1-2. Timoteo Ginigunana 6:20 ena hereva hegeregerena, Timoteo be dahaka hahenamo ia abia?

NEGA momo iseda dava bada gaudia be ma haida dekenai ita henia, idia naria totona. Hegeregere, reana iseda moni be banika dekenai ita atoa. Unai bamona ita karaia neganai, ita diba iseda moni be do ia boio lasi eiava do idia henaoa lasi. Unai dala amo, ma ta dekenai dava bada gauna ta ita henia ena anina ita lalopararalaia.

² Timoteo Ginigunana 6:20 duahia. Aposetolo Paulo ese Timoteo ia hamaoroa ia be Dirava ena ura taunimanima totona ia diba vadaeni, bona unai be dava bada gauna. Danu, Timoteo be “Dirava ena hereva do [ia] harorolaia” bona “evanelia tauna ena gaukara” ena hahenamo ia abia. (2 Tim. 4:2, 5) Paulo ese Timoteo ia hagoadaia ia abia dava bada gaudia ia naria namonamo totona. Timoteo hegeregerena, Dirava be ita dekenai dava bada gaudia ia henia. Unai gaudia be dahaka? Bona dahaka dainai Iehova ese ita dekenai ia henia dava bada gaudia ita naria namonamo be gau badana?

3-4. Dahaka badina haida dainai Baibel ena hereva momokanidia be mai anina bada?

³ Iehova ese iena Hereva, Baibel, ai idia noho hereva momokani be ita dekenai ia henia. Unai hereva momokanidia be dava bada gaudia, badina ita dekenai Iehova tura henia dalana ia hadibaia bona moale korikori ita davaria dalana ia herevalaia. Unai hereva momokanidia ita abia dae bona ita badinaia neganai, tomadiho koikoi edia hahediba herevadia amo ita do ia ruhaia bona mauri namona do ita noholaia.​—1 Kor. 6:9-11.

⁴ Baibel ai idia noho hereva momokani be dava bada gaudia ena badina ma ta be, Iehova ese idia manau “kudou-maoro taudia”  sibona dekenai ia hahedinaraia. (Kara 13:48) Manau taudia idia abia dae, hesiai tauna mai ena kamonai bona mai ena kara maoromaoro ese hari inai negai Baibel amo ita idia hadibaia. (Mat. 11:25; 24:45) Ita ese heduru ita abia dainai, unai hereva momokanidia ita lalopararalaia diba bona unai be hahenamo ta.​—Aon. 3:13, 15.

5. Iehova ese ita dekenai dahaka hahenamo ia henia?

⁵ Iehova ese ita dekenai ia henia hahenamo ma ta be, ma haida dekenai iena sivarai bona iena ura ita hadibaia. (Mat. 24:14) Ita harorolaia sivaraina be mai anina bada, badina taunimanima ia durua Iehova ena ruma bese lalonai idia vareai bona dala ia kehoa mauri hanaihanai idia abia totona. (1 Tim. 4:16) Ena be nega bada eiava nega sisina sibona ita haroro, to inai nega lalonai unai mai anina bada gaukarana ita durua noho. (1 Tim. 2:3, 4) Dirava ida ita gaukara hebou be hahenamo badana!​—1 Kor. 3:9.

6. Edia hahenamo idia laloa bada lasi taudia dekenai dahaka ia vara?

⁶ Timoteo ena negai, Keristani taudia haida ese Dirava ida idia gaukara hebou ena hahenamo idia laloa bada lasi. Dema be inai tanobada gaudia ia ura henia bada dainai, Paulo ida idia karaia gaukara ia rakatania. (2 Tim. 4:10) Fugelo bona Heremogene be idia gari dainai edia hesiai gaukara idia rakatania, badina idia laloa Paulo ese ia davaria dagedage karana do idia davaria danu. (2 Tim. 1:15) Humenaio, Alesana bona Pileto be aposteit ai idia lao bona Iehova tomadiho henia karana idia hadokoa. (1 Tim. 1:19, 20; 2 Tim. 2:16-18) Guna unai taudia be Iehova idia lalokau henia, to gabeai Dirava ese idia dekenai ia henia dava bada gaudia idia laloa maragi.

