1. Со керена амаре пхења ки организација, хем саве предизвикија иси лен? (Дикх и слика тари насловно страна.)

БУТ сием бахтале со иси бут пхења кола со трудинена пе ко собрание! На пример, ола учествујнена ко состанокија хем ки служба. Несаве поможинена те одржинен пе о дворане хем грижинена пе башо пхраља хем пхења. Џанѓола пе, ленде да иси лен проблемија. Несаве грижинена пе пумаре попхуре родителенге. Јавера трпинена противибе таро ленгере најпаше. А несаве јавера даја кола со коркори бајрарена пумаре чхавен керена пхари бути те шај те грижинен пе ленге.

2. Соске ваљани те поддржина амаре пхењен?

² Соске ваљани те поддржина амаре пхењен? Адалеске со о свето авдиве на поштујнела секогаш е џувлен сар со заслужинена. А освен адава, и Библија поттикнинела амен те поможина ленге. На пример, о апостол Павле вакерѓа е пхраленге таро собрание ко Рим те приминен е пхења Фива хем те „поможинен лаке ко са со ка ваљани лаке“ (Рим. 16:1, 2). Кеда о Павле сине фарисеи, ов сине дело тари јекх група мануша кола со мислинена сине кај о џувља врединена похари таро мурша хем аѓаар понашинена пе сине ленцар. Ама, кеда уло христијани, о Павле џала сине пало е Исусескоро пример, хем понашинела пе сине љубезно е џувленцар хем сине ле поштовање спрема ленде (1. Кор. 11:1).

3. Сар понашинела пе сине о Исус е џувленцар, хем саво стави сине ле спрема о џувља со керена сине е Девлескири волја?

³ О Исус поштујнела сине са е џувлен (Јован 4:27). На дикхела сине ко џувља сар со дикхена сине о еврејска верска водачија ко адава време. Уствари ко јекх библиско прирачнико пишинела: „О Исус никогаш на вакерѓа нешто  со понижинѓа е џувлен“. О Исус сикавѓа кај посебно поштујнела е џувлен кола со керена сине и волја лескере Дадескири. Ки ленде дикхела сине сар пле пхења, кола со заедно е муршенцар сине дело тари лескири духовно фамилија (Мат. 12:50).

4. Со ка дикха ки акаја статија?

⁴ О Исус секогаш сине спремно те поможинел е џувленге кола со служинена сине е Девлеске. Ов ценинела лен сине хем бранинела лен. Те дикха сар шај те џа пало лескоро пример аѓаар со ка грижина амен амаре пхењенге.

5. Соске несаве пхењенге тано пхаро те аракхен песке друштво ко собрание?

⁵ Сарине амен, хем пхраља хем пхења, иси амен потреба таро шукар друштво. Ама, несаве пхењенге понекогаш пхаро тано те аракхен песке друштво. Соске? Дикх несаве со вакерѓе. Јекх пхен со викинела пе Џоана * вакерела: „Адалеске со на сиум ко брако, бут пути на џанава касаја шај те овав паше ко собрание хем осетинава ман кај на сиум бут важно адатхе“. И Кристина, јекх пионерка која со селинѓа пе те шај те служинел ки побари мера вакерела: „Кеда сиан неви ко собрание, шај те осетине тут осамено“. Окола со живинена ки фамилија коте со о јавера нане е Јеховаскере сведокија, шај те овел ленге пхаро те овен паше пле фамилијаја, а ко исто време шај нане паше ни е пхраленцар ни е пхењенцар таро собрание. Несаве пхења шај осетинена пе коркори соске тане насвале хем нашти те икљон кхералдан, или ваљани те грижинен пе некаске тари пли фамилија адалеске сој тане насвале. И Анета вакерела: „Нашти сине те џав кеда викинена ман сине те дружина амен соске побаро дело таро време ме грижинава ман сине ме дајаке“.

6. Спрема Лука 10:38-42, сар о Исус поможинѓа е Мартаке хем е Маријаке?

⁶ О Исус накхавела сине време пле духовна пхењенцар хем сине ленге чаче амал. На пример, ов сине амал е Маријаја хем е Мартаја, кола со изгледа на сине ко брако. (Читин Лука 10:38-42.) Пле лафенцар хем постапкенцар, о Исус сигурно керѓа те осетинен пе шукар. На пример, и Марија осетинела пе сине слободно те бешел узо лескере пре сар со керена сине о ученикија. * А и Марта, која со хољанѓа е Маријаке адалеске со на поможинела сине лаке, осетинела пе сине слободно те вакерел е Исусеске со мислинела башо адава. Ки адаја прилика, ов поможинѓа солдујенге те сикљон важна поуке. Исто аѓаар, о Исус сикавѓа кај грижинела пе ленге хем ленгере пхралеске, е Лазареске, адалеа со џала сине ки ленде ко гости ко јавера да прилике (Јован 12:1-3). Адалеске, кеда о Лазар сине бут насвало, и Марта хем и Марија џанле кај шај те роден о Исус те поможинел ленге (Јован 11:3, 5).

