1-2. Otja ku 1 Timoteus 6:20, ovikwaye Timoteus mbyaa sokutjita?

EṰE potuingi tu tjeverisa oviṋa vyetu ovinanḓengu ku varwe. Otjotjihorera, eṱe mape ya atu pwike ovimariva vyetu mombaanga. Indu tji twa tjiti nao, tu undjira ko kutja ovimariva vyetu vi ri mondjeverero nu kamaa vi vakwa. Kunao tu tjiwa nawa kutja okuṱizisa omundu oviṋa mbi tu vara kutja ovinanḓengu ku heya tjike.

² Lesa 1 Timoteus 6:20. Omuapostele Paulus wa zemburukisa Timoteus kutja eye wa muna ondjiviro yatjiri ohunga nondando ya Mukuru kovandu, tji tji ri otjiṋa otjihuze. Jehova wina wa yandja otjiungura otjinanḓengu ku Timoteus ‘tjokuzuvarisa Ombuze’ nu ma ‘ungure oviungura vye otja omuzuvarise wOmbuze Ombwa.’ (2 Tim. 4:2, 5) Paulus wa tunduuza Timoteus okuṱakamisa oviṋa mbya pewa. Tjimuna Timoteus eṱe wina twa pewa oviṋa ovinanḓengu. Oviṋa viṋe mbyo? Ongwaye tji matu sokuṱakamisa oviṋa Jehova mbya yandja kweṱe?

3-4. Ongwaye ouatjiri wOmbeibela tji u ri ounanḓengu?

³ Jehova we tupa ouatjiri mbu ri mEmbo re Ombeibela. Ouatjiri mbwo ounanḓengu mena rokutja u tu honga okukara noupanga ouwa kuna Jehova nu u tu raera kutja ovikwaye mbi yeta ouṋingandu mehupo. Indu tji twa yakura ouatjiri mbwo nokuhupa otja komirari vyOmbeibela, eṱe tu kuturwa komahongero woposyo nu tu yenena okuhupa momuano omukohoke.—1 Kor. 6:9-11.

⁴ Epu rarwe ouatjiri wOmbeibela tji u ri ounanḓengu omena rokutja Jehova u tjiukisa ku imba overisusuparise uriri mbe nomitima omiwa poo mba ‘toororwa.’ (Oviung.13:48) Ovandu overisusuparise  ve yakura kutja omukarere omuṱakame nomunazondunge ongu tu honga ouatjiri wOmbeibela moruveze ndwi. (Mat. 11:25; 24:45) Eṱe kamaatu yenene okurihonga ouatjiri mbwo kourike wetu, nu kape notjiṋa tjarwe otjinanḓengu okukapita ouatjiri mbwo.—Omiano 3:13, 15.

5. Omerizirira yeṋe yarwe Jehova nge tupa?

⁵ Jehova wina we tupa omerizirira wokuhonga varwe ouatjiri ohunga naye nondando ye kovandu. (Mat. 24:14) Ombuze ya Jehova ndji tu zuvarisa onanḓengu tjinene mena rokutja i vatera ovandu okurira orupa rweṱunḓu rwe nu i tjita kutja ve kamune omuinyo wa aruhe. (1 Tim. 4:16) Kainatja kutja tu zuvarisa tjinene poo kaṱiṱi, eṱe tu vatera notjiungura otjinanḓengu tji tji ungurwa moruveze ndwi. (1 Tim. 2:3, 4) Tjiri ondjingonekero yapeke okurira omuungure wa pamwe na Mukuru.—1 Kor. 3:9.

6. Pa tjitwa tjike kovandu mbe hina va ṱakamisa oviṋa Jehova mbye vepa?

⁶ Moruveze rwa Timoteus, Ovakriste tjiva kaave raisa ondangi kondjingonekero yokurira ovaungure va pamwe na Mukuru. Demas wa isa okukarera puna Paulus mena rokutja wa yaruka okusuvera oviṋa vyouye mbwi. (2 Tim. 4:10) Pe munika tjimuna Figelus na Hermogenes va isa otjiungura tjokuzuvarisa mena rokutja aave tira okutatumisiwa tjimuna Paulus. (2 Tim. 1:15) Imeneus, Aleksander na Filetus va isa okurikotamena ku Jehova. (1 Tim. 1:19, 20; 2 Tim. 2:16-18) Ovandu avehe mbo va suverere Jehova, posi yokutja va uta okuripura kutja oviṋa Jehova mbye vepa kavi nanḓengu.

