1, 2. Según 1 Timotéu 6:20, ka meha lunbei ladügüni Timotéu?

DAN le anihein lan aban katei gebegiti luma aban gürigia, anihein dan ru lumuti lábugiñe laríaahan amu gürigia lun lóunigiruni lubá. Kei hénpulu, háfuga lidin íchigei seinsu bánkurugu lun chouru lan, ani lun meferidirun lan o lun míweruhoun lan luéi. Ligíati subudi wamuti ka lan mini lubéi lichugúniwa aban katei gebegiti lábugiñoun laríaahan aban gürigia lun lóunigiruni.

² (Aliiha huméi 1 Timotéu 6:20). Haritaguagüda lumuti apostolu Pábulu Timotéu ibihaali lan aban katei wéiriti lebegi: lasubudiruniwa inarüni luáguti lisuuni Bungiu houn gürigia. Ruti giñe Heowá aban lubuidun chansi lun Timotéu lun lapurichihani “uganu le lánina asalbaruni” (2 Tim. 4:2, 5). Ariñagati giñe Pábulu lun Timotéu mosu lan lóunigiruni le rúaalibei lábugiñe laríaahan. Rúhali giñe Heowá katei gebegiti lábugiñoun waríaahan. Ka katei ligía? Ani ka uagu mosu lubéi wóunigiruni katei gebegiti ligía?

3, 4. Ru humá aban resun ka lan uagu gebegi lubéi inarüni le tídanbei Lererun Bungiu?

³ Lidan lareini Heowá arufuda lumuti inarüni woun le tídanbei Lererun to Bíbülia. Gebegiti inarüni le ladüga arufudahati woun ida luba lan gamadagua wamá luma Heowá ani gunda wagíame le tímatimaati. Dan le wánharun lun inarüni le ani winwan wameime, mámadiwame lidamun arufudahani mama inarüniti ni lidamun magíaguni (1 Ko. 6:9-11).

⁴ Gebegiti giñe inarüni le tídanbei Lererun Bungiu, ladüga hóunrügüñein gürigia ha ǘnabugutiña hama ha “lúnbaña hafiñerun”  larufudahei Heowá (Adü. 13:48). Ánhatiña gürigia ha ǘnabugutiña lun le layusurubei Heowá lun lachülürǘn inarüni houn uguñe weyu (Mat. 11:25; 24:45). Siñá wafurendeiruni inarüni le wagía wábugua. Dan le gunfuranda wamani aba ligíaali lan katei le gebegitimabei lidan wabagari (Ari. 3:13, 15).

5. Ka lubuidun chansi líchugubei Heowá woun?

⁵ Ruti Heowá aban lubuidun chansi woun lun warufudahani inarüni luagu luma luagu lisuuni houn amu (Mat. 24:14). Wéiriti gebegi lan inarüni le houn gürigia ladüga ruti aban lubuidun chansi houn lun hádangiñe hamá lumutuniña Heowá luma lun habihin ibagari magumuchaditi (1 Tim. 4:16). Meberesenga anhein gibe lubéi o lougua lan le wadügübei lidan wani ministeriu, wídehaña lidan dasi le súdinitimabei lidan wadaani (1 Tim. 2:3, 4). Ma lubuidun chansi le wámabei lun wídehan luma Bungiu! (1 Ko. 3:9).

6. Ka asuseredubei houn fiu kristiánugu ha ígiraguagüdübaña houngua lun lábürühan harüna?

⁶ Lidan meha lidaani Timotéu, añahein meha fiu kristiánugu barǘ hamuti kei ni kata chansi le hámabei lun hídeha luma Bungiu. Kéiburi meha Démasi hínsiñetimati katei le lánina ubóu lun ligía lébubei lígiruni lubuidun chansi, leseriwidun úara luma Pábulu (2 Tim. 4:10). Fihelu luma Erümóhenesi aba hígiruni apurichihani ladüga genege lan aba lan hanufudedun luéi hasufurirun ligiaméme éibaahouni libe le lásügürübei Pábulu (2 Tim. 1:15). Ánhañati Imenéu, Alehánduru luma Filetu aba hagarabaagun luagu Bungiu ani aba hígiruni inarüni (1 Tim. 1:19, 20; 2 Tim. 2:16-18). Genegeti derebugu lan meha hafiñen gürigia ha luagu somu dan, gama lumoun aba mebegi hali lan le súdinitimabei houn.

