1-2. Ukulingana na 1 Timote 6:20, finshi Timote bamwebele ukucita?

ILINGI line, tulapeela abantu ukutusungilako ifintu ifyacindama. Ku ca kumwenako, nalimo kuti twasungisha indalama ku banki. Nga twasungisha indalama ku banki, tulacetekela ukutila shikasungwa fye bwino kabili tapali uwingatwibila. Kanshi twalishiba ifyo cipilibula ukuseekesha ifintu ifyacindama ku muntu.

² Belengeni 1 Timote 6:20. Umutumwa Paulo alibukisheko Timote ukuti alipokelele icintu icacindama, e kutila ukwishiba bwino bwino ubufwayo bwa kwa Lesa ku bantunse. Timote balimupeele no mulimo wa ‘kubila icebo’ e lyo no ‘kubomba umulimo wa kwa kabila wa mbila nsuma.’ (2 Tim. 4:2, 5) Paulo alikoseleshe Timote ukucingilila ico bamuseekeshe. Na ifwe bene balituseekesha ifintu ifyacindama. Fintu nshi ifi fine? Kabili mulandu nshi tulingile ukucingilila ifyo Yehova atuseekesha?

3-4. Finshi fimo ifyo twingalandila ukuti icine icaba mu Baibolo calicindama?

³ Yehova alitupeela ishuko lya kwishiba icine icacindama icaba mu Cebo cakwe Baibolo. Ici icine calicindama pantu cilalenga twaishiba ifyo twingacita pa kuti tube na bucibusa ubwakosa na Yehova, e lyo ne fyo twingacita pa kuti tube ne nsansa sha cine. Nga twasumina ici cine no kulakonka ifyo Baibolo ilanda, tatubepwa ku fisambilisho fya bufi kabili tulataluka ku mibele yabipa.—1 Kor. 6:9-11.

⁴ Umulandu na umbi uo icine icaba mu Cebo ca kwa Lesa cacindamina, wa kuti Yehova acisokolwela fye ku bantu abaicefya ababa no “mutima uusuma.” (Imil. 13:48) Abantu  abaicefya balisumina ukuti muno nshiku Yehova abomfya umusha wa cishinka kabili uwashilimuka pa kutusambilisha icine. (Mat. 11:25; 24:45) Te kuti tumfwikishe ici cine pa lwesu, kabili takwaba icacindama ukucila pa kwishiba bwino bwino icine.—Amapi. 3:13, 15.

5. Finshi fimbi ifyo Yehova atuseekesha?

⁵ Yehova alitupeela ne shuko lya kusambilisha abantu icine pali ena, e lyo na pa bufwayo bwakwe. (Mat. 24:14) Icine ico tubila calicindama sana pantu cilafwa abantu ukuba mu lupwa lwa kwa Yehova, kabili cilalenga baba ne subilo lya kwisaikala umuyayaya. (1 Tim. 4:16) Nampo nga tulapoosa inshita iikalamba mu mulimo wa kubila imbila nsuma nelyo iyo, nga tule-esha apo twingapesha ukubombako uyu mulimo ninshi tuletungilila umulimo uwacindamisha uulebombwa pali ino nshita. (1 Tim. 2:3, 4) Ala lishuko nga nshi ukubombela pamo na Lesa!—1 Kor. 3:9.

6. Cinshi cacitike kuli bamo abashalesunga bwino icine ico babaseekeshe?

⁶ Abena Kristu bamo abaliko pa nshita imo ine na Timote, tababikile amano kwi shuko bakwete ilya kubombela pamo na Lesa. Pa mulandu wa kuti Dema alitemenwe ifya muli cino calo, alilekele ukubombela pamo na Paulo. (2 Tim. 4:10) Cimoneka kwati Fugele na Hermogene balilekele ukubomba umulimo wa kubila imbila nsuma pa mulandu wa kutila baletiina ukuti abalwani bakulabacusha nga filya balecusha Paulo. (2 Tim. 1:15) Humenai, Alekisanda, na Filete baishileba abasangu kabili balilekele ukubombela Yehova. (1 Tim. 1:19, 20; 2 Tim. 2:16-18) Aba bonse twalandapo pa kubala bali abakosa mu fya kwa Lesa, lelo balilekele ukumona icine ico babaseekeshe ukuti calicindama.

