1. Vhahashu vha tshifumakadzini vha tikedza hani ndangulo fhedzi vhanzhi vha imedzana na thaidzo dzifhio? (Sedzani tshifanyiso tshi re kha gwati.)

ZWI a ri takadza u vha na vhahashu vha tshifumakadzini vhane vha shuma vhukuma tshivhidzoni. Sa tsumbo, vha shela mulenzhe miṱanganoni na tsimuni. Vhaṅwe vha thusa kha u ṱhogomela Holo na u ṱhogomela vhahashu tshivhidzoni. Zwi tou pfala uri vha a vha na dzithaidzo. Vhaṅwe vha ṱhogomela vhabebi vhavho vha re vhaaluwa. Vhaṅwe vha a pikiswa nga miṱa yavho. Ngeno vhaṅwe vha si na vhafarisi nahone vha tshi shuma nga maanḓa uri vha ṱhogomele vhana vhavho.

2. Ndi ngani ri tshi tea u ḓidina u itela u tikedza vhahashu vha tshifumakadzini?

² Ndi ngani ri tshi tea u tikedza vhahashu vha tshifumakadzini? Ndi ngauri a si kanzhi shango ḽi tshi ṱhonifha vhafumakadzi. Zwiṅwe hafhu, Bivhili i ri ṱuṱuwedza u vha tikedza. Sa tsumbo, muapostola Paulo o humbela tshivhidzo tsha Roma uri tshi ṱanganedze Foivhe na uri vha “mu ṋee zwine a shaya.” (Vharoma 16:1, 2) Samusi Paulo o thoma e mufarisei, o vha e tshipiḓa tsha vhathu vha dzhielaho vhafumakadzi fhasi. Fhedzi musi a tshi vha Mukriste, o edzisa Yesu, a ṱhonifha vhafumakadzi na u vha sumbedza vhuthu.​—1 Vhakor. 11:1.

3. Yesu o fara hani vhafumakadzi nahone o dzhia hani vhafumakadzi vhe vha ita zwi funwaho nga Mudzimu?

³ Yesu o vha a tshi ṱhonifha vhafumakadzi vhoṱhe. (Yoh. 4:27) O vha a sa vha dzhii u fana na nḓila ye vharangaphanḓa vha vhurereli vha Vhayuda vha vha dzhia ngayo. Iṅwe bugu i ṱalutshedzaho Bivhili i ri: “Yesu ho ngo vhuya a amba maipfi ane a nyadzisa vhafumakadzi.” Fhedzi vhafumakadzi vhe vha ita zwi funwaho nga Khotsi awe, o vha a tshi vha ṱhonifha nga ho khetheaho. O vha dzhia sa khaladzi dzawe nahone a vha bula khathihi na vha vhanna vhe a vha dzhia sa muṱa wawe.​—Mat. 12:50.

4. Ri ḓo amba nga ha mini kha ino thero?

 ⁴ Yesu o vha a tshi dzula o lugela u thusa vhafumakadzi vha shumelaho Mudzimu. O vha a tshi vha dzhiela nṱha nahone a tshi vha imelela. Kha ri ambe nga ha uri ri nga edzisa hani nḓila ye Yesu a fara ngayo vhahashu vha tshifumakadzini.

