” nin. Cutin Juanita panigutaca shuj huauquimi paipa carro ama huaglichun imashina cuidana cashcata yachachirca. Juanitaca ninmi: “Chai turigu ñuca ama imapash sucidichun shina yachachishcamandaca ninandami cushijupani” nin.

19. Ancianocunaca ¿imashinata panigucunataca ayudaita ushan?

¹⁹ Ancianocunaca panigucuna imagutapash minishtijpica ayudangapami ricurianajun. Jehová Diosca ancianocuna panigucunata ali tratachunmi munan (Sant. 1:27). Jesuspa ejemplota catishpami ancianocunaca panigucunata intindingapaj esforzarin. Shinallata paicunapa munaita rurachunbash na mandanllu (Mat. 15:22-28). Panigucunaca ancianocuna ayudajpica cushillami sintirin. Por ejemplo panigu Karolca shuj huasiman causangapami yaligrijurca. Chaita paipa grupomanda superintendente uyashpaca uchallami shuj huauquipanicunapa ayudata mascarca. Pani Karolca ninmi: “Ancianocuna ñucata shina ayudashcamandaca cushilla, alimi sintirircani. Ama yapata estresada cachunbashmi ayudahuarca. Shina ayudajpimi congregacionbi tucui turiñañagucuna ñucata ninanda juyashcata ricuparcani. Ima problemata charijpipash paicuna ayudanataca segurami capani” nirca.

20, 21. Panigucunata juyashcataca ¿imashinata ricuchipanchi?

²⁰ Congregaciongunapica ashtaca ashtaca panigucuna alita rurangapaj esforzarinajushcamandami paicunataca apoyana capanchi. Shinallata ñucanchicunaca Jesushnami paicunata animangapaj, ayudangapapash tiempoguta llujchina capanchi. Jehovata sirvinajushcamandami paicunataca agradicina capanchi. Huaquinbica pipash imatapash nishpa nali tratajujpica ñucanchi panigucunapa ladomi tucuna capanchi.

²¹ Romanos librota escribi tucuchijushpaca apóstol Pabloca 9 panigucunapa shutitami escribirca (Rom. 16:1, 3, 6, 12, 13, 15). Paicunaman saludocunata shutipi cachamujpica ninandami cushijurianga. Ñucanchicunapash panigucunata apoyashpa, pipash imatapash nijpi difindishpa, ñucanchi propio familiacunatashna tratashpami paicunata juyashcata ricuchipanchi.