1. Sangano rinopa rubetso ripi hanzvadzi, asi dzinosongana no zvineso zvipi? (Onai mufanikiso uri pa kapa.)

TINOPFARA maningi kuona hanzvadzi dzakawanda dzirikuita zvakawanda mu ungano! Ngo muezaniso, idzona dzinopinda misangano ye ungano uye dzinobuda mu basa rekuparidza masoko anopfadza. Hanzvadzi dzimweni dzinobetsera pa kugadzirisa Nyumba dze Umambo uye dzinozwirawo usisi hama no hanzvadzi dzimweni. Zviri pamhene kuti idzona dzinosonganawo no zvineso. Dzimweni dzinodikana kucengeta abereki akura. Dzimweniwo dzinozondhwa nge mhuri. Uye dzimwenizve adzina anarume, uye anoseenza no simba kuti ariritire ana awo.

2. Ngei tecidikana kubetsera hanzvadzi dzedu?

² Ngei tecidikana kubetsera hanzvadzi dziri mu ungano? Nge kuti nyika aibati zvakanaka anakadzi uye aiyareremedzi. Kusiya izvi, Bhaibheri rinotikohomedzesa kuti tibetsere hanzvadzi idzi. Ngo muezaniso, mu apostori Pauro wakangwadza ungano ye ku Roma kuti atambire Febe uye kuti ‘amubetsere pa zviro zvese zvaaida.’ (Aro. 16:1, 2) Kuita hingana Afarisi amweni, pamweni Pauro aibata uye aiona anakadzi hingana asikakoshi. Asi mu masure me kugara mu Kristu, Pauro akatanga kuteedzera Djesu mukubata anakadzi ne rureremedzo.—1Ako. 11:1.

3. Djesu aibata kudini anakadzi, uye aiona kudini aya aiita kuda ka Mwari?

³ Djesu aibata anakadzi ese no rureremedzo. (Ju. 4:27) Iyena ainga asikaoni anakadzi hingana zvaizwa no akuru e magreja munguwa iyona. Bhuku re enciclopédia rinopanganidza nge zve bhaibheri rinoti: “Djesu aambozi kureketa ciro cinopsverusa kana kushora anakadzi.” Djesu aireremedza anakadzi aita kuda ka Baba ake. Zvezvirokwazvo, iyena waiawona hingana hanzvadzi dzake aiyabatanidza pamwepo no anarume hingana nhai ye mhuri.—Mt. 12:50.

4. Ticaonei mu fundo ino?

 ⁴ Djesu ainga akagadzirira kubetsera anakadzi aiseenzera Mwari. Iyena akaita izvi nge kutora nguwa yakawanda ainawo, kuwareremedza uye kuwadziirira. Ngationei kuti tingateedzera kudini Djesu pakupangidza rureremedzo hanzvadzi dzedu.

5. Ngei zvinoshupha ku hanzvadzi dzimweni kuti dzione nguwa ye kupfara?

⁵ Tese hedu, hama no hanzvadzi, tinoda kugara no ushamwari wakanaka. Asi nguwa dzimweni, zvinoshuphira hanzvadzi dzimweni. Ngei? Onai zvakarekethwa no hanzvadzi dzimweni. Jordan * unoti: “Ngekuti andisati ndawakwa zvinoshupha kuona basa randingaita mu ungano, zvinoita hingana kuti anditobatanidzwi.” Kristen, pionera wakacinja ungano kuti aite zvakawanda mu basa re kuparidzira, unoti: “Pamunocinja mecienda ku ungano ipsva, munozwa hingana mapsvetwa.” Uye hama dzimweni dzinozwawo kudaro. Aya anorarama mu mhuri isikazi kubatana, angakwanisa kusazwa ari padhuze no mhuri yawo kamare uye munguwa imweyo, kuzwa hingana asikazi kubatana no hama dze mu ungano. Hanzvadzi dzisikabudi pa nyumba nge ndaa ye nhenda kana kuti anodikana kubetsera we mu mhuri unonga ecirhwara anokwanisa kuzwa ari oga. Annette unoreketa eciti: “Mai angu aida rubetso rangu nguwa dzese. Ndiyo ndaa, zvainga zvisikaiti kuti nditende pandaipikwa no hama kuti tipfare.”

