1. Ngande wasukɛ akadiyɛso okongamelo, ko ekakatanu akɔna wahomana l’efula ka wɔ? (Enda osato wele lo lohoso.)

TEKƆ l’ɔngɛnɔngɛnɔ dia monga l’akadiyɛso efula wakamba olimu efula l’etshumanelo! Ɛnyɛlɔ, vɔ mbishaka kɔmatɛrɛ ndo salaka adevwara lo nsanganya ndo vɔ ndjashaka l’olimu w’esambishelo. Amɔtshi wekɔ lo mbisha lonya l’ɔlɔngɔswɛlɔ wa Mbalasa ka Diolelo, ndo vɔ ndjashaka l’otema ɔtɔi le asekawɔ atɛmɔdi. Koko, vɔ pomanaka l’ekakatanu. Amɔtshi wekɔ lo nkokɛ ambutshi awɔ waya esombe. Akina wekɔ lo mbikikɛ ɔlɔshamelo w’oma le ase nkumbo yawɔ. Ndo akina nto wekɔ lo mbodia ana vɔamɛ, ndo wekɔ lo nkamba olimu efula dia kotshɛ anawɔ ehomba awɔ.

2. Lande na kahombaso mbidja welo dia nsukɛ akadiyɛso?

² Lande na kahombaso mbidja yimba dia nsukɛ akadiyɛso? Nɛ dia l’andja ɔnɛ aha tena tshɛ mbasalɛwɔ wamato akambo la kɛnɛmɔ kahombama. Laadiko dia laasɔ, Bible tokeketshaka dia mbasukɛ. Ɛnyɛlɔ, ɔpɔstɔlɔ Pɔɔlɔ akatɛ ase etshumanelo ka la Rɔmɔ dia nongola Febe ndo “mbosha ekimanyielo tshɛ kakokande monga la ohomba.” (Rɔmɔ 16:1, 2) Etena kaki Pɔɔlɔ Ofarisɛ, nde aki l’olui w’anto amɔtshi wakɔsaka wamato oko anto wele l’ɛse k’anto akina. Koko, etena kakandayonga Okristo, nde akokoya Yeso ndo akasalɛka wamato akambo la kɛnɛmɔ ndo lo yoho ya dimɛna.​—1 Kɔr. 11:1.

3. Ngande wakasalɛka Yeso wamato akambo, ndo ngande wakandɔsaka wamato wakasalaka lolango la Nzambi?

³ Yeso akasalɛka wamato tshɛ akambo la kɛnɛmɔ. (Jni. 4:27) Nde kɔmbɔsaka wamato oko wakawaɔsaka ewandji w’ɔtɛmwɛlɔ w’ase Juda wa lo nshi yande. Diakɔ diele, dibuku dimɔtshi di’awui wa lo Bible mbutaka ɔnɛ: “Ndooko lushi lakate Yeso dui dimɔtshi diakɛnyaka dia nde kɔnɛmiyaka wamato kana kombaɔsaka la kɛnɛmɔ.” Koko, Yeso akɔsaka wamato wakasalaka lolango la She la kɛnɛmɔ ka laande. Lo mɛtɛ, nde akawaɔsaka oko akadiyɛnde, ndo akaashile kaamɛ l’apami wakandɔsaka  oko ase nkumbo kande ka lo nyuma.​—Mat. 12:50.

4. Kakɔna kayangaso nsɛdingola lo sawo nɛ?

⁴ Yeso aki tena tshɛ suke dia nkimanyiya akadiyɛnde. Nde aki la lowando otsha le wɔ ndo akawawamɛka. Tayanga nsɛdingola woho wakokaso mbokoya Yeso lo mbɔsaka akadiyɛso la nɛmɔ.