7. Сар шај те охрабрина амаре пхењен?

⁷ Несаве пхењенге, о состанокија тане јекх таро хари прилике со иси лен те овен заедно е пхраленцар хем е пхењенцар. Адалеске мангаја те користина адала прилике те кера те осетинен пе шукар, те кера ленцар лафи хем те сикава ленге кобор тане аменге важна. И Џоана, која со спомнинѓем ла поупре, вакерела: „Бут охрабринела ман кеда о јавера фалинена ман башо мле коментарија, кеда викинена ман те џав ленцар заедно ки служба или кеда сикавена кај грижинена пе манге ко несаво јавер начин“. Амен мора те сикава амаре пхењенге кај тане аменге важна. И Киа вакерела: „Ако на  џава ко состанок, џанава кај некој ка пишинел манге порака те пучел ман дали сиум шукар. Адава сикавела манге кај мле пхраља хем пхења грижинена пе манге“.

8. Ко саве јавера начинија шај те ова сар о Исус?

⁸ Исто сар о Исус, амен да шај те одвојна аменге време те дружина амен амаре пхењенцар. На пример, шај те канина лен ко гости или негде те пхира ленцар. Кеда сием заедно, мангаја те кера лафи башо буќа со охрабринена (Рим. 1:11, 12). Е старешинен ваљани те овел лен о исто стави сар со сине е Исусе. Ов џанља кај некаске шај те овел пхаро те на овел ко брако, ама јасно вакерѓа кај о трајно бахталипе на зависинела ни дали некој тано ко брако ни дали иси ле чхаве (Лука 11:27, 28). Наместо адава, ка ова трајно бахтале ако чхиваја и служба башо Јехова ко прво тхан (Мат. 19:12).

9. Сар шај о старешине те поможинен е пхењенге?

⁹ Посебно о старешине ваљани те понашинен пе е џувленцар сар ленгере духовна пхења хем даја (1. Тим. 5:1, 2). Шукар тано о старешине те одвојнен песке време англедер или пало состанок те керен лафи е пхењенцар. И Кристина вакерела: „Адалеске со керава сине бути хем сиум сине пионерка, сиум сине бут зафатими хем јекх старешина мангља те џанел сар успејнава те керав са адава. Бут сиум сине благодарно со сикавѓа кај грижинела пе  манге“. Кеда о старешине редовно одвојнена песке време те керен лафи е пхењенцар, ола сикавена кај грижинена пе ленге. * И Анета, која сој спомними поупре, истакнинела јекх корист со сине ла таро адава со редовно керела лафи е старешиненцар. Ој вакерела: „Аѓаар пошукар запознајнава лен хем ола да запознајнена ман. А кеда иси ман несаво проблеми, полокхо манге те родав лендар помош“.

10. Со шај те поможинел е пхењенге те осетинен пе бахтале?

¹⁰ Сарине амен, бизи разлика дали сием џувља или мурша, бахтале сием кеда о јавера дикхена амаре шуже особине хем вакерена аменге кај ценинена адава со кераја. Ама, обесхрабринаја амен ако никој на приметинела амаре способностија или адава со кераја. И пхен Абигејл која сој тани пионерка хем нане ко брако признајнела кај понекогаш осетинела пе сар те пхене никој на приметинела ла. Ој вакерела кај о мануша на џанена ла лично, него сар некаскири пхен или некаскири чхај. Адава керела те осетинел пе сар те пхене на дикхјола. И пхен Памела која со нане ко брако служинѓа бут берша сар мисионери. Покасно, иранѓа пе кхере те шај те грижинел пе пле родителенге. Иако акана иси ла повише таро 70 берш, ој панда тани пионерка. Ој вакерела: „Највише охрабринава ман кеда о јавера вакерена манге кај ценинена ман хем кај тане благодарна башо адава со керава“.

11. Сар о Исус сикавѓа кај ценинела сине е џувлен кола со служинѓе заедно леа?