7. Finshi Satana acita pa kuti atulenge ukulacita ifyo alefwaya?

⁷ Bushe Satana acita shani pa kuti atulenge ukuleka ukubika amano ku fyacindama ifyo batuseekesha? Moneni fimo ifyo acita. Abomfya ifya kuleseshamo icitendwe ne milabasa, pa kulenga twalatontonkanya no kucita ifintu ifingalenga twaleka ukutemwa Yehova panono panono. Alesha ukututiinya ukubomfya ifyo abantu balanda nelyo ukulenga balatucusha pa kuti twaleka ukubila imbila nsuma. Kabili alesha ukutubeleleka ukuti tulekutika ku ‘fya bufi ifiitwa “ukwishiba,”’ ifyo abasangu basabankanya pa kuti tulekeleshe icine.—1 Tim. 6:20, 21.

8. Finshi mwasambilila ku lyashi lya ba Daniel?

⁸ Nga tatucenjele kuti twatendeka ukulekelesha icine panono panono. Tontonkanyeni pa fyacitikile ba Daniel * abatemenwe ukuteya  ifyangalo fya pa kompyuta. Batile: “Natendeke ukuteya ifyangalo ninshi ndi ne myaka 10. Pa kubala, nshaleteya ifyangalo ifyali ifyabipa. Lelo panono panono natendeke ukuteya ifyangalo umwali ubunkalwe ne fya mipashi.” Mu kupita kwa nshita ba Daniel batendeke ukuteya ifyangalo fya pa kompyuta ama-awala 15 cila bushiku. Batile: “Ukulanda fye icishinka, nalishibe ukuti ifyangalo naleteya ne nshita nalepoosa ku kufiteya, fyalilengele natendeka ukutaluka kuli Yehova panono panono. Lelo nalikunkwime ica kuti nalemona kwati nshalingile ukulakonka amashinte ya mafunde ya mu Baibolo.” Kanshi nga tatucenjele, ifya kuleseshamo icitendwe kuti fyalenga twaleka ukubika amano ku cine. Kabili ici kuti calenga twalufya ifyacindama ifyo Yehova atuseekesha.

9. Nga fintu ilembo lya kwa 1 Timote 1:18, 19 lilanda, bushe Paulo apashenye Timote kuli bani?

⁹ Belengeni 1 Timote 1:18, 19. Paulo apashenye Timote ku mushilika, kabili amwebele ukuti ‘alelwa ubulwi ubusuma.’ Bulya ubulwi bwali bulwi bwa ku mupashi. Bushe Abena Kristu baba shani kwati bashilika abalelwa inkondo? Mibele nshi tulingile ukuba nayo nga abashilika ba kwa Kristu? Natulande pa masambililo 5 ayo twingasambilila ku cilangililo Paulo abomfeshe. Aya amasambililo kuti yatwafwa ukulasunga bwino icine.

10. Bushe ukuipeelesha kuli bukapepa kwalola mwi, kabili cinshi tulingile ukuipeelesesha?

¹⁰ Muleipeelesha kuli bukapepa. Umushilika umusuma alaba uwa cishinka. Alesha na maka ukucingilila uo atemwa nelyo icintu icacindama. Paulo akoseleshe Timote ukuti aleipeelesha kuli bukapepa, e kutila ukutwalilila ukuba uwa cishinka kuli Lesa. (1 Tim. 4:7) Nga twatemwa sana Lesa no kuipeelesha kuli ena, tukalafwaisha sana ukutwalilila ukusungilila icine.—1 Tim. 4:8-10; 6:6.

