1. So kerena amare phenja ki organizacija, hem save predizvikija isi len? (Dikh i slika tari naslovno strana.)

BUT siem bahtale so isi but phenja kola so trudinena pe ko sobranie! Na primer, ola učestvujnena ko sostanokija hem ki služba. Nesave pomožinena te održinen pe o dvorane hem grižinena pe bašo phralja hem phenja. Džangjola pe, lende da isi len problemija. Nesave grižinena pe pumare pophure roditelenge. Javera trpinena protivibe taro lengere najpaše. A nesave javera daja kola so korkori bajrarena pumare čhaven kerena phari buti te šaj te grižinen pe lenge.

2. Soske valjani te poddržina amare phenjen?

² Soske valjani te poddržina amare phenjen? Adaleske so o sveto avdive na poštujnela sekogaš e džuvlen sar so zaslužinena. A osven adava, i Biblija pottikninela amen te pomožina lenge. Na primer, o apostol Pavle vakergja e phralenge taro sobranie ko Rim te priminen e phenja Fiva hem te „pomožinen lake ko sa so ka valjani lake“ (Rim. 16:1, 2). Keda o Pavle sine farisei, ov sine delo tari jekh grupa manuša kola so mislinena sine kaj o džuvlja vredinena pohari taro murša hem agjaar ponašinena pe sine lencar. Ama, keda ulo hristijani, o Pavle džala sine palo e Isuseskoro primer, hem ponašinela pe sine ljubezno e džuvlencar hem sine le poštovanje sprema lende (1. Kor. 11:1).

3. Sar ponašinela pe sine o Isus e džuvlencar, hem savo stavi sine le sprema o džuvlja so kerena sine e Devleskiri volja?

³ O Isus poštujnela sine sa e džuvlen (Jovan 4:27). Na dikhela sine ko džuvlja sar so dikhena sine o evrejska verska vodačija ko adava vreme. Ustvari ko jekh biblisko priračniko pišinela: „O Isus nikogaš na vakergja nešto  so ponižingja e džuvlen“. O Isus sikavgja kaj posebno poštujnela e džuvlen kola so kerena sine i volja leskere Dadeskiri. Ki lende dikhela sine sar ple phenja, kola so zaedno e muršencar sine delo tari leskiri duhovno familija (Mat. 12:50).

4. So ka dikha ki akaja statija?

⁴ O Isus sekogaš sine spremno te pomožinel e džuvlenge kola so služinena sine e Devleske. Ov ceninela len sine hem braninela len. Te dikha sar šaj te dža palo leskoro primer agjaar so ka grižina amen amare phenjenge.

5. Soske nesave phenjenge tano pharo te arakhen peske društvo ko sobranie?

⁵ Sarine amen, hem phralja hem phenja, isi amen potreba taro šukar društvo. Ama, nesave phenjenge ponekogaš pharo tano te arakhen peske društvo. Soske? Dikh nesave so vakergje. Jekh phen so vikinela pe Džoana * vakerela: „Adaleske so na sium ko brako, but puti na džanava kasaja šaj te ovav paše ko sobranie hem osetinava man kaj na sium but važno adathe“. I Kristina, jekh pionerka koja so selingja pe te šaj te služinel ki pobari mera vakerela: „Keda sian nevi ko sobranie, šaj te osetine tut osameno“. Okola so živinena ki familija kote so o javera nane e Jehovaskere svedokija, šaj te ovel lenge pharo te oven paše ple familijaja, a ko isto vreme šaj nane paše ni e phralencar ni e phenjencar taro sobranie. Nesave phenja šaj osetinena pe korkori soske tane nasvale hem našti te ikljon kher­aldan, ili valjani te grižinen pe nekaske tari pli familija adaleske soj tane nasvale. I Aneta vakerela: „Našti sine te džav keda vikinena man sine te družina amen soske pobaro delo taro vreme me grižinava man sine me dajake“.

6. Sprema Luka 10:38-42, sar o Isus pomožingja e Martake hem e Marijake?

⁶ O Isus nakhavela sine vreme ple duhovna phenjencar hem sine lenge čače amal. Na primer, ov sine amal e Marijaja hem e Martaja, kola so izgleda na sine ko brako. (Čitin Luka 10:38-42.) Ple lafencar hem postapkencar, o Isus sigurno kergja te osetinen pe šukar. Na primer, i Marija osetinela pe sine slobodno te bešel uzo leskere pre sar so kerena sine o učenikija. * A i Marta, koja so holjangja e Marijake adaleske so na pomožinela sine lake, osetinela pe sine slobodno te vakerel e Isuseske so mislinela bašo adava. Ki adaja prilika, ov pomožingja soldujenge te sikljon važna pouke. Isto agjaar, o Isus sikavgja kaj grižinela pe lenge hem lengere phraleske, e Lazareske, adalea so džala sine ki lende ko gosti ko javera da prilike (Jovan 12:1-3). Adaleske, keda o Lazar sine but nasvalo, i Marta hem i Marija džanle kaj šaj te roden o Isus te pomožinel lenge (Jovan 11:3, 5).

