1-2. Inoñnaga ni kaat 1 Timôtéô 6:20, limbe jam Timôtéô a bi kôs?

I YÉ i pam le di ti bôt bape nkus wés le ba tééda. Kiki hihéga, di nla tééda moni nwés i bañk. Di mboñ hala inyule di gwé bé ngôñ le ba nip nwo tole mi nimil. Ibale di ma boñ hala, wee di nla nok i bôdôl di nlama bana inyu ti mut jam li yé mahee i mis més.

² Añ 1 Timôtéô 6:20. Ñôma Paul a bi hôñlaha Timôtéô le a bi kôhna tik jam hala wee ba bi niiga nye sômbôl i Djob inyu bôt ba binam. Yéhôva a bi ti ki Timôtéô nsima i “añal bañga” yé ni i “boñ nson u ñañal ñañ nlam.” (2 Timôtéô 4: 2, 5) Paul a bi ti Timôtéô maéba le a tééda jam a bi kôs. Kiki Timôtéô yak bés di bi kôhna tik mam. Mambe? Ni inyuki di nlama tibil tééda i mam Yéhôva a bi ti bés?

3-4. Mambe manjom ma ntinde bés i hoñol le maliga ma yé tik jam?

³ Ni loñgeñem, Yéhôva a bi ti bés bañga yi i i nlôl i Bibel. Maliga di nléba ikété Bibel ma yé tik inyule ma niiga bés lelaa di nla bana maada malam ni Yéhôva, ni lelaa di nla bana bañga maséé. Ngéda di neebe biniigana bi, di ha gwo bisélél, di ga ba ha bé minkol mi biniigana bi bitembee, to mi maboñok ma nyega.​—1 Korintô 6:9-11.

⁴ Njom ipe i i ntinde bés i yoñ maliga kiki tik jam, i yé le Yéhôva a nyelel mo bôt ba suhulnyuu ba ba gwé “libak lilam.” (Minson mi baôma 13:48) I bôt ba suhulnyuu ba, ba neebe le Yéhôva a ngwélél nkol u maliga ni u pék i len ini inyu niiga bés. (Matéô 11:25;  24:45) Di ta bé le di yi maliga ma, ibale ba nhôla bé bés, yom ipe yo ki yo i nlel bé mo.​—Bingéngén 3:13, 15.

5. Kii ipe Yéhôva a bi ti bés?

⁵ Yéhôva a bi ti ki bés nsima i niiga bôt bape maliga ni bitééne gwé. (Matéô 24:14) U nwin di nlegel bo u yé nseñ inyule u nhôla bo i jôp ikété lihaa li Yéhôva, u nhôla ki bo i bana botñem i niñ boga. (1 Timôtéô 4:16) Too di nyoñ ngaba ikeñi mu nson u, to i titigi, di yi le di yé yoñ ngaba i nson u nlôôha ba nseñ i len ini. (1 Timôtéô 2:3, 4) Kinje nsima i sal ntôñ ni Nyambe!​—1 Korintô 3:9.

6. Kii i bi pémél i bet ba bi yén bé péé?

⁶ I ngéda Timôtéô, ngim bikristen i bi diihe bé nsima ba bééna i sal ntôñ ni Nyambe. Wada wap le Démas, a bi gwés nkoñ ’isi unu, a tjôô nsima a bééna i sal ni Paul. (2 Timôtéô 4:10) Bape kiki Figélô bo Hermôgéne, ba bi tjôô nson wap likalô, inyule ba bé kon woñi le b’a tééñga bo kiki Paul. (2 Timôtéô 1:15) Himénéô, Aléksandrô ni Filétô ba bi jôp i ntôñ u batjañgbene maliga. (1 Timôtéô 1:19, 20; 2 Timôtéô 2:16-18) I nene le i bôt bana bobasôna ba bé minhôôlak mi bikristen i ngéda bisu, ndi ndék ni ndék, litehge jap li tik mam ba bi kôs, li bi héñha.

7. Kii Satan a mboñ i len ini inyu gwel bés?

⁷ I len ini, Satan a noode héñha litehge jés li tik mam di bi kôs. Lelaa? Di béñge ngim dipa a ngwélél. A ngwélél mintuk, minkuu mi mahop ni u biliñgeliñge, bisima, internet, bakégikel ni bikaat bipe inyu tinde bés i hoñol ni i bana maboñok ma ma ga boñ le di waa gwélél Yéhôva. A ngwélél ngui i bilôñ bibe tole ndééñga inyu kônha bés woñi, kayéle di waa téé likalô. A noode tinde bés i emble batjañbene maliga ba ba nkal le ba gwé ‘yi, ki le bitembee bi’, inyu boñ le di kee haa ni maliga.​—1 Timôtéô 6:20, 21.

