1-2. Sumala sa 1 Timoteo 6:20, unsay gisalig kang Timoteo?

SAGAD ipiyal nato sa uban ang atong bililhong mga butang. Pananglitan, ideposito tingali nato ang atong kuwarta sa bangko. Kon himoon nato kana, magdahom ta nga ang atong kuwarta maampingan ug dili mawala o makawat. Busa atong masabtan kon unsay kahulogan sa pagpiyal ngadto sa laing tawo sa usa ka butang nga giisip natong bililhon.

² Basaha ang 1 Timoteo 6:20. Gipahinumdoman ni apostol Pablo si Timoteo nga nakadawat kinig bililhong butang​—ang tukmang kahibalo bahin sa katuyoan sa Diyos alang sa katawhan. Gisalig, o gipiyal, sab kang Timoteo ang pribilehiyo nga “isangyaw ang pulong” ug ‘himoon ang buluhaton sa tig-ebanghelyo.’ (2 Tim. 4:2, 5, footnote) Giawhag ni Pablo si Timoteo nga bantayan ang gisalig kaniya. Sama kang Timoteo, gipiyalan tag bililhong mga butang. Unsa kana? Ug nganong angay natong bantayan ang bililhong mga butang nga gipiyal ni Jehova kanato?

3-4. Unsay pipila ka rason kon nganong bililhon ang mga kamatuoran sa Bibliya?

³ Si Jehova mahigugmaong naghatag kanato ug tukmang kahibalo bahin sa bililhong mga kamatuoran nga makita diha sa iyang Pulong, ang Bibliya. Bililhon kini nga mga kamatuoran kay kini nagtudlo kanato kon sa unsang paagi makabaton ug maayong relasyon kang Jehova ug kon unsay makahatag ug tinuod nga kalipay. Kon atong dawaton ang maong mga kamatuoran ug sundon kana, dili na ta maulipon sa bakak nga mga pagtulon-an ug sa imoral nga mga buhat.​—1 Cor. 6:9-11.

⁴ Ang laing rason kon nganong bililhon ang mga kamatuoran nga naa sa Pulong sa Diyos mao nga si Jehova nagpadayag niana ngadto lang sa mga tawong mapainubsanon nga “nakiling sa  pagdawat sa kamatuoran.” (Buh. 13:48) Ilang gidawat nga ang matinumanon ug maalamong ulipon maoy nagtudlo karon sa maong mga kamatuoran. (Mat. 11:25; 24:45) Dili nato masabtan kini nga mga kamatuoran kon walay tabang, ug walay mas bililhon pa kay sa pagsabot niana.​—Prov. 3:13, 15.

5. Unsa pay gipiyal ni Jehova kanato?

⁵ Gipiyal sab ni Jehova kanato ang pribilehiyo sa pagtudlo sa kamatuoran bahin kaniya ug sa iyang mga katuyoan. (Mat. 24:14) Ang mensahe nga atong gisangyaw bililhon kaayo kay kini makatabang sa mga tawo nga mahimong bahin sa pamilya ni Jehova ug maghatag kanilag kahigayonan nga mabuhi sa walay kataposan. (1 Tim. 4:16) Dako man o gamay ang atong mahimo sa ministeryo, kita nagsuportar sa labing importanteng buluhaton nga ginahimo karon. (1 Tim. 2:3, 4) Dako gyod nga pribilehiyo nga mahimong mga isigkamagbubuhat sa Diyos!​—1 Cor. 3:9.

6. Unsay nahitabo sa pipila nga wala magmabinantayon?

⁶ Sa panahon ni Timoteo, ang pipila ka Kristohanon wala magpabili sa ilang pribilehiyo nga mahimong mga isigkamagbubuhat sa Diyos. Tungod kay gihigugma ni Demas ang kalibotan, gibiyaan niya ang iyang pribilehiyo nga mag-alagad uban kang Pablo. (2 Tim. 4:10) Dayag nga gibiyaan ni Figelo ug Hermogenes ang ilang ministeryo kay nahadlok sila nga lutoson sama sa nahitabo kang Pablo. (2 Tim. 1:15) Si Himeneo, Alejandro, ug Fileto nahimong apostata ug mibiya sa kamatuoran. (1 Tim. 1:19, 20; 2 Tim. 2:16-18) Kini sila lig-on kaniadto sa espirituwal, pero nawad-an silag pagpabili sa bililhong mga butang nga gipiyal kanila.

