1-2. Asegun na 1 Timoteo 6:20, cosa ya dale con Timoteo?

TIENE vez, ta deja kita con el diaton maga valoroso cosas con otro. Por ejemplo, tan deposit kita con el diaton sen na banco. Ta expecta kita que gendeh perde o ruba con el diaton sen. Poreso, sabe kita si cosa el envuelto si tiene kanaton cosa encarga precioso cosas.

² Le con el 1 Timoteo 6:20. Si apostol Pablo ya hace acorda con Timoteo que tiene le cosa ya ricibi que precioso​—el justo entendimiento del proposito del Dios para na maga gente. Ya dale tambien con Timoteo el privilegio para “predica el Buen Noticia.” (2 Tim. 4:2, 5) Ya anima si Pablo con Timoteo que guarda con el cosa con ele ya dale. Igual con Timoteo, tiene tambien precioso cosas que ya encarga kanaton. Cosa este? Y porque kita debe guarda con el precioso cosas que ya dale kanaton si Jehova?

3-4. Cosa el cuanto razon si porque precioso el maga verdad estaba na Biblia?

³ Ya dale kanaton si Jehova el justo entendimiento del maga precioso verdad que puede incuntra na de suyu palabra, el Biblia. Precioso este maga verdad cay ta enseña este kanaton si paquemodo tiene buen relacion con Jehova y ta habla este si cosa kanaton puede hace deverasan alegre. Si acepta kita con este maga verdad y vivi harmonia con este, hay queda kita librao desde na falso enseñanza y na maga imoral practica.​—1 Cor. 6:9-11.

⁴ El otro razon si porque precioso el maga verdad que puede mira na Palabra del Dios amo cay si Jehova ta revela  con este na maga humilde persona lang quien “tiene justo condicion de corazon.” (Act. 13:48, NWT) Este maga persona ta acepta con el cosa le ta usa para dale este maga verdad ahora. (Mat. 11:25; 24:45) Bien precioso este verdad y gendeh kita puede entende con este si nuay quien ayuda kanaton.​—Prov. 3:13, 15.

5. Cosa pa el otro cosa que ya manda kanaton si Jehova?

⁵ Ya dale tambien kanaton si Jehova el privilegio para enseña con otro el verdad acerca con ele y de suyu maga proposito. (Mat. 24:14) Bien precioso este mensaje cay ta ayuda este con el maga gente para queda parte del familia de Jehova y tiene vida hasta para cuando. (1 Tim. 4:16) Grande man o diutay el cosa kita ta puede hace na ministerio, ta suporta kita con el de con todo importante trabajo que ta hace na diaton tiempo ahora. (1 Tim. 2:3, 4) Bien grande gayot el diaton privilegio que puede trabaja junto con Dios!​—1 Cor. 3:9.

6. Cosa ya pasa con el cuanto quien nuay guarda con el diila precioso privilegio?

⁶ El cuanto contemporario de Timoteo nuay aprecia con el diila privilegio que trabaja junto con Dios. Si Dimas, quien ya ama con el mundo, ya deja con el de suyu privilegio sirvi junto con Pablo. (2 Tim. 4:10) Si Figelo y Hermogenes posible ya deja con el diila ministerio cay tiene sila miedo enfrenta persecucion igual na cosa ya enfrenta si Pablo. (2 Tim. 1:15) Si Himeneo, Alejandro y Fileto ya deja con el verdad y ya queda apostata. (1 Tim. 1:19, 20; 2 Tim. 2:16-18) Claro que este maga persona fuerte el espiritualidad del una, pero nuay sila guarda con el precioso privilegio que ya dale kanila.

7. Cosa maga tactica ta usa si Satanas?

⁷ Cosa ta hace si Satanas para deja kita con el diaton precioso privilegio que ya dale si Jehova? Nota con el cuanto tactica de Satanas. Ta usa le con el maga entretenimiento y con el media para manda kanaton pensa y actua na manera que hinay-hinay kita deja con el verdad. Ta hace le miedo kanaton por medio na pressure estaba na diaton maga uban y persecucion para descanza kita predica. Y ta pricura le engaña kanaton por medio na “saber falso” del maga apostata para deja kita con el verdad.​—1 Tim. 6:20, 21.

