1. Ano an ginhihimo han mga sister para ha organisasyon, pero ano nga mga problema an naieksperyensyahan han damu? (Kitaa an retrato ha kobre.)

MAPASALAMATON gud kita nga damu an Kristiano nga kababayin-an nga maduruto ha kongregasyon! Pananglitan, nakikigbahin hira ha mga katirok ngan ha ministeryo. An iba nabulig ha pagmintinar han Kingdom Hall ngan nagpapakita hin personal nga interes ha ira mga igkasi-magsiringba. Syempre, may mga problema liwat hira. An pipira nag-aataman han ira lagas na nga mga kag-anak. An iba ginkukontra han ira mga kapamilya. Ngan an iba naman, solo nga mga kag-anak nga naniniguro ha pagtagana ha ira mga anak.

2. Kay ano nga kinahanglan naton mangalimbasog nga suportaran an kabugtoan nga kababayin-an?

² Kay ano nga kinahanglan naton suportaran an kabugtoan nga kababayin-an? Kay an kalibotan kaurogan nga diri nagpapakita ha kababayin-an hin dignidad nga angayan ha ira. Gin-aaghat liwat kita han Biblia nga suportaran hira. Pananglitan, ginsidngan ni apostol Pablo an kongregasyon ha Roma nga abiabihon hi Febe ngan “ihatag ha iya an anoman nga bulig nga iya ginkikinahanglan.” (Roma 16:1, 2) Han Pariseo hi Pablo, bahin hiya han usa nga grupo nga nagmiminos ha kababayin-an. Pero han Kristiano na hiya, ginsubad niya hi Jesus ngan gintratar an kababayin-an nga may dignidad ngan pagkabuotan.​—1 Cor. 11:1.

3. Paonan-o gintratar ni Jesus an kababayin-an, ngan paonan-o niya gintratar an kababayin-an nga nagbubuhat han kaburut-on han Dios?

³ Gintratar ni Jesus nga may dignidad an tanan nga babaye. (Juan 4:27) An iya pagtratar ha ira diri pariho han pagtratar han Judio nga mga lider han relihiyon ha iya panahon. Ngani, usa nga reperensya ha Biblia an nagsiring: “Waray gud ginyakan hi Jesus nga nakainsulto o nakaminos ha kababayin-an.” Pero may daku nga respeto hi Jesus ha kababayin-an nga nagbubuhat han kaburut-on  han iya Amay. Gintawag niya hira nga kabugtoan ngan gin-unabi upod han kalalakin-an nga iya gintratar sugad nga bahin han iya espirituwal nga pamilya.​—Mat. 12:50.

4. Ano an aton hihisgotan hini nga artikulo?

⁴ Andam pirme bumulig hi Jesus ha kababayin-an nga nag-aalagad ha Dios. Gin-apresyar niya hira ngan gindepensahan. Aton hisgotan kon paonan-o naton hiya masusubad ha pagpakita hin konsiderasyon ha mga sister.

5. Kay ano nga bangin makurian an iba nga sister nga magpahimulos ha makaparig-on nga pakig-upod?

⁵ Kinahanglan naton, brother man kita o sister, hin maopay nga pakig-upod. Pero usahay, mahimo makurian an mga sister nga magkaada hito. Kay ano? Tagda ini nga mga komento. An sister nga hi Jordan * nagsiring, “Tungod kay solo ako, kasagaran nga diri ako maaram han akon papel ha kongregasyon ngan inaabat ko nga diri ako parte hito.” Hi Kristen, usa nga payunir nga binalhin basi mapahaluag an iya ministeryo, nagsiring, “Kon bag-o ka ha kongregasyon, bangin abaton mo nga nag-uusahan ka.” Mahimo liwat ito abaton han iba nga brother. Adton diri Saksi an pamilya bangin makurian nga magin duok ha iya pamilya ngan ha iya mga kakongregasyon. An iba nga sister bangin umabat nga nag-uusahan hira kay may sakit hira ngan diri nakakabaya ha balay o tungod kay nag-aataman hin may sakit nga kapamilya. Hi Annette nagsiring, “Diri ako nakakaupod ha kabugtoan ha pagturotarampo kay ako an nag-aataman ha akon nanay.”