5. Ndi ngani vhaṅwe vhahashu vha tshifumakadzini zwi tshi nga vha konḓela u vha na vhukonani na vhahashu?

⁵ Roṱhe ri a ṱoḓa u vha na vhukonani na vhahashu. Fhedzi nga zwiṅwe zwifhinga zwi nga konḓela vhahashu vha tshifumakadzini u vha na vhukonani na vhahashu. Ndi ngani? Ṱhogomelani zwe vhaṅwe vhahashu vha tshifumakadzini vha zwi amba. Muṅwe wahashu wa tshifumakadzini ane a pfi Jordan * u ri: “Samusi ndi songo vhingwa, ndi pfa u nga a thi na mushumo tshivhidzoni nahone a thi tshipiḓa tshatsho.” Muṅwe muvulanḓila ane a pfi Kristen we a pfulutshela kha tshiṅwe tshivhidzo uri a ite zwo engedzeaho kha mushumo wa u huwelela u ri: “Musi wo pfulutshela kha tshiṅwe tshivhidzo, u nga ḓipfa u tshi nga u woṱhe.” Na vhaṅwe vhahashu vha tshinnani vha nga ḓipfa nga yeneyo nḓila. Vhane vha dzula na mashaka ane a si vhe Dziṱhanzi zwi nga vha konḓela u vha tsini navho. Zwi nga dovha zwa vha konḓela u vha na vhukonani na vhahashu tshivhidzoni. Vhaṅwe vhahashu vha tshifumakadzini vha nga pfa vhe na vhuludu ngauri vha a lwala nahone a vha koni u bva nḓuni kana ngauri vha khou ṱhogomela muthu ane a lwala. Annette u ri: “Ndo vha ndi sa koni u ḓimvumvusa na vhahashu ngauri ndo vha ndi tshi tea u ṱhogomela mme anga.”

6. U ya nga Luka 10:38-42, Yesu o thusa hani Maria na Marita?

⁶ Yesu o fhedza tshifhinga na vhafumakadzi vha shumelaho Mudzimu nahone o vha e khonani yavho ya vhukuma. Kha ri vhone vhukonani he a vha e naho na Maria na Marita vhe vhuvhili havho vha vha vha songo vhingwa. (Vhalani Luka 10:38-42.) Zwi tou pfala uri Yesu o ita uri vha ḓipfe vho vhofholowa nga zwe a amba na u zwi ita. Sa tsumbo, Maria o ḓipfa o vhofholowa u dzula milenzheni ya Yesu sa mufunziwa. * Marita o pfa o vhofholowa u amba na Yesu musi o dinalea nge Maria a si mu thuse u lugisa zwiḽiwa. Nga tshenetsho tshifhinga, Yesu o vha gudisa zwithu zwa ndeme. O dovha a sumbedza uri u na ndavha na vhenevha vhafumakadzi na khaladzi avho Lazaro nga u dzula a tshi vha dalela. (Yoh. 12:1-3) A zwi ri mangadzi uri Maria na Marita vho humbela thuso kha Yesu musi Lazaro a tshi khou lwala vhukuma.​—Yoh. 11:3, 5.

7. Ri nga ṱuṱuwedza hani vhahashu vha tshifumakadzini?

⁷ Miṱanganoni ndi huṅwe ha fhethu hu si gathi hune vhaṅwe vhahashu vha tshifumakadzini vha kona u vha na vhahashu. Ngauralo, ri tea u vha ṱanganedza, u amba navho na u vha sumbedza uri ri na ndavha navho. Jordan we ra amba nga hae u ri: “Kha nṋe ndi zwihulwane musi vhathu vha tshi khoḓa phindulo dzanga, vha tshi ṱoḓa u shuma na nṋe tsimuni na u sumbedza uri vha na ndavha na nṋe nga iṅwe nḓila.” Ri tea u sumbedza vhahashu vha tshifumakadzini uri ndi vha ndeme kha riṋe. Kia u ri: “Ndi a zwi ḓivha uri arali nda sa ya muṱanganoni, vhahashu vha ḓo nthumela mulaedza vha tshi ṱoḓa u ḓivha uri ndo vuwa hani. Zwenezwo zwi ntsumbedza uri vhahashu vha na ndavha na nṋe.”

8. Ri nga edzisa hani tsumbo ya Yesu?

⁸ Ri nga edzisa Yesu nga u fhedza tshifhinga na vhahashu vha tshifumakadzini. Khamusi ri nga vha ramba uri ri ḽe navho kana ri ḓimvumvuse navho. Musi ri navho, ri ambe zwi fhaṱaho.  (Vharoma 1:11, 12) Vhahulwane vha fanela u vha na mahumbulele a fanaho na a Yesu. O vha a tshi zwi ḓivha uri vhaṅwe zwi ḓo vha konḓela u sa vha mbinganoni. Fhedzi o zwi bvisela khagala uri u vha mbinganoni kana u vha na vhana a si zwone zwine zwa ita uri muthu a takale lwa tshoṱhe. (Luka 11:27, 28) Nṱhani hazwo, zwine zwa ita uri muthu a takale lwa tshoṱhe ndi musi u shumela Yehova zwi zwone zwa ndeme khae.​—Mat. 19:12.

