1. How sisters de support the organization, but which things many of them de face? (Check picture for front cover.)

WE REALLY glad say we get plenty sisters wey de work hard for congregation! For example, them de get part for meeting and them de preach. Some de maintain Kingdom Hall, and them de show say they care about other brothers and sisters. But, them de face many things. Some of this sisters get their old papa and mama wey them de care for. Other sisters de face problem from their family members. And some no get husband wey de help them take care of their children.

2. Why e good make we try support our sisters?

² Why e good make we de support our sisters? Na because plenty people for the world no de respect women as they suppose respect them. Apart from that one, Bible advise us make we support them. For example, apostle Paul tell the congregation for Rome say make they welcome Phoebe and “help Phoebe for anything wey e need.” (Rom. 16:1, 2) When Paul be Pharisee, e fit be say Paul believe say women no be anything and maybe na so e still treat them. But when Paul become Christian, e do like Jesus; e treat women with respect and e dey kind to them.​—1 Cor. 11:1.

3. How Jesus treat women, and how e see women wey de worship Jehovah?

³ Jesus treat all women with respect. (John 4:27) E no see them the way leaders for Jew religion de see them that time. One book about Bible even talk say: “Jesus no ever talk anything wey show say women na nothing.” Another thing be say, Jesus get special respect for women wey de worship Jehovah. Jesus even see them as e sisters, and e mention them join the men wey e take as part of e family.​—Matt. 12:50.

4. Wetin we go talk about for this article?

⁴ When Jesus dey this earth, e always dey ready to help  women wey de serve God. E show them say them dey important and e protect them. Make we talk about how we fit de show say we get our sisters for mind just like Jesus.

5. Why e fit hard some sisters to get good friends to spend time with?

⁵ All of us need good friends to spend time with, whether we be brothers or sisters. But sometimes, e fit hard sisters to get this good friends wey they need. Why? See wetin some people talk. One sister wey e name na Jordan * talk say, “Because I never marry, I de always feel say e no get wetin them de use me do for congregation, and say I no be part of the congregation.” One pioneer sister wey e name na Kristen, pack go place wey e fit do more for the preaching work. E talk say, “When you dey new for congregation, you fit de feel say na only you dey.” Some brothers fit still de feel like that too. When person get family members wey no be Jehovah Witness and them de live together, e fit no easy for the person to dey close to e family. Apart from that one, the person fit de feel say e no dey close to e brothers and sisters for congregation. Some sisters fit dey lonely because them de sick and they no fit comot for house, or because them de care for their family members wey no well. One sister wey e name na Annette talk say, “I no fit accept invitation to attend party with my brothers and sisters, because na me be the main person wey de care for my mama.”

6. As e dey for Luke 10:38-42, how Jesus help Martha and Mary?

⁶ Jesus spend time with women wey de serve God, and na better friend e be to them. Think about the friendship wey e get with Mary and Martha. E fit be say this two women no get husband. (Read Luke 10:38-42.) The things wey Jesus talk and do de cool their heart. No wonder Mary dey free to sitdown near e leg like disciple. * And Martha dey free to tell Jesus wetin dey e mind when e no happy as Mary no come help-am prepare food. Jesus use that time to help the women learn some important lesson. And for other time, Jesus visit this women and their brother, wey e name na Lazarus. This one show say Jesus care about them. (John 12:1-3) So when Lazarus get serious sickness, Mary and Martha know say they fit go meet Jesus to help them.​—John 11:3, 5.

7. Wetin be one way wey we fit encourage sisters?

⁷ For some sisters, the main opportunity wey they get to dey with brothers and sisters na for meeting. So we want use that chance welcome them, talk with them, and help them see say we really care about them. Jordan wey we don talk about before, talk say, “When people de thank me for my comment for meeting, de arrange to work with me for preaching, or de do other things to show say they care about me, this one de really encourage me.” We must show our sisters say them dey important to us. One sister wey e name na Kia talk say, “If I miss meeting, I know say person must send me text message to check if I dey OK. That one de make me see say the brothers and sisters care about me.”

