1-2. Thenge la 1 Timoteo 6:20, nemene la itre ewekë ka sisitria hna ahnith koi Timoteo?

 AME itre xaa ijin, easa ahnith koi itre xan la itre ewekë ka tru alameken. Maine jë, hne së hna ami manie ngöne baak ke, atre hi së laka, tha tro kö a paatr maine atrekënö pena. Easa trotrohnin e celë la aliene la troa ahnithe koi ketre la ewekë së ka tru alameken.

² E jë la 1 Timoteo 6:20. Hnei Paulo hna amekunë Timoteo ka hape, hnei angeic hna kapa la ketre ewekë ka sisitria, ene la troa atre la aja i Akötresie kowe la itre atr. Nge hetre ketre hnëqa ka tru hna ahnith koi Timoteo, ene la troa “cainöjëne la trengewekë i Akötresie” me “cainöjëne la maca ka loi.” (2 Tim. 4:2, 5) Hnei Paulo hna ithuecatre koi Timoteo troa thupëne hnyawa la itre hna ahnith koi angeic. Ketre tu së fe, hetre hnëqa ka tru hna ahnith koi së hnei Iehova. Nemene la itre hnëqa cili? Nge pine nemene matre nyipiewekë tro sa thupëne hnyawa itre ej?

3-4. Pine nemene matre ka sisitria catre la itre nyipici qa hnine la Tusi Hmitrötr?

³ Ka tru la ihnimi Iehova koi së, matre hnei Nyidrëti hna aijijë së troa kapa la itre nyipici qa hnine la Tusi Hmitrötr. Ka sisitria catre itre ej ke, easa atre la aqane troa nyisinee i Iehova me mele madrin. Celë hi matre, maine tro sa wangatrune me trongëne la itre nyipici cili, tro ha thepe së qa ngöne la itre ini ka thoi me itre huliwa ka sis.—1 Kor. 6:9-11.

⁴ Ka sisitria catre fe la itre nyipici qa hnine la Tusi Hmitrötr pine laka, Iehova hmekuje hi a amamane itre ej  kowe la itre atr “ka hmalahnin.” (Itre hu. 13:48) Atre hi angatr laka, Iehova la ka acile la hlue ka nyipici me ka inamacan matre troa inine la itre atr. (Mat. 11:25; 24:45) Eje hi, ka sisitria catre la itre nyipici cili, ngo nyipiewekë troa xatua së troa trotrohnine itre ej.—Ite Edomë 3:13, 15.

5. Nemene la ketre hnëqa ka tru hna ahnith koi së hnei Iehova?

⁵ Hnei Iehova hna ahnith koi së la ketre hnëqa ka tru, ene la troa inine la itre atr la nyipici göi Nyidrë me itre aja i Nyidrë. (Mat. 24:14) Eje hi, ka sisitria catre la maca cili. Pine nemen? Pine laka, kola aijijëne la nöjei atr troa hane sine la lapa ka cahae i Iehova me hetrenyi la mele ka pë pun. (1 Tim. 4:16) Ngacama tha tru kö la hne së hna cainöj, ngo loi e tro palahi sa kuca la huliwa cili ka sisitria. (1 Tim. 2:3, 4) Drei la ketre manathith ka tru la troa ce huliwa me Akötresie!—1 Kor. 3:9.

6. Nemene la ka traqa kowe la itre Keresiano ka wangacone la nyipici?

⁶ Ame ngöne la ijine la itre pane Keresiano, hetrenyi la itre ka wangacone la huliwa i Akötresie. Tha hnei angatre kö hna tui Timoteo. Hnei Dema hna hnime la fen matre hnei angeic hna nuetriji Paulo. (2 Tim. 4:10) Ame pena Fugelo me Hemogeni, hnei nyidroti hna nue la huliwa ne cainöj ke, nyidroti a xoue troa akötrë nyidro tui Paulo. (2 Tim. 1:15) Nge ame Humenaio, Alesanedro me Fileto, ke, tha itre hlue i Iehova hmaca kö angatr, ngo itre ka iamenumenu pena. (1 Tim. 1:19, 20; 2 Tim. 2:16-18) Ame la itre Keresiano cili, ke, itre ka catre qale koi Iehova me nyihlue i Nyidrë ekö. Ngo ame e thupen, hnei angatr hna wangacone la nyipici.

