1. ¿Ximodo cayacané ca hermana stinu xquidxi Dios, ne xi guendanagana cadxaagalú stale de laacabe? (Biiyaʼ foto ni zeeda lu portada).

RIÉCHENU purtiʼ nuu stale hermana ni cayuni dxiiñaʼ nadipaʼ ndaaniʼ congregación. Runi participárcabe lu reunión, runi predicárcabe ne rizaaláʼdxicabe ca hermanu stícabe. Laaca nuu de laacabe racané lu mantenimientu stiʼ ca Yoo stiʼ Reinu. Peru laaca ridxaagalúcabe guendanagana. Nuu de laacabe cayápacabe bixhózecabe ni maʼ huaniisi. Xcaadxi cayuni huantar purtiʼ cucaalú familia stiʼ laa. Ne xcaadxi hermana cusiniisi ca xiiñiʼ stubi ne cayúnicaʼ stipa para gudiicaʼ ni caquiiñecabe.

2. ¿Xiñee caquiiñeʼ gúninu stipa para gacanenu ca hermana stinu?

² ¿Xiñee caquiiñeʼ gúninu stipa para gacanenu ca hermana stinu? Purtiʼ cadi guiráʼ binni runi respetar ca gunaa. Ne lu Biblia ná caquiiñeʼ gacanenu laacabe. Guzéʼtenu ti ejemplu, gunabaʼ apóstol Pablo ca hermanu de congregación ni nuu Roma guidxaagalucaʼ hermana Febe ne gacanecaʼ laabe né ni caquiiñebe (Rom. 16:1, 2). Tiempu guca Pablo fariseu la? bíʼnibe menu ca gunaa purtiʼ zaqué nga cultura stibe. Peru dxi gúcabe xpinni Cristu, yenándabe ejemplu stiʼ Jesús, gúcabe nachaʼhuiʼ ne biʼniʼ respetarbe ca gunaa (1 Cor. 11:1).

3. ¿Ximodo biʼniʼ tratar Jesús ca gunaa, ne xi biʼniʼ sentirbe pur ca ni runi ni ná Dios?

³ Biʼniʼ tratar Jesús guiráʼ gunaa né respetu (Juan 4:27). Qué ñácabe casi ca xaíque yuʼduʼ de tiempu stibe que. Ti enciclopedia bíblica guníʼ: «Qué ñuu dxi niníʼ Jesús xiixa ni nusihuinni runi menu ca gunaa». Ne jmaruʼ si biʼniʼ respetarbe ca gunaa ni runi ni ná Bixhózebe. Ora bizeeteʼ Jesús tuu nga ca binni ni ruuyaʼ casi familia stiʼ la? guniʼbe de caadxi hombre ne gunaa (Mat. 12:50).

4. ¿Xi zadúʼyanu lu artículo riʼ?

 ⁴ Guyuu Jesús dispuestu gacané ca hermana stiʼ. Laaca bisisácabe ne biʼniʼ defenderbe laacaʼ. Guidúʼyanu ximodo zanda chinándanu ejemplu stibe ora guni tratarnu ca hermana stinu.

5. ¿Xiñee raca nagana para caadxi hermana guidxaagacaʼ xcaadxi?

⁵ Pa hombre o gunaa laanu la? guiranu caquiiñeʼ guidxaaganu xhamígunu ni gacané laanu. Peru caadxi hermana raca nagana para laacaʼ gúnicaʼ ni bizéʼtenu riʼ. ¿Xiñee yaʼ? Guzéʼtenu ni guníʼ caadxi de laacabe. Ti hermana lá Jordan * guníʼ: «Cumu caʼruʼ guichaganaʼyaʼ, stale biaje runeʼ sentir qué rulábicabe naa ndaaniʼ congregación ne qué rusisácacabe naa». Kristen, ti hermana ni yendeza sti guidxi para gacané jma lu predicación guníʼ: «Ora nacubi yendaluʼ ti congregación, runi sentirluʼ stúbiluʼ». Ca hermana ni nabezané familia stiʼ ni cadi Testigu zándaca guni sentircaʼ nuucaʼ zitu de familia sticaʼ ne de ca hermanu. Ne ca hermanu ni huará o ca ni cayapa ti familia stiʼ ni huará zanda guni sentircaʼ stúbicaʼ. Sicaríʼ guníʼ ti hermana ni láʼ Annette: «Cumu naa nga rapaʼ jñaaʼ la? qué randa riaaʼ ca lugar ra runi invitárcabe naa».

