1-2. Folem 1 Timoti 6:20, ?God i givim wanem long Timoti?

PLANTE taem yumi putum ol sas samting blong yumi long han blong ol narafala. Eksampol, yumi putum mane blong yumi long bang. Taem yumi mekem olsem, yumi ekspektem se mane blong yumi i stapgud, i no lus o oli stilim. Taswe yumi kasemsave se i minim wanem blong putum wan samting we yumi luk se i sas, long han blong wan narafala man.

² Ridim 1 Timoti 6:20. Aposol Pol i mekem Timoti i tingbaot se hem i kasem wan sas samting, hemia stret save we God i gat long saed blong ol man. Mo tu, Jehova i putum wok ya blong “talemaot tok blong God” mo “wok blong ivanjelis,” long han blong Timoti. (2 Tim. 4:2, 5) Pol i pulum Timoti blong i lukaot gud long ol samting ya we God i putum long han blong hem. Olsem Timoti, God i putum ol sas samting long han blong yumi tu. ?Wanem ol sas samting ya? ?Mo from wanem yumi mas lukaot gud long ol sas samting ya we Jehova i givim long yumi?

3-4. ?Wanem risen moa we i mekem se ol trutok blong Baebol oli sas?

³ Jehova i kaen tumas blong givim stret save blong ol sas trutok blong Baebol, long yumi. Ol trutok ya oli sas, from we oli tijim yumi olsem wanem blong frengud wetem Jehova, mo oli eksplenem olsem wanem blong gat wan hapi laef. Taem yumi akseptem ol trutok ya mo yumi mekem i wok long laef blong yumi, yumi no moa slef long ol giaman tijing mo ol rabis fasin.—1 Kor. 6:9-11.

⁴ Wan narafala risen from wanem ol trutok blong Baebol oli sas, hemia se Jehova i soemaot nomo long olgeta we oli gat tingting daon mo we oli “soemaot se oli stret.” (Wok  13:48) Ol man olsem oli akseptem rod we God i yusum blong givim ol trutok ya tede. (Mat. 11:25; 24:45) Yumi no save kasem ol trutok ya yumi nomo, mo i no gat wan narafala samting we i sas moa i bitim ol trutok ya.—Prov. 3:13, 15.

5. ?Wanem narafala wok we Jehova i putum long han blong yumi?

⁵ Mo tu, Jehova i putum wok ya blong tijim ol narafala long trutok long saed blong hem mo stamba tingting blong hem, long han blong yumi. (Mat. 24:14) Mesej we yumi talemaot i sas tumas, from we i givhan long ol man blong oli joen long famle blong Jehova, mo i givim janis long olgeta blong oli kasem laef we i no save finis. (1 Tim. 4:16) Nomata se yumi prij plante o smol, be yumi stap sapotem wok ya we i moa impoten tede. (1 Tim. 2:3, 4) !Hemia wan bigfala ona blong joen wetem God blong mekem wok ya!—1 Kor. 3:9.

6. ?Wanem i hapen long sam Kristin we oli no lukaot gud?

⁶ Sam Kristin long taem blong Timoti oli no tinghae long blesing ya blong joen wetem God blong mekem wok. Demas i lavem wol tumas, nao i lego blesing ya blong wok wetem Pol. (2 Tim. 4:10) I klia se Fugelas mo Hemogenes oli lego wok blong prij from we oli no wantem safa olsem Pol. (2 Tim. 1:15) Haemenaeas, Aleksanda, mo Faelitas oli kam man blong apostasi, nao oli lego trutok. (1 Tim. 1:19, 20; 2 Tim. 2:16-18) I klia se olgeta ya bifo oli strong long spirit, be oli no moa luksave samting we i rili sas.

7. ?Wanem teknik we Setan i yusum agensem yumi?

⁷ ?Olsem wanem Setan i traem blong mekem yumi lego ol sas samting we Jehova i putum long han blong yumi? Makem sam teknik blong Setan. Hem i yusum ol pleplei mo media blong promotem ol fasin, ol tingting, mo ol aksen we bambae oli pulum yumi blong no moa holemtaet trutok. Hem i yusum ol fren mo fasin agens blong traem mekem yumi fraet, nao bambae yumi no moa prij. Mo hem i traem pulum yumi blong lesin long “tingting blong ol man we oli ting se oli gat save,” hemia ol man blong apostasi, nao bambae yumi lego trutok.—1 Tim. 6:20, 21.

8. ?Yumi lanem wanem long stori blong Daniel?

