1, 2. 1 Timoteo 6:20 tä niere erere, ¿dre ribebare Timoteo ie?

JONDRON ütiäte tä ni itikwe ngwane, ruäre ngwane tä bien ni madai ngübakäre jakrä. Ñodre, ni iti raba ngwian kwe kite bancote ne kwe ñan riadrete kän o goidre kän yekäre. Aisete, ñobätä jondron ütiäte nikwe ye nita bien ni madai ngübakäre jakrä nüke gare kwin nie.

² (Ñäkädre 1 Timoteo 6:20 yebätä). Timoteo ye nämäne jondron bökäne ütiäte kukwe ja üairebiti ye Pablokwe ngwaninta törö ie. Kukwe ütiäte kena ye abokän Ngöbö töita ño ni kä tibienbätä kräke ye nämäne gare metre ie. Aune Timoteo ja di ngwandre kukwe kwin driere, sribi ye Jehovakwe mikani kisete arato (2 Tim. 4:2, 5). Jondron ütiäte biani Timoteo ie ye rabadre ngübare jakrä Pablokwe niebare ie. Ye erere jondron ütiäte tä ni kisete arato. ¿Jondron ütiäte ye abokän meden meden? ¿Aune ñobätä nikwe ngübadre jakrä?

3, 4. ¿Ñobätä kukwe metre Ngöböbätä tä Bibliabätä ye ütiäte krubäte?

³ Jehovakwe ja töi mikani kwin nikrä yebätä kukwe metre tä Bibliabätä ye mikani gare kwe nie. ¿Ñobätä kukwe metre ye ütiäte? Ñobätä ñan aune ni raba ja kete ño Jehovabe drieta kwe nie aune ni raba nüne ño kä jutobiti ye mikata gare kwe nie arato. Kukwe metre ye nita kain ngäbiti aune mike täte ngwane, kukwe ngwarbe drieta aune kukwe kämekäme nuainta yebätä nita nemen kwäre (1 Cor. 6:9-11).

⁴ ¿Kukwe medenbätä mada kukwe metre Bibliabätä ye ütiäte? Kukwe metre ye Jehovata driere nitre töi bobre aune töita juto biare ye aibe ie yebätä ütiäte (Hech. 13:48, TNM). Nitre Braibe Konkrekasion Jökrä Ngübabitikä ye Jehovakwe kädekani kukwe metre driekäre nie, ye ni töi bobre tä kain ngäbiti (Mat. 11:25;  24:45, TNM). Kukwe metre ye ñaka raba nüke gare ja di jeñebiti nie. Aune kukwe metre ye rabadre gare nie ngwane, ye bäri ütiäte jondron mada ütiäte yebiti ta (Prov. 3:13, 15).

5. ¿Sribi ütiäte meden mada mikani Ngöbökwe ni kisete?

⁵ Kukwe metre Jehovabätä aune niara töita ño ni kä tibienbätä kräke ye nikwe driedre ni madai ye sribi ütiäte mikani kwe ni kisete arato (Mat. 24:14). ¿Ñobätä kukwe drieta nikwe ye ütiäte krubäte? Ñobätä ñan aune tä nitre dimike rabakäre Jehová mräkätre ye ngätäite aune kukwe metre ye köböire nüna kärekäre ye raba nemen kwetre arato (1 Tim. 4:16). Nita kukwe driere chi o krubäte akwa sribi bäri ütiäte nuainta kä nengwane ye nita nuainne siba (1 Tim. 2:3, 4). Sribidre gwairebe Ngöböbe ye tä kä mike juto nibätä, ¿ñan ererea? (1 Cor. 3:9).

6. ¿Nitre kristiano ruäre ñan ja ngwani mokre yebätä dre namani bare?

⁶ Timoteo näire nitre kristiano ruäre sribidre jankunu Ngöböbe näre akwa ñan mikani ütiäte kwetre jai. Ñodre, Demas jondron kä nebätä ye tarebare bäri aisete sribidre gwairebe kwe Pablobe ye mikani tuin ngwarbe kwe jai (2 Tim. 4:10). Figelo aune Hermógenes kukwe drie ye tuanimetre ñobätä ñan aune ja mikani Pablo rüere ye erere ja mikadre niaratre rüere ye jürä namani bätätre (2 Tim. 1:15). Himeneo, Alejandro aune Fileto nikwitani apóstata yebätä kukwe metre tuanimetre kwetre (1 Tim. 1:19, 20; 2 Tim. 2:16-18). Nitre kädininte ye kä ruäre ngwane nämäne dite kukwe ja üairebiti, akwa biti jatanintre kukwe metre ütiäte ye mike tuin ngwarbe jai.

