1. Dirijjitiyaa maaddanawu michchontti ay oottiyoonaa, shin eta gakkiya metoti aybee? (Koyro sinttan deˈiya misiliyaa xeella.)

GUBBAAˈIYAN minnidi oottiya daro michchontti deˈiyoogee ayba ufayssii! Leemisuwawu, eti shiiqotuninne mishiraachchuwaa sabbakiyoogan minnidi oottoosona. Issoti issoti shiiquwaa Addaraasha bottokoniyoogan, harati qassi bantta ishanttussinne michchonttussi koshshiyaabaa kunttiyoogan maaddoosona. Eta paacee gakkiyoogee qoncce. Issoti issoti banttana yelida cimidaageeta heemmoosona. Harati qassi soo asaappe gakkiya yedeta genccoosona. Issoti issoti banttarkka bantta naatussi koshshiyaabaa kunttanawu minnidi oottoosona.

2. Nuuni nu michchontta minttettana koshshiyoy aybissee?

² Nuuni nu michchontta minttettana koshshiyoy aybissee? Alamee darotoo maccaasata bessiyaagaadan bonchchenna gishshataassa. SHin nuuni eta minttettanaadan Geeshsha Maxaafay nuna zorees. Leemisuwawu, kiitettida PHawuloosi Roomen deˈiya gubaaˈee Peebo mokkanaadan yootido wode, “A intteppe koyiyoobai aiba gidikkokka, o maaddite” giis. (Roo. 16:1, 2) PHawuloosi Parisaawe gidido gishshawu maccaasa karennan aggenna. SHin, I Kiristtaane giidi simmidi Yesuusaagaadan, maccaasata bonchchuwaaninne kehatettan oyqqiis.—1 Qor. 11:1.

3. Yesuusi macca asata waati oyqqidee, qassi Xoossaa sheniyaa poliya maccaasata waati xeellidee?

³ Yesuusi maccaasata ubbaa bonchchuwan oyqqiis. (Yoh. 4:27) Yesuusi A wodiyan deˈiya Ayhuda haymaanootiyaa kaalettiyaageeti maccaasata xeelliyo ogiyan xeellibeenna. Geeshsha Maxaafaara gayttidabaa yootiya issi maxaafay, “Yesuusi macca asa kariyoogaa bessiya haasayaa mule haasayibeenna” yaagees. Ubba Yesuusi ba Aawaa sheniyaa poliya maccaasata keehi bonchchiis. Yesuusi ayyaanaaban ba so asata oottidi xeelliyoogeetuubaa yootido wode attuma asatubaakka maccasatubaakka yootiis.—Maa. 12:50.

4. Nuuni ha huuphe yohuwan ay beˈanee?

 ⁴ Yesuusi ayyaanaaban ba michchontta ubbatoo maaddanawu koyees. I eta nashshiis; qassi etawu exatiis. Nu michchonttussi qoppiyoogaa bessiyoogan Yesuusa leemisuwaa waati kaallana danddayiyaakko ane beˈoos.

5. Issi issi michchontti laggeta demmanawu metootiyoy aybissee?

⁵ Nuuni ubbay, ishanttinne michchontti issoy issuwawu loˈˈo lagge gidanawu koyoos. SHin issi issitoo, michchontti eti koyiyo laggeta demmanawu metootana danddayoosona. Aybissi? Kaalliya qofata beˈa. Jordano * geetettiya issi michchiyaa hagaadan gaasu: “Taani aqo oyqqabeenna gishshawu, darotoo gubaaˈiyan aybanne oottana danddayennabadaaninne gubaaˈiyaa yame gidennabadan tawu siyettees.” Kaseegaappe aaruwan haggaazanawu harasaa biida Kirstino giyo aqinyiyaa hagaadan gaasu: “Neeni hara gubaaˈiyaa biikko, neessi nerkka attidabadan siyettana danddayees.” Issi issi ishanttussikka hegaadan siyettana danddayees. Yihoowa Markka gidenna so asaara deˈiyaageeti etaara siiqettidi deˈanawu metootana danddayoosona; qassi gubaaˈiyan deˈiya ishanttuppenne michchonttuppe shaahettidabadan siyettana danddayees. Issi issi michchontti sahettiyo gishshawunne sooppe kiyanawu danddayenna gishshawu, woy sahettiya so asaa yara maaddiyo gishshawu banttarkka attidabadan etawu siyettana danddayees. Aneto giyo michchiyaa hagaadan gaasu: “Ta aayyiyo waannatada maaddiyay tana gidiyo gishshawu, ishanttuuranne michchonttuura wodiyaa attanawu danddayikke.”

