1. I yini leswi vamakwezru va xisati va swi yentxaka akuva va seketela nhlengeletanu, kambe hi swini swikazratu leswi vanyingi ka vone va kumanaka naswone? (Vona xifaniso lexi nga ka kapa.)

HI NYONXA ngopfu swinene hi ku va ni vamakwezru va xisati lava va yentxaka hinkwaswu leswi va nga swi kotaka a bandleni! Hi xikombiso, vone va kumeka a mintlhanganwini va tlhela va hlengela a ku zrezreni ka madzrungula lamanene. Van’we va pfunisa ka ku lungisa Tiyindlu ta Mfumu, nakone va kombisa ku zron’weka hi vamakwezru van’wana. I ntiyiso leswaku va kumana ni swikazratu. Van’we va hlayisa vapswele vavu lava kuliki hi ntanga. Na kasi van’wana va kanetiwa hi vandangu wavu. Nakone van’wana va wundla vana na va li wuswavu nakone va boheka ku tizra ngopfu akuva va va wundla.

2. Ha yini hi fanela ku seketela vamakwezru va xisati?

² Ha yini hi fanela ku seketela vamakwezru va xisati a bandleni? Hikusa a hi vhanu hinkwavu va va kombaka xihlonipho lexi va fanelaka. Handle ka leswo, Bibele dzri hi kutxa akuva hi va seketela. Hi xikombiso, mupostola Pawulo a kutxe bandla dzra le Roma akuva dzri yamukela Febi ni ku ‘mu nyika ku hinkwaswu leswi a a ta swi djula’. (Ro 16:1, 2) Ku fana ni vafarisi van’wana, swi tikomba na Pawulo a a vona va xisati swanga vhanu lava nga pfunikiki ntxhumu. Kambe, ntsrhaku ka loko a ndzruluke mukriste, a sungule ku yetisela Yesu nakone a sungule ku va komba xitxhavu ni wunene.​—1Ko 11:1.

3. Xana Yesu a a komba va xisati xihlonipho lexi xi va fanelaka hi ndlela yini, nakone a a va vonisa kuyini lava a va yentxa ku zrandzra ka Tatana wakwe?

³ Yesu Kriste a a komba va xisati xihlonipho lexi xi va fanelaka. (Yh 4:27) Yene a a nga va voni hi lani vazrangeli va wukhongoti va le nkameni lowo a va va vona ha kone. A enciclopédia dzra kukazri ledzri khanelaka hi Bibele dzri li: “Yesu a ngi ngi hlaya ntxhumu lexi a xi ta khunguvanyisa kumbe xi yentxa va xisati va voniwa swanga lava nga pfunikiki ntxhumu.” Yesu a a kazrateka ngopfu hi vavasati lava a va yentxa ku zrandzra ka Tatana wakwe. A a va vona swanga vamakwavu va xisati nakone a a va patsra loko a khanela hi  vavanuna van’wana lava a a va vona swanga swizro swa ndangu wakwe.​—Mt 12:50.

4. I yini leswi hi taka swi vona ka nhloko-mhaka leyi?

⁴ Minkama hinkwayu Yesu a a tibekiseli ku pfuna vavasati lava a va tizrela Xikwembu Nkulukumba. A yentxi leswo hi ku va nyika lisima ni ku va seketela. A hi voneni leswaku hi nga mu yetiselisa kuyini Yesu ka ku nyika lisima vamakwezru va xisati.

