1-2. Mikitini 1 Timoti 6:20, malifokay ni Timoti ko maanan hani?

PATOROD to tao misimaw to kalimlaan a dafong, marariday maˈaraw i kaˈorip a demak. Tinakoen, micokingay kita to payci i kingko, samanen telien ko payci i kingko masimaway, cowa ko mamasiday, cowa ko mamatakaw. Mihaenay caay ka pasangar a cipinang kita, patorod to kalimlaan a dafong i tao o maanan ko tatodong.

² ˈOsien ko 1 Timoti 6:20. Patalipaˈelalan no tarokos ci Pawlo ci Timoti, pafeliay ko Kawas cingranan to kalimlaan a sapatorod, mahawpay ko milingatay to araaw no Kawas a matatodongay a sifanaˈ, ato cecay kalimlaan a tayal, “patenak to kimad no Kawas,” “ka pidemak to paratohay a tayal.” (2 Timoti 4:2, 5) Palimoˈotan ni Pawlo ci Timoti ka pisimaw to patorodan. Malecad ci Timotian, milifokay kita to kalimalaan a sapatorod no Kawas. Mahawpay ko maanan hani? Hano mamisimaw kita toniya sapatorod hani?

3-4. Hano kalimlaan ko soˈlinay kimad no Fangcalay Cudad hani?

³ Pafelian ni Yihofa kita to kalimlaan a Kimad no Fangcalay Cudad. Hano kalimlaan ko soˈlinay kimad, samanen o soˈlinay kimad padamaay kitaanan mafanaˈ sasamaan patireng to kalawidang ci Yihofaan, ato sasamaan lipahak ko kaˈorip. Micada kita to soˈlinay kimad halo mitoor to soˈlinay kimad a maˈorip, cowato ko mamalipalaw no mararaway a kimad, cowato ko mamidemak to tatiihay a demak.—1 Korinto 6:9-11.

⁴ O roma lalangian no kalimlaan ko Kimad no Fangcalay  Cudad i, edeng oya ‘matatodongay ko waywayan’ hanaca misapoeneray ko falocoˈ a tamdaw ko padamaan ni Yihofa cipinang to soˈlinay kimad. (Dmak 13:48) O mahaenay tamdaw mihaiyay, pakaynian no Kawas i ‘madimadiay citanengay a koli’ pasifanaˈ kitaanan. (Matay 11:25; 24:45) Oniyah ko tiˈeren cato ka cipinang kita to Fangcalay Cudad. Awaay ko maanan a demakan mikikakato kacipinang to soˈlinay kimad a masakalimlaan.—Taneng 3:13, 15.

5. Patorodanho ni Yihofa kita to maanan kalimlaan a tayal hani?

⁵ Patorodanho ni Yihofa kita to kalimlaan a tayal, pasifanaˈ to tamdaw mafanaˈ Cingranan ato araaw Ningra. (Matay 24:14) O milasilan ita a lihaf tada kalimlaan, paira to hatoki no tamdaw micomod i taˈangayay paro no lomaˈ ni Yihofa milifok to tahadaˈocay a ˈorip. (1 Timoti 4:16) Ano hakowato ko toki ita a mitosil, sahtoay o midamaay toniya kalimlaan a tayal. (1 Timoti 2:3, 4) Ngaˈay malacafay to Kawas a matayal, o kalikoan no mita!—1 Korinto 3:9.

6. O roma tamdaw cowa pisimaw to sapatorod no Kawas cangranan, samanay to teloc hani?

⁶ O roma kalecadan ni Timoti lintad a tamdaw cowa pisalimla to kalacafayan to Kawas matayal a toki. Tinakoen, ci Timas maolahay toniya hekal cowato kalacafay ci Pawloan a matayal. (2 Timoti 4:10) Ci Fikilus aci Hermokinis matalaway malecad ci Pawloan micada to sapalak, ikor sawad sanay to mitosilay a tayal. (2 Timoti 1:15) Ci Himinayus aci Aliksantor aci Filitus malo mitowakangay to kimad a tamdaw, miliyasay to soˈlinay kimad. (1 Timoti 1:19, 20; 2 Timoti 2:16-18) Oniya tamdaw na maolahay ci Yihofaan, ikor cowato pisalimla to sapatorod ni Yihofa cangraanan.