7. Omiano viṋe tjiva Satan mbye ungurisa okutupora ku Jehova?

⁷ Satan u kondja vi kutja tu ise oviṋa ovinanḓengu Jehova mbye tupa? Tara komiano tjiva mbye ungurisa. Eye u ungurisa oviṋa tjimuna ozotiivi, ozomuvi, otungovi, ozongoramambo nomambo warwe okutjita kutja tu ute okuripura nokuungura oviṋa momuano mu mau tjiti kutja tu ise okusuvera Jehova nokukara nonḓuviro komirari vye. Nu u kondja kutja tu ise okuzuvarisa mena rokutira omambo poo oṋiṋikizire okuza kovandu. Eye u kondja kutja tu puratene komambo wovandu mba isa okurikotamena ku Jehova ngu ve “hungira posyo ave tja: ‘Ondjiviro’”.—1 Tim. 6:20, 21.

8. Ove we rihongo tjike okuza kotjihorera tja Daniel?

⁸ Indu tji tu hi nokukengeza eṱe mape ya atu isa ouatjiri kouṱiṱiṱiṱi. Tara kotjihorera tja Daniel, * ngwa suverere okunyanda ouvidio games. Eye wa tja: “Ami mba uta okunyanda ouvidio games indu tji mba ri nozombura ape  omurongo. Rutenga omahore ngee nyanda ya ri omawa. Posi yokutja kouṱiṱiṱiṱi mba uta okunyanda omahore nga ri noutwe nu wozondemone.” Korusenina, eye aa nyanda ozovidio games oure wozoiri ape 15 eyuva arihe. Daniel wa tja: “Okuhungira owatjiri ami e tjiwa kutja ee nyanda omahore omavi ngaa ye kambura oruveze oruingi, nu ya tjita kutja mbi humburuke kokure na Jehova. Posi yokutja, mbe ri zuvisa omuini kutja hi nokuhepa okutjita imbi Ombeibela mbi i honga.” Kunao, indu tji tu hi nokukengeza omanyando mape ya aye tjiti kutja tu poke kouatjiri. Nu iho tji tja tjitwa, eṱe matu pandjara oviṋa ovinanḓengu Jehova mbye tupa.

9. Otja ku 1 Timoteus 1:18, 19, Paulus wa sasaneka Timoteus ku ye?

⁹ Lesa 1 Timoteus 1:18, 19. Paulus wa sasaneka Timoteus komurwe wovita nu we mu ningira kutja ‘marwe otjirwa otjiwa.’ Palus kaa hungire ohunga novandu mbu mave ru movita. Omomuano uṋe Ovakriste mu ve ri tjimuna ovarwe wovita motjirwa? Ovikaṋena viṋe mbi matu sokukara navyo otjovarwe va Kristus? Indjo tu tare komapu yetano ngu matu rihongo okuza komasasanekero wa Paulus. Omapu ngo maye tu vatere kutja tu ṱakamise ouatjiri.

10. Ouṱakame ku Mukuru otjikeṋa, nu ongwaye tji tu hepa okukara nouṱakame?

¹⁰ Rira omuṱakame. Omurwe wovita omuwa u rira omuṱakame. Eye u rwa nomasa mena rokuvanga okutjevera omundu ngwa suvera poo otjiṋa otjinanḓengu. Paulus wa tunduuza Timoteus kutja ma rire omuṱakame ku Mukuru. (1 Tim. 4:7) Indu orusuvero rwetu ku Mukuru tji maru kurire ko tu kara nonḓero yokuṱakamisa ouatjiri.—1 Tim. 4:8-10; 6:6.

