1-2. Sèlon 1 Timoté 6:20, yo té ba Timoté sèwten biten ki té ni onlo valè. Ki biten ésa ?

BYENSOUVAN, nou ka ba sèwten moun tchenbé biten ki ni onlo valè pou nou. Pa ègzanp, pétèt kè nou dépozé lajan an nou labank. Si sé sa, nou ka èspéré kè lajan-la ansékirité, kè yo pé’é pèd li é kè yo pé’é volé-y nonplis. Donk nou sav trèbyen ka sa vé di, ba on moun tchenbé on biten ki ni onlo valè pou nou.

² (Li 1 Timoté 6:20.) Pòl fè Timoté sonjé kè yo té ba-y on biten ki té ni onlo valè. Ki biten ésa ? Pòl té ka palé dè on konésans ègzak anrapò èvè sa Bondyé ni lentansyon fè pou limanité. Jéova ba Timoté ondòt biten ki té ni onlo valè osi : i di-y « préché bon nouvèl-la ». É sa osi, sé té on gran lonnè ! (2 Tim. 4:2, 5). Pòl di Timoté pran swen a sa yo ba-y. Nou osi, Jéova ban-nou onpakèt biten ki ni onlo valè. Ki biten ésa ? É poukwa fò-nou pran prékosyon pou nou pa pèd trézò-la i ban-nou la ?

3-4. Poukwa nou pé di kè sé vérité-la ki an Bib-la ni onlo valè ?

³ Konm Jéova enmé-nou, i fè ansòt pou nou ni on konésans ki ègzak. I édé-nou konnèt onpakèt vérité ki ni onlo valè é kè nou ka touvé an Pawòl a-y, Labib. Sé vérité-lasa ni onlo valè pas yo ka édé-nou sav ka pou nou fè pou nou vin bon zanmi èvè Jéova. É yo ka édé-nou sav osi, ka pou nou fè pou nou ni tchè-kontan pannan tout vi an nou. Lè nou ka kwè adan sé vérité-lasa é kè nou ka mété-yo an pratik, nou pa èsklav a pon mansonj ankò é nou ka menné on vi ki pwòp (1 Kor. 6:9-11).

⁴ Sé vérité-la ki an Bib-la ni onlo valè pou ondòt rézon ankò : Jéova pa’a ba nenpòt kimoun sé vérité-lasa ; sé yenki moun ki ni « mantalité-la ki fo la pou ni lavi étèwnèl » ki pé konnèt sé vérité-lasa (Akt 13:48). Sé moun-lasa plen imilité é yo ka rèkonnèt kè Jéova ka sèvi èvè èsklav fidèl é prévwayan la pou anségné-nou sé vérité-lasa (Mat.  11:25 ; 24:45). Pa ni mwayen konprann sé vérité-lasa tousèl an nou. É lè yo ka édé-nou konprann-yo, pa ni pi bèl biten ki sa ! (Pwov. 3:13, 15).

5. Jéova ban-nou ondòt biten ki ni onlo valè. Ki biten ésa ?

⁵ Jéova ban-nou ondòt privilèj ankò : i ka itilizé-nou pou fè moun konnèt kijan dè moun i yé é ka i ni lentansyon fè pou limanité (Mat. 24:14). Mésaj-la nou ka préché la, pa ni 2 kon-y ! Poukwa nou ka di sa ? Pas si sé moun-la aksèpté-y, yo ké pé fè pawti a fanmi a Jéova é yo ké pé ni lavi étèwnèl ! Ou pa’a touvé sa bèl ? (1 Tim. 4:16). Kèlkanswa kantité lè nou ka fè an prédikasyon, noutout ka pawtisipé adan aktivité-la ki pi enpòwtan la (1 Tim. 2:3, 4). Nou ka kolaboré èvè Bondyé é pa ni pi bèl privilèj ki sa ! (1 Kor. 3:9).

6. Ni sèwten krétyen ki té ka kolaboré èvè Bondyé men yo pa ba privilèj-lasa asé valè. Ka i rivé-yo ?

⁶ An tan a Timoté, ni sèwten krétyen ki té ka kolaboré èvè Bondyé men ki pa té ka ba sa pon enpòwtans. Pa ègzanp, Démas touvé-y enmé mond-la, kifè, i té préféré arété sèvi Bondyé ansanm èvè Pòl (2 Tim. 4:10). I ka sanm sa Fijèl é Èwmojèn arété préché pas yo té pè yo pèwsékité-yo menmjan ki Pòl (2 Tim. 1:15). Iméné, Alèksann, é Filèt vin apòsta é yo arété sèvi Jéova (1 Tim. 1:19, 20 ; 2 Tim. 2:16-18). Tout sé boug-lasa dwèt té byen enmé Jéova odépa, men onlè, yo pa té ka ba lavérité pon valè ankò.