11. Cinshi tulingile ukulailamina?

¹¹ Muleisambilisha ukucita icalungama. Umushilika afwile ukulaisambilisha lyonse pa kuti aleba uwaipekanya ukulwa ubulwi. Timote alitwalilile ukuba uwakosa mu fya kwa Lesa pantu alikonkele ifyo Paulo amwebele ukuti afulumuke ulunkumbwa lwabipa, alefwaisha ukuba ne mibele ya bulesa, no kuba pamo na ba bwananyina. (2 Tim. 2:22) Pa kuti acite ifi alingile ukulailama. Tulingile ukulailama pa kuti tucimfye ulunkumbwa lwabipa. (Rom. 7:21-25) Kabili tulakabila ukuilama pa kuti tutwalilile ukufuula ubuntu bwa kale no kufwala ubuntu bupya. (Efes. 4:22, 24) Na kabili nga twabwela na natunaka ukufuma ku milimo, tulingile ukuibikilishako pa kuti tuye mu kulongana.—Heb. 10:24, 25.

12. Finshi tulingile ukucita pa kuti twishibe ifya kubomfya bwino Baibolo?

¹² Umushilika alingile ukulaisambilisha ifya kubomfya ifyanso fyakwe. Pa kuti eshibe bwino ifya kufibomfya alingile ukulaisambilisha lyonse. Ifi fine e fyo na ifwe tulingile ukucita pa kuti twishibe bwino ifya kubomfya Icebo ca kwa Lesa. (2 Tim. 2:15) Ilyo tuli pa kulongana kuti twasambilila fimo ifingatwafwa ukulabomfya bwino Icebo ca kwa Lesa. Nomba nga tulefwaya abantu bashininkishe ukuti icine icaba mu Baibolo calicindama, tulingile ukulaisambilisha Baibolo lyonse. Tulingile ukulabomfya Icebo ca kwa Lesa pa kuti tukoshe icitetekelo cesu. Kanshi tatulingile ukulabelenga fye Baibolo. Lelo tulingile ukulatontonkanya na pa fyo tulebelenga no kufwailapo ifyebo na fimbi mu mpapulo shesu, pa kuti tumfwikishe ifyo tulebelenga no kulafikonka. (1 Tim. 4:13-15) Nga tulecita ifi tukalabomfya bwino Icebo ca kwa Lesa pa kusambilisha abantu. Tatwakulababelengela  fye Baibolo. Twakulabafwa no kumfwikisha ifyo tulebelenga, e lyo ne fyo bengafibomfya. Nga tuleisambilisha Baibolo lyonse ukulingana ne fyo twatantika, tukalaishibilako ifya kubomfya bwino Icebo ca kwa Lesa pa kusambilisha abantu.—2 Tim. 3:16, 17.

13. Nga fintu Baibolo ilanda pa AbaHebere 5:14, cinshi tulingile ukulailukila?

¹³ Muleiluka. Umushilika alingile ukwishiba ifingamuletelela e lyo ne fyo engafisengauka. Na ifwe tulingile ukwishiba ifingatuletelela e lyo ne fyo twingacita pa kuti tuicingilile. (Amapi. 22:3; belengeni AbaHebere 5:14.) Ku ca kumwenako, tulingile ukulasala ifya kuleseshamo icitendwe ifisuma. Ilingi line mu maprogramu yaba pa TV na mu mafilimu, mulaba imibele yabipa. Iyi imibele ilakalifya Lesa kabili kuti yatuletelela. Kanshi tulingile ukusengauka ifya kuleseshamo icitendwe ifingalenga twaleka ukutemwa Lesa panono panono.—Efes. 5:5, 6.

14. Bushe ukwiluka kwa-afwile shani ba Daniel?

¹⁴ Ba Daniel abo tulandilepo kale balilwike ukuti tacali bwino ukulateya ifyangalo fya pa kompyuta umwaba ubunkalwe no kupupa imipashi. Balifwaile ifyebo mu Watchtower Library ifya bafwile. Fyabafwile shani? Balilekele ukuteya ifyangalo fya pa kompyuta ifyabipa. Kabili balilekele no kulanshanya na bo baleteya nabo ifyangalo pa Intaneti. Batile: “Mu cifulo ca kuti ndeteya ifyangalo fya pa kompyuta, natendeke ukulacita ifintu fimbi no kulaba pamo ne fibusa abo twali nabo mu cilonganino.” Pali ino nshita ba Daniel ni bapainiya kabili ni baeluda.

