1. Fa den sisa e yepi na ini na organisâsi, ma sortu problema furu fu den abi tu? (Luku a fowtow na tapu a kafti.)

WI BREITI srefisrefi taki wi abi someni sisa di e wroko tranga na ini a gemeente! Den e teki prati na den konmakandra èn na ini a preikiwroko. Sonwan fu den e yepi fu hori a Kownukondre zaal bun èn den e poti prakseri tu na den Kresten brada nanga sisa fu den. A no de fu taki dati den e kisi problema tu. Son sisa musu sorgu gi den papa nanga mama di kon owru kaba. Tra sisa e kisi gens fu famiriman fu di den e dini Yehovah. Èn trawan e wroko tranga fu di den musu sorgu den pikin den wawan.

2. Fu san ede wi musu horibaka gi den sisa fu wi?

² Fu san ede wi musu horibaka gi den sisa fu wi? Fu di furu sma na ini a grontapu disi no e gi umasma a lespeki di den musu kisi. Boiti dati, Bijbel e gi wi a deki-ati fu horibaka gi den. Fu eksempre, na apostel Paulus ben aksi a gemeente na ini Rome fu gi Feibe wan switikon èn fu „yepi en nanga ala sani di a ben sa abi fanowdu” (Rom. 16:1, 2). Di Paulus ben de wan Fariseiman, a ben de na ini wan grupu fu sma di ben e si umasma leki moro lagi sma. Ma bakaten di a tron wan Kresten, a teki na eksempre fu Yesus èn a sori lespeki nanga switifasi gi umasma.​—1 Kor. 11:1.

3. Fa Yesus ben e denki fu umasma èn fa a ben e si den uma di ben e du a wani fu Gado?

³ Yesus ben e sori lespeki gi ala umasma (Yoh. 4:27). A no ben e si den leki fa den Dyu kerki fesiman fu a ten dati ben e si den. Fu taki en leti, wan buku di e fruklari son pisi fu Bijbel e taki: „Yesus no taki nowan sani di e lagi noso wisiwasi umasma.” Èn Yesus ben abi furu lespeki, spesrutu gi den uma di ben e du a wani fu en Papa. A moi fu si taki di a ben e taki fu den sma di ben de leki famiri gi en, dan a ben e kari  den mansma brada èn den umasma sisa.​—Mat. 12:50.

4. San wi o luku na ini na artikel disi?

⁴ Ala ten Yesus ben de klariklari fu yepi den uma di ben e dini Gado. A ben meki ten gi den, a ben e warderi den, èn a ben e opo taki gi den. Meki wi luku fa wi kan de leki Yesus.

5. Fu san ede a muilek gi son sisa fu feni bun mati?

⁵ Wi alamala, sobun ala brada nanga sisa, abi bun mati fanowdu. Ma son leisi a no makriki gi den sisa fu feni bun mati. Fu san ede? Luku san son sisa taki. Wan sisa di nen Jordan * taki: „Fu di mi no trow, meki furu tron mi no sabi suma mi musu teki leki mati na ini a gemeente èn mi e firi leki den no e teri mi.” Kristen, wan pionier sisa di go yepi na wan presi pe moro preikiman de fanowdu, taki: „Te yu kon na ini wan nyun gemeente, a kan taki yu e firi leki yu wawan de.” Kande son brada e firi so tu. Den sisa di e libi na ini wan osofamiri pe den wawan na Kotoigi kan firi leki sma no teri den na ini na osofamiri èn na ini a gemeente. Kande son sisa e firi leki den wawan de, fu di den siki èn den no man komoto na oso, noso den musu sorgu gi wan siki sma na ini den osofamiri. Annette taki: „Mi no ben man abi prisiri ten nanga den brada nanga sisa fu di mi ben musu sorgu gi mi mama.”

6. Te wi e luku Lukas 10:38-42, dan fa Yesus yepi Marta nanga Maria?

⁶ Yesus ben e meki ten gi den uma di ben e dini Gado èn a ben de wan trutru mati gi den. Wi man si dati na den tu sisa Maria nanga Marta di no ben trow kande. (Leisi Lukas 10:38-42.) A no de fu taki dati a fasi fa Yesus ben e taki nanga den èn den sani di a ben e du ben meki taki den ben si leki den mati. Maria ben lobi fu sidon na en futusei leki wan disipel fu en. * Èn di Maria no ben go yepi Marta na ini a kukru, dan Marta no ben frede fu taigi Yesus taki a no ben lobi a sani disi. Toku Yesus ben man leri den tu uma disi wan prenspari sani na a okasi dati. Èn di a ben go tan na a oso fu den tu sisa disi nanga den brada Lasarus, dan a ben sori tu taki a ben e broko en ede nanga den (Yoh. 12:1-3). Fu dati ede, di Lasarus kon siki, Maria nanga Marta ben sabi taki den ben kan go suku yepi na Yesus.​—Yoh. 11:3, 5.

