1-2. Akpa Timothy 6:20 owụt ke nso ke Abasi ọkọnọ Timothy?

IMESIWAK ndimen akpan n̄kpọ nnyịn nnọ mbon en̄wen ẹtịm ẹnịm ẹnọ nnyịn. Uwụtn̄kpọ kiet edi okụk. Imesiwak ndisịn okụk nnyịn ke ban̄k. Ima isịn okụk nnyịn ke ban̄k, imọdiọn̄ọ ke n̄kpọ idinamke okụk oro, okụk oro idisopke, owo idinyụn̄ iyịpke okụk oro. Ntre ẹma ẹdọhọ ke ẹmen akpan n̄kpọ ẹnọ owo efen akama, idịghe esen ikọ ke utọn̄ nnyịn.

² Kot 1 Timothy 6:20. Apostle Paul ama eti Timothy ke enyene akpan n̄kpọ emi Abasi ọnọde enye, ke Abasi anam enye ọdiọn̄ọ nnennen n̄kpọ emi imọ iduakde ndinam nnọ mme owo. N̄kpọ efen edi ke Abasi ama ọdọhọ Timothy ‘anam utom ọkwọrọ eti mbụk.’ (2 Tim. 4:2, 5) Paul ama ọdọhọ Timothy etịm ekpeme se ẹkeyakde ẹsịn enye ke ubọk oro. Ẹnọ nnyịn mme akpan n̄kpọ n̄ko kpa nte ẹkenọde Timothy. Nso ye nso ke ẹnọ nnyịn? Ntak emi anade itịm ikpeme mme akpan n̄kpọ emi Jehovah ayakde esịn nnyịn ke ubọk-ọ?

3-4. Tịn̄ ndusụk se inamde mme akpanikọ emi ẹdude ke Bible ẹdi ọsọn̄urua n̄kpọ.

³ Mme akpanikọ emi ẹdude ke Bible ẹsọn̄ urua etieti. Jehovah onyụn̄ ama nnyịn nte enye anamde nnyịn idiọn̄ọ mme akpanikọ emi. Se inamde mme akpanikọ oro ẹnen̄ede ẹsọn̄ urua edi ke mmọ ẹnam nnyịn idiọn̄ọ se ikpanamde man inen̄ede ikpere Jehovah, ẹnyụn̄ ẹnam nnyịn idiọn̄ọ se inamde owo enen̄ede okop inemesịt ke uwem. Ima inịm mme akpanikọ oro inyụn̄ inam se inịmde oro, nnyịn ididụkke ufụn aba inọ nsu emi mme owo ẹkpepde, idinyụn̄ idụhe oburobụt uwem aba.—1 Cor. 6:9-11.

⁴ N̄kpọ efen emi anamde mme akpanikọ emi ẹdude ke Bible ẹsọn̄ urua ntre edi ke n̄kukụre mbon emi Jehovah ayararede mmọ ọnọ edi mbon emi ẹsụhọrede idem ẹnyụn̄ “ẹnyenede eti esịt.” (Utom 13:48) Utọ mbon oro ẹnịm ke Jehovah ada  “ofụn emi anamde akpanikọ onyụn̄ enyenede ọniọn̄” ekpep nnyịn mme akpanikọ oro mfịn. (Matt. 11:25; 24:45) Nnyịn ikemeke nditie ke idem nnyịn n̄kpep mme akpanikọ emi, inyụn̄ idụhe n̄kpọ ndomokiet ke ererimbot emi ọsọn̄de urua nte akpanikọ oro.—N̄ke 3:13, 15.

5. Nso efen ke Jehovah anam ọnọ nnyịn?

⁵ N̄kpọ efen emi Jehovah anamde ọnọ nnyịn edi enye ndidọn̄ nnyịn ika ikekpep mbon en̄wen akpanikọ iban̄a enye ye se enye aduakde ndinam. (Matt. 24:14) Se ikpepde mme owo oro ọsọn̄ urua etieti sia an̄wam mmọ ẹdi ikọt Jehovah, ẹnyụn̄ ẹtiene ẹdori enyịn ndinyene nsinsi uwem. (1 Tim. 4:16) Edide imọkwọrọ ikọ hour awak m̀mê iwakke, kpukpru nnyịn idian ubọk inam akakan utom emi ẹnamde ke eyo nnyịn emi. (1 Tim. 2:3, 4) Edi ata n̄kpọ ukpono nnyịn ndidian ubọk ye Abasi nnam utom emi!—1 Cor. 3:9.

