1-2. Kalate 1 Timothée 6:20 a liti na jé Zambe a nga ve Timothée?

DA BO é kui’ na bi kee môte mfe édima jôme na a ba’ale bia je. A ne fo’o ve ane éyoñ môt a naane moné wé bañ. Bia bo de amu bi nji yi na moné wongan a jañ, nge na be wube bia nye, nge ke na bi ndamane nye zezé. Éve’an éte ja ve’ele liti bia jôme ja tinane na e ve môt édima jôme na a ba’ale.

² Lañe’e 1 Timothée 6:20. Paul a nga kate Timothée na édima jôm é nga vebane be nye. Édima jôm éte é mbe jé? Zambe a nga bo na Timothée a yeme nsôñane Wé a lat a môta binam. Ajô te a mbe a yiane’e kañete bôte Mejô me Zambe a bo “ésaé ya nkate foé.” (2 Tim. 4:2, 5) Paul a nga lebe Timothée na a kôme ba’ale édima jôm éte. Ane Timothée, bia fe bi bili bidima bi biôme Zambe a ve bia na bi ba’ale. Bidima bi biôme bite bi ne bivé? Aval avé bi ne yeme ba’ale bie?

3-4. Amu jé benya mejôô me ne édima?

³ Yéhôva a nga ve bia nya ñyemane ya mejô mé me ne Bible été. Mejô mete me ne édima amu ma liti bia avale bi ne bo bemvôé be Yéhôva, ma liti fe bia mam bi ne bo asu na bi nyiñe meva’ été. Éyoñe bia buni benya mejôô mete, bia kui na bi ba’ale biabebiene mfuban, a môt a vo’o beta du’u bia a bivuse bedo’oten.​—1 Bec. 6:9-11.

⁴ Benya mejôô me ne fe édima amu sa ke môt ase nnye a ne bi me; bôte be ne éjote nyul étam mbe Yéhôva a ve mvom éte, amu a yene na be bili mbamba été nsisim. (Mam. 13:48) Bôte bete ba semé nta’ane mame Zambe a  nga bo na be bi bidi ya nsisim melu ma. (Mt. 11:25; 24:45) Bi vo’o yeme wô’ô benya mejôô a biabebien; teke ki jam afe e ne mfi ényiñe môt ane mvome ya kôme wô’ Mejô me Zambe.​—Min. 3:13, 15.

5. Yéhôva a nga ve fe bia jé?

⁵ Yéhôva a nga ve bia jam afe. A nga ve bia mbe’e ya liti bôte za a né a mam a sôñ. (Mt. 24:14) Foé bia kañete é ne nya mfii amu ja volô bôte na be bo bibu’a ya nda bôte Yéhôva, a na be bi fane ya nyiñe nnôm éto. (1 Tim. 4:16) Ajô te, éyoñ bia bo abim ese bi ne ngule ya bo ésaé nkañete, bia su’u ésaé ja dañe mfi melu ya asu’ulane ma. (1 Tim. 2:3, 4) Za avale ma’a bi bili le na bi ne beébe bebo bisaé be Yéhôva!​—1 Bec. 3:9.

6. Jé é nga kui Bekristene béziñ amu be nji tabe ntyel?

⁶ Melu me Timothée, Bekristene béziñ be nji ke ôsu a nyane mvome ya bo beébe bebo bisaé be Yéhôva. Démas a nji ke ôsu a saé a Paul amu a nga dañe nye’e émo. (2 Tim. 4:10) Phygelle ba Hermogène be nga jô’é ésaé nkañete éko éziñ amu be nga mate na bôte be tibili be avale be nga tibili Paul. (2 Tim. 1:15) Wônaa Hymenée, Alexandre, a Philète ki be be nga su’ulane bo bo b’apostat. (1 Tim. 1:19, 20; 2 Tim. 2:16-18) Bôte bete bese be mbe be taté’é nye’e Yéhôva, ve ane éyoñ é nga lôt, be nga su’ulane biasé bidima bi biôm a nga ve be na be ba’ale.

7. Aval avé Satan a jeñe na a wone bia?

⁷ Aval avé Satan a jeñe na a wôlé bidima bi biôme Zambe a nga ve bia na bi ba’ale? A bo abui mam. A belane télé, internet, bekalate mefoé a bekalate befe na a tindi bia na bi ndaman élate jangan a Yéhôva a na bi bo mam a vini. A tindi fe bôte na be jô bia mam me ne te’e mbunane wongan, nge ke na be tibili bia asu na te bia kee ésaé nkañete jangan ôsu. A kômbô fe dutu bia na bi vô’ôlô “bemomo bikobôkobô” b’apostat, ndemben bi lume benya mejôô mvus.​—1 Tim. 6:20, 21.

