1. Okotshɔ wɔkɔnge wankaana ɔpɛyɛwɔ l’olonghanyelo, ko ekakasano wɛkɔnge wepomana l’efula kɛwɔ? (Lenda n’tshango djelá loposo.)

TOLEKƆ l’osasa efula djɛ mba wankana yekamba la wolo w’efula l’otshumano! Djɔmbɔmba, iwɔ mpɛyɛka wa kɔmatɛrɛ lá nsanghanyɛ edjinge iwɔ mpoposanyɛka la ndakanyɛka losango lɔ wɔlɔ. Amɔtshi nkotshɛka djɛ ndɔngɔsɔla Mvulu y’Onkfumi, edjinge iwɔ ndakiyanyɛka lá n’kambo djɛ wananyɔ la wankaana yɛwɔ. Koko, iwɔ mpomanaka l’ekakasano. Amɔtshi walama ambotshi wawɔ wambotshunda. Ankina wa kfulumeyɛ ndjolo yime ase nkfumbo yɛwɔ. Edjinge ankina walekɔ ambotshi wa m’polo, wakamba la wolo djɛ nkotshɛ ehomba wɛ wana wawɔ.

2. Ladjikɛnge oyɛso ladjɛ nangha la wolo djɛ nsuka wankaana yɛso?

² Ladjikɛnge oyɛso ladjɛ nangha la wolo djɛ nsuka wa nkaana yɛso? Ladjikɛnde andja wanɛ wapapɛyɛ wamato nɛmɔ djɛlama la wɔ. Lonkina, Bible ntokembɛka djɛ ndasuka. Ndjɔmbɔmba, ɔpɔstɔlɔ Poolo ashimelaka otshumano w’ase Ɔrɔma djɛ ndongola Foebe edjinge ‘ndɔpɛyɛ okotshɔ onkfumɔ woyɛnde la djonyi.’ (Ɔrɔ. 16:1, 2) Etengo ndayalaka Ofarisɛ, Poolo afulaka lá n’kfumbo ndj’anto watɔsaki wamato la ntshina. Koko, wina windakome Okristo nde okolaka Yeso edjinge awɔsaki la nɛmɔ la ananghelaki akambo la ngandji.​—1 Kɔ. 11:1.

3. Wopo wɔkɔnge Yeso ndananghelaka wamato akambo, edjinge wopo wɔkɔnge Yeso ndɔsaka wamato wananghaki ɛkɔpa kɛ Ndjambe?

³ Yeso ɔsaki wamato ankfumɔ la nɛmɔ la ananghelaki akambo la ngandji. (Dj. 4:27) Nde atɔsaki wamato etengo ewandji wɛ n’kɛlɛsiya dj’ase Juda iyawɔsaka. Lá nsɔsɔlɔ, onkanda ɔmɔtshi wopakisola Bible ntepelaka ante: “Lako loshi lɔ Yeso ndatepela n’kambo djɛ nyɔnyɔla wamato.” Koko, Yeso alɛmɛyɛki wamato wananghaki ɛkɔpa kɛ Papa kɛnde. N’kambo n’tshɔ nsakisola djɛ Yeso awɔsaki etengo wankaana yɛnde edjinge awalaka l’ɔnɔnghɔ w’ampame yɛndɔsaka etengo ase nkfumbo kɛnde kɛ nyuma.​—Mat. 12:50.

4. Kɛkɔnge kɔkɔpaso nyɛna lá djamba djɛnɛ?

⁴ Yeso ayalaki wina tshɛ entshupa djɛ nkotshɛ wankaana yɛnde  yelá nyuma. Nde ɛnyɛki djɛ nde ndawɔsaka la ntshina edjinge aselaki. Nyontshɔ tokolenda wopo wokokaso ndjokola Yeso lá nyɛnyɛ dj’iso ndjilaka wakaana yɛso yimba.

