1-2. Ngu kuya ngu 1 Timoti 6:20, nji txani atxi Timoti a nga ti fanete kumaha?

TI TOLOVELEKILE ku kombela vamwani ku ve hi vekela silo sathu sa lisima. Ngu txikombiso ha veka male bhanku. Hi maha toneto ngu kuthemba ti to male yathu yi na xayiseka kwati yi na mbi piwa. Ngu toneto ha tipfisisa ti to ti womba txani kukombela m’thu e hi vekela so maha.

² Lera 1 Timoti 6:20. Mpostoli Paulo a khumbutisile Timoti ti to a ñolisilwe simaha sa lisima. I ku wuzivi wa ditshuri mayelano ni ti Txizimu txa ditshuri txi no ta mahela vathu. Timoti a tshumete e ningwa lungelo yo “e txhumayela dipswi” ni yo ‘tiningetela ka mthumo wa evhangeli.’ (2 Tim. 4:2, 5) Paulo a kuzetile Timoti ti to e veketa silo si a nga ti ningilwe. Kufana ni Timoti nathu Jehovha a hi ningile silo sa lisima. Ngu sihi silo sa kona? Ngu kutxani hi di fanete kuveketa asi Jehovha a nga hi ninga?

3-4. Ngu sihi sivangelo simwani si mahako ti to ditshuri da mu ka Bhibhlia diva da lisima?

³ Jehovha a ni wunene, ene a hi ningile wuzivi wa ditshuri wu ku mu ka Dipswi dakwe i ku Bhiblia. Ditshuri donedo nda lisima nguko di hi gondisa nzila yo va ni wungana ni Jehovha ni nzila yo mana litsako ka wutomi. Ngako hi txi amukela ditshuri donedo ni kuhanya ngu dona ha khululwa ka tigondo ta makuhu ni ka mahanyelo o biha. —1 Vak. 6:9-11.

⁴ Txivangelo tximwani txi mahako to ditshuri da mu ka Dipswi da Txizimu di txiva da lisima, ngu ti to Jehovha a di womba ka vale vo tiveka hahatshi i ku vona va ‘fanelekako.’ (Mith. 13:48) Vathu vonevo va tumela nzila yi Jehovha a yi thumisako  nyamsi ti to e hi gela ditshuri donedo. (Mat. 11:25; 24:45) Kha hi na kusikota kupfisisa hokha ditshuri donedo, ni ku ha mafuni hawa txiwalo i ku txa lisima kupinda ditshuri. —Mav. 3:13, 15.

5. Nji txani tximwani txi Jehovha a nga hi ninga?

⁵ Jehovha a tshumete e hi ninga lungelo yo gondisa vamwani ngu ngene ni ngu ti a no ti maha. (Mat. 24:14) Ati hi ti gondisako nda lisima ngutu nguko ta vhuna vathu ti to ve lumba sengeletano ya Jehovha ni ku va ninga lungelo yo ve hanya ngu ha ku si gumiko. (1 Tim. 4:16) Ti si nga ni mhaka ni ti to mwendo mbimo yi hi yi hetako hi di kutxhumayelani njingi mwendo njidotho, mthumo wu hi wu mahako ngu wona i ku wa lisima ngutu Nyamsi. (1 Tim. 2:3, 4) Hi nga wona lungelo yi hi ku nayo yova vavhuneteli va Txizimu!—1 Vak. 3:9.

6. Ku mahekile txani ngu va va nga leka kuninga lisima si va nga ñoliswa?

⁶ Vamwani ka timbimo ta Timoti kha va yi ninga lisima lungelo yi va nga ti nayo yova vavhuneteli va Txizimu. Ngu txikombiso, ngu mhaka ya kuranda sa mafu awa Dhemasi a lekile lungelo yo thuma kumweko ni Paulo. (2 Tim. 4:10) Ngu konaho ti woneka nga Figelusi ni Hermogenesi va lekile mthumo wo txhumayela ngu kuthava kuxaniswa kufana ni Paulo. (2 Tim. 1:15) Himinewu, Alexandre ni Filetusi va lekile ditshuri ngu kulondetela tigondo ta va kanganyisi. (1 Tim. 1:19, 20; 2 Tim. 2:16-18) Ti woneka nga votshe vava i ti vathu va moya, kambe va gwitile ve teka timhaka ta moya i si nga ta lisima.

