1-2. Timote cu 1 Timote 6:20 ningin zeidah pek a si?

MAN a ngeimi kan thil pawl zohkhenh awkah midang kha kan fial tawn hna. Tahchunhnak ah, kan tangka kha bank ah kan chiah men lai. Cutin kan chiah tikah kan tangka cu a him i mi nih an fir kho lai lo tiah kan i ruahchan. Cucaah kan sunsak tukmi thil pakhatkhat kha zohkhenh dingin zumhnak he midang pek timi sullam kha kan hngalhthiam.

² Kuatkhat Timote 6:20 rel. Lamkaltu Paul nih Timote kha minung ca i Pathian tinhnak a simi a hmaanmi hngalhnak a ngeih kha a hngalhter ṭhan. Jehovah nih Timote kha “phung kha chim hna” law “thawngṭha karhter kha fakpi in i zuam” tiah a ti. (2 Tim. 4:2, 5) Paul nih Timote kha pek a simi thil kha ṭha tein kilven awkah a forh. Timote bantukin kannih zong man a ngeimi thil tampi pek kan si ve. Mah cu zei hna dah an si? Jehovah nih a kan pekmi thil kha zeicah ṭha tein kan kilven awk a si?

3-4. Baibal biatak a sunlawinak a ruang cu zei hna dah an si?

³ Jehovah nih Baibal ah hmuhmi a sunglawi tukmi biatak hngalhthiam khawhnak kha a kan pek. Mah biatak cu a sunglawi tukmi a si, zeicahtiah Jehovah he a ṭhami pehtlaihnak ngeih khawh ning le nuamhnak taktak hmuh khawh ning kha a kan cawnpiak caah a si. Mah biatak kha kan cohlan i mah ningin kan nun tikah a hmaan lomi cawnpiaknak le ziaza ṭha lo sal in kan luat.—1 Kor. 6:9-11.

⁴ Baibal biatak a sunlawinak a dang a ruang pakhat cu Jehovah nih “thim a simi” toidornak a ngeimi hna sin lawng  ah mah biatak kha a phuan caah a si. (Lam. 13:48) Tuchan ah zumh awk a tlakmi le a fimmi sal nih a kan cawnpiakmi Baibal kong kha aa toidormi hna nih an cohlan. (Matt. 11:25; 24:45) Mah biatak kha kanmah tein kan cawng kho lo, khoika hmun hmanhah mah biatak nakin a sunglawi deuhmi thil a um lo.—Ptb. 3:13, 15.

5. Jehovah nih zei thil dah a kan pek rih?

⁵ Jehovah nih a sunglawimi thil zong a kan pek. Mah cu midang sinah amah kong he aa tlaimi biatak le aa tinhnak kong cawnpiak kha a si. (Matt. 24:14) Kan chimmi thawngṭha cu a man a sung tuk, zeicahtiah mah nih mi pawl kha Jehovah chungkhar si awkah a bawmh hna i zungzal nunnak hmuh awkah caan ṭha a pek hna caah a si. (1 Tim. 4:16) Kan chimmi cu tlawmte a si ah, tampi a si ah atu ah a biapi bikmi rian kha kan bawmhmi a si. (1 Tim. 2:3, 4) Pathian he rianṭuanṭi hawi si cu zeitlukin dah a ṭhat!—1 Kor. 3:9.

6. Pek an simi thil a sunsak lomi hna cungah zeidah a cang?

⁶ Timote chan lioah Khrihfa cheukhat nih Pathian he rianṭuanṭi hawi sinak tinvo sung kha an sunsak lo. Demas nih vawlei kha a tlaihchan caah Paul he rianṭuanṭinak tinvo sung kha a kaltak. (2 Tim. 4:10) Figelus le Hermogenes nih Paul bantukin hrem kan si lai ti an phan caah phungchim rianṭuannak kha an ngolmi a si men lai. (2 Tim. 1:15) Himanias, Alekzandar le Felitas cu zumhpialmi an hung si i Jehovah kha an kaltak. (1 Tim. 1:19, 20; 2 Tim. 2:16-18) An dihlak in thlaraulei ah a ṭhawngmi an rak si ko nain a man a sung tukmi thil kha an sunsak ti lo.