5. Lande na kakoka akadiyɛso amɔtshi monga l’okakatanu dia nkondja wahɔ oma lo lɔngɛnyi lakeketsha?

⁵ Sho tshɛ, anangɛso l’akadiyɛso mongaka l’ohomba wa lɔngɛnyi la dimɛna. Koko lo tena dimɔtshi, akadiyɛso amɔtshi koka monga l’okakatanu dia nkotsha ohomba ɔsɔ. Lande na? Tende awui wayela anɛ. Kadiyɛso kɛmɔtshi kelɛwɔ Jordan * mbutaka ate: “Lam’ele lekɔ onyemba, mbala efula dimi mbɔsaka dia hakoke monga la dihole l’etshumanelo ndo hakoke mɛtɛ monga ose etshumanelo.” Kristen, lele ombatshi mboka lakonɔ dia tohamia olimu ande mbutaka ate: “Etena keyɛ oyoyo l’etshumanelo kɛmɔtshi, wɛ koka ndjaoka opoko.” Anangɛso amɔtshi koka ndjaoka woho akɔ waamɛ. Anto tshɛ wadjasɛ lo nkumbo katɔnyi lo awui w’ɔtɛmwɛlɔ, koka ndjaoka oko vɔ mangana la nkumbo kawɔ ka lo demba ndo l’etena kakɔ kaamɛ ndjaoka dia vɔ mangana la nkumbo kawɔ ka lo nyuma. Wanɛ wadihama paka lo luudu koka ndjaoka opoko woho wakoka wanɛ wakokɛ ewotɔ awɔ wele la hemɔ ndjaoka. Annette mbutaka ate: “Dimi kokoka mbetawɔ leeta la ntshɔ lo nsanganya nɛ dia laki l’ɔkɛndɛ wa kokɛka mama.”

6. Oko wofundamidiɔ lo Luka 10:38-42, ngande wakakimanyiya Yeso Maata la Mariya?

⁶ Yeso aketshaka wenya kaamɛ l’akadiyɛnde, ndo nde aki ɔngɛnyi wa mɛtɛ le wɔ. Tɔsɛdingole lɔngɛnyi laki lam’asande la Mariya la Maata, waki ondo enyemba. (Adia Luka 10:38-42.) Oma l’ɛtɛkɛta ndo l’etsha ande, Yeso akɛnya hwe dia nde akasalaka dia vɔ ndjaoka dimɛna. Mariya akayaoke dimɛna diakɔ diele nde akadjasɛ l’ekolo ande oko ombeki. * Ndo Maata, lam’ele Mariya kombokimanyiya, nde komengenga dia mbitɛ Yeso kɛnɛ kaki lo yimba yande. L’etena kɛsɔ Yeso akakoke nkimanyiya wamato asɔ lo nyuma. Ndo nde akɛnya woho wakandayakiyanyaka dikambo dia wamato asɔ ndo di’ɔnangɛwɔ Lazaro, lo mbaembolaka lo waaso akina. (Jni. 12:1-3) Diakɔ diele, etena kakonge Lazaro la hemɔ wolo, Mariya la Maata wakeyaka dia vɔ wakakoke nyanga ekimanyielo le Yeso.​—Jni. 11:3, 5.

7. Naa yoho mɔtshi yakokaso nkeketsha akadiyɛso?

⁷ Le akadiyɛso amɔtshi, diaaso dimɔtshi diakokaso mbakeketsha ele etena kewɔ lo nsanganya kaamɛ l’asekawɔ atɛmɔdi. Diakɔ diele, sho nangaka nkamba la waaso asɔ dia mbalongola, nsawola la wɔ ndo nsala dia vɔ mɛna ɔnɛ sho ndjakiyanyaka dikambo diawɔ. Jordan, lakatatɛkɛtshi la diko mbutaka ɔnɛ: “Dimi keketshamaka etena kamandola anto akina l’ɔtɛ wa kɔmatɛrɛ yakamasha lo nsanganya, etena katombawɔ la mi l’esambishelo kana etena kamɛnyawɔ dia vɔ ndjakiyanyaka lo dikambo diami lo yoho kina.” Sho pombaka nsala dia akadiyɛso mbeya ɔnɛ vɔ wekɔ la nɛmɔ le so. Kia mbutaka ate: “Naka lambetsha losanganya, dimi mbeyaka dia wayotomɛ mesajɛ dia mbeya kana lekɔ ki. Dui sɔ kimanyiyakami dia mbeya ɔnɛ anangɛso l’akadiyɛso ndjakiyanyaka lo dikambo diami.”