7. ¿Tukuna meden meden Satana tä kainkä ni rüere?

⁷ ¿Tukuna meden meden Satana tä mike ni jiete ne kwe kukwe metre ütiäte Jehovakwe biani nie ye nikwe ñaka ngübadre jankunu? Ñodre, tä videojuego, televisión aune película yebiti kukwe mike gare nitre töi mikakäre kukwe blo jiebiti, ja ngwen käme aune töbike jene ne kwe rabadre kukwe metre ye tuenmetre. Nitre tä ja mike ni rüere aune tö ni tuai ja ngwen niaratre erere yebiti tä kä jürä mike nibätä ne kwe nikwe ñaka kukwe driedre. Aune tä ni töi mike nitre apóstata tä kukwe driere ye kukwe nuin ne kwe nikwe kukwe metre tuanemetre (1 Tim. 6:20, 21).

8. ¿Kukwe nakaninkä Danielbätä ye tä dre driere nie?

⁸ Ni ñaka ja ngübarebiti ngwane, kukwe metre ye jatai nemen nie bätärekä bätärekä. Ni kädekata Daniel * nämäne ja näkwite videojuegobätä yebätä ani blite. “Kä nämä kräjätä tibiti ti jataba ja denkä videojuegobätä” nieta kwe. “Kenanbe ti ñan nämä ja denkä jondron kämebätä akwa bätärekä bätärekä jadaka känti ja nuainta tare aune kukwe chokakwe mikata tuare yebätä ti jataba jadenkä mada”. Biti Daniel  jatani jadenkä ora kräjäbiti krärike köbö kwatire kwatire mada. Daniel tä niere: “Jadakabätä ti nämä jadenkä aune ti nämä kä denkä krubäte jai ja näkwitakärebätä ye jataba ti denkä mento Jehovabätä nämä gare metre tie. Akwa ti brukwä namanina ribi krubäte, yebätä ti ñan nämä kukwe ja jie ngwankäre Bibliabätä ye mike tuin ngwarbe jai ti nämä nütüre”. Kukwe ne tä mike gare nie ni ñaka ja ngübabiti ngwane, ja näkwita raba ni denkä bätärekä bätärekä kukwe metre yebätä. Ye erere rabai bare nibätä ngwane, kukwe metre ütiäte biani Jehovakwe nie ye riaite nikän.

9. 1 Timoteo 1:18, 19 tä niere erere, ¿Pablokwe Timoteo ketani drebätä?

⁹ (Ñäkädre 1 Timoteo 1:18, 19 yebätä). * Timoteo ja ngwandre ni rükä kwrere Pablokwe niebare ie aune rüdre kwin kwe jankunu niebare kwe ie arato. Akwa Pablo ñan nämäne blite rüdre metre yebätä, ñakare aune Timoteokwe rüdre kukwe ja üairebiti meden gäräbare kwe. ¿Ñobätä ni kristiano ketata ni rükä tä rüre yebe? ¿Ni rükä Kristokwe käkwe ja ngwandre ño? Pablokwe Timoteo ketani ni rükä yebätä ye tä kukwe ketarike driere nie, ye nikwe nuaindre kukwe metre ye ketatekäre dime. Meden meden ye ani mike gare jai.

10. ¿Ni raba nüne ño Ngöbö kräke aune ye ñobätä ütiäte?

¹⁰ Ngöbö aibe kräke nünandre. Ni rükä kwin tä ja ngwen metre. Tä ja di ngwen krubäte nire tareta kwe o jondron meden ütiäte kräke ye kriemikakäre. Timoteo rabadre nüne Ngöbö kräke Pablokwe niebare ie, ye abokän rabadre Ngöbö tarere aune ja ngwen metre ie meden gäräbare kwe (1 Tim. 4:7). Nikwe Ngöbö taredi aune ja ngwain metre bäri ie ngwane, bäri ni ñan törbai kukwe metre ye tuenmetre (1 Tim. 4:8-10; 6:6).

11. ¿Ñobätä nikwe ja gobraindre?