6. Maererano na Ruka 10:38-42 Djesu wakabetsera kudini Maria na Marta?

⁶ Djesu waitora nguwa ecicedza no hanzvadzi dzake mukutenda. Iyena wainga ari shamwari ye cokwadi. Ngo muezaniso, rangarirai ushamwari waainga anawo na Maria uye Marta. Tikada kuona, iwona ainga asikazi awakwa. (Erengai Ruka 10:38-42.) Djesu paaicedza nawo, waireketa uye waiita zviro zvaiwasiya akasudzunuka. Maria wakazwa akasudzunuka kugara pa tsoka dza Djesu hingana zvaiizwa no afundi. * Uye Marta wakazwa akasudzunuka kubvunza Djesu kuti wainga akanyangadzwa nge ndaa yekuti Maria wainga asikamubetsi pakugadzirira zvekurhya. Muciitiko ici cisikazi kurongwa, Djesu wakafundisa fundo dzinokosha kuna Marta uye Maria. Uye kainga kusiripi kekutanga kuvhakacirhwa na Djesu. Iyena akazviita kakawanda, kupangidza kuti waida maningi Maria, Marta uye mukoma wawo Razaro. (Ju. 12:1-3) Razaro paakarhwara maningi, Maria na Marta aiziya kuti ainga ano rubetso ra Djesu.—Ju. 11:3, 5.

7. Tingabambisa kudini hanzvadzi dzedu?

⁷ Kune hanzvadzi dzimweni, misangano ndiyo basi mukana we kugara no hama dzawo mukutenda. Ngo kudaro, tinodikana kukhorovhera mikana ii kuti tiyatambire, kuti tirekete nawo uye kuti tiapangidzire kuti tinowada. Jordan, wamborekethwa nge zvake, unoti: “Ndinozwa zvakanaka anhu paanotenda mhinduro yandinonga ndapasa, paanopangana na inini kuti tibude mu basa re kuparidzira kana kuti paanopangidza kuti anondirangarirawo.” Tinodikana kuita kuti hanzvadzi dzedu dziziye kuti dzinokosha katiri. Kia unoti: “Pandinorovha ku misangano, ndinoziya kuti ndicatambira mesaji pa thurufunu ecida kuziya kuti ndakadini. Izvi  zvinondipasa rugondo rekuti hama dze mu ungano dzinondida.”

8. Mishobo ipizve yatingateedzera Djesu?

⁸ Hingana Djesu, tinodikana kutenga nguwa kuti tigare no hanzvadzi dzedu. Madini kuwapika kuti murhye uye mupfare nawo pamwepo? Munguwa dzakadai, reketai zviro zvinoabambisa. (Aro. 1:11, 12) Kana muri mukuru, edzurirai muezaniso wa Djesu nguwa dzese. Iyena waiziya kuti, kune amweni, azviripi nyore kugara ari oga. Uye, iyena akabvisawo pamhene kuti mupfaro usikaperi aubvi pakuwakwa kana kugara no ana. (Ru. 11:27, 28) Zvezvirokwazvo, cinoita kuti munhu aone mupfaro usikaperi, kukanda basa ra Djehovha pekutanga mu upenyu.—Mt. 19:12.

9. Akuru anodikana kuitei kuti abetsere hanzvadzi?

⁹ Akuru, anodikana kubata anakadzi ari muungano hingana hanzvadzi dzawo kana kuti mai awo e kumwiya. (1Ti. 5:1, 2) Zvakanaka kuti atenge nguwa ye kucedza no hanzvadzi dzawo misangano isati yatanga kana kuti yapera. Kristen, unoti: “Mukuru umweni wakaona kuti ndainga ndakabatikana maningi uye wakandibvunzisa kuti zviro zvaindihambira kudini zuwa no zuwa. Ndakapfara maningi nge kuona kuti anondirangarirawo.” Akuru paanotenga nguwa kuti acedze no hanzvadzi  dzawo dze kumwiya, anonga ecipangidza kuti anowarangarira. Annette, wamborekethwa nge zvake, unoreketa pe zvakanakira kucedza no akuru, iyena unoti: “Izvi zvinondibetsera kunyasa kuaziya uye iwona kunyasa kundiziyawo. Uye pandinosongana no matambudziko akakura, ndinozwa ndakasudzunuka kukumbira rubetso rawo.” *