8. Naa toho tokina takokaso mbokoya Yeso?

⁸ L’ɛnyɛlɔ ka Yeso, sho kokaka tshungolaka etena ka mongaka kaamɛ l’akadiyɛso. Ondo sho koka mbaelɛ la ngelo dia ndjɔlɛ la wɔ yangɔ  kana dia ndjetsha wenya kaamɛ la wɔ. Etena kasalaso dui sɔ, sho pombaka ndjashikikɛ di’asawo aso wekɔ asawo wakeketsha. (Rɔmɔ 1:11, 12) Dikumanyi pombaka monga la woho wa lɔkɛwɔ laki la Yeso. Nde akeyaka dia lonyemba kokaka monga okakatanu le anto amɔtshi, koko nde akɛnya hwe dia tshukana kana monga l’ana bu sheke y’ɔngɛnɔngɛnɔ wa pondjo. (Luka 11:27, 28) Koko, ɔngɛnɔngɛnɔ wa pondjo ndjaka lo mbetsha olimu wa Jehowa lo dihole dia ntondo.​—Mat. 19:12.

9. Kakɔna kakoka dikumanyi nsala dia nkimanyiya akadiyɛso?

⁹ Lo yoho ya laande, dikumanyi pombaka salɛ wamato w’Akristo akambo oko akadiyɛwɔ ndo oko anyangɛwɔ wa lo nyuma. (1 Tim. 5:1, 2) Dikumanyi pombaka tshungolaka etena la ntondo ndo l’ɔkɔngɔ wa nsanganya dia sawolaka l’akadiyɛso. Kristen mbutaka ate: “Ekumanyi kɛmɔtshi akɛnyi dia laki l’olimu efula ndo nde akalange mbeya awui wakamasalaka. Lakonge mɛtɛ la lowando le nde lo woho wakandayakiyanya dikambo diami.” Naka dikumanyi tshungolaka etena mbala la mbala dia sawolaka l’akadiyɛwɔ, kete vɔ wayɛnya dia vɔ ndjakiyanyaka dikambo diawɔ. * Annette, lakatatɛkɛtshi dikambo diande la diko tɔtɔmiyaka wahɔ ɔmɔtshi woonga lo  sawolaka mbala la mbala la dikumanyi. Nde mbutaka ɔnɛ: “Lakasale la wolo dia mbaeya dimɛna, ndo vɔ wakambeye. Oma laasɔ, etena kongami l’ohemba wa wolo, halengenga dia nyanga ekimanyielo kawɔ.”

10. Kakɔna kakoka nkimanyiya akadiyɛso dia monga l’ɔngɛnɔngɛnɔ?

¹⁰ Sho tshɛ, apami la wamato ngɛnangɛnaka etena keya anto akina akoka aso ndo katotɛwɔ dia vɔ ngɛnangɛnaka olimu wakambaso. Lo wedi okina, naka anto mɔnyɔla diewo diaso ndo olimu wakambaso, kete dui sɔ diayotɔkɔmɔla. Abigail lele ombatshi mboka w’onyemba mbutaka dia lo tena dimɔtshi nde ndjaokaka oko hawowodje yimba, nde mbutaka ate: “Anto hawombeye dimi, vɔ mbeyaka paka ewotɔ ami kana vɔ mbeyakami tsho ɔnɛ ɔnaki kapanda. Lo tena dimɔtshi dimi ndjaokaka oko ndooko onto lamɛna.” Koko, tende kɛnɛ kata kadiyɛso kelɛwɔ Pam. Nde akakambe ɛnɔnyi efula oko misiɔnɛrɛ w’onyemba. L’ɔkɔngɔ wa laasɔ, nde akakalola la ngelo dia tokokɛ ambutshi ande. Nshi nyɛ nde aya l’ɛnɔnyi 70 l’ɛmɔtshi, ndo ekɔ lo ntetemala nkamba oko ombatshi mboka. Pam mbutaka ɔnɛ: “Kɛnɛ kaleka kimanyiyami ele etena kambitɛ anto akina ɔnɛ vɔ ngɛnangɛnaka olimu wakambami.”

11. Ngande wakɛnyaka Yeso dia nde akɔsaka wamato wakokimanyiyaka l’olimu ande la nɛmɔ?

¹¹ Yeso akɔsaka la nɛmɔ ekimanyielo kakandalongolaka oma le wamato waki la kɔlamelo wakokimanyiyaka “la diangɔ diawɔ.” (Luka 8:1-3) Nde kombetawɔ tsho dia vɔ monga la diɛsɛ sɔ, koko nde akawasholɛ ndo akambo wa mɛtɛ wa lo nyuma. Ɛnyɛlɔ, nde akawatɛ dia nde ayovɔ ndo ayolɔ. (Luka 24:5-8) Oko wakandasale l’apɔstɔlɔ, nde akalɔngɔsɔla wamato asɔ dikambo di’ehemba wakahombe mbakomɛ. (Makɔ 9:30-32; 10:32-34) Ndo kaanga mbakalawɔ apɔstɔlɔ etena kakawande Yeso, wamato wakosukɛka waki suke la nde etena kakandavu l’otamba w’asui.​—Mat. 26:56; Makɔ 15:40, 41.