¹¹ О Исус ценинела сине и помош таро верна џувља со служинена сине леске адалеа со иси лен (Лука 8:1-3). На само со дозволинѓа ленге те овел лен и чест те служинен леске него ов исто аѓаар сикавела лен сине важна чачипа баши е Девлескири волја. На пример, ов вакерѓа ленге кај ка мерел хем ка овел воскреснимо (Лука 24:5-8). Ов спреминѓа акале џувлен, исто сар со спреминѓа е апостолен, башо неволје со аџикерена лен сине (Мар. 9:30-32; 10:32-34). Хем иако о апостолија нашле кеда астарѓе е Исусе, несаве џувља со служинѓе леа сине узи лесте кеда муло ко стубо (Мат. 26:56; Мар. 15:40, 41).

12. Саве задаче денѓа о Исус е џувленге?

¹² О Исус денѓа важна задаче е џувленге. На пример, несаве верна џувља сине о прва со дикхле е Исусе кеда воскреснинѓа. Ов вакерѓа адале џувленге те џан те вакерен е апостоленге кај ов уштило таро муле (Мат. 28:5, 9, 10). Освен адава, шај сине џувља да машкар о ученикија со сине помазиме свети духоја ки Педесетница 33 берш а.е. Ако тано аѓаар, тегани шај ола да добинѓе о поклон те керен лафи ко разна чхибја хем те вакерен е јаверенге башо „моќна буќа со керѓа о Девел“ (Дела 1:14; 2:2-4, 11).

13. Со керена о христијанке авдиве, хем сар шај те сикава ленге кај ценинаја лен башо са адава со керена?

¹³ Амаре пхења заслужинена те фалина лен башо са адава со керена ки служба е Јеховаске. Ола поможинена те градинен пе или те одржинен пе амаре објектија, проповединена е манушенге со керена лафи ки јавер чхиб хем служинена сар доброволција ко Бетел. Поможинена ко акцие кеда иси катастрофе, превединена амаре публикацие, хем служинена сар пионерија хем мисионерија. Исто сар о пхраља, о пхења да присуствујнена ки Школа башо пионерија, ки Школа башо полновремена објавителија хем ки Школа Гилеад. Освен адава, о ромња поддржинена пумаре ромен те исполнинен пумаре одговорностија ко собрание хем ки организација. О Јехова денѓа акале пхрален „сар поклон“ те шај те поможинен е јаверенге ко бут начинија (Еф. 4:8). Ама, би овела сине ленге пхаро те керен адава бизи  поддршка таро пумаре ромња. Сар би шај сине те поможине акале пхењенге ко са адава со керена?

14. Со керена о мудра старешине кола со лена ко предвид о лафија таро Псалм 68:11?

¹⁴ О мудра старешине тане свесна кај о пхења „тане бари војска“ доброволција кола со бут шукар проповединена о шукар хабери. (Читин Псалм 68:11.) Адалеске о старешине трудинена пе те сикљон таро пхења. И Абигејл која сој спомниме поупре, бут ценинела кеда о пхраља пучена ла сар шај пошукар те почминен о разговорија ко подрачје. Ој вакерела: „Адава поможинела манге те дикхав кај о Јехова денѓа ман јекх важно тхан ки лескири организација“. Исто аѓаар, о старешине тане свесна кај о духовна зрела пхења шај те поможинен е потерне пхењенге кеда иси лен проблемија (Тит 2:3-5). Чаче амаре пхења заслужинена те ценина лен хем те манга лен!

15. Кеда шај некој ка ваљани те бранинел е пхењен?

¹⁵ Понекогаш, кеда е пхењен иси лен несаве посебна проблемија иси лен потреба некој те бранинел лен (Иса. 1:17). На пример, јекхе удовица или разведиме пхења иси ла потреба некој те керел лафи ко лакоро анав хем те поможинел лаке ко несаве буќа кола со англедер керела лен сине лакоро ром. Несаве попхуре пхењаке шај ка ваљани помош те керел лафи е докторенцар. А несави пхен која со служинела сар пионери а ко исто време керела јавера да теократска задаче, шај иси ла потреба некој те бранинел ла кеда о јавера критикујнена ла адалеске со на накхавела бут време ки служба сар о јавера пионерија. Сар шај те поможина акале пхењенге? Палем, те дикха е Исусескоро пример.

16. Спрема Марко 14:3-9, сар о Исус бранинѓа е Марија?