5. Ha yini vamakwezru van’wana va xisati swi va kazratela ku va kun’we ni vhanu van’wana?

⁵ Hinkwezru, ha swi vilela ku va kun’we ni van’wana. Kambe minkama yin’wana, vamakwezru van’wana va xisati swa va kazratela ku yentxa leswo. Ha yini? Vona leswi van’wana va swi hlayiki. Jordan * a li: “Leswi ni nga txhatangakiki, hakanyingi swa ni kazratela ku vona ntizro wanga a bandleni; swi yentxa ingiki a ni na ntizro.” Kristen, lweyi a nga phayona ledzri zruzreliki a mbangwini wun’wana akuva dzri yentxa leswi yengetelekiki a ntizrweni wa nsimu, a li: “Loko u txintxa u ya ka bandla dzrin’wana, swi nga yentxeka u titwa na u li wuswaku.” Vamakwezru van’wana va titwa hi ndlela leyi fanaka. Lava va nga ndangwini lowu vhanu va kone va nga liki va wukhongoti byin’we, va nga ha titwa na va nga li xiyenge xa lisima a ndangwini hi nkama wun’we va nga ha titwa na va li kule ni vamakwezru a bandleni. Vamakwezru va xisati lava nga humikiki kaya hi mhaka ya mavabyi kumbe hi leswi va fanelaka ku hlayisa xizro xa ndangu lexi vabyaka va nga ha titwa na va li wuswavu. Annette a li: “Mamana wanga a a vilela mpfunu wanga ka mintxhumu hinkwayu. Hi mhaka ya leswo, a ni nge na ku pfumela loko vamakwezru va ni zramba akuva ni ya ku hungateni.”

6. Hi ku ya hi buku dzra Luka 10:38-42, xana Yesu a pfune Mariya na Marta hi ndlela yini?

⁶ Yesu a a tinyika nkama wa ku va kun’we ni vamakwezru va xisati. Yene a a li munghanu wa xihlayelamfuzri ku vone. Hi xikombiso, yanakanya hi wunghanu lebyi a a li na byone na Marta na Mariya. Swi tikomba na vone a va nga txhatanga. (Dondzra Luka 10:38-42.) Yesu a a khanela a tlhela a yentxa mintxhumu leyi a yi va yentxa va titwa na va ntsrhunxekile loko va li na yene. Mariya a nga dananga ku tsrhama kusuhi na Yesu, hi lani mudondzrisiwa mun’wana ni mun’wana a a yentxa ha kone. * Nakone Marta a titwe na a ntsrhunxekile ku byela Yesu leswaku a a khunguvanyekile hi leswi Mariya a a nga mu pfuni ku lulamisela swakuda. Hi nkama luwani wa ku bula, Yesu a dondzrise Marta na Mariya ndondzro ya lisima ngopfu swinene. Nakone a ku vanga khambi dzra ku sungula na Yesu a va pfuxela. Yene a yentxe leswo hi makhambi manyingi, a kombisa leswaku a a va zrandzra ngopfu, Marta, Mariya ni makwavu Lazaru. (Yh 12:1-3) Nkama lowu Lazaru a nga sungula ku vabya ngopfu swinene, Mariya na Marta a va ni ku dumba ka leswaku Yesu a a ta va pfuna.​—Yh 11:3, 5.

7. Xana hi nga kutxa vamakwezru va xisati hi ndlela yini?

⁷ Ka vamakwezru van’wana va xisati, ko va mintlhanganwini ntsena va nga ni mukhandlu wa ku va kun’we ni vamakwezru van’wana. Xileswo, hi fanela ku londzrovota mukhandlu wolowo akuva hi va yamukela ha hombe, hi vulavula na vone ni ku va byela leswaku ha zron’wa ha vone. Jordan, lweyi hi khaneliki ha yene, a li: “Ni titwa na ni nyonxile swinene loko vamakwezru va ni tlangela hi kola ka nhlamulo leyi ni yi nyikeliki, loko va ni zramba akuva ni huma na vone nsimu kumbe loko va kombisa hi ndlela ya kukazri leswaku va ni mhaka na mine.” Hi fanela ku komba vamakwezru lava va xisati leswaku i va lisima ka hine. Kia a li: “Loko ni nga yi mintlhanganwini, na swi tiva leswaku ni ta zrumeliwa mensaje va ni vutisa leswaku swo yini. Leswo swi  ni yentxa ni tiyiseka leswaku vamakwezru va le bandleni va ni mhaka na mine.”