6. Nso iketịbe inọ ndusụk mbon emi mîkomụmke se ẹkenọde mmọ ẹkama ubọk ọsọn̄?

⁶ Ndusụk mme Christian ke eyo Timothy ikadaha aba ke edi n̄kpọ ukpono mmimọ ndidian ubọk ye Abasi nnam utom. Demas ama ama n̄kpọ ererimbot tutu enye etre ndisan̄a ye apostle Paul n̄kwọrọ ikọ. (2 Tim. 4:10) Mbon efen emi ẹketrede ndisan̄a ye Paul n̄kwọrọ ikọ ẹkedi Phygelus ye Hermogenes. Etie nte ndịk akanam mmọ ke ẹyekọbọ mmimọ nte ẹkekọbọde Paul. (2 Tim. 1:15) Hymenaeus, Alexander, ye Philetus ẹma ẹkabade mbon mfiakedem ẹnyụn̄ ẹkpọn̄ Jehovah. (1 Tim. 1:19, 20; 2 Tim. 2:16-18) Kpukpru mbon emi isiakde mi ẹma ẹsima Jehovah, edi ekem mmọ ẹma ẹtre ndida n̄kpọ emi Jehovah ọkọnọde mmọ nte ọsọn̄urua n̄kpọ.

7. Siak ndusụk n̄kari emi Satan esidomode ndida nnam nnyịn inam se enye oyomde.

⁷ Nso ke Satan esinam man anam nnyịn iyak ọsọn̄urua n̄kpọ emi Jehovah ọkọnọde nnyịn iduọk? Se ndusụk n̄kari esie mi. Satan esida TV, fim, Intanet, mme n̄wed, ye magazine anam nnyịn ikere n̄kpọ inyụn̄ inam n̄kpọ ke usụn̄ emi enye ọdiọn̄ọde ke ayanam nnyịn ikpọn̄ Jehovah sụn̄sụn̄ sụn̄sụn̄. Enye esidomo ndida ukọbọ m̀mê se mme ubọkn̄ka nnyịn ẹtịn̄de nnam ndịk anam nnyịn man nnyịn itre ndikwọrọ ikọ. Enye esinyụn̄ odomo ndinam nnyịn ikpan̄ utọn̄ inọ nsu emi mbon mfiakedem ẹdọhọde ke edi “ifiọk” man nnyịn ikpọn̄ akpanikọ emi Bible ekpepde.—1 Tim. 6:20, 21.

8. Se iketịbede inọ brọda kiet emi ekerede Daniel ekpep fi nso?

⁸ Nnyịn mîkpemeke, imekeme nditọn̄ọ ndikpọn̄ Jehovah sụn̄sụn̄ sụn̄sụn̄. Se ikọwọrọde Daniel * emi ekesimade ndibre vidio game edi oro. Enye ọdọhọ ete: “N̄kọtọn̄ọ ndibre vidio game ini ndide n̄kpọ nte isua duop. Akpa akpa n̄kesibre mbon emi mîdiọkke, edi sụn̄sụn̄ sụn̄sụn̄ mma ntọn̄ọ ndibre mbon emi  aban̄ade afai ye n̄kpọ mme demon.” Ekem ko, enye ama ọtọn̄ọ ndisibre vidio game ke n̄kpọ nte hour 15 kpukpru usen. Daniel afiak ọdọhọ ete: “Ke isọn̄ esịt mi, mma ndiọn̄ọ ke utọ vidio game emi mbrede ye ini emi ndade mbre mmọ ke ẹdian̄ade mi ẹkpọn̄ Jehovah sụn̄sụn̄ sụn̄sụn̄. Edi esịt ama ọsọn̄ mi, n̄konyụn̄ nnịmke ke se Bible etịn̄de ebehe mi.” Edieke nnyịn mîkpemeke, mme utọ n̄kpọ emi ẹkeme ndinam nnyịn itọn̄ọ ndikpọn̄ Jehovah sụn̄sụn̄ sụn̄sụn̄. Ndien edieke ikpọn̄de Jehovah, imekeme nditre ndida mme n̄kpọ emi Jehovah ọnọde nnyịn ke akpan n̄kpọ.