11. Omena raye tji tu sokukondja nomasa?

¹¹ Kondja nomasa. Omurwe wovita ma sokuungura oukukutu kutja aruhe ma vazewe e rirongere kotjirwa. Timoteus wa yenena okunakaura omapopero wa Satana mena rokutja wa ungurisa erakiza ra Paulus nu wa ungura oukukutu okupirukira ozonḓuma ozombi, okukara novikaṋena oviwa nokukara pu novakambure ovakwao. (2 Tim. 2:22) Eye wa kondja nomasa kutja ma tjite oviṋa mbyo. Eṱe wina matu hepa okukondja nomasa kutja tu pirukire ozonḓuma zonyama. (Rom. 7:21-25) Kombanda yanao, matu sokukondja nomasa kutja tu hukure omundu omukuru nokurihwikika omundu omupe. (Ef. 4:22, 24) Nu indu tji twa urwa kombunda yeyuva ere, eṱe mape ya atu hepa okukondja nomasa kutja tu yende kozombongarero zombongo.—Hebr. 10:24, 25.

12. Omomiano viṋe mu matu yenene okurira ovahonge vOmbeibela ovawa?

¹² Omurwe wovita u hepa okurirongerisa okuungurisa oviumbe vye. Indu tji ma vanga okuungurisa oviumbe vye nawa, eye ma sokurirongerisa aruhe. Momuano otjingewo, matu sokutjiwa okuungurisa Embo ra Mukuru nawa. (2 Tim. 2:15) Pozombongarero zombongo tu rihonga okuungurisa Embo ra Mukuru nawa. Posi yokutja indu tji matu vanga okuvatera varwe okukambura kutja ouatjiri wOmbeibela ma u yenene okuvevatera, eṱe matu hepa okukonḓonona Ombeibela aruhe. Matu hepa okuungurisa Embo ra Mukuru okukurisa ongamburiro yetu. Ihi matji hee kutja katu sokulesa Ombeibela uriri. Nungwari matu sokuripurira ko oukoto koviṋa mbi matu lese nokutjita omakonḓononeno momambo wetu, kokutja tu zuve nokuṱakamisa Omatjangwa nawa. (1 Tim. 4:13-15) Indu tji twa tjiti nao otji matu yenene okuhonga varwe Embo ra Mukuru. Nu ihi ka tji hee kutja matu sokuvelesera  Ombeibela uriri. Tu vanga okuvatera ovandu mbu mave puratene kweṱe okuzuva omatjangwa nawa nokuyeṱakamisa. Kunao indu tji matu konḓonona Ombeibela aruhe, matu yenene okurira ovahonge vOmbeibela ovawa.—2 Tim. 3:16, 17.

13. Otja kOvaheberi 5:14, ongwaye tji twa sokukara nongengezero?

¹³ Kara nongengezero. Omurwe wovita u sokumuna oumba komurungu woruveze nokuuyepa. Eṱe wina matu sokumuna ozongoro nḓu mape ya aze tu hitisa moumba nokutjiwa kutja matu ze yepe vi. (Omiano 22:3; lesa Ovaheberi 5:14.) Otjotjihorera, matu hepa okutoorora oviṋa mbi tu kuturisa ouruvi nomanyando nongengezero. Ozotiivi potuingi ze nyanda ozomuvi nḓe handjaura ozongaro ozombi zomeritjindiro. Ovitjitwa otja imbyo vi pindikisa Mukuru nu vi tu yetera omihihamo nokuhihamisa varwe. Tu nakaura omanyando otja ingo mena rokutja ye tjita kutja oupanga wetu kuna Jehova u ngundipare kouṱiṱi.—Ef. 5:5, 6.

14. Ongengezero ya vatera vi Daniel?

¹⁴ Daniel ngwa tamunwa rukuru, wa uta okumuna kutja katjiṋa otjiwa okunyanda omanyando woutwe nowozondemone. Eye wa tjita omakonḓononeno mo-Watchtower Library okupaha oviṋa mbi mavi mu vatere okupirukira oviṋa ovivi. Hapo kwa kongorera tjike? Eye wa isa okunyanda omanyando omavi ngo. Daniel wa tja: “Pendje nokunyanda ozovidio games, ami mba uta okukara pu nomapanga wandje okuza mombongo.” Daniel nai u karera otjomukandjira nu omunene wombongo.