8. Hi tini tindlela tin’wana leti hi nga yetiselaka Yesu ha tone?

⁸ Ku fana na Yesu, hi nga tinyika nkama wa ku va kun’we ni vamakwezru va xisati. Swi ngo yini u va zramba akuva va da kumbe ku hungata na wene? Ka minkama yoleyo, khanela hi mintxhumu leyi kutxaka. (Ro 1:11, 12) Loko u li nkulu wa bandla, dzrimuka xikombiso xa Yesu minkama hinkwayu. Yene a a swi tiva leswaku ka van’wana, ku va mhunu lweyi a nga txhatangakiki a swi nabyali. Kambe a swi beke livaleni leswaku akuva mhunu a nyonxa a swi vileli leswaku a txhata kumbe a va ni vana. (Lk 11:27, 28) Hi ntiyiso wa kone, leswi nga mu nyikaka ku nyonxa i ku beka ntizro wa Yehovha wu va wa ku sungula a wuton’wini byakwe.​—Mt 19:12.

9. I yini leswi vakulu va bandla va nga swi yentxaka akuva va pfuna vamakwezru va xisati?

⁹ Vakulu hi vone ngopfungopfu va fanelaka ku vona vamakwezru va xisati va le bandleni swanga vamakwavu ni vamamana hi tlhelo dzra moya. (1Tm 5:1, 2) I swinene leswaku va tinyika nkama akuva va bulisana ni vamakwezru va xisati loko mintlhanganu yi nga si na sungula kumbe loko yi hela. Kristen a li: “Nkulu wa kukazri a vone leswaku a ni tsrhama na ni khomekile nakone a ni vutisile leswaku i yini ni swi yentxaka siku ni siku. Ni nyonxe ngopfu loko ni vone leswaku awa kazrateka ha mine.” Loko vakulu va bandla va tinyika nkama wa ku bulisana ni vamakwezru va xisati, va kombisa leswaku va ni mhaka na  vone. *Annette, lweyi hi buliki ha yene, a khanela hi dzrin’we dzra mabindzru ya ku bulisana ni vakulu, a li: “Leswo swi ni pfuna ku tiva vakulu ha hombe, nakone na vone va ni tiva ha hombe. Xileswo, loko ni kumana ni xikazratu, ni swi vona na swi ni nabyalela ku kombela mpfunu ka vone.”

10. I yini leswi swi nga pfunaka vamakwezru va xisati akuva va titwa ha hombe?

¹⁰ Hinkwezru, hi titwa na hi nyonxile loko vambeni va nyika lisima ntizro lowu hi wu yentxaka ni wuswikoti byezru. Hi tlhelo dzrin’wana, loko ku nga na mhunu lweyi a xiyaka wuswikoti byezru ni ku tikazrata kwezru, leswo swi nga ha hi godolisa. Abigail, lweyi a nga phayona dzra nkama hinkwawu a hlaya leswaku minkama yimbeni a titwa ingiki a nga voniwi. Yene a li: “Ka van’wana, no va ntsena makwavu wa lwiyani kumbe n’wana wa manyana. Minkama yin’wana ni titwa ingiki a ni voniwi.” Hi tlhelo dzrin’wana, vona leswi hlayiwiki hi makwezru Pam. Yene a tizre malembe manyingi swanga muzrumiwa lweyi a nga txhatangakiki. Ntsrhaku, a tlhele kaya akuva a ya hlayisa vapswele. Namunhla wa siku a ni ku tlula 70 wa malembe nakone a ha tama a tizra swanga phayona. Pam a li: “Leswi swi ni pfunaka hi loko van’wana va ni byela leswaku va wu nyika lisima ntizro lowu ni wu yentxaka.”

11. Xana Yesu a swi kombise hi ndlela yini leswaku a a va nyika lisima vavasati lava a va mu seketela a ntizrweni wakwe wa ku zrezra?

¹¹ Vavasati van’wana va ku dumbeka a va pfuna Yesu hi leswi ‘faka ve naswu’ nakone yene a a swi nyika lisima leswo. (Lk 8:1-3) Yesu a a nga va nyiki mukhandlu lowo ntsena, kambe a a tlhela a va pfuletela mintiyiso ya ku yenta mayelanu ni ku zrandzra ka Xikwembu Nkulukumba. Hi xikombiso, a va byele leswaku a a ta fa a tlhela a pfuxiwa. (Lk 24:5-8) Hi lani a yentxiki ha kone ka vapostola, Yesu a lulamisele valandzreli vakwe va xisati akuva va lwisana ni swikazratu. (Mr 9:30-32; 10:32-34) I swinene ku dzrimuka leswaku, nkama lowu va nga khoma Yesu, vapostola vakwe va tsrutsrumile. Kambe loko a li kusuhi ni ku fa a mhandzrini ya nxaniso, vavasati van’wana lava a va mu seketela a va li kusuhi na yene.​—Mt 26:56; Mr 15:40, 41.

