ARTIK POU ÉTIDYÉ 40
« Tchenbé sa yé bay to-a »
« Timoté, tchenbé sa yé bay to-a » (1 TIM. 6:20).
KANTIK 29 Nous voulons être dignes de notre nom
KOUTWÉY ASOU SA NOU KÉ WÈ *
1-2. Dapré 1 Timothée 6:20, ki bagaj ki té gen bokou valò yé té bay Timoté tchenbé ?
NOU souvan ka bay ròt moun tchenbé bagaj ki gen bokou valò pou nou. Parèkzanp, pitèt nou mété nou soumaké labank. Lò nou ka fè sa, nou ka èspéré yé ké byen tchenbé nou soumaké, yé pa ké pédi l’, ouben pyès moun pa ké vòlò l’. Atò, nou ka konprann sa sa lé di bay roun moun tchenbé roun bagaj ki gen valò pou nou.
2 (Li 1 Timothée 6:20.) Apot Pòl fè Timoté sonjé ki yé té bay li tchenbé roun bagaj ki té gen bokou valò : i té konnèt lavérité asou sa Bondjé prévwè pou moun-yan. Yé té bay Timoté rounòt bagaj ankò ki té gen valò : lònò di ‘préché paròl-a’ ké ‘fè sa roun évanjélizatèr divèt fè’ (2 Tim. 4:2, 5). Pòl di li byen tchenbé sa yé té bay li-a. Jéova bay nou osi plizyèr bagaj ki gen bokou valò. Ki bagaj ? É poukisa nou divèt byen tchenbé sa trézòr-a ?
YÉ BAY TO TCHENBÉ PLIZYÈR VÉRITÉ KI GEN BOKOU VALÒ
3-4. Poukisa vérité-ya nou ka jwenn annan Labib-a gen bokou valò ?
3 Paské i kontan nou, Jéova ka fè nou konnèt vérité-ya ki annan so Paròl. Sa vérité-ya gen bokou valò paské yé ka idé nou savé kouman pou nou divini so zanmi é kouman pou nou vréman gen tchò kontan. Lò nou ka krè annan sa vérité-ya é nou ka viv dapré sa nou anprann, sa ka libéré nou di roun patché manti é sa ka pèrmèt nou gen roun lavi pròp (1 Cor. 6:9-11).
4 I gen rounòt bagaj ki ka fè ki sa vérité-ya gen bokou valò : a sèlman roun ran moun Jéova ka bay sa vérité-ya, ‘tout sa yé tchò paré pou asèpté lavérité’ (Actes 13:48). Sa moun-yan ki ka fè yé kò toupiti ka rékonnèt ki Jéova ka sèrvi èsklav fidèl ké avizé-a pou fè nou konnèt sa vérité-ya (Mat. 11:25 ; 24:45). Lò nou ka konprann sa vérité-ya, nou pouvé di ki a pi bèl bagaj nou pouvé gen ; mé nou pa pouvé rivé konprann yé nou rounso (Prov. 3:13, 15).
5. Ki ròt bagaj ki gen bokou valò Jéova bay nou tchenbé ?
5 Jéova bay nou roun gran lònò osi : fè moun-yan konnèt lavérité asou li ké sa i prévwè pou nou (Mat. 24:14). I pa gen pyès bagaj ki gen plis valò pasé sa mésaj-a. Poukisa ? Paské si moun-yan ka asèpté sa mésaj-a, yé ké pouvé vini annan fanmi Jéova épi gen lavi pou tout-tan (1 Tim. 4:16). Ki nou pouvé fè bokou ouben roun tibi sèlman annan prédikasyon-an, nou ka soutni travay pi enpòrtan i pouvé gen (1 Tim. 2:3, 4). Travay ansanm ké Jéova, men roun bèl lònò nou gen ! (1 Cor. 3:9).
BYEN TCHENBÉ SA YÉ BAY TO-A
Toupannan roun ran té ka lésé lavérité-a, Timoté li menm kontinyé tchenbé l’ rèd (gadé paragraf 6).