7. Ka sádara layusuruboun Satanási lun wígiruni inarüni?

⁷ Ka sádara layusuruboun Satanási lun metenirun wamá lun katei gebegiti le líchugubei Heowá woun? Ariha wamá fiu. Yúsuti isebáhari, bigibigitu, Internet luma katei libe lira lun línchahaniña gürigia lun hasansiruni ligaburi hasaminan luma lun hadügün katei lun hígiruni inarüni. Yúsuti giñe hadügüdarun umadagu wawagu luma éibaahouni lun wanufudedun luma lun wígiruni wapurichihan. Ani álugati giñe lun leyeeduniwa lun wetenirun lun katei le nege gíribei “subudi” le hani ha agarabaagubaña luagu Bungiu luma lun wígiruni inarüni (1 Tim. 6:20, 21).

8. Ka wafurendeirubei lídangiñe le asuseredubei lun Danieli?

⁸ Ánhawa móunigi, gayaraati ladügün katei le lun wadisedun luéi inarüni murusun murusun. Ariha waméi le asuseredunbei lun Danieli, * wéiriti meha línsiñe huraraü tuéigiñe konputadora, gágamuru katei líbeina lira lun.  Ariñagati: “Gumesetina áhurerei huraraü burí le dan meha diisi lubéi irumu nau. Dan meha le nagumeserunbei úati meha ni kata wuribati lidan huraraü le náhurerubei. Gama lumoun, murusun murusun aba nagumeserun áhurera huraraü le gaganati anarimeni luma le gaganati katei hánina máfianu”. Anihein meha weyu lásügürün lóugiñe keinsi oura áhurera. Ariñagayati Danieli: “Subuditi meha nun buidu buidu wuriba lan huraraü burí le ani ladisedagüdüñadina meha luéi Heowá. Lau sun lira, tedereruña meha nanigi ladüga nasaminarun mama lan nunti adundehani le tídanbei Bíbülia”. Arufudahati le woun gayaraati lan ladügün isebáhari lun lagumeserun gürigia ígirei inarüni. Anhein asusereda katei le woun, gayaraabei wagumeserun eferidirei katei gebegiti le ru laalibei Heowá woun.

9. Según 1 Timotéu 1:18, 19, ka uma lagoubaguagüdei Pábulu Timotéu?

⁹ (Aliiha huméi 1 Timotéu 1:18, 19). Góubaguagüda lumuti Pábulu Timotéu luma aban súdara ani aba lóunahan ariñaga lun, lun ítarameme lan ageindaguei “luwuribun Bungiu buidu”. Gama lumoun, mama aban wuribu hama súdaragu ha gürigia, aban wuribu le marihinti wuribu le. Ida liña ítara wamá wagía kristiánugu kei súdaragu lidan aban wuribu? Ka igaburi lunbei gagaburi wamani wagía lisudaranigu Kristu? Arufudati agoubaguagüdüni le ladügübei Pábulu, seingü katei le lunbei wadügüni lun wárügüdün luagu inarüni buidu. Ariha waméi katei lan.

10. Ka mini lubéi lúnrügü lan Bungiu wáhuduragua, ani ka uagu mégeiwatima lubéi?

¹⁰ Lúnrügü lan Bungiu wáhuduragua. Aban súdara le buiti, úaraguati. Awuribuhati lau sun lere lun líderaguniña gürigia ha hínsiñebaña lun o luéigiñe aban katei le gebegibei lun. Ínchaha lumuti Pábulu Timotéu lun láhuduragun lúnrügü Bungiu, ítara, larufuduña ínsiñeni luma úaraguni lun Bungiu (1 Tim. 4:7). Eibu here lan ínsiñeni le wasandirubei, aba busentima wamá wárügüdün luagu inarüni (1 Tim. 4:8-10; 6:6).