12. Hi yini mintizro leyi Yesu a yi nyikiki va xisati akuva va yi yentxa?

¹² Yesu a nyike va xisati mintizro ya lisima swinene. Hi xikombiso, vhanu va ku sungula lava va voniki Yesu loko a pfuxiwile, ku ve vavasati va ku dumbeka. Nakone Yesu a va nyike ntizro wa ku ya byela vapostola leswaku a a pfuxiwile. (Mt 28:5, 9, 10) Handle ka leswo, swi nga yentxeka a ku li ni vavasati va kukazri loko moya wa ku xwenga wu txhululiwa hi pentekoxta dzra 33 Nguveni Yezru, (N.Y.). Loko swi ve tanu, vamakwezru lavo va xisati va nga va va yamukele hi hlolana wuswikoti bya ku vulavula hi tindzrimi tin’wana. Xileswo, va hambe xiyenge ka ku byela van’wana ‘timhaka letikulu ta Xikwembu Nkulukumba’.​—Min 1:14; 2:2-4, 11.

13. I yini leswi vamakwezru va xisati va swi yentxelaka Yehovha namunhla, nakone u nga swi kombisisa kuyini leswaku u nyika lisima hinkwaswu leswi va swi yentxaka?

¹³ Vamakwezru va xisati va fanela ku khensiwa hi mintizro hinkwayu leyi va yi yentxelaka Yehovha. Leswo swi patsra ntizro wa ku yaka ni ku lungisa Tiyindlu ta Mfumu, wa ku pfunisa ka mintlawa ya tindzrimi tin’wana ni ntizro wa Betele. Vone va pfunisa ka ntizro wa ku pfuna lava weliwiki hi timhangu, wa ku ndzrulutela mabuku nakone va tizra swanga maphayona ya nkama hinkwawu ni ku tizra swanga vazrumiwa. Ku fana ni vamakwezru va xinuna, vamakwezru va xisati va ya ka Xikole xa Maphayona, ka Xikole xa Vazrezri va Mfumu ni ka Xikole xa Giliyadi. Handle ka leswo, lava va txhatiki va pfunisa vanuna vavu akuva va hetisisa swiyavelo swavu swa bandla ni swa nhlengeletanu. Vamakwezru lavo vo kota ku va ‘swihiwa’ hi leswi va seketeliwaka hi vasati vavu. (Ef 4:8) Xana ku ni leswi u nga swi yentxaka akuva u seketela vamakwezru lavo va xisati ka hinkwaswu leswi va swi yentxaka?

14. Hi ku ya hi Amapsalma 68:11, i yini leswi vakulu lava nga ni wutlhazri va swi yentxaka?

 ¹⁴ Vamakwezru va xisati va hamba ‘yimpi’ kumbe khandzra ledzrikulu dzra vatizri lava tiyimiseliki. Hi ntolovelo vone i vazrezri lava va nga ni wuswikoti. (Dondzra Amapsalma 68:11.) A vakulu va bandla lava va nga ni wutlhazri va swi vona leswo, nakone va djula tindlela ta ku dondzra ka vamakwezru lavo va xisati. Abigail, lweyi hi sunguliki hi khanela ha yene, a titwa na a kutxeka loko vamakwezru va mu vutisa hi tindlela leti va nga humelelaka ha tone loko va sungula mabulu a nsin’wini. Yene a li: “Leswo swi ni pfuna ku vona leswaku Yehovha a ni nyike ntizro a bandleni.” Handle ka leswo, vakulu va swi xiya leswaku vamakwezru lavo va xisati va ku dumbeka, va humelela ngopfu loko va pfuna vampswha lava kumanaka ni swikazratu. (Ti 2:3-5) Nakunene, vamakwezru va xisati va faneliwa hi lizrandzru dzrezru ni ku tlangeliwa kwezru!

