1. (a) Olsem wanem ol sista i helpim wok bilong oganaisesen? (b) Planti sista i bungim wanem ol hevi? (Lukim fran pes piksa.)

YUMI amamas tru olsem i gat planti sista i givim bel long mekim wok insait long kongrigesen! Olsem, ol i save bekim tok long ol miting, na autim tok. Sampela i helpim wok bilong lukautim Haus Kingdom, na ol i save tingim ol wanbilip. Tasol tru tru ol i save bungim sampela hevi. Sampela i save lukautim ol lapun papamama. Sampela i karim hevi long famili i birua long ol. Na sampela narapela ol i wanpis mama na ol i wok hat long lukautim ol pikinini bilong ol.

2. Bilong wanem yumi mas sapotim ol sista?

² Bilong wanem yumi mas sapotim ol sista? Bikos planti man i no save rispektim ol meri. Na tu, Baibel i kirapim yumi long sapotim ol. Olsem, aposel Pol i tokim kongrigesen long Rom long welkamim Fibi na “helpim em long wanem wanem samting em i laikim.” (Rom 16:1, 2) Pol em wanpela Farisi, na ol Farisi i save tingim ol meri olsem samting nating. Tasol taim em i kamap Kristen, em i bihainim pasin bilong Jisas na em i tingim gut ol meri na mekim gutpela pasin long ol.—1 Kor. 11:1.

3. (a) Jisas i mekim wanem pasin long ol meri? (b) Wanem tingting bilong em long ol meri i mekim laik bilong Papa bilong em?

³ Jisas i tingim gut olgeta meri. (Jon 4:27) Jisas i no gat wankain tingting long ol meri olsem ol lida bilong lotu Juda long dispela taim. Wanpela referens bilong Baibel i tok: “I no gat wanpela tok bilong Jisas i daunim ol meri.” Jisas i rispektim tru ol meri i mekim laik bilong Papa bilong em. Em i tingim ol olsem ol sista bilong em na em i kolim nem bilong ol wantaim nem bilong ol man we em i tingim ol olsem famili bilong em.—Mat. 12:50.

4. Long dispela atikol, bai yumi stori long wanem samting?

 ⁴ Oltaim Jisas i redi long helpim ol sista Kristen. Em i tingim ol na sambai long ol. Yumi ken stori long hau yumi ken bihainim pasin bilong Jisas long tingim gut ol sista.

5. Bilong wanem sampela sista inap pilim hatwok long kisim helpim long ol bung bilong strongim bilip?

⁵ Yumi olgeta, ol brata na sista, i nidim ol gutpela pren. Sampela taim, ating ol sista i pilim hatwok long painim ol gutpela pren. Bilong wanem? Tingim ol dispela stori. Wanpela sista nem bilong em Jordan * i tok: “Bikos mi singel, sampela taim mi hatwok long bung wantaim ol bratasista long kongrigesen.” Kristen, wanpela painia husat i muv i go long hap i gat nid long mekim sampela wok moa bilong autim tok, em i tok: “Taim yu kam nupela long wanpela kongrigesen, yu inap pilim olsem yu wanpis.” Sampela brata inap pilim wankain. Sampela em famili bilong ol i gat narapela narapela lotu inap pilim olsem ol i no pas gut wantaim wanfamili bilong ol, na tu, ol inap pilim olsem ol i stap longwe long ol wanbilip Kristen. Sampela sista inap pilim wanpis bikos ol i sik na ol i stap tasol long haus, na i wankain tu long ol sista em ol i lukautim ol wanfamili i sik. Annette i tok: “Mi hatwok long i go long ol bung bikos mi wanpela i save lukautim mama bilong mi.”

6. Olsem Luk 10:38-42 i kamapim, Jisas i helpim Maria na Marta olsem wanem?

⁶ Jisas i lusim sampela haptaim long stap wantaim ol sista, na em i stap olsem gutpela pren bilong ol. Tingim pasin pren bilong em wantaim Maria na Marta, tupela wantaim i singel. (Ritim Luk 10:38-42.) Toktok na pasin bilong Jisas i mekim na ol i stap bel isi. Maria i no pret long sindaun klostu long lek bilong em olsem wanpela disaipel. * Na Marta i bel hevi bikos Maria i no helpim em, na em i no pret long tokim Jisas long tingting bilong em. Long dispela taim, Jisas i helpim tupela wantaim long kisim skul long ol bikpela samting. Na em i soim olsem em i tingim dispela tupela meri na brata bilong ol, Lasarus, taim em i go lukim ol. (Jon 12:1-3) Olsem na taim Lasarus i sik nogut tru, Maria na Marta i save olsem ol inap go long Jisas bilong kisim helpim.—Jon 11:3, 5.