10. Zvii zvingabetsera hanzvadzi dzedu kuti dzizwe zvakanaka?

¹⁰ Tese hedu, anarume kutobatanidzawo no anakadzi, tinozwa zvakanaka amweni paanoziya zvatinokwanisa kuita uye paanoreremedza basa ratinomga taita. Ngo dii rimweni, munhu, paasikareremedzi zvatinoita kana kupeta masimba katinoita, tingaora mwoyo. Pionera umweni usikazi kuwakwa unozwi Abigail unoreketa kuti nguwa dzimweni unozwa hingana warambwa. Iyena unoti: “Kune amweni, nditori basi hanzvadzi ya ngana kana kuti mwana wa ngana. Panguwa dzimweni, ndinozwa hingana ndisikaoneki.” Ngo dii rimweni, onai zvinorekethwa no hanzvadzi imweni inozwi Pam. Paainga asati awakwa, wakaseenza ke nguwa yakareba hingana missionária. Pedzepo iyena waidikana kuwhirira kumba kuti abetsere abereki ake. Zvino iyena waane makore anodarika 70, uye urikurumbwa eciseenza hingana pionera. Iyena unoti: “Ndinobetsereka maningi anhu paanoreremedza zvese zvandinoita.”

11. Djesu akapangidza kudini kuti aireremedza anakadzi aimubetsera mubasa re kuparidzira?

¹¹ Hanzvadzi dzimweni dzakagondeka dzaibetsera Djesu “ngo zviro zvawo.” (Ru. 8:1-3) Djesu aidapi basi kuti anakadzi agare no makomborero aya, asi aiyabvunza cokwadi cakadzika. Ngo muezaniso, ayena ainga aabvunza kuti aizofa uye aizomutswa. (Ru. 24:5-8) Hingana zvaakaita no apostori ake, Djesu wakagadzirira ateeri ake e anakadzi pa miyedzo yaaizosongana nawo. (Mk. 9:30-32; 10:32-34) Asi tikada kuona, Djesu paakasungwa, afundi ake akatiza. Asi iyena paainga ecifa pamutanda we kutambudzikira, anakadzi amweni aimutsigira ainga aripo.—Mt. 26:56; Mk. 15:40, 41.

12. Djesu akapasa anakadzi basa ripi?

¹² Djesu aipasa anakadzi mabasa anokosha. Ngo muezaniso, Inhu akatanga kuona Djesu paakamutswa, anakadzi akagondeka. Uye Djesu akaapasa basa rekuti aende kobvunza apostori nge zve rumuko. (Mt. 28:5, 9, 10) Kupinda izvi, pamweni zvingaita kuti anakadzi ainga ariyoo mwiya mucena pewakadururhwa mugore ra  33 K.A., kana izvi zvakaitika, zvezvirokwazvo hanzvadzi idzi dzakatotambirawo cipo cinoshamisa ce kureketa mureketero we nyika dzimweni. Nge kudaro, iwona akapindawo mu basa re kubvunza anhu amweni “zviro zvinoshamisa zva Mwari.”—Zvi. 1:14; 2:2-4, 11.

13. Zvii zviri kuizwa no hanzvadzi nyamasi uno pa basa ra Djehovha, uye mungapangidza kudini kuti munoreremedza zvese zvaanoita?