7. Satani be dahaka ia karaia ita ia tarapua totona?

⁷ Edena dala ai Satani ese ita ia tohoa, unai amo Iehova ia henia dava bada gaudia ita laloa bada lasi? Mani Satani ena tarapu haida ita herevalaia. Ia ese TV, muvi, Intanet, niuspepa, buka bona magasin amo ia halasia gaudia ia gaukaralaia, iseda lalohadai bona kara ia biagua totona, unai amo metairametaira Iehova lalokau henia karana do ita rakatania, eiava ena taravatu do ita badinaia lasi. Ia ese taunimanima edia hagaria herevadia eiava dagedage karadia ia gaukaralaia ita ia hagaria totona, unai amo haroro gaukara ita hadokoa. Bona ia ura iseda lalona ia veria aposteit taudia ese “hereva momokani idia hakoikoia herevadia” ita kamonai, bena hereva momokani ita rakatania.​—1 Tim. 6:20, 21.

8. Tadikaka Daniel ena ekspiriens amo dahaka oi dibaia?

⁸ Bema ita naria namonamo lasi, metairametaira hereva momokani ita rakatania diba. Mani tadikaka Daniel * ena ekspiriens ita laloa.  Ia be vidio gadara ia ura henia bada, bona ia gwau: “Egu mauri lagani be 10 bamona neganai, vidio gadara lau matamaia. Matamanai, vidio gadara namodia lau gadaralaia. To, metairametaira lau ese dagedage bona babalau vidio lau gadaralaia.” Gabeai, Daniel be dina ta ta ai hora 15 lalonai vidio gadara ia gadaralaia. Ma ia gwau: “Lau laloparara vidio gadara totona lau gaukaralaia nega ese metairametaira egu hetura karana Iehova ida ia hadikaia. To, lau laloa Baibel ena hakaua herevadia lau badinaia be anina lasi.” Oibe, bema ita naria namonamo lasi, moale karadia ese karaharaga hereva momokani dogoatao auka karana ia hadikaia diba. Bema unai ia vara, Iehova ese ita dekenai ia henia dava bada gaudia ita haboioa diba.

9. Timoteo Ginigunana 1:18, 19 ena hereva bamona, Paulo ese Timoteo be daika ida ia hahegeregerea?

⁹ Timoteo Ginigunana 1:18, 19 duahia. Paulo ese Timoteo be soldia ta ida ia hahegeregerea, bona ia hagoadaia “tuari namona lalonai do [ia] tuari noho” totona. Paulo be soldia korikoridia tuari henia karana ia herevalaia lasi. Edena dala ai Keristani taudia be idia tuari soldia bamona? Ita be Keriso ena soldia dainai, edena kara ita hahedinaraia be namo? Paulo ena haheitalai amo gau faiv do ita dibaia, unai gaudia ese ita do idia durua hereva momokani ita dogoatao auka totona.

10. Dahaka dainai Dirava badinaia karana ita hahedinaraia be namo?

¹⁰ Dirava badinaia karana hahedinaraia. Soldia namona be badinaia karana ia hahedinaraia. Ia be do ia tuari goadagoada ia lalokau henia tauna eiava ia laloa bada gauna ta ia gimaia totona. Paulo ese Timoteo ia hagoadaia Dirava badinaia karana ia laloa bada totona. (1 Tim. 4:7) Dirava ita lalokau henia bada bona ita badinaia neganai, hereva momokani do ita dogoatao auka.​—⁠1 Tim. 4:8-10; 6:6.

