1-2. Dapre 1 Timote 6:20, ki Timote ti bezwen fer?

SOUVANDFWA nou donn lezot dimoun nou bann keksoz valer pour pran swen avek. Par egzanp, nou kapab met nou larzan labank. Ler nou fer sa, nou ekspekte ki nou larzan i an sekirite e ki i pa perdi oubyen ganny vole. Alor nou konpran ki savedir konfye en dimoun en keksoz ki presye pour nou.

² Lir 1 Timote 6:20. Zapot Pol ti fer Timote rapel ki i’n ganny en keksoz ki presye. Sa ti konnesans egzakt lo lavolonte Bondye pour bann imen. Timote ti’n osi ganny konfye sa privilez pour “anons parol Bondye” e pour “fer travay en predikater.” (2 Tim. 4:2, 5, not) Pol ti ankouraz Timote pour protez sa ki’n ganny konfye avek li. Parey Timote, nou osi nou’n ganny konfye bann keksoz valer. Ki sa bann keksoz valer? Akoz nou devret protez sa trezor ki Zeova in donn nou?

3-4. Akoz bann laverite dan Labib i presye?

³ Zeova in donn nou sa loner pour ganny konnesans egzakt lo bann laverite ki dan son Parol, Labib. Bann laverite dan Labib i presye parski zot ansenny nou ki mannyer pour annan en bon lanmitye avek Zeova e eksplik nou kwa ki pou fer nou vreman ere. Ler nou aksepte e nou viv dapre bann laverite dan Labib, nou nepli lesklav bann fo lansennyman ek bann pratik imoral.​—1 Kor. 6:9-11.

⁴ En lot rezon akoz bann laverite dan Labib i presye i akoz Zeova i montre sa bann laverite zis avek bann ki annan limilite e ki “annan sa bon kondisyon leker.” (Akt  13:48) Bann dimoun ki annan limilite i aksepte ki ozordi Zeova pe servi lesklav fidel e pridan pour ansenny nou sa bann laverite. (Mat. 11:25; 24:45) Nou bezwen led pour nou kapab konpran sa ki Labib i dir e napa nanryen ki pli presye ki sa.​—Prov. 3:13, 15.

5. Ki lezot keksoz Zeova in konfye avek nou?

⁵ Zeova in osi konfye nou avek sa privilez pour ansenny lezot laverite lo li ek son plan. (Mat. 24:14) Sa mesaz ki nou anonse i vreman presye parski i ed bann dimoun pour form parti fanmir Zeova e i donn zot sa loportinite pour ganny lavi eternel. (1 Tim. 4:16) Ki swa nou pe fer bokou dan predikasyon oubyen non, nou pe ede dan sa travay pli enportan ki pe ganny fer ozordi. (1 Tim. 2:3, 4) Pa i en loner pour nou travay ansanm avek Bondye!​—1 Kor. 3:9.

6. Ki ti arive avek serten Kretyen ki pa ti apresye sa privilez ki zot ti annan pour travay ansanm avek Bondye?

⁶ Dan letan Timote, serten Kretyen pa ti apresye sa privilez ki zot ti annan pour travay ansanm avek Bondye. Par egzanp, Demas ti pli kontan sa lemonn e akoz sa i pa ti gard sa privilez ki i ti annan pour travay ansanm avek Pol. (2 Tim. 4:10) I paret ki Fizel ek Ermozenn ti aret anons sa bon nouvel akoz zot ti per ki zot ti pou ganny persekite parey Pol. (2 Tim. 1:15) Imene, Aleksann ek Filet ti vin bann aposta e zot ti aret ador Zeova. (1 Tim. 1:19, 20; 2 Tim. 2:16-18) Tou sa bann dimoun ti kontan Zeova me apre zot ti aret krwar ki sa bann keksoz ki Zeova ti’n donn zot i presye.

7. Ki taktik Satan i servi?

⁷ Ki mannyer Satan i esey fer nou kit sa trezor ki Zeova in konfye nou? Annou vwar serten taktik ki Satan i servi. I servi bann divertisman ek medya pour fer nou mazin e azir dan en fason ki pou fer nou dousman dousman aret kontan Zeova oubyen aret obei son bann lalwa. I esey fer nou per persekisyon oubyen sa ki lezot dimoun i dir lo nou pour nou aret anons sa bon nouvel. I osi esey fer nou ekout parol bann aposta ki “swadizan ganny apele ‘konnesans’” pour li kapab fer nou kit laverite.​—1 Tim. 6:20, 21.