6. Luqaasa 10:38-42y yootiyoogaadan, Yesuusi Marttonne Mayraamo maaddidoogaappe nuuni ay tamaarana danddayiyoo?

⁶ Yesuusi baassi ayyaanaaban michchontta gididaageetuura wodiyaa attiis; qassi etawu loˈˈo lagge gidiis. Geellaa aqo oyqqibeenna Mayraamiiranne Marttiira Yesuusi dabbotido dabbotaaba qoppa. (Luqaasa 10:38-42 nabbaba.) Yesuusi haasayiyoobaaninne oottiyooban eta minttettidoogee qoncce. Leemisuwawu, Mayraama erissiyo ashkkaratudan Yesuusa tohuwaa matan uttanawu yayyabeykku. * Qassi Martta qumaa kattishin Mayraamo O maaddabeenna gishshawu, A hanqqettido wode A bawu siyettiyaabaa Yesuusawu yootanawu yayyabeykku. He wode, he naaˈˈu maccaasati keehi koshshiyaabaa akeekanaadan maaddiis. Qassi I hara wodekka etanne eta ishaa Alˈˈaazara biidi oychchiyoogan etawu qoppiyoogaa bessiis. (Yoh. 12:1-3) Hegaa gishshawu, Alˈˈaazari keehi sahettido wode Marttanne Mayraama Yesuusa maaduwaa oychchana danddayiyoogaa eridosona.—Yoh. 11:3, 5.

7. Nuuni michchontta minttettana danddayiyo issi ogee aybee?

⁷ Issi issi michchonttussi shiiqoy ishanttuuranne michchonttuura gayttiyo waanna oge. Hegaa gishshawu, shiiqotun nuuni eta mokkanawu, etaara haasayanawu, qassi etawu qoppiyoogaa bessanawu koyoos. Qommoora ibaa denttido Jordana hagaadan gaasu: “SHiiqotun taani yootido qofawu harati tana galatiyo wode, tanaara haggaazanawu bantta hanotaa giigissiyo wode, woy taassi qoppiyoogaa hara ogetun bessiyo wode, taani keehi minettays.” Nu michchontti nuussi alˈˈo gidiyoogaa nuuni bessana koshshees. Kiˈa hagaadan gaasu: “Taani shiiquwaa beennan aggikko, issi issi ishanttinne michchontti ta waanidaakko oychchanawu tana haasayissanaagaa erays. Hegee ishanttinne michchontti taassi qoppiyoogaa bessees.”

8. Nuuni hara ay ogetun Yesuusa leemisuwaa kaallana danddayiyoo?

 ⁸ Yesuusaagaadan, nuuni michchonttuura wodiyaa aattanawu baaxetana danddayoos. Qumaa maanawu woy nunaara allaxxanawu eta nu soo shoobbanawu danddayoos. Nuuni yaatiyo wode nu haasayiyooban eta minttettanawu koyoos. (Roo. 1:11, 12) Cimatussi Yesuusaagaa mala xeelay deˈana bessees. Aqo oyqqennan deˈiyoogee issota issota metana danddayiyoogaa Yesuusi erees. SHin issi uri ufayttidi deˈiyoy aqo oyqqiyoogan woy naata yeliyoogaa xallan gidennaagaa I qonccissiis. (Luq. 11:27, 28) Nuuni xayenna ufayssaa demmana danddayiyoy nu deˈuwan Yihoowa haggaazuwaa kaseyiyoogaana.—Maa. 19:12.