8. Cosa tu ya aprende na experiencia del un hermano, si Daniel?

⁸ Si gendeh kita con cuidao posible kita hinay-hinay deja con el verdad. Considera con el experiencia de Daniel * quien quierre-quierre  juga maga video game. Ele ya habla: “Ya principia yo juga maga video game cuando maga diez año pa yo. Del una, ta juga yo aquel lang maga aceptable juego. Pero hinay-hinay, ya principia yo juga maga juego que tiene violencia y magica.” Na uliji, ta juga ya le maga 15 hora cada dia. “Sabe yo que el clase de maga juego y el hora que ta gasta yo juga ta hace lejos conmigo con Jehova. Pero ya llega el tiempo que gendeh mas yo ta creé que aplicable conmigo el maga principio na Biblia,” ya habla si Daniel. El influencia del entretenimiento puede causa kanaton para deja con el verdad. Si sucede se, posible kita hace perde con el precioso cosas que ya dale kanaton si Jehova.

9. Asegun na 1 Timoteo 1:18, 19, na cosa ya compara con Timoteo?

⁹ Le con el 1 Timoteo 1:18, 19. Ya compara si Pablo con Timoteo na un soldao y ya anima con ele que “pelea como un buen soldao.” Pero gendeh le ta refiri na literal guerra sino na espiritual. Na cosa manera el maga Cristiano igual na maga soldao na guerra? Cosa maga calidad necesita kita cultiva como maga soldao del Cristo? Considera kita con el cinco leccion que puede kita aprende na ilustracion de Pablo. Este maga leccion puede ayuda kanaton para guarda con el verdad.

10. Cosa el devocion con Dios y porque kita necesita con este?

¹⁰ Tiene devocion con Dios. Leal el un buen soldao. Hay hace le el todo para protege con aquellos con quien le ta ama o con el cosas valoroso con ele. Ya anima si Pablo con Timoteo que tiene devocion con Dios o queda leal con Dios. (1 Tim. 4:7) Si hace kita mas hondo con el diaton amor con Dios, mas pricura kita guarda con el verdad.​—1 Tim. 4:8-10; 6:6, El Nuevo Testamento.

11. Porque kita necesita el disciplina na cuerpo?

¹¹ Cultiva el disciplina na cuerpo. El un soldao debe disciplina con el de suyu mismo cuerpo para pirmi le preparao na guerra. Ya puede ganá si Timoteo contra na influencia de Satanas cay ya sigui le con el consejo de Pablo que quita con el mal deseo, tiene maga buen calidad y man junto na maga hermano y hermana. (2 Tim. 2:22) Necesita el disciplina na cuerpo para puede se hace. Necesita kita con el disciplina para ganá contra na diaton maga deseo de laman. (Roma 7:21-25) Omento pa, necesita kita disciplina con el diaton mismo cuerpo para continua quita con el daan personalidad y pone con el nuevo personalidad. (Ef. 4:22, 24) Y si cansao kita despues del entero dia trabajo, posible necesita kita hace esfuerzo para atende na miting.​—Heb. 10:24, 25.

12. Na cosa manera mas progresa el diaton abilidad usa con el Biblia?

¹² El un soldao necesita man practice usa con el de suyu maga armas. Y necesita le hace con ese regular para sabe le usa con ese enbuenamente. Na igual manera, necesita kita aprende si paquemodo usa con el Palabra del Dios. (2 Tim. 2:15) Puede kita aprende con el cuanto de ese na diaton maga miting. Si quierre kita ayuda con otro para creé que puede ayuda kanila el verdad na Biblia, necesita kita regular estudia con este. Necesita kita usa con el Palabra del Dios para hace fuerte con el diaton fe. Quierre decir de este que gendeh lang kita basta le con el Biblia. Necesita kita medita con el cosa kita ta le y man research na diaton maga publicacion para puede kita entende y aplica con el Escritura. (1 Tim. 4:13-15) Si hace kita se, puede kita usa con el Palabra del Dios para enseña con otro. Otravez, gendeh lang kita le con el un texto na Biblia.  Quierre kita que el quien ta oi kanaton hay entende con el texto y mira si paquemodo sila puede aplica con ese. Si sigui kita con el diaton schedule del personal estudiada de Biblia, puede kita usa enbuenamente con el inspirao Palabra del Dios para enseña con otro.​—2 Tim. 3:16, 17.

