1, 2. Heʼiháicha 1 Timoteo 6:20-pe, ¿mbaʼépa oñenkarga vaʼekue Timotéope?

ÑANDE ningo pyʼỹinte jaheja ótro kárgope umi mbaʼe ivaliósova ñandéve g̃uarã. Por ehémplo ikatu ñamoĩ ñande pláta vánkope. Upéicha jave ñande ñahaʼarõ ojasegura ñandéve ñande pláta ani hag̃ua oñemonda ni okañy. Upéicharõ ñande ñantende mbaʼépa heʼise jaheja peteĩ persóna kárgope umi mbaʼe ñamombaʼéva.

² (Elee 1 Timoteo 6:20). Apóstol Pablo omomanduʼa vaʼekue Timotéope ojeheja hague ikárgope peteĩ mbaʼe ivaliósova: Haʼe oikuaa porã vaʼekue mbaʼépa Ñandejára rembipota yvyporakuérape g̃uarã. Timotéope oñenkarga avei pe priviléhio ‘opredika hag̃ua Ñandejára ñeʼẽ’ ha ‘osegi hag̃ua opredika umi notísia porã’ (2 Tim. 4:2, 5). Pablo omokyreʼỹ Timotéope oñangareko hag̃ua upe ojeheja vaʼekuére ikárgope. Timotéoicha avei, ojeheja vaʼekue ñande kárgope umi mbaʼe ivaliósova. ¿Mbaʼépa hína umíva? ¿Ha mbaʼérepa ñañangareko porã vaʼerã pe tesóro Jehová omeʼẽ vaʼekuére ñandéve?

3, 4. ¿Mbaʼérepa ikatu jaʼe umi enseñánsa oĩva la Bíbliape ivaliosoitereiha?

³ Jehová ningo imbaʼeporãitereígui oikuaauka porã ñandéve umi enseñánsa porãite oĩva Iñeʼẽ la Bíbliape. Koʼã enseñánsa ningo ivaliosoiterei, pórke ñanemboʼe mbaʼéichapa ikatu jareko peteĩ amista iporãva Jehovándi, ha oikuaauka ñandéve mbaʼéichapa añetehápe ikatu jaiko vyʼápe. Ñande jagueroviávo umi enseñánsa ha jaiko umíva heʼiháicha, nañanembotavyvéima umi japu oñemboʼéva ha ikatúma ñanderekopotĩ (1 Cor. 6:9-11).

 ⁴ ¿Mbaʼérepa avei ikatu jaʼe umi enseñánsa oĩva la Bíbliape ivaliosoitereiha? Pórke Jehová oikuaauka umíva umi iñumíldeva ha ‘ipyʼaporãvape’ añoite (Hech. 13:48). Umi iñumíldeva oguerovia Jehová ojevaleha ‘pe esklávo de konfiánsa ha iñarandúvare’, ñanemboʼe hag̃ua ko tiémpope umi enseñánsa oĩva la Bíbliape (Mat. 11:25; 24:45). Ñande ningo ndaikatúi ñantende la Biblia ñandejehegui reínte, ha ndaipóri hína ótra kósa iporãvéva koʼã enseñánsagui (Prov. 3:13, 15).

5. ¿Mbaʼe priviléhiopa Jehová omeʼẽ avei ñandéve?

⁵ Jehová omeʼẽ avei ñandéve pe priviléhio ñamboʼévo ótrope mávapa añetehápe haʼe ha mbaʼépa ivolunta (Mat. 24:14). Umi notísia porã jaikuaaukáva ningo ivaliosoiterei, pórke oipytyvõ umi héntepe oĩ hag̃ua Jehová famíliape, ha omeʼẽ chupekuéra oportunida oikove hag̃ua pára siémpre (1 Tim. 4:16). Oiméramo japredika heta térã saʼi, lomímonte ñaipytyvõ hína pe traváho iñimportantevéva ojejapóvape hína ko tiémpope (1 Tim. 2:3, 4). ¡Ajépa tuichaite priviléhio jaiko Ñandejára ajudánteramo! (1 Cor. 3:9).