9. Cimati michchontta maaddanawu ay oottana danddayiyoonaa?

⁹ Ubba qassi cimati Kiristtaane maccaasata ayyaanaaban banttassi michchonttudaaninne aayotudan xeellana koshshees. (1 Xim. 5:1, 2) Cimati shiiqotuppe kase woy shiiqotuppe simmin, michchonttuura haasayanawu wodiyaa bazzana koshshees. Qommoora ibay odettido Kirstina hagaadan gaasu: “Issi cimay taassi oosoy daridoogaa akeekidi ta prograamiyaa hanotaa eranawu koyiis. I taassi qoppido gishshawu taani A keehi galatays.” Cimati banttassi ayyaanaaban michchontta gididaageetuura haasayanawu ubbatoo wodiyaa bazziyo wode etassi  qoppiyoogaa bessoosona. * Qommoora ibaa denttido Aneta cimatuura darotoo haasayiyoogaa goˈˈaa yootaasu. A hagaadan gaasu: “Taani eta loytta eranawu malays; qassi etikka tana eranawu maloosona. Hegaa gishshawu tana metoy gakkiyo wode, maaduwaa eta oychchanawu metootikke.”

10. Nu michchontti ufayttanaadan maaddidabay aybee?

¹⁰ Attuma gidin macca gidin, nuuni oottidobaa harati akeekidi galatiyo wode ufayttoos. Hara baggaara qassi, nu oottidobawu ooninne galatennaba gidikko, hidootaa qanxxoos. Aqo oyqqabeenna Abigaalo giyo issi aqinyiyaa issi issitoo O harati dogidobadan iyyo siyettiyoogaa yootaasu: “Harati tana coo ta ishaa mala woy ta michchee mala giidi qoppoosona. Issi issitoo tana ooninne akeekennaabada tawu siyettees” yaagaasu. Qassi Pamo giyo michchiyaa yootidobaa akeeka. A daro layttawu misoonaawe gidada haggaazida aqo oyqqabeenna michcho. Guyyeppe, A bana yelidaageeta maaddanawu so simmaasu. Iyyo layttay 70 heera gidikkonne A haˈˈikka aqinye. Pama, “Harati ta oottidobaa yootidi galatiyo wode hegee tana keehi minttettees” yaagaasu.

11. Yesuusi bana maaddida maccaasata xoqqu oottidi xeelliyoogaa waati bessidee?

¹¹ Ammanettida maccaasati “banttassi de7iyaagaappe” Yesuusa maaddido gishshawu, I eta galatiis. (Luq. 8:1-3) I eti awu haggaazanaadan eeno giyoogaa xalla gidennan, keehi koshshiya Xoossaa sheniyaabaa tamaarissiyoogankka eta bochchiis. Leemisuwawu, I hayqqanaagaanne denddanaagaa etawu yootiis. (Luq. 24:5-8) Kiitettidaageetuugaadan, he maccaasatikka eta gakkana metuwawu giigettanaadan I oottiis. (Mar. 9:30-32; 10:32-34) Yesuusi oyqettido wode kiitettidaageeti baqatikkokka, I mittan kaqettidi hayqqiyo wode issi issi maccaasati A miyiyaappe shaahettibookkona.—Maa. 26:56; Mar. 15:40, 41.

12. Yesuusi maccaasatussi immido oosoy aybee?

¹² Yesuusi maccaasatussi keehi koshshiya oosuwaa immiis. Leemisuwawu, Xoossawu ammanettida maccaasati I denddidoogaa koyro markkattanaadan oottiis. I hayquwaappe denddidoogaa he maccaasati kiitettidaageetussi yootanaadan Yesuusi kiittiis. (Maa. 28:5, 9, 10) Qassi PHenxxaqosxxe 33 M.Ln., kiitettidaageeti geeshsha ayyaanan tiyettido wode maccaasatikka yan deˈennan aggokkona. Yaanikko, eti ooratta qaalaa haasayiyoonne “Xoossai oottido gita oosuwaa” haratuyyo yootiyo eraa demmennan waayi aggana.—Oos. 1:14; 2:2-4, 11.

13. Ha wodiyan Kiristtaane michchontti ay oottiiddi deˈiyoonaa, qassi eti oottiyoobawu nuuni galatiyoogaa waati bessana danddayiyoo?