7. Misaka dademakan ni Satan ko maanan a pakayraan miˈodis kitanan hani?

⁷ Tano maanan a pakayraan ci Satan papisawad kitaanan to kalimlaan a sapatorod ni Yihofa kitaanan hani? I laenoay o misaka dademakan ni Satan a pakayraan. Misaka dademakan ningra ko tilifi ato lawla miowing to mararaway harateng ato waywayan, hato palidlid sato kita a miliyas ci Yihofaan, ecato pidofdof Cingraanan. Misaka demakanho ningra ko saroero no widang ato sapalak patalaw kitaanan, cato ka timolo mitosil. Mikayhidayho cingra kitaanan mitengil to sasowalen no mitowakangay to kimad a tamdaw, tano ‘misamangahay a sifanaˈ’ a sasowalen papisawad kitanan to soˈlinay kimad.—1 Timoti 6:20, 21.

8. Mikitini nalifetan ni Tannie mananam iso ko maanan?

⁸ Ano eca pinaˈon kita, wa palidlid saan a miliyas to soˈlinay kimad. Nengnengen ita ko tinakoan ni Tannie. * I salakat maolahay ci Tannie misalama to tingnaw, sanay cingra: “10 ko  mihecaan ako misatapangay misalama to tingnaw. Salakat, cowa ko tatiihay ko misalamaan ako, kawra ikorto, misatapangay kako misalama to mariˈangay ato misakawasay a sasalamaen.” Cecay liyad, 15 tatokian ko pisalama ako to tingnaw. Sanay cingra: “Soˈlinen ko sowal, mafanaˈay kako misalama to mahaenay, adihay ko mapalakay a toki, maedeng miraay miraayay ci Yihofaan. Kawra misakaniwan ako koniyah, eca pitoor to safalod no Fangcalay Cudad a midemak cowa ko mararaway.” Mikitini nalifetan ni Tannie mananamay ita, o pifiyor no lawla cowa ka hapinang no latekay, oha papisawad kitanan to soˈlinay kimad alatek, ecato pisaareteng to sapatorod ni Yihofa kitaanan.

9. Pakayni 1 Timoti 1:18, 19, patinakoan ni Pawlo ci Timoti to maanan hani?

⁹ ˈOsien ko 1 Timoti 1:18, 19. Patinakoan ni Pawlo ci Timoti to sofitay, pakalalok cingranan ‘padadotoc milood toya makapahay lalooden.’ O misowalan ni Pawlo a lalood cowa ko soˈlinay a lalood, hatiraay, o Krisciyang ato milooday a sofitay iraay ko maanan kalecadan hani? Malo sofitay ni Kristo, oha papalahad kita to maanan a capeling hani? Dotoc, nengnengen ita mikitini sapatinako ni Pawlo wa ngaˈay mananam ita ko lima kalimlaan. O papadama konini kitaanan misimaw to sapatorod no Kawas kitaanan.

10. O tatodong no soˈliˈlinay a falocoˈ o maanan hani? Hano papalahad kita to soˈliˈlinay a falocoˈ hani?

¹⁰ Palahad to soˈliˈlinay a falocoˈ. O sangaˈayay a sofitay kalimlaan ko madimadiay. Wa pakayni cingra sapidipotaw to kaolahan no niyah ato misalimlaan no niyah a dafong a milood. Pakalalokan ni Pawlo ci Timoti palahad to soˈliˈlinay falocoˈ, madimadi maolah to Kawas. (1 Timoti 4:7) Ano tangongol ko olah ita to Kawas, oha mamisongilaˈ a misimaw to sapatorod Ningra kitaanan.—1 Timoti 4:8-10; 6:6.