8. Kii ndémbél i mankéé Daniel i niiga we?

⁸ Ibale di nyoñ bé yihe, ndék ni ndék di nla ke haa ni maliga. Di yoñ hihéga hi Daniel, * nu a bé gwés mintuk mi gém ngandak. A nkal le: “Me bi bôdôl tuk gém i ngéda me  bééna jôm li nwii. I bibôdle, mintuk nwem mi gém mi bé kolba bé Bitilna. Ndi ndék ni ndék me bi bôdôl gwés gém i mintuk mi ngui ni i mimbuu mimbe.” A bi pam likala le a bé tégbaha 15 ngeñ i tuk gém hiki kel. A nkônde le: “I pot maliga, me bé yi le nsoñgi u ngeñ me bé tégbaha i tuk, ni mintén mi bigém me bé tuk, mi bé kena me haa ni Yéhôva ndék ni ndék. Ndi me bé kwés memede nkaa le matiñ ma Bibel ma ma mpôdôl i jam li, ma mbéñge bé me.” Ibale di nyoñ bé yihe, mintuk mi nla kena bés haa ni maliga. Ibale hala a mbôña, di nla nimis tik mam Yéhôva a bi ti bés i tééda.

9. Inoñnaga ni kaat 1 Timôtéô 1:18, 19, Paul a bi hégha Timôtéô ni njee?

⁹ Añ 1 Timôtéô 1:18, 19. Paul a hégha Timôtéô ni sônda, a ti ki nye maéba le a “ke ni bisu i jo gwét bilam.” A bé pôdôl gwét bi mbuu, he bi minson bé. Ndi lelaa bikristen bi njo gwét kiki bisônda? Bés bisônda bi Kristô, bimbe bilem di nlama bana? Di béñge mam matan di nla nigil mu hihéga Paul a bi yoñ. Biniigana bi bi ga hôla bés i téñbe i maliga.

10. Kii i yé i téñbe i gwélél Nyambe, inyuki hala a yé nseñ?

¹⁰ Boñ biliya i téñbe i gwélél Nyambe. Loñge sônda i ntéñbe ni nwet wé. A njo ni ngui inyu sôñ i bôt a ngwés, tole i tééda gwom bi yé tik i mis mé. Paul a bi ti Timôtéô makénd le a boñ biliya i téñbe ni Nyambe. (1 Timôtéô 4:7) Kiki di nke ni bisu i gwés ni i téñbe ni Nyambe, hala nyen di ga kabda maliga.​—1 Timôtéô 4:8-10; 6:6.

11. Inyuki di nlama yi gwel bésbomede?

¹¹ Di yi gwel bésbomede. I mut a yé sônda a nlama sal ni ngui inyu boñ le a ba nkôôbaga hiki ngéda inyu jo gwét. Timôtéô a bi téñbe i maliga inyule a bi noñ maéba ma Paul i ke mahoñol mabe ngwéé, i boñ biliya i bana bilem bilam, ni i tégbaha ngéda ni lôk kéé yé i mbuu. (2 Timôtéô 2:22) Inyu pam i boñ i mam ma momasôna, i mbéda le di yi gwel bésbomede. Di nlama bana lem i inyu yémbél minheña nwés mi minsôn. (Rôma 7:21-25) I mbéda ki le di yi gwel bésbomede inyu héya nlômbi mut ni inyu haba mut yondo. (Éfésô 4:22, 24) Yon i nhôla ki bés i yémbél waa i ngéda di nlo bôlô inyu ke i makoda.​—Lôk Héber 10:24, 25.   

12. Lelaa di nla kônde lémés likeñge jés i gwélél Bibel?

¹² Sônda i nlama nigil i tibil gwélél pansoñ yé. A nlama boñ i jam li hiki ngéda inyu hôlôs likeñge li. Yak bés, di nlama hôlôs likeñge jés i yi gwélél Bibel. (2 Timôtéô 2:15) Makoda ma nla niiga bés lelaa di nla boñ hala. Ndi ibale di nyéñ hôla bôt bape i ba nkwoog nkaa le Bibel i yé toi mahee, bésbomede di nlama nigil yo hiki ngéda. Inyu bana hémle i ngui, di nlama añ Bibel, di ôt pék mu mam di ñañ, di boñ nyiña inyu yi too di ntibil nok, di ha ki i yom di nigil i bisélél. Ni i njel i, di ga yi gwélél Bañga i Djob inyu niiga bôt bape. (1 Timôtéô 4:13-15) Ñ inyu hôla bo, di nlama ndik bé  éñél bo minlôñ mi Bibel. Ngôñ yés i yé le di hôla bo i nok Bitilna, ni i ha gwo i bisélél. Ibale di gwé lem i nigil Bibel hiki ngéda di ga lémés likeñge jés i yi gwélél Bitilna inyu niiga bôt bape.​—2 Timôtéô 3:16, 17.