11. Ka uagu lunti lubéi warufudun ragüguaü unguaü?

¹¹ Ragügua wamá wougua. Mosu aranseñu lan aban súdara lun lagunfulirun lau lidasin. Gúnfuliti Timotéu lau lidasin keisi lisudaran Kristu ladüga falá lumuti adundehani le líchugubei Pábulu lun lau lídehan Bungiu lun ladisedun luéi luriban ayumahani luma lun láyeihani igaburi le lunbei gagaburi lani aban kristiánu ani gamadagua ligíame hama íbirigu (2 Tim. 2:22). Lun ladügüni lira, mosu meha larufudun ragüguaü unguaü. Mosu giñe warufudun ragüguaü unguaü anhein busén wabéi lun magañeirun lániwa luriban ayumahani (Rom. 7:21-25). Lanwoun lira, mosu warufudun ragüguaü unguaü lun wígiruni binadu wagaburi luma lun wadaüragun lau iseri igaburi (Efe. 4:22, 24). Dan le buchá lan wawagun lárigiñe wawadigimaridun sun weyu, másiñati mosu lan wáfaagun lun wadügün erei lun woudin adamuridagua (Ebü. 10:24, 25).

12. Kaba íderaguawa lun buídutima lan warufudahan?

¹² Anhein busén lubéi aban súdara lun layusurunu lárumate buidu mosu gabügürügua lan lasayahan. Ítarameme, wagía kristiánugu mosu wafurendeirun ahandilihoun Lererun Bungiu buidu (2 Tim. 2:15). Íderagua lumutiwa adamuridaguni lun wafurendeirun adügei. Anhein busén wabéi wachoururagüdüni inarüni gebegiti le tídanbei Bíbülia houn gürigia mosu gaturiahadi wamá wábugua. Lunti wederebudagüdüni wafiñen lau tídehan Lererun Bungiu. Gama lumoun úati buídurügü lan aliiharügü wamanu. Lunti wararamun asaminara luagu bérusu burí le waliihabei luma wáluahan lanwoun ariñahani tidan wani agumeiraguagüdüni lun gayara  lan gunfuranda wamani le waliihabei luma lun gayara lan wafuranguagüdüni (1 Tim. 4:13-15). Ítara luba aranseñu wamá lun warufudahan houn amu tau Bíbülia. Inarüni, ua lan buídurügü lan waliihan aban bérusu. Busentiwa wíderaguniña lun gunfuranda hamani luma lun warihin ida luba lan lahuudun houn. Ligíati anhein gabügürügua lubéi waturiahanu Bíbülia buídutimabei ligaburi warufudahan (2 Tim. 3:16, 17).

13. Según Ebüréu 5:14, ka uagu lunti lubéi wayusuruni lichú au le wawagubei?

¹³ Yusu waméi lichú au le wawagubei. Mosu gabaroun lani aban súdara ka burí lan denchaü uma lagagibudagua luma lun ladisedun luéi. Wagía giñe lunti wasubudiruni denchaü le gayaraabei ladügün wuribani woun luma lun wadisedun luéi (aliiha huméi Ebüréu 5:14; Ari. 22:3). Kei hénpulu, lunti wanúadiruni wisebáhari buidu. Gabügürüguati burí láfuachun magíaguni lidan burí programa le tídanbei bigibigitu luma le burí tídanbei pelikula. Máhatiña kristiánugu lun luwuyeri isebáhari le lugundun gayaraati ledebilidagüdüni wamadagua luma Heowá murusun murusun. Subudi wamuti iyereegu lan magíaguni lun Heowá ani gürigia ha awinwandubaña lidan magíaguni, adügatiña wuribani hóuniwagua luma houn amu (Efe. 5:5, 6).

14. Ida liña líderaguni lichú au Danieli?

¹⁴ Danieli le uágubei wayanuhan lidan párafu 8, aba lagumeserun íchiga fe wuriba lan huraraü le gaganati anarimeni luma katei le hani máfianu. Aba láluahan ariñahani lidan Watchtower Library lun láfaagun lígiruni luriban échuni le luágubei. Ida liña lidin lun? Aba máhurerun laali lan luriban huraraü burí ligía ani aba giñe lígiruniña umadagu ha úmabaña láhurera. Ariñagati: “Lubaragiñe nerederun áhurerei huraraü burí ligía, aba nagumeserun adüga amu burí katei bóugudi o ásügüra dan hama íbirigu ha lílana damuriguaü”. Ani guentó wéiyaali lidan afiñeni Danieli ani prekursoru.