8. Nkañete Daniel wo ye’ele wo jé?

⁸ Nge bi teke kôme tabe ntyel, ôte’ete’ ôte’etek, bi ne bo mame Zambe a vini a su’ulane lume benya mejôô mvus. Jam ete e nga kui Daniel * étome bejeu vidéo. A jô na: “Me nga taté na ma lé bejeu vidéo me bili jôm ane mimbu awôm.  Atata’a me ne jô na, bejeu bam be nji be be bili jam da ndeñele. Ve ane éyoñ é nga lôt, me nga taté na ma lé ba ba ngôné njet a ngbwel.” Daniel a mbe a lôte’e mewolo me nkolo bebé 15 a léé ve biôm bite. A ke ôsu a jô’ô na: “Me mbe me kôme’e yeme na Yéhôva a vini mimvôman miam a na a nji nye’e na me jañele abim éyoñ éte ve na ma vôman. Ve mbôle nleme wom ô mbe ô nto biko, me nga ke ôsu a du’u mamiene na miñye’elane ya Bible mite mia fombô ki ma.” Bi lôô na nge bi teke tabe ntyel, mimvômane mi ne faté bia benya mejôô Yéhôva a nga ve bia. Nge avale jam ete ki é kui bia, bi ne fe su’ulane jañele bidima bi biôm bise bivo’o Yéhôva a veya bia na bi ba’ale.

9. E kalate 1 Timothée 1:18, 19, Paul a ve’e Timothée a za?

⁹ Lañe’e 1 Timothée 1:18, 19. Paul a nga jô Timothée na, ane mone bezimbi, a yiane ke ôsu a “wosan mbamba mewosan.” A mbe a kobô’ ajô mewosane ya nsisim. Amu jé bi ne jô na Bekristen be ne ane bezimbi be nee bita? Mefulu mevé ma sili bia asu mewosane mete? Bi tame zu yene mam metan éve’ane Paul é ne ye’ele bia. Mam mete me ne volô bia na bi yeme ba’ale benya mejôô.

10. Jé ja tinane na e kabetane Zambe, a amu jé da sili na bi kabetane Yéhôva?

¹⁰ Kabeta’ane Zambe. Mone bezimbi a yiane bo étabe ndi. A yiane bo nkômesane ya wosan asu na a kamane môt a nye’e nge ke jôm a nyane je. Paul a nga lebe Timothée na a kabetane Zambe aval ete. (1 Tim. 4:7) Nge bia nye’e Yéhôva nya abuii, bia ye fe bo ntindane ya kôme kamane benya mejôô.​—1 Tim. 4:8-10; 6:6.

11. Amu jé é ne mfi na bi yeme jôé biabebien?

¹¹ Yeme’e jôé womien. Asu na mone bezimbi a tabe nkômesan asu bita éyoñ ése, a yiane yeme jôé émien. Timothée a nga tebe ne bip nsisim amu a nga tôñe melebe me Paul; a nga sa’ale mbia minkômban a jeñe na a bi mbamba mefulu, teke vuane sulan a Bekristene bevok. (2 Tim. 2:22) A nga kui na a bo mam mete amu a mbe a yeme’e jôé émien. Asu na bia fe bi wosane mbia minkômbane ya minsôn, bia yiane yeme jôé biabebien. (Bero. 7:21-25) Fulu éte nje fe é ne volô bia na bi tyendé mbia mefulu mangan a jaé mfefé môt. (Beép. 4:22, 24) Fulu jia jia éte ja volô fe bia na bi tôme nyule na bi ke ésulan éyoñ bi te’eya a ésaé ngume môs.​—Beh. 10:24, 25.

12. Jé é ne volô bia na bi yeme belane Bible?

¹² Mone bezimbi a yiane yé’é avale ba belane bikpwelé mewosan. Ve a yiane de bo mban nge a kômbô tu’a yeme belane bie. Bia fe bia yiane yeme belane Mejô me Zambe. (2 Tim. 2:15) Bi ne yé’é avale ba bo de bisulan. Ve nge bia kômbô kôme liti bôte mfi ya Mejô me Zambe, biabebiene bia yiane bo mbane ya yé’é Bible. Da sili na Mejô me Zambe me taté yemete mbunane wongan biabebien. Jam ete e ne bobane nge bia su’u ki ve na bia lañe Bible. Bia yiane fe bindi mam bia lañ, a vune bekalate bangan asu na bi tu’a wôk mam bia yé’é, a na bi yeme belane me ényiñe jangan. (1 Tim. 4:13-15) Éyoñ éte nje ñhe bia ye fe bo ngule ya ye’ele bôte bevok Kalate Zambe. E ye’ele a nji tinane ve na bia  lañe môt éfuse ya Bible. Bia yiane volô môte bia ye’ele na a kôme wôk éfuse bia lañe nye, a na a bo ngule ya belane miñye’elane ya été ényiñe jé. Éyoñe bi bili fulu ya yé’é Bible, nalé a volô bia na bi tu’a fe yeme ye’ele bôte bevok.​—2 Tim. 3:16, 17.