7. Wanem wanpela rot yumi ken strongim ol sista?

⁷ Sampela sista i save bung wantaim ol wanbilip long taim bilong miting tasol. Olsem na yumi laik yusim ol dispela taim long welkamim ol, toktok long ol, na larim ol i save olsem yumi tingim ol. Jordan, em yumi stori pinis long em, i tok: “Mi save pilim amamas tru taim ol narapela i tok amamas long ol komen bilong mi, pasim tok long autim tok wantaim mi, o soim olsem ol i tingim mi.” Yumi mas soim ol sista bilong yumi olsem ol i bikpela samting long yumi. Kia i tok: “Sapos mi no go long wanpela miting, mi save wanpela bai salim mesis na askim sapos mi orait. Dispela i helpim mi long save olsem ol bratasista i tingim mi.”

8. Wanem narapela rot yumi inap bihainim pasin bilong Jisas?

 ⁸ Olsem Jisas, yumi laik lusim haptaim long bung wantaim ol sista. Ating yumi ken invaitim ol long kam kaikai wantaim yumi o kisim amamas wantaim yumi. Taim yumi mekim olsem, yumi laik mekim ol tok bilong strongim narapela narapela. (Rom 1:11, 12) Ol elda i mas bihainim pasin bilong Jisas. Em i save olsem pasin bilong stap singel inap putim hevi long sampela, tasol em i tok tu olsem marit na kamapim pikinini i no rot bilong stap amamas tru. (Luk 11:27, 28) Amamas tru i save kam long pasin bilong putim wok bilong Jehova i stap nambawan.—Mat. 19:12.

9. Ol elda inap mekim wanem long helpim ol sista?

⁹ Ol elda i mas mekim pasin long ol meri Kristen olsem sista na mama bilong ol. (1 Tim. 5:1, 2) Paslain long miting na bihain long miting ol elda i mas makim taim long toktok wantaim ol sista. Kristen i tok: “Wanpela elda i luksave olsem mi bisi tru na em i laik save long sediul bilong mi. Mi amamas tru olsem em i tingim mi.” Taim ol elda i makim taim long toktok wantaim ol sista, ol i soim olsem ol i tingim ol. * Annette, em yumi stori pinis long em, i tok planti taim  em i save toktok wantaim ol elda na dispela i helpim em. Em i tok: “Mi save gut moa long ol, na ol i save gut moa long mi. Na taim mi karim wanpela hevi, mi amamas long kisim helpim long ol.”

10. Wanem samting inap strongim ol sista bilong yumi?

¹⁰ Yumi olgeta, ol man na ol meri, i save kisim strong taim ol narapela i luksave long wok bilong yumi na tok amamas long yumi. Tasol taim ol narapela i no soim olsem ol i amamas long wok yumi mekim, yumi save bel hevi. Wanpela singel painia nem bilong em Abigail, em i tok sampela taim em i save pilim olsem ol narapela i no tingim em: “Ol i tingim mi tasol olsem sista o pikinini meri bilong dispela man o meri. Sampela taim mi pilim olsem ol i no save long mi.” Tingim tok bilong wanpela sista nem bilong em Pam. Inap planti yia em i mekim wok misineri taim em i singel. Bihain em i kam bek long ples bilong em long lukautim papamama bilong em. Nau em i gat 70 krismas, na em i mekim yet wok painia. Pam i tok: “Samting i helpim mi tru em taim ol narapela i tok amamas long wok mi mekim.”

11. Olsem wanem Jisas i soim olsem em i amamas long ol meri i bihainim em long mekim wok autim tok?

¹¹ Jisas i amamas long ol bilipmeri i givim “ol samting bilong ol yet” long helpim em. (Luk 8:1-3) Em i larim ol i mekim dispela gutpela wok, na tu, em i kamapim klia ol bikpela tok i tru long laik bilong God long ol. Olsem, em i tokim ol olsem em bai dai na kirap bek. (Luk 24:5-8) Wankain olsem em i bin mekim long ol aposel, em i redim ol dispela meri long ol hevi ol bai bungim long bihain. (Mak 9:30-32; 10:32-34) Em i bikpela samting long tingim olsem, maski ol aposel i ranawe taim ol man i arestim Jisas, sampela bilong ol dispela meri husat i bin sapotim em ol i stap wantaim em taim em i dai long diwai pos.—Mat. 26:56; Mak 15:40, 41.