6. Casi ná Lucas 10:38-42, ¿ximodo gucané Jesús María ne Marta?

⁶ Gulee Jesús tiempu para chuʼ ra nuu ca hermana stiʼ ne dxandíʼ guca xhamígube laacaʼ. Guca xhamígube María ne Marta, chupa gunaa soltera (biindaʼ Lucas 10:38-42). Rihuinni dxichi pur modo guniʼbe ne modo biʼniʼ tratarbe laacaʼ biʼniʼ sentircaʼ galán ora guyuucaʼ ra nuube. Ne pur nga gurí María xañee maestru stiʼ para guiziidiʼ de laabe. * Ne Marta la? qué nituí lú ora gudxi Jesús cadxiichi purtiʼ cadi cayacané María laa. Óraque bisiidiʼ Jesús laacabe caadxi cosa nabé risaca. Laaca bisihuínnibe rizaaláʼdxibe laacaʼ ne bizáʼnacaʼ Lázaro, purtiʼ yegánnabe laacaʼ xcaadxi biaje (Juan 12:1-3). Nga runi yeyubi María ne Marta Jesús para gacanebe laacaʼ dxi guca huará Lázaro (Juan 11:3, 5).

7. ¿Ximodo zanda cuʼnu gana ca hermana stinu?

⁷ Para caadxi hermana, ti lugar ra zanda guidxaagacabe ca hermanu stícabe nga ra reunión. Nga runi guni aprovecharnu para guidxaagalunu laacabe, guinínenu ne gusihuínninu rizaaláʼdxinu laacabe. Jordan, hermana ni maca bizéʼtenu que guníʼ: «Runeʼ sentir galán ora runi felicitárcabe naa pur bineʼ comentar ra reunión, ora runi invitárcabe naa para chiguneʼ predicar o gusihuínnicabe rizaaláʼdxicabe naa de sti modo». Gúninu stipa guni sentir ca hermana stinu risácacaʼ para laanu. Sicaríʼ guníʼ ti hermana láʼ Kia: «Pa guiaadxaʼ ti reunión, seguru ziuu ti mensaje ra canabadiidxacabe naa pa gucaʼ xiixa. Nga rusihuinni rizaalaʼdxiʼ ca hermanu naa».

8. ¿Xiruʼ zanda gúninu para chinándanu ejemplu stiʼ Jesús?

⁸ Chinándanu ejemplu stiʼ Jesús ne cueenu tiempu para ca hermana stinu. Zanda guni invitarnu laacabe ra lídxinu  para guidoʼno xiixa o chuʼnu juntu ti ratu. Ora gúninu ni, gúninu stipa pur guininu cosa ni cuʼ gana laacabe (Rom. 1:11, 12). Nga runi, risaca chinanda ca ancianu ejemplu stiʼ Jesús. Gunna Jesús cadi fácil para caadxi hermanu ne hermana gácacaʼ solteru. Peru guniʼbe para guibani binni nayecheʼ cadi caquiiñeʼ peʼ guichaganáʼ o gapa xiiñiʼ, sínuque ni jma risaca nga guni ni ná Jehová primé lu xquendanabani (Mat. 19:12; Luc. 11:27, 28).

9. ¿Ximodo zanda gacané ca ancianu ca hermana?

⁹ Naquiiñeʼ guni tratar ca ancianu ca hermana sticaʼ casi jñaacaʼ ne bizáʼnacaʼ (1 Tim. 5:1, 2). Caquiiñeʼ cueecaʼ tiempu para guiníʼnecaʼ laacabe ante o despué de cada reunión. Sicaríʼ guníʼ Kristen: «Cumu runeʼ dxiiñaʼ ne precursora naa la? guizáʼ riuaaʼ xhiiñaʼ, ngue runi gunabadiidxaʼ ti ancianu naa ximodo runeʼ para ganda guneʼ guiráʼ cosa stinneʼ. Bidieeʼ xquixe peʼ laabe purtiʼ rizaaláʼdxibe naa». Ora ribee ca ancianu tiempu para guiníʼnecaʼ ca hermana sticaʼ, rusihuínnicaʼ rizaaláʼdxicaʼ laacabe. * Annette bizeeteʼ  xi runi sentir tuuxa ora rizaaláʼdxicabe laa: «Runebiaʼyaʼ laacabe, ne laaca runibiáʼcabe naa. Ne ora napaʼ xiixa guendanagana, qué raca nagana para naa guinabaʼ laacabe gacanécabe naa».