6. ¿Mbaʼépa oiko vaʼekue umi nomombaʼevéi vaʼekuére pe priviléhio orekóva oikóvo Ñandejára ajudánteramo?

⁶ Timoteo tiémpope oĩ vaʼekue umi kristiáno nomombaʼéiva pe priviléhio orekóva oikóvo Ñandejára ajudánteramo. Por ehémplo, Demas oheja vaʼekue pe priviléhio oservívo apóstol Pablo ndive (2 Tim. 4:10). Amalisia Figelo ha Hermógenes ndopredikavéi vaʼekue okyhyje rupi ojepersegírõ g̃uarã chupekuéra apóstol Pábloicha (2 Tim. 1:15). Himeneo, Alejandro ha Filétogui oiko vaʼekue apóstata ha oheja Jehovápe (1 Tim. 1:19, 20; 2 Tim. 2:16-18). Amalisia koʼã kuimbaʼe peteĩ tiémpore ijerovia mbarete vaʼekue, péro upéi haʼekuéra nomombaʼevéi umi mbaʼe Jehová oheja vaʼekue ikargopekuéra.

7. ¿Mbaʼe mbaʼépa Satanás ojapo ñanemoñuhã hag̃ua?

⁷ ¿Mbaʼépa Satanás ojapo anivéma hag̃ua ñamombaʼe umi tesóro Jehová onkarga vaʼekue ñandéve? Jahechami mbaʼépa haʼe ojapo upearã. Por ehémplo, haʼe ojevale téle, pelíkula ha Internet umívare, ha péicha mbeguekatúpe ñapensa ha jajapo hag̃ua umi mbaʼe ñanemomombyrýtava Jehovágui, ha anivéma hag̃ua ñaneñeʼẽrendu chupe. Haʼe oipota jakyhyje umi hénte opensátavagui ñanderehe ha avei pe persekusióngui, ha péicha anivéma hag̃ua japredika. Haʼe oipota jaheja pe añetegua, ha upearã oñehaʼã ñanemoñuhã ñahendu hag̃ua ‘umi hénte oimoʼãvape iñaranduha’, térã umi apóstatape (1 Tim. 6:20, 21).

8. ¿Mbaʼépa ñaaprende ermáno Daniel rembiasakuégui?

⁸ Nañañatendéiramo ikatu mbeguekatúpe jaheja pe añetegua. Jahechami Daniel * rembiasakue, haʼe itavyete vaʼekue umi videohuégore.  Haʼe heʼi: “Che añepyrũ vaʼekue ahuga videohuégo arekórõ guare 10 áñorupi. Ñepyrũrã ahuga vaʼekue umi videohuégo ndaivaiguasúiva. Péro mbeguekatúpe añepyrũma ahuga umi huégo iviolénto ha isatánikova”. Tiémpo rire, haʼe ohugáma oikóvo 15 órarupi al día umi videohuégo. Daniel heʼi: “Ajepyʼamongetáramo, aikuaa kuri umi videohuégo ahugáva ha mboy tiémpopa ahuga aikóvo, chemomombyryha hína kuri Jehovágui. Péro añekonvense chejupe umi mbaʼe ajapóva noĩriha la Biblia heʼíva kóntrape”. Upévare nañañatendéiramo umi mbaʼe jajapóvare jajediverti hag̃ua, ikatu hína pyaʼeterei ohejaka ñandéve pe añetegua. Upéva oikóramo ñanderehe, ikatu hína nañamombaʼevéi umi mbaʼe Jehová onkarga vaʼekue ñandéve.