6. Paonan-o ginbuligan ni Jesus hira Marta ngan Maria, sugad han nakarekord ha Lucas 10:38-42?

⁶ Hi Jesus naghatag hin panahon ha iya kabugtoan nga kababayin-an ha espirituwal, ngan tinuod hiya nga sangkay ha ira. Tagda an iya pakigsangkay kanda Maria ngan Marta, nga posible mga solo. (Basaha an Lucas 10:38-42.) Tungod han mga ginyakan ngan ginbuhat ni Jesus, nagin komportable hira ha iya. Pananglitan, waray mag-alang hi Maria ha paglingkod ha iya tiilan sugad nga disipulo. * Ngan hi Marta, nga naaaringit kay diri nabulig ha iya hi Maria, waray mag-alang ha pagsiring kan Jesus han iya ginhuhunahuna. Hito nga kahimtang, ginbuligan ni Jesus an duha nga babaye nga mahibaro hin importante nga leksyon. Ngan iya iginpakita an iya gugma ha ira ngan ha ira bugto nga hi Lazaro pinaagi ha pagbisita ha ira ha iba nga mga panahon. (Juan 12:1-3) Diri urusahon nga han nagkasakit hin grabe hi Lazaro, maaram hira Maria ngan Marta nga makakaaro hira hin bulig kan Jesus.​—Juan 11:3, 5.

7. Ano an usa nga paagi nga mapaparig-on naton an aton kabugtoan nga kababayin-an?

⁷ Para ha iba nga sister, an mga katirok an ira nangunguna nga oportunidad basi makaupod an ira mga igkasi-magsiringba. Salit karuyag ta gamiton ito nga mga higayon basi abiabihon hira, kaistoryahon, ngan ipakita an aton gugma ha ira. Hi Jordan nga gin-unabi kanina, nagsiring, “Makaparig-on gud kon ginpapasalamatan ako ha akon mga komento, may nakikigsabot ha akon nga makigpartner ha ministeryo, o nagpapakita ha akon hin gugma ha iba pa nga paagi.” Kinahanglan ipakita naton ha mga sister nga importante hira. Hi Kia nagsiring, “Kon diri ako nakakatambong ha katirok, maaram ako nga may magtiteks ha akon basi mangumusta. Iginpapakita hito nga hinigugma ako han kabugtoan.”

8. Ano pa an mga paagi nga masusubad naton hi Jesus?

⁸ Pariho kan Jesus, mahimo kita mangalimbasog nga maggahin hin panahon basi makaupod an mga sister. Bangin puydi naton hira imbitaron ha simple nga pangaon o pagpahalibway. Kon  bubuhaton naton ito, karuyag naton siguruhon nga makaparig-on an pag-iristorya. (Roma 1:11, 12) An mga tigurang kinahanglan magkaada panhunahuna nga pariho kan Jesus. Maaram hiya nga mahimo magin makuri ha iba an pagin solo. Pero ginklaro niya nga an nagpapadayon nga kalipay diri nakadepende ha pagkaada asawa o anak. (Luc. 11:27, 28) Lugod, magkakaada kita permanente nga kalipay kon uunahon naton an pag-alagad kan Jehova.​—Mat. 19:12.

9. Ano an mahihimo han mga tigurang basi mabuligan an mga sister?

⁹ Labi nga kinahanglan trataron han mga tigurang an mga sister sugad nga ira bugto ngan nanay ha espirituwal. (1 Tim. 5:1, 2) Kinahanglan maggahin hira hin panahon ha pakiistorya ha mga sister antes o katapos han katirok. “Napansin han usa nga tigurang nga busy gud ako ngan ginkumusta niya an akon eskedyol,” siring ni Kristen. “Naapresyar ko gud an iya sinseridad.” Kon an mga tigurang regular nga nakikiistorya ha mga sister, ginpapakita nira nga hinigugma nira hira. * Ginsaysay ni Annette nga gin-unabi kanina, an usa nga kapulsanan han regular nga pakiistorya ha mga tigurang. Hiya nagsiring: “Nakikilala ko hira hin mas maopay, ngan nakikilala nira ako. Katapos kon may problema ako, diri ako nag-aalang ha pag-aro hin bulig ha ira.”