¹³ Hanzvadzi dzedu dzakasisira kusimbwa nge zvese zvaanoita mubasa ra Djehovha. Zvinobatanidza kuwaka uye kugadzirisa Nyumba dze Umambo, kubetsera grupu re mureketero we nyara, uye basa re kudzipira re pa Betheri. Aona anobetsera panoitika njodzi, pa kuturikira mabhuku, uye anoseenza hingana mapiyoneira uye mamisiyonaria. Hingana hama, hanzvadzi dzinopindawo Cikora ce Mapiyona, Cikora ce Aziisi e Masoko e Umambo uye Cikora ce Giriyedhi. Kupinda izvi, aya akawakwa anobetsera anarume awo kuti abate zvakanaka mitoro yaanayo mu ungano uye mu sangano. Hama idzi  dzingakwanisa kugara “zvipo zve anarume” ecibetserhwa no anakadzi awo. (Aef. 4:8) Mungakwanisa kurangarira here kuti mungabetsera kudini hanzvadzi idzi pa zvese zvaanoita?

14. Tecirangarira zviri pana Pisarema 68:11, akuru ano ungwaru anoitei?

¹⁴ Hanzvadzi dzinoumba “arhwi akuru” e aseenzi akadzipira. Uye zvezvirokwazvo awona anobudirira pa basa re kuparidzira. (Erengai Pisarema 68:11.) Akuru ano ungwaru anoziya izvi uye anoita zviri zvese kuti afunde zvakawanda pa experiencia dzino hanzvadzi dzedu. Abigail, amboretethwa nge zvake, anozwa ecibambiswa kana hama dzikamubvunzisa nge zve mishobo ingabudirira pe kutangisa makani mu ndima. Iyena unoti: “Izvi zvinondibetsera kuona kuti Djehovha akandicengetera mbuto mu sangano rake.” Kusiya izvi, akuru anoziya kuti hanzvadzi dzakagondeka dzakura dzinobudirira pa kubetsera anzvadzi dzinonga dzecisongana no matambudziko. (Tit. 2:3-5) Zviri pamhene kuti, hanzvadzi dzedu dzinosisira rudo redu uye rukudzo!

15. Migarire ipi ye zviro, yekuti hanzvadzi dzingada munhu angadzidziirira?

¹⁵ Pa nguwa dzimweni, hanzvadzi dzinopinda mukupikiswa kakakura zvekuti dzinoda munhu anowadziirira. (Isa. 1:17) Ngo muezaniso, hanzvadzi iri mufirhwa kadzi kana kuti yakarambwa pamweni ingada munhu ingamudziirira pa zvitenderhwa zvake uye ingamubetsera nge basa raiizwa no mwamuna wake. Pamweni hanzvadzi yakura ingada rubetso re munhu angareketa no medhiko. Pamwenizve, piyonera umweni unoseenza pa mabasa e sangano pamweni ungada rubetso re munhu angamudziirira paanonga ecishorha nge kutama kubuda mubasa re kuparidzira hingana amweni. Zvii zvamungaitazve kuti mubetsere hanzvadzi dzedu? Ngationeizve kecipiri muezaniso wa Djesu.

16. Maererano na Marko 14:3-9, Djesu wakadziirira kudini Maria?

¹⁶ Djesu wainga akagadzirira pa kudziirira hanzvadzi dzake mukutenda padzaishorhwa. Ngo muezaniso, wakadziirira Maria paaishorhwa na Marta. (Ru. 10:38-42) Uye akamudziirirazve kecipiri, amweni paaireketa kuti iyena wainga aita cisananguro cakashata. (Erengai Marko 14:3-9.) Djesu wakaziya caita kuti Maria aite izvona uye akamusimba, eciti: ‘Iyena wandiitira zviro zvakanaka. . . . Iyena waita zvaanokwanisa.’ Djesu wakatophorofita eciti: “kwese kuchaparidzwa masoko akanaka munyika yese, zvaizwa ne mwanakadzi uu zvicharekethwawo ecirangairhwa.” Izvi ndizvona zviri kuizwawo no fundo ino nyamasi. Pasina mubvunzo, masoko aDjesu akabambisa Maria mumasure mekubva kushorhwa! Uye ciro cinopfadza, mushobo wakaseenzesa Djesu usisi wa Maria kuti arekete nge zve basa rekuparidza raizoizwa mu nyika dzese.