5. Ladjikɛnge ankaana imɔtshi oyalakawɔ l’okakasano djɛ mba ntombe y’oyɛwɔ la djonyi?

⁵ Isankfumɔ, wananyɔ edjinge wankaana, tolekɔ la djonyi djɛ mba ntombe yɛ wɔlɔ. Koko lá wina ɛmɔtshi, wankaana nkoka ndjala l’okakasano wɔ mba ntombe yɛ wɔlɔ yoyɛwɔ la djonyi. Ladjikɛnge? Kolenda kɔmatɛrɛ yɛnɛ. Nkaana kɛmɔtshi k’etawɔ Jordan * atepelaka ante: “Ladjikɛnde ndekɔ epolo, lemi ndawokaka etengo mpaIekɔ la djonyi l’otshumano.” Kristen, yatekalo imɔtshi yetshwisa t’etena k’ekina djɛ ntoleka ndapɛyɛ l’olemo w’ipoposanyɛ, atepela ante: “Wina wokomɛ tato l’otshumano, wɛ nkoka ndawoka olengedji.” Kaanga wananyɔ amɔtshi nkoka ndawoka nghɔsɔ. Anto wintansɛ la nkfumbo kepalekɔ Ewakɛ wɛ Yehova nkoka ndjala l’okakasano wɔ ndjala imama nya nkfumbo kɛnde edjinge nkoka ndawoka olengedji l’anteyi kɛ wananyɔ la wankaana yel’otshumano. Wankaana imɔtshi nkoka ndawoka olengedji ladjikɛnde walekɔ l’olando edjinge wapakoke mposa má amvulu yɛwɔ kana ladjikɛnde walama ase nkfumbo yɛwɔ walekɔ l’elando. Annette ntepelaka ante: “Lemi ntakokaki ndjawola kaanga leta l’onto tá nsanghanyɛ ladjikɛnde lemi mɔmɛlɛ ndeke loyalaki ifulumɛ yɛ nyɔ kɛmi.”

6. Lá nkilika Luka 10:38-42 wopo wɔkɔnge Yeso ndakotshɛ Mata nya Mariya?

⁶ Yeso asawolaki l’ankaana yɛnde yelá nyuma, edjinge ayalaka ilongo yɛwɔ yɛ nsɔsɔlɔ. Tokolenda lotombe lɔnde nya Mariya la Mata, iyape kɛkɔ iyayalaka ngo m’polo. (Wala Luka 10:38-42.) Má etepela wɛnde la nanghedji djɛnde, Yeso ɛnyɛka djɛnde awɔsaki l’odjito. Mariya ayalaka l’osasa djɛ ndjintansɛ l’anse k’ekoko wɛnde etengo ombeki. * Ko wina wɔ Mata ndayalaka la nkɛlɛ ladjikɛnde Mariya atokotshɛ djɛ nkatshɛ, nde ashimelaka Yeso ikanyi yɛnde ipa la djoka wɔma. Yeso akambaka la mbamba kɛsɔ djɛ nkotshɛ wamato ape wasɔ lá nyuma. Edjinge nde ɛnyɛka djɛnde ayakiyanyɛki la n’kambo djɛwɔ edjinge djɛ wɔnanyɔ kɛwɔ, Lazaro, má wopo wɔ ndawembolaka lá mbamba inkina. (Dj. 12:1-3) Djɛkondeke topakamɔ djɛ nyɛna ente wina wɔ Lazaro ndakfu olando wɔ wolo, Mariya nya Mata wewaki ambɔ ngo le Yeso ndeke okokawɔ mba okotshɔ.​—Dj. 11:3, 5.