12. Olimu akɔna wakasha Yeso wamato?

¹² Yeso akasha wamato olimu w’ohomba efula. Ɛnyɛlɔ, wamato waki la kɔlamelo mbaki ɛmɛnyi wa ntondo wa eolwelo kande. Nde akalɔmbɛ wamato asɔ dia totɛ apɔstɔlɔ ɔnɛ nde ambolɔ. (Mat. 28:5, 9, 10) Lo Pɛntɛkɔsta 33 T.D., ondo ndo wamato waki laawɔ etena kakalongola ambeki nyuma k’ekila. Naka ngasɔ, kete akadiyɛso asɔ wakakitama nyuma wakalongola dikoka dia ntɛkɛta l’ɛtɛkɛta ekina ndo mbitɛ anto akina “akambo wa diambo waki Nzambi.”​—Ets. 1:14; 2:2-4, 11.

13. Kakɔna kasala akadiyɛso ɛlɔ kɛnɛ, ndo ngande wakokaso mɛnya dia tekɔ la lowando l’ɔtɛ wa kɛnɛ kasalawɔ?

¹³ Akadiyɛso sunganaka mandɔma l’ɔtɛ wa kɛnɛ tshɛ kasalawɔ l’olimu wa Jehowa. Olimu ɔsɔ mendanaka la wokelo ndo ɔlɔngɔswɛlɔ wa mvudu, nsukɛ elui wa l’ɔtɛkɛta okina ndo nkamba lo Bɛtɛlɛ oko onto layakimɔ la lolango. Vɔ mbishaka lonya dia nkimanyiya etena katomba mpokoso, vɔ kimanyiyaka dia nkadimola ekanda aso ndo vɔ kambaka oko ambatshi mboka ndo oko waa misiɔnɛrɛ. Oko wasala anangɛso, akadiyɛso mbɔtɔka kalasa k’ambatshi mboka, Kalasa k’esambisha wa Diolelo ndo Kalasa ka Ngiliyadɛ. Laadiko dia laasɔ, wadi kimanyiyaka waomɛwɔ dia nkotsha ɛkɛndɛ awɔ wa l’etshumanelo ndo wa l’okongamelo. Anangɛso wele l’ɛkɛndɛ asɔ hawokoke nkamba oko “apami wele oko weshasha” aha l’osukɔ wa wadiɛwɔ. (Ɛf. 4:8) Onde wɛ koka nkanyiya toho tɔmɔtshi takokayɛ nsukɛ akadiyɛso asɔ l’olimu wakambawɔ ɔsɔ?

14. Lo ndjela kɛnɛ kotami lo Osambo 68:11, kakɔna kasala dikumanyi diele la lomba?

¹⁴ Dikumanyi diele la lomba shihodiaka ɔnɛ akadiyɛso wekɔ olui wa woke w’alembe  walanga nkamba olimu ndo ɔnɛ mbala efula vɔ mongaka l’atei w’anto waleka monga l’akoka wa nsambisha lokumu l’ɔlɔlɔ. (Adia Osambo 68:11.) Diakɔ diele, dikumanyi nyangaka toho ta nkondja wahɔ oma lo diewo diawɔ. Abigail, lakatatɛkɛtshi la diko keketshamaka etena kawombola anangɛso toho takandɛnyi ɔnɛ tekɔ amɛna dia ntatɛ nsawola l’anto wa l’ɛtshi kande ka nkɛtɛ. Nde mbutaka ɔnɛ: “Dui sɔ kimanyiyakami dia mɛna ɔnɛ Jehowa mbishakami dihole l’okongamelo ande.” Laadiko dia laasɔ, dikumanyi shihodiaka ɔnɛ akadiyɛso wele la kɔlamelo ndo wambotshunda lo nyuma wekɔ l’akoka wa nkimanyiya akadiyɛso w’esekaseka dia ndɔshana l’ekakatanu. (Tito 2:3-5) Lo mɛtɛ, akadiyɛso sunganaka mandɔma!