6. Kisa ki rivé roun ran wonm ki pa kontinyé kontan lònò yé té gen travay ansanm ké Bondjé, kou Timoté ?
6 Annan lépòk Timoté, a pa tout wonm ki kontinyé kontan lònò yé té gen travay ansanm ké Bondjé. Démas koumansé kontan monn-an, é i lésé lònò i té gen sèrvi Bondjé ansanm ké Pòl (2 Tim. 4:10). Fijèl ké Èrmojèn lésé travay prédikasyon-an, pitèt paské yé té pè yé té pèrsékité yé, menm fason yé té pèrsékité Pòl (2 Tim. 1:15). Iméné, Alèksann ké Filèt divini apòsta é yé arété adoré Jéova (1 Tim. 1:19, 20 ; 2 Tim. 2:16-18). Dapré sa nou ka wè, tout sa wonm-yan té pròch ké Jéova anvan, mé yé arété pansé ki sa yé té bay yé-a té gen valò.
7. Kisa Satan ka fè pou nou anvi lésé tout trézòr Jéova bay nou tchenbé ?
7 Kisa Satan ka fè pou nou anvi lésé tout trézòr Jéova bay nou tchenbé ? Annou wè sa i ka sèrvi. I ka sèrvi latélé, fim, Entèrnèt, journal ké liv pou fè nou réfléchi ouben aji roun fason ki ké fè nou arété kontan Jéova ouben arété obéyi so lalwa piti piti. I ka chaché fè nou pè ké sa moun-yan ka di asou nou ouben ké pèrsékisyon-an, tousa pou fè nou arété préché. É i ka chaché fè nou kouté sa apòsta-ya ka di, « sa yé ka aplé swadizan “konésans” », pou fè nou lésé lavérité (1 Tim. 6:20, 21).
8. Kisa sa ki rivé Danyèl ka anprann to ?
8 Si nou pa panga, nou ka riské piti piti pédi nou lanmou pou lavérité. Annou wè sa ki rivé Danyèl *, roun frè ki té kontan jwé jévidéyo. I ka di : « Mo koumansé jwé jévidéyo lò mo té gen apéprè 10 an. Lò mo koumansé, i pa té gen anyen ki té mové annan sa mo té ka jwé. Mé apré, sa mo té ka jwé té gen patché vyolans ké lamaji annan. » Finalman, Danyèl té ka pasé 15 lèr ka jwé jévidéyo chak jou. I ka di : « Annan mo tchò, mo té savé ki sa mo té ka jwé épi tan mo té ka pasé annan sa, té ka fè mo pédi mo lanmityé ké Jéova piti piti. Mé mo tchò té vin rèd tèlman ki mo té ka di ki sa Labib-a té ka di a pa té pou mo. » Si roun krétyen ka lésé vyé anmizman aji asou li, i ka riské pédi so lanmou pou lavérité san i pa menm randé so kò kont. Si roun bagaj konsa ka rivé nou, nou pouvé pédi tout bèl bagaj Jéova bay nou tchenbé.
KOUMAN NOU POUVÉ BYEN TCHENBÉ LAVÉRITÉ-A
9. Annan 1 Timothée 1:18, 19, kisa Pòl ankourajé Timoté fè ?
9 (Li 1 Timothée 1:18, 19.) Pòl konparé Timoté ké roun sòlda é i di li ‘kontinyé bèl konba-a’ (1 Tim. 1:18, 19). Pòl pa té ka palé di roun vré lagèr ké vré sòlda. Kouman krétyen-yan pouvé briga annan yé lavi kou sòlda annan roun lagèr ? Ki kalité sòlda Jézi Kris divèt kontinyé chaché gen ? Annou wè senk bagaj nou ka anprann ké èkzanp Pòl pran. Sa ké idé nou byen tchenbé lavérité-a.
10. Poukisa nou lanmou pou Bondjé divèt fò ?
10 Fè to lanmou pou Bondjé divini pi fò. Roun bon sòlda, a roun sòlda ki fidèl : i ka briga ké tout so fòrs pou protéjé roun moun ouben roun bagaj i kontan. Pòl ankourajé Timoté fè so lanmou pou Bondjé divini pi fò (1 Tim. 4:7). Pi nou lanmou pou Bondjé ké fò, pi nou ké pi désidé byen tchenbé lavérité-a (1 Tim. 4:8-10 ; 6:6).
Lò nou fini travay, é lajournen-an té rèd, pitèt nou divèt fòrsé nou kò roun tibi pou alé lasal. Mé nou toujou ka jwenn patché bénédiksyon ! (gadé paragraf 11).