9. Heʼiháicha 1 Timoteo 1:18, 19, ¿mávarepa apóstol Pablo okompara Timotéope?

⁹ (Elee 1 Timoteo 1:18, 19). Pablo okompara vaʼekue Timotéope peteĩ soldádore, ha omokyreʼỹ chupe osegi hag̃ua ‘oñorairõ ikatu hag̃uáicha ohupyty umi mbaʼe porã’. Péro koʼápe Pablo noñeʼẽi vaʼekue peteĩ gérra ojejapóvare yvyporakuéra kóntrape. ¿Mbaʼérepa ikatu jaʼe kristianokuéra ojoguaha umi soldádo oĩvape hína gerrahápe? ¿Mbaʼe kualidápa tekotevẽ jareko ñande haʼe rupi Cristo soldádo? Jahechami 5 mbaʼe ikatúva ñaaprende Pablo ehémplogui. Koʼã mbaʼe ñanepytyvõta ñañakarama hatã hag̃ua pe añeteguáre.

10. ¿Mbaʼépa heʼise jaadora Ñandejárape ñande pyʼaite guive, ha mbaʼérepa tekotevẽ jajapo upéva?

¹⁰ Jaadora Ñandejárape ñande pyʼaite guive. Peteĩ soldádo ivaléva ningo ifiél. Haʼe oñorairõ mbaretéta oprotehe hag̃ua peteĩ ohayhúvape, térã peteĩ mbaʼe ivaliósova chupe g̃uarã. Pablo omokyreʼỹ vaʼekue Timotéope oadora hag̃ua Jehovápe ipyʼaite guive, upéva heʼise ifiél ha ohayhu vaʼerãha Ñandejárape ikorasõite guive (1 Tim. 4:7). Amáske jahayhu Ñandejárape ha jaadora chupe ñande pyʼaite guive, ñañakarama hatãsevétantema pe añeteguáre (1 Tim. 4:8-10; 6:6).

11. ¿Mbaʼérepa tekotevẽ ñañehaʼãmbaite jajapo hag̃ua iporãva?

¹¹ Ñañehaʼãmbaite jajapo hag̃ua iporãva. Peteĩ soldádo oñentrena vaʼerã ikatu hag̃uáicha siémpre oĩ preparádo oñorairõ hag̃ua. Timoteo ikatu vaʼekue oñorairõ Satanás kóntrape, pórke osegi vaʼekue Pablo konsého ha oñorairõ mbarete umi deséo vai kóntrape, oñehaʼã oreko umi kualida porã ha ohasa tiémpo ermanokuéra kongregasionpeguándi (2 Tim. 2:22). Upearã haʼe oñehaʼãmbaite vaʼerã kuri. Ñande avei tekotevẽ ñañehaʼãmbaite ñagana hag̃ua pe gérra jarekóva umi ñande deséo vai kóntrape (Rom. 7:21-25). Avei tekotevẽ ñañehaʼãmbaite jasegi hag̃ua jaipeʼa ñandejehegui ñane kondúkta yma guare, ha ñamonde peteĩ aóicha pe kondúkta pyahu (Efes. 4:22, 24). Ha ñanekaneʼõitereíramo ñambaʼapo rire un día pytã, tekotevẽtamante jajeovliga jaha hag̃ua rreunionhápe (Heb. 10:24, 25).

12. ¿Mbaʼépa ikatu jajapo jaipurukuaave hag̃ua la Biblia?