13. Asegun na Maga Hebreo 5:14, porque kita debe tiene hondo entendimiento?

¹³ Tiene hondo entendimiento. El un soldao debe sabe mira si tiene peligro y ta evita con este. Necesita tambien kita mira con el maga situacion que puede causa kanaton peligro y actua dayun para evita con ese. (Prov. 22:3; le con el Maga Hebreo 5:14.) Por ejemplo, necesita kita iscuji enbuenamente con el diaton recreacion y entretenimiento. Mas manada na maga salida na television y sine ta dale mira imoral conducta. Ese conducta gendeh ta hace alegre con Dios y puede causa peligro kanaton. Ta evita kita con ese clase de entretenimiento cay ta hace este perde hinay-hinay con el diaton amor con Dios.​—Ef. 5:5, 6.

14. Paquemodo el hondo entendimiento ya puede ayuda con Daniel?

¹⁴ Si Daniel que ya menciona enante, ya realiza que el de suyu maga juego de violencia y magica amo un problema. Ya busca le maga material na Watchtower Library que puede con ele ayuda enfrenta con el de suyu problema. Cosa el resulta? Ya descanza le juga con el maga gendeh bueno juego. Ya quita le con el de suyu account na maga online game y ya descanza asocia na otro maga player. Si Daniel ya habla, “En vez juga maga video game, ya principia yo hace maga cosas apuera junto na maga amigo na congregacion.” Ahora, si Daniel ta sirvi como un pioneer y anciano.

15. Porque peligroso el maga falso istoria?

¹⁵ Igual con Timoteo, debe tambien kita realiza que peligroso el maga falso informacion que ta hace calayat el maga apostata. (1 Tim. 4:1, 7; 2 Tim. 2:16) Por ejemplo, ta hace sila calayat maga falso istoria acerca na diaton maga hermano y hermana o causa kanaton para man duda con el organizacion de Jehova. Ese maga gendeh justo informacion puede hace luya con el diaton fe. Gendeh kita debe creé con este propaganda. Porque? Cay este maga clase de istoria ta hace calayat el “maga gente . . . quien no sabe si cosa el verdad.” Quierre lang sila principia argumento y man debate. (1 Tim. 6:4, 5) Quierre sila que creé kita con el diila imbusterias  y gendeh confia con el diaton maga hermano y hermana.

16. Cosa el maga cosas que debe evita?

¹⁶ Esta focus. Como “un buen soldao de Cristo Jesus,” necesita si Timoteo esta focus na ministerio en vez na secular o material cosas. (2 Tim. 2:3, 4) Igual con Timoteo, gendeh kita debe desea pa mas manada material cosas. “El ansias por el maga riqueza” puede hace perde con el diaton amor con Jehova, apresacion na Palabra del Dios y con el diaton deseo para predica este con otro. (Mat. 13:22) Debe kita hace simple con el diaton vida y usa con el diaton tiempo y fuerza para “busca . . . una el disuyo Reino.”​—Mat. 6:22-25, 33.

17-18. Cosa kita puede hace para protege con el diaton buen amistad con Jehova?

¹⁷ Queda preparao para actua dayun. El un soldao ta plaña adelantao si cosa le hace para protege con el de suyu mismo cuerpo. Para puede kita guarda con el maga cosas que ya dale kanaton si Jehova, necesita kita actua dayun si puede kita mira peligro. Cosa puede ayuda kanaton para hace se? Necesita kita plaña adelantao si cosa kita hace si tiene peligro.

¹⁸ Para ilustra, si ta atende na maga grande ocasion, ta habla daan con el audience si onde el de con todo cerca exit antes principia el programa. Porque? Para puede sila sale dayun si tiene emergencia sucede. Na igual manera, puede kita prepara daan si onde man “exit” si puede kita enfrenta maga cosas imoral, violencia o maga cosas tiene que hace na maga apostata mientras ta usa con el Internet o ta mira salida o maga programa na TV. Si prepara kita daan, puede kita protege con el diaton buen amistad con Jehova y esta limpio na de suyu ojos.​—Sal. 101:3; 1 Tim. 4:12.

19. Cosa maga bendicion kita hay tiene si guarda kita con el maga precioso cosas que ya dale kanaton si Jehova?

¹⁹ Debe kita guarda con el maga precioso cosas que ya dale kanaton si Jehova​—el precioso verdad na Biblia y el privilegio que enseña este con otro. Si hace kita se, hay tiene kita limpio conciencia, tiene proposito diaton vida y alegre kita ayuda con otro conoce con Jehova. Na de suyu ayuda, puede kita guarda con el cosa que ya encarga kanaton.​—1 Tim. 6:12, 19.