7. Yopo imɔtshi yɛkɔnge yokokaso nkeketshɛ wankaana yɛso?

⁷ Le wankaana imɔtshi nsanghanyɛ ilekɔ mbamba kopomanawɔ la winawɔ Akristo. Djɛko ndeke iso nkɔpaka nkamba la mbamba kɛsɔ djɛ ndasangela, nsawola la wɔ, edjinge ndawɛnyɛ wopo woyakiyanyɛso la n’kambo djɛwɔ. Jordan, nkaana k’isolumolaki má djiko ntepelaka ante: “Lemi nkeketshamaka efula wina w’anto ankina ombandolawɔ má kɔmantɛrɛ yɔpɛyɛmi, ohonawɔ djɛ mposa la lemi t’olemo w’ipoposanyɛ kana ɛnyɛwɔ dj’iwɔ ndakiyanyɛka lá n’kambo djɛmi.” Nyotshɔ tɛnyɛ wankaana yɛso ente walekɔ la ntshina efula leso. Kia nkaana kɛso kɛmɔtshi antepela ante: “Ntsha lambohetshɛ losanghanyɛ, lemi ndjewaka ente langolongola mesagɛ ɔmɔtshi me wananyɔ dj’iwɔ ndjewa ntsha ndekɔ ngo mvu. N’kambo n’tshɔ nyɛnyɛka ente wananyɔ la wankaana ndakiyanyɛka lá n’kambo djɛmi.”

8. Lá wopo onkina wɔkɔnge okokaso ndjokola Yeso?

⁸ Etengo Yeso, iso nkoka ndɔsaka wina djɛ  ndjalaka esanga la wankaana yɛso. Mbala imɔtshi iso nkoka ndaweta lakaso djɛ ndɔsɛka nyawɔ la ndosanga nyawɔ lɔwɔ kaanga l’ilalambo yɛ dambi yɛ ngete iwongonfumba. Wina wonanghaso nkambo n’tshɔ, iso ladjɛ ndashikikɛ djɛ asawo waso wayale wakeketshɛ. (Ɔrɔ. 1:11, 12) Tokokolo ladjɛ ndjala la tokanyi tɔ wɔlɔ etengo Yeso. Nde ewaki ante londjemba nkoka ndjala okakasano le anto amɔtshi, koko nde ɛnyɛka papoo ante ntshukana kana mba wana apalekɔ ikɔkɔ y’osasa wɔ nsɔsɔlɔ. (Luka 11:27, 28) Koko, osasa wɔ nsɔsɔlɔ ndjɛka má ndjila olemo wɔ Yehova l’etena kɛ ntondo lá lowiko lɔso.​—Mat. 19:12.

9. Kɛkɔnge kɛ tokokolo oyɛwɔ ladjɛ nangha djɛ nkotshɛ wankaana?

⁹ Pekaka tokokolo ladjɛ nanghela Akristo wa wamato akambo etengo wankaana la wa nyɔ yɛwɔ yelá nyuma. (1 Ti. 5:1, 2) Tokokolo ladjɛ nkamba la wina wɛwɔ wɔlɔ lá ntondo kana lɔkɔngɔ wɔ losanghanyɛ djɛ nsawola la wankaana. Kristen nkaana kɛmɔtshi atepelaka ante: “Ikokolo imɔtshi ɛnaka ante ndekɔ wina tshɛ ngo l’olemo edjinge akɔpaka ndjewa nonganyi kɛmi, ndjalaka la djedjɛ dj’efula lá wopo wɔ ndakiyanaka lá n’kambo djɛmi.” Ntsha tokokolo ndɔsaka wina mbala efula djɛ nsawola la wankaana yɛwɔ yelá nyuma, wangɛnyɛka ambɔ iwɔ ndakiyanyɛka lá n’kambo djɛwɔ. * Annette, nkaana kisolumulaki ntondo, nyɛnyɛka ladjikɛnge  alekɔ wɔlɔ nsawolaka mbala la mbala la tokokolo. Nde ntepelaka ante: “Lemi ndawewaka wɔlɔ, edjinge iwɔ ndjewaka lemi. Lasɔ, wina woyɛmi l’okakasano, alekɔ wɔdju le lemi djɛ ndalɔmba okotshɔ.”