9. Ke 1 Timothy 1:18, 19, Paul ekemen Timothy odomo ye anie?

⁹ Kot 1 Timothy 1:18, 19. Paul ekemen Timothy odomo ye owoekọn̄ onyụn̄ ọdọhọ enye “aka iso an̄wana eti en̄wan.” Edi idịghe ata ata en̄wan ke Paul eketịn̄ aban̄a. Didie ke nnyịn mme Christian ibiet mbonekọn̄ emi ẹdude ke iso ekọn̄? Nso ye nso ke nnyịn emi idide mbonekọn̄ Christ ikpanam? Ẹyak ineme n̄kpọ ition emi ikemede ndikpep nto uwụtn̄kpọ owoekọn̄ emi Paul ọkọnọde Timothy. Se idikpepde oro ayan̄wam nnyịn ikûkpọn̄ akpanikọ.

10. Nso idi uten̄e Abasi? Ntak emi ikpeten̄ede Abasi-e?

¹⁰ Ten̄e Abasi. Eti owoekọn̄ isikpọn̄ke mbon mmọ. Enye esisịn idem an̄wana ekpeme owo emi enye amade m̀mê n̄kpọ emi enye adade ke akpan n̄kpọ. Paul ọkọdọhọ Timothy yak enye eten̄e Abasi. Nditen̄e Abasi ọwọrọ owo ndinen̄ede mmụm Abasi n̄kama. (1 Tim. 4:7) Nte inen̄erede ima Abasi inyụn̄ iten̄e enye, ntre ke edinen̄ede idọn̄ nnyịn ndimụm akpanikọ n̄kama.—1 Tim. 4:8-10; 6:6.

11. Ntak emi oyomde itụnọ idem nnyịn-e?

¹¹ Tụnọ idemfo. Ana owoekọn̄ otụnọ idemesie man enye eben̄e idem ọnọ ekọn̄ kpukpru ini. Se ikan̄wamde Timothy akan nsio nsio idomo emi Satan ekemende ebịne enye ekedi enye ndinam item emi apostle Paul ọkọnọde enye. Paul ọkọdọhọ enye etịme man enye okûnam ndiọi n̄kpọ emi ẹdọn̄de enye, enyene nti edu, onyụn̄ esidian idem ye nditọete. (2 Tim. 2:22) Akana Timothy otụnọ idemesie man enye ekeme ndinam se Paul eketịn̄de oro. Edi se nnyịn n̄ko itụnọ idem nnyịn man nnyịn ikûnam ndiọi n̄kpọ emi ẹdọn̄de nnyịn. (Rome 7:21-25) N̄kpọ efen edi ke ana itụnọ idem nnyịn man ikeme ndision̄o n̄kani edu emi ikenyenede nduọk inyụn̄ inyene nti edu. (Eph. 4:22, 24) Ndien n̄ko ke ima ikọnyọn̄ utom idi yak akak nnyịn ke idem, ekeme ndidi se itụnọde idem nnyịn mbak ekaha idinam nnyịn itre ndidụk mbono esop.—Heb. 10:24, 25.

12. Tịn̄ nsio nsio n̄kpọ emi ikpanamde man inen̄ede idiọn̄ọ ndida Bible n̄n̄wam owo.

¹² Ọfọn yak edi owoekọn̄ ama etie etie enye emen n̄kpọekọn̄ esie odomo ese nte enye akpakamade n̄kpọekọn̄ oro an̄wana ekọn̄. Oro edinam enye enen̄ede ọdiọn̄ọ nte akpakamade n̄kpọekọn̄ esie an̄wana ekọn̄. Se nnyịn n̄ko ikpanamde edi oro. Ọfọn nnyịn idiọn̄ọ nte ikpadade Bible in̄wam mme owo. (2 Tim. 2:15) Ke mbono esop ke nnyịn idikpep ndusụk usụn̄ emi ikemede ndida Bible n̄n̄wam owo. Edi edieke iyomde mbon en̄wen ẹnịm ke Bible enen̄ede enyene ufọn, ọfọn nnyịn ke idem nnyịn isikpep Bible kpukpru ini. Ana ida Bible in̄wam idem nnyịn man inen̄ede ibuọt idem ye Abasi. Idịghe ndikokot kpọt edin̄wam nnyịn inam emi-o. Oyom yak edi ima ikot ima nnyịn itie ikere se ikotde, ida mme n̄kpọ emi esop Abasi ẹsiode ẹdi inam ndụn̄ọde man itie Bible emi ikotde enen̄ede an̄wan̄a nnyịn, inyụn̄ idiọn̄ọ nte ikpanamde itie Bible oro an̄wan̄a owo. (1 Tim. 4:13-15) Ima inam oro ima ke nnyịn idikeme ndida Bible n̄kpep mbon en̄wen n̄kpọ. Enye emi n̄ko idịghe ndikot itie Bible kpọt nnọ owo-o. Ana inam itie Bible emi ikotde do  an̄wan̄a mbon emi ikotde enye inọ, inyụn̄ in̄wam mmọ ẹkụt nte itie Bible oro ebehede mmọ. Ima ikpep idem nnyịn Bible kpukpru ini, iyenen̄ede idiọn̄ọ nte ikpadade Bible ikpep mme owo n̄kpọ.—2 Tim. 3:16, 17.