7. Satan nih kanmah ralchanh awkah zei lam dah a hman?

⁷ Jehovah nih a kan pekmi thil kaltak awkah Satan cu zeitindah aa zuam? Satan hmanmi lam cheukhat kha zohhmanh hna u sih. Satan nih nuamhsaihnak le media hna kha hmangin Jehovah kan dawtnak a zor nakhnga asiloah a nawlbia kan sunsaknak duhsah tein a tlau nakhnga aa zuam. Cun ṭhirual hneknak asiloah hremnak hna kha hmangin ṭihnak ngeih in phungchim rian kan ngol nakhnga zong aa zuam. Cun biatak kan kaltak nakhnga “hmaan lopi in ‘Fimnak’” tiah an timi bia kha ngaih awkah zumhpialmi pawl nih an kan lem.—1 Tim. 6:20, 21.

8. Unaupa Daniel hmuhtonnak in zeidah na cawn khawh?

⁸ Kan i ralrin lo ahcun biatak kan sunsaknak cu duhsah tein a tlau kho. Video game celh a duh tukmi unaupa Daniel * kong hi ruathmanh. Hitin a ti: “Kum hra hrawng ka si lioin video  game kha ka hun i celh. A hmasa ahcun ṭih a nung lomi game kha kaa celh. Asinain duhsah tein zaangennak le khuachia thiamnak kong aa telmi game pawl kha ka hun i celh.” A donghnak ah cun video game kha nikhat ah sulmilam 15 chung hrawng a rak i celh. Daniel nih hitin a ti: “Hmaan tein ka chim ahcun kaa celhmi game phun le a caan ka hman ning nih Jehovah he duhsah tein a ka hlatter ti kha ka hngalh. Asinain Baibal chimmi ningin tuah a hau lo tiah keimah le keimah kaa hleng.” Cucaah kannih zong kan i ralrin lo ahcun nuamhsaihnak nih biatak kan i tlaihmi kha fawi tein a tlauter khawh. Cutin a si ahcun Jehovah nih a kan pekmi a sunglawi tukmi thil zong kan sung men lai.

9. Kuatkhat Timote 1:18, 19 ningin Paul nih Timote kha ahote he dah a tahchunh?

⁹ Kuatkhat Timote 1:18, 19 rel. Paul nih Timote kha ralkap pakhat he a tahchunh i “raldohnak hriam ah i hman hna” tiah a forh. Mah cu raldohnak taktak kha si loin thlaraulei raldohnak kha a si. Khrihfa hna cu zeiti lam in dah ral a domi ralkap bantuk an si? Khrih ralkap in zei bantuk sining dah kan ṭhanchoter a herh? Paul chimmi in kan cawn khawhmi a kong panga kha zohhmanh hna u sih. Mah kong nih biatak i tlaih awkah a kan bawmh khawh.

10. Pathian biaknak fehter timi cu zeidah a si, mah cu zeicah kan herh?

¹⁰ Pathian na biaknak kha fehter. Ralkap ṭha pakhat cu zumh awk tlak tein a um. A dawtmi pakhat asiloah a sunsakmi thil pakhat kha kilven awkah fakpi in aa zuam lai. Cucaah Paul nih Timote zong kha Pathian a biaknak kha fehter awkah a forh, mah cu Pathian he fek tein i pehtlaih kha a si. (1 Tim. 4:7) Pathian kan dawt deuh tikah biatak i tlaih kha kan duh deuh lai.—1 Tim. 4:8-10; 6:6.

11. Zeicah kanmah le kanmah kan i uk a herh?

¹¹ Mahle mah uk khawh i zuam. Ralkap pakhat nih raldohnak ah timhcia a si nakhnga amah le amah aa uk khawh a hau. Timote nih Paul ruahnak cheuhnak kha a zulh, a ṭha lomi duhnak kha doh awkah fakpi in aa zuam, a ṭhami ziaza a ṭhanchoter i Khrihfa unau pawl he caan a hmanṭi caah Satan kha a rak doh khawh. (2 Tim. 2:22) Cucaah mahle mah i uk khawh a hau. Pumsa duhnak doh khawh awkah kanmah le kanmah kan i uk khawh a hau. (Rom 7:21-25) Mah lengah kan sining kha i thlen in a ṭhami kan ziaza ṭhanchoter awkah kanmah le kanmah kan i uk zong a hau. (Efe. 4:22, 24) Chun nitlak rian kan ṭuan i kan tha a bat tikah unau pawl he i pumhṭi dingin kan i zuam a hau men lai.—Heb. 10:24, 25.