10. Kɛkɔnge kekoka nkotshɛ wankaana yɛso djɛ ndjala l’osasa?

¹⁰ Isankfumɔ, ampame edjinge wamato, nsasangaka wina w’anto ankina otowandolawɔ kana otɛnyɛwɔ djedjɛ djɛwɔ l’olemo wonanghaso. Koko, ntsha lako onto wotowandola kana wotɛnyɛ djedjɛ djɛnde l’olemo wonanghaso, iso ndɛmbaka. Yatekalo imɔtshi y’epolo yetawɔ Abigail ayawokaki ngo ngete wapowile yimba, antepelaka ante: “Anto ndjewaka Iemi ngo ambɔ nkana kɛ kapanda kana wɔna kapanda toko. Wina ɛmɔtshi lemi ndawokaka etengo lak’onto wɔnyɛna.” Koko, kekameyɛ kɔmantɛrɛ kɛ nkaana ketawɔ Pam. Nde ayaliki epolo, nde akambaka ɛnɔnyi efula etengo misiɔnɛrɛ. L’ɔkɔngɔ, nde akalɔka tákawɔ djɛ ntowomba ambotshi wande. L’ɛnɔnyi 70, nde ayalaka ngo yatekalo. Pam ntepelaka ante: “Kɛnɛ kelekisa nkotshɛ nde, anto ankina wanshimelaki ambɔ iwɔ nkɔpaka lemi.”

11. Wopo wɔkɔnge Yeso ndɛnyɛ djedjɛ djɛnde te wamato wahetaki lande l’olemo wɔnde?

¹¹ Yeso ayalaka la djedjɛ te wamato wahetaki lande lá wopo wiy’okotshɛka má ‘n’kete djɛwɔ iyɔmɛlɛ.’ (Luka 8:1-3) Nde atawola ndapɛyɛ lumo lá wopo wiyokambelaka toko koko álakanyɛka edjinge akambo wa nsɔsɔlɔ wa djonyi walendana la Ndjambe. Ndjɔmbɔmba, nde áshimelaka ante nde ladjɛ mvɔ edjinge n’kfundɔ. (Luka 24:5-8) Nde alɔngɔsɔlaka wamato wasɔ, ngo ngete ndalɔngɔsɔla apɔstɔlɔ wande la ekakasano wehombisa ndakomela. (Mar. 9:30-32; 10:32-34) Alekɔ djonyi djɛ ndjewa ente kaanga apɔstɔlɔ iyalote wina w’iyavunde Yeso, wamato amɔtshi wasukaki Yeso wayalaka polo wina wɔ ndotavɔka l’otomba wɔ ndjolo.​—Mat. 26:56; Mar. 15:40, 41.

12. Olemo wɔkɔnge wɔ ntshina Yeso ndapɛyɛ wamato?

¹² Yeso apɛyɛka wamato olemo wɔ ntshina efula. Ndjɔmbɔmba, wamato wa n’kɔmano ndeke loyalisa anto wantondo wɛnisa ekfundwelo kɛnde. Nde ashimelaka wamato wasɔ dj’iwɔ ntoshimela apɔstɔlɔ ambɔ, nde ambokfundɔ. (Mat. 28:5, 9, 10) Edjinge lá Pantekotɛ 33 Ɛ.K., wamato wayalaka l’eteyi wina wɔ ambeki iyakfutama avuta la nyuma k’ekina. Ntsha nghɔsɔ, mbɔkoko edjinge wankaana y’ankfutami yɛsɔ wawaka mbamba kɛ ntepela etepela enkina má nsese la nshimela anto ankina ‘akambo wa nkamɔ wa Ndjambe.’​—Ele. 1:14; 2:2-4, 11.