15. Etena kakɔna kakoka akadiyɛso monga l’ohomba w’onto ɔmɔtshi mbakimanyiya?

¹⁵ Lo tena dimɔtshi, akadiyɛso koka monga l’ohomba w’onto ɔmɔtshi mbakimanyiya etena kambowohomana l’okakatanu ɔmɔtshi. (Isa. 1:17) Ɛnyɛlɔ, wadi aki odo kana kadiyɛso kɛmɔtshi kakadiake diwala koka monga l’ohomba w’onto ɔmɔtshi mbɔtɛkɛtɛ kana mbokimanyiya dia nsala elimu ɛmɔtshi wakasalaka omɛnde. Kadiyɛso kɛmɔtshi kaya osombe koka monga l’ohomba w’onto ɔmɔtshi mbokimanyiya dia nsawola l’aseka enganga lo dikambo diande. Kana kadiyɛso kɛmɔtshi kele ombatshi mboka kakamba elimu ekina wa l’okongamelo, koka monga l’ohomba w’onto ɔmɔtshi mbaamɛ etena kawɔnyɔla anto akina l’ɔtɛ wahandasambisha mbala la mbala oko ambatshi mboka akina. Naa woho okina wakokaso nkimanyiya akadiyɛso? Nyɛsɔ tonyomɔsɛdingola ɛnyɛlɔ ka Yeso.

16. Oko wɔkɔndwamidiɔ lo Makɔ 14:3-9, ngande wakakimanyiya Yeso Mariya?

¹⁶ Yeso akongaka suke dia nkimanyiya akadiyɛnde etena kakawongaka l’ekakatanu. Ɛnyɛlɔ, Yeso akaamɛ Mariya etena kakawɔnyɔla Maata. (Luka 10:38-42) Nde akaamɛ Mariya mbala ka hende etena kakawanya anto akina l’ɔtɛ wa yɛdikɔ yakandɔshi yakawɔsaka ɔnɛ yekɔ ya kɔlɔ. (Adia Makɔ 14:3-9.) Yeso akashihodia kɛnɛ kakatshutshuya Mariya ndo akawandola lo mbuta ate: “Nde ambonsalɛ dikambo dia dimɛna. . . . Nde ambosala kɛnɛ kakandakoki nsala.” Nde akasha prɔfɛsiya ɔnɛ tshelo yande y’ɔlɔlɔ yayɔkɔndwamaka “l’ahole tshɛ wa l’andja w’otondo wayosambishama lokumu l’ɔlɔlɔ lɔnɛ,” oko wasalemadiɔ lo sawo nɛ kakianɛ. Ekɔ dui dia diambo efula lo woho wakate Yeso ɔnɛ lokumu l’ɔlɔlɔ layosambishama l’andja w’otondo etena kakandandola tshelo ya lokaho ya Mariya! Ɛtɛkɛta ande wakakeketsha mɛtɛ Mariya l’ɔkɔngɔ wa vɔ mbokanɛ kɔlɔ!

17. Sha ɛnyɛlɔ kɛnya etena kakokaso nkimanyiya kadiyɛso kɛmɔtshi.

¹⁷ Onde wɛ kimanyiyaka akadiyɛso etena kewɔ l’ohomba w’ekimanyielo? Ɛnyɛlɔ, tɔsɛdingole dui diayela nɛ. Apandjudi amɔtshi mɛnaka dia kadiyɛso kɛmɔtshi kele omɛnde bu ombetawudi, komaka mbala efula l’ɔkɔngɔ lo nsanganya ndo kalolaka kam’ashila nsanganya. Vɔ mɛnaka dia nde haleke ndja l’anande lo nsanganya. Diakɔ diele vɔ mbɔɔnyɔlaka nɛ dia vɔ fɔnyaka dia nde pombaka nɔmba omɛnde dia mbeetawɔ dia nde ndjaka l’ana lo nsanganya. Koko, kɛnɛ kele mɛtɛ ele kadiyɛso ekɔ lo nsala kɛnɛ tshɛ kakokande nsala. Aha nde mbakongɛ kɛnɛ tshɛ kasalande, aha nde mbele la yɛdikɔ y’ekomelo lo dikambo di’ana. Akokayɛ nsala naka wɛ ekɔ lo mboka di’anto amɔtshi wekɔ lo mɔnyɔla kadiyɛso kɛmɔtshi lo yoho shɔ? Naka wɛ mandola kadiyɛso kɛsɔ ndo mbitɛ anto akina akambo w’amɛna wasalande, kete wɛ koka nsala dia vɔ ntshika mbɔnyɔla.