7. Nemene la itre nyinyithiina i Satana matre tro sa nuetrije la hnëqa së qaathei Iehova?

⁷ Nemene la hna kuca hnei Satana matre tro sa nuetrije la hnëqa së qaathei Iehova? Tro sa ce wang la itre xaa nyinyithiina i angeic. Jëne la itre nyine iamadrinë me itre ithuemacany, Satana a ajojezi së. Angeic a ajane tro sa nuetrije la nyipici me nyitipune la aqane ujë me aqane mekun ne la fen. Angeice fe a ajane tro sa nuetrije la huliwa ne cainöj. Celë hi matre angeic a axouenyi së jëne la itre sinee së ka icilekeu me iakötrë. Ketre, angeic a ajojezi së hnene la itre ini ne la itre ka iamenumenu, “lo hna hëne menune ka hape, ‘atrehmekun.’ ” Itre ini hi lai ka troa thë la lapaune së.—1 Tim. 6:20, 21.

8. Nemene la ini hne së hna xom qa ngöne la hna melën hnei Daniel?

 ⁸ Maine tha hmeke kö së, tro hë sa iananyi trootro memine la nyipici. Hane hi la ka traqa koi Daniel, ketre trejin ka pi elo jeux. Öni angeic: “Eni a nyiqane elo jeux ngöne la eni a 10 lao macatre. Nge tha ka ngazo kö la itre jeux hnenge hna elon. Ngo ame hë e thupen, eni a elone la itre jeux ka amamai isi me kuci iöni.” Ame la pun, traqa koi 15 lao hawa ne elo jeux angeic ngöne la drai. Öni angeic: “Atre hi ni laka, tha ka loi kö la itre jeux cili ke, pëhë traemeng koi Iehova. Tha huliwa ha la mekuthetheung ke, tha nyipiewekëne hë ni la itre trepene meköt.” Eje hi, maine tha hmeke kö së, canga tro hi a ajojezi së hnene la itre nyine iamadrinë ka ngazo, nge tro hë sa nuetrije la nyipici. E cili, tro hë sa nuetrij la itre ewekë ka tru alameken hna ahnith koi së hnei Iehova. *

9. Thenge la 1 Timoteo 1:18, 19, nemene la aqane qeje Timoteo hnei Paulo?

⁹ E jë la 1 Timoteo 1:18, 19. Hnei Paulo hna aceitunë Timoteo me ketre sooc, me ithuecatre koi angeic troa “isine la nyipi isi.” Ngo tha kolo kö a qaja la kola isi hnei itre atr. Pine nemene matre kola aceitunëne la itre Keresiano memine la itre sooc ka isi? Nemene la itre thiina hnei angatr hna troa hetreny? Tro sa ce wang la 5 lao ini qa ngöne la ceitune i Paulo. Itre ej a xatua së troa wangatrune me xölehuje la nyipici.

10. Pine nemene matre loi e tro sa catre nyipici koi Akötresie?

¹⁰ Troa nyipici koi Akötresie. Ame la sooc ka nyipici ke, angeic a isi matre troa thupëne la itre atr hna hnim maine itre ewekë ka tru alamekene koi angeic. Hnei Paulo hna ithuecatre koi Timoteo troa catre nyipici koi Akötresie. (1 Tim. 4:7) Eje hi, maine tro palahi sa hnimi Akötresie me nyipici koi Nyidrë, tro hë sa thupëne hnyawa la nyipici.—1 Tim. 4:8-10; 6:6.