10. Ano an makakabulig ha mga sister nga magin malipayon?

¹⁰ Kita tanan, lalaki man o babaye, nalilipay kon ginkikilala han iba an aton mga abilidad ngan ginsisidngan kita nga gin-aapresyar nira an aton ginbubuhat. Ha luyo nga bahin, nasusubo kita kon ginbabalewaray nira ito. An solo nga payunir nga hi Abigail, nagsiring nga usahay inaabat niya nga ginbabalewaray hiya: “Kilala la ako han mga tawo sugad nga bugto o anak ni Polano. Danay inaabat ko nga waray nakakapansin ha akon.” Pero tagda an siring han sister nga hi Pam. Waray hiya asawa ngan nag-alagad hiya hin damu ka tuig sugad nga misyonera. Ha urhi, inuli hiya ha ira basi atamanon an iya mga kag-anak. Yana, sobra 70 anyos na hiya ngan payunir la gihap. Hi Pam nagsiring: “Nakakabulig gud ha akon kon ginsisidngan ako han iba nga gin-aapresyar nira ako.”

11. Paonan-o iginpakita ni Jesus nga gin-apresyar niya an kababayin-an nga inupod ha iya pagministeryo?

¹¹ Gin-apresyar ni Jesus an bulig ha iya han matinumanon nga kababayin-an nga nag-asikaso ha iya ‘gamit an ira mga panag-iya.’ (Luc. 8:1-3) Pero labot la ha pagtugot ha ira nga magkaada hito nga pribilehiyo, gintutdoan liwat niya hira hin higlarom nga espirituwal nga mga kamatuoran. Pananglitan, ginsumatan niya hira nga mamamatay hiya ngan babanhawon. (Luc. 24:5-8) Iya igin-andam ini nga kababayin-an, pariho han mga apostol, ha mga pagsari nga ira maieksperyensyahan. (Mar. 9:30-32; 10:32-34) Ngan makapainteres gud nga bisan kon namalagiw an mga apostol han gin-aresto hi Jesus, an pipira nga kababayin-an nga sinuporta ha iya nakada ha iya hirani samtang tikamatay hiya ha pasakitan nga kahoy.​—Mat. 26:56; Mar. 15:40, 41.

12. Ano nga buruhaton an igintapod ni Jesus ha kababayin-an?

¹² Gintaporan ni Jesus an kababayin-an hin importante nga buruhaton. Pananglitan, an matinumanon nga kababayin-an an una nga nakakita han iya pagkabanhaw. Ginsugo niya hira nga sumatan an mga apostol nga ginbanhaw na hiya. (Mat. 28:5, 9, 10) Ngan posible nga may kababayin-an nga presente han iginbubo an baraan nga espiritu han Pentekostes 33 C.E. Kon presente hira, posible nga nakakarawat liwat hira hin milagroso nga abilidad nga makayakan hin iba nga mga linggwahe ngan sumatan an iba han “urusahon nga mga buhat han Dios.”​—Buh. 1:14; 2:2-4, 11.

13. Ano an ginbubuhat yana han mga sister, ngan paonan-o naton maipapakita an aton apresasyon ha ira ginbubuhat?

¹³ Angay gud kumendasyonan an mga sister ha tanan nga ira ginhihimo ha pag-alagad kan Jehova. Nag-uupod ito ha pagpanukod ngan pagmintinar hin mga pasilidad, pagbulig ha mga grupo nga iba an yinaknan, ngan pagboluntaryo ha Bethel. Nabulig hira ha mga relief work katapos han kalamidad, nabulig ha paghubad han aton mga publikasyon, ngan nag-aalagad sugad nga payunir ngan misyonero. Pariho ha mga brother, naeskwela liwat an mga sister ha Pioneer Service School, ha School for Kingdom Evangelizers, ngan ha Gilead. Dugang pa, ginbubuligan han mga asawa an ira bana basi matuman an ira mga responsabilidad ha kongregasyon ngan ha organisasyon. Magigin mas makuri para hini nga mga brother an pagbuhat han ira responsabilidad sugad nga “regalo nga mga lalaki” kon waray han suporta han ira asawa. (Efe. 4:8) Puydi ka ba maghunahuna hin mga paagi basi mabuligan an mga sister ha ira buruhaton?