17. Pasai muezaniso e kuti mungadziirira kudini hanzvadzi?

¹⁷ Munodziirira hanzvadzi dzenyu mukutenda here? Ngo muezaniso, rangarirai izvi: Mu ungano yenyu mune hanzvadzi ino mwamuna asikatendi. Aparidzi amweni anoiwona ecinonoka kuguma pamisangano uye anobuda mu masure me “ameni.” Kupinda izvi, hanzvadzi ii aisati yakambouya no ana ku misangano. Hino aparidzi anotanga kumushora eciti: Ngei iyena areketi zviripozvo kune mwamuna wake? Asi zvezvirokwazvo, hanzvadzi ii iri kuita zvese zvainokwanisa. Iyena andiepi unoonerera urongwa wake; Andiyepi unoreketa zvekuita nge ndaa ye ana. Mungaitei kuti muidziirire? Simbai hanzvadzi ii nge kupeta masimba  kairikuita uye reketai no amweni nge zvakanaka zvaari kuita. Ngo kudaro, munonga meciita kuti isashorhwe.

18. Mishobo ipizve yatingabetsera nayo hanzvadzi dzedu?

¹⁸ Tinokwanisawo kupangidza kuti tinoda hanzvadzi dzedu nge kuwapasa nhungamiriro dzinowabetsera. (1Ju. 3:18) Annette, hanzvadzi yaibetsera mai ayo ari kurhwara, inoti: “Hama dzimweni dzaiuya kumba kuti ambondibetsere kana kuunzisa zvekurhya. Ndaizwa kuti ndinodiwa, uye ndaizwa kuti ndiri nhai ye ungano.” Jordan wakabatsirhwawo. Hama imweni akamubvunza kuti angagadzirisa kudini karu yawo. Iyena unoti: “Zvakanaka kuziya kuti hama dzangu dzinoda kuti ndigare ndakacengeteka.”

19. Akuru angabetsera hanzvadzi nge mushobo upi?

¹⁹ Ngo mushobo umwewo, akuru anodikana kubetsera pazvinodikanwa ne hanzvadzi. Iwona anoziya kuti Djehovha unoda kuti hanzvadzi dzibatwe zvakanaka. (Tg. 1:27) Akuru anodikana kugara anhu anozwisisa hingana Djesu; iwona aadikani kugadza zvimitemo paanoda kubetsera munhu. (Mt. 15:22-28) Akuru paanogara pekutanga pa kubetsera, hanzvadzi dzinozwa kuti Djehovha no sangano rake anowada. Kia wamboreketwa nge zvake. Waida kucinja pe kugara. Muwonereri we grupu rake paakazvizwa, wakaita kuti paoneke rubetso no kukasika. Iyena unoti: “Izvi zvakandinyaradza maningi. Kubatanidza masoko ekunyaradza e akuru uye no rubetso raakandipasa, zvakapangidza pamhene kuti ndiri imwe nhai ye ungano. Ndinoziya kuti, kunyazi mu migariro e zviro zvinoshupha, andiripi ndega.”

20-21. Mungapangidza kudini kuti hanzvadzi dze mu ungano yenyu dzinokosha?

²⁰ Mu ungano imwe na imwe, tinogumira miezaniso wakasiyana, we hanzvadzi dzinoda rubetso redu. Hingana zvetakafunda pa muezaniso wa Djesu, tinodikana kuwabetsa nge kupedza nguwa yakawanda nawo uye kunyasa kuwaziya. Uye tinodikana kupangidza kuti tinoreremedza zvese zvaanoita mu basa ra Mwari. Uye pakupedzesera, tinodikana kuwadziirira kana zvecidikana.

²¹ Pa tsamba yake yaakatarira Aroma, mu apositori Pauro wakareta anakadzi 9 nge mazina. (Aro. 16:1, 3, 6, 12, 13, 15) Pasina mibvunzo akabambiswa paakazwa kuerengwa ke tsamba ii ecikwadziswa uye ecisimbwa na Pauro. Hinga Pauro, betserai hanzvadzi dzese dze mu ungano yenyu. Ngo mushobo uu munonga meciapangidza kuti iwona anobatanidzwawo mu nhai ye mhuri yedu ye ku mwiya.