11. Dahaka dainai sibona ita biagua be namo?

¹¹ Kara maorona karaia totona sibona oi biagua. Namona be soldia tauna ia gaukara goada, bema ia ura tuari lalonai ia kwalimu. Timoteo be Satani ena hahetoho ia hanaia diba, badina ia ese Paulo ena sisiba ia badinaia bona ura dikadia ia dadaraia, kara namodia ia hahedinaraia, bona Keristani tadikaka taihu ia bamodia. (2 Tim. 2:22) Timoteo be unai ia karaia totona sibona ia biagua be namo. Tauanina ena ura dikadia ita dadaraia totona sibona ita biagua be namo. (Roma 7:21-25) Danu, kara gunadia ita kokia bona kara namodia ita hahedinaraia noho totona, sibona ita biagua be namo. (Efe. 4:22, 24) Dina ia ore bona ita karaia gaukara idauidau dainai ita hesiku neganai, namona be sibona ita doria hebou ita lao totona.​—Heb. 10:24, 25.

12. Edena dala ai Baibel ita gaukaralaia dalana ita hanamoa diba?

¹² Soldia ese ena tuari kohudia ia gaukaralaia namonamo bona ia manada totona, namona be hanaihanai ia praktis. Unai hegeregerena, Baibel gaukaralaia dalana ita manadalaia be namo. (2 Tim. 2:15) Iseda hebou dekenai unai dala haida do ita dibaia. To, bema ita ura ma haida dekenai ita hahedinaraia Baibel ena hereva momokani ese idia ia durua diba, namona be dina ta ta ai Baibel ita stadilaia. Namona be Baibel ita gaukaralaia iseda abidadama ita hagoadaia totona. Baibel ita duahia sibona be hegeregere lasi. To, ita duahia gaudia ita laloa dobu, bona iseda pablikeisen dekenai tahua gaukara ita karaia, unai amo Baibel do ita lalopararalaia namonamo bona iseda mauri ai ita badinaia. (1 Tim. 4:13-15) Bena, Baibel ita gaukaralaia diba ma haida ita durua totona. Ma haida dekenai Baibel ena siri ta ita duahia sibona be hegeregere lasi. Ita ura kamonai taudia  ita durua siri idia lalopararalaia bona idia ia durua dalana idia diba. Hanaihanai sibona iseda Baibel stadi sediual ita badinaia neganai, Baibel amo ma haida ita durua diba dalana do ita hanamoa.​—2 Tim. 3:16, 17.

13. Aonega Herevadia 22:3 ena hereva bamona, dahaka dainai aonega ita gaukaralaia be namo?

¹³ Aonega oi gaukaralaia. Soldia ese do ia vara dika ia lalohadailaia bona ia dadaraia be namo. Unai hegeregerena, namona be do idia vara dika ita lalohadailaia guna, bona kara ta ita karaia unai dika ita dadaraia totona. (Aonega Herevadia 22:3 duahia; Heb. 5:14.) Hegeregere, moale karadia ita abia hidi neganai, namona be aonega ita gaukaralaia. Nega momo televisen bona muvi dekenai matabodaga karadia idia hahedinaraia. Unai bamona moale karana ita dadaraia badina metairametaira iseda lalokau Iehova totona ia hadikaia diba. Ita diba Iehova be matabodaga karana ia inai henia bona matabodaga taudia be idia sibona bona haida dekenai dika idia havaraia.​—Efe. 5:5, 6.

14. Edena dala ai aonega karana ese Daniel ia durua?

¹⁴ Tadikaka Daniel be gabeai ia laloparara ia gadaralaia dagedage bona babalau vidio gadara be hekwakwanai badana ta. Ia be Watchtower Library ai tahua gaukara ia karaia unai hekwakwanai ia hamaoromaoroa totona. Unai ese ia durua, a? Oibe, vidio gadara dikadia gadaralaia karana ia hadokoa. Intanet amo ia gadaralaia vidio gadara ia rakatania bona idia gadara hebou taudia ia bamoa lou lasi. Daniel ia gwau: “Hari vidio gadara lau rakatania, bona murimuri dekenai moale karadia lau karaia eiava kongrigeisen turadia lau bamoa.” Hari Daniel be painia gaukara ia karaia bona ia be elda ta.