7. San na wan fasi fa wi kan gi den sisa fu wi deki-ati?

⁷ Gi son sisa, den konmakandra na a wan-enkri okasi pe den kan de nanga den Kresten brada nanga sisa fu den. Sobun, meki wi gebroiki na okasi dati fu gi den wan switikon, fu taki nanga den, èn fu sori den taki wi e broko wi ede nanga den. Jordan, di wi ben taki fu en kaba, taki: „Mi e warderi en trutru te den trawan e taki dati den lobi den piki di mi e gi na den konmakandra, te den e seti sani fu wroko nanga mi na ini a preikiwroko, noso te den e du sani fu sori taki den e broko den ede nanga mi.” Wi musu sori den sisa fu wi taki den prenspari gi wi. Kia taki: „Efu mi misi wan konmakandra, mi sabi taki den o app mi fu luku efu ala sani e go bun nanga mi. Disi e sori mi krin taki den brada nanga sisa e broko den ede nanga mi.”

8. Na sortu fasi wi kan de leki Yesus?

⁸ Neleki Yesus, wi musu meki ten gi den  sisa fu wi. Wi kan kari den fu kon nyan wan sani nanga wi, noso wi kan du tra prisiri sani nanga den. Te wi e du disi, dan wi musu sorgu taki den sani di wi e taki e gi den deki-ati (Rom. 1:11, 12). Yesus ben sabi taki a no makriki gi son sma te den no trow. Ma a ben sori krin tu taki a no soso te wan sma trow noso te a meki pikin, dan a de koloku trutru (Luk. 11:27, 28). Wan sma o de koloku trutru te na anbegi fu Yehovah de na a fosi presi na ini en libi (Mat. 19:12). A bun te owruman abi a srefi denki disi neleki Yesus.

9. San owruman kan du fu yepi den sisa?

⁹ Spesrutu gi owruman a prenspari fu si Kresten uma leki den sisa nanga mama (1 Tim. 5:1, 2). A bun te den e meki ten fu taki nanga den sisa fosi èn baka den konmakandra. Kristen taki: „Wan owruman ben si taki mi ben e du so furu èn a ben wani sabi san mi e du ibri dei. Mi en warderi en taki a ben poti prakseri na mi.” Te owruman abi a gwenti fu taki nanga den Kresten sisa fu den, dan den e sori taki den e broko den ede nanga den. * Annette, di wi ben taki fu en kaba, sori fu san ede a bun te yu abi a gwenti fu taki nanga den owruman. A taki: „Mi e leri sabi den moro bun  èn den e kon sabi mi moro bun tu. Èn te mi abi wan problema, dan mi no e frede fu go suku yepi na den.”

10. San kan meki den sisa fu wi firi bun?

¹⁰ Awinsi yu na wan man noso wan uma, wi alamala e firi bun te sma e prèise wi fu di wi man du wan sani bun, noso te den e sori warderi gi wan wroko di wi du. Ma efu nowan sma e du disi, dan wi kan firi brokosaka. Abigail, wan pionier sisa di no trow, e taki dati son leisi a e firi leki nowan fu den brada nanga sisa sabi en trutru. A taki: „Den e si mi soso leki a sisa fu so wan brada noso na umapikin fu Brada so-so-so. Son leisi mi e firi leki nowan sma e si mi.” Ma luku san wan tra sisa di nen Pam taki. A sisa disi di no trow ben dini furu yari leki zendeling, ma bakaten a drai go na oso baka fu sorgu gi a papa nanga mama fu en. Now a pasa 70 yari èn a e pionier ete. Pam taki: „San e yepi mi trutru, na te den brada nanga sisa e taigi mi taki den e warderi den sani di mi e du.”

11. Fa Yesus sori taki a ben e warderi den sani di son uma ben e du di den ben de nanga en?

¹¹ Yesus ben warderi a yepi di a ben e kisi fu den uma di ben „gebroiki den sani fu den fu sorgu” gi en (Luk. 8:1-3). A no ben gi den a grani fu yepi en nomo, ma a ben fruteri den prenspari sani fu Gado Wortu tu. Fu eksempre, a ben fruteri den taki a ben o dede èn taki a ben o kisi wan opobaka (Luk. 24:5-8). Boiti dati, a ben sreka den uma disi gi den tesi di den ben o kisi, neleki fa a ben sreka den apostel fu en (Mark. 9:30-32; 10:32-34). Aladi den apostel lon gowe di sma kon grabu Yesus, a moi fu si taki son uma di ben e horibaka gi en ben de drape di a ben e dede na a pinapostu.​—Mat. 26:56; Mark. 15:40, 41.

