1-2. Nitihka 1 Timoti 6:20, nama utai ke udah diserahka ngagai Timoti?

KITAI seruran nyimpan utai ti berega dibaruh jaga orang bukai. Tu baka kitai ke nyimpan duit ba bank, lalu ngarapka duit nya disimpan enggau manah sereta enda dichuri.

² Bacha 1 Timoti 6:20. Rasul Paul ngingatka Timoti, iya udah nerima utai ti berega, iya nya penemu pasal tuju Petara ke mensia. Jehovah mega udah meri Timoti tanggung pengawa “nusui Jaku” sereta “nyadi penginjil.” (2 Tim. 4:2, 5) Paul meransang Timoti nyaga utai ke udah diserahka ngagai iya. Baka Timoti, kitai udah diberi tanggung pengawa nyaga utai ti berega. Nama utai nya? Lalu nama kebuah kitai patut nyaga utai ke udah diserahka Jehovah ngagai kitai?

3-4. Nama sekeda kebuah pemendar Bup Kudus nya berega?

³ Ketegal Jehovah manah ati, Iya meri kitai penemu pasal pemendar ba Bup Kudus. Pemendar tu dikumbai berega laban ngajar kitai chara bisi kaul ti manah enggau Jehovah sereta utai ke ulih ngelantangka pengidup. Lebuh kitai arapka pemendar tu lalu idup sejalai enggau ajar nya, kitai enda agi nyadi ulun ajar ti salah tauka pengawa ti enda menyana.—1 Kor. 6:9-11.

⁴ Siti agi kebuah pemendar ba Bup Kudus nya berega iya  nya, Jehovah semina mandangka nya ngagai orang ke baruh ati ti ngembuan ulah ti manah. (SKR. 13:48) Orang ke baruh ati nemu Jehovah ngena ulun ke tetap ati sereta bepenemu-dalam ngajar kitai pasal Bup Kudus kemayaharitu. (Mat. 11:25; 24:45) Kitai enda ulih meretika ajar Bup Kudus enti nadai tulung, lalu nadai utai ke berega agi ari ulih meretika Bup Kudus.—J-lam. 3:13, 15.

5. Nama utai bukai ti udah diserahka Jehovah ngagai kitai?

⁵ Jehovah mega udah meri kitai tanggung pengawa ngajar orang pemendar pasal Iya sereta tuju Iya. (Mat. 24:14) Pesan Jehovah ke ditusui kitai amat berega laban ulih nulung orang nyadi sebagi ari ruang bilik Jehovah sereta bulih pengidup ti meruan belama iya. (1 Tim. 4:16) Enda ngira enti kitai ulih mayuh nginjil tauka enda, semua kitai nyukung pengawa ke pemadu beguna tu ti benung dipejalaika kemayaharitu. (1 Tim. 2:3, 4) Endang basa ti besai ulih sama gawa enggau Petara!—1 Kor. 3:9.

6. Nama nyadi ngagai sekeda orang Kristian?

⁶ Ba jeman Timoti, sekeda menyadi Kristian enda ngemeratka peluang ulih sama gawa enggau Petara. Ketegal Demas rinduka utai ba dunya, iya badu gawa enggau Paul. (2 Tim. 4:10) Pigelus enggau Hemoginis mega badu nginjil ketegal takut napi pemerinsa baka Paul. (2 Tim. 1:15) Himinius, Aleksander, sereta Pilitus nyadi orang ke limpang ari pengarap lalu badu nyembah Jehovah. (1 Tim. 1:19, 20; 2 Tim. 2:16-18) Semua sida tu orang ti tegap ba pengarap, tang udah nya sida badu agi ngumbai utai ti diberi Jehovah nya berega.

7. Nama chara dikena Sitan ngambika kitai nitihka peneka iya?

⁷ Nama chara dikena Sitan ngambika kitai ngelengkaka utai ti udah diserahka Jehovah ngagai kitai? Peratika sekeda chara tu. Iya ngena pemerindang enggau berita meransang runding sereta ulah ti ngasuh kitai belubah-lubah ngelaban adat Jehovah. Sitan mega nekan kitai ngena bala serambau tauka pemerinsa ngambika kitai takut lalu badu nginjil. Iya mega nguji mai kitai ningaka orang ke limpang ari pengarap ‘bekelikuh pasal utai ti dikumbai sekeda orang “Penemu”’ ngambika kitai ninggalka pemendar.—1 Tim. 6:20, 21.