11. Hano mamiˈimer kita to niyah hani?

¹¹ Palahad to miˈimeray to niyah. O mamiˈimer to niyah ko sofitay ngaˈ maharek misaday milood. Ngaˈay ci Timoti maharek a misaday micoˈay to saˈodis ni Satan, samanen mitengilan ningra ko limoˈot ni Pawlo miliyas to mararaway a harateng, palahad to kaolahan no Kawas a capeling, micerid micawmaˈ to salikaka. (2 Timoti 2:22) Sapiremoaw tonini misaaliay to piˈimer to niyah. Malecaday, oha mamiˈimer kita to niyah ngaˈ pakalowid to mararaway harateng. (Loma 7:21-25) Roma i, sapadotocaw mifalah to matelangay capeling, halo micaˈedong to faelohay capeling, misaaliay kita miˈimer to niyah. (Ifiso 4:22, 24) Ano ˈifowa kita to cecay romiˈad, malotayen ko tireng, o mamisaˈicel kita mikowad to harateng malingad to masaˈopo.—Hipray 10:24, 25.

12. Ngaˈay kita samanan misalof to inaneng no niyah misaka dademak to sinael hani?

¹² O mamicerid ko sofitay mihatatanam, ngaˈ mananam misaka dademak to sapilood a lalosidan. Malecaday, oha mamananam kita misaka dademak to Kimad no Kawas. (2 Timoti 2:15) Mirienang kita to saˈopo wa mananam ko pakayraan misaka dademak to Fangcalay Cudad, kawra ano sapadamaaw kita to tao pakasoˈlin to kimad no Fangcalay Cudad, o mamicerid tono tekedan a picekiw. Tano sowal no Kawas a paˈicel to pakasoˈlin no niyah, aka o piasip aca to Fangcalay Cudad. Oha mamidotimho to maˈosiay a lalakaw, kilimen ko lalakaw no mitepangan, mihaen wa matatodong ko kacipinang ato misaka dademak to sinael. (1 Timoti 4:13-15) Ikor ngaˈayto tano Fangcalay Cudad a pasifanaˈ to tao. Kawra cowa ko papiasip aca ita to tao to sinael, papadamaen cingra cipinang to tatodong no sinael, mafanaˈ to sasamaan misaka dademak i kaˈorip no niyah.  Micerid kita tono tekedan picekiw, wa malo ngaˈayay a singsi pasifanaˈ to Fangcalay Cudad.—2 Timoti 3:16, 17.

13. Mikitini Hipray 5:14, hano misaali kita to sapihapinang a inaneng hani?

¹³ Ira ko sapihapinang a inaneng. O milooday a sofitay mamafanaˈ a miliyas to katalawan, wa malecad kita pakahapinang to o maanan ko papaira to katalawan, kaliki a miliyas. (Taneng 22:3; ˈosien ko Hipray 5:14.) Tinakoen, mamisinanot a mipiliˈ to lawla. Adihayay a kamok no tilifi ato ika adihayay ko malafoay a lalakaw, o mahaenay a waywayan o kaˈintehan no Kawas, midemakay to mahaenay demak a tamdaw mipalakay to niyah ato tao. O hatiniay a lawla wa palidlid saan mifasaw to olah ita to Kawas, mihaenay oha laliyasen ita.—Ifiso 5:5, 6. 