7. Ngu yahi marindi aya Sathani a ma thumisako kasi ku hi zweta?

⁷ Sathani a maha txani ti to hi leka kuninga lisima si Jehovha a nga hi ñolisa? Wona marindi ya Sathani a mathumisako kasi ku e hi tsulupeta. Ene a thumisa milongoloko ya TV ni internet, ti to e hangalasa mapimiselo ni mahanyelo aya ma no hi maha hi leka ditshuri. A tshumela a thumisa vangana ni maxaka ti to ve hi dhukisela ni ku hi xanisa kasi ku hi leka kutxhumayela. Ene a zama ku hi zweta ngu kuthumisa “wuzivi wa makuhu” wa va va nga leka ditshuri.—1 Tim. 6:20, 21.

8. Hi gonda txani ka ti ti nga humelela Dhaniyeli?

⁸ Ngako hi si tiwoneli hi nga leka ditshuri kudotho-kudotho. Wona txikombiso txa Dhaniyeli,  * awu a nga ti dhunda mavhidhiyo gemi. Ene a womba tiya: “Ni khatile kutha mavhidhiyo gemi ni ti ni 10 wa malembe. Makhatoni ni txitha ma vhidhiyo gemi ya ma nga si nga ni silo sa walo. Kambe kudotho-kudotho  ni khatile kutha aya ma nga ti kombisa wugevenga ni wudhimoni.” Ngu kutsimbila ka mbimo a khatile ku heta 15 wa ma ora ngu ditshiku a txitha ma vhidhiyo gemi. A tshumela e womba tiya: “Ni txi ti ziva ti to magemi ya ni nga txitha ni mbimo yi ni nga ti yi heta ti txi moxa wuxaka wangu ni Jehovha. Hambi keto ni lekile mbilu yangu yi maha dirigwi ni hokela ha ni pimisako to ati ni mahako kha ta biha.” Atiya ti nga humelela ni kwathu. Hi si ti tumbuli milongoloko ya TV yi nga hi maha hi leka ditshuri. Ngako tiya ti txi maheka hi nga gwitisa kuleka kuninga lisima asi Jehovha a nga hi ñolisa.

9. Ngu kuya ngu 1 Timoti 1:18, 19, Paulo a fananisile Timoti ni txani?

⁹ Lera 1 Timoti 1:18, 19. Paulo a fananisile Timoti ni disotxhwa e gwita e mu kuzeta ku ‘elwa yimbi ya yinene.’ Ahawa Paulo a si wombawombi ngu yimbi ya nyama kambe a txi wombawomba ngu yimbi ya moya. Ngu kuhi kuyelana kukuho ka masotxhwa ni Makristu? Ngu tihi tifanelo ti hi fanelako ku hi va nato athu kota masotxhwa a Kristu? He wone mtxhanu wa tigondo ti hi nga ti manako ka txifananiso txa Paulo. Tigondo toneto ti na hi vhuna ku hi zumba hi di tsani ditshurini.

10. Tiwomba txani kukombisa mithumo ya wukhongeli ni ku ngu kutxani i di ta lisima?

¹⁰ Kombisa mithumo ya wukhongeli. Disotxhwa da dinene da thembeka. Dona da tikarata ti to di vhikela m’thu wu di mdhundako mwendo silo sa lisima. Paulo a kuzetile Timoti ti to e kombisa mithumo ya wukhongeli,i ku kuhisekela kuthumela Txizimu. (1 Tim. 4:7) Ngako lirando lathu ngu Jehovha i di la hombe hi na titsakela ngutu ku ñolisisa kwati ditshuri.—1 Tim. 4:8-10; 6:6.