8. Nama ulih dipelajarka kitai ari peneleba Menyadi Daniel?

 ⁸ Enti kitai enda bejimat, kitai ulih belubah-lubah ninggalka pemendar. Peratika peneleba Menyadi Daniel, * ke rindu main video game. Ku iya: “Aku berengkah main video game lebuh beumur sepuluh taun. Terubah, aku main game ke biasa. Tang nyau kelama aku main video game ti kasar sereta bisi kuasa roh ti jai, lalu main kira-kira 15 jam ninting hari. Aku nemu bansa game ke dimain aku sereta penyampau jam ke dikena aku, ngasuh aku belubah-lubah lenyau kaul enggau Jehovah. Taja pia, aku madahka diri empu, jaku lalau Bup Kudus enda ngena ba aku.” Nya alai, enti kitai enda bejimat enggau pemerindang, kitai senang deka ngelengkaka pemendar. Enti tu nyadi, kitai deka lenyau utai ti berega ke udah diserahka Jehovah ngagai kitai.

9. Nitihka 1 Timoti 1:18, 19, Paul meransang Timoti ngereja nama?

⁹ Bacha 1 Timoti 1:18, 19. Paul nyemaka Timoti baka seiku soldadu. (2 Tim. 2:3) Lalu iya meransang Timoti “kering belaban.” Nama reti ku Paul? Paul ukai madahka perang ngelaban soldadu mensia. Nama kebuah orang Kristian ulih disemaka baka soldadu ke beperang? Nama kualiti ke patut dikemansangka kitai ti nyadi soldadu Kristus? Aram kitai bejuraika lima iti pekara ke ulih dipelajarka kitai ari sempama Paul. Tu ulih nulung kitai enda ngelengkaka pemendar.

10. Nama reti nangika Petara, lalu nama kebuah kitai patut ngembuan nya?

¹⁰ Nangika Petara. Soldadu ti manah nya, taluk. Iya bebendar nyaga orang ti dikesayauka iya, tauka nyaga utai ti berega ba iya. Paul meransang Timoti nangika Petara—iya nya, taluk ngagai Petara. (1 Tim. 4:7) Majak agi kitai rindu sereta nangika Petara, keran agi kitai deka bepegai ba pemendar.—1 Tim. 4:8-10; 6:6.

11. Nama kebuah kitai patut matih diri empu?

¹¹ Matih diri empu. Seiku soldadu patut matih diri ngambika seruran sedia beperang. Timoti ulih tegap ba pengarap laban iya nitihka jaku lalau Paul iya nya ngelaban pengingin ti salah, ngemansangka kualiti ti manah, sereta begulai enggau bala menyadi Kristian. (2 Tim. 2:22) Semua tu begunaka disiplin diri ngambika kitai ulih ngelaban pengingin ti salah. (Rom. 7:21-25) Kelimpah ari nya, kitai patut matih diri empu kena muai ulah ti lama lalu ngembuan kualiti ti manah. (Eps. 4:22, 24) Kitai mega enggau naka ulih datai begempuru taja pan berasai lelak.—Heb. 10:24, 25.

12. Baka ni kitai ulih majak landik ngena Bup Kudus?

¹² Seiku soldadu patut suah belatih ngena perengka perang iya ngambika ulih landik. Pia mega, kitai patut landik ngena Bup Kudus. (2 Tim. 2:15) Kitai ulih belajar sekeda chara nya ba gempuru. Tang enti kitai deka nulung orang pechayaka pemendar Bup Kudus nya utai ti berega, kitai empu patut seruran belajarka Bup Kudus. Kitai begunaka Bup Kudus kena ngeringka pengarap kitai. Reti nya kitai ukai semina macha aja. Kitai patut belemati lalu ngaga pansik ba litaricha ngambika bisi penemu ti betul lalu ngena ayat nya ba pengidup diri. (1 Tim. 4:13-15) Pengudah nya, kitai ulih ngena Bup Kudus ngajar orang bukai. Taja pia, kitai ukai semina macha ayat ngagai sida, tang kitai deka nulung sida meretika ayat ke dibacha sereta  baka ni ayat nya bisi kaul enggau sida. Nya alai, enti kitai suah belajarka Bup Kudus, kitai deka majak landik ngajar Bup Kudus.—2 Tim. 3:16, 17.

13. Nitihka Hebrew 5:14, nama ulih nulung kitai nemu berunding?

¹³ Nemu berunding. Seiku soldadu patut beratika utai ti tau nganu lalu nyeliahka nya. Kitai mega patut nemu utai ke ulih ngemediska kitai lalu nyeliahka nya. (J-lam. 22:3; bacha Hebrew 5:14.) Ambika chunto, kitai patut bejimat lebuh milih main enggau pemerindang. Cherita ba TV enggau wayang suah mandangka pengawa ti enda menuku. Ulah ke baka tu ulih ngemediska diri empu sereta orang bukai. Kitai nemu Petara begedika ulah tu. Ketegal nya, kitai nyeliahka sebarang pemerindang ti ulih belubah-lubah ngelemika pengerindu kitai ngagai Petara.—Eps. 5:5, 6.