12. Sortu wroko Yesus ben gi umasma?

¹² Yesus ben gi umasma prenspari wroko tu. Fu eksempre, den fosi sma di ben si taki Yesus kisi wan opobaka, ben de umasma. A ben aksi den uma disi fu go taigi den apostel taki a kisi wan opobaka (Mat. 28:5, 9, 10). A kan tu taki umasma ben de na a Pinksterfesa fu a yari 33 di santa yeye kon na tapu den bakaman fu Yesus. Efu disi de so, dan den sisa disi ben salfu nanga santa yeye tu èn a kan taki den srefi ben man taki tra tongo fu fruteri den trakondresma fu „den bigi sani di Gado du”.​—Tori 1:14; 2:2-4, 11.

13. San Kresten uma na ini a ten disi e du, èn fa wi kan sori taki wi e warderi den sani di den e du?

¹³ A bun fu prèise den sisa fu wi gi ala sani di den e du na ini a diniwroko gi Yehovah. Den e yepi fu bow sani soleki Kownukondre zaal èn fu sorgu taki den e tan bun, den e leri tra tongo fu yepi nanga a preikiwroko na ini den tongo dati, èn den e yepi na Betel tu. Den e go yepi na presi pe wan rampu ben kon, den e yepi nanga a vertaal-wroko fu den buku nanga tra sani di wi e kisi, èn den e wroko leki pionier nanga zendeling. Neleki den brada, den sisa e go tu na a Pionierskoro, a Skoro gi Kownukondre preikiman èn a Gileadskoro. Boiti dati, yu abi den wefi di e horibaka gi den masra, so taki den masra man tyari den frantwortu di den abi na ini den gemeente èn na ini na organisâsi. Den brada disi no ben o man du so furu na ini den gemeente efu den wefi no ben e yepi den (Ef. 4:8). Wan fasi de fa yu kan horibaka gi den sisa fu wi di e du so furu?

14. San Psalm 68:11 e taki fu den sisa, èn san koni owruman e du fu dati ede?

¹⁴ Koni owruman e frustan taki den sisa  na „wan bigi legre” di de klariklari fu wroko, èn furu tron den na den moro bun preikiman fu a bun nyunsu. (Leisi Psalm 68:11.) Dati meki a bun te den owruman e pruberi fu leri wan sani fu den sisa. Abigail, di wi ben taki fu en kaba, breiti te brada e aksi en san na a moro bun fasi fu bigin taki nanga den sma na ini a kontren. A taki: „Te den e du disi, dan dati e meki mi si taki mi srefi kisi wan wroko fu Yehovah fu du na ini en organisâsi.” Den owruman e si tu taki son leisi a moro bun te lepi Kresten sisa e yepi den yongu sisa nanga den problema fu den (Titus 2:3-5). A no de fu taki dati wi lobi den Kresten sisa fu wi èn taki wi e warderi den.

15. O ten a kan de fanowdu fu opo taki noso yepi den sisa fu wi?

¹⁵ Son leisi den sisa abi yepi fanowdu nanga son problema (Yes. 1:17). Fu eksempre, yu abi sisa di den masra kon dede noso a trow fu den broko. Kande so wan sisa abi wan afkati fanowdu noso wan sma di kan yepi en nanga sani di en masra ben e du. Kande wan owru sisa abi wan sma fanowdu di kan yepi en fu taki nanga datra. Son pionier sisa no man go so furu na ini a preikiwroko leki den tra pionier fu di den e du tra sani gi na organisâsi tu. Efu sma e krutu so wan sisa fu di a no e kon so furu na ini a preikiwroko, dan wan sma kan opo taki gi en tu. Fa wi kan yepi den sisa disi? Meki wi luku baka san Yesus ben du.

16. Fa Yesus yepi Maria soleki fa skrifi na ini Markus 14:3-9?

¹⁶ Yesus no ben e draidrai fu opo taki gi den sisa efu tra sma ben e krutu den. Wan leisi a opo taki gi Maria di Marta ben e krutu en (Luk. 10:38-42). Wan tra leisi a opo taki gi Maria tu di sma ben feni taki a du wan don sani. (Leisi Markus 14:3-9.) Yesus ben frustan fu san ede Maria ben du a sani dati èn a ben prèise en. A taki: „A du wan bun sani gi mi. . . . Na uma disi du san a ben man du.” A ben taki srefi dati sma ben o taki fu a sani disi „na ala sei fu grontapu pe sma o preiki a bun nyunsu”. Èn na fu a sani disi wi e taki now na ini na artikel. A moi fu si taki di Yesus ben e taki fu a bun nyunsu di ben o preiki na heri grontapu, a ben prèise na uma disi fu a sani disi di a du sondro fu denki ensrefi! A musu fu de so, taki den sani di Yesus taki gi Maria deki-ati di sma krutu en!