7. Ka Satan ka éséyé fè pou nou pa ba sé trézò-la Jéova ban-nou la pon valè ankò ?

⁷ Jéova ban-nou bon enpé trézo. Ki mannèv Satan ka pòté pou nou pa ba sé trézò-lasa pon valè ankò ? An-nou palé dè sèwten métòd i ka itilizé. I ka sèvi èvè fim, èvè émisyon, oben èvè sèwten biten ki ni asi Entèwnèt pou mèt enpé vyé lidé an tèt an nou é pou fè-nou fè enpé biten ki pa bon. Konsa, piti-a-piti, nou ké lagé lavérité. I ka fè fanmi an nou fè présyon asi nou oben i ka fè moun pèwsékité-nou pou fè-nou pè, èvè lidé nou ké arété préché. É i vé fè-nou kouté sa sé apòsta-la ka di pou fè-nou lagé lavérité (1 Tim. 6:20, 21).

8. Ka ègzanp a Daniel ka aprann-nou ?

⁸ Si nou pa’a fè atansyon, nou pé rivé a lagé lavérité piti-a-piti. An-nou vwè ka ki rivé Daniel *, on frè ki té enmé jé vidéo toubònman. Mi sa i ka rakonté : « Lè an koumansé jouwé jé vidéo, an té ni 10 an apépré. Odépa, pa té ni ayen dè mové adan sé jé-la an té ka jouwé la. Men aprésa, an mèt-mwen ka jouwé jé  ki té plen vyolans é ki té ni biten a démon adan. » Onlè, adan on jouné, Daniel té ka pasé 15 èdtan ka jouwé sé jé-lasa. Mi sa limenm ka di : « Anfon a tchè an mwen, an té sav byen kè lèwvwè an té ka pasé tousa tan ka jouwé sé kalté jé-lasa, an pa té’é pé rété bon bon zanmi èvè Jéova ankò ! Men tchè an mwen vin rèd kon wòch é an fin pa kwè kè an pa té ni a tchenn kont dè sa Labib ka di anrapò èvè sijé-lasa. » Akòz dè on anmizman ki pa bon, on krétyen pé rivé a lagé lavérité piti-a-piti, san menm i rann-li kont. Si sa rivé-nou, nou pé rivé a pèd tout sé trézò-la Jéova ban-nou la.

9. An 1 Timoté 1:18, 19, èvè ki biten Pòl konparé Timoté ?

⁹ (Li 1 Timoté 1:18, 19.) Pòl konparé Timoté èvè on sòlda é i ankourajé-y ‘kontinyé menné bèl konba-la’ (1 Tim. 1:18, 19). A pa goumé i té k’ay goumé èvè ponmoun, men, Pòl té vé fè-y konprann kè sé krétyen-la ka touvé-yo kon sòlda ki adan on lagè. An ki sans ? Ki kalité fò on sòlda a Jézikris travay ? Ègzanp-la Pòl pran la ka aprann-nou onlo biten. Nou ké ègzaminé 5 adan yo é nou ké vwè kijan yo ka édé-nou pran swen a on trézò Bondyé ban-nou : vérité-la ki an Bib-la.

10. Poukwa fò-nou fè sa ki fo pou nou enmé Bondyé plis ankò ?

¹⁰ An-nou fè ansòt pou nou enmé Bondyé pi fò ankò. On bon sòlda, sé on moun ki fidèl. Lèwvwè i enmé on moun oben on biten, i parèt a pèd vi a-y pou i pé sa pwotéjé-y. Pòl di Timoté kè fò i fè sa ki fo pou i enmé Bondyé plis ankò (1 Tim. 4:7). Pas pi nou ké enmé Bondyé, é pi nou ké anvi pwotéjé lavérité (1 Tim. 4:8-10 ; 6:6).