8. Ki nou aprann avek leksperyans en frer ki apel Daniel?

⁸ Si nou pa fer atansyon, nou kapab dousman dousman kit laverite. Annou vwar leksperyans Daniel, * ki ti kontan  bann zwe video. I dir: “Mon ti konmans zwe bann zwe video ler mon ti annan di-z-an. O konmansman, mon ti zwe bann zwe video ki ti ase apropriye. Me dousman dousman mon ti konmans zwe bann ki ti vyolan e demonyak.” Avek letan, Daniel ti pe zwe bann zwe video pour apepre 15 erdtan toulezour. I dir: “Mon admet ki mon ti konnen ki sa kalite zwe video ki mon ti pe zwe ek lakantite letan mon ti zwe, ti pe elwanny mwan avek Zeova. Me mon ti’n konvenk mon lekor ki bann prensip Labib pa ti aplik pour mwan.” Alor, si nou pa fer atansyon, bann divertisman i kapab fer nou dousman dousman kit laverite. Si sa i arive, nou kapab perdi bann keksoz valer ki Zeova in donn nou.

9. Dapre 1 Timote 1:18, 19, avek kwa ki Pol ti konpar Timote?

⁹ Lir 1 Timote 1:18, 19. Pol ti konpar Timote avek en solda e i ti ankouraz li pour “kontinyen konbat dan sa bon lager.” Sa lager ti en lager spirityel e pa fizik. Dan ki fason bann Kretyen i parey bann solda ki pe konbat dan en lager? Konman bann solda, ki bann kalite nou bezwen? Annou vwar senk leson ki nou kapab aprann avek legzanp ki Pol ti donnen. Sa bann leson i kapab ed nou pour kontinyen tyonbo for laverite.

10. Ki savedir devosyon pour Bondye e akoz nou bezwen annan devosyon pour Bondye?

¹⁰ Devlop devosyon pour Bondye. En bon solda i fidel. I pou lager lebra kase pour li protez en dimoun ki i kontan oubyen en keksoz ki annan valer pour li. Pol ti ankouraz Timote pour devlop devosyon pour Bondye, setadir reste fidel avek Bondye. (1 Tim. 4:7) Pli nou kontan Bondye, pli nou pou anvi kontinyen tyonbo for laverite.​—1 Tim. 4:8-10; 6:6.

11. Akoz nou bezwen disiplin nou lekor?

¹¹ Devlop disiplin lo nou lekor. En solda i bezwen disiplin son lekor pour li toultan pare pour lager. Timote ti kapab lager kont lenfliyans Satan parski i ti swiv konsey Pol e i ti fer zefor pour lager avek bann move dezir, pour devlop bann bon kalite e pour pas letan avek bann frer ek ser. (2 Tim. 2:22) Pour li kapab fer sa, i ti bezwen disiplin son lekor. Nou osi nou bezwen disiplin nou lekor pour nou reisi lager kont nou bann move dezir. (Rom. 7:21-25) Osi, nou bezwen disiplin nou lekor pour nou kapab debaras nou avek sa vye personnalite e pour devlop sa enn nouvo. (Efe. 4:22, 24) Ler nou fatige apre en gran lazournen, petet nou pou bezwen fors nou lekor pour al renyon.​—Ebr. 10:24, 25.

12. Ki mannyer nou kapab amelyor nou abilite pour servi Parol Bondye?

¹² En solda i bezwen antrenn regilyerman pour li kapab servi byen son zarm. Pareyman, nou bezwen aprann servi byen Parol Bondye. (2 Tim. 2:15) Nou kapab aprann serten fason pour fer sa dan nou bann renyon. Me si nou anvi ed lezot pour krwar ki bann laverite dan Labib i kapab ed zot, nou menm nou bezwen etidye Labib regilyerman. Nou bezwen servi Parol Bondye pour ranforsi nou prop lafwa. Sa pa vedir ki nou zis lir Labib. Nou bezwen medit lo sa ki nou lir e fer resers dan nou bann piblikasyon pour nou kapab byen konpran e aplik sa ki nou lir. (1 Tim. 4:13-15) Koumsa nou  pou kapab servi Parol Bondye pour ansenny lezot. Sa pa vedir ki nou zis lir en verse Labib avek zot. Nou anvi ed zot konpran sa verse e vwar ki mannyer sa verse i aplik pour zot. Alor ler nou etidye Labib regilyerman, nou kapab amelyor nou abilite pour servi Parol Bondye pour ansenny lezot.​—2 Tim. 3:16, 17.