10. ¿Xi zanda gacané ca hermana guni sentircaʼ galán?

¹⁰ Riéchenu ora ruuyaʼ xcaadxi ca cualidad ni nápanu ne ora rábicaʼ laanu rusisácacaʼ ni rúninu. Pa guirutiʼ gúnini la? zareʼnu gana. Ti precursora ni láʼ Abigaíl runi sentir nuu biaje qué rulábicabe laa, sicaríʼ guniʼbe: «Ruuyacabe naa casi xiiñiʼ tal hermanu o bizaʼnaʼ fulanu. Nuu tiru runeʼ sentir qué gánnacabe pa nuaaʼ». Guidúʼyanu ni guníʼ ti hermana soltera ni láʼ Pam, gúcabe misionera stale iza peru biguétabe ra lídxibe para gápabe jñaabe ne bixhózebe. Tiempu riʼ nácarube precursora ne maʼ nápabe jma de 70 iza, sicaríʼ guniʼbe: «Ni jma racané naa nga ora rábicabe naa nadxiicabe naa».

11. ¿Ximodo bisihuinni Jesús rusisaca ca gunaa ni guzané laa dxi biʼniʼ predicar?

¹¹ Bisisaca Jesús ca «gunaa ni rudii de ni napa para» gucané laabe (Luc. 8:1-3). Cadi bidii si Jesús lugar gacanécabe laa, sínuque laaca bisiidibe laacaʼ cosa risaca de ni chiguni Dios. Gúdxibe laacaʼ zátibe ne ziásabe de lade gueʼtuʼ (Luc. 24:5-8). Cásica bíʼnibe né ca apóstol stibe, laaca gucanebe ca gunaa riʼ chuʼcaʼ listu para dxi gúʼyacaʼ laabe gacanabe ne gátibe (Mar. 9:30-32; 10:32-34). Ne dxi gunaaze ca xaíque yuʼduʼ Jesús ne bisaana ca apóstol stiʼ laa la? qué nusaana ca gunaa riʼ laabe dxi cayátibe lu yaga que (Mat. 26:56; Mar. 15:40, 41).

12. ¿Xi dxiiñaʼ risaca bidii Jesús caadxi gunaa?

¹² Bidii Jesús dxiiñaʼ risaca caadxi gunaa. Guzéʼtenu ti ejemplu, ca primé binni ni biʼyaʼ laabe dxi biásabe de lade gueʼtuʼ nga caadxi gunaa fiel. Gúdxibe laacaʼ gábicaʼ ca apóstol stibe maʼ biásabe de lade gueʼtuʼ (Mat. 28:5, 9, 10). Ne lu Pentecostés de iza 33, dxi biaba espíritu santu luguiáʼ caadxi xpinni Cristu, zándaca nuu gunaa ládecabe. Pa zacá ni la? gucuaa ca gunaa riʼ privilegiu para guiniʼcaʼ de «ca cosa ni biʼniʼ Dios né poder stiʼ» lu gadxé gadxé idioma (Hech. 1:14; 2:2-4, 11).

13. a) ¿Xi runi stale hermana para guni servircaʼ Jehová tiempu riʼ? b) ¿Ximodo zanda gusihuínninu rudiʼnu xquixe peʼ laacabe pur guiráʼ ni rúnicabe yaʼ?

¹³ Caquiiñeʼ gudiʼnu xquixe peʼ ca hermana stinu pur guiráʼ ni rúnicaʼ lu xhiiñaʼ Jehová. Caadxi de ca dxiiñaʼ ni rúnicabe nga racanécabe lu construcción ne rudiicabe mantenimientu ca edificiu stiʼ organización, runi predicárcabe lu sti idioma ne rúnicabe dxiiñaʼ de voluntaria Betel. Laaca racanécabe ora rizaaca ti desgracia ne runi traducírcabe ca publicación, nácacabe precursora o misionera. Ne casi ca hermanu, laaca riécabe escuela de precursor, escuela de evangelizador ne Galaad. Laaca nuu hermana ni maʼ bichaganáʼ ni cayacané xheelaʼ para ganda guni tender ca responsabilidad ni napa ndaaniʼ congregación ne ndaaniʼ organización stiʼ Dios. Pa qué ñacané ca hermana riʼ xheelacaʼ, ca hombre ni zeeda gaca casi ti regalu, qué ñanda ñuni ca hermanu riʼ xhiiñacaʼ (Efes. 4:8). ¿Ñee huaníʼ íquenu ximodo gacanenu ca hermana riʼ lu dxiiñaʼ ni cayúnicaʼ para Jehová la?