11. Poukisa nou divèt fòrsé nou kò fè sa ki byen ?
11 Fòrsé to kò fè sa ki byen. Roun sòlda divèt kontinyé travay rèd, konsa i ké toujou paré pou briga. Timoté rivé briga pou Satan pa pran pyès pyé asou li paské i fè sa Pòl té di li : i briga ké tout so fòrs ké mové anvi i té pouvé gen, i kontinyé chaché gen bèl kalité, é i pasé tan ké so frè ké sò-ya (2 Tim. 2:22). Pou i té rivé fè sa, i té divèt fòrsé so kò fè sa ki byen. Menm fason-an, pou nou rivé ganyen asou mové anvi nou gen, a pou nou fòrsé nou kò fè sa ki byen (Rom. 7:21-25). A pou nou fòrsé nou kò osi pou nou kontinyé abiyé ké nouvo pèrsonalité-a é pou nou tiré vyé pèrsonalité-a (Éph. 4:22, 24). Épi lò lajournen-an té rèd é nou byen las, détan nou divèt fòrsé nou kò roun tibi pou alé lasal (Héb. 10:24, 25).
12. Kouman nou pouvé anprann sèrvi Paròl Bondjé-a pi byen ?
12 Roun sòlda divèt antréné so kò pou i rivé byen sèrvi so zarm. É pou i divini vayan, a pou i fè l’ souvan. Menm fason-an, nou divèt antréné nou kò pou nou byen sèrvi Paròl Bondjé-a (2 Tim. 2:15). Annan nou réinyon, nou ka rousouvwè roun bon fòrmasyon pou sa. Mé si nou lé rivé fè moun-yan konprann kouman lavérité ki annan Labib-a gen valò, a pou nou abitchwé étidyé nou rounso. Nou divèt sèrvi Labib-a pou fè nou lafwa divini pi fò. Mé a pa loutou di li l’. Pou nou rivé byen konprann sa roun vèrsé ka di é pou nou rivé byen èspliké l’, a pou nou pran tan réfléchi asou l’ é fè réchèrch annan nou piblikasyon (1 Tim. 4:13-15). A konsa nou ké rivé byen sèrvi Paròl Bondjé-a pou ansényé ròt moun-yan. Sa kou-a ankò, li Labib-a pou yé pa ké asé. Si nou ka pran roun vèrsé lò nou ka palé ké roun moun, a pou nou idé moun-an konprann li é wè kouman sa vèrsé-a pouvé itil pou li annan so lavi. Si nou ka kontinyé étidyé Labib-a, nou ké anprann sèrvi Paròl Bondjé-a pi byen pou ansényé moun-yan (2 Tim. 3:16, 17).
13. Dapré Hébreux 5:14, poukisa nou divèt fè diférans ant sa ki bon ké sa ki mové ?
13 A pou to fè diférans ant sa ki bon ké sa ki mové. Roun sòlda divèt wè danjé-a anvan i rivé pou i pa tonbé annan l’. Menm fason-an, nou divèt anprann wè sitiasyon-yan ki pouvé sa roun danjé pou nou é fè sa nou pouvé pou nou pa tonbé annan (Prov. 22:3 ; li Hébreux 5:14). Parèkzanp, a pou nou byen gadé ké kisa nou ka anmizé, é kisa nou ka gadé ouben kouté. Souvan, a bagaj malpròp Bondjé pa kontan yé ka montré nou latélé. Mé nou byen savé ki Jéova rayi péché sèksyèl-ya, é ki yé toujou ka mennen mové bagaj. A pou sa nou pa lé sa kalité anmizman-yan ki ka gaté piti piti nou lanmou pou Bondjé (Éph. 5:5, 6).
14. Kouman Danyèl montré i té ka fè diférans ant sa ki bon ké sa ki mové ?
14 Nou té ka palé di Danyèl titalò. Finalman, i konprann ki jévidéyo i té ka jwé-a ké patché vyolans ké lamaji, té danjéré pou li. I chaché asou Watchtower Library sa ki té pouvé idé li. A konsa, i arété jwé sa kalité jévidéyo-ya. I fronmen tout abònman i té gen pou jwé asou Entèrnèt é i bloké tout moun i té ka jwé ké yé asou Entèrnèt. I ka di : « Pasé mo rété jwé jévidéyo, mo koumansé fè ròt bagaj pou anmizé dèrò é pasé tan ké frè ké sò annan mo asanblé. » Jòdla, Danyèl pyonyé ké ansyen annan so asanblé.