⁸ Sipos yumi no lukaot gud, sloslo bambae yumi no moa holemtaet trutok. Tingbaot stori blong Daniel, * we i laekem tumas ol video gem. Hem i talem se: “Taem mi gat samwe ten yia, mi stat blong plei ol video gem. Fastaem, mi plei ol gem we oli  gud nomo. Be sloslo, mi stat blong plei ol gem we oli raf mo i joen wetem ol dimon.” Sloslo, hem i stap spenem 15 aoa evri dei blong plei ol video gem. Daniel i talem se: “Mi mi save se ol gem we mi stap plei long hem mo taem we mi spenem blong plei long olgeta, oli pulum mi mi gowe long Jehova. Be hat blong mi i strong finis, mo mi stap tingbaot ol rul blong Baebol se oli no blong mi.” Taem yumi no lukaot gud, sloslo paoa blong ol pleplei bambae i pulum yumi isi nomo, blong no moa holemtaet trutok. Sipos i hapen olsem, bambae yumi lusum ol sas samting we Jehova i givim long yumi.

9. Folem 1 Timoti 1:18, 19, ?Pol i komperem Timoti long wanem?

⁹ Ridim 1 Timoti 1:18, 19. Pol i komperem Timoti long wan soldia, mo i talem long hem blong i “gohed strong long nambawan faet ya.” Hemia i no wan prapa faet. ?Olsem wanem ol Kristin oli olsem ol soldia we oli stap faet? ?Mo yumi ol soldia blong Kraes, yumi mas gat wanem fasin? I gud yumi tokbaot faef lesen we yumi save lanem long pijatok blong Pol. Ol lesen ya oli save givhan long yumi blong holemtaet trutok.

10. ?Fasgud long God i minim wanem, mo from wanem yumi nidim?

¹⁰ Yumi mas fasgud long God. Wan gudfala soldia i gat fasin ya blong holemstrong. Bambae hem i faet strong blong protektem wan man we hem i lavem, o wan samting we hem i tinghae long hem. Pol i pulum Timoti blong i fasgud long God, hemia i min se hem i holemstrong long God. (1 Tim. 4:7) Moa we yumi lavem God mo fasgud long hem, moa we bambae yumi wantem tumas blong holemtaet trutok.—1 Tim. 4:8-10; 6:6.

11. ?From wanem yumi mas fosem yumi wan?

¹¹ Yumi mas fosem yumi wan. Wan soldia i mas fosem hem wan blong i stap fit oltaem blong faet. Long sem fasin, Timoti i stap fit oltaem from we hem i folem advaes blong Pol, nao i ronwe long ol samting we ol yangfala oli stap wantem tumas, i traehad blong gat ol gudfala fasin, mo i joen wetem ol man blong bilif. (2 Tim. 2:22) Blong mekem olsem, hem i mas fosem hem wan. Yumi mas fosem yumi wan sipos yumi wantem faet agensem ol samting we bodi blong yumi i wantem. (Rom 7:21-25) Mo tu, yumi mas fosem yumi wan blong yumi save gohed blong karemaot olfala fasin, mo putum niuwan. (Efes. 4:22, 24) Mo taem yumi taed tumas long en blong wan longfala dei, maet yumi mas fosem yumi wan blong joen long wan miting.—Hib. 10:24, 25.

12. ?Olsem wanem yumi save gat gudhan blong yusum Baebol?

¹² Wan soldia i mas praktis blong yusum ol tul blong faet blong hem. Blong hem i gat gudhan, hem i mas praktis oltaem. Long sem fasin, yumi mas gat gudhan blong tijim trutok long fasin we i stret. (2 Tim. 2:15) Yumi save lanem blong gat gudhan long ol miting blong yumi. Be sipos yumi wantem pulum ol narafala blong oli bilif se trutok blong Baebol i rili sas, yumi mas gohed blong stadi yumi wan long Baebol. Yumi mas yusum Baebol blong mekem bilif blong yumi i strong. Hemia i no minim nomo se yumi ridim Baebol. Yumi mas tingting dip tu long ol samting we yumi ridim, mo mekem risej long ol buk blong yumi, blong yumi kasemsave gud mo folem wanem we Baebol i talem. (1 Tim. 4:13-15) Nao bambae yumi naf blong yusum Baebol blong tijim ol narafala. Bakegen, hemia i no minim nomo se yumi ridim wan vas blong Baebol.  Yumi wantem givhan long man we i lesin long yumi, blong i kasemsave long vas ya mo i save olsem wanem blong folem. Taem yumi gohed blong folem program blong stadi yumi wan, yumi save gat gudhan blong yusum Baebol blong tijim ol narafala.—2 Tim. 3:16, 17.

13. Folem Hibru 5:14, ?from wanem yumi mas luksave samting?

¹³ Yumi mas luksave samting. Wan soldia i mas luksave denja mo ronwe long hem. Yumi tu yumi mas lanem blong luksave ol samting we oli save spolem yumi, mo tekem aksen blong ronwe long denja ya. (Prov. 22:3; ridim Hibru 5:14.) Eksampol, yumi mas waes taem yumi jusum gud ol samting we yumi wajem mo mekem blong spel. Plante taem ol program blong TV mo ol muvi oli soemaot ol rabis fasin. Ol rabis fasin ya oli mekem God i no glad long yumi mo i sua se bambae oli spolem yumi. Taswe, yumi no mas jusum blong wajem ol samting we sloslo, oli save mekem yumi lusum lav blong yumi long God.—Efes. 5:5, 6.