13. Mme Hebrew 5:14 ọdọhọ ke ana inam nso man idiọn̄ọ se ikpanamde ye se nnyịn mîkpanamke?

¹³ Diọn̄ọ se akpanamde ye se mûkpunamke. Ana owoekọn̄ ọdiọn̄ọ mme n̄kpọ emi ẹkemede ndisịn enye ke mfịna onyụn̄ ọkọhọde mme n̄kpọ oro. Ana nnyịn n̄ko ikpep ndidiọn̄ọ mme n̄kpọ emi ẹkemede ndisịn nnyịn ke mfịna, inyụn̄ inam n̄kpọ man idisịn idem ke mfịna. (N̄ke 22:3; kot Mme Hebrew 5:14.) Usụn̄ kiet emi nnyịn ikemede ndinam emi edi nnyịn ndisasat mbre se ibre ye se idade inem idem nnyịn esịt. Ẹsiwak ndisio oburobụt n̄kpọ ke TV ye mme fim. Utọ oburobụt n̄kpọ oro isinemke Jehovah esịt, ndien utịt utịt mmọ ẹyesịn nnyịn ke mfịna. Ke ntak oro, ọfọn nnyịn itre ndise mme utọ n̄kpọ oro sia mmọ ẹkeme ndinam nnyịn itre ndima Jehovah sụn̄sụn̄ sụn̄sụn̄.—Eph. 5:5, 6.

14. Didie ke Daniel ndikokụt se vidio game akanamde enye akan̄wam enye ọdiọn̄ọ se enye akpanamde?

¹⁴ Daniel emi iketịn̄de iban̄a ke ọyọhọ ikpehe itiaita ama edikụt ke imọ ndibre mme vidio game emi aban̄ade afai ye n̄kpọ mme demon ama anam imọ ibak. Enye ama ada Watchtower Library anam ndụn̄ọde man an̄wam enye. Oro ama an̄wam enye etre ndibre ndiọi vidio game. Enye ekesikpekpe okụk ebre vidio game emi ke Intanet. Ekem enye ama etre, onyụn̄ adian̄ade nsan̄a ye mbon emi ẹkesitienede enye ẹbre vidio game oro. Daniel ọdọhọ ete: “Utu ke nditie ke ufọk mbre vidio game, mma nsikpọn̄ ufọk n̄ka n̄kanam n̄kpọ en̄wen mîdịghe n̄ka n̄kese nditọete ke esop nnyịn.” Idahaemi Daniel edidi ebiowo ye asiakusụn̄.

15. Nso inam nsu nsu mbụk enen̄ede ọdiọk?

¹⁵ Timothy ama ọdiọn̄ọ ibak emi nsu mbon mfiakedem ekemede ndinam nditọete. Ana nnyịn n̄ko idiọn̄ọ. (1 Tim. 4:1, 7; 2 Tim. 2:16) Mbon mfiakedem emi ẹkeme ndisuan nsunsu mbụk mban̄a nditọete nnyịn, mîdịghe ẹdomo ndinam nnyịn ikûnịm se esop Jehovah ẹtịn̄de. Utọ nsu oro ekeme ndinam nnyịn itre ndibuọt idem ye Abasi. Ntre inaha iyak mmọ ẹda nsu mmọ ẹbian̄a nnyịn. Ntak-a? Sia “mbon oro ekikere mmọ ama akabiara” emi mînyụn̄ idiọn̄ọke akpanikọ aba ẹsisuan utọ mbụk emi. Mmọ ẹyom ndinam mme owo ẹtọn̄ọ ndineni se esop Abasi ẹtịn̄de. (1 Tim. 6:4, 5) Mmọ ẹyom nnyịn inịm nsu emi mmọ ẹsude ẹbiat nditọete nnyịn enyịn̄ inyụn̄ ikpekpeme idem ye nditọete nnyịn.