8. Which other ways we fit copy Jesus?

⁸ Like Jesus, make we do our best to  spend time with sisters. We fit invite them come our place come chop or do some other things wey we de use relax and enjoy ourself. When we do like that, make we make sure say we de talk things wey go encourage them. (Rom. 1:11, 12) E good make elders get the kind mind wey Jesus Christ get. Jesus know say e fit no easy for some people wey never marry. But Jesus make-am clear say no be to marry or to get children be the main thing wey de make person really dey happy. (Luke 11:27, 28) Instead, we go dey happy forever if we put the worship of Jehovah as the number one thing for our life.​—Matt. 19:12.

9. Wetin elders fit do to help sisters?

⁹ E dey important make elders de treat women for congregation as their sisters and mama. (1 Tim. 5:1, 2) E good make elders try de talk with sisters before or after meeting. Kristen wey we talk about before talk say, “One elder notice-am say I really dey busy and the elder want understand how my program be like. I really like-am as e show say e care about me.” When elders de spend some time de talk with their sisters for congregation, them de show say they care about them. * Annette wey we talk  about before talk why e good to always talk to elders. The sister talk say: “This one de make me know them well pass before, and them de know me too. Then, anytime wey I get problem, e no de hard me to tell them make they help me.”

10. Wetin fit help our sisters dey happy?

¹⁰ Whether we be man or woman, all of us de like-am when other people tell us say we de do something well and they like wetin we do. But if they no show say they like wetin we do, this one fit make us feel bad. One pioneer sister wey never marry and wey e name na Abigail talk how e de feel sometimes. E say e de feel say people no even know-am. E talk say: “People just de see me as somebody sister or somebody pikin. Sometimes I de feel say people no de notice me.” But hear wetin one sister wey e name na Pam talk. This sister never marry and e serve as missionary for many years. But after, e go back to house so that e go fit care for e papa and mama. This sister don pass 70 years now and e still de pioneer. The sister talk say: “The thing wey don help me pass any other thing na when people de tell me say they like the work wey I de do.”

11. How Jesus show say e like as faithful women support-am for e preaching work?

¹¹ Faithful women use “the things wey they get” to help Jesus, and Jesus show say e really like this thing wey they do. (Luke 8:1-3) Jesus no only give them the honor to help-am with wetin they get, but e still teach them important truth about the things wey God want. For example, e tell them say e go die and come back to life. (Luke 24:5-8) The way Jesus prepare the apostles for the things wey they go face for future, na so e still prepare this women. (Mark 9:30-32; 10:32-34) When they arrest Jesus, the apostles run. Even with that one, some of the women wey de support Jesus no leave-am when e dey ontop the pole de die.​—Matt. 26:56; Mark 15:40, 41.

12. Which work Jesus give women?

¹² For Bible time, Jesus give women important work make they do. For example, na some women wey de serve God first see Jesus when e come back to life. E send this women make they go tell the apostles say e don come back to life. (Matt. 28:5, 9, 10) And e fit be say when the disciples receive holy spirit for Pentecost 33 C.E., women dey the place. If na so, then this women go don get the power from holy spirit to speak different-different language and tell other people about “the wonderful things wey God de do.”​—Acts 1:14; 2:2-4, 11.

13. Which work women for congregation de do today, and how we fit show say we like wetin them de do?

¹³ We suppose de greet our sisters for all the work wey them de do for Jehovah. Part of this work na to build and maintain our buildings, de support groups wey de use different language, and support Bethel work. Them de join go help brothers and sisters wey things like heavy rain scatter their property, them de translate our book them, and them de serve as pioneers and missionaries. Like brothers, sisters de go pioneer school, School for Kingdom Evangelizers, and Gilead School. Apart from that one, wives de support their husband so that they go fit do their work for congregation and for the organization. This brothers na “gift” to congregation and them de do many things to help other people. But e no go easy for them to do their work if their wife no support them. (Eph. 4:8) You fit think of things wey you fit do to support our sisters for the work wey them de do?

14. With wetin dey for Psalm 68:11, wetin elders go do to show say they get sense?

 ¹⁴ E good make elders know say sisters “be like plenty soldiers” wey dey ready to work, and say many of them really know how to preach the good news. This one go show say the elders get sense. (Read Psalm 68:11.) So elders go try to learn from the experience wey this sisters get. Abigail wey we talk about before, talk say e de like-am when brothers ask-am which different style e de use talk to people for the territory make they listen. The sister talk say, “That one help me see say Jehovah get wetin e de use me do for e organization.” Apart from that one, elders know say mature sisters wey de serve Jehovah well really know how to help young sisters when them de face problem. (Titus 2:3-5) True-true, we suppose to show our sisters say we love them!