9. Vhahulwane vha nga thusa hani vhahashu vha tshifumakadzini?

⁹ Vhahulwane ndi vhone vhane zwihuluhulu vha tea u dzhia vhafumakadzi vha Vhakriste sa khaladzi dzavho na vhomme avho. (1 Tim. 5:1, 2) Zwi nga vha zwavhuḓi arali vhahulwane vha ḓifha tshifhinga tsha u amba na vhahashu vha tshifumakadzini musi miṱangano i sa athu u thoma kana musi yo no fhela. Kristen u ri: “Muṅwe muhulwane o vhona uri ndo vha ndo farakanea vhukuma, a ṱoḓa u ḓivha uri ndo vhekanya hani mishumo yanga. Ndo takalela uri u na ndavha na nṋe.” Musi vhahulwane vha tshi ḓifha tshifhinga tsha u amba na vhahavho vha tshifumakadzini, vha sumbedza uri vha na ndavha navho. * Annette we ra amba nga hae u amba uri ndi ngani zwi zwavhuḓi u dzula a tshi amba na vhahulwane. U ri: “Zwi ita uri ndi vha ḓivhe khwine na vhone vha nḓivhe-vho. Nga zwenezwo, musi ndi na thaidzo zwi a leluwa u vha humbela thuso.”

10. Ndi mini zwine zwa nga ita uri vhahashu vha tshifumakadzini vha takale?

¹⁰ Roṱhe ri a takala musi vhathu vha tshi dzhiela nṱha vhukoni hashu na mushumo une ra u ita hu sa londwi uri ri vhanna kana vhafumakadzi. Fhedzi ri a kulea nungo arali vhathu vha sa dzhieli nṱha vhukoni hashu na mushumo we ra u ita. Muṅwe muvulanḓila a songo vhingwaho ane a pfi Abigail u vhona u nga vhathu a vha na ndavha nae nga zwiṅwe zwifhinga. U ri: “Vhathu vha sokou ndzhia sa mukomana wa mugede na mugede kana ṅwana wa vho mukene na vho mukene. Nga zwiṅwe zwifhinga ndi vhona u nga vhathu a vha mboni.” Fhedzi ṱhogomelani zwe muṅwe wahashu wa tshifumakadzini ane a pfi Pam a zwi amba. Pam ho ngo vhingwa nahone o shuma lwa miṅwaha minzhi sa murumiwa. O fhedza o vhuya hayani u ṱhogomela vhabebi vhawe. Na zwino u kha ḓi vha muvulanḓila e miṅwahani ya vho-70. Pam u ri: “Zwe zwa nthusa vhukuma ndi musi vhathu vha tshi mbudza uri vha livhuwa mushumo une nda u ita.”

11. Yesu o sumbedza hani uri u dzhiela nṱha vhafumakadzi vhe vha tshimbila nae?

¹¹ Yesu o zwi dzhiela nṱha musi vhafumakadzi vha shumelaho Mudzimu vha tshi mu thusa nga “zwine vha vha nazwo.” (Luka 8:1-3) Ho ngo sokou vha tendela fhedzi vha tshi vha na ndugelo ya u mu thusa, fhedzi o dovha a vha dzumbululela zwithu zwa ndeme zwine Mudzimu a zwi ṱoḓa nga hae. Sa tsumbo, o vha vhudza uri u ḓo fa a dovha a vuswa. (Luka 24:5-8) O ita uri vha lugele milingo ye vha vha vha tshi ḓo ṱangana nayo, sa zwe a ita kha vhaapostola. (Marko 9:30-32; 10:32-34) Naho vhaapostola vha Yesu vho shavha musi a tshi farwa, vhaṅwe vha vhafumakadzi vhe vha mu tikedza vho mu vhona musi a tshi fela kha danda.​—Mat. 26:56; Marko 15:40, 41.