¹¹ Nikwe ja gobraindre kukwe metre nuainkäre. Sribi meden mikani ni rükä kisete törbadre mikai nemen bare ngwane rabadre ja gobraine. Sribi mikani Timoteo kisete ni rükä Kristokwe erere ye mikani nemen bare kwe. ¿Ye nuainbare ño kwe? Ñan ja töi mikani kwe kukwe käme jiebiti, ñakare aune ja töi ükaninte kwin kwe ni kristiano erere aune ja ketabare kwe ja mräkätre ben nuain mananbare Pablokwe ie ye erere (2 Tim. 2:22). Yekäre rabadre ja gobraine. Aune ni ñan törbadre ja töi mikai kukwe käme jiebiti ngwane, nikwe ye erere nuaindre arato (Rom. 7:21-25). Ne madakäre, nikwe dängutu ngututu ye tikadrete jabätä aune ni törbadre dängutu bitin kitai jankunu jabätä yekäre nikwe ja gobraindre (Efes. 4:22, 24). Aune nita sribire jume dekä nükebe dere ye täbiti nita nemen dräre krubäte ye ngwane bäri nikwe ja di ngwandre rikakäre gätäbätä (Heb. 10:24, 25).

12. ¿Nikwe dre dre nuaindre dirikäre kwin Bibliabiti?

¹² Ni rükä törbadre rüdi kwin yekäre rabadre jondron rükäre yebiti ja kite käre. Ye erere ni kristiano rabadre ja kite kwin dirikäre Bibliabiti (2 Tim. 2:15). Nikwe diridre ño kwinbiti ye ruäre drieta nie gätäte. Akwa kukwe metre raba nitre mada dimike ye rükadre gare ietre ie ni törbadre ngwane käre nikwe ja kitadre kwin Biblia yebätä. Nikwe tödeka nikwe mikadre dite Bibliabiti, akwa ñan ñäkädre jerekäbebätä, ñakare aune nikwe töbikadretaribätä aune kukwebätä nita ñäke ye dre gärätä ye nikwe känändre täräkwatabätä mikakäre gare kwin jai aune mikakäre gare kwin nitre madai (1 Tim. 4:13-15). Ye käkwe ni mikai juto dirikäre ni madai Bibliabiti. Akwa ni ñaka tö ñäkäbätä textobätä jerekäbe  ietre, ñakare aune ni tö dimikai texto ye mike nüke gare jai aune ñobätä mikadre täte kwe ye ni tö driebätä ietre. Ye medenbätä, nikwe ja tötikai käre Bibliabätä ngwane ni rabai ni dirikä kwin (2 Tim. 3:16, 17).

13. Hebreos 5:14 tä niere erere, ¿ñobätä nikwe ja töi tötikadre kukwe meden ni raba kain ngäbiti aune meden ni ñaka rabadre kain ngäbiti ye kräke?

¹³ Ja töi tötikadre kukwe meden kwin aune kukwe meden käme ye mikakäre gare jai. Ni rükä rabadre kukwe tare ye gain jötrö aune ngitiebätä. Ni kristiano rabadre ye erere nuainne arato. Kukwe meden tare nikrä ye nikwe gadre jötrö aune ni gitiadrebätä (Prov. 22:3; ñäkädre Hebreos 5:14 yebätä). Ñodre, drebätä nikwe ja näkwitadre ye nikwe diandre kwin jai. Bäsi käre televisionte aune película yete nitre tä nemen kämekäme jabe mikata tuare. Ni kristiano ñan tä ja näkwite jondron ye kwrerebiti ñobätä ñan aune Ngöbö tareta nikwe ye raba kite nekä nikän bätärekä bätärekä. Nitre tä nemen kämekäme jabe ye ñaka tä kukwe tare nuainne ja aibebätä, ñakare aune tä kukwe tare nuainne ni madabätä aune kukwe ye kräke Jehová brukwä ye gare nie (Efes. 5:5, 6).

14. ¿Daniel ja töi tötikani kukwe tare ye gakäre jötrö ye käkwe dimikani ño?

¹⁴ Daniel, kädininte párrafo 8 yekänti yebätä ani bliteta. Ja näkwitadre videojuego känti ja nuainta tare aune kukwe chokakwe mikata tuare ye ñaka kwin nükani gare ie. Nämäne ja näkwite krubäte videojuego yebätä aune tuametrekäre kukwe känänbare kwe Watchtower Library yebätä. ¿Ye köböire dre namani bare? Videojuego käme krubäte niara kräke ye tuanimetre kwe aune jadaka muko ben nämäne ja kete ye tuanimetre kwe arato. Daniel tä niere: “Ti ñan namanina jadenkä videojuego yebätä, ñakare aune ye täte ti nämäne kä denkä jai jondron mada nuainkäre aune ja ketakäre ja mräkätre konkrekasionte ben”. Nengwane Daniel tä sribi prekursor nuainne aune ji ngwen konkrekasionte.