7. Sar šaj te ohrabrina amare phenjen?

⁷ Nesave phenjenge, o sostanokija tane jekh taro hari prilike so isi len te oven zaedno e phralencar hem e phenjencar. Adaleske mangaja te koristina adala prilike te kera te osetinen pe šukar, te kera lencar lafi hem te sikava lenge kobor tane amenge važna. I Džoana, koja so spomningjem la poupre, vakerela: „But ohrabrinela man keda o javera falinena man bašo mle komentarija, keda vikinena man te džav lencar zaedno ki služba ili keda sikavena kaj grižinena pe mange ko nesavo javer način“. Amen mora te sikava amare phenjenge kaj tane amenge važna. I Kia vakerela: „Ako na  džava ko sostanok, džanava kaj nekoj ka pišinel mange poraka te pučel man dali sium šukar. Adava sikavela mange kaj mle phralja hem phenja grižinena pe mange“.

8. Ko save javera načinija šaj te ova sar o Isus?

⁸ Isto sar o Isus, amen da šaj te odvojna amenge vreme te družina amen amare phenjencar. Na primer, šaj te kanina len ko gosti ili negde te phira lencar. Keda siem zaedno, mangaja te kera lafi bašo bukja so ohrabrinena (Rim. 1:11, 12). E starešinen valjani te ovel len o isto stavi sar so sine e Isuse. Ov džanlja kaj nekaske šaj te ovel pharo te na ovel ko brako, ama jasno vakergja kaj o trajno bahtalipe na zavisinela ni dali nekoj tano ko brako ni dali isi le čhave (Luka 11:27, 28). Namesto adava, ka ova trajno bahtale ako čhivaja i služba bašo Jehova ko prvo than (Mat. 19:12).

9. Sar šaj o starešine te pomožinen e phenjenge?

⁹ Posebno o starešine valjani te ponašinen pe e džuvlencar sar lengere duhovna phenja hem daja (1. Tim. 5:1, 2). Šukar tano o starešine te odvojnen peske vreme angleder ili palo sostanok te keren lafi e phenjencar. I Kristina vakerela: „Adaleske so kerava sine buti hem sium sine pionerka, sium sine but zafatimi hem jekh starešina manglja te džanel sar uspejnava te kerav sa adava. But sium sine blagodarno so sikavgja kaj grižinela pe  mange“. Keda o starešine redovno odvojnena peske vreme te keren lafi e phenjencar, ola sikavena kaj grižinena pe lenge. * I Aneta, koja soj spomnimi poupre, istakninela jekh korist so sine la taro adava so redovno kerela lafi e starešinencar. Oj vakerela: „Agjaar pošukar zapoznajnava len hem ola da zapoznajnena man. A keda isi man nesavo problemi, polokho mange te rodav lendar pomoš“.

10. So šaj te pomožinel e phenjenge te osetinen pe bahtale?

¹⁰ Sarine amen, bizi razlika dali siem džuvlja ili murša, bahtale siem keda o javera dikhena amare šuže osobine hem vakerena amenge kaj ceninena adava so keraja. Ama, obeshrabrinaja amen ako nikoj na primetinela amare sposobnostija ili adava so keraja. I phen Abigejl koja soj tani pionerka hem nane ko brako priznajnela kaj ponekogaš osetinela pe sar te phene nikoj na primetinela la. Oj vakerela kaj o manuša na džanena la lično, nego sar nekaskiri phen ili nekaskiri čhaj. Adava kerela te osetinel pe sar te phene na dikhjola. I phen Pamela koja so nane ko brako služingja but berša sar misioneri. Pokasno, irangja pe khere te šaj te grižinel pe ple roditelenge. Iako akana isi la poviše taro 70 berš, oj panda tani pionerka. Oj vakerela: „Najviše ohrabrinava man keda o javera vakerena mange kaj ceninena man hem kaj tane blagodarna bašo adava so kerava“.