12. Yesu o ṋea vhafumakadzi mushumo ufhio?

¹² Yesu o ṋea vhafumakadzi mushumo wa ndeme. Sa tsumbo, vhafumakadzi vha shumelaho Mudzimu ndi vhone vho thomaho u vhona uri o vuswa. O ruma vhenevho vhafumakadzi uri vha vhudze vhaapostola uri o vuswa vhafuni. (Mat. 28:5, 9, 10) Khamusi vhafumakadzi vho vha vhe hone nga Pentekoste ya 33 C.E. musi vhafunziwa vha tshi ḓodzwa nga muya mukhethwa. Arali vho vha vhe hone, na vhone vha nga vha vho kona u amba nga ndimi nga vhuṱolo, vha vhudza vhaṅwe nga ha “mishumo ya maanḓa ya Mudzimu.”​—Mish. 1:14; 2:2-4, 11.

13. Vhafumakadzi vha Vhakriste vha khou ita mini ṋamusi nahone ni nga sumbedza hani uri ni dzhiela nṱha zwine vha ita?

¹³ Vhahashu vha tshifumakadzini vha tea u khoḓwa nga mishumo yoṱhe ine vha i ita ndanguloni ya Yehova. Yeneyi mishumo i katela u fhaṱa na u ṱhogomela zwifhaṱo, u huwelela na vhane vha amba luambo lu sili na u thusa Bethele. Vha thusa vho welwaho nga khombo, vha thusa u ṱalutshedzela khandiso dzashu na u shuma sa vhavulanḓila na vharumiwa. Vhahashu vha tshifumakadzini vha ya tshikoloni tsha vhavulanḓila, Tshikoloni Tsha Vhahuweleli Vha Muvhuso (SKE) na Tshikoloni tsha Gilead u fana na vhahashu vha tshinnani. Vhafumakadzi vha dovha vha thusa vhanna vhavho u ita mishumo yavho yoṱhe i lemelaho tshivhidzoni na ndanguloni. Vhenevho vhahashu vha tshinnani vho vha vha sa ḓo kona u shuma sa “zwifhiwa” arali vho vha vha sa tikedzwi nga vhafumakadzi vhavho. (Vhaef. 4:8) Ni vhona u nga ni nga tikedza hani vhenevha vhahashu vha tshifumakadzini kha mushumo une vha u ita?

14. Nga nṱhani ha zwo ambiwaho kha Phisalema 68:11, vhahulwane vho ṱalifhaho vha ita mini?

¹⁴ Vhahulwane vho ṱalifhaho vha a zwi ḓivha uri vhahashu vha tshifumakadzini ndi “mmbi khulu” ya vhashumi vha u ḓifunela nahone vha a kona vhukuma musi zwi tshi ḓa kha u huwelela mafhungo maḓifha. (Vhalani Phisalema  68:11.) Ngauralo vhahulwane vha lingedza u guda kha vhahashu vha tshifumakadzini. Abigail we ra amba nga hae o ri zwi a mu ṱuṱuwedza musi vhahashu vha tshinnani vha tshi mu vhudzisa uri ndi dzifhio nḓila dza u amba na vhathu tsimuni dzine a wana dzi tshi shuma. U ri: “Zwenezwi zwi nthusa u vhona uri Yehova o mpha mushumo wa ndeme une nda tea u u ita ndanguloni yawe.” Zwiṅwe hafhu, vhahulwane vha a zwi ḓivha uri vhahashu vha tshifumakadzini vha vhaaluwa vha fhulufhedzeaho vha a kona vhukuma u thusa vhahashu vha tshifumakadzini vhane vha kha ḓi vha vhaswa musi vhe na dzithaidzo. (Tito 2:3-5) Zwi tou vha khagala uri vhahashu vha tshifumakadzini vha tea u khoḓwa.