14. Baka ni nemu berunding nulung Menyadi Daniel?

¹⁴ Menyadi Daniel ke disebut ba pun tadi nyau nemu video game ti mandangka ulah ti kasar sereta roh ti jai, ulih ngenusahka iya. Iya ngaga pansik ba Watchtower Library kena ngiga litaricha ti ulih nulung mutarka penanggul iya. Baka ni nya nulung iya? Iya badu main video game ti enda manah sereta enda agi begulai enggau orang ke sama main game. Ku Daniel madah: “Ari ke main video game, aku berengkah ngereja utai bukai tauka begulai enggau bala menyadi Kristian ari eklisia.” Diatu Daniel seiku pengerintis sereta tuai gempuru.

15. Nama kebuah penerang ti enda betul ulih ngenusahka?

¹⁵ Baka Timoti, kitai mega patut bejimat enggau penerang ti enda betul ke ditusui orang ti limpang ari Jehovah. (1 Tim. 4: 1, 7; 2 Tim. 2:16) Ambika chunto, sida engka madahka utai ti bula pasal bala menyadi Kristian tauka ngasuh kitai kakang ati enggau gerempung Jehovah. Penerang ke baka nya ulih ngelemika pengarap kitai. Anang meh pechayaka penerang ti enda betul nya! Nama kebuah? Laban penerang nya ditusui orang ti “jai runding, sereta nadai nemu pemendar.” Tuju sida nya ngepunka kelikuh  sereta betalat. (1 Tim. 6:4, 5) Sida deka kitai pechayaka pemula sida lalu badu agi arapka menyadi Kristian kitai.

16. Nama utai ke tau ngelimpangka kitai?

¹⁶ Nyeliahka utai ke tau ngelimpang. Ketegal Timoti “soldadu Jesus Kristus,” iya patut ngemeratka pengawa nginjil, ukai begigaka pengaya tauka ngenuluka juluk ati bukai ba pengidup iya. (2 Tim. 2:3, 4) Baka Timoti, kitai enggai dilimpangka pengingin deka ngembuan mayuh agi reta tengkira. “Pengangkun . . . ke pengaya” ulih ngelemika pengerindu kitai ke Jehovah, Bup Kudus, sereta pengeran kitai deka bekunsi enggau orang. (Mat. 13:22) Kitai patut idup enggau pengumbas iya lalu ngena awak sereta pengering kitai ‘ngiga dulu Perintah Petara.’—Mat. 6:22-25, 33.

17-18. Baka ni kitai ulih nyaga kaul enggau Jehovah?

¹⁷ Besedia. Seiku soldadu patut berunding dulu chara iya deka ngelindung diri empu. Pia mega, enti kitai deka nyaga utai ke udah diserahka Jehovah ngagai kitai, kitai patut enggau jampat nyeliahka diri lebuh meda utai ti tau nganu kitai. Nama ulih nulung kitai ngereja nya? Merambu enggau tumu utai ke deka digaga kitai sebedau napi siti-siti pekara.

¹⁸ Uji gambarka, sebedau bilun terebai, orang ke nepan bilun deka dipadahka ni alai pintu kena pansut. Nama kebuah? Ngambika sida ulih jampat pansut enti sema bilun bisi penanggul. Enggau chara ti sama, kitai ulih merambu dulu utai ke deka digaga enti tepedaka ulah ti enda menuku, pengawa ti kasar, tauka litaricha ke ditulis orang ti limpang ari Jehovah maya kitai ngena internet, meda cherita wayang tauka TV. Enti kitai besedia enggau tumu, kitai ulih nyaga kaul kitai enggau Jehovah lalu mengkang tuchi ba mata Iya.—Mas. 101:3; 1 Tim. 4:12.

19. Nama berekat ti deka diasaika kitai enti nyaga utai ti berega ke udah diserahka Jehovah ngagai kitai?

¹⁹ Kitai patut nyaga utai ti udah diserahka Jehovah ngagai kitai, iya nya pemendar Bup Kudus sereta peluang ulih ngajar orang. Lebuh ngereja nya, kitai deka ngembuan ati ti beresi, pengidup ti bisi tuju, sereta pengaga ati laban ulih nulung orang nemu pasal Jehovah. Enggau saup ari Jehovah, kitai ulih nyaga utai ti berega ke udah diserahka Iya ngagai kitai.—1 Tim. 6:12, 19.