13. Anliny avek Ebre 5:14, akoz nou bezwen servi bon zizman?

¹³ Servi bon zizman. En solda i devret mazin davans ki danze i kapab rankontre e evit li. Nou osi nou devret aprann pour idantifye bann sityasyon ki kapab fer nou ditor e evit zot. (Prov. 22:3; lir Ebre 5:14.) Par egzanp, nou bezwen swazir nou rekreasyon ek divertisman byen. Bann progranm televizyon ek film i souvan montre bann aksyon imoral. Nou evit sa bann kalite divertisman parski i kapab afeblir nou lanmour pour Zeova. Nou konnen ki Zeova pa kontan sa bann kalite konportman e bann dimoun ki fer bann keksoz imoral i fer zot lekor ek lezot dimoun ditor.​—Efe. 5:5, 6.

14. Ki mannyer Daniel ti demontre bon zizman?

¹⁴ Daniel, ki’n ganny mansyonnen pli boner, ti konmans realize ki bann zwe video ki vyolan e demonyak pa ti bon pour li. I ti fer resers dan Watchtower Library pour rod bann piblikasyon ki pou ed li fer fas avek son problenm. Ki mannyer sa ti ed li? I ti aret zwe sa bann kalite zwe video. I ti aret zwe sa bann zwe video lo Enternet e i ti aret pas letan avek sa bann dimoun ki i ti zwe avek. Daniel i dir: “Dan plas zwe bann zwe video, mon ti konmans fer bann aktivite deor oubyen pas letan avek bann zanmi dan kongregasyon.” Ozordi Daniel i en ansyen e i osi en pionye.

15. Akoz bann fo zistwar i danzere?

¹⁵ Parey Timote, nou osi nou devret idantifye bann danze ki bann lenformasyon sorti kot bann aposta i kapab anmennen. (1 Tim. 4:1, 7; 2 Tim. 2:16) Par egzanp, zot kapab esey fann rimer lo nou bann frer ek ser oubyen fer nou annan dout lo lorganizasyon Zeova. Sa bann fo lenformasyon i kapab afebli nou lafwa. Nou devret evite krwar dan sa bann fo zistwar. Akoz? Parski i “bann move dimoun ki’n abandonn laverite” ki fann sa bann rimer. Zot anvi  “zis argimante e fer deba.” (1 Tim. 6:4, 5) Zot anvi ki nou krwar zot bann mansonz e aret annan konfyans dan nou bann frer ek ser.

16. Kwa ki kapab anpes nou reste konsantre?

¹⁶ Reste konsantre. Konman “en bon solda Kris Zezi,” Timote ti bezwen reste konsantre lo son minister olye les li ganny distrer avek bann keksoz materyel ek bann lobzektif dan sa lemonn. (2 Tim. 2:3, 4) Parey Timote, nou pa devret annan sa dezir pour ganny plis keksoz materyel. “Pouvwar larises i anbet” nou e i kapab fer nou aret kontan Zeova, aret apresye Parol Bondye e perdi sa dezir pour anons sa bon nouvel avek lezot. (Mat. 13:22) Nou devret annan en lavi senp e servi nou letan ek lenerzi pour “kontinyen rod Rwayonm . . . premye.”​—Mat. 6:22-25, 33.

17-18. Ki nou kapab fer pour protez nou lanmitye avek Zeova?

¹⁷ Pare pour azir vitman. En solda i bezwen plàn ki mannyer i pou protez son lekor. Si nou anvi protez bann keksoz ki Zeova in konfye nou, nou bezwen azir vitman ler nou vwar danze. Kwa ki kapab ed nou pour fer sa? Nou bezwen plàn davans lo ki mannyer nou pou reakte ler nou fer fas avek en danze.

¹⁸ Par egzanp, ler nou pe asiste en levennman, souvan lodyans i ganny demande pour rod laport exit ki pli pros avek zot avan progranm i konmanse. Akoz sa? Pour zot kapab evakye landrwa an ka dirzans. Dan menm fason, nou kapab prepar davans ki nou pou fer si ler nou lo Enternet oubyen nou pe get televizyon, en sel kou nou vwar en aksyon imoral, vyolans oubyen en keksoz ki annan pour fer avek bann aposta. Si nou prepar davans, nou pou kapab azir vitman pour protez nou lanmitye avek Zeova.​—Ps. 101:3, NWT; 1 Tim. 4:12.

19. Ki bann benediksyon nou pou gannyen si nou protez bann keksoz valer ki Zeova in konfye nou?

¹⁹ Nou devret protez bann keksoz valer ki Zeova in konfye nou, setadir bann laverite presye ki dan Labib e sa privilez pour ansenny lezot sa bann laverite. Ler nou fer sa, nou pou annan en konsyans kler, nou lavi pou fer sans e nou pou annan sa lazwa pour ed lezot aprann konn Zeova. Avek led Zeova, nou pou kapab protez sa ki’n ganny konfye avek nou.​—1 Tim. 6:12, 19.