13. Kɛkɔnge kenangha wankaana y’Akristo lɔɔko kɛnɛ, edjinge wopo wɔkɔnge okokɛ nyɛnyɛ djedjɛ lá kɛnɛ k’onanhgawɔ?

¹³ Wankaana yɛso wɛdje djɛ mba djedjɛ lá kɛnɛ tshɛ k’onanghawɔ l’olemo wɔ Yehova. Olemo w’opikelo la w’ɔwɔngɛlɔ w’amvulu, ntshɔ djɛ ntokotshɛ eloyi wɛ n’tshumano dj’etepela w’angangɛnda, edjinge nkamba l’ɛkɔpa lá Betɛlɛ alekɔ l’anteyi k’elemo wonanghawɔ. Iwɔ nkotshɛka l’olemɔ w’oloyi wosuka anto wɛɛna ndjolo, nkadjimola enkanda wɛso, nkambaka etengo tatekalo edjinge etengo wamisiɔnɛrɛ. Etengo wananyɔ onanghawɔ, wankaana ndjingelaka Nkalasa kɛ tatekalo, Nkalasa k’esambisha w’Onkfumi, Nkalasa kɛ giliadɛ. Lonkina, wadji nkotshɛka wame wawɔ djɛ nkotshɛ edjito wɛwɔ wel’otshumano edjinge wel’olonganyelo. Wananyɔ wawɛmba edjito wɛsɔ watasamba nkotshɛ edjito wɛwɔ wɔlɔ ‘etengo epapɛyɛ,’ ntsha wapawá osukɔ me wadji wawɔ. (Ɛfɛ. 4:8) Ongokanelake topo tɔ nsuka wankaana yɛsɔ l’olemo wonanghawɔ wɔsɔ?

14. Lá nkilika etepela welekɔ lá Yeembo 68:11, kɛkɔnge kɛ tokokolo tolekɔ la balo onanghawɔ?

¹⁴ Tokokolo tólekɔ la balo ndjokaka djɛ wankaana walekɔ ‘oloyi w’angala’ wokambá l’ɛkɔpa edjinge mbala efula walekɔ l’anteyi k’ansakodji yɛ losango lɔ wɔlɔ yelekɔ la balo efula.  (Wala Yeembo 68:11.) Djɛko ndeke tokokolo mponaka mbamba kɛmba wapɔ má balo djɛwɔ. Abigail, nkaana k’isotepelaki l’adjiko, mbaka n’kelembo wina wɔ wananyɔ owopolawɔ lɛdji lɔ wɔlɔ lɔ ndotatsheyɛka ndjamba l’anto wal’etatshi kɛnde kɛ looko. Nde ntepelaka ante: “N’kambo n’tshɔ nkotshɛka lemi djɛ nyɛna ente Yehova alekɔ la djonyi dj’olemo wonanghami l’olonganyelo wɔnde.” Lonkina, tokokolo ndjawolaka la n’kɔmano nkfumɔ ambɔ wankaana yembotshunda walekɔ entshupa djɛ nkotshɛ wankaana y’eseka yepomana l’ekakasano. (Tito 2:3-5) Nsɔsɔlɔ, wankaana yɛso wɛdje djɛ mba djedjɛ djɛso edjinge ngandji kɛso!

15. Lá mbamba kɛkɔnge wankaana okokawɔ ndjala la djonyi dj’onto ɔmɔtshi ndaseela?

¹⁵ Lá mbamba imɔtshi, wankaana nkoka ndjala la djonyi dj’onto ɔmɔtshi ndaseela wina wopomanawɔ l’ekakasano. (Iza. 1:17) Ndjɔmbɔmba, wadj’odjo kana nkaana kemboyaka bala nya womende, nkoka ndjala la djonyi dj’onto ndoseela edjinge ndokotshɛ l’akambo amɔtshi wa womende otakokande ndonanghela. Nkaana kembotshunda nkoka ndjala la djonyi dj’okotshɔ wɔ ntepela l’adɔktɛrɛ. Kana, nkaana kelekɔ yat’ekalo k’ekamba l’elemo enkina wɛ teokrasi nkoka ndjala la djonyi dj’onto ndoseela ntsha anto watepela nyɛtshi lá nkambo djɛnde ambɔ, apapoposanyɛ etengo winande tat’ekalo tonkina onangawɔ. Wopo wɔkɔnge okokaso nkotshɛ wankaana yɛso? Lonkina, nyotshɔ tolende ndjɔmbɔmba kɛ Yeso.