11. Ngu kutxani ti txi lava hi ziva kutigondisa?

¹¹ Ziva ku tigondisa. Disotxhwa di fanete di ziva kutigondisa ngako di txi lava kuzumba di di lungekete kulwa. Timoti a txi zumba a di longile ngu didhawa da moya nguko a engisile txialakanyiso txa Paulo txo vayilela minavelo yo biha, txo kulisa tifanelo ta moya ni kutipata ni vanathu. (2 Tim. 2:22) Eto ti txi lava e ziva kutigondisa. Nathu ti lava hi ziva kutigondisa kasi ku hi xula ka yimbi yo lwa ni minavelo yo biha. (Var. 7:21-25) Ti lava hi tshumela hi ziva kutigondisa kasi ku hi kota ku ambula minavelo ya m’thu wa kale, hi ambala a m’thu wamphya. (Vaef. 4:22, 24) Ti lava hi tshumela hi ziva kutigondisa ti to hi si tumeleli mikaralo yi hi tsivela kuya mitshanganoni.—Vaheb. 10:24, 25.

12. Hi nga tshukwatisisa kutxani wusikoti wathu wo gondisa Bhiblia?

¹² Disotxhwa da dinene ti lava di gondela kuthumisa matxhari. Ti to di kota kuthumisa kwati matxhari, ti lava di heta mbimo yo tala di txi gondela. Ngu ha kufanako nathu ti lava hi ziva ku di thumisa kwati Dipswi da Txizimu. (2 Tim. 2:15) Hi nga gonda kuthumisa kwati Dipswi da Txizimu hi di mitshanganoni. Kambe ti to hi kholwisa vamwani ka ditshuri da mu ka Bhiblia ti lava hi va ni gondo ya m’thu a pune. Hi fanete kuthumisa Dipswi da Txizimu ti to hi tsanisa likholo lathu. Ti to eto ti koteka kha ti lavi hi gwitela ko lera Bhiblia dwe. Ti lava hi alakanyisisa ngu ti hi ti gondako ni kumaha wuxolisisi ka mabhuku athu, kasi ku hi kota kupfisisa ni kuthumisa ati hi ti gondako ka wutomi wathu. (1 Tim. 4:13-15) Hi txi maha toneto hi na kota kuthumisa kwati dipswi da Txizimu hi txi gondisa vamwani. Kugondisa m’thu ni kona kha ti wombi ku mlerela ndimana ya Bhiblia dwe. Ti lava hi mvhuna ku e yi pfisisa ni ku e kota ku  e yi thumisa ka wutomi wakwe. Hi di ni mtolovelo wo maha gondo ya m’thu a pune hi na tshukwatisa wusikoti wathu wo gondisa Dipswi da Txizimu.—2 Tim. 3:16, 17.

13. Ngu kuya ngu Vahebheru 5:14 ngu kutxani hi di fanete ku va vathu va mapimo?

¹³ Vana m’thu wa mapimo. Msotxwa ti lava he ziva kuwona phango e yi vayilela. Nathu ti lava hi ziva kuwona siemo si si nga vekako ha phangoni ni kumaha to kari kasi ku yi vayilela. (Mav. 22:3; lera Vahebheru 5:14.) Ngu txikombiso ti lava hi ziva kusawula misakano ni milongoloko ya TV ngu wutxhari. Mafilmi ni milongoloko yo tala ya TV yi kombisa mahanyelo a nzambwa. Mahanyelo onewo ma henyisa Txizimu ni ku ngu kutsimbila ka mbimo ma nga hi vangela sikarato. Ngu toneto, hi fanete kuvayilela misakano ayi kudotho-kudotho yi nga moxako lirando lathu ngu Jehovha.—Vaef. 5:5, 6.

14. Kuva ni mapimo ti vhunisile kutxani Dhaniyeli?

¹⁴ Dhaniyeli awu hi nga womba-womba ngu ngene a vile ni mapimo, ene a woni ti to kutha magemi aya ma kombisako wugevenga ni wudhimoni ti ni phango. Ene a mahile wuxolisisi ka ka Watchtower Library kasi ku e xula txikarato txakwe. Yi ve yihi wuyelo? Ene a emile kutha magemi a walo. Ene a humile ka masite ya a nga di ti bhalisile ka ona e tshumela e wila wungana ni va a nga ti txi tha navo. Dhaniyeli a womba tiya: “Hahanze ko heta mbimo ni txi tha magemi, ni khatile kumaha mithumo yimwani ni ku ni ti ningile mbimo yo va ni vanathu va dibanzani.” Dhaniyeli konkuwa a thuma kota nyaphandule ni ku didhota.