11. Poukwa fò-nou montré kò an nou kè sé nou ka komandé ?

¹¹ Pran labitid fè sa ki byen. Fò on sòlda toujou antréné pou i pé sa paré siwvwè on lagè pété. Timoté pa lésé Satan pran lanmen asi-y pas i fè tousa Pòl té di-y. Lè i té ka santi kè i anvi fè on biten ki pa bon, i té ka goumé rèd pou i pa té bétizé. I té ka fè onlo éfò pou i té ni sèwten kalité é i toujou té ka réyini èvè frè é sè a-y (2 Tim. 2:22). Men pou i té rivé fè sa, fò i té aprann tchenbé kò a-y. Nou osi, lè nou anvi fè on biten ki pa bon, pou nou rivé métrizé-nou, fò-nou aprann tchenn kò an nou (Wom. 7:21-25). Anplis, fò-nou ni métriz osi pou nou pé sa kontinyé chanjé pèwsonalité an nou é kiltivé dé bèl kalité (Éféz. 4:22, 24). É lèwvwè nou fè on bèl jouné travay é kè nou byen las, fò-nou fè on éfò pou nou ay réinyon (Ébr. 10:24, 25).

12. Ka nou pé fè pou nou aprann mannyé Bib-la pibyen ?

¹² Fò on sòlda aprann mannyé tout zam i ni pou goumé. É pou i vin fò, fò i ka fè sa toutlè. Nou osi, menmjan-la fò-nou aprann mannyé Bib-la byen (2 Tim. 2:15). É an réinyon, yo ka aprann-nou kijan pou nou fè. Men si nou vé montré sé moun-la kè sé vérité-la ki an Bib-la pé édé-yo, fò-nou pran labitid étidyé Bib-la dè koté an nou. Pou konsolidé fwa an nou, fò-nou sèvi èvè Pawòl a Bondyé. Men a pa enki li pou nou li-y. Pou nou byen konprann on pasaj é pou nou pé sa apliké-y an vi an nou, fò-nou pran tan réfléchi asi-y é fò-nou fè rèchèch adan piblikasyon an nou (1 Tim. 4:13-15). A moman-lasa, nou ké pé èspliké moun, ka i ni adan Pawòl a Bondyé. Men la ankò, apatoudi li on pasaj ba moun-la. Pa ègzanp, si nou ka  diskité èvè on moun é kè nou ka li on vèwsé ba-y, fò-nou édé-y konprann-li é fò-nou édé-y vwè kijan sa pé itil pou-y. É wi ! Siwvwè nou ka étidyé Labib, nou ké mannyé-y pibyen é nou ké ansegné moun pibyen osi (2 Tim. 3:16, 17).

13. Dapré sa Ébré 5:14 ka di, poukwa fò-nou aji èvè bon jijman ?

¹³ Fò ou ni bon jijman. On sòlda ka vwè danjé-la ka vin olwen pou i ba-y lè pou i pasé. Menmjan-la, lè on biten bizwen mèt lanmityé an nou èvè Jéova an danjé, fò-nou vwè-y ka vin olwen é fò-nou ba-y gran lè a-y (Pwov. 22:3 ; li Ébré 5:14). Pa ègzanp, fò-nou chwazi èvè ki biten nou ké détann-nou èvè onlo sajès. Byensouvan, sé émisyon-la ki an télé-la é sé fim-la yo ka pasé la ka montré enpé biten kè Labib ka kondanné. É lè moun ka fè biten ki pa pwòp, sa pa’a fè Bondyé plézi é sé pwoblèm sa ka menné a chakfwa. Kifè, lè on anmizman ni kochonni adan-y, nou ka ba-y gran lè a-y, pas piti-a-piti, sa pé rivé a fè-nou lagé lavérité é nou pé’é bon zanmi èvè Bondyé ankò (Éféz. 5:5, 6).

14. Daniel aji èvè bon jijman. Kijan i fè sa ?

¹⁴ Nou palé dè Daniel talè-la. Ében i fin pa konprann kè sé jé-la i té ka jouwé la sé té on danjé pou-y pas té ni twòp vyolans é twòp biten a démon adan. Kifè, i ay chèché adan Watchtower Library pou touvé déotwa awtik ki té ka palé dè sa. Ka sa bay ? I arété jouwé sé vyé jé-la i té ka jouwé la. É konm i té pran plizyè abònman pou i té jouwé èvè moun asi entèwnèt, i koupé yotout é i koupé lépon èvè sé moun-lasa osi. Mi sa i ka di : « Olyé an té pèd tan an mwen ka jouwé jé vidéo, an mèt-mwen ka fè ispò é an òwganizé-mwen mwen pasé plis tan èvè frè é sè a lasanblé an mwen. » Jòdijou, Daniel pyonyé é i ansyen.