15. Dahaka dainai koikoi herevadia ita dadaraia be namo?

¹⁵ Timoteo bamona, aposteit taudia edia koikoi herevadia dainai do ita naria namonamo. (1 Tim. 4:1, 7; 2 Tim. 2:16) Hegeregere, iseda tadikaka taihu idia gwauraia koikoi eiava Iehova ena orea idia gwauraia dika badina idia ura ita dekenai daradara idia havaraia. Unai bamona koikoi herevadia ese iseda abidadama idia hadikaia diba. Namona be unai bamona lalohadai koikoidia ita dadaraia. Dahaka dainai? Badina unai bamona sivarai be “edia lalohadai ia gageva bona hereva momokani idia laloa lasi taudia” ese idia halasia. Idia ura “hepapahuahu” idia hamatamaia. (1 Tim. 6:4, 5) Idia ura edia koikoi herevadia ita abia dae bona iseda tadikaka taihu ita lalodia kerere.

16. Dahaka gaudia ita dadaraia be namo?

 ¹⁶ Lalona veria gaudia dadaraia. Timoteo be “Keriso Iesu ena tuari tauna namona” dainai, haroro gaukara ia laloa bada, bona moni gaukara eiava kohu momo tahua karana ia dadaraia. (2 Tim. 2:3, 4) Timoteo bamona, ita ura lasi kohu momo ura henia karana ese iseda hesiai gaukara ia hadikaia. “Taga ena koikoi siahuna” ese iseda lalokau Iehova totona, Baibel ita laloa bada karana, bona ma haida dekenai ita harorolaia dalana ia hadikaia diba. (Mat. 13:22) Namona be kohu momo lasi maurina ita noholaia, bona iseda nega bona goada ita gaukaralaia “Dirava ena Basileia . . . [ita] tahua guna” totona.​—Mat. 6:22-25, 33.

17-18. Dahaka ita karaia diba iseda hetura karana Iehova ida ita gimaia totona?

¹⁷ Oi hegaegae gau ta oi karaia haraga totona. Soldia be sibona ia gimaia totona, namona be palani ia karaia guna. Bema ita ura Iehova ese ita dekenai ia henia gaudia ita gimaia, namona be hekwakwanai ia vara neganai, kara ta do ita karaia haraga. Dahaka ese ita do ia durua unai ita karaia haraga totona? Namona be palani ita karaia guna dahaka do ita karaia bema hekwakwanai idia vara.

¹⁸ Mani inai oi laloa, taunimanima be peleini lalonai idia helai bona peleini ia do roho lasi neganai, gaukara tauna ese idia badinai ia noho iduara bona heduru gaudia ma haida ia hadibadia. Dahaka dainai? Badina bema hekwakwanai ta ia vara, idia be karaharaga unai iduara amo idia roho bona idia mauri diba. Unai hegeregerena, ita “roho” ena palani ta ita karaia be namo, unai amo bema Intanet ita gaukaralaia, eiava muvi o TV program ta ita itaia noho lalonai matabodaga laulaudia, dagedage karadia, eiava aposteit taudia edia hereva idia hedinarai, do ita diba dahaka do ita karaia. Bema do idia vara gaudia totona ita hegaegae, ita be karaharaga iseda hetura karana Iehova ida do ita gimaia bona ena vairanai do ita goeva noho.​—Sal. 101:3; 1 Tim. 4:12.

19. Dahaka hahenamo do ita abia bema Iehova ese ita dekenai ia henia dava bada gaudia ita naria namonamo?

¹⁹ Namona be Iehova ese ita dekenai ia henia dava bada gaudia ita naria namonamo, idia be Baibel ena hereva momokanidia bona ma haida dekenai unai gaudia ita hadibaia ena hahenamo. Unai bamona ita karaia neganai, iseda lalomamina do ia goeva, iseda mauri do ia namo, bona haida ita durua Iehova idia dibaia karana do ita moalelaia. Iehova ena heduru amo ita dekenai ia henia gaudia ita naria namonamo diba.​—1 Tim. 6:12, 19.