13. Bela’ane Behébreu 5:14 na ô liti amu jé bia yiane yeme yen ôyap.

¹³ Yene’ ôyap. Mone bezimbi a yiane bo ngule ya yene minjuk éyoñ mi ngenane mi za’a ôyap a sa’ale mie. Bia fe bia yiane bo ngule ya yemelane mam me ne ndeñele élate jangan a Yéhôva a sa’ale me. (Min. 22:3; lañe’e Behébreu 5:14.) Nge bia tame kobô ve ajô mimvôman a mam bia yene télé. Abui befilm da ngôné mvite mam. Avale befilm ete da vindane Zambe nlem, môte ki a yene be a bo émien a bôte befe abé. Jôm ete nje bia yiane sa’ale mimvômane mise mi ne ndaman amvôé dangan a Yéhôva.​—Beép. 5:5, 6.

14. Daniel a nga kui na a bo jé amu a nga yeme yen ôyap?

¹⁴ Daniel bia te jôô nye yôp a nga su’ulane yemelane na mimvômane mié mi nji yian. A nga vune Watchtower Library asu na a yene minlô mejô mi ne volô nye na a tyendé mbia mboan ate. Jam ete e nga soo nye jé? A nga telé mbia mimvômane mite. A nga vaa fe éyôlé jé vôm a nga tiliban asu biôm bite nkol, a tyi’i fe minkañ a bôte ba be nye be mbe be léé’ bejeu bete. A jô na: “A lôte na me fetebane nda ngume môs na ma lé bejeu vidéo, ma jibi kui a bo mam a bemvôé bame ya akônda.” Den Daniel a ne nkpwa’a mefan a mvendé akônda dé.

15. Amu jé bikobekobô b’apostat bi ne abé?

¹⁵ Ane Timothée, bia yiane fe yemelane minju’u bikobekobô b’apostat mi ne soo bia. (1 Tim. 4:1, 7; 2 Tim. 2:16) Be ne jeñe na be bôte bobejañe bitua mejô nge ke té mam asu na te bia beta tabe ékôane Yéhôva ndi. Avale bibôta ete e ne te’e mbunane wongan. Te bia ve’ele buni bikobekobô bite. Amu jé ? Amu Bible a jô na bia so be bôte be bili “mbia b’asimesan a be nji fe bi benya mejôô.” Nsôñane wop ô ne ve na be bo “bisô.”  (1 Tim. 6:4, 5) Ba yi na bi buni minsose ba laan, a na bi taté na bia tyetebe bobejañ.

16. Jé nje bia yiane sa’ale?

¹⁶ Te kee ôsimesane vôme mfe. Fo’o ve ane “mbamba mone bezimbi ya Krist Yésus,” Timothée a nji be a yiane’e yebe na akum nge ke biôme bife ya émo bi kamane nye na a telé ésaé nkañete ôsu. (2 Tim. 2:3, 4) Bia fe bi nji yiane futi nlem akume ya émo ji. Akum e ne bo na môt a kate beta kôme nye’e Yéhôva, Mejô me Zambe, a ésaé nkañete. (Mt. 13:22) Bi nji yiane jeñ abui mam ényiñ. Bia yiane belane ngule jangan a éyoñe jangane na bia taté jeñe ve Éjôé Zambe.​—Mt. 6:22-25, 33.

17-18. Jé é ne volô bia na bi ba’ale amvôé dangan a Yéhôva?

¹⁷ Tabe’e nkômesan nnutan ôse. Mone bezimbi a yiane jeñe na a bo nkômesane ya kaman émien éyoñe ya éyoñ ése. Aval ete da da, asu na bi yeme kaman éza biôme bi Yéhôva, bia yiane tabe nkômesane ya ji’a yaa éyoñ bia yene mbia jam a ye’e kui bia. Jé é ne volô bia? Bia yiane kôme fas avale bia ye bo éyoñe ya minjuk.

¹⁸ Nde bôte be wô’ô bo be bo’o nalé éyoñ ba tabe beta nsula’ane vôm éziñ. Be wô’ô jeñe na be yemelane zene ya mbé, asu na be bo ngule ya tube tyi’ibi nge mbia jam a kui atemetem. Aval ete fe, bia yiane kôme fas avale bi ne “tup” nge bia teme be nga liti mvite mame ya bisôk, nge jame da ngôné évôl a njet, nge ke mam b’apostat, nté bia belan internet, nge ke éyoñ bia yene film éziñe télé. Nge bia kômesane nsisime wongan aval ete, nalé a ye volô na bi ba’ale élate jangan a Yéhôva, a na bi ke ôsu a bo mfubane mise mé.​—Bs. 101:3; 1 Tim. 4:12.

19. Bibotane bivé bia ye bi nge bia kôme ba’ale bidima bi biôme Yéhôva a nga ve bia?

¹⁹ Bia yiane kôme bi bidima bi biôme Yéhôva a nga ve bia na bi ba’ale. Biôme bite bi ne jé? Ayé’é di, bia te kobô ajô benya mejôô a mvome bi bili na bi kañete bôte mbamba foé a ye’ele be. Nge bi yeme ba’ale biôm bite, bia ye bi mbamba mone môte ya nlem, mbamba ényiñ, a ava’a ya volô bôte bevo’o na be yeme Yéhôva. Ôwé, Yéhôva a ne volô bia na bi yeme ba’ale jôm é nga vebane be bia!​—1 Tim. 6:12, 19.