7. Unsang mga taktika ang gigamit ni Satanas batok kanato?

⁷ Unsay ginahimo ni Satanas aron buhian nato ang bililhong mga butang nga gipiyal ni Jehova kanato? Matikdi ang pipila sa mga taktika ni Satanas. Siya naggamit sa kalingawan ug sa media sa pagpasiugdag kalibotanong mga prinsipyo, panghunahuna, ug panggawi aron moluag ang atong pagpangupot sa kamatuoran. Siya naggamit sa negatibong komento sa mga tawo o sa paglutos aron mahadlok ta ug mohunong sa pagsangyaw. Ug siya nagdani kanato sa pagpaminaw “sa bakak nga ‘kahibalo’” sa mga apostata aron mobiya ta sa kamatuoran.​—1 Tim. 6:20, 21.

8. Unsay imong nakat-onan sa eksperyensiya sa brader nga si Daniel?

⁸ Kon dili ta magbantay, anam-anam nga moluag ang atong pagpangupot sa kamatuoran. Tagda ang eksperyensiya ni Daniel, * nga hilig kaayog video game. Siya miingon: “Misugod kog dulag video game dihang mga 10 anyos ko. Sa sinugdan, dili ra man makadaot  ang akong ginadula. Pero anam-anam nga misugod kog dulag mga video game nga bayolente ug dunay espiritismo.” Ngadtongadto, moabot nag mga 15 ka oras kada adlaw ang iyang pagdulag video game. “Sa tinuod lang, nahibalo ko nga ang mga video game nga akong ginadula ug ang panahon nga akong gigamit niini anam-anam nga nakapalayo nako kang Jehova. Pero mitig-a na ang akong kasingkasing ug naghunahuna ko nga ang mga prinsipyo sa Bibliya dili mapadapat kanako,” miingon si Daniel. Kon dili ta magbantay, ang kalingawan makapaluag sa atong pagpangupot sa kamatuoran. Ingong resulta, mahimong mawala kanato ang bililhong mga butang nga gipiyal ni Jehova.

9. Sumala sa 1 Timoteo 1:18, 19, sa unsa gitandi ni Pablo si Timoteo?

⁹ Basaha ang 1 Timoteo 1:18, 19. Gitandi ni Pablo si Timoteo sa usa ka sundalo ug giawhag siya nga ‘padayong makigsangka sa maayong gubat.’ Ang maong gubat dili literal, kondili espirituwal. Sa unsang mga paagi nga ang mga Kristohanon samag mga sundalo nga nakiggubat? Unsang mga hiyas ang kinahanglan natong ugmaron ingong mga sundalo sa Kristo? Hisgotan nato ang lima ka leksiyon nga atong makat-onan sa ilustrasyon ni Pablo. Kini nga mga leksiyon makatabang nato sa pagpangupot sa kamatuoran.

10. Unsa ang debosyon sa Diyos, ug nganong gikinahanglan nato kini?

¹⁰ Ugmara ang imong debosyon sa Diyos. Ang usa ka maayong sundalo maunongon. Makig-away siya aron maprotektahan ang usa nga iyang gimahal o ang butang nga iyang gipabilhan. Si Pablo nagdasig kang Timoteo nga ugmaron ang iyang debosyon sa Diyos​—sa ato pa, ang iyang pagkamaunongon sa Diyos. (1 Tim. 4:7) Samtang magkalawom ang atong gugma ug debosyon sa Diyos, magkadako ang atong tinguha nga panguptan ang kamatuoran.​—1 Tim. 4:8-10; 6:6.