15. Hi swini swiyimu leswi vamakwezru va xisati va nga ha djulaka ku yimeleliwa ka swone?

¹⁵ Minkama yin’wana, vamakwezru va xisati va kumana ni swikazratu swa ku kongoma nakone va djula mhunu akuva a va yimelela. (Eza 1:17) Hi xikombiso, swi nga yentxeka makwezru wa kukazri wa xisati lweyi a feliwiki kumbe lweyi a tsrhikiwiki hi nuna wakwe a djula ku yimeleliwa kumbe ku pfuniwa ka mintizro ya kukazri leyi nuna wakwe a a yi yentxa. Makwezru wa kukazri wa xisati lweyi a kuliki hi ntanga a nga ha djula mpfunu akuva a khanela ni Dotori. Kumbe swi nga yentxeka phayona dzra kukazri ledzri tizraka ka mintizro yin’wana a nhlengeletanwini dzri djula ku yimeleliwa loko van’wana va dzri solasola hi leswi dzri kalaka dzri nga koti ku huma nsimu ku fana ni maphayona man’wana. Hi swini swin’wana leswi hi nga swi yentxaka akuva hi pfuna vamakwezru va xisati? A hi tlheleni hi vona xikombiso xa Yesu.

16. Hi ku ya hi Marka 14:3-9, xana Yesu a yimelele Mariya hi ndlela yini?

¹⁶ Yesu a a hatla a yimelela vamakwavu va xisati hi tlhelo dzra moya loko vhanu vambeni va va solasola. Hi xikombiso, Yesu a yimelele Mariya loko Marta a khanele swa ku biha ha yene. (Lk 10:38-42) A tlhele a yimelela Mariya loko van’wana va hlaye leswaku yene a a teke xiboho lexi a xi nga li xinene. (Dondzra Marka 14:3-9.) Yesu a twisise leswi a swi li mbilwini ya Mariya nakone a mu kulungelile, a ku: ‘A ndzri tizreli ntizro lowunene . . . . A yentxi leswi a swi kotiki.’ Yesu a tlhele a profeta a ku: ‘Hinkwaku lomu evhangeli dzri taka hlayiwa kone, a misaveni hinkwayu, leswi a swi yentxiki naswone swi ta hlayiwa, akuva a dzrimukiwa ha swone.’ Nakone leswo hi leswi xidondzro lexi xi swi yentxaka swoswi. Handle ka ku ganaganeka, mazritu ya Yesu ma kutxe Mariya ntsrhaku ka loko va mu solasole swinene. Nakone leswi nyonxisaka hi leswaku Yesu a tizrise leswi Mariya a swi yentxiki akuva a khanela hi ndlela leyi a ntizro wa ku zrezra a wu ta hangalaka ha yone a misaveni hinkwayu.

17. Kombisa ndlela yin’we leyi u nga yimelelaka makwezru wa xisati ha yone.

¹⁷ Xana wa va yimelela vamakwezru va xisati loko swi vileleka? Hi xikombiso, yanakanya hi xiyimu lexi: A bandleni dzraku, ku ni makwezru lweyi a nga ni nuna lweyi a nga liki mupfumeli. Vazrezri van’wana va xiya leswaku makwezru lweyo a talisa ku xwela a mintlhanganwini nakone a hatla a huma loko mintlhanganu yi hela. Handle ka leswo, makwezru lweyo a ngi ngi buya ni vanakwe. Xileswo, vazrezri va sungula ku mu solasola, va ku: ‘Ha yini a nga yimi a tiya a khanela ni nuna wakwe akuva a mu pfumelela ku buya ni vana a mintlhanganwini?’ Kambe, hi ntiyiso wa kone, makwezru lweyo a yentxa hinkwaswu leswi a nga swi kotaka. A hi yene a lawulaka hi ku helela leswi a fanelaka ku swi yentxa minkama hinkwayu nambi ku teka swiboho mayelanu ni vana. I yini leswi u nga swi yentxaka akuva u mu yimelela? Mu kulungeli makwezru lweyo hi kola ka mintxhumu hinkwayu leyi a yi yentxaka u tlhela u khanela ni van’wana hi mintxhumu leyinene leyi a yi yentxaka. Hi ndlela leyo, u ta swi kota ku helisa mabulu lawa ma nga liki manene.