14. ?Olsem wanem fasin blong luksave samting i halpem Daniel?

¹⁴ Daniel we yumi tokbaot hem finis, i stat blong luksave se fasin blong plei ol video gem we oli raf mo we oli joen wetem ol dimon, i wan problem. Hem i mekem risej long Wajtaoa Laebri blong faenem ol atikol blong halpem hem blong winim problem ya. ?Samting ya i givhan long hem olsem wanem? Hem i stop blong plei ol video gem we oli no stret. Hem i kanselem ol gem we hem i stap plei long olgeta long Intenet, mo i no moa joen wetem ol narafala man long Intenet blong plei. Daniel i talem se: “Mi no moa plei video gem, be mi spenem taem blong mekem ol samting aotsaed, o mi joen wetem ol fren long kongregesen.” Naoia Daniel i wan paenia mo wan elda.

15. ?From wanem i denja blong bilivim ol giaman stori?

¹⁵ Olsem Timoti, yumi mas luksave denja blong ol giaman infomesen we ol man blong apostasi oli stap talemaot. (1 Tim. 4:1, 7; 2 Tim. 2:16) Eksampol, maet oli traem blong talem ol giaman stori long saed blong ol brata, o pulum yumi blong no trastem oganaesesen blong Jehova. Ol kaen infomesen olsem oli save spolem bilif blong yumi. Yumi no mas letem ol kaen toktok olsem oli trikim yumi. ?From wanem? From we oli kamaot long “ol man we  oli gat kruked tingting mo oli no gat trutok long olgeta.” Mak blong olgeta i blong ‘agiu oltaem mo mekem tumas toktok blong rao nomo.’ (1 Tim. 6:4, 5) Oli wantem se yumi bilivim giaman toktok blong olgeta mo gat nogud tingting long ol brata blong yumi.

16. ?Wanem ol samting we yumi no mas letem oli pulum yumi?

¹⁶ No letem narafala samting i pulum yumi. Timoti i “wan gudfala soldia blong Kraes Jisas,” taswe hem i no mas letem ol samting blong bodi oli pulum hem i gowe long minista wok blong hem. (2 Tim. 2:3, 4) Olsem Timoti, yumi no mas letem ol samting blong bodi oli pulum yumi. “Ol rij samting we oli gat paoa blong trikim man,” oli save jokem lav we yumi gat long Jehova, glad we yumi gat long Baebol, mo strong tingting we yumi gat blong talemaot long ol narafala. (Mat. 13:22) Yumi mas gohed blong mekem laef blong yumi i simpol, mo yusum taem mo paoa blong yumi blong “gohed blong lukaot Kingdom . . . fastaem.”—Mat. 6:22-25, 33.

17-18. ?Yumi save mekem wanem blong ronwe long samting we i save spolem yumi?

¹⁷ Rere blong tekem aksen kwiktaem. Wan soldia i mas mekem plan fastaem blong i save olsem wanem blong tekem aksen. Sipos yumi wantem lukaot gud long ol samting we Jehova i putum long han blong yumi, yumi mas kwik blong tekem aksen taem yumi luk denja. ?Wanem i save givhan long yumi? Yumi mas plan fastaem se bambae yumi mekem wanem taem i gat denja.

¹⁸ Eksampol, i gat ol saen blong tsunami long ol rod, blong ol man oli folem. ?From wanem? Blong mekem se taem tsunami i kam, bambae ol man oli folem ol rod ya kwiktaem blong oli stap sef. Long sem fasin, yumi mas lanem fastaem weswan “rod” bambae yumi folem, sipos yumi stap long Intenet, o wajem TV, o muvi nao yumi sek long ol denja olsem, rabis pija, raf fasin, o toktok blong ol man blong apostasi. Sipos yumi rere long samting we maet i save hapen, bambae yumi kwik blong tekem aksen blong ronwe long samting we i save spolem bilif blong yumi, mo yumi stap klin long ae blong Jehova.—Sam 101:3; 1 Tim. 4:12.

19. ?Bambae yumi kasem wanem blesing sipos yumi lukaot gud long ol sas samting we Jehova i givim?

¹⁹ Yumi mas lukaot gud long ol sas samting we Jehova i givim long yumi, hemia ol sas trutok blong Baebol mo wok ya blong tijim ol narafala long hem. Taem yumi mekem olsem, bambae tingting blong yumi i no stikim yumi, yumi harem se yumi no laef blong nating nomo, mo yumi haremgud se yumi halpem ol narafala blong oli save Jehova. Wetem help blong hem, bambae yumi save lukaot gud long sas samting ya we hem i putum long han blong yumi.—1 Tim. 6:12, 19.