15. Ndi lini hune vhahashu vha tshifumakadzini vha nga ṱoda uri muṅwe muthu a vha ambele?

¹⁵ Nga zwiṅwe zwifhinga, vhahashu vha tshifumakadzini vha nga ṱoḓa uri muṅwe muthu a vha ambele musi vhe na thaidzo. (Yes. 1:17) Sa tsumbo, wahashu wa tshifumakadzini a re tshilikadzi kana o ṱaliwaho a nga ṱoḓa uri muṅwe muthu a mu ambele na u mu thusa nga mishumo ye ya vha i tshi itwa nga munna wawe. Wahashu wa tshifumakadzini a re mualuwa a nga ṱoḓa u thusiwa u amba na madokotela. Kana wahashu wa tshifumakadzini a re muvulanḓila ane a shuma kha muṅwe mushumo wa ndangulo a nga ṱoḓa uri muṅwe a mu ambele musi vhaṅwe vha tshi mu sasaladza nga u sa vha hone tsimuni tshifhinga tshoṱhe u fana na vhaṅwe vhavulanḓila. Ri nga dovha ra thusa hani vhahashu vha tshifumakadzini? Kha ri dovhe ri sedze tsumbo ya Yesu.

16. Samusi zwo sumbedzwa kha Marko 14:3-9, Yesu o imelela hani Maria?

¹⁶ Yesu o vha a tshi ṱavhanya a ambela khaladzi dzawe dzine dza shumela Mudzimu musi vhathu vha tshi vha dzhia nga iṅwe nḓila. Sa tsumbo, o imelela Maria musi Marita a tshi mu sasaladza. (Luka 10:38-42) O imelela Maria lwa vhuvhili musi vhaṅwe vha tshi mu sasaladza nge vha vhona u nga o ita zwithu zwi si zwavhuḓi. (Vhalani Marko 14:3-9.) Yesu o pfesesa tshiitisi tsha Maria, a mu khoḓa a ri: “O nnyitela zwithu zwavhuḓi. . . . O ita zwe a vha a tshi nga kona.” O dovha a porofita uri hu ḓo ambiwa nga ha zwe onoyu mufumakadzi a zwi ita “hoṱhe hune mafhungo maḓifha a ḓo ḓivhadzwa hone,” sa zwine yeneyi thero ya khou zwi ita. Zwi a takadza uri Yesu o amba uri mafhungo maḓifha a ḓo ḓivhadzwa shangoni ḽoṱhe musi a tshi khoḓa Maria nga zwe a ita. Maipfi a Yesu a fanela u vha o khuthadza Maria musi vhaṅwe vhathu vho mu sasaladza.

17. Ṋeani tsumbo ya vhuimo vhune ha nga ṱoḓa uri ni imelele wahashu wa tshifumakadzini.

¹⁷ Naa ni a imelela vhahaṋu vha tshifumakadzini musi zwi tshi ṱoḓea? Kha ri sedze tsumbo i tevhelaho. Vhaṅwe vhahuweleli vha vhona uri wahashu ane munna wawe a si vhe Ṱhanzi u anzela u swika miṱangoni o lenga a dovha a ṱavhanya u ṱuwa musi i tshi fhela. Vha a zwi ṱhogomela uri a si kanzhi a tshi ḓa na vhana vhawe. Ngauralo, vha a mu sasaladza ngauri vha vhona u nga u tea u kombetshedza munna wawe uri a mu tendele a tshi ḓa na vhana miṱanganoni. Fhedzi zwine vha si zwi ḓivhe ndi uri onoyo wahashu u khou ita zwoṱhe zwine a nga kona. Ha na maanḓa kha zwine a ita muṱani wawe nahone a si ene amba dzi fhele musi zwi tshi ḓa kha vhana vhawe. Ni nga ita mini musi ni tshi pfa vhaṅwe vha tshi mu sasaladza nga yeneyi nḓila? Arali na mu khoḓa na u vhudza vhaṅwe uri u khou ita mushumo wavhuḓi, ni nga ita uri vha si tsha mu sasaladza.