11. Nganong nagkinahanglan tag disiplina sa kaugalingon?

¹¹ Ugmara ang disiplina sa kaugalingon. Ang usa ka sundalo kinahanglang may disiplina sa kaugalingon aron kanunay siyang andam sa pagpakiggubat. Si Timoteo nakasukol sa impluwensiya ni Satanas kay iyang gisunod ang tambag ni Pablo nga isalikway ang daotang mga tinguha, ugmaron ang maayong mga hiyas, ug makig-uban sa mga igsoon. (2 Tim. 2:22) Nagkinahanglan nag disiplina sa kaugalingon. Gikinahanglan nato ang disiplina sa kaugalingon aron makadaog ta batok sa daotang mga tinguha. (Roma 7:21-25) Dugang pa, gikinahanglan nato ang disiplina sa kaugalingon aron mahukas nato ang daang personalidad ug masul-ob ang bag-o. (Efe. 4:22, 24) Ug dihang gikapoy ta human sa tibuok adlaw nga trabaho, kinahanglan tingali natong pugson ang atong kaugalingon sa pagtambong ug tigom.​—Heb. 10:24, 25.

12. Sa unsang mga paagi mapauswag nato ang atong paggamit sa Bibliya?

¹² Ang usa ka sundalo kinahanglang magpraktis sa paggamit sa iyang mga hinagiban. Aron mahimong hanas, kinahanglan nga kanunay siyang magpraktis. Sa susama, kinahanglang mahimo tang hanas sa paggamit sa Pulong sa Diyos. (2 Tim. 2:15) Makat-onan nato diha sa mga tigom ang pipila ka paagi nga mahimo tang hanas. Pero kon gusto natong makombinsir ang uban nga bililhon kaayo ang kamatuoran sa Bibliya, kinahanglan nga regular nato ning tun-an. Kinahanglan natong gamiton ang Pulong sa Diyos sa pagpalig-on sa atong pagtuo. Nagpasabot ni nga dili lang basta basahon ang Bibliya. Kinahanglan sab tang mamalandong  sa atong nabasa ug mag-research sa atong mga publikasyon aron husto ang atong pagsabot ug pagpadapat sa Kasulatan. (1 Tim. 4:13-15) Pinaagi niana, magamit nato ang Pulong sa Diyos sa pagtudlo sa uban. Sa gihapon, nagpasabot ni nga dili lang ta basta magbasa ug teksto. Gusto natong tabangan ang atong gisangyawan nga masabtan ang teksto ug kon sa unsang paagi kini mapadapat kanila. Busa kon regular tang magtuon sa Bibliya, mahimo tang mas maayong mga magtutudlo niini ngadto sa uban.​—2 Tim. 3:16, 17.

13. Base sa Hebreohanon 5:14, nganong angay tang magbaton ug katakos sa pag-ila?

¹³ Magbaton ug katakos sa pag-ila. Ang usa ka sundalo angayng maghunahuna daan sa kapeligrohan ug likayan kana. Kita sab kinahanglang makaila sa mga situwasyon nga makadaot nato ug likayan kana. (Prov. 22:3; basaha ang Hebreohanon 5:14.) Pananglitan, kinahanglang magmaalamon ta sa pagpilig kalingawan. Ang mga salida sa TV ug mga pelikula sagad nagpakitag imoral nga mga buhat. Ang maong mga buhat makapasuko sa Diyos ug makadaot kanato. Busa, likayan nato ang kalingawan nga anam-anam nga makapahuyang sa atong gugma sa Diyos.​—Efe. 5:5, 6.

14. Sa unsang paagi ang katakos sa pag-ila nakatabang kang Daniel?

¹⁴ Si Daniel, nga gihisgotan ganina, nakaamgo nga makadaot ang pagdulag mga video game nga bayolente ug dunay espiritismo. Nag-research siya sa Watchtower Library aron matabangan siya maylabot niini nga problema. Unsay resulta? Mihunong siya pagdulag makadaot nga mga video game. Giundang niya ang iyang subskripsiyon sa mga online game ug wala na siya makigdula sa ubang player. Si Daniel miingon, “Imbes magdulag video game, nagsugod ko sa paggawasgawas sa balay o sa pagpakig-uban sa mga igsoon.” Karon, si Daniel payunir ug ansiyano na.

