1-2. Ma lubbe ki 1 Temceo 6:20, gin ango ma onongo kimiyo ki Temceo?

POL kare wamiyo jo mukene aye gigwoko jamiwa ma pigi tek. Me labolle, waromo gwoko centewa i beng. Ka watimo meno, nongo watye ki gen ni pe gibirwenyo centewa nyo giweko lukwo kwalo. Pi meno, watwero niang maber adada tyen lok me miyo ki ngat mukene gin mo ma waneno ni pire tek wek en ogwok piwa.

² Kwan 1 Temceo 6:20. Lakwena Paulo opoyo wi Temceo ni onongo gimine gin mo ma pire tek​—ngec ma atir i kom yub pa Lubanga pi dano. Kimiyo ki Temceo bene mot me ‘tito lok me kwena maber pa Lubanga.’ (2 Tem. 4:2, 5) Paulo ocuko cwiny Temceo me gwoko gin ma dong gimiyo i cinge. Calo Temceo, wan bene watye ki jami mapol ma pigi tek. Jami mene? Dok pingo omyero wagwok lonyo ma Jehovah omiyo botwa-ni?

3-4. Pingo lok ada me Baibul pire tek?

³ Jehovah omiyo botwa ngec ma atir i kom lok ada ma pigi tego ma nonge i Lokke, Baibul. Lok ada magi pigi tek pien gipwonyowa kit me bedo ki wat maber ki Jehovah dok gitito gin ma kelo yomcwiny me ada i kwo. Ka wajolo lok ada magi dok walubugi i kwowa, wabibedo agonya ki i kom pwony goba kacel ki tim me tarwang.—1 Kor. 6:9-11.

⁴ Tyen lok mukene ma oweko lok ada ma tye i lok pa Lubanga pire tek aye pien Jehovah nyutugi bot jo ma ‘myero me nongo kwo ma pe tum’ keken. (Tic 13:48) Jo  ma mwol giye ni lagwok ot ma lagen dok maryek aye tye ka pwonyowa lok ada me Baibul i kare-ni. (Mat. 11:25; 24:45) Pe watwero niang lok me Baibul labongo kony, dok pe tye gin mo ma pire tek loyo niang lok me Baibul.​—Car. 3:13, 15.

5. Gin ango mukene bene ma Jehovah ominiwa?

⁵ Jehovah bene ominiwa mot me pwonyo jo mukene ki lok ada madok i kome ki yubbe. (Mat. 24:14) Kwena pa Jehovah ma watito-ni pire tek adada pien konyo dano me doko jo me ot pa Jehovah dok minigi kare me nongo kwo ma pe tum. (1 Tem. 4:16) Kadi bed watero cawa malac nyo manok i tic me tito kwena, nongo watye ka cwako tic ma pire tek loyo ma kitye ka timone i kare-ni. (1 Tem. 2:3, 4) Man pud dong obedo mot madit ya me tic kacel ki Lubanga!—1 Kor. 3:9.

6. Ngo mutimme i kom jo ma onongo pe gitye ki pwoc pi mot me bedo lutic kacel ki Lubanga?

⁶ I kare pa Temceo, Lukricitayo mogo onongo pe gitye ki pwoc pi mot me bedo lutic kacel ki Lubanga. Dema onongo maro jami me lobo-ni, meno omiyo en ojalo motte me tic kacel ki lakwena Paulo woko. (2 Tem. 4:10) Pugelo ki Kermogen nen calo gujuko tito kwena pien onongo gitye ki lworo ni kibiunogi calo Paulo. (2 Tem. 1:15) Kumenayo, Alegijanda, ki Pileto gungak woko ki i ada. (1 Tem. 1:19, 20; 2 Tem. 2:16-18) Jo magi ducu onongo yam gitiyo pi Jehovah, ento lacen gujuko woko pien gurwenyo pwoc pi jami ma pigi tek ma kimiyo botgi.

7. Diro ango ma Catan tiyo kwede i komwa?

⁷ Ngo ma Catan bitowa kwede wek wajal lonyo ma Jehovah ominiwa? Nen kong diro mogo ma Catan tiyo kwede. En tiyo ki galowang kacel ki odi me poko lok angeya me nyayo tam ki kit mogo ma en ngeyo ni twero ywayowa woko motmot ki i ada. En bene temo miniwa bwura nyo aunauna kun tiyo ki dic ma a ki bot luwotwa wek wajuk tito kwena woko. Dok tye ka temme me bitowa me keto cwinywa i winyo pwony pa jo mungak wek wawek lubo lok ada woko.​—1 Tem. 6:20, 21.