15. Poukisa sa apòsta-ya ka di danjéré ?
15 Kou Timoté, nou divèt anprann wè rounòt danjé : manti apòsta-ya ka di (1 Tim. 4:1, 7 ; 2 Tim. 2:16). Apòsta-ya pouvé manti asou nou frè ouben di bagaj pou nou pa fè òrganizasyon Jéova-a konfyans ankò. Sa manti-ya pouvé fè nou lafwa fébli. Nou pa divèt krè manti apòsta-ya ka di paské a dé ‘moun yé bloublou, é ki pa konnèt lavérité-a’. Yé ka chaché lévé ‘dézòrd ké kozé initil’ (1 Tim. 6:4, 5). Yé lé nou krè manti yé ka di é fè nou arété fè nou frè konfyans.
16. Kisa ki pouvé anpéché nou chaché sa ki pi enpòrtan-an ?
16 Kontinyé chaché sa ki pi enpòrtan-an. « Kou roun bon sòlda Jézi Kris », Timoté té divèt kontinyé mété tout so fòrs annan travay prédikasyon-an. I pa té divèt lésé anvi gen roun bon travay ouben gen roun patché bagaj anpéché li chaché sa ki pi enpòrtan-an (2 Tim. 2:3, 4). Nou menm osi, nou pa divèt lésé anvi gen roun patché bagaj anpéché nou chaché sa ki pi enpòrtan-an. Si nou ka lésé zafè ranmasé soumaké bloublou nou, nou pouvé pédi nou lanmou pou Jéova, nou rékonésans pou so Paròl, é pitèt nou pa ké anvi palé bay ròt moun-yan di lavérité-a ankò (Mat. 13:22). Nou pa divèt chaché gran bagaj annan nou lavi, é nou divèt sèrvi tout nou tan ké nou fòrs pou ‘kontinyé chaché Rwayonm-an an prémyé’ (Mat. 6:22-25, 33).
17-18. Kisa nou pouvé fè pou protéjé nou lanmityé ké Jéova ?
17 A pou to paré réyaji vit. Roun sòlda divèt réfléchi anvan pou savé kisa i ké fè si i gen roun danjé. Si nou lé protéjé tout bèl bagaj Jéova bay nou, nou divèt réyaji vit si i gen roun danjé. Kisa ki pouvé idé nou ? Sa enpòrtan pou nou désidé anvan kisa nou divèt fè.
18 Anvan roun avyon dékolé, otès-ya ka doumandé tout moun gadé ki koté yé ké pouvé soti si janmen i gen roun problèm. Poukisa ? Pou yé pouvé soti annan avyon-an vitman si i gen roun problèm. Menm fason-an, anvan nou alé asou Entèrnèt, ouben anvan nou alé gadé roun fim ouben roun émisyon, nou divèt réfléchi asou sa nou ké fè si, toupannan nou ka gadé nou ka wè moun ka fè bagaj malpròp, ouben roun bagaj vyolan toubonnman, ouben si nou ka tonbé asou manti apòsta ka di. Si nou ka réfléchi anvan pou savé ki koté danjé-a fika, nou ké réyaji vit. Atò, nou ké protéjé nou lanmityé ké Jéova é nou ké rété pròp douvan li (Ps. 101:3 ; 1 Tim. 4:12).
19. Si nou ka protéjé tout bèl bagaj Jéova bay nou tchenbé, ki bénédiksyon nou ké gen ?
19 Jéova bay nou tchenbé plizyèr bagaj enpòrtan. Nou konnèt lavérité é nou pouvé anprann moun-yan lavérité asou li. Si nou ka protéjé sa bèl bagaj i bay nou, nou ké gen patché bénédiksyon : roun bon konsyans, roun lavi ki gen roun sans, é nou ké kontan idé ròt moun konnèt Jéova. Gras a Jéova, nou ké rivé byen tchenbé tousa i bay nou (1 Tim. 6:12, 19).
KANTIK 127 Quel genre de personne je dois être !