15. Which time sisters fit need person to help them?

¹⁵ Sometimes, sisters fit need person to protect and help them when them de face some kind problem. (Isa. 1:17) For example, sister wey e husband don die or wey no dey with e husband again, fit need person wey go help-am do some things wey e husband de do before. Sister wey don old fit want make person help-am talk to doctor. Or e fit be say one sister wey de pioneer de help our organization do some other work. So this sister fit need person wey go talk for-am when other people de talk say e no de come out for preaching again like other pioneers. Which other thing we fit do to help our sisters? Make we see the example of Jesus again.

16. How Jesus help Mary as Bible talk for Mark 14:3-9?

¹⁶ Jesus no waste time to help sisters wey de serve God when other people no understand them. For example, e support Mary when Martha de vex for wetin Mary do. (Luke 10:38-42) And Jesus still support Mary second time, when people feel say wetin Mary do no good and they begin talk bad about Mary. (Read Mark 14:3-9.) Jesus understand why Mary do wetin e do and Jesus talk say e do well. E say: “Na better thing e do for me. . . . E do wetin e fit do.” Jesus even talk say people go talk about the fine thing wey this woman do “for any place wey they preach the good news for the whole world.” And that one na the thing wey this article de do now. Na fine thing say when Jesus praise Mary for wetin e do, Jesus talk about the good news wey people go preach for the whole world. This thing wey Jesus talk go don really encourage Mary, as people no understand why Mary do wetin e do!

17. Give one example about when we fit need to help any of our sister.

¹⁷ You de protect and help sisters for congregation when they need-am? Think about this examples. Some publishers see say one sister wey e husband no de serve Jehovah de come meeting late many times, and e de go house as meeting just close. They notice-am say e no de too bring e children come meeting. So they no like wetin the sister de do because they feel say, the sister no de do e best to make e husband allow-am de bring the children come meeting. But the truth be say, the sister de do everything wey e fit do. No be the sister de decide everything wey e de use e time do, and e no get right to talk the final thing wey the children go do. Wetin you fit do for this kind situation? If you thank the sister and tell other people the things wey e de do well, this one fit make them stop to talk wetin no good about the sister.

18. Which other things we fit do to help our sisters?

 ¹⁸ We fit show our sisters say we really care about them when we do somethings to help them. (1 John 3:18) Annette wey we talk about before, wey de care for e mama talk say: “Some brothers and sisters de come my house to take care of my mama sometimes so that I go fit do other things, or they go bring food for me. This one de make me know say they love me and I be part of the congregation.” Brothers and sisters still help Jordan wey we talk about before. One brother teach this sister how to maintain e motor. The sister talk say: “I dey happy to know say my brothers and sisters want make I dey safe.”

19. Which other things elders fit do to help sisters?

¹⁹ Make elders still try to see how they fit de care for sisters. They know say Jehovah want make we treat sisters well. (Jas. 1:27) So like Jesus, elders go dey ready to change wetin they get for mind sometimes. They fit do this one if they no de make law for everything, when e be say e go better to dey kind and understand the situation. (Matt. 15:22-28) When the elders de try their best to help, them de make the sisters feel say Jehovah and e organization love them. When the group overseer of Sister Kia know say the sister de pack go another place, e no waste time to help. Kia talk say: “This one make the work easy for me. Because the elders encourage and help me, they make me really see say I dey important for congregation and I no dey alone when I de face problem.”

20-21. How we fit show say we love all our sisters for congregation?

²⁰ Today, when we look our congregation well, we go see plenty fine examples of sisters wey de work hard and wey we suppose to support. As we don learn from the example of Jesus, we fit help our sisters when we de spend time with them and try to know them. We fit show them say we like wetin them de do for Jehovah. And we fit protect and help them when they need-am.

²¹ For the end of the letter wey apostle Paul write to the congregation for Rome, e mention nine women for congregation. (Rom. 16:1, 3, 6, 12, 13, 15) True-true, as this women hear the greeting and the well done from Paul, this one go don encourage them. So make we support all the sisters for our congregation. When we do this one, we de show say we love them as all of us na one family.