12. Jisas i givim wanem wok long ol meri?

¹² Jisas i givim ol bikpela wok long ol meri. Olsem, ol bilipmeri ol i fes lain long lukim em taim em i kirap bek. Em i tokim ol dispela meri long tokim ol aposel olsem em i kirap bek pinis. (Mat. 28:5, 9, 10) Na long Pentikos 33 C.E., ating ol meri i bin stap taim God i makim ol disaipel long holi spirit. Sapos olsem, ating ol dispela sista God i makim ol i kisim save long mekim narapela tokples na tokim ol man long “ol strongpela wok bilong God.”—Apo. 1:14; 2:2-4, 11.

13. (a) Ol meri Kristen i mekim wanem long nau? (b) Olsem wanem yumi ken soim tenkyu bilong yumi long ol wok ol i mekim?

¹³ Yumi mas tok amamas long ol sista long ol gutpela wok bilong Jehova ol i mekim. Ol i mekim ol wok olsem wok konstraksen, wok meintenens, sapotim ol grup i mekim narapela tokples, na volantia long Betel. Ol i save helpim wok bilong disasta rilif, wok bilong trensletim ol pablikesen bilong yumi, na mekim wok olsem ol painia na misineri. Olsem ol brata, ol sista i save go long painia skul, Skul Bilong Kingdom Evanselis, na Skul Gileat. Na tu, ol meri i save helpim man bilong ol long mekim ol bikpela wok long kongrigesen na long oganaisesen. Ol meri bilong ol i sapotim ol dispela brata na ol i inapim wok bilong ol long stap “ol man olsem ol presen.” (Efe. 4:8) Yu inap tingim sampela rot we yu ken sapotim ol dispela sista long ol wok ol i mekim?

14. Olsem Buk Song 68:11 i kamapim, ol elda i save mekim wanem?

 ¹⁴ Ol elda i save olsem ol sista i stap olsem “bikpela lain ami” i redi long mekim wok na ol i save mekim gut wok bilong autim gutnius. (Ritim Buk Song 68:11.) So ol elda i save kisim helpim long ekspiriens bilong ol. Abigail, em yumi bin stori pinis long em, i save amamas taim ol brata i askim em long wanem gutpela rot bilong kirapim tok wantaim ol man taim em i autim tok. Em i tok: “Dispela i helpim mi long luksave olsem wok mi mekim em i bikpela samting long oganaisesen bilong Jehova.” Na tu, ol elda i luksave olsem ol gutpela sista i stap longpela taim, i save mekim gutpela wok bilong helpim ol yangpela sista taim ol i karim hevi. (Tai. 2:3-5) Tru tumas, yumi mas amamas long ol sista!

15. Wanem samting inap mekim na ol sista inap nidim wanpela long sambai long ol?

¹⁵ Sampela taim ol sista bai nidim wanpela long sambai long ol taim ol i bungim wanpela hevi. (Ais. 1:17) Olsem, wanpela wido o sista i divos inap nidim helpim bilong wanpela long toktok na mekim sampela wok em bipo man bilong em i save mekim. Wanpela lapun sista inap nidim helpim long toktok long ol dokta. O wanpela painia sista i mekim ol narapela wok tiokratik inap nidim wanpela long sambai long em sapos ol narapela i sutim tok long em olsem em i no kam autim tok planti taim olsem ol narapela painia i mekim. Wanem ol narapela rot yumi ken helpim ol sista bilong yumi? Yumi ken tingim eksampel bilong Jisas.