15. Ongwaye ozondjivisiro zovizeze tji ze ri ozonaumba?

¹⁵ Tjimuna Timoteus, eṱe wina matu sokumuna oumba mbu za mozondjivisiro nḓe handjaurwa i yovandu mba isa okukarera Jehova. (1 Tim. 4:1, 7; 2 Tim. 2:16) Otjotjihorera, owo mape ya ave handjaura ovizeze ohunga novakambure ovakwetu poo ave tjiti kutja atu ha kara nongamburiro motjira tja Jehova. Ondjivisiro otja indjo mape ya ai ngundiparisa ongamburiro yetu. Matu sokukengeza kutja atu ha kambura movizeze mbyo. Omena raye? Mena rokutja ozondjivisiro otja inḓo ze handjaurwa i ‘yovandu mba puruka ozondunge nu mbe ha tjiwa kutja ouatjiri otjikeṋa.’ Ondando yawo oyokuuta ‘ozombata nozondjakaha.’ (1 Tim. 6:4, 5) Owo  ve vanga kutja tu kambure movizeze vyawo nokutja atu ha kara nongamburiro movakambure ovakwetu.

16. Ovikwaye mbi matu sokunakaura?

¹⁶ Yandja ombango. Otja “omurwe omuṱakame wa Kristus Jesus,” Timoteus aa sokuyandja ombango kotjiungura tjokuzuvarisa pendje nokuyandja ombango komauini nozondando zarwe nḓa ri nazo mehupo. (2 Tim. 2:3, 4) Tjimuna Timoteus, katu sokunanukirwa i yokukara nomauini omengi. ‘Otjiwova tjoutumbe’ mape ya atji tjiti kutja atu ha suvere Jehova, atu ha raisa ondangi kEmbo re nu atu ha kara nonḓero yokuraera varwe ouatjiri wOmbeibela. (Mat. 13:22) Eṱe matu sokukara nehupo ndi hi noviṋa ovingi nokuungurisa oruveze nomasa wetu ‘okupaha ouhona wa Ndjambi’ rutenga.—Mat. 6:22-25, 33.

17-18. Ovikwaye mbi matu yenene okutjita okutjevera oupanga wetu kuna Jehova?

¹⁷ Rirongerisa nawa. Omurwe wovita u hepa okutjiwa kutja ma sokutjita vi okuritjevera omuini. Indu tji matu vanga okutjevera oviṋa Jehova mbye tupa, eṱe matu sokuhakahana okutoora omukambo indu tji twa munu oumba. Otjikwaye tji matji tu vatere okutjita nao? Matu sokutjiwa kutja matu tjiti vi indu tji twa munu oumba.

¹⁸ Otjotjihorera, indu tji uri potjitjitwa, ovandu potuingi ve ningirwa okupaha oruveze pu mave pitire ngunda oprograma ai hiya uta. Ongwaye? Kokutja ve yenene okupita tjimanga indu tji pa kara oumba. Momuano otjingewo, matu yenene okurirongerisa komurungu woruveze kutja matu tjiti vi indu tjitwa munu ozondjito zourunde, zoutwe poo ozondjivisiro nḓe pitisiwa i yovandu mba isa okurikotamena ku Jehova ngunda amatu ungurisa orungovi poo amatu tarere otiivi. Indu tji twe rirongerisa komurungu woruveze, eṱe matu yenene okutjevera oupanga wetu kuna Jehova nu atu rire ovakohoke komurungu we.—Eps. 101:3; 1 Tim. 4:12.

19. Ozondaya zeṋe nḓu matu munu indu tji twa ṱakamisa oviṋa ovinanḓengu Jehova mbye tupa?

¹⁹ Eṱe matu sokuṱakamisa oviṋa ovinanḓengu Jehova mbye tupa, mbu ri ouatjiri wOmbeibela nondjingonekero ndji tu nayo yokuhonga ouatjiri mbwo ku varwe. Indu tji twa tjiti nao, matu kara nomeritjiviro omawa womomutima, ehupo eṋingandu, nondjoroka ndji za mokuvatera varwe okutjiwa Jehova. Nombatero ye, matu yenene okuṱakamisa oviṋa mbye tupa.—1 Tim. 6:12, 19.