11. Sar o Isus sikavgja kaj ceninela sine e džuvlen kola so služingje zaedno lea?

¹¹ O Isus ceninela sine i pomoš taro verna džuvlja so služinena sine leske adalea so isi len (Luka 8:1-3). Na samo so dozvolingja lenge te ovel len i čest te služinen leske nego ov isto agjaar sikavela len sine važna čačipa baši e Devleskiri volja. Na primer, ov vakergja lenge kaj ka merel hem ka ovel voskresnimo (Luka 24:5-8). Ov spremingja akale džuvlen, isto sar so spremingja e apostolen, bašo nevolje so adžikerena len sine (Mar. 9:30-32; 10:32-34). Hem iako o apostolija našle keda astargje e Isuse, nesave džuvlja so služingje lea sine uzi leste keda mulo ko stubo (Mat. 26:56; Mar. 15:40, 41).

12. Save zadače dengja o Isus e džuvlenge?

¹² O Isus dengja važna zadače e džuvlenge. Na primer, nesave verna džuvlja sine o prva so dikhle e Isuse keda voskresningja. Ov vakergja adale džuvlenge te džan te vakeren e apostolenge kaj ov uštilo taro mule (Mat. 28:5, 9, 10). Osven adava, šaj sine džuvlja da maškar o učenikija so sine pomazime sveti duhoja ki Pedesetnica 33 berš a.e. Ako tano agjaar, tegani šaj ola da dobingje o poklon te keren lafi ko razna čhibja hem te vakeren e javerenge bašo „mokjna bukja so kergja o Devel“ (Dela 1:14; 2:2-4, 11).

13. So kerena o hristijanke avdive, hem sar šaj te sikava lenge kaj ceninaja len bašo sa adava so kerena?

¹³ Amare phenja zaslužinena te falina len bašo sa adava so kerena ki služba e Jehovaske. Ola pomožinena te gradinen pe ili te održinen pe amare objektija, propovedinena e manušenge so kerena lafi ki javer čhib hem služinena sar dobrovolcija ko Betel. Pomožinena ko akcie keda isi katastrofe, prevedinena amare publikacie, hem služinena sar pionerija hem misionerija. Isto sar o phralja, o phenja da prisustvujnena ki Škola bašo pionerija, ki Škola bašo polnovremena objavitelija hem ki Škola Gilead. Osven adava, o romnja poddržinena pumare romen te ispolninen pumare odgovornostija ko sobranie hem ki organizacija. O Jehova dengja akale phralen „sar poklon“ te šaj te pomožinen e javerenge ko but načinija (Ef. 4:8). Ama, bi ovela sine lenge pharo te keren adava bizi  poddrška taro pumare romnja. Sar bi šaj sine te pomožine akale phenjenge ko sa adava so kerena?

14. So kerena o mudra starešine kola so lena ko predvid o lafija taro Psalm 68:11?

¹⁴ O mudra starešine tane svesna kaj o phenja „tane bari vojska“ dobrovolcija kola so but šukar propovedinena o šukar haberi. (Čitin Psalm 68:11.) Adaleske o starešine trudinena pe te sikljon taro phenja. I Abigejl koja soj spomnime poupre, but ceninela keda o phralja pučena la sar šaj pošukar te počminen o razgovorija ko podračje. Oj vakerela: „Adava pomožinela mange te dikhav kaj o Jehova dengja man jekh važno than ki leskiri organizacija“. Isto agjaar, o starešine tane svesna kaj o duhovna zrela phenja šaj te pomožinen e poterne phenjenge keda isi len problemija (Tit 2:3-5). Čače amare phenja zaslužinena te cenina len hem te manga len!

15. Keda šaj nekoj ka valjani te braninel e phenjen?

¹⁵ Ponekogaš, keda e phenjen isi len nesave posebna problemija isi len potreba nekoj te braninel len (Isa. 1:17). Na primer, jekhe udovica ili razvedime phenja isi la potreba nekoj te kerel lafi ko lakoro anav hem te pomožinel lake ko nesave bukja kola so angleder kerela len sine lakoro rom. Nesave pophure phenjake šaj ka valjani pomoš te kerel lafi e doktorencar. A nesavi phen koja so služinela sar pioneri a ko isto vreme kerela javera da teokratska zadače, šaj isi la potreba nekoj te braninel la keda o javera kritikujnena la adaleske so na nakhavela but vreme ki služba sar o javera pionerija. Sar šaj te pomožina akale phenjenge? Palem, te dikha e Isuseskoro primer.