15. Nganong peligroso ang sayop nga mga estorya?

¹⁵ Sama kang Timoteo, kinahanglan sab natong mailhan ang kapeligrohan sa sayop nga impormasyon nga gipakaylap sa mga apostata. (1 Tim. 4:1, 7; 2 Tim. 2:16) Pananglitan, magpakaylap tingali silag sayop nga mga estorya bahin sa mga igsoon o magpatunghag mga pagduhaduha bahin sa organisasyon ni Jehova. Ang maong sayop nga impormasyon makapahuyang sa atong pagtuo. Dili gyod ta magpalimbong niini nga propaganda. Ngano? Tungod kay kini nga mga estorya  gipakaylap “sa mga tawong hugawg kaisipan ug wala na makasabot sa kamatuoran.” Tuyo nila nga magsugod ug “mga argumento ug mga debate.” (1 Tim. 6:4, 5) Gusto nila nga motuo ta sa ilang mga bakak ug dili na mosalig sa atong mga igsoon.

16. Unsang mga kabaldahan ang angay natong likayan?

¹⁶ Likayi ang mga kabaldahan. Ingong “maayong sundalo ni Kristo Jesus,” si Timoteo kinahanglang magpokus sa ministeryo imbes sa materyal nga mga butang o sa ubang tumong. (2 Tim. 2:3, 4) Sama kang Timoteo, dili ta angayng magtinguha ug dugang materyal nga mga butang. “Ang pagkamalimbongon sa bahandi” makatuok sa atong gugma kang Jehova, sa atong apresasyon sa Pulong sa Diyos, ug sa atong tinguha nga isulti kini sa uban. (Mat. 13:22) Kinahanglang huptan natong simple ang atong kinabuhi ug gamiton ang atong panahon ug kusog sa ‘pag-una kanunay sa pagpangita sa Gingharian.’​—Mat. 6:22-25, 33.

17-18. Unsay atong mahimo aron makalikay sa espirituwal nga kadaot?

¹⁷ Magmaandam sa paglihok dayon. Ang usa ka sundalo kinahanglang magplano kon unsay iyang himoon aron maprotektahan ang kaugalingon. Aron atong maprotektahan ang mga butang nga gipiyal ni Jehova kanato, kinahanglan tang molihok dayon kon makakita tag kapeligrohan. Unsay makatabang nato sa paghimo niana? Kinahanglang magplano ta kon unsay himoon kon dunay kapeligrohan.

¹⁸ Sa pag-ilustrar, diha sa dagkong panagkatigom, ang mga nanambong awhagon sa pagpangita sa kinadul-ang gawsanan, o exit, sa dili pa magsugod ang programa. Ngano? Aron makabiya dayon sila kon may emerhensiya. Sa samang paagi, puwede tang mangandam kon unsaon “pag-exit” kon kalit nga motungha ang imoral nga esena, grabeng kapintasan, o apostatang impormasyon samtang nag-Internet ta o nagtan-awg sine o salida sa TV. Kon mangandam ta sa posibleng mahitabo, makalikay dayon ta sa espirituwal nga kadaot ug makapabiling hinlo sa atubangan ni Jehova.​—Sal. 101:3; 1 Tim. 4:12.

19. Unsang mga panalangin ang atong madawat kon atong bantayan ang bililhong mga butang nga gipiyal ni Jehova kanato?

¹⁹ Kinahanglan natong bantayan ang bililhong mga butang nga gipiyal ni Jehova kanato​—ang mga kamatuoran sa Bibliya ug ang pribilehiyo sa pagtudlo niini sa uban. Kon buhaton nato kana, mabatonan nato ang hinlong konsensiya, ang makapatagbaw nga kinabuhi, ug ang kalipay sa pagtabang sa uban nga makaila kang Jehova. Sa iyang tabang, atong mabantayan ang iyang gipiyal kanato.​—1 Tim. 6:12, 19.