14. Casi ná Salmo 68:11, ¿xi runi ca ni naca buen ancianu?

 ¹⁴ Ca buen ancianu nánnacaʼ naca ca hermana ca casi «ti ejércitu naroʼbaʼ» ni nuu dispuestu guni dxiiñaʼ, ne stale de ca hermana riʼ guizáʼ nánnacaʼ guni predicarcaʼ ca noticia galán (biindaʼ Salmo 68:11). Nga runi ruyubi ca ancianu guiziidicaʼ de experiencia napa ca hermana riʼ. Abigaíl, hermana ni bizéʼtenu lu ca párrafo ni gudiʼdiʼ ca guníʼ nabé riuu gana ora rinabadiidxacabe laa xi runi para guzulú guni predicar. Sicaríʼ guniʼbe: «Ndiʼ rucaa naa guiníʼ iqueʼ risacaʼ ndaaniʼ organización stiʼ Jehová». Laaca nanna ca ancianu zanda gacané ca hermana fiel riʼ ca hermana ni jma nahuiiniʼ ora nápacaʼ guendanagana (Tito 2:3-5). Ndiʼ rusihuinni caquiiñeʼ gudiʼnu xquixe peʼ ca hermana riʼ ne gannaxhiinu laacabe.

15. ¿Pora nga zándaca caquiiñeʼ tu guni defender ne gacané ca hermana stinu?

¹⁵ Ziuu ora caquiiñeʼ tu guni defender ne gacané ca hermana stinu (Is. 1:17). Guzéʼtenu ti ejemplu, ti hermana viuda o divorciada zándaca caquiiñeʼ tu guiníʼ pur laa o gacané laa né caadxi de ca dxiiñaʼ ni biʼniʼ xheelaʼ. Ti hermana maʼ huaniisi zándaca caquiiñeʼ tu gacané laa para guiniʼné ti doctor. Ne ti precursora ni racané organización de xcaadxi modo zándaca caquiiñeʼ tu guni defender laa ora guiníʼ tuuxa qué runi predicarbe biaʼ runi xcaadxi precursor. ¿Xi zanda gúninu pur laacabe yaʼ? Guzéʼtenu sti biaje ejemplu stiʼ Jesús.

16. Casi ná Marcos 14:3-9, ¿ximodo biʼniʼ defender Jesús María?

¹⁶ Biʼniʼ defender Jesús ca hermana stiʼ ora guníʼ binni cadi jneza ni cayúnicaʼ. Ti biaje biʼniʼ defenderbe María dxi biʼniʼ criticar Marta laa (Luc. 10:38-42). Laaca biʼniʼ defenderbe laa ora guníʼ binni bíʼnibe ti cosa ni cadi jneza (biindaʼ Marcos 14:3-9). Nanna Jesús xi pur biʼniʼ María ni. Ngue runi guluube gana laa né ca diidxaʼ riʼ: «Jneza ni bíʼnibe pur naa. [...] Biʼniʼ gunaa riʼ ni zanda guni». Ne laaca biʼniʼ profetizarbe: «Lu guidubi guidxilayú, intiica lugar gaca predicar ca noticia galán, laaca zaníʼcabe ni biʼniʼ gunaa riʼ». Ne nga peʼ ni cayuni artículo riʼ. ¡Nanna pabiáʼ gudixhedxí ca diidxaʼ riʼ ladxidóʼ María! Guizáʼ galán ni guníʼ Jesús riʼ purtiʼ bizeeteʼ de guendanachaʼhuiʼ stiʼ María ora guniʼbe zaca predicar ca noticia galán lu guidubi Guidxilayú.