15. Cinshi cabipila ukukutika ku malyashi ya bufi?

¹⁵ Nga filya baebele Timote, na ifwe bene tulingile ukulailuka amafya ayengafuma mu kulakutika ku malyashi ya bufi ayo abasangu basabankanya. (1 Tim. 4:1, 7; 2 Tim. 2:16) Ku ca kumwenako, nalimo abasangu kuti balasabankanya amalyashi ya bufi pali bamunyinefwe nelyo amalyashi ayengalenga twalatwishika icilonganino ca kwa Yehova. Amalyashi ya musango uyu kuti yalenga twaleka ukuba ne citetekelo icakosa. Kanshi tatufwile ukulakutikako. Mulandu nshi? Pantu abasabankanya amalyashi ya musango uyu “bantu abaonaika amatontonkanyo kabili ababulwa icine.” Ico bafwaisha ‘kulakansana.’ (1 Tim. 6:4, 5) Bafwaya twasumina ubufi babepa no kuleka ukucetekela bamunyinefwe.

16. Fintu nshi ifingatupumbula ifyo tulingile ukusengauka?

 ¹⁶ Mwilapumbulwa. Apo Timote ali “mushilika umusuma uwa kwa Kristu Yesu,” abikile sana amano ku mulimo wakwe ukucila ukupumbulwa ne fya muli cino calo. (2 Tim. 2:3, 4) Nga filya Timote acitile, na ifwe tatulingile ukupumbulwa no lunkumbwa lwa kukwata ifingi. ‘Ukubelelekwa ku fyuma’ kuti kwalenga twaleka ukutemwa Yehova, twaleka ukulatasha pa Cebo cakwe, kabili twaleka ukulafwaisha ukusambilishako abantu icine. (Mat. 13:22) Tufwile ukwangusha imikalile yesu, no kulabomfya inshita na maka yesu ku ‘kulafwaya ubufumu intanshi.’—Mat. 6:22-25, 33.

17-18. Finshi mwingacita pa kuti mucingilile bucibusa bwenu na Yehova?

¹⁷ Muleangufyanya ukucitapo cimo. Umushilika alingile ukupekanishisha limo ifya kucita pa kuti aicingilile. Pa kuti tucingilile ifyo Yehova atuseekesha, tulingile ukucitapo fimo bwangu bwangu nga twamona ifingatuletelela. Cinshi cingatwafwa ukwangufyanya ukucitapo cimo? Tufwile ukupekanishisha limo ifyo tulingile ukucita nga twamona icingatuletelela.

¹⁸ Natulangilile: Abantu nga balelongana mu cikuulwa umuli abantu abengi, ilingi line balabalanga ukubeleele umwinshi wa kufuminako mupepi na po bekaliile. Mulandu nshi? Pa kuti nga kwacitika ifyabula ukwenekela cabangukila ukufulumuka. Ifi fine e fyo na ifwe tulingile ukucita. Tulingile ukutontonkanishisha libela ifya kucita nga ca kuti ukwabula ukwenekela twamona ifikope ifyabipa, ubunkalwe, nelyo ifyebo fya basangu ilyo tulebomfya Intaneti nelyo ilyo tuletamba TV. Nga ca kuti twaipekanishisha libela ku fingacitikika, cikatwangukila ukwangufyanya ukucitapo cimo pa kuti tucingilile bucibusa bwesu na Yehova, kabili tukatwalilila ukuba abasanguluka mu menso yakwe.—Amalu. 101:3; 1 Tim. 4:12.

19. Mapaalo nshi tukakwata nga ca kuti tulesunga bwino ifyacindama ifyo Yehova atuseekesha?

¹⁹ Tufwile ukulasunga bwino ifyacindama ifyo Yehova atuseekesha, e kutila icine icaba mu Cebo cakwe Baibolo, e lyo ne shuko twakwata ilya kusambilisha abantu icine. Nga twacita ifi, tukaba na kampingu iyasanguluka, tukaba ne nsansa, kabili tukalasekelela ilyo tulesambilisha abantu pali Yehova. Yehova nga atwafwa, tukatwalilila ukusunga bwino ifyo atuseekesha.—1 Tim. 6:12, 19.