13. Inoñnaga ni kaat Lôk Héber 5:14, inyuki di nlama yi boñ maselna ipôla loñge ni béba?

¹³ Di yi boñ maselna ipôla loñge ni béba. Sônda i nlama ba mut a mpala nôgda yom ibe i yé nye bisu a keñgle ki yo. Kiki nye di nlama pala yimbe mam ma nla ôbôs maada més ni Yéhôva. (Bingéngén 22:3; añ Lôk Héber 5:14.) Kiki hihéga, di nlama pohol mintuk nwés ni pék. I mam ba ñunda i nkuu biliñgeliñge ni i bisinima bi yé nyonok ni nyega. Maboñok ma, ma nla boñ le ndék ni ndék di nimis maada més malam ni Djob. Inyu hala nyen di nkeñgle ngim mintuk i i nla hôyôs gwéha yés inyu Nyambe.​—Éfésô 5:5, 6.

14. Lelaa i yi boñ maselna ipôla loñge ni béba i bi hôla Daniel?

¹⁴ Daniel nu di mbôk di sima, a bi bôdôl nôgda le bigém a bé tuk bi bé bé loñge. A bi bôdôl boñ nyiña i Watchtower Library mu jam li. Lelaa hala a bi hôla nye? A bi kit le a ntuk ha bé bigém bi. A bi sas jôl jé i mintuk mi gém mi internet, a tjôô ki bilôñ bibe a bééna mu. Daniel a nkal le: “I ngéda me bé tégbaha i mintuk, me bôdôl gwélél yo inyu tégbaha ngéda ni mawanda mem ma likoda.” I len ini, Daniel a yé mañ, a bak ki nsañal.   

15. Inyuki miñañ mi bitembee mi yé béba?

¹⁵ Kiki Timôtéô, di nlama yoñ yihe ni bitembee batjañgbene maliga ba ntjam. (1 Timôtéô 4:1, 7; 2 Timôtéô 2:16) Kiki hihéga, ba ntjam miñañ mi bitembee ikolba lôk kéé yés, tole ba ntinde bés i badba too di yé toi i ntôñ Yéhôva. Biniigana bi bitembee bi, bi nla tômbôs hémle yés. Di nlama bé hémle gwo. Inyuki? Inyule miñañ mi mi nlôl “ni bôt ba gwé mahoñol mabe, ba nyi bé maliga.” Njômbi yap i yé le ba bôdôl ‘jomol ni pééna inyu  bibuk.’ (1 Timôtéô 6:4, 5) Ngôñ yap i yé le di hémle minsohi ba ñôm lôk kéé yés, le di waa bôdôl bo ñem.

16. Kii di nlama keñgle?

¹⁶ Di bok mis i nson likalô. Kiki “bañga sônda i Kristô Yésu,” Timôtéô a bi bok mis i nson likalô iloole a nwas le njômbi nkus i yoña nye. (2 Timôtéô 2:3, 4) Kiki Timôtéô di nlama bé nwas le njômbi nkus i yoña bés. “Ngui i malôga i lingwañ” i nla boñ le di nimis gwéha yés inyu Yéhôva, le di nimis maséé i wan Bañga yé ni i niiga yo bôt bape. (Matéô 13:22) Di kon maséé ni i gwom di gwé, di gwélél ki ngéda yés ni ngui yés “i yéñ ndugi Ane.”​—Matéô 6:22-25, 33.

17-18. Kii di nlama boñ inyu sôñ maada més malam ni Yéhôva?

¹⁷ Di tiñha bañ i yoñ makidik. Ilole i nke i gwét sônda i nlama yi kii i ga boñ. Ibale di nyéñ sôñ i mam Djob a bi ti bés, di tiñha bañ i yoñ makidik i ngéda di ntehe béba. Kii i ga hôla bés i boñ hala? Di nlama hek pék i bisu bi ngéda inyu yi kii di ga boñ i ngéda ngim jam i mpémél bés.

¹⁸ Kiki hihéga, i ngéda ba naña bôt i ngand, ba yé ba ti bo makénd i yi hee homa ba nla pam ngwéé i ngéda béba i nkwo. Inyuki? Inyu boñ le ba pala pam ibale jam li mpuhe bo. Nlélém jam won di nlama boñ i pes mbuu, di nlama ôt pék i bisu bi ngéda inyu yi kii di ga boñ ibale mu kiki di nsal i internet tole ibale di mbéñge nkuu biliñgeliñge ba kahal unda mam ma nyega, bisañ ni biniigana bi batjañgbene maliga. Ibale di ñôt pék i bisu bi ngéda, i ga ba bés jam li ntomb i yoñ makidik ma ma nla hôla bés i sôñ maada més malam ni Yéhôva.​—Tjémbi 101:3; 1 Timôtéô 4:12.

19. Bimbe bisai di ga kôs ibale di ntibil tééda tik mam Yéhôva a bi ti bés?

¹⁹ Di nlama tibil tééda tik mam Djob a bi ti bés hala wee maliga, ni nsima di gwé i niiga mo bôt. Ibale di mboñ hala, di ga bana kiññem i mpôp, bañga niñ, di ga bana ki maséé i hôla bôt bape i yi Yéhôva. Ñ, ni mahôla ma Yéhôva, di ga pam i tééda tik mam a bi ti bés.​—1 Timôtéô 6:12, 19.