18. Ndi dzifhio dziṅwe nḓila dzine ra nga thusa vhahashu vha tshifumakadzini ngadzo?

¹⁸ Ri nga sumbedza uri ri dzhiela nṱha vhahashu vha tshifumakadzini nga u vha thusa musi vha tshi ṱoḓa thuso. (1 Yoh. 3:18) Annette we a vha a tshi ṱhogomela mme awe vha lwalaho u ri: “Vhaṅwe vhahashu vho vha vha tshi ḓa u nṱhaḓula kana u ḓisa zwiḽiwa. Zwo ita uri ndi ḓipfe ndi tshi funiwa na u pfa ndi tshipiḓa tsha tshivhidzo.” Jordan na ene o wana thuso. Muṅwe wahashu  wa tshinnani o mu gudisa u ṱhogomela goloi yawe. U ri: “Ndi zwavhuḓi u ḓivha uri vhahashu vha a nṱhogomela nahone vha ṱoḓa ndi tshi vha ndo tsireledzea musi ndi tshi khou reila goloi yanga.”

19. Vhahulwane vha nga thusa vhahashu vha tshifumakadzini nga dzifhio dziṅwe nḓila?

¹⁹ Vhahulwane na vhone vha fanela u lingedza u ṱhogomela zwine vhahashu vha tshifumakadzini vha zwi shaya. Vha a zwi ḓivha uri Yehova u ṱoḓa vhahashu vha tshifumakadzini vha tshi farwa zwavhuḓi. (Yak. 1:27) Ngauralo vhahulwane vha edzisa Yesu nahone vha a humbulela. Vha nga zwi ita nga u sa vhea milayo, fhedzi vha vha na vhuthu nahone vha pfesesa musi vhuimo vhu tshi ṱoḓa uri vha ite nga u ralo. (Mat. 15:22-28) Musi vhahulwane vha tshi ḓidina u itela u thusa, vha ita uri vhahashu vha tshifumakadzini vha pfe vha tshi funiwa nga Yehova na ndangulo yawe. Musi mulavhelesi wa tshigwada tsha tsimu tshe Kia a vha e khatsho a tshi pfa uri Kia u khou pfuluwa, o ṱavhanya a ita nzudzanyo uri a thusiwe. Kia u ri: “Zwo mphungudzela mutsiko. Nge vhahulwane vha nthusa na u nṱuṱuwedza, vho nthusa uri ndi vhone uri ndi wa ndeme tshivhidzoni na uri a thi ndoṱhe musi ndi na thaidzo.”

20-21. Ri nga sumbedza hani uri ri funa vhahashu vhoṱhe vha tshifumakadzini vha Vhakriste?

²⁰ Musi ri tshi sedza zwivhidzoni zwashu ṋamusi, ri wana tsumbo nnzhi dza vhafumakadzi vha Vhakriste vha re vhashumi vha biko vhane ra tea u vha tikedza. Ri nga vha thusa nga u fhedza tshifhinga ri navho na u vha ḓivha khwine sa zwe ra guda kha tsumbo ya Yesu. Ri nga sumbedza uri ri dzhiela nṱha zwine vha ita kha mushumo wa Mudzimu. Nahone ri nga vha imelela musi zwi tshi ṱoḓea.

²¹ Magumoni a vhurifhi ha muapostola Paulo vhu yaho kha Vharoma, o bula madzina a vhafumakadzi vha Vhakriste vha 9. (Vharoma 16:1, 3, 6, 12, 13, 15) Zwi tou pfala uri vhenevho vhafumakadzi vho ṱuṱuwedzea musi vha tshi pfa a tshi vha lumelisa na u vha khoḓa. Na riṋe ri tea u tikedza vhahashu vhoṱhe vha tshifumakadzini vha re tshivhidzoni tshashu. Musi ri tshi ita zwenezwo, ri ḓo vha ri tshi khou sumbedza uri ri a vha funa sa izwi vhe tshipiḓa tsha muṱa washu.