¹² Peteĩ soldádo ningo tekotevẽ oñentrena oipurukuaa hag̃ua umi árma orekóva, ha pyʼỹinte ojapo vaʼerã upéva ikatu hag̃uáicha ivakeáno. Upéicha avei ñande tekotevẽ ñanevakeáno jaipurúvo Ñandejára Ñeʼẽ (2 Tim. 2:15). Upéva ikatu ñaaprende jajapo hag̃ua ñane rreunionhápe. Péro ñaipytyvõséramo ótrope oguerovia hag̃ua avei ivaliosoha umi mbaʼe omboʼéva la Biblia, jastudia meme vaʼerã Ñandejára Ñeʼẽ. Jaipurúmante vaʼerã la Biblia ñamombarete hag̃ua ñande jerovia, ha upéva ndeʼiséi jaleénte vaʼerãha. Upearã tekotevẽta jajepyʼamongeta upe jaleévare ha jaheka informasión ñane puvlikasionkuérape, ikatu hag̃uáicha ñantende porã ha jaexplikakuaa la Biblia heʼíva (1 Tim.  4:13-15). Upéi ikatútama jaipuru Ñandejára Ñeʼẽ ñamboʼe hag̃ua ótrope. Upéva heʼise avei ndahaʼemoʼãiha jaleétanteva chupekuéra peteĩ téxto. Ñaipytyvõse umi ñanerendúvape ontende hag̃ua pe versíkulo, ha ohecha hag̃ua mbaʼéichapa ojapokuaa upépe heʼíva. Upéicharõ, ñande jastudia meméramo la Biblia, ikatúta ñanevakeanove jaipurúvo Ñandejára Ñeʼẽ ñamboʼe hag̃ua ótrope (2 Tim. 3:16, 17).

13. Heʼiháicha Hebreos 5:14, ¿mbaʼérepa tekotevẽ jaipuru ñane akã?

¹³ Jaipurúkena ñane akã. Peteĩ soldádo ohechakuaa vaʼerã moõpa ikatu oĩ hína la pelígro ha ojei chugui. Ñande avei tekotevẽ ñaaprende jahechakuaa hag̃ua umi situasión ikatúva ipeligróso ñandéve g̃uarã ha jajei chugui (Prov. 22:3; elee Hebreos 5:14). Upévare tekotevẽ ñanearandu ha jaiporavo porã mbaʼépa jajapóta jajediverti hag̃ua. Télepe ha umi pelíkulape pyʼỹinte ojehechauka umi hekovaíva, upeichagua kondúkta ningo ombopochy Ñandejárape ha katuete oporoperhudikáta. Upéicha rupi ñande ñamboykete umichagua diversión, ikatu rupi mbeguekatúpe ñanemomombyry Ñandejáragui ha ndajahayhuvéi chupe (Efes. 5:5, 6).

14. ¿Mbaʼéichapa Daniélpe oipytyvõ oipuru haguére iñakã?

¹⁴ Daniel, pe ermáno ñañeʼẽma hague, oñepyrũ vaʼekue oipuru iñakã ha ohechakuaa mbaʼépa la iprovléma: Umi videohuégo iviolénto ha satániko ohugáva jepi. Haʼe oheka informasión Watchtower Library-pe oipytyvõtava chupe upe provlémape. ¿Oipytyvõpa chupe upéva? Daniel ohejaite umi videohuégo ivaíva. Haʼe okansela umi suskripsión oreko vaʼekue Internétpe ohuga hag̃ua umi videohuégo, ha noñehuntavéi umi ohuga vaʼekuéndi oikóvo Internétpe. Daniel heʼi: “Ahuga rangue umi videohuégo, añepyrũ ahasa tiémpo ajapóvo heta mbaʼe okápe, ha ajeheʼa umi che amígo kongregasionpeguáre”. Daniel koʼág̃a oservi hína prekursór ha ansiánoramo.

15. ¿Mbaʼérepa ipeligróso umi japu oñemosarambíva?

¹⁵ Timotéoicha avei ñande tekotevẽ jahechakuaa ipeligrosoha umi informasión japu omosarambíva umi apóstata (1 Tim. 4:1, 7; 2 Tim. 2:16). Por ehémplo, haʼekuéra ikatu omosarambi japu ñane ermanokuéra kóntrape, térã jaduda hag̃ua Jehová organisasióngui. Umichagua informasión vai ningo ikatu omokangy ñande jerovia. Ñande ndajahejái vaʼerã ñanembotavy koʼã mbaʼe. ¿Mbaʼérepa? Pórke koʼãichagua informasión omosarambi hína ‘umi iménte kyʼáva ha nontendéiva pe añetegua’. Haʼekuéra ojapo upéicha “oñorairõségui ha  ojodiskutiségui” (1 Tim. 6:4, 5). Haʼekuéra oipota jaguerovia umi japu heʼíva hikuái ha ñañepyrũ ñadeskonfia ñane ermanokuéragui.