12. Baibal kan hman ning kha zeiti lam in dah kan ṭhanchoter khawh?

¹² Ralkap pakhat nih hriamnam hman ning kha a cawn lengmang a hau. Ral doh a thiammi a si khawh nakhnga hriamnam hman ning kha hmaan tein a cawn a hau. Cu bantukin kannih zong Baibal ṭha tein a hmang thiammi kan si a hau. (2 Tim. 2:15) Pumhnak ah cutin tuah khawh ning lam cheukhat kha kan cawn khawh. Asinain midang nih Baibal biatak nih a bawmh khawh hna ti kha an zumh khawh nakhnga bawmh kan duh hna ahcun Baibal kha hmaan tein kan hlathlai a hau. Kan zumhnak fehter awkah Baibal kha kan hman a hau. Baibal kha rel sawhsawh lawngin a za lo. Kan relmi kong kha ṭha teiin ruah in mah kong he aa tlaiin bupi chuahmi cauk pawl kha kan hlathlai a hau, cutin kan tuah ahcun kan relmi kha ṭha tein kan hngalhthiam lai i mah ningin kan zulh khawh lai. (1 Tim. 4:13-15) Cun midang cawnpiak awkah Baibal kha kan hman khawh lai. Cucaah midang kha Baibal relpiak sawhsawh lawngin a za lo. Kan bia a ngaimi hna kha Baibal caang hngalhthiam awk le mah ningin  zulh khawh awkah bawmh kan duh hna. Cucaah hmaan tein Baibal kan hlathlai ahcun Baibal cawnpiak a thiam deuhmi kan hung si kho.—2 Tim. 3:16, 17.

13. Hebru 5:14 ningin zeicah thleidan khawhnak lungthin kan ngeih awk a si?

¹³ Thleidan khawhnak ngei. Ralkap pakhat nih ṭih a nungmi thil kha hmuh chung in a hrialthiam a hau. Kannih zong harnak a chuahter khomi thil sining kha hngalh in hrial a hau ve. (Ptb. 22:3; Hebru 5:14 rel.) Tahchunhnak ah, hrimhnak le nuamhsaihnak kha fimhring tein kan i thim a hau. TV le baisakup ah ziaza rawhralnak kong kha an langhter lengmang. Cubantuk ziaza nih Pathian thin a hunter i mah ruangah a chuakmi harnak cu hrial khawh a si lai lo. Duhsah tein Pathian kan dawtnak a zorter khomi nuamhsaihnak kha kan hrial. —Efe. 5:5, 6.

14. Thleidan khawhnak nih Daniel kha zeitindah a bawmh?

¹⁴ A hmasa ah langhtermi Daniel nih zaangennak le khuachia thiamnak kong aa telmi video game i celh cu a ṭha lo ti kha a hun hngalhthiam. Mah kong he aa tlaiin tawnghtham khawh awkah amah a bawmh khomi kong kha Vennak Innsang Library in hlathlainak a rak tuah. Mah nih a cungah zeitindah ṭhatnak a chuahter? A ṭha lomi video game celh kha a hun ngol. Internet in tangka pe in aa celh tawnmi game kha aa celh ti lo i aa celhṭimi a hawikom pawl he zong pehtlaihnak a tuah ti lo. Daniel nih hitin a ti: “Video game i celh canah thil pakhatkhat tuah awkah lengah ka chuak asiloah Khrihfa unau pawl he caan ka hmangṭi.” Atu ah Daniel cu hmaikal rian a ṭuan i Khrihfa upa pakhat a si cang.