15. Ka uagu dencha lubéi abahüdaguni le iyeeniti?

¹⁵ Ítara kei Timotéu, lunti giñe gunfuranda wamani dencha lan ariñahani le haburuchaguagüdübei ha agarabaagubaña luagu Bungiu (1 Tim. 4:1, 7; 2 Tim. 2:16). Kéiburi, másiñati haburuchaguagüdün abahüdaguni le iyeeniti hawagu wíbirigu o lun wasandirun machouruni tuagu lóundarun Heowá. Gayaraati ladügün iyeeni burí le lun ledebilidun wafiñen. Mígiraguagüda wamá woungua lun iyeeni burí le, lugundun hámagiñeti “gürigia ha wuribati hasaminan”, busentiña lun ñein lan magundani wadan luma lun wageindagun wámagua (1 Tim. 6:4, 5). Busentiña lun wafiñerun  lun hayeeni ani busentiña giñe lun mafiñerun wamá hawagu wíbirigu.

16. Ka katei gayaraabei ladügün lun ladireiruni warihin?

¹⁶ Madireira waméi warihin. Kei “lisudaran Hesukrístu le buiti”, lunti meha letenirun Timotéu lun lani ministeriu luma lun mígiraguagüdün lan lungua lun umegeguni ni lun amu burí katei lun ladireiruni larihin luéi katei le lúmagiñeti Bungiu (2 Tim. 2:3, 4). Ítara kei Timotéu moun lumuti wígiraguagüdün woungua lun ladügün umegeguni lun ladireiruni warihin luéi katei le lúmagiñeti Bungiu. Gayaraabei leyeeduniwa lubafu “irisini” lun láfaruni ínsiñeni le wasandirubei luagu Heowá luma eteingiruni le wasandirubei tuagu Lererun luma wabusenrun wíderaguniña amu (Mat. 13:22). Lunti mibe lan wámati luma lun wayusuruni wadaani luma were lun wáluahani “larúeihan luma liricha Bungiu furumiñe” (Mat. 6:22-25, 33).

17, 18. Ka gayaraabei wadügüni lun wóunigiruni wamadagua luma Heowá?

¹⁷ Aranse wamá lun wánhingichun lau lóufudagun. Aban súdara lunti lasaminarun kaba lan ladüga danme le lagagibudagun luma wuribu. Anhein busén wabéi lun wóunigiruni le ru laalibei Heowá lábugiñe waríaahan, lunti aranseñu wamá danme le lasuseredun wuribani. Kaba íderaguawa adügei lira? Wasaminarun kaba lan wadüga danme le wagagibudagun luma turobuli.

¹⁸ Kéiburi dan le ladügǘn aban damuriguaü le ídanbei hachülüra saragu gürigia, kamaniti lariñawagún houn gürigia ha ñéinbaña lubaragiñe lagumeserun programa, halíagiñeba lan háfurida ánheindügü asusereda somu katei. Ka uagu lariñawagúa le houn? Ladüga ánheindügü asusereda somu katei subudi habéi halíagiñeba lan háfurida lau lóufudagun. Ítarameme, lunti wasubudiruni halíagiñeba lan “wáfurida” lidan amu dimurei kaba lan wadüga ánhawa adunragua luma magíaguni o anarimeni o luma ariñahani le hámagiñeti ha agarabaagubaña luagu Bungiu, tidan bigibigitu, tidan pikchá o pelikula o páhina lidan Internet. Anhein aranseñu wabéi wánhingichuba lau lóufudagun lun wóunigiruni wamadagua luma Heowá luma lun harumañu wamá ligibugiñe (Sal. 101:3; 1 Tim 4:12).

19. Kaba abiniruni wibiha ánhawa óunigirei katei le ru laalibei Heowá woun lábugiñoun waríaahan?

¹⁹ Lunti hóunigiruni kristiánugu katei gebegiti le ru laalibei Heowá houn kéiburi: inarüni le tídanbei Bíbülia luma lubuidun chansi le wámabei lun warufudahani houn amu. Ánhawa adügei darangilubei wasaminan, gasuunibei wabagari ani gúndaabadiwa lau wíderagun amu asubudirei Heowá. Lau lídehan Heowá, gayaraabei wóunigiruni le ru laalibei woun lábugiñoun waríaahan (1 Tim. 6:12, 19).