14. Tungod han ginsiring ha Salmo 68:11, ano an ginbubuhat han makinaadmananon nga mga tigurang?

¹⁴ Nasasabtan han makinaadmananon nga mga tigurang nga an mga sister “usa ka daku nga hugpo” hin andam nga mga magburuhat ngan kaurogan nga maopay gud hira nga parasangyaw han maopay nga sumat. (Basaha an Salmo 68:11.) Salit an mga tigurang namimiling hin mga paagi basi magpahimulos ha ira eksperyensya. Gin-aapresyar gud ni Abigail, nga gin-unabi kanina,  kon ginpapakianhan hiya han mga brother kon ano an iya nakita nga epektibo nga pamaagi ha pagtikang hin pakiistorya ha mga tawo ha teritoryo. Hiya nagsiring, “Nabulig ito ha akon nga makita nga may importante ako nga buruhaton ha organisasyon ni Jehova.” Ginkikilala liwat han mga tigurang nga an matinumanon ngan hamtong nga mga sister epektibo ha pagbulig ha burobata nga mga sister nga maatubang an mga problema. (Tito 2:3-5) Angayan gud han aton gugma ngan apresasyon an mga sister!

15. Ha ano nga mga kahimtang bangin magkinahanglan hin bulig an mga sister?

¹⁵ Usahay, bangin magkinahanglan hin bulig an mga sister kon may mga problema hira. (Isa. 1:17) Pananglitan, bangin kinahanglan han usa nga balo o diborsyada nga sister nga may magyakan para ha iya ngan bumulig ha paghimo han pipira nga buruhaton nga ginhihimo hadto han iya asawa. Bangin magkinahanglan hin bulig an edaran na nga sister ha pakiistorya ha doktor. O bangin magkinahanglan an payunir nga sister nga nagbubuhat hin iba pa nga teokratiko nga proyekto nga may magdepensa ha iya kon ginkukwestyon hiya kay talagsa la hiya makasangyaw, diri pariho ha iba nga payunir. Paonan-o pa naton mabubuligan an mga sister? Tagdon naton utro an susbaranan ni Jesus.

16. Paonan-o gindepensahan ni Jesus hi Maria, sugad han nakarekord ha Marcos 14:3-9?

¹⁶ Gindepensahan dayon ni Jesus an iya kabugtoan nga kababayin-an ha espirituwal han may sayop nga impresyon ha ira an iba. Pananglitan, iya gindepensahan hi Maria han nagreklamo hi Marta mahitungod ha iya. (Luc. 10:38-42) Ngan gindepensahan niya utro hi Maria han nasina an iba kay ginhunahuna nira nga sayop an iya desisyon. (Basaha an Marcos 14:3-9.) Maaram hi Jesus han motibo ni Maria ngan ginkumendasyonan hiya, nga nasiring: “Maopay an iya ginbuhat ha akon. . . . Ginbuhat niya an iya mahihimo.” Iya pa ngani igintagna nga an ginbuhat ni Maria igsusumat “diin man isangyaw an maopay nga sumat ha bug-os nga kalibotan,” ngan ito an ginhihimo yana hini nga artikulo. Makapainteres gud nga hi Jesus nagsiring nga an maopay nga sumat igsasangyaw ha bug-os nga kalibotan han gindayaw niya hi Maria tungod han iya diri makikalugaringon nga buhat! Sigurado nga naparig-on hi Maria ha ginsiring ni Jesus han ginhukman hiya han iba!