16. Etengo Marko 14:3-9 ɛnyɛnde, wopo wɔkɔnge Yeso ndakotshɛ Mariya?

¹⁶ Yeso ayalaki entshupa djɛ nseela wankaana yɛnde yelá nyuma wina w’anto iyatonaka ndawekameyɛ. Djɛko ndeke, ndaseela Mariya wina wɔ Mata ndɔwɔnyɔla. (Luka 10:38-42) Nde aseelaka Mariya lonkina, wina w’anto iyakanela ambɔ ambɔsa n’kano djɛ nyɛtshi edjinge iyatateyɛ ndɔwɔnyɔla. (Wala Mar. 14:3-9.) Yeso okaka ikanyi yɛ Mariya ko owandolaka, nde atepelaka ante: ‘Nde ambonanghela n’kambo djɛ wɔlɔ. . . . Nde ambonangha kɛnɛ kɛndakoke nangha.’ Edjinge nde asakolaka ante, n’kambo djɛnde djɛ wɔlɔ djɛ ndombonangha djengokɔndwamaka ‘lá todjena tonkfumɔ tɔ l’andja w’otondo tɔ iyongopoposanyɛka losango lɔ wɔlɔ,’ etengo djamba djɛ wekelo djɛnɛ onanghande. Ɔsɔngo n’kambo djɛ nkamɔ djɛ Yeso ndatepela ante losango lɔ wɔlɔ longopoposanyema l’andja w’otondo wina wɔ ndalumɛ womoto wɔsɔ lá n’kambo djɛ ndananghe! Ɔsɔngo etepela wɛnde wɛsɔ iyakeketshɛ Mariya m’ɔkɔngɔ w’iwɔ ndohamɛ!

17. Pɛyɛ ndjɔmbɔmba kokaso nseela nkaana kɛmɔtshi.

¹⁷ Ongoseelake wankaana yɛko yela nyuma wina woyɛwɔ la djonyi djɛ ndaseela? Kɔsa ndjɔmbɔmba kɛnɛ. Ansakodji amɔtshi wɛna ambɔ nkaana kɛmɔtshi kɛ womende apalekɔ owakɛ, angokomake mbala efula l’ɔkɔngɔ wina wɔ losanghanyɛ edjinge angoposake onto wɔ ntondo l’ekomo kɛ losanghanyɛ. Wambɛna ambɔ angoyakalake wana lá losanghanyɛ ngo taangoyi. Koko wambotateyɛ ndaawopola ladjikɛnge ndopalɔmbɛ womende djɛnde ndjakalaka wana lá losanghanyɛ, ko wambo tateyɛ ndɔwɔnyɔla. Koko, wapewe ambɔ nde nanghaka k’enkfumɔ k’oyɛnde ladjɛ nangha. Nde apalekɔ la lotshungɔ lɔ nkotshɛ nonghanyi yɛnde edjinge apalekɔ l’otepela te wana wande. Okokɛ nangha mo? Ntsha wɛ mpɛyɛka wankaana djedjɛ l’olemo wɔ wolo wonanghawɔ edjinge nshimelaka anto ankina akambo wa wɔlɔ wonanghawɔ, okoka nkomɛ tokanyi tɔ nyɛtshi tolekɔ l’anto la nkambo djɛwɔ.