15. Ngu kutxani makuhu ya va va nga leka ditshuri ma di ni phango?

¹⁵ Kufana ni Dhaniyeli, nanathu ti lava hi va ni mapimo hi tumbula phango ya makuhu ya mawombwako ngu ngu va nga leka ditshuri. (1 Tim. 4:1, 7; 2 Tim. 2:16) Ngu txikombiso, vona va nga hangalasa makuhu mayelano ni vanathu mwendo ku hi maha hi kanakana sengeletano ya Jehovha. Makuhu onewo ma nga holisa likholo lathu. Ti lava hi ti wonela ti to hi si kanganyiswi ngu makuhu onewo. Ngu kutxani? Nguko ona ma hangalaswa ngu “vathu va mapimo o hambaneka, ava va ku singa ni ditshuri.” Txikongomelo txawe ngu kuwusa “mazunga ni kukanetisana.” (1 Tim. 6: 4, 5) Vona va lava ku hi kholwa ka makuhu awe ni ku hi si thembi vanathu.

16. Ngu sihi silo si si nga hi tsulupetako asi hi fanelako ku si vayilela?

¹⁶ U nga tshulupetwe. Aku Timoti i nga ti “disotxowa da dinene da Kristu” a di fanete kuveka mapimo ka mthumo wo txhumayela i si nga kutsulupetwa ngu mithumo ya ditshiku ni ditshiku mwendo tithomba. (2 Tim. 2:3, 4) Nathu kufana ni Timoti kha ha fanela leka minavelo yo lava tithomba yi hi tsulupeka. Hi nga thuka hi leka Jehovha ni Dipswi dakwe hi tshumela hi si tsaki ngu mthumo wo txhumayela ngu mhaka ya “kuxengwa ngu tithomba.” (Mat. 13:22) Ngu toneto, ti lava hi hehukisa wutomi ni kuthumisa mbimo yathu ni mtamo wathu ti to hi ‘lava Mfumo wa Txizimu’ kukhata.—Mat. 6:22-25, 33.

17-18. Hi nga maha txani ti to hi vhikela wumoya wathu?

¹⁷ Zumba u di lungekile. Disotxhwa di fanete kuziva a ti di no maha i di ngadi mbimo. Ti to hi vhikela asi Jehovha a nga hi ñolisa ti lava hi zumba hi di lungekile i ziva to hi na maha txani hi txi wona phango. Hi nga vhunwa ngu txani ti to hi teka dizambo ngu txikuluveka? Hi fanete ku ti ziva ngu mbimo ti to hi na maha txani ngako hi txi hi txi manana ni phango.

¹⁸ Ngu txikombiso ka makhalo mamwani a misakano, vathu va kombwa makhalo a huma ngu ona a hafuhi ni ha va nga khalahatsha kona wu se kukhata msakano. Ngu kutxani? Nguko, ngako ku txi thuka kuhumelela phango va na kota kuhuma ngu txi kuluveta. Ngu ha kufanako, nanathu ti lava hi ti lulamisela i di ngadi mbimo ti to hi ziva nzila yo huma ngu yona ka internet mwendo ka mlongoloko wa TV, ngako ku txi thuka kuhumelela, silo sa nzambwa, wugevenga mwendo makuhu a vathu va va nga leka ditshuri. Ngako hi txi zumba hi di lungekile hi na sikota kumha to kari ti to hi vhikela wumoya wathu ni kuzumba hi di basile masoni ka Jehovha.—Mas. 101:3; 1 Tim. 4:12.

19. Hi na wuyelwa ngu txani ngako hi txi veketa asi Jehovha a hi nga ñolisa?

¹⁹ Athu hi fanete kuveketa si Jehovha a nga hi ñolisa i ku ditshuri di di ku ka Bhiblia ni lungelo yo txhumayela. Ngako hi txi maha toneto, hi na hanya wutomi wu wu ku ni txikongomelo ni ku va ni litsako lo vhuna vamwani ve ziva Jehovha. Ngu kuvhunwa ngu Jehovha u na sikota kuveketa asile u nga ñoliswa.—1 Tim. 6:12, 19.