15. ¿Kukwe ngwarbe drieta ye ñobätä raba kukwe tare mike nemen bare nibätä?

¹⁵ Ne madakäre, nitre apóstata tä kukwe ngwarbe driere ye raba kukwe tare mike nemen bare nibätä ye tädre gare nie Timoteo erere (1 Tim. 4:1, 7; 2 Tim. 2:16). Ñodre, nitre apóstata raba kukwe ngwarbe niere ja mräkätrebätä aune raba kukwe niere ni mikakäre ñaka tö ngwen juta Jehovakwe ie. Kukwe ngwarbe drieta kwetre ye raba tödeka nikwe ngwen di nekä. Nitre apóstata ye töi käme aune kukwe metre ñaka tä kwetre, yebätä tö ni tuabätä  ngüdrärekä jabe aune ñäke ie ja dokwäre, aisete nikwe ñaka ja ngökamana ietre (1 Tim. 6:4, 5). Kukwe ngwarbe drieta kwetre ie nikwe tö ngwandre aune ñaka tö ngwandre ja mräkätre ie ie niaratre tö.

16. ¿Kukwe meden ie nikwe ñaka ja näkwita manandre?

¹⁶ Ja töi mikadre kwatibe kukwe ja üairebätä. Timoteo törbadre ja tuai ni rükä kwin Kristokwe ngwane, rabadre ja töi mike kwatibe kukwe driebätä aune ñaka jondron kä nebätä aune kukwe mada ie ja näkwitamana (2 Tim. 2:3, 4). Ni törbadre ja tuabätä jondron bökäne krubäte ye ie nikwe ñaka ja ganainmana Timoteo erere. Jondron kä nebätä känänta jankunu ye köböite ni ñaka raba kite Jehová tarere, debe bien Biblia yebätä aune ñaka kukwe kwin ye mike gare nitre madai (Mat. 13:22). Nikwe nünandre jondron braibebiti aune kä tä nie bätä ni die yebiti nikwe Gobran Ngöbökwe ye känändre jankunu käne (Mat. 6:22-25, 33, TNM).

17, 18. ¿Ni raba dre dre nuainne ja kriemikakäre kukwe ja üairebiti?

¹⁷ Nikwe dre nuaindi tädre gare biarebe nie. Ni rükä ye rüe rakadrekä ngwane, dre nuaindre kwe yebätä töbikadre käne kwe. Kukwe metre ütiäte Jehovakwe biani nie ye ni tö kriemikabätä ngwane, ni rüe rakadrekä ngwane nikwe dre nuaindi yebätä töbikadre käne. ¿Dre käkwe ni dimikai ja mike juto? Kukwe ño ben nikwe ja tuadre ye ngwane nikwe dre nuaindi ye ükadrete käne jai.

¹⁸ Ñodre, töbike ni iti törbadre kri dati nötai tibien yebätä. ¿Drebätä töbikadre kwe käne? Kri jatadre nötökä ngwane medente gitiadreta kwe ye mikadre gare kwe jai. Ye erere arato, ni tädre televisión aune película mrusaire o ni tädre Internet yete, ye ngwane nitre apóstata tädre kukwe mike gare, nitre tä nemen kämekäme jabe o ja nuainta tare ye bämikadre tuare. Nikwe dre nuaindi “gitiakäre” yebätä nikwe töbikadre käne. Ni täi juto kukwe ye kräke ngwane, jötrö ngwarbe ni gitiai kukwe yebätä ja kriemikakäre kukwe ja üairebiti ne kwe ni tädre kwin Jehová okwäkänti (Sal. 101:3; 1 Tim. 4:12).

19. Jondron ütiäte biani nie Jehovakwe ye nikwe ngübai kwin ngwane, ¿dre kwin rabai nikwe?

¹⁹ Jondron ütiäte biani Jehovakwe nie ye ni kristiano rabadre ngübare kwin. Jondron ütiäte ye abokän kukwe metre Bibliabätä aune driedre nitre madai. Nikwe ye erere nuaindi ngwane, ni töi täi jäme, nikwe nünain kwin aune kä täi juto nibätä nikwe nitre mada dimikani Jehová mike gare jai yebätä. Jehová diebiti jondron ütiäte biani kwe nie ye nikwe ngübai kwin (1 Tim. 6:12, 19).