14. Palahad to sapihapinang a inaneng ci Tannie, ikor samaanayto ko minaroˈan hani?

¹⁴ O masowalay i fafekang ci Tannie ikor mafanaˈay, misalama to mariˈangay ato milingatay to misakawasay a tasalamaan i tingnaw o katalawan. Sapifalahaw toniya tatiihay nanaman, mikilimay cingra to lalakaw no Mikecolay i Library. Ikorto, cowato pisalama cingra to tatiihay a tasalamaan i tingnaw, cowato picawmaˈ to mahaenay a tamdaw. Sanay ci Tannie: “Cowato ka ˈenep kako to tasalamaan i tingnaw, tayraay i potal anca kalacafay to widang i kasakopang.” Nohatini, o misakafahay ci Tannie, o malohemay malitengay no kasakopang.

15. O sasowalen no mitowakangay to kimad a tamdaw hano tada masakatalawan hani?

¹⁵ Malecad ci Timotian, misaaliay kita mihapinang to o maanan a sasowalen o mikitiniay mitowakangay to kimad a tamdaw. (1 Timoti 4:1, 7; 2 Timoti 2:16) Latekay miyakayakay ko mitowakangay to kimad a tamdaw to makaniway lihaf pakayni salikaka, anca paira to cisasaay harateng ita to likakawa no Kawas. O hatiniay a lihaf o mamifasaw to pakasoˈlin ita, oha laliyasen no mita. Misamanay hani? Samanen o mitowakangay to kimad a tamdaw o ‘maminahol to harateng, ecato ka ira ko soˈlinay kimad,’ o araaw nangra ho mifekad ko lacongis sanay. (1 Timoti 6:4, 5) Sapilipalawaw cangra kitaanan, ho ecato pakasoˈlin kita to salikaka.

16. Aka pakayni maanan a demakan makalisanga ko falocoˈ ita hani?

¹⁶ Aka makalisanga ko falocoˈ. Malo “sofitay ni Kristo,” o mamisamacay ko harateng ni Timoti to mitosilay a tayal, cowa ko ngangaˈay pakayni picangacang to hafay ato roma  dafong a makalisanga ko falocoˈ. (2 Timoti 2:3, 4) Malecad ci Timotian, cowa ko ngangaˈay makalisanga ko falocoˈ ita micangacang to hafay. O hafay iraay ko “milipalaway to tamdaw a ˈicel,” oha mamifasaw to olah ita ci Yihofaan, ecato pisaareteng to kimad no Kawas, eca ka ciharateng milengo to Fangcalay Cudad i tamdaw. (Matay 13:22 ato roma pihongyak) O mamisaˈicel kita midolo to kaˈorip, misaka dademak to toki ato ˈicel “padotoc micangacang to Hongti kitakit.”—Matay 6:22-25, 33.

17-18. Sapidipotaw to ngaˈayay kalalaˈed no niyah aci Yihofaan, sasamaan ko hademak ita hani?

¹⁷ Salakat a mihalaka, kaliki ko pisaysay. Wa isalakat ko sofitay miharateng to sapisaysay a pakayraan. Ano sapisimawaw kita to sapatorod ni Yihofa kitaanan, ano tahalifa to katalawan i, kaliki a misaysay. Sasamaan ko hademak ita hani? Wa isalakat kita miharateng to sasamaan midipot to niyah.

¹⁸ Haratengen ko cecay tinakoan. Ano mirienang kita to taˈangayay saˈopo i, to cerid ˈayaw no misatapang ko kamok misinanotay, icowaay ko ingataay kacalohan a kasadakan. Mihaen, ano mifekad ko macalohay a pakayraan, wa tangsol kita a milaliw. Malecaday, wa isalakat kita a miharateng, ano misangwang anca minengneng to ika, kamok no tilifi fahalsa masadak ko kaacekan anca mariˈangay sasing, anca milingatay to lalakaw no mitowakangay to kimad a tamdaw, sasamaan ko hademak ita. Ano salakatay a mihalaka kita, wa kaliki a misaysay, midipot to kalalaˈed ita ci Yihofaan, wa ngaˈay ira ko makoracay a falocoˈ i ˈaˈayaw ni Yihofa.—ˈOlic 101:3; 1 Timoti 4:12.