¹³ Yihoowa haggaazuwan nu michchontti oottiyo ubbabawu etawu galatay bessees. He oosoy keexxiyoogaanne bottokoniyoogaa, hara qaalan sabbakiya citaara haggaaziyoogaa, qassi bantta dosan Beeteelen oottiyoogaa gujjees. Eti daafaban qohettidaageeta maaddiyo oosuwaaninne nu xuufeta birshshiyoogan maaddoosona; qassi aqinyenne misoonaawe gididi haggaazoosona. Ishanttuugaadan, michchontikka aqinyetu timirtte keettan, Kawotettaa Mishiraachchuwaa Yootiyaageetu Timirtte Keettaaninne Giiliyaade Timirtte Keettan tamaaroosona. Hegaa bollikka, gubaaˈiyaaninne dirijjitiyan bantta azinatussi imettida aawatettaa ubbaa polanaadan machchoti maaddoosona. Machchoti eta maaddana xayikko, he “imota” gidida aawatettay deˈiyo ishantti loytti oottana danddayokkona. (Efi. 4:8) Nu michchontti oosuwan maaddiiddi deˈiyo ogiyaa qoppana danddayay?

14. Mazamure 68:11 yootiyoogaadan, akeekanchcha cimati ay oottiyoonaa?

¹⁴ Akeekanchcha cimati bantta dosan oottiya  “maccaasati daro” gidiyoogaanne darotoo eti mishiraachchuwaa sabbakiyoogan gooba gidiyoogaa eroosona. (Mazamure 68:11 nabbaba.) Hegaa gishshawu, cimati michchonttuppe tamaaranawu baaxetoosona. Qommoora ibay odettido Abigaala, haggaazo moottan deˈiya asaa haasayissanawu A goˈettido loˈˈo ogee aybakko ishantti oychchiyo wode A minettiyoogaa yootaasu. A, “Hegee Yihooway taani A dirijjitiyan oottanaadan keehi koshshiya oosuwaa tawu immidoogaa akeekanaadan maaddees” yaagaasu. Qassi ammanettida kayma michchontti yelaga michchontti paaciyaa xoonanaadan maaddiyoogan gooba gidiyoogaa cimati akeekoosona. (Tii. 2:3-5) Nu michchonttussi galatay bessiyoogee qoncce!

15. Michchonttussi issi uri exatana koshshiyoy awudee?

¹⁵ Michchontta paacciyaabay gakkiyo wode, issi issitoo etayyo exatiya uri koshshana danddayees. (Isi. 1:17) Leemisuwawu, issi amˈˈiyaa woy paraman shaahettida issi michchiyaa issi uri iyyo exatanaadan, qassi I azinay kase oottiyo oosuwaa issi uri oottidi maaddanaadan koyana danddayawusu. Cimida issi michchiyaa dottoriyaa haasayissanawu maaduwaa koyana danddayawusu. Woy Yihoowa dirijjitiyan hara oosuwaa oottiya issi aqinyaa darotoo hara aqinyetuugaadan A haggaazenna gishshawu, harati O borikko, iyyo exatiya ura koyana danddayawusu. Nuuni nu michchontta maaddana danddayiyo hara ogee aybee? Yesuusa leemisuwaa ane gujjidi beˈoos.

16. Marqqoosa 14:3-9y yootiyoogaadan, Yesuusi Mayraamiyyo waani exatidee?

¹⁶ Yesuusi ayyaanaaban ba michchontta harati bala ogiyan akeekido wode sohuwaara etawu exatiis. Leemisuwawu, Martta Mayraamo borido wode Yesuusi Mayraamiyyo exatiis. (Luq. 10:38-42) Mayraama balabaa kuuyidabadan harati qoppidi O borido wodekka iyyo exatiis. (Marqqoosa 14:3-9 nabbaba.) Yesuusi Mayraamo denttettidabaa akeekidi, “A tau lo77obaa oottaasu. . . . A ba danddayidoogaa oottaasu” yaagidi O galatiis. Ubba qassi A kehatettan oottidobay ha menttuwan qonccidoogaadan, “sa7a ubban wonggeliyaa mishiraachchuwaa odiyoosan awaanikka” odettana. I Mayraama kehatettan oottidoba gishshawu O galatiyo wode, saˈa ubban wonggeliyaa mishiraachchoy odettana giidoogee keehi maalaalissiyaaba! Harati Mayraamo bala ogiyan xeellin Yesuusi giidobay O ay keena minttettideeshsha!