16. Nso ye nso ke nnyịn mîkpayakke anam isio esịt ikpọn̄ utom emi Abasi ọnọde nnyịn?

 ¹⁶ Kûyak n̄kpọ ndomokiet osio fi esịt ọkpọn̄ utom emi Abasi ọnọde fi. Sia Timothy ekedide “eti owoekọn̄ Christ Jesus,” akana enye esịn ofụri esịt esie ke ukwọrọikọ okûnyụn̄ uyak utom m̀mê inyene anam enye osio esịt ọkpọn̄ utom oro. (2 Tim. 2:3, 4) Item emi ẹkenọde Timothy ebehe nnyịn. Inaha iyom ndinyene ediwak n̄kpọ sia mme n̄kpọ oro ẹkeme ndinam itre ndisịn esịt ke utom emi Abasi ọnọde nnyịn inam. Inyene ekeme ndibian̄a nnyịn onyụn̄ anam nnyịn ikûma Jehovah aba, anam nnyịn itre ndida Bible ke ọsọn̄urua n̄kpọ, onyụn̄ anam okûdọn̄ nnyịn ndikwọrọ ikọ nnọ mbon en̄wen. (Matt. 13:22) Ana iyụhọ ye ekpri se inyenede inyụn̄ ida ini nnyịn ye odudu nnyịn ‘ika iso ibem iso iyom Obio Ubọn̄ Abasi.’—Matt. 6:22-25, 33.

17-18. Nso ke ikpanam mbak n̄kpọ ndomokiet idinam nnyịn itre ndidi ufan Jehovah?

¹⁷ Ben̄e idem man anam n̄kpọ usọp usọp n̄kpọ ama etịbe. Ana owoekọn̄ etetie ekere kan̄a se enye edinamde n̄kpọ ekpetịbe mbak n̄kpọ idinam enye. Edieke nnyịn mîyomke se Jehovah akayakde esịn nnyịn ke ubọk ọbọhọ nnyịn, ana inam n̄kpọ usọp usọp ima ikụt n̄kpọ emi oyomde ndisịn nnyịn ke mfịna. Se idin̄wamde nnyịn edi nnyịn ndibabak ntie n̄kere nte idinamde n̄kpọ ima ikụt n̄kpọ emi edisịnde nnyịn ke mfịna.

¹⁸ Yak inọ uwụtn̄kpọ man se itịn̄de emi an̄wan̄a. Ke ndusụk itie, mbemiso edinam ọtọn̄ọde, ẹsiwụt mme owo usụn̄ efen emi mmọ ẹkemede ndisan̄a n̄wọrọ ke itie edinam oro. Ẹsinam ntre man n̄kpọ ekpetịbe yak edi se ẹfehe, mmọ ẹkeme ndisọsọp nduọk idem. Se nnyịn n̄ko ikpanamde edi oro. Ana ibabak ibiere se idinamde man ekpedi ke ise TV m̀mê ke inam n̄kpọ ke Intanet, ite ise oburobụt n̄kpọ, afai, m̀mê n̄kpọ mbon mfiakedem ọwọrọ ada. Edieke itịmde idem iben̄e utọ n̄kpọ emi, iyanam n̄kpọ usọp usọp, idinyụn̄ iyakke n̄kpọ ndomokiet anam nnyịn itre ndidi ufan Jehovah m̀mê anam nnyịn idehe ke enyịn Jehovah.—Ps. 101:3; 1 Tim. 4:12.

19. Nso ufọn ke idibọ edieke ikpemede mme ọsọn̄urua n̄kpọ emi Jehovah ayakde esịn nnyịn ke ubọk?

¹⁹ Jehovah anam nnyịn idiọn̄ọ mme akpanikọ emi ẹdude ke Bible, onyụn̄ ọdọn̄ nnyịn ikekpep mbon en̄wen akpanikọ oro. Ata akamba n̄kpọ ke enye ọnọ nnyịn oro, inaha itop iduọk. Ima imụm se Jehovah ọnọde nnyịn ikama ubọk ọsọn̄, nnyịn idinamke n̄kpọ emi esịt edimiade nnyịn ufen, uwem nnyịn eyenyene ibuot, iyonyụn̄ in̄wam mbon en̄wen ẹdidiọn̄ọ Jehovah, inyụn̄ ikop inemesịt. Jehovah ayan̄wam nnyịn isọn̄ọ imụm se enye ayakde esịn nnyịn ke ubọk ikama.—1 Tim. 6:12, 19.