15. A hmaan loin tuanbia cu zeicah ṭih a nun?

¹⁵ Timote bantukin kannih zong zumhpialmi hna karhtermi, ṭih a nungmi a hmaan lomi cawnpiaknak kha kan thleidan thiam a hau. (1 Tim. 4:1, 7; 2 Tim. 2:16) Tahchunhnak ah, zumhpialmi hna nih unau pawl kong he aa tlaiin a hmaan lomi tuanbia kong a karh nakhnga asiloah Jehovah bupi kong he aa tlaiin lunghrinnak kan ngeih nakhnga an i zuam men lai. Cu bantuk a hmaan lomi kong nih kan zumhnak kha a hrawh khawh. Mah hlennak bia kha kan zumh awk a si lo. Zeicah? Zeicahtiah “biatak a ngei ti lomi” hna nih an karhtermi tuanbia a si caah a si. An hmuitinh cu “biafang tete i al duhnak lungthin, a ngan a dam lomi duhnak” ngeihter kha a si. (1 Tim. 6:4, 5) Cun an chimmi  lihbia kha zum hna sehlaw unau pawl cungah zumhnak ngei hna hlah seh ti a kan duh.

16. Zei bantuk lungvaivuanhnak dah kan hrial awk a si?

¹⁶ Lungvaivuanhnak kha hrial. “Khrih Jesuh ralkap zumhawktlak” pakhat in Timote nih mi thinlung a la khomi thilri chawva le a dang hmuitinh nakin phungchimnak rian tu ah lungthin a rak pek deuh. (2 Tim. 2:3, 4) Timote bantukin thilri chawva duh tuknak kha kan hrial awk a si. “Chaw le va duhnak” nih Jehovah kan dawtnak, Baibal kan sunsaknak le phungchim kan duhnak lungthin kha a tlauter khawh. (Matt. 13:22) Nunning sawhsawh tein kan nun awk a si i “Pathian Pennak . . . kha biapi deuh in” chiah awkah kan caan le kan thazaang kha kan hman awk a si.—Matt. 6:22-25, 33.

17-18. Jehovah he kan i pehtlaihnak kha kan kilven khawh nakhnga zeidah kan tuah khawh?

¹⁷ Khulrang tein tuah awkah timhtuahnak ngei. Ralkap pakhat cu amahle amah aa kilven khawh nakhnga timhtuahnak a ngeih a hau. Jehovah nih a kan pekmi thil kha him tein kan kilven khawh nakhnga ṭih a nungmi thil kan hmuh tikah pakhatkhat kan tuah colh a hau. Cutin tuah awkah zeinihdah a kan bawmh khawh? Tlerhkhonnak lehrulh khawh ning kong he aa tlaiin timhtuahnak kan ngeih a hau.

¹⁸ Tahchunhnak ah, puai pakhatkhat ah a kalmi hna nih program an thawk hlanah a naih bikmi leng chuahnak kha hngalh awkah an i zuam tawn. Zeicah? Zeicahtiah an i ruahchan lomi thil pakhatkhat a can sual ahcun khulrang in an chuah khawh lai caah a si. Cu bantukin kannih zong Internet kan hman lio asiloah baisakup le TV kan zoh lioah ruahlopi in a thurhnawmmi hmanthlak, ṭih a nungmi zaangennak kong asiloah zumhpialmi hna kong kha kan hmuh sual ahcun kan “chuah” colh khawh nakhnga zeidah kan tuah lai ti kha kan i timtuah kho. A cang khomi kong he aa tlaiin kan i timhtuah chung ahcun Jehovah he kan i pehtlaihnak kha kan kilven khawh lai i Jehovah mithmuh ah thiang tein kan um kho peng lai.—Salm 101:3; 1 Tim. 4:12.

19. Jehovah nih a kan pekmi a sunglawimi thil kha kan kilven ahcun zei thluachuah dah kan hmuh lai?

¹⁹ Jehovah nih a kan pekmi a sunglawi tukmi Baibal biatak le midang cawnpiaknak tinvo sung kha kan kilven a hau. Cutin kan tuah ahcun a thiangmi chiaṭha thleidannak lungthin kan ngei lai, sullam a ngeimi nunnak kan ngei lai i midang kha Jehovah hngalh awkah kan bawmh khawh hna lai. Pathian bawmhnak thawngin pek kan simi thil kha him tein kan kilven khawh lai.—1 Tim. 6:12, 19.