11. Pine nemene matre loi e tro sa xomehnöth la itre sipu aja së?

¹¹ Loi e tro sa xomehnöth la itre sipu aja së. Maine kola ajane hnene la itre sooc troa cile catr ngöne la hna isi, nyipiewekë tro angatr a xomehnöth la itre sipu aja i angatr. Hnei Timoteo hna mele nyipici koi Akötresie ke, hnei angeic hna trongëne la itre eamo i Paulo, me kötrene la itre aja ka ngazo. Hnei angeice fe hna eënyine la itre thiina ka loi me cememine la itre trejin. (2 Tim. 2:22) Hnei Timoteo hna cile catr pine laka, hnei angeic hna xomehnöth la itre sipu aja i angeic. Celë hi matre, loi e tro fe sa xomehnöth la itre sipu aja së, matre troa kötrene la itre aja ka ngazo. (Rom. 7:21-25) Ketre, tro fe lai a xatua së troa heetrëne la thiina ka hnyipixe me unatrije lo thiina hnapan. (Efe. 4:22, 24) Eje hi laka, ngacama easa nango kucakuca thupene la hna huliwa, ngo easa nue trengecatr matre troa sine la icasikeu.—Heb. 10:24, 25.

12. Nemene la nyine tro sa kuca matre tro sa maca troa huliwane hnyawa la Tusi Hmitrötr?

¹² Nyipiewekë tro la itre sooc a inine troa huliwane hnyawa la itre jiane isi angatr, matre troa maca ngöne la hna isi. Ketre tu së fe, loi e tro sa atreine huliwane hnyawa la Tusi Hmitrötr. (2 Tim. 2:15) Celë hi hna ini së ngöne la itre icasikeu. Ngo maine easa ajane troa acatrene la lapaune së me thele troa ketr la hni ne la itre atr, loi e tro palahi sa ini tusi caas me  e Tusi Hmitrötr. Nyipiewekë tro fe sa lapa mekun me ithel ngöne la itre itusi së, matre trotrohnine la aliene la itre xötr me xomi ini qa ngön. (1 Tim. 4:13-15) E cili, tro hë sa maca troa huliwane hnyawa la Tusi Hmitrötr me inine la itre atr. Eje hi, tha tro hmekuje kö sa e la ketre xötr, ngo loi e tro fe sa qejepengön, matre tro lai atr a trotrohnine me xomi ini qa ngön. Maine tro sa majemine ini tusi caas, tro hë sa maca troa huliwane hnyawa la Tusi Hmitrötr me inine la itre atr.—2 Tim. 3:16, 17.

13. Thenge la Heberu 5:14, pine nemene matre loi e tro sa atreine waiewekë?

¹³ Loi e tro sa atreine waiewekë. Ame la itre sooc ka atreine waiewekë, tre, angatr a hmekëne la itre jol matre troa canga neën itre ej. Ketre tu së fe, loi e tro sa canga mekun la itre jol matre tro sa atreine neën itre ej. (Ite Edomë 22:3; e jë la Heberu 5:14.) Eje hi, nyipiewekë troa iëne hnyawa la itre nyine iamadrinë pine laka, kolo palahi a mama ngöne tele la itre huliwa ka sis. Itre huliwa lai hna methinëne hnei Akötresie nge ka angazone la mele së. Celë hi matre easa thipetrij la itre nyine iamadrinë cili ka troa thapa la ihnimi së koi Akötresie.—Efe. 5:5, 6.

14. Nemene la hna kuca hnei Daniel?

¹⁴ Ame Daniel ke, trotrohnine hë angeic laka, ka ngazo catr la itre jeux hna elon, matre hnei angeic hna ithel ngöne Watchtower Library. Nemene la thangane lai? Tha angeice hmaca kö a elone la itre jeux cili me itre ka elo ngöne Ëternet. Öni Daniel: “Ame enehila, eni a kuci sport me ce madrin memine la itre trejin ne la ekalesia.” Ketre pionie hë Daniel nge ketre qatre thup.