¹⁶ О Исус спремно бранинела сине пле духовна пхењен кеда некој на хаљола лен сине. На пример, ов бранинѓа е Марија кеда и Марта критикујнѓа ла (Лука 10:38-42). А бранинѓа ла ки јавер да прилика кеда о јавера хољанѓе лаке адалеске со мислинѓе кај анѓа јекх погрешно одлука. (Читин Марко 14:3-9.) О Исус халило соске и Марија керѓа адава хем пофалинѓа ла адалеа со вакерѓа: „Ој керѓа манге шукарипе... Керѓа са со шај сине“. Ов чак пророкујнѓа кај адава шукарипе со керѓа леске ка овел вакердо „сегде кај со ка проповединел пе о шукар хабери“, хем баш акаја статија керела адава. Лескере лафија сигурно бут утешинѓе е Марија! Хем кобор тано интересно адава со о Исус поврзинѓа лакири несебично постапка е проповедибаја кова со ваљани сине те керел пе ко цело свето.

17. Вакер јекх пример кеда би ваљани те бранина јекхе пхења.

¹⁷ Дали ту да бранинеа е пхењен кеда иси лен асавки потреба? Размислин башо акава пример. Несаве објавителија дикхена кај јекх пхен каскоро ром нане е Јеховаскоро сведоко авела касно ко состанокија хем џала песке одма само со ка завршинел и програма. Исто аѓаар дикхена кај бут ретко анела пле чхавен пеа. Адалеске несаве објавителија почминена те критикујнен ла соске мислинена кај ваљани те овел ла цврсто стави хем те овел поупорно кеда керела пе лафи башо лакере чхаве. Ама ола на џанена кај и пхен керела са со шај. Ој нашти те керел о буќа сар ој со мангела хем те анел о конечна одлуке башо лакере чхаве. Со шај те кере кеда шунеа кај некој критикујнела ла? Ако фалинеа е пхења башо адава со керела хем вакереа е јаверенге кобор бут трудинела пе те служинел е Јеховаске, шај те чхинаве е јаверен те критикујнен ла.

18. Ко кола јавера начинија шај те поможина амаре пхењенге?

¹⁸ Шај те сикава е пхењенге кај мангаја лен адалеа со практично ка поможина ленге (1. Јов. 3:18). И Анета која со грижинела пе  сине пле насвале дајаке, вакерела: „Некобор пхраља хем пхења авена сине те грижинен пе ме дајаке те шај ме те завршинав несаве јавера буќа или анена сине аменге хајбаске. Адава уверинѓа ман кај ола мангена ман хем кај сиум дело таро собрание“. И Џоана исто аѓаар добинѓа помош. Јекх пхрал објаснинѓа лаке сар те одржинел пло врда. Ој вакерела: „Шукар тано те џанел пе кај о пхраља хем о пхења грижинена пе баши мли безбедност“.

19. Ко саве јавера начинија о старешине шај те поможинен е пхењенге?

¹⁹ О старешине да дена пестар са те грижинен пе башо е пхењенгере потребе. Ола џанена кај о Јехова очекујнела лендар те понашинен пе шукар е пхењенцар (Јак. 1:27). Адалеске трудинена пе те овен разумна сар о Исус аѓаар со на чхивена правилија ко ситуацие кеда би овела пошукар те сикавен љубезност хем хаљојбе (Мат. 15:22-28). Адалеа со грижинена пе ленге, о старешине поможинена е пхењенге те осетинен кај о Јехова хем лескири организација мангела лен. Кеда о надгледнико тари група проповедибаске дознајнѓа кај и Киа ка селинел пе ко јавер кхер, ов одма организиринѓа некој те поможинел лаке. И Киа вакерела: „Адава керѓа те овел ман похари стрес. Адалеа со охрабринѓе ман хем поможинѓе манге, о старешине јасно сикавѓе манге кај иси ман важно тхан ко собрание хем кај нане те мукхен ман коркори кеда ка аракхљовав ко пхаре ситуацие“.

20-21. Сар шај те сикава кај ценинаја хем кај мангаја са амаре пхењен?

²⁰ Авдиве, ко амаре собранија иси бут вредна пхења кола со заслужинена амари поддршка. Сар со дикхлем таро Исусескоро пример, ка поможина ленге аѓаар со ка накхава ленцар време хем пошукар ка пенџара лен. Шај те сикава кај ценинаја лен хем кај сием благодарна башо адава со керена ки служба башо Јехова. Хем, ако ваљани, спремно ка бранина лен.

²¹ Ко крајо таро пло писмо џи ко Римјања, о апостол Павле спомнинѓа ења пхењен ко анав (Рим. 16:1, 3, 6, 12, 13, 15). Адала џувља сигурно сине охрабриме таро адава со ов поздравинѓа лен хем пофалинѓа лен. Амен да ваљани те поддржина са амаре пхењен ко собрание. Аѓаар ка сикава ленге кај мангаја лен хем кај дикхаја лен сар скапоцено дело тари амари духовно фамилија.