15. Poukwa sa sé apòsta-la ka di vréman danjéré ?

¹⁵ Kon Timoté, ni ondòt danjé pou nou vwè dépi olwen. Kilès la ? Sé sé mansonj-la sé apòsta-la ka simé la (1 Tim. 4:1, 7 ; 2 Tim. 2:16). Pa ègzanp, sé apòsta-la ka malpalé frè é sè an nou, oben yo ka di bétiz asi òwganizasyon a Jéova. Si nou ka kouté sé mansonj-lasa, sa pé fébli fwa an nou ! Fò pa nou kwè adan sa sé apòsta-la ka di. An réyalité, sé dé moun ki ni yenki mové lidé an tèt a yo, dé moun ki lagé lavérité. Sa yo té’é vé sé fè moun babyé é  fè-yo rantré adan onpakèt déba ki initil (1 Tim. 6:4, 5). Yo vé fè-nou kwè adan sé mansonj-la yo ka simé la é yo vé fè-nou pèd konfyans adan frè é sè an nou.

16. Ka ki té’é pé fè-nou oubliyé sa ki pli enpòwtan an vi an nou ?

¹⁶ Fò pa ou lésé ayen distrè-w. Konm Timoté té on « bon sòlda a Kris Jézi », fò i té rété konsantré anlè ministè a-y. Fò pa i té lésé ayen distrè-y. Fò pa i té chèché a vin on gwotchak adan sistèm-lasa é fò pa i té kouri dèyè byen matéryèl nonplis (2 Tim. 2:3, 4). Nou nonplis, fò pa nou kouri dèyè byen matéryèl pas sa pé pran plas a sa ki pi enpòwtan an vi an nou. Fò pa nou oubliyé kè ‘larichès ni on pouvwa’. É si nou lésé-y pran lanmen asi nou, nou pé’é enmé Jéova kon avan, nou pé’é ni rèkonésans pou Pawòl a-y é nou pé’é anvi préché ankò (Mat. 13:22). Fò nou kontinyé menné on vi ki senp, é fò-nou itilizé tout tan an nou é tout énèwji an nou pou nou kontinyé « chèché Wayòm-la [...] an prèmyé » (Mat. 6:22-25, 33).

17-18. Ka nou pé fè pou nou rété bon bon zanmi èvè Jéova ?

¹⁷ Fò pa ou ka dòmi. Sé dépi avan pou on sòlda réfléchi pou i vwè kijan i ké réyaji siwvwè ni on danjé. Si nou vé pwotéjé sé trézò-la Jéova ban-nou la, fò pa nou dòmi si nou vwè on danjé ka vin. Ka ki pé édé-nou ? Ében, fò-nou kalkilé zafè an nou byen lontan alavans.

¹⁸ An-nou pran on ègzanp : avan on aviyon dékolé, sé otès-la ka mandé sé pasajé-la gadé byen ola sé pòt-la yé. Poukwa ? Sé pou yo pé sa chapé kò a yo vit si janmen ni on danjé. Menmjan-la, avan nou ay asi Entèwnèt, oben avan nou gadé on fim oben on émisyon an télé-la, fò-nou réfléchi alavans pou nou vwè ka nou ké fè si nou tonbé asi on biten ki pa pwòp, asi on biten ki plen vyolans adan-y oben asi on mansonj a sé apòsta-la. Si nou vwè danjé-la ka vin olwen, nou pé’é pèd tan pou nou réyaji. Konsa, nou pé’é sali lèspri an nou, é nou ké rété bon bon zanmi èvè Jéova (Sòm 101:3 ; 1 Tim. 4:12).

19. Si nou ka pwotéjé sé trézò-la Jéova ban-nou la, ki byenfé sa ké pwokiré-nou ?

¹⁹ Jéova ban-nou sé vérité biblik la é i ka pèwmèt-nou anségné lézòt. Sa, sé 2 bèl trézò toubònman ! Si nou ka pwotéjé-yo, nou ké pwokiré-nou onpakèt byenfé. Pa ègzanp, nou ké ni on konsyans ki nèt, vi an nou ké ni on sans, é nou ké kontan pas nou ké fè dòt moun konnèt Jéova. Wi, grasa Jéova, nou ké rivé pran swen a sé bèl trézò-la i ban-nou la (1 Tim. 6:12, 19).