16. Olsem Mak 14:3-9 i kamapim, olsem wanem Jisas i sambai long Maria?

¹⁶ Jisas i redi long sambai long ol sista taim ol narapela i kisim tingting kranki long ol. Kain olsem, em i sambai long Maria taim Marta i sutim tok long em. (Luk 10:38-42) Na tu, em i sambai long Maria taim ol narapela i kros olsem samting em i mekim i no stret. (Ritim Mak 14:3-9.) Jisas i save long astingting bilong Maria na tok amamas long em, em i tok: “Em i mekim gutpela pasin long mi. . . . Meri i mekim samting em inap long mekim.” Em i mekim tok profet tu olsem ol man bai stori long gutpela pasin bilong em “long wanem wanem hap bilong graun ol i autim gutnius long en.” Em narapela kain olsem Jisas i kolim wok bilong autim tok bai kamap long olgeta hap taim em i stori long gutpela pasin bilong Maria! Ating ol dispela tok i strongim Maria bihain long ol i sutim tok long em!

17. Wanem taim i stret long sambai long wanpela sista? Stori long wanpela eksampel.

¹⁷ Yu save sambai long ol sista taim ol i nidim wanpela long sambai long ol? Olsem, tingim dispela stori. Sampela pablisa i lukim olsem wanpela sista em man bilong em i no Witnes i save kam leit olgeta taim long miting na go hariap taim miting i pinis. Ol i luksave olsem em i no save kisim ol pikinini bilong em i kam. So ol i askim olsem wai na em i no laik tok strong long man bilong em long larim em i mekim ol samting bilong lotu, na ol i sutim tok long em. Tasol tru tru, dispela sista i mekim olgeta samting em inap long mekim. Em i no bosim taim bilong em yet, na tu, man bilong em i save mekim olgeta disisen bilong ol pikinini. Yu inap mekim wanem? Sapos yu tok amamas long sista na tokim ol narapela long ol gutpela samting em i mekim, yu inap pasim ol long sutim tok long em.

18. Wanem ol narapela rot yumi inap helpim ol sista bilong yumi?

¹⁸ Yumi inap soim olsem yumi tingim ol  sista bilong yumi taim yumi givim helpim ol i nidim. (1 Jon 3:18) Annette i save lukautim mama bilong em husat i sik, em i tok: “Sampela pren i save kisim kaikai i kam na was long mama na bai mi ken mekim sampela narapela wok. Dispela i mekim mi pilim olsem ol i laikim mi na mi hap bilong kongrigesen.” Jordan i kisim helpim tu. Wanpela brata i helpim em long hau em yet inap stretim kar bilong em. Em i tok: “Em gutpela long save olsem ol brata na sista bilong mi i tingim seifti bilong mi.”

19. Wanem sampela rot moa ol elda inap helpim ol sista?

¹⁹ Olsem tasol, ol elda i save helpim ol sista. Ol i save Jehova i laik bai ol narapela i mekim gutpela pasin long ol sista. (Jems 1:27) Olsem na ol i bihainim pasin bilong Jisas long tingim ol sista, na ol i pilim tingting bilong ol na ol i no putim ol lo samting. (Mat. 15:22-28) Taim ol elda i hariap long helpim ol sista, dispela i helpim ol long pilim olsem Jehova na oganaisesen bilong em i tingim ol. Taim grup ovasia bilong Kia i harim olsem em bai muv i go long nupela haus, em i stretim rot long givim helpim long em. Kia i tok: “Dispela i daunim presa bilong mi. Ol elda i mekim ol gutpela tok na ol i helpim mi, ol i soim olsem mi hap bilong kongrigesen na mi no stap wanpis taim sampela samting i putim hatwok long mi.”

20-21. Olsem wanem yumi ken soim olsem yumi laikim olgeta sista Kristen bilong yumi?

²⁰ Taim yumi lukim kongrigesen bilong yumi long nau, i gat planti sista i save givim bel tru long wok na i stret yumi sapotim ol. Olsem yumi kisim skul long eksampel bilong Jisas, yumi ken helpim ol taim yumi lusim haptaim long stap wantaim ol na save gut moa long ol. Yumi ken soim tenkyu bilong yumi long ol wok bilong God ol i mekim. Na yumi ken sambai long ol taim i stret long mekim olsem.

²¹ Long pinis bilong pas aposel Pol i raitim i go long ol bratasista long Rom, em i kolim nem bilong 9-pela sista Kristen. (Rom 16:1, 3, 6, 12, 13, 15) Ol dispela sista i kisim strong taim ol i harim ol tok gude na tok amamas Pol i mekim. Olsem tasol, yumi mas sapotim olgeta sista bilong yumi long kongrigesen. Taim yumi mekim olsem, yumi soim ol olsem yumi laikim ol na ol i hap bilong famili bilong yumi.