8. Ngo ma wapwonyo ki gin ma otimme i kom omego mo ma nyinge Daniel?

⁸ Ka pe wagwokke, watwero a woko ki i ada motmot. Nen kong gin mutimme i kom Daniel, * ma onongo maro tuko tuko me vidio. En otito ni: “Acako tuko tuko me vidio i kare ma atye ki  mwaka apar. I acakkine, onongo atuko tuko mabeco. Ento motmot acako tuko tuko mogo ma nongo opong ki tim gero kacel ki tim jokjok.” I agikkine, Daniel onongo tuko tuko me vidio man pi cawa ma romo 15 nino ki nino. Daniel owaco ni, “Ki i cwinya, onongo angeyo ni tuko ma atuko-ni ki cawa ma acwalo ka tukone tye ka weko abedo bor ki Jehovah. Ento cwinya odoko nwang ma oweko acako tamo ni cik ma igi lac me Baibul pe guda.” Dong ka pe wagwokke, ci motmot galowang twero weko pe wamako lok ada matek. Ka meno otimme, watwero rwenyo jami ma pigi tek ma Jehovah omiyo botwa woko.

9. Ma lubbe ki 1 Temceo 1:18, 19, gin ango ma Paulo ocuko cwiny Temceo me timone?

⁹ Kwan 1 Temceo 1:18, 19. Lakwena Paulo oporo Temceo ki lamony. (2 Tem. 2:3) Dok en okwaye ni ‘omedde ki lwenyo lweny maber.’ Paulo onongo pe tye ka lok i kom lumony ma dano, ento lweny i yo me cwiny. I yo ma nining ma Lukricitayo gitye calo lumony ma gitye i dog lweny? Kit ango ma omyero wanyak macalo lumony pa Kricito? Kong dong wanenu pwony abic ma wanongo ki i labol pa lakwena Paulo. Pwony magi twero konyowa me mako lok ada matek.

10. Pingo omyero wadong kit me lworo Lubanga?

¹⁰ Dong kit me lworo Lubanga. Lamony maber obedo ngat ma lagen. En lwenyo matek me gwoko ngat ma en maro nyo gin mo ma pire tek bote. Paulo ocuko cwiny Temceo me dongo kit me lworo Lubanga​—nyo me nyuto woro ki bedo lagen bot Lubanga. (1 Tem. 4:7) Ka marwa pi Lubanga tye matek, ci wabibedo ki miti matek bene me bedo i ada.​—1 Tem. 4:8-10; 6:6.

11. Pingo omyero wadine kenwa?

¹¹ Dong kit me dine ken. Lamony myero odine kekene wek obed mupore pi lweny i cawa mo keken. Temceo onongo twero loyo bita pa Catan pien en olubo tira pa Paulo dok otiyo matek me lweny ki miti maraco, me dongo kit mabeco, ki me ribbe kacel ki luye luwote. (2 Tem. 2:22) Meno onongo mito dine ken. Omyero wadine kenwa me loyo lweny i kom mitiwa maraco. (Rom. 7:21-25) Medo i kom meno, myero wadine kenwa wek wamedde ki tic matek me loko kwowa macon kun waruko kit pa dano manyen. (Ep. 4:22, 24) Dok ka waol adada i nge tic matek, twero mitte ni wadine adiya me cito i cokke.​—Ibru 10:24, 25.

12. Watwero doko ludiro i tic ki Baibul nining?

¹² Lamony myero obed ka pwonyo kit me tic ki jami lwennye. Me doko ladiro, en myero otim meno kare ducu. I yo acel-lu, wan bene omyero wadok ludiro i tic ki Lok pa Lubanga. (2 Tem. 2:15) Watwero pwonyo diro mogo ki i cokkewa. Ento ka wek wakony jo mukene me ye ni lok ada me Baibul twero konyogi, ci omyero wabed ki yub me kwanone kare ki kare. Omyero wati ki Lok pa Lubanga me jingo niyewa. Man pe kwako kwanone akwana keken. Mitte bene ni walwod lok i kom gin ma wakwano dok wati ki bukkewa me timo kwed wek waniang dok watit Ginacoya i yo maber. (1 Tem. 4:13-15) Ka watimo kit meno, wabibedo ki diro me tic ki Lok pa Lubanga me pwonyo jo mukene. Man pe kwako kwano tyeng me Baibul akwana botgi.  Wamito ni wakony jo ma winyo lokwa me niang tyeng meno ki kit ma gudogi kwede. Pi meno, ka wakwano Baibul kare ki kare, ci wadoko lupwonye me Baibul ma ludiro.​—2 Tem. 3:16, 17.

13. Ngo ma Jo Ibru 5:14 waco ni omyero watim wek wapwonnye me poko kin gin maber ki marac?

¹³ Bed ki niang matut. Lamony myero obed ki kero me niang peko ma tye ci ogwokke kwede. Wan bene myero waniang jami ma twero wanowa i yo me cwiny ci wagwokke ki iye. (Car. 22:3; kwan Jo Ibru 5:14.) Me labolle, mitte ni wayer jami ma wagalo ki wangwa ki ryeko. Yub me telebijon ki cinema pol kare nyuto jami ma opong ki tim tarwang. Tim meno cwero cwiny Lubanga dok kadi ki ngo bikelo peko i komwa. Pi meno, wagwokke ki galowang ma twero weko marwa pi Lubanga doko goro.​—Ep. 5:5, 6.