16. ¿Mbaʼérepa ñañatende porã vaʼerã?

¹⁶ Ñañatende porãkena. Timoteo haʼe rupi “Cristo Jesús soldádo teete” omotenonde vaʼerã kuri iservísio ojedesvia rangue pláta térã ótra kósa rapykuéri (2 Tim. 2:3, 4). Timotéoicha avei, ñande ndovaléi jajedesvia ha jaiko pláta rapykuéri. ‘Umi rrikésa tuicha oporombotavy’ ha ikatu voi jaju ndajahayhuvéi Jehovápe, nañamombaʼevéi Ñandejára Ñeʼẽ, ha nañamombeʼusevéi ótrope umi mbaʼe heʼíva upépe (Mat. 13:22). Ñande jasegi vaʼerã jaiko sensillomínte, ha jaipuru ñane tiémpo ha mbaretekue ñamotenonde meme hag̃ua Ñandejára Rréino (Mat. 6:22-25, 33).

17, 18. ¿Mbaʼépa ikatu jajapo japrotehe hag̃ua ñane amista Jehovándi?

¹⁷ Jajepreparákena pyaʼe jajeprotehe hag̃ua. Peteĩ soldádo okalkuláma vaʼerã voi mbaʼépa ojapóta ojeprotehe hag̃ua. Ñande japroteheséramo umi mbaʼe Jehová onkarga vaʼekue ñandéve, pyaʼe jajapo vaʼerã álgo jahecháramo peteĩ pelígro. ¿Mbaʼépa ñanepytyvõta upearã? Ñande jakalkuláma vaʼerã voi mbaʼépa jajapóta jahecha mbaʼéramo peteĩ pelígro.

¹⁸ Ikatu ñamoĩ peteĩ ehémplo. Ojeho jave peteĩ lugár hetahápe hénte, oñepyrũ mboyve pe prográma ojeʼe jepi chupekuéra ohecha hag̃ua moõpa opyta pe salída de emerhénsia hiʼag̃uivéva. ¿Mbaʼérepa? Ikatu hag̃uáicha pyaʼe porã osẽmba hikuái oikóramo algúna emerhénsia. Upéicha avei ñande ikatúma hína jajeprepara, ha jahecháma “pe salída de emerhénsia” jaipuru jave Internet, térã jahecha jave pelíkula térã téle, peichahágui osẽramo g̃uarã ñandéve derrepentete peteĩ mbaʼe itieʼỹ térã ivioléntova, térã peteĩ informasión omosarambíva umi apóstata. Ñande jajepreparáramo ñambohovái hag̃ua umi mbaʼe ikatúva oiko, pyaʼe voi japrotehéta ñane amista Jehovándi ha jasegíta ñaime porã henondépe (Sal. 101:3; 1 Tim. 4:12).

19. ¿Mbaʼe vendisiónpa jahupytýta ñañangarekóramo umi mbaʼe Jehová onkarga vaʼekuére ñandéve?

¹⁹ Ñande ningo ñañangareko vaʼerã umi mbaʼe ivaliosoitéva Jehová omeʼẽ vaʼekuére ñandéve: Umíva hína umi enseñánsa porãite oĩva la Bíbliape, ha pe priviléhio jarekóva ñamboʼévo umíva ñande rapichakuérape. Jajapóramo upéicha ñanekonsiénsia potĩta, ñande rekove isentídota, ha javyʼáta ñaipytyvõ haguére ótrope oikuaa hag̃ua Jehovápe. Haʼe ñanepytyvõ rupi, ikatúta ñañangareko umi mbaʼe oñenkarga vaʼekuére ñandéve (1 Tim. 6:12, 19).