17. Bizeeteʼ ti ejemplu ni rusihuinni pora nga caquiiñeʼ guni defendernu ti hermana.

¹⁷ ¿Ñee runi defendernu ca hermana stinu ora caquiiñecaʼ ni la? Guzéʼtenu ti ejemplu. Ti hermana ni cadi Testigu xheelaʼ, maʼ huadxí rindá ra reunión ne casi guiluxe ni maca zibiʼ. Ne huaxiéʼ biaje rinebe ca xiiñibe reunión. Nga runi nuu tu laa ruzulú runi criticar laabe, riniʼcaʼ xiñee qué rábibe xheelabe gudii lugar chinebe ca xiiñibe reunión. Peru laabe cayúnibe guiráʼ ni nuu lu nabe. Ne nuu ora rabi xheelabe laabe gúnibe xiixa ni cadi cabézabe ne caquiiñeʼ guni respetarbe xheelabe pa qué naʼ cheʼ ca xiiñicabe reunión. ¿Xi caquiiñeʼ gúninu yaʼ? Pa guni felicitarnu laabe pur stipa ni cayúnibe ne guinínenu xcaadxi hermanu de stipa ni cayúnibe, zándaca maʼ qué zuni criticar guirutiʼ laabe.

18. ¿Xiruʼ zanda gúninu para gacanenu ca hermana stinu?

¹⁸ Sti modo zanda gusihuínninu rizaaláʼdxinu ca hermana stinu nga ora racanenu  laacabe (1 Juan 3:18). Sicaríʼ guníʼ Annette, ti hermana ni cayuuyaʼ jñaa ni maʼ huará: «Beeda gacané ca xhamiguaʼ naa chupa chonna biaje para ganda guneʼ xcaadxi cosa o nuu biaje reedanécabe ti guendaró. Guiráʼ ni rúnicabe que bicaaʼ ni naa guneʼ sentir risacaʼ ndaaniʼ congregación ne nadxiicabe naa». Ne hermana Jordan, gucané ti hermanu laa para ganna xi guni ti cadi gaca feu xcarru. Laabe guniʼbe: «Riecheʼ purtiʼ rizaalaʼdxiʼ ca hermanu ca cadi guizaacaʼ gastiʼ».

19. ¿Xiruʼ zanda guni ca ancianu para gacanecaʼ ca hermana?

¹⁹ Laaca naquiiñeʼ guʼyaʼ ca ancianu xi caquiiñeʼ ca hermana. Nánnacabe ruuyaʼ Jehová ximodo runi tratárcabe ca hermana (Sant. 1:27). Nga runi, rinándacabe ejemplu stiʼ Jesús, qué riguíxhecabe regla sínuque riénecabe laacaʼ (Mat. 15:22-28). Ora ruyúbicabe modo gacanécabe ca hermana, rucaacabe laacaʼ guni sentircaʼ nayecheʼ. Nga nga ni bizaaca Kia dxi bidxaa de yoo. Ora gunna superintendente de grupu stibe chiguidxaabe la? nagueendaca biyubi caadxi hermanu para gacanecaʼ laabe. Sicaríʼ guniʼbe: «Maʼ qué ñuuaaʼ piaʼ xizaa. Né ca diidxaʼ ni gudxi ca ancianu naa ne modo gucanecaʼ naa bisihuínnicaʼ risacaʼ ndaaniʼ congregación ne cadi nuaaʼ stubeʼ».

20, 21. ¿Ximodo zanda gusihuínninu rusisácanu guiráʼ ca hermana stinu?

²⁰ Ndaaniʼ congregación stinu laaca zanda guidxélanu stale hermana ni guizáʼ runi dxiiñaʼ ni caquiiñeʼ gacanenu. Ra bidúʼndanu ejemplu stiʼ Jesús, bizíʼdinu caquiiñeʼ gúninu stipa para chuʼnu gaxha de laacabe, gunibiaʼnu laacabe, gudiʼnu xquixe peʼ laacabe pur dxiiñaʼ ni cayúnicabe para Jehová ne ora caquiiñeʼ tu guni defender laacabe la? gúninu ni.

²¹ Ra maʼ ziluxe carta ni bicaa Pablo para ca hermanu de Roma la? bizeetebe lá gaʼ hermana xpinni Cristu (Rom. 16:1, 3, 6, 12, 13, 15). Nanna dxíchinu biéchecabe ora binadiágacabe cuseendaʼ Pablo diuxi para laacabe ne caguu gana laacabe. Pa gacanenu guiráʼ hermana stinu, zusihuínninu risácacabe ne nácacabe parte de familia stiʼ Dios.