14. Bedo ki niango okonyo Daniel nining?

¹⁴ Daniel, ma kiloko i kome con-ni, ocako niang ni tuko tuko me vidio ma opong ki tim gero ki tim jokjok obedo peko madit. En otimo kwed i Watchtower Library pi ngec ma twero konye me lweny ki pekone. Meno okonye nining? En ojuko tuko tuko me vidio ma pe oporre. Dok bene ojuko culo pi tuko me vidio ma kiwilo ki i Intanet kun ogiko bedo ki lureme ma gituko kacel kwede woko. Daniel owaco ni, “Me ka bedo ka tuko tuko me vidio, acako timo jami ma mito ni akat woko ki i ot kun bene akwanyo kare me bedo kacel ki lurema me kacokke.” Daniel dong tye ka tic macalo painia ki bene laelda.

15. Pingo lok goba rac adada?

¹⁵ Calo Temceo, wan bene omyero waniang rac pa ngec ma pe tye ada ma jo mungak ginyayo. (1 Tem. 4:1, 7; 2 Tem. 2:16) Me labolle, giromo temme me nyayo lok goba i kom omegiwa nyo kelo akalakala i kom dul pa Jehovah. Ngec gobagoba meno twero weko niyewa doko goro. Omyero pe waye lok goba magi. Pingo? Pien kodi lok macalo magi a ki bot “jo ma ryekogi oballe, ma mako lok me ada oloyogi woko.” Mitigi tye me nyayo “pyem ki daa.” (1 Tem. 6:4, 5) Gimito ni waye gobagi wek wabed ki gung cwiny i kom omegiwa.

16. Jami mene ma twero wiro tamwa ma myero wagwokke kwede?

 ¹⁶ Gwokke ki jami ma wiro tammi. Macalo “askari maber pa Yecu Kricito,” Temceo onongo myero oket cwinye i tic me pwony kun pe weko jami me kom wiro tamme woko. (2 Tem. 2:3, 4) Calo Temceo, pe myero wawek miti pi bedo ki jami me kom mapol owir tamwa woko. Cwiny me “maro lonyo” twero rwenyo marwa pi Jehovah, pwocwa pi Lok pa Lubanga, ki mitiwa me nywako lok me kwena maber ki jo mukene. (Mat. 13:22) Myero wakwo kwo ma rwomme lapiny dok wati ki cawa kacel ki kerowa me ‘keto cwinywa i kom kerre.’​—Mat. 6:22-25, 33.

17-18. Ngo ma omyero watim wek wagwokke ki i kom gin mo keken ma twero balo watwa ki Jehovah?

¹⁷ Bed ma iyubbe pi tic. Lamony myero oket yub con madok i kom ngo ma en bitimo me gwokke. Ka wamito gwoko jami ma Jehovah omiyo botwa, ci omyero watim gin mo oyotoyot ka waneno peko. Ngo ma twero konyowa me timo meno? Omyero waket yub con i kit ma wabidok kwede i kom gin marac.

¹⁸ Me labolle, ka dano gucito i yub mo ma guro wi lwak, pol kare kiwacigi ni omyero gunge ka ma doggola macok loyo tye iye ma peya yub ocakke. Pingo? Wek gubed atera me kato woko oyotoyot ka peko mo ocakke atura. I yo acel-lu, mitte ni waniang con doggola ma wabitiyo kwede me “kato woko” ka warwatte ki tim tarwang, tim gero malik, nyo pwony pa jo mungak i cawa ma nongo watye ka tic ki Intanet nyo ka neno filim nyo yub mo i telebijon. Ka wayubbe con pi gin ma twero timme, ci watwero timo gin mo oyotoyot me gwokke ki i kom gin ma twero balo watwa ki Jehovah kun wabedo maleng i wange.​—Jab. 101:3; 1 Tem. 4:12.

19. Mot ango ma wabinongo ka wagwoko jami ma pigi tego ma Jehovah omiyo botwa me agwoka?

¹⁹ Omyero wagwok jami ma pigi tego ma Jehovah ominiwa​—ma gin aye lok ada me Baibul ki mot me tito kwena bot jo mukene. Ka watimo meno, wabibedo ma cwinywa pe pidowa, kwowa bibedo ki tyen lok, dok wabinongo yomcwiny ma bino pi konyo jo mukene me ngeyo Jehovah. Ki konye, wabigwoko jami ma kimiyo botwa.​—1 Tem. 6:12, 19.