17. Issi michcheessi nuuni awude exatana koshshiyaakko qonccissiya leemisuwaa yoota.

¹⁷ Neeni ayyaanaaban ne michchonttussi koshshiyo wodiyan exatay? Leemisuwawu, kaalliya hanotaa beˈa. Ammanenna azinay deˈiyo issi michchiyaa shiiqota poˈissada yiyoogaanne wurosaara biyoogaa aassiya issoti issoti akeekidosona. Eti A issi issitoo ba naata eheennaagaa akeekidosona. Hegaa gishshawu, I azinay naata A shiiquwaa efaanaadan eeno giikkonne, A ehaanawu koyabeennabadan qoppidi O boroosona. SHin, A bawu danddayettida ubbabaa oottiyoogaa eti akeekibookkona. A bawu kessido prograamiyan simerettana danddayukku; qassi ba naatu gishshaa kuuyiyay O gidukku. Nena gidiyaakko waatuutee? Neeni A minnada oottaydda deˈiyo gishshawu O galatikkonne A oottaydda deˈiyo loˈˈoba haratuyyo yootikko eti O boriyoogaa aggana danddayoosona.

18. Nuuni nu michchontta maaddana danddayiyo hara ogee aybee?

¹⁸ Michchontta maaddiyaabaa oottiyoogan nuuni etawu ay keena qoppiyaakko bessana danddayoos. (1 Yoh. 3:18) Sahettiya ba aayyiyo maaddiya Aneeto giyo michchiya hagaadan gaasu: “Issi issi ishanttinne michchontti ta so yiidi taani harabaa oottishin eti ta aayyiyo maaddoosona woy qumaa ekkidi yoosona. Hegee taani harati tana dosiyoogaanne gubaaˈiyaa  yame gidiyoogaa akeekanaadan oottiis.” Jordaano giyo michchiyaakka maadettaasu. Issi ishay moorettida I kaamiyaa A waata giigissanaakko bessiis. A, “Ta ishanttinne michchontti taani kaamiyaa laaggiyo wode qohoy gakkennaadan taassi qoppiyoogaa akeekidoogee tana ufayssees” yaagaasu.

19. Cimati michchontta maaddana danddayiyo hara ogee ayba gidana danddayii?

¹⁹ Cimati michchonttussi koshshiyaabaa kunttanawu qoppana bessees. Yihooway michchontti waani oyqettanaadan koyiyaakko eti eroosona. (Yaaq. 1:27) Yaatiyo gishshawu cimati Yesuusaagaadan bessiyaagaadan qoppana koshshees. Eti higgiyaa kessennan keha gidiyoogaaninne haratu hanotaa akeekiyoogan hegaadan oottana danddayoosona. (Maa. 15:22-28) Cimati maaddanawu baaxetiyo wode, Yihoowaynne A dirijjite michchonttussi qoppiyoogaa eti akeekanaadan maaddana. Kiˈa deˈiyo citaa xomoosiya ishay A keettaa laammiyoogaa akeekidi O maaddanawu sohuwaara hanotaa giigissiis. Kiˈa hagaadan gaasu. “Hegee taani keehi unˈˈettennaadan oottiis. Eti tana minttettido gishshawunne tawu koshshiyaaban maaddido gishshawu, taani gubaaˈiyan dosettiyaabadaaninne metuwaa wodiyan tarkka deˈennabadan akeekanaadan cimati oottidosona.”

20-21. Kiristtaane michchontta ubbaa nuuni siiqiyoogaa waati bessana danddayiyoo?

²⁰ Ha wodiyan, nu gubaaˈiyaa xeelliyo wode nu maadoy koshshiyo minnidi oottiyoogan leemiso gidiya daro Kiristtaane maccaasati deˈoosona. Nuuni Yesuusa leemisuwaa kaallikko, etaara wodiyaa aattiyoogaaninne eta eranawu maliyoogan eta maaddana danddayoos. Xoossaa haggaazuwan eti oottiyoobawu eta galatana danddayoos. Qassi koshshiyo wodiyan etawu exatana danddayoos.

²¹ Kiitettida PHawuloosi Roome gubaaˈiyawu xaafido dabddaabbiyaa wurssettan, uddufun Kiristtaane maccaasata eta sunttan xeegiis. (Roo. 16:1, 3, 6, 12, 13, 15) He maccaasati A sarotaanne galataa siyidi minettidoogee qoncce. Nu gubaaˈiyan deˈiya michchontta ubbaa nuunikka minttettana koshshees. Nuuni yaatiyo wode, nu so asaadan eta siiqiyoogaa bessoos.