16. Sprema Marko 14:3-9, sar o Isus braningja e Marija?

¹⁶ O Isus spremno braninela sine ple duhovna phenjen keda nekoj na haljola len sine. Na primer, ov braningja e Marija keda i Marta kritikujngja la (Luka 10:38-42). A braningja la ki javer da prilika keda o javera holjangje lake adaleske so mislingje kaj angja jekh pogrešno odluka. (Čitin Marko 14:3-9.) O Isus halilo soske i Marija kergja adava hem pofalingja la adalea so vakergja: „Oj kergja mange šukaripe... Kergja sa so šaj sine“. Ov čak prorokujngja kaj adava šukaripe so kergja leske ka ovel vakerdo „segde kaj so ka propovedinel pe o šukar haberi“, hem baš akaja statija kerela adava. Leskere lafija sigurno but utešingje e Marija! Hem kobor tano interesno adava so o Isus povrzingja lakiri nesebično postapka e propovedibaja kova so valjani sine te kerel pe ko celo sveto.

17. Vaker jekh primer keda bi valjani te branina jekhe phenja.

¹⁷ Dali tu da braninea e phenjen keda isi len asavki potreba? Razmislin bašo akava primer. Nesave objavitelija dikhena kaj jekh phen kaskoro rom nane e Jehovaskoro svedoko avela kasno ko sostanokija hem džala peske odma samo so ka završinel i programa. Isto agjaar dikhena kaj but retko anela ple čhaven pea. Adaleske nesave objavitelija počminena te kritikujnen la soske mislinena kaj valjani te ovel la cvrsto stavi hem te ovel pouporno keda kerela pe lafi bašo lakere čhave. Ama ola na džanena kaj i phen kerela sa so šaj. Oj našti te kerel o bukja sar oj so mangela hem te anel o konečna odluke bašo lakere čhave. So šaj te kere keda šunea kaj nekoj kritikujnela la? Ako falinea e phenja bašo adava so kerela hem vakerea e javerenge kobor but trudinela pe te služinel e Jehovaske, šaj te čhinave e javeren te kritikujnen la.

18. Ko kola javera načinija šaj te pomožina amare phenjenge?

¹⁸ Šaj te sikava e phenjenge kaj mangaja len adalea so praktično ka pomožina lenge (1. Jov. 3:18). I Aneta koja so grižinela pe  sine ple nasvale dajake, vakerela: „Nekobor phralja hem phenja avena sine te grižinen pe me dajake te šaj me te završinav nesave javera bukja ili anena sine amenge hajbaske. Adava uveringja man kaj ola mangena man hem kaj sium delo taro sobranie“. I Džoana isto agjaar dobingja pomoš. Jekh phral objasningja lake sar te održinel plo vrda. Oj vakerela: „Šukar tano te džanel pe kaj o phralja hem o phenja grižinena pe baši mli bezbednost“.

19. Ko save javera načinija o starešine šaj te pomožinen e phenjenge?

¹⁹ O starešine da dena pestar sa te grižinen pe bašo e phenjengere potrebe. Ola džanena kaj o Jehova očekujnela lendar te ponašinen pe šukar e phenjencar (Jak. 1:27). Adaleske trudinena pe te oven razumna sar o Isus agjaar so na čhivena pravilija ko situacie keda bi ovela pošukar te sikaven ljubeznost hem haljojbe (Mat. 15:22-28). Adalea so grižinena pe lenge, o starešine pomožinena e phenjenge te osetinen kaj o Jehova hem leskiri organizacija mangela len. Keda o nadgledniko tari grupa propovedibaske doznajngja kaj i Kia ka selinel pe ko javer kher, ov odma organiziringja nekoj te pomožinel lake. I Kia vakerela: „Adava kergja te ovel man pohari stres. Adalea so ohrabringje man hem pomožingje mange, o starešine jasno sikavgje mange kaj isi man važno than ko sobranie hem kaj nane te mukhen man korkori keda ka arakhljovav ko phare situacie“.

20-21. Sar šaj te sikava kaj ceninaja hem kaj mangaja sa amare phenjen?

²⁰ Avdive, ko amare sobranija isi but vredna phenja kola so zaslužinena amari poddrška. Sar so dikhlem taro Isuseskoro primer, ka pomožina lenge agjaar so ka nakhava lencar vreme hem pošukar ka pendžara len. Šaj te sikava kaj ceninaja len hem kaj siem blagodarna bašo adava so kerena ki služba bašo Jehova. Hem, ako valjani, spremno ka branina len.

²¹ Ko krajo taro plo pismo dži ko Rimjanja, o apostol Pavle spomningja enja phenjen ko anav (Rim. 16:1, 3, 6, 12, 13, 15). Adala džuvlja sigurno sine ohrabrime taro adava so ov pozdravingja len hem pofalingja len. Amen da valjani te poddržina sa amare phenjen ko sobranie. Agjaar ka sikava lenge kaj mangaja len hem kaj dikhaja len sar skapoceno delo tari amari duhovno familija.