18. Lá wopo onkina wɔkɔnge okokaso nkotshɛ wankaana yɛso?

¹⁸ Iso nkoka nyɛnyɛ wankaana yɛso wopo woyakiyanyɛso lá n’kambo djɛwɔ, má epapɛyɛ wɛnama w’apɛyɛso. (1 Dj. 3:18) Annette, nkaana kewombaki nyɔ kɛnde l’olando atepela  ante: “Wananyɔ la wankaana imɔtshi wayɛki lá mbadja ndonkotshɛ djɛ namá mama la wandjakalaki n’kete djɛndɛ. Kɛsɔ kanyɛnyɛki djɛ lemi nkɔpamaka la ndekɔ la mpipo l’otshumano.” Edjinge Jordan koko awaka okotshɔ wɔkɔ. Nde atepela ante, wɔnanyɔ ɔmɔtshi ankotshɛka djɛ ndakanyɛ wopo wɔ ndɔngɔsɔla otuka wɔmi. Nde ante: “Alekɔ wɔlɔ efula djɛ nyɛna ente wananyɔ la wankaana yɛmi ndakiyanyɛka lá n’kambo djɛmi edjinge mponaka wɔlɔ wɔmi.”

19. Lá yopo inkina yɛkɔnge tokokolo okokawɔ nkotshɛ wankaana?

¹⁹ Tokokolo ladjɛ ndjila yimba l’ehomba wɛ wankaana. Iwɔ ndjewaka ambɔ Yehova nkɔpaka djɛ nanghela wankaana akambo lá wopo wɔ wɔlɔ. (Dja. 1:27) Iwɔ ladjɛ ndjokola ekanedji kɛ wɔlɔ keyalisa lá Yeso, ipa ndjila ɛlɛmbɛ wilila koko ndjala la ngandji edjinge la djandji. (Mat. 15:22-28) Wina wɔ tokokolo onanghawɔ la wolo djɛ nkotshɛ, iwɔ nkotshɛka wankaana dj’iwɔ ndawoka ambɔ Yehova l’olongonyelo wɔnde ndaakɔpaka. Wina wɔ ilɔndjɛ y’oloyi wɔ tokokolo tɔ otshumano wingelaki Kia ndewe ante nde ambima m’etena kindayalaka, nde ɔsaka nonghanyi mbala kɛkɔ kɛmɔ djɛ ndokotshɛ. Kia atepela ante: “N’kambo n’tshɔ nkakitshɛká yɛnyi yɛmi. Ladjikɛnde, tokokolo wankotshɛka m’etepela wɛwɔ la má nanghedji djɛwɔ, wa nyɛnyɛka papoo ambɔ ndekɔ la ntshina l’otshumano edjinge mpalekɔ mɔmɛlɛ kaanga wina woyalami l’ekakasano.”

20-21. Wopo wɔkɔnge okokaso nyɛnyɛ wankaana yɛso y’Akristo inkfumɔ ente tongakɔpake?

²⁰ Wina wolendaso lá ntshumano djɛso lɔɔko kɛnɛ, iso ntanaka ndjɔmbɔmba efula yɛ wamato w’Akristo wakamba la wolo edjinge wɛdje djɛ mba okotshɔ wɔso. Etengo isombowa elakanyelo efula má ndjɔmbɔmba kɛ Yeso, iso nkoka ndakotshɛ má ndɔsaka wina wɔ nsawolaka la wɔ edjinge ndjeka djɛ ndawewa. Iso nkoka ndawɛnyɛ djedjɛ djɛso lá kɛnɛ k’onanghawɔ l’olemo wɔ Ndjambe. Edjinge iso nkoka ndaseela la wina wɔyɛwɔ la djonyi.

²¹ L’ekomo k’onkanda wɔnde te as’Ɔrɔma, ɔpɔstɔlɔ Poolo alumulaka nkombo y’Akristo wa wamato djuwa. (Ɔrɔ. 16:1, 3, 6, 12, 13, 15) Ape l’ehamo, wamato wasɔ wawaka ekeketshelo wina wiyoke djemo edjinge djedjɛ djɛndatomela. Nyontshɔ ole iso, tosuke wankaana yɛso inkfumɔ yelekɔ l’otshumano. Ntsha tombonangha nghɔsɔ, tongawɛnyɛ ente iso ndakɔpaka ladjikɛnde walekɔ l’anteyi kɛ nkfumbo k’osanga k’onto la wɔnanyɔ.