17. Paghatag hin ehemplo kon san-o naton mahimo depensahan an usa nga sister.

¹⁷ Gindidepensahan mo ba an mga sister kon kinahanglan nira ito? Pananglitan, tagda ini nga senaryo. Nakikita han iba nga magwarali nga an usa nga sister nga diri Saksi an asawa kaurogan nga late ha mga katirok ngan nabaya dayon kahuman. Napansin nira nga talagsa la niya iupod an iya mga anak. Salit ginkukwestyon nira kon kay ano nga diri hiya naninindogan hin marig-on ha iya diri Saksi nga asawa, ngan nagin kritiko hira ha iya. Pero ha pagkatinuod, ginhihimo han sister an tanan niya nga mahihimo. Diri niya bug-os nga kontrolado an iya eskedyol; ngan diri la hiya an nagbubuot ha iya mga anak. Ano an puydi mo himoon? Kon kukumendasyonan mo an sister ngan isusumat ha iba an iya mag-opay nga ginbubuhat, mapapahunong mo an negatibo nga iristorya.

18. Ha ano pa nga mga paagi mabubuligan naton an mga sister?

¹⁸ Mahimo naton ipakita ha mga sister nga hinigugma gud naton hira pinaagi ha paghatag hin praktikal nga bulig. (1 Juan 3:18) Hi Annette, nga nag-ataman ha iya may sakit nga nanay, nagsiring: “An iba nga kabugtoan nabisita ha balay basi sumaliwan hin madaliay ha pag-ataman kan Nanay, o nagdadara hira hin pagkaon. Tungod hito, inabat ko nga hinigugma ako ngan parte ako han kongregasyon.” Nakakarawat liwat hin bulig hi Jordan. Gintutdoan hiya han usa nga brother ha pagmintinar han iya awto. Hiya nagsiring:  “Maopay gud hibaroan nga interesado an kabugtoan ha akon safety.”

19. Ha ano pa nga mga paagi mahimo mabuligan han mga tigurang an mga sister?

¹⁹ Naniningkamot liwat an mga tigurang nga asikasuhon an panginahanglan han mga sister. Maaram hira nga importante kan Jehova kon paonan-o gintatratar ito nga kabugtoan. (San. 1:27) Salit ginsusubad nira an pagin makatadunganon ni Jesus. Diri hira naghihimo hin mga surundon kon mas angayan an pagpakita hin pagkabuotan ngan konsiderasyon. (Mat. 15:22-28) Kon naniningkamot hira ha pagbulig, naipapaabat nira ha mga sister nga hinigugma hira. Han nahibaroan han paramangno han grupo nga mabalhin hi Kia hin balay, gin-areglar dayon niya nga mabuligan hi Kia. “Nakaiban gud ito han akon istres,” siring ni Kia. “Tungod han ira makaparig-on nga mga pulong ngan praktikal nga bulig, klaro nga iginpakita han mga tigurang nga importante ako ha kongregasyon ngan diri ako nag-uusahan kon aada ako ha makuri nga sitwasyon.”

20-21. Paonan-o naton maipapakita nga hinigugma naton an tanan nga Kristiano nga kababayin-an?

²⁰ Ha aton kongregasyon yana, damu an ehemplo han maduruto nga Kristiano nga kababayin-an nga angayan han aton suporta. Sugad han aton nahibaroan ha susbaranan ni Jesus, mabubuligan naton hira pinaagi ha paggahin hin panahon kaupod nira ngan kilalahon hira. Mahimo naton ipakita an apresasyon ha ira mga ginbubuhat ha pag-alagad ha Dios. Ngan mahimo naton hira depensahan kon kinahanglan.

²¹ Ha kataposan han iya surat ha mga taga-Roma, espisipiko nga gin-unabi ni apostol Pablo an siyam nga Kristiano nga babaye. (Roma 16:1, 3, 6, 12, 13, 15) Sigurado nga naparig-on ito nga kababayin-an han nabatian nira an iya pangumusta ngan kumendasyon. Sugad man, kinahanglan naton suportaran an tanan nga kababayin-an ha kongregasyon. Pinaagi hito, iginpapakita naton nga hinigugma ta hira sugad nga parte han aton espirituwal nga pamilya.