18. Hi tini tindlela tin’wana leti hi nga pfunaka vamakwezru va xisati ha tone?

 ¹⁸ Hi nga tlhela hi kombisa ku zron’weka kwezru hi vamakwezru va xisati hi ku va pfuna hi swiyentxo. (1Yh 3:18) Annette, makwezru wa xisati lweyi a a hlayisa mamana wakwe lweyi a a vabya, a li: “Vamakwezru van’wana a va buya kaya kwanga akuva va ta ni hlayiselanyana mamana wanga, kumbe va buyisa swakuda. Ni titwe na ni zrandzriwa ni tlhela ni titwa na ni li xiyenge xa bandla.” Jordan na yene a pfuniwile. Makwezru mun’wana a mu pfune ku tiva tindlela tin’wana leti a nga lungisaka movha wakwe ha tone. Yene a li: “Swa nyonxisa ku tiva leswaku vamakwezru va ni mhaka ni wuhlayiseki byanga.”

19. Vakulu va nga pfuna vamakwezru va xisati hi tindlela tini?

¹⁹ Hi ndlela leyi fanaka, vakulu va bandla va fanela ku hlayisa vamakwezu va xisati. Vone va swi tiva leswaku Yehovha a djula leswaku vamakwezru va xisati va hlayiseka. (Yk 1:27) Va fanela ku dzringanisela ku fana na Yesu, a va fanelanga ku tsrhamela ku beka milawu ka mintxhumu leyi swi nga vilelekiki. (Mt 15:22-28) Loko vakulu va va va ku sungula ka ku nyikela mpfunu, vamakwezru va xisati va kota ku vona ndlela leyi Yehovha kun’we ni nhlengeletanu va nga ni mhaka na vone ha yone. Kia, lweyi hi khaneliki ha yene, a a vilela ku txintxa muti. Loko mulaviseli wa nsimu wa ntlawa wakwe a swi tivile, a hatle a yentxa malulamiselo akuva a mu pfuna. Kia a li: “Leswo swi ni pumbeli ku hlatiyela. Mazritu ya vakulu ni mpfunu lowu va ni nyikiki wone, swi ni yentxi ni titwa na ni li xiyenge xa lisima a bandleni, na swi tiva leswaku nambi ni le ka xiyimu xa ku kazrata a ni wuswanga.”

20-21. Xana u nga komba vamakwezru va xisati leswaku wa va nyika lisima hi ndlela yini?

²⁰ A mabandleni yezru namunhla, hi kuma swikombiso swa vamakwezru vanyingi va xisati lava va faneliwaka hi mpfunu wezru. Nakone hi lani hi dondzriki ha kone ka Yesu Kriste, hi fanela ku va pfuna hi ku va kun’we na vone ni ku va tiva ha hombe. Hi fanela ku tlhela hi va komba leswaku ha swi nyika lisima hinkwaswu leswi va swi yentxaka a ntizrweni wa Xikwembu Nkulukumba. Nakone hi wugamu, hi fanela ku va yimelela loko swi vileleka.

²¹ Ka mazritu yakwe ya wugamu ka papela ledzri a dzri tsraleliki va le Roma, mupostola Pawulo a hlaye mavito ya vamakwezru va xisati lava tlhasaka 9 wa vone. (Ro 16:1, 3, 6, 12, 13, 15) Handle ka ku ganaganeka, vamakwezru lavo va xisati va titwe na va kutxekile loko va yingela papela ledzro dzra Pawulo ni ndlela leyi a a va losa ni ku va kulungela ha yone. Ku fana na Pawulo, seketela vamakwezru va xisati hinkwavu a bandleni dzraku. Hi ndlela leyo, u ta va komba leswaku va hamba xiyenge xa lisima ngopfu swinene ka ndangu wezru wa moya.