15. Pine nemene matre loi e tro sa hmekëne la itre trengathoi ne la itre ka iamenumenu?

¹⁵ Tui Timoteo, loi e tro sa hmekëne la itre ithuemacany ka thoi hna qaja hnene la itre ka iamenumenu. (1 Tim. 4:1, 7; 2 Tim. 2:16) Ijije hi tro angatr a silitrengathoine la itre trejin memine la organizasio i Iehova. Tro la itre ithuemacanyi cili a thë la lapaune së. Celë hi matre tha tro kö sa mejiun kowe la itre hnei angatr hna qaja ke, “itre ka tria inamacanen, me itre ka tha trotrohnine hë la nyipici.” Angatr a ajane troa aciane la “iwesitrë, me iqaqa.”  (1 Tim. 6:4, 5) Angatr a thel tro sa mejiune kowe la itre trengathoi angatr me qaja angazone la itre trejin.

16. Nemene la ka troa ajojezi së matre tro sa thëthëhmine la ka nyipiewekë?

¹⁶ Tha tro kö sa thëthëhmine la ka nyipiewekë. Timoteo la ketre “nyipi sooc i Keriso Iesu” ke, hnei angeic hna catre cainöj. Tha hnei angeice kö hna thele troa cilëne la ketre göhnë ka draië, maine thele mo pena. (2 Tim. 2:3, 4) Ketre tu së fe, tha tro kö sa thëthëhmine la ka nyipiewekë. Loi e tro pe sa thupën la “trenge iaö ne la mani” ke, tro lai a thapa la ihnimi së koi Iehova me sewe së troa amamane la hni ne ole së kowe la Tusi Hmitrötr. Nge tro fe lai a upi së troa nuetrije la huliwa ne cainöj. (Mat. 13:22) Haawe, catre jë së ahmaloeëne la mele së me ‘thele panëne la Baselaia.’—Mat. 6:22-25, 33.

17-18. Nemene la aqane tro sa acatrene la aqane imelekeu së me Iehova?

¹⁷ Loi e troa hnëkë me canga mekun la nyine kuca. Nyipiewekë kowe la itre sooc troa canga mekun la itre jol ka troa traqa. Ketre tu së fe, loi e tro sa canga hnëkë matre troa atreine thupëne la itre ewekë ka sisitria qaathei Iehova ngöne la itre ijine jol. Nemene la nyine tro sa kuca? Nyipiewekë tro sa canga mekun la nyine kuca.

¹⁸ Nyipici laka, qëmekene troa sesë la avio, kola amaman hnene la itre ka huliwa la itre qënehlö hnë troa canga kötr e ijine jol. Ketre tu së fe, qëmekene tro sa fe la Ëternet maine wai tele, loi e tro sa canga mekun la itre “qënehlö hnë troa kötr.” Tro hë lai a thupë së ngöne la kola mama la itre iatr ka sis, me isi, me itre trengathoi ne la itre ka iamenumenu. Maine tro sa canga hnëkë, tro hë së lai a atre la nyine troa kuca. Ketre, tro lai a acatrene la aqane imelekeu së me Iehova, nge tro hë sa itre atr ka thiina ka wië koi Nyidrë.—Sal. 101:3; 1 Tim. 4:12.

19. Nemene la itre eloin e tro sa thupëne hnyawa la itre ewekë hna ahnithe koi së hnei Iehova?

¹⁹ Hnei Iehova hna ahnithe koi së la itre nyipici qa hnine la Tusi Hmitrötr me upi së troa cainöj. Maine tro sa thupëne la itre ewekë cili ka sisitria, tro ha lolo la mekuthetheu së, nge tro hë sa mele madrin. Ketre, tro lai a acatrene la aja së troa xatuane la itre xan troa hane atre Iehova. Haawe, catre jë së sipo ixatua koi Iehova. E cili, tro hë sa atreine thupëne hnyawa la itre ahnahna ka sisitria qaathei Iehova.—1 Tim. 6:12, 19.