18. Naa toho tokina takokaso nkimanyiya akadiyɛso?

¹⁸ Sho koka mɛnya akadiyɛso dia sho ndjakiyanyaka efula dikambo diawɔ lo mbakimanyiya  lo toho tɔmɔtshi shikaa. (1 Jni. 3:18) Kadiyɛso Annette, kakokɛ nyango lele la hemɔ mbutaka ate: “Angɛnyi ami amɔtshi ndjaka dia ndjotokimanyiya kana telaka mbo ya ndɛ. Dui sɔ mɛnyaka dia dimi nangemaka ndo lekɔ ose etshumanelo.” Jordan nde lawɔ akalongola ekimanyielo. Ɔnangɛso ɔmɔtshi akokimanyiya dia nde mbeya woho wa nɔngɔsɔlaka mutuka ande. Nde mbutaka ate: “Ekɔ ɔngɛnɔngɛnɔ efula dia mbeya ɔnɛ analengo l’akadiyɛmi ndjakiyanyaka dikambo dia ekokelo kami.”

19. Naa toho tokina takoka dikumanyi nkimanyiya akadiyɛso?

¹⁹ Dikumanyi vɔ lawɔ ndjakiyanyaka dikambo di’ehomba w’akadiyɛso. Vɔ mbeyaka dia Jehowa nangaka di’anto akina mbasalɛ akambo lo yoho ya dimɛna. (Jak. 1:27) Dikumanyi mbokoyaka Yeso ndo wekɔ l’ekanelo k’ɔlɔlɔ, vɔ salaka dui sɔ lo mbewɔ mbidja ɛlɛmbɛ etena kele ndeka dimɛna monga ɔlɔlɔ ndo monga anto woka dikambo. (Mat. 15:22-28) Dikumanyi diatakola nna dia ntondo dia nkimanyiya, kimanyiyaka akadiyɛso dia ndjaoka dia wekɔ lo sukamɛ. Etena kakoke omendji w’olui w’esambishelo wa Kia dia nde ayanga monɔ lo luudu lokina, mbala kakɔ ɔtɔi nde akayakongɛ dia mbokimanyiya. Kia mbutaka ate: “Dui sɔ diakakitshakitsha okiyanu ami. Lam’ele vɔ wakakeketsha ndo wakambisha ekimanyielo kakimi l’ohomba, dikumanyi wakamɛnya hwe dia lekɔ ose etshumanelo lele la nɛmɔ ndo ɔnɛ dimi bu opoko etena kemi l’okakatanu wa wolo.”

20-21. Ngande wakokaso mɛnya dia sho mbɔsaka akadiyɛso tshɛ la nɛmɔ?

²⁰ Etena kasɛdingolaso lo tshumanelo diaso ɛlɔ kɛnɛ, sho mɛnaka dia ekɔ bɛnyɛlɔ efula di’akadiyɛso wakamba olimu wa wolo ndo wasungana sho mbasukɛ. Oko wamboteka oma l’ɛnyɛlɔ ka Yeso, sho koka mbakimanyiya lo mbetshaka wenya kaamɛ la wɔ ndo nyanga dia mbaeya. Sho koka mɛnya dia sho mandolaka kɛnɛ kasalawɔ l’olimu wa Nzambi. Ndo sho koka mbakimanyiya etena kele ohomba.

²¹ L’ekomelo ka mukanda ande wakandafundɛ ase Rɔmɔ, ɔpɔstɔlɔ Pɔɔlɔ akashile nkombo shikaa ya wamato w’Akristo divwa. (Rɔmɔ 16:1, 3, 6, 12, 13, 15) Aha la taamu wamato asɔ wakakeketshama etena kakawoke mɔyɔ ndo lowando l’oma le Pɔɔlɔ. Nyɛsɔ sho lawɔ tosukɛke akadiyɛso tshɛ wa l’etshumanelo kaso. Lo nsala ngasɔ tayɛnya dia sho mbaɔsaka la nɛmɔ oko ase nkumbo kaso ka lo nyuma.