17. Na ini sortu situwâsi a kan de fanowdu fu opo taki gi wan sisa? Gi wan eksempre.

¹⁷ Yu e opo taki gi den sisa tu te a de fanowdu? Luku na eksempre disi: Wan sisa di abi wan masra di no de Kotoigi e kon lati na den konmakandra furu tron èn a e gowe wantewante baka den konmakandra. Son preikiman e si disi. Den e si tu taki wanwan leisi nomo a e tyari den pikin fu en na den konmakandra. Den e aksi densrefi fu san ede a no abi a deki-ati fu taigi en masra taki a o tyari den pikin na ala den konmakandra èn den e bigin krutu en. Ma san den no e si, na taki a sisa disi e du ala san a man na ini a situwâsi fu en. Son leisi en masra e aksi en fu du wan sani èn a no en wawan e bosroiti fa den o kweki den pikin. San yu kan du te yu e yere sma e krutu so wan sisa? Efu wi e prèise a sisa na fesi trawan èn wi e fruteri trawan fu den bun sani di a sisa disi e du, dan kande den no o krutu en moro.

18. Na sortu tra fasi wi kan yepi den sisa fu wi?

¹⁸ Wan tra fasi fa wi kan sori taki wi e broko wi ede nanga den sisa fu wi, na te wi e aksi den fu du son sani gi den (1 Yoh. 3:18). Annette, a sisa di ben musu sorgu gi en siki  mama, taki: „Son brada nanga sisa ben kon yepi mi fu luku mi mama, noso den ben e tyari nyanyan gi mi. Disi ben meki mi firi taki den lobi mi èn taki mi de wan pisi fu na organisâsi.” Jordan ben kisi yepi tu. Wan brada ben leri en fa fu sorgu taki en wagi tan bun. A taki: „Mi e prisiri te mi e si fa den brada nanga sisa e broko den ede nanga mi èn taki den no wani taki mi kisi mankeri te mi e rèi mi wagi.”

19. San den owruman kan du moro fu yepi den sisa?

¹⁹ Den owruman e sorgu tu taki den sisa e kisi san den abi fanowdu. Den sabi taki Yehovah wani taki ala sani waka bun nanga den sisa fu wi (Yak. 1:27). Dati meki den e hori den firi fu den na prakseri neleki fa Yesus ben du dati. Den no e meki wet gi den, spesrutu te den si taki a moro bun efu den sori switifasi èn efu den e pruberi fu frustan den sisa (Mat. 15:22-28). Den owruman di e du muiti fu yepi den sisa e meki den sisa firi taki Yehovah nanga na organisâsi lobi den. Di a grupu-opziener fu Kia yere taki a ben o froisi, a seti sani wantewante fu yepi en. Kia taki: „Disi ben meki taki mi no ben e stress so furu moro. Den sani di den taki èn du fu yepi mi gi mi deki-ati trutru. Den owruman sori krin taki mi prenspari gi a gemeente èn taki mi no de mi wawan te mi de na ini wan muilek situwâsi.”

20-21. Fa wi kan sori taki wi lobi ala den Kresten sisa fu wi?

²⁰ Te wi e luku den gemeente fu wi na ini a ten disi, dan wi e si someni Kresten uma di e wroko tranga èn di warti fu wi horibaka gi den. Te wi e luku na eksempre fu Yesus, dan wi e si taki wi o man yepi den te wi e meki ten gi den èn te wi e leri sabi den. Wi kan sori taki wi e warderi den sani di den e du na ini a diniwroko gi Gado. Wi kan opo taki gi den tu te a de fanowdu.

²¹ Na a kaba fu a brifi gi den Romesma, na apostel Paulus ben kari son uma na den nen di a ben taki fu den (Rom. 16:1, 3, 6, 12, 13, 15). Wi kan frustan taki den uma disi ben breiti fu yere fa Paulus ben seni odi gi den èn fa a ben e prèise den. Meki wi du a srefi tu. Meki wi horibaka gi ala den sisa na ini wi